یەکێتی جەختدەکاتەوە، بەبێ یەکێتیی نیشتمانیی کوردستان حکومەتی سەرکەوتوو پێکناهێندرێت، هەر حکومەتێکیش پێکبهێندرێت شکست دەهێنێت.

ئەمڕۆ بەسەرپەرشتی بافڵ جەلال تاڵەبانی سەرۆکی یەکێتیی نیشتمانی کوردستان، مەکتەبی سیاسی یەکێتی کۆبووەوە و تێیدا دواین پێشهاتەکانی پەیوەست بە هەرێمی کوردستان و عیراق تاوتوێکرا، لە دوای کۆبوونەوەکە کاروان گەزنەیی وتەبێژی یەکێتی لە کۆنفڕاسێکی رۆژنامەوانیدا رایگەیاند، سوپاسی متمانەی هاووڵاتیان دەکەین بە یەکێتیی نیشتمانیی کوردستان، هەروەها یەکێتی پاپەندی بەڵێنەکانیەتی بەرانبەر بە خەڵک.

وتیشی، یەکێتی دەرگای کراوەیە بۆ پێکهێنانی حکومەتێکی گشتگیر لە هەرێم و یەکێتی پێداگرە لەسەر داواکارییەکانی لەسەر پێکهێنانی حکومەت.

کاروان گەزنەیی ئەوەشی خستەڕوو، بە سەرۆکایەتی بافڵ تاڵەبانی، یەکێتی لە هەوڵەکانی بەردەوامە بۆ چارەسەکردنی تەواوی کێشەکان لە عیراق بە رێگەی گفتوگۆ و دانوستان، چونکە بەغداد قوڵایی ستراتیژی هەرێمی کوردستانە.

سەبارەت بە پۆستی سەرۆک کۆماری عیراق ئاماژەی بەوەکرد، پۆستی سەرۆک کۆمار پشکی کوردە، لەناو کوردیشدا پشکی یەکێتیی نیشتمانیی کوردستانە، بۆ ئەو پۆستەش کاندیدیان دەبێت.

وتەبێژی یەکێتی راشیگەیاند، وەکو یەکێتی ئامادەییان هەیە لەگەڵ لایەنەکانی دیکە بچنە بەغداد و لە رێگەی گفتوگۆوە، کێشەی موچە و بودجە چارەسەر بکەن، دەشڵێت، دەیانەوێت كورد لە بەغداد یەكدەنگ بێت.

"یەكێتی لە دووبارەكردنەوەی هەڵبژاردن ناترسێت، چونکە یەكێتی لە دوو هەڵبژاردن دەنگ  و كورسییەكانی زیادیكردووە"، کاروان گەزنەیی وا دەڵێت.

وەزارەتی نەوتی عیراق رایگەیاند، لە مانگی 10دا زیاتر لە پێنج ملیۆن بەرمیل نەوتی هەرێمی كوردستان لەرێگەی بەندەری جەیهانەوە فرۆشراوە.

وەزارەتی نەوتی عیراق راپۆرتی مانگانەی سەبارەت بە بڕی فرۆشراوی نەوت لە مانگی رابردوودا بڵاوكردەوە و لە داتاكەدا ئاماژە بە كۆی بری نەوتی فرۆشراو لە هەرێمی كوردستان و عیراق كراوە.

بەپێی داتاكەی وەزارەتی نەوت، لە مانگی 10دا 110 ملیۆن و 923 هەزار و 47 بەرمیل نەوت فرۆشراوە و كۆی داهاتەكەشی گەشتووەتە حەوت ملیار و 30 ملیۆن و 689 هەزار دۆلار.

وەزارەتەكە ئاماژەی بەوەشكردووە، لە مانگی 10دا پێنج ملیۆن و 834 هەزار و 864 بەرمیل نەوتی هەرێم لەرێگەی بەندەری جەیهانەوە فرۆشراوە كە دەكاتە رێژەی 5.26%ـی كۆی نەوتی فرۆشراو.

هەروەها، بەپێی ئەو رێژەیەش داهاتی نەوتی فرۆشراوی هەرێم تەنها لە مانگی 10دا زیاتر بووە لە 369 ملیۆن دۆلار.

قوباد تاڵەبانی، جێگری سەرۆک وەزیرانی هەرێم لەگەڵ ئەرمان تۆپجو، کونسوڵی گشتیی تورکیا لە هەرێم کۆبووەوە و جەختیان لە پەرەپێدانی پەیوەندییە بازرگانییەکان کردەوە.

لە کۆبوونەوەکەدا کە ئەمڕۆ سێشەممە بەڕێوەچوو، گفتوگۆ لەبارەی دۆخی سیاسیی هەرێمی کوردستان و عیراق و پەیوەندییەکانی نێوان هەولێر و ئەنکەرە کرا، هەردوولا هاوڕابوون لەسەر پێویستیی کاری هاوبەش بۆ بەهێزترکردنی پەیوەندییەکان بەتایبەت لە بواری بازرگانیدا.

تەوەرێکی دیکەی دیدارەکە تایبەت بوو بە پرۆسەی سیاسیی عیراق دوای هەڵبژاردنەکان، قوباد تاڵەبانی رایگەیاند، پێکهێنانی حکومەتێکی بەهێز کە مافەکانی هەموو پێکهاتەکان بپارێزێت، یارمەتیدەرە بۆ باشترکردنی دۆخی ئاسایش و سەقامگیریی عیراق.

جێگری سەرۆک وەزیران جەختی لەوەش کردەوە، دەبێت ئەولەوییەتی هەردوو حکومەتی داهاتووی عیراق و هەرێمی کوردستان، چارەسەرکردنی بنەڕەتیی کێشەکانی نێوانیان بێت.

وەزارەتی نەوتی عیراق رایگەیاند، کۆی هەناردەی نەوت لە مانگی تشرینی یەکەمی رابردوودا زیاتر لە 110 ملیۆن بەرمیل بووە و داهاتەکەشی حەوت ملیار دۆلاری تێپەڕاندووە.

بەپێی ئامارێکی کۆمپانیای بەبازاڕکردنی نەوتی عیراق "سۆمۆ" کە ئەمڕۆ سێشەممە بڵاوکراوەتەوە، کۆی گشتیی هەناردەی نەوتی خاو و چڕکراوە لە مانگی تشرینی یەکەمدا 110 ملیۆن و 923 هەزار و 47 بەرمیل بووە، کە داهاتەکەی گەیشتووەتە 7 ملیار و 30 ملیۆن و 689 هەزار دۆلار.

سەبارەت بە دابەشبوونی جوگرافیی هەناردەکە، وەزارەتەکە رونیکردوەتەوە:

• ناوەڕاست و باشوری عیراق: 104 ملیۆن و 816 هەزار و 106 بەرمیل هەناردە کراوە.

• هەرێمی کوردستان (لەرێگەی بەندەری جەیهان): 5 ملیۆن و 834 هەزار و 864 بەرمیل هەناردە کراوە.

• ئوردن: 272 هەزار و 77 بەرمیل هەناردە کراوە.

وەزارەتی نەوت جەختی لەوە کردووەتەوە کە بڵاوکردنەوەی ئەم ئامارانە مانگانە لەپێناو شەفافییەت و ئاگادارکردنەوەی ڕای گشتییە لە پرۆسەی بەبازاڕکردن و داهاتی نەوت.

وەزارەتی ژینگەی عیراق روونکردنەوەی لەبارەی ئەو کەشوهەوایە دا کە ئەمڕۆ بەغدادی پایتەختی گرتەوە و رایگەیاند، ئەوەی دەبینرێت دیاردەیەکی سروشتی و کاتییە کە پێی دەوترێت "تەمی دوکەڵاوی".

لوئەی موختار، وتەبێژی وەزارەتی ژینگە رایگەیاند، بەرزبوونەوەی رێژەی پیسبوون لە بەغداد پەیوەندی بە دەردانی گاز و دوکەڵەوە هەیە، کە بەهۆی دیاردەی "پێچەوانەبوونەوەی گەرمی"ـەوە لە چینی خوارەوەی بەرگەهەوادا دەمێننەوە و بەهۆی بەرزیی پلەی گەرمیی چینە بەرزەکانی هەواوە ناتوانن بڕۆن.

وتەبێژەکە ئاماژەی بەوەکردووە، شاری بەغداد چارەکێکی دانیشتووانی عیراق لەخۆدەگرێت و بەهۆی قەرەباڵغی و زۆریی ئۆتۆمبێل و موەلیدە و کارگەکانەوە چالاکییە پیسکەرەکانی زۆرە، لە دۆخی ئاساییدا هەست بەم پیسبوونە ناکرێت چونکە بڵاودەبێتەوە، بەڵام ساڵانە لەم وەرزەدا بەهۆی گۆڕانی پلەکانی گەرماوە کۆدەبێتەوە.

سەبارەت بەو بۆنەی لە هەوادا هەیە، لوئەی موختار رونی کردەوە کە ئەوە ئەنجامی کارلێکی دەرچوە گازە جیاوازەکانە لەگەڵ هەوادا و بەنزیکبوونەوە لە نیوەڕۆ کاریگەرییەکەی کەم دەبێتەوە. هاوکات تیمەکانی وەزارەت بەردەوامن لە چاودێریکردن و سزادانی سەرپێچیکاران.

وەزارەتی ژینگە داوا لە هاووڵاتیان دەکات، بەپێی راسپاردەکانی رێکخراوی تەندروستیی جیهانی، لەم کەشەدا خۆیان بپارێزن و ئەگەر پێویست نەبێت نەچنە شوێنە کراوەکان و زیاتر لە شوێنە داخراوەکاندا بمێننەوە تا کاریگەریی هەوای پیس لەسەریان کەمبێتەوە.

قوباد تاڵەبانی، جێگری سەرۆک وەزیرانی هەرێم پێشوازیکرد لە جانێت ئەلبێرتا، باڵیۆزی هۆڵەندا لە عیراق و پێکەوە گفتوگۆیان لەبارەی قۆناغی دوای هەڵبژاردنەکان و پەرەپێدانی پەیوەندییە ئابورییەکان کرد.

لە کۆبوونەوەکەدا کە ئەمڕۆ سێشەممە بەڕێوەچوو، تاوتوێی دۆخی سیاسیی عیراق دوای هەڵبژاردنەکان کرا. قوباد تاڵەبانی رایگەیاند، عیراق پێویستی بە پێکهێنانی حکومەتێکی کارا و بە‌هێز و خزمەتگوزار هەیە کە جێی رەزامەندی هەموو پێکهاتەکان بێت، هاوکات بتوانێت بە هاوکاری لەگەڵ هەرێم کێشەکانی نێوان هەرێم و بەغدا بەپێی دەستور چارەسەر بکات.

سەبارەت بە یەکڕیزیی لایەنەکان، جێگری سەرۆک وەزیران ئاماژەی بەوەکرد، دەبێت لایەنە کوردستانییەکان پێکەوە هەماهەنگ و هاوکاربن بۆ ئەوەی پێگەی کورد لە بەغدا بەهێز بکەنەوە و وتی: "کاتێک هەرێم بەهێز دەبێت کە پێگەی کورد لە بەغدا بەهێز بێت."

لە بەشێکی دیکەی کۆبوونەوەکەدا، باس لە چۆنێتی بەهێزترکردنی پەیوەندیی بازرگانیی نێوان هەرێم و هۆڵەندا کرا. قوباد تاڵەبانی داوایکرد کۆمپانیا و وەبەرهێنەرانی هۆڵەندا بەشدارییەکی کاریگەرتریان لە پرۆسەی گەشەپێدانی هەرێمی کوردستاندا هەبێت، بەتایبەت لە بوارەکانی کشتوکاڵ و گەشتوگوزاردا کە دەرفەتی باشی وەبەرهێنانیان تێدایە.

ئەمڕۆ سێشەممە، بە سەرپەرشتیی بافڵ جەلال تاڵەبانی، سەرۆکی یەکێتیی نیشتمانیی کوردستان، مەکتەبی سیاسیی یەکێتی لە شاری سلێمانی کۆدەبێتەوە.

بەپێی زانیارییەکانی کوردسات نیوز، لە کۆبوونەوەکەدا گفتوگۆ لەسەر دوایین پەرەسەندنە سیاسییەکانی هەرێمی کوردستان و عیراق دەکرێت و دەرەنجامەکانی هەڵبژاردن هەڵسەنگاندنی بۆ دەکرێت.

تەوەرێکی دیکەی کۆبوونەوەکە تایبەت دەبێت بە پرسی پێکهێنانی کابینەی نوێی حکومەتی هەرێم و حکومەتی عیراق، تێیدا یەکێتی گفتوگۆ لەسەر هەنگاوەکانی داهاتوو و هەڵوێستی رەسمی خۆی لەوبارەیەوە دەکات.

چلەمین دادگای سزاکانی ئیستانبوڵ، ئەو لیستەی پەسەند کرد کە لەژێر ناوی "رێکخراوی ئیمامئۆغڵو بۆ قازانج" ئامادەکرابوو و تێیدا ئەکرەم ئیمامئۆغڵو و 406 کەسی دیکە تۆمەتبار کراون.

بەپێی زانیارییەکان، دادگا لێکۆڵینەوەی لە دۆسیەی 407 گومانلێکراوەکە تەواو کردووە کە 105 کەسیان دەستگیرکراون، بڕیارە لە رۆژانی داهاتوودا کاتی دانیشتنی دادگاییەکە دیاری بکرێت.

لە لیستەکەدا داواکراوە سزای زیندانی لە 849 ساڵەوە بۆ 2 هەزار و 430 ساڵ و 6 مانگ بەسەر ئەکرەم ئیمامئۆغڵودا بسەپێنرێت.

تۆمەتەکان بریتین لە: "دامەزراندنی رێکخراو بە مەبەستی تاوان"، "وەرگرتنی بەرتیل"، "سپیکردنەوەی پارە"، "تۆمارکردن و بڵاوکردنەوەی زانیاریی کەسی"، "فێڵکردن لە تەندەرەکان"، "زیانگەیاندن بە موڵکی گشتی" و چەندین مادەی یاسایی دیکە.

لە دۆسیەکەدا، هەریەکە لە فاتیح کەلێش، مورات ئۆنگون و ئادەم سۆیتەکین وەک "بەڕێوەبەری رێکخراو" ناویان هاتووە.

• فاتیح کەلێش: داوای سزای 556 ساڵ تا 1542 ساڵ زیندانی بۆ دەکرێت، بە تۆمەتی 48 جار وەرگرتنی بەرتیل و 55 جار فێڵکردن لە تەندەر.

• مورات ئۆنگون: داوای سزای 287 ساڵ تا 779 ساڵ زیندانی بۆ دەکرێت.

لەم دۆسیەیەدا، وەزارەتەکانی ناوخۆ، دارایی، وزە، کشتوکاڵ و ژینگەی تورکیا وەک لایەنی "زیانلێکەوتوو" لە تاوانەکان ناویان تۆمارکراوە. هەروەها داوا کراوە یاسای "پەشیمانبوونەوەی کارا" بۆ سێ لە تۆمەتبارەکان جێبەجێ بکرێت کە زانیارییان داوەتە پۆلیس.

 

لە قەزای قۆسەر (کزیڵتەپە)ی سەر بە پارێزگای مێردین، دایک و باوکێک و منداڵە پێنج ساڵانەکەیان لەناو ماڵەکەی خۆیاندا بە کوژراوی دۆزرانەوە، کە شوێنەواری فیشەک بە سەریانەوە بوو.

بەپێی زانیارییەکان، رووداوەکە لە گەڕەکی "تورگوت ئۆزال" لە شەقامی مێردین رویداوە، دوای ئەوەی دراوسێکانیان هەواڵیان نەزانیوە، تیمەکانی پۆلیس و فریاگوزارییان ئاگادار کردووەتەوە، دوای شکاندنی دەرگاکە و چوونیان بۆ ژوورەوە، تەرمی هەر سێ ئەندامی خێزانەکەیان دۆزیوەتەوە.

قوربانییەکان پێکهاتوون لە مەهمەت کایا (37 ساڵ)، بێرنا کایا (33 ساڵ) و سامیەلی کایا (5 ساڵ)، دوای پشکنین دەرکەوتووە کە هەر سێکیان گیانیان لەدەستداوە و تەرمەکانیان رەوانەی پزیشکی دادوەری نەخۆشخانەی حکومی قۆسەر کراوە.

عەلی بەیتوس، یەکێک لە دراوسێکانی خێزانەکە رایگەیاندووە: "هیچ شتێکی نامۆمان بەدی نەکردووە، پیاوێکی کاسبکار بوو و کاری چاککردنەوەی دەکرد، چەندین ساڵە دەیناسم و وەک خێزان بووین، توشی هێدمە بووین بەم رووداوە." ئاماژەی بەوەشکردووە پێدەچێت رووداوەکە سەعات 1 بۆ 2ی شەوی رابردوو رویدابێت.

لە ئێستادا پۆلیس دەستی بە لێکۆڵینەوەی ورد کردووە بۆ ئاشکراکردنی هۆکار و چۆنێتی ئەنجامدانی تاوانەکە.

قوباد تاڵەبانی، جێگری سەرۆک وەزیرانی هەرێمی کوردستان لە رۆژی جیهانیی بەرەنگاربوونەوەی توندوتیژی دژی ژناندا پەیامێکی بڵاوکردەوە و رایگەیاند، پێویستە هەموان پێکەوە کار بۆ دانانی پلان و ستراتیژێکی نیشتمانی بکەن بۆ کۆتاییهێنان بە توندوتیژیی دیجیتاڵی لە کوردستان.

قوباد تاڵەبانی لە پەیامەکەیدا ئاماژەی بەوەکردووە، کورد نەتەوەیەکی "بە شانسە" کە خاوەنی کولتورێکە سەرەڕای هەندێک کەموکوڕی، بەڵام دەوڵەمەندە بە رێزگرتن لە پێگەی ژن لەناو خێزان و کۆمەڵگەدا، ئەو ئازایەتییەی ژنانی خەباتکاری کوردیش کە جیهانیان سەرسام کردووە، بەشێکی گرنگی سەرچاوەکەی دەگەڕێتەوە بۆ ئەو کولتورە دەوڵەمەندەی کە "پیاوەکان سەری رێز و شکۆ لە ئاست ژنانی ئازا و ئازاددا دادەنوێنن".

جێگری سەرۆک وەزیران جەختی لەوە کردۆتەوە، پێویستە بە ئیلهام وەرگرتن لە کولتوری رەسەن و خۆگونجاندن لەگەڵ روحی سەردەم و بەها جیهانییەکان، کۆمەڵگە لە هەموو جۆرەکانی توندوتیژی پاکبکرێتەوە، هاوکات لەگەڵ پتەوکردنی دامەزراوەی خێزانی تەندروست، زەمینە بۆ بەشداریی کارای ژنان لە بوارەکانی سیاسی و ئابوری و کۆمەڵایەتی بڕەخسێنرێت.

سەبارەت بە دروشمی ئەمساڵ کە تایبەتە بە "کۆتاییهێنان بە توندوتیژیی دیجیتاڵی"، قوباد تاڵەبانی نیگەرانی خۆی نیشانداوە لەوەی ساڵانێکە لە کۆمەڵگەی کوردیدا ئەم دیاردەیە بە شێوەی جۆراوجۆر پەرەی سەندووە، بۆیە داوا دەکات بەبێ جیاوازی کار بۆ جێبەجێکردنی پلان و ستراتیژێکی نیشتمانی بکرێت بۆ بنبڕکردنی ئەم جۆرە لە توندوتیژی دژی ژنان.

حکومەتی نیوزلەندا پلانێکی نوێی بۆ رزگاربوون و لەناوبردنی تەواوەتی 2.5 ملیۆن پشیلەی کێوی تا ساڵی 2050 راگەیاند، ئەوەش بەهۆی ئەو زیانە گەورەیەی ئەو ئاژەڵانە بە سیستمی ژینگەیی وڵاتەکەی دەگەیەنن.

تاما پۆتاکا، وەزیری پاراستنی سروشت رونی دەکاتەوە، "ئەم هەنگاوە یەکەم زیادکردنی جۆرێکی نوێی ئاژەڵە بۆ ستراتیژیی (خاڵیبوون لە ئاژەڵی دڕندە 2050) کە وڵاتەکە لە ساڵی 2016ەوە وەک بەرنامەیەکی نیشتمانی جێبەجێی دەکات".

وەزیرەکە ئاماژەی بەوە کردووە، پشیلە کێوییەکان دەخرێنە هەمان لیستی ئاژەڵە زیانبەخش و دڕندەکانی وەک مشک و جۆرەکانی تر و بەرنامەی فراوان و رێکخراو بۆ کۆنترۆڵکردنیان جێبەجێ دەکرێت، بڕیارە لە ئاداری 2026 پلانێکی ورد بۆ چۆنێتی جێبەجێکردنی ئەم بڕیارە بڵاوبکرێتەوە.

بەپێی مەزەندەکان، نزیکەی 2.5 ملیۆن پشیلەی کێوی لە دارستان و دورگەکانی نیوزلەندا دەژین و کێشی هەندێکیان دەگاتە 7 کیلۆگرام، ئەم پشیلانە کاریگەری خراپیان لەسەر هەمەچەشنی ژینگەیی هەیە و مەترسییان بۆ سەر جۆرە دەگمەنەکانی باڵندە و شەمشەمەکوێرە دروستکردووە.

ئەم بڕیارە دوای ئەوە دێت کە راپرسییەکان دەریانخستووە لە سەدا 90ی بەشداربووان پشتیوانی لە کۆنترۆڵکردنی ئەم ئاژەڵانە دەکەن، هەرچەندە پلانەکە پشیلەی ماڵی (ماڵی هاووڵاتیان) ناگرێتەوە، بەڵام نیوزلەندا کە یەکێکە لەو وڵاتانەی زۆرترین پشیلەی ماڵییان هەیە، روبەڕوی ئاڵنگاری دەبێتەوە لە رێکخستنی خاوەندارێتییان.

لەلایەکی ترەوە، کۆمەڵە و رێکخراوەکانی پاراستنی مافی ئاژەڵان نیگەرانی خۆیان نیشانداوە لەوەی "کوشتن" وەک رێگەی سەرەکی بەکاربهێنرێت و داوای رێگەی "مرۆڤانەتر" دەکەن بۆ کۆنترۆڵکردنیان، وەک نەزۆککردن و دانانی چیپی ئەلیکترۆنی و دەرکردنی یاسایەک بۆ پابەندکردنی خاوەن پشیلەکان بەوەی ئاژەڵەکانیان لە ماڵەوە بهێڵنەوە.

 

وەزارەتی دارایی و ئابوری حکومەتی هەرێمی کوردستان رایگەیاند، لیستی موچەی مانگی تشرینی یەکەمی موچەخۆرانیان ئاراستەی وەزارەتی دارایی عیراق کردووە.

بەپێی راگەیەندراوەکەی وەزارەتی دارایی، ئەمڕۆ سێشەممە 25ی تشرینی دووەمی 2025، تیمی تەکنیکی وەزارەتەکە سەردانی بەغدادیان کردووە و لیستی موچەی مانگی تشرینی یەکەم (مانگی 10)ی فەرمانبەران و موچەخۆرانی هەرێمی کوردستانیان رادەستی فەرمانگەی ژمێریاریی وەزارەتی دارایی حکومەتی فیدراڵ کردووە.

 

وەزارەتی شارەوانی و گەشتوگوزاری حکومەتی هەرێمی کوردستان، بڕیاریدا  لەسەر خەرجکردنی گوژمەی زیاتر لە 281 ملیۆن دینار بۆ پڕۆژەکانی قیرتاوکردن و نۆژەنکردنەوەی شەقام و کۆڵانەکانی شاری سلێمانی.

بەپێی سێ فەرمانی وەزاری کە دەرچووە، بڕی 281 ملیۆن و 600 هەزار دینار لەسەر رێژەی 15%ی داهاتی شارەوانی تەرخانکراوە، پارەکەش بەمەبەستی دابینکردنی قیری شل بۆ کارگەی قیری شارەوانی لە تانجەرۆ خەرج دەکرێت.

بەپێی پلانەکە، ئەم گوژمەیە بۆ جێبەجێکردنی قۆناغەکانی (حەوتەم، هەشتەم و نۆیەم)ـی پرۆسەی قیرتاوکردنەوەی شەقام و کۆڵانەکان لە سنوری سەرۆکایەتی شارەوانی سلێمانی بەکاردەهێنرێت.

وەزارەتی شارەوانی ئاماژەی بەوەشکردووە، ئامانج لەم پرۆژانە نۆژەنکردنەوەی شەقامەکان، رێگریکردنە لە تێکچوونیان و ئاسانکارییە بۆ هاتووچۆی هاووڵاتیان لە گەڕەک و شەقامەکانی شاری سلێمانی.

وەزارەتی گواستنەوە و گەیاندنی حکومەتی هەرێمی کوردستان، لە رێگەی بەڕێوەبەرایەتی گشتیی پۆستە و گەیاندنەوە، بڕیارێکی نوێی لەبارەی پەخشکردنی کەناڵەکانی (beIN SPORTS) دەرکرد و داوای راگرتنی پەخشی نایاسایی ئەو کەناڵانە دەکات.

بەپێی نووسراوێکی رەسمی وەزارەتەکە کە لە رێکەوتی 17-11-2025 ئاراستەی کۆمپانیاکانی خزمەتگوزاریی ئینتەرنێت کراوە، تیایدا هاتووە کە دەبێت پەخشی ئۆنلاین (IPTV)ی کەناڵەکانی "بین سپۆرت" کە لەلایەن هەندێک لە کەناڵە ناوخۆییەکانەوە بەبێ مۆڵەت و بەشێوەی نایاسایی پەخش دەکرێنەوە، رابگیرێن.

وەزارەتی گواستنەوە و گەیاندن مۆڵەتی یەک مانگی بۆ کۆمپانیاکان دیاریکردووە بۆ جێبەجێکردنی بڕیارەکە، ئامانج لێی پاراستنی مافی خاوەندارێتی فیکری و رێگریکردنە لەو سەرپێچییانەی دەکرێنە سەر مافی پەخش و بڵاوکردنەوە.

لە بەشێکی تری بڕیارەکەدا جەخت لەوە کراوەتەوە، هەر کەناڵێک بیەوێت لە رێگەی ئینتەرنێتەوە پەخشی دامەزراوەی (beIN SPORTS) بکات، دەبێت لە رێگەی بریکاری رەسمی ئەو دەزگایەوە بێت و رەچاوی یاسا و رێنماییە بەرکارەکانی حکومەتی هەرێمی کوردستان بکات.

 

دوای ئەوەی هەفتەی رابردوو نێردەی تایبەتی ترەمپ لە ئەفریقا باسی لە راگەیاندنی ئاگربەستێكی سێ مانگی لە سودان كرد، ئەمڕۆ هێزەكانی پشتیوانی خێرا لە سودان پابەندبوونیان بە ئاگربەست راگەیاند، بەڵام سوپای سودان رەتیدەكاتەوە.

ئەحمەد حەمدان دەقلو، فەرماندەی هێزەكانی پشتیوانی خێرا لە سودان پابەندبوونی هێزەكەی بە ئاگربەستێكی مرۆیی بۆ ماوەی سێ مانگ راگەیاند و ئاماژەی بەوەكرد، وەك وەڵامدانەوەیەك بۆ هەوڵە نێودەوڵەتییەكان، سەرجەم چالاكییە سەربازییەكانیان رادەگرن و پابەند دەبن بە ئاسانكاریی بۆ گەیشتنی تیمە پزیشكی و نێودەوڵەتییەكان بە مەبەستی گەیاندنی فریاگوزاریی و پێداویستییە مرۆییەكان بە سودان.

حەمدان دەقلو رەزامەندی لەسەر پێكهێنانی میكانیزمێكی چاودێری نێودەوڵەتی لە سودان دەربڕیوە و دەشڵێت، لارییان لە بەشداریی هیچ لایەنێك لە پرۆسەی سیاسیی سوداندا نییە، جگە لە بزتنەوەی ئیسلامی و ئیخوان موسلمین.
لە بەرامبەریشدا، سوپای سودان ئاگربەستە سێ مانگییەكە رەتدەكاتەوە و رایگەیاندووە، بەردەوام دەبن لە شەڕ تا هێزەكانی پشتیوانی خێرا لەناو دەبەن.