هەواڵەکان
مارکۆ روبیۆ، وەزیری دەرەوەی ئەمریکا ئاشکرای کرد کە دانوستانەکانیان لەگەڵ تاران بۆ بەگەڕخستنەوەی هاتوچۆی دەریاوانی لە گەروی هورمز پێشچوونی بەخۆیەوە بینیوە.
روبیۆ لە لێدوانێکی رۆژنامەوانیدا ئاماژەی بەوە کرد: پێشچوون لە دانوستانەکان لەگەڵ ئێران بۆ بەگەڕخستنەوەی گەروی هورمز هەیە، هاوکات جەختیشی کردەوە: نابێت ئێران ببێتە خاوەنی چەکی ئەتۆمی.
وەزیری دەرەوەی ئەمریکا وتیشی: بەشداریین لە دانوستانەکان لەگەڵ ئێران بۆ دەستەبەرکردنی کردنەوەی گەروی هورمز، و ئاماژەی بەوەش کرد: هێشتا نەگەیشتووینەتە لێکگەیشتنی کۆتایی سەبارەت بە گەروی هورمز، بەڵام هیواداریین بەم نزیکانە بگەیەنە رێککەوتن.
کۆبوونەوەی نێوان مەزڵوم عەبدی و ئەحمەد شەرع کۆتایی هات و پرسی یەکخستنەوەی هەسەدە و سوپای سوریا تاوتوێ کرا.
پەیامنێری کوردسات نیوز لە رۆژئاوای کوردستان رایگەیاند، کۆبوونەوەی مەزڵوم عەبدی فەرماندەی گشتی هەسەدە و ئیلهام ئەحمەد لەگەڵ ئەحمەد شەرع سەرۆکی سوریا و ئەسعەد شەیبانی وەزیری دەرەوە کۆتایی هات.
وتیشی، بەپێی زانیارییەکان تەوەری سەرەکی کۆبوونەوەکە یەکخستنەوەی هێزەکانی سوریای دیموکرات و سوپای سوریا بووە و لەچەند رۆژی داهاتودا راگەیەنراوی رەسمی بڵاودەکەنەوە.
کۆمپانیاکانی "دانەغاز" و "نەوتی هیلال" دەستپێکردنی دابینکردنی غازی سروشتییان لە کێڵگەی کۆرمۆرەوە لە هەرێمی کوردستان بۆ وەزارەتی کارەبای عیراق لە شاری کەرکوک راگەیاند.
کۆمپانیاکانی دانەغاز لە راگەیەنراوێکدا بڵاویکردەوە، بەپێی رێککەوتنەکە، رۆژانە بڕی 100 ملیۆن پێ سێجا غاز لە کێڵگەی کۆرمۆرەوە رەوانەی وێستگەی کارەبای تازە لە کەرکوک دەکرێت بۆ ماوەی یەک ساڵ، ئەوەش بە ئامانجی پشتگیریکردنی بەرهەمهێنانی کارەبای نیشتمانی لە عیراق.
ئەوەشی خستەڕوو، ئەم هەنگاوە دوای تەواوبوونی پڕۆژەی فراوانکردنی (KM250) دێت لە تشرینی یەکەمی 2025، کە توانای بەرهەمهێنانی کۆرمۆری بە رێژەی ٪50 بەرزکردەوە بۆ 750 ملیۆن پێ سێجا لە رۆژێکدا.
مەجید جەعفەر، بەڕێوەبەری جێبەجێکاری کۆمپانیای نەوتی هیلال رایگەیاند، ئەمە یەکەم دابینکردنی غازە بۆ وەزارەتی کارەبای عیراق و قۆناغێکی گرنگە بۆ پەرەپێدانی کەرتی غاز و دابینکردنی خواستی گەشەسەندووی کارەبا لە سەرانسەری عیراقدا.
لای خۆشییەوە ریچارد هال، بەڕێوەبەری جێبەجێکاری دانەغاز ئاماژەی بەوە کرد، رێککەوتنەکە بنەمایەکە بۆ هاوکاریی ستراتیژیی زیاتر لە بازاڕی عیراقدا بەرەو بەهێزکردنی ئاسایشی ئۆتۆنۆمیی وزە.
پڕۆژەی غازی کۆرمۆر سووتەمەنی بۆ زیاتر لە ٪80ـی بەرهەمهێنانی کارەبای هەرێمی کوردستان دابین دەکات و قەبارەی سەرمایەگوزاری تێیدا چوار ملیار دۆلاری تێپەڕاندووە.
بۆ رێگری لە گەندەڵی و بەهەدەردانی سەرمایەی گشتی، سەرۆک وەزیرانی عیراق رێنماییدا بە ئەنجامدانی وردبینیی پێشوەختە بۆ سەرجەم گرێبەستە حکومییەکان پێش ئیمزاکردنیان.
عەلی زەیدی، سەرۆکی ئه‌نجومه‌نی وەزیران، ئەمڕۆ سێشەممە، سەردانی بارەگای دیوانی چاودێریی دارایی فیدراڵی کرد و سەرپەرشتی کۆبوونەوەیەکی هاوبەشی کرد بە ئامادەبوونی، سەرۆکی دیوانی چاودێریی دارایی فیدراڵی، سەرۆکی دەستەی دەستپاکی، و وەزیری دارایی.
کۆبوونەوەکە تایبەت کرابوو بە تاوتوێکردنی میکانیزمەکانی بەهێزکردنی چاودێریی پێشوەختە، پاراستنی سەرمایەی گشتی و پەرەپێدانی رێکارەکانی وردبینی لە گرێبەستە حکومییەکاندا.
سەرۆک وەزیران جەختی لەوە کردەوە: بەرپرسیارێتی پێویستی بە کارکردنی جدی، بەدەستهێنانی دەستکەوت و ئەنجامدانی ئەرکەکان بە باشترین شێوە هەیە، و روونی کردەوە کە دەبێت سەرجەم لایەنەکان بەرپرسیارێتییە یاسایی و نیشتمانییەکانی خۆیان هەڵبگرن.
زەیدی رێنماییدا بە پەیڕەوکردنی بنەمای "وردبینیی پێشوەختە" بۆ گردبەستەکان پێش ئیمزا کردنیان، وەک رێکارێکی خۆپارێزی کە ئامانجی چارەسەرکردنی کێشەکانە پێش رودانیان، چونکە ئەمە وەک پارێزبەندییەک وایە بۆ دامەزراوەکان.
هەروەها داوای لە دیوانی چاودێریی دارایی و دەستەی دەستپاکی کرد کە ببنە چاوی دەوڵەت بۆ دۆزینەوەی کەلەبەرەکان و چارەسەرکردنیان پێش ئەوەی ببنە کێشە یان پەڕاوی گەندەڵی.
لە کۆبوونەوەکەدا، سەرۆک وەزیران رێنماییدا بە پێکهێنانی تیمێکی پسپۆڕ لە دیوانی چاودێریی دارایی کە ئەرکی وردبینیی پێشوەختەی گردبەستەکان لەئەستۆ بگرێت، بە مەرجێک ماوەکەی لە دە رۆژی کاری تێنەپەڕێت، هاوکات بڕی ئەو گردبەستانەش دیاری بکرێن کە دەکەونە ژێر ئەم جۆرە وردبینییە، بە جۆرێک خێرایی لە ئەنجامدان و کارامەیی لە چاودێری بەدەستبهێنرێت.
سەرۆک کۆماری ئێران دەڵێت، ئێران هەوڵی فراوانکردنی بازنەی جەنگ نادات و تەنها بەرگری لە خۆی دەکات.
مەسعود پزیشکیان، سەرۆک کۆماری ئێران رایگەیاند، وڵاتەکەی هیچ نیازێکی نییە بۆ فراوانکردنی ئاڵۆزی و گۆڕەپانی جەنگ لە ناوچەکەدا، هاوکات سەرۆکی ئەمریکاش ئاشکرای دەکات کە دانوستانەکان لەگەڵ تاران بەردەوامییان هەیە.
مەسعود پزیشکیان، سەرۆک کۆماری ئێران ئاماژەی بەوەکرد، ئەوەی تاران دەیکات تەنها بەرگریکردنە لە سنورەکانی خۆی و بە هیچ شێوەیەک خوازیاری بەردەوامیی جەنگ نییە.
لای خۆشییەوە پێشتر دۆناڵد ترەمپ، سەرۆکی ئەمریکا رایگەیاند، لە ئێستادا دانوستانەکان لەگەڵ ئێراندا بەڕێوەدەچن و ئەوەش بە دوا هەل بۆ لێپرسراوانی تاران دادەنرێت تا بگەنە رێککەوتن.
ترەمپ ئاماژەی بەوەشکرد، گفتوگۆکان لەسەر داوای تاران و بە پشتگیریی سعودیە و ئیمارات و قەتەر بەڕێوەدەچن، کە تەرخانکراون بۆ تاوتوێکردنی ئەگەری کردنەوەی گەروی هورمز.
قائیمقامیەتی سلێمانی جەختدەكاتەوە، قەیرانی غازی ماڵان لە سلێمانی نییە و بە كۆبۆن غاز دەدرێت بە هاووڵاتیان.
بابان ئەحمەد سەرۆكی لیژنە هاوبەشەكانی قائیمقامیەتی سلێمانی لە لێدوانێكدا بۆ كوردسات نیوز رایگەیاند، گرژییەكانی ئەم دواییەی ناوچەكە كاریگەری لەسەر غازی ماڵان دروست نەكردووە.
ئاماژەی بەوەشدا: ئێستا هاووڵاتیان دەتوانن لە رێگەی كۆبۆنەوە غازی ماڵان بە دەستبهێنن.
شەپۆلی گەرما و وشکەساڵی، کەرتی وزەی لە فەرەنسا تووشی ئاستەنگ کردووە و پاریس ناچار دەکات بەهۆی هۆکاری ژینگەیی کارکردنی سێ کارگەی ئەتۆمی رابگرێت.
دەزگاکانی راگەیاندنی ناوخۆیی لە سەرچاوەکانی کۆمپانیای کارەبای فەرەنساوە گواستیانەوە کە دوو کارگە لە وێستگەی "شۆز" و مفاعلی سێیەم لە وێستگەی "ئاردێن" کارکردنیان راوەستێنراوە، هاوکات ئاستی بەرهەمهێنانی چەندین کارگەی تریشیان کەم کردووەتەوە.
لە مانگی ئایاری رابردووەوە، فەرەنسا رووبەڕووی شەپۆلی یەکبەدوایەکی گەرما بووەتەوە کە تێیاندا پلەکانی گەرما ئاستی پێوانەییان تۆمار کردووە، ئەمەش کاریگەرییەکی راستەوخۆی لەسەر کەرتەکانی کۆنترۆڵکردنی سەرچاوەکانی ئاو و وزە دروست کردووە.
لە دوای راپۆرتی لێپرسراوانی ئەمریکا سەبارەت بە ئەنجامدانی هێرشی ئەلیکترۆنی رێکخراو بۆ سەر سیستمەکانی ئاو لە چەند ویلایەتێکی ئەمریکا دەنگۆکانی تێوەگلانی تاران رویان لە زیادبوون کردوە.
هەفتەی رابردوو لێپرسراوانی ویلایەتی مینیسۆتا رایانگەیاند، کە زیاتر لە 30 سیستمی ئاوی ئەو ویلایەتە کراونەتە ئامانج، دواتریش نووسینگەی لێکۆڵینەوەی فیدراڵی (FBI) ئاشکرای کرد، کە هێرشی هاوشێوە لە حەوت ویلایەتی تر رویان داوە و کێشەیان بۆ کارکردنی ئەو دامەزراوانە دروست کردووە.
هەرچەندە ئاژانسی ئاسایشی سایبەری و ئاسایشی ژێرخانی ئەمریکا (CISA) بێدەنگی هەڵبژاردووە، بەڵام میدیاکانی ئەمریکا ئاماژە بەوە دەکەن، کە لێکۆڵینەوە لە روداوەکان دەکرێت =و بە دواداچون دەکرێت بۆ ئەگەری تێوەگلانی ئێران لەو هێرشانەدا.
لای خۆشیەوە، مورگان رایت، راوێژکاری پێشووی وەزارەتی دەرەوەی ئەمریکا، ئاماژەی بەوە کردووە کە بەپێی ئاڵۆزییەەکانی نێوان واشنتن و تاران، ئێران لە سەروی لیستی تۆمەتباراندایە، بەڵام لێپرسراوانی ئەمریکی ئەگەری ئەوەش لێک دەدەنەوە، کە رەنگە ئەوانەی ئەو کارەیانکردوە بە مەبەست خۆیان وەک لایەنی ئێرانی نیشان دابێت تا ئاڵۆزییەکان زیاتر بکەن.
ئەمە لە کاتێکدایە تا ئێستا تاران هیچ لێدوانێکی لەسەر ئەو بابەتە نەبووە و لە ناوخۆی ئەمریکاشدا، دوناڵد ترامپ بەرپرسیارێتیی روداوەکەی خستە ئەستۆی بەرپرسانی ویلایەتی مینیسۆتا و بە کەمتەرخەمی لەقەڵەمداون، بەڵام ئەوانیش لە وەڵامدا رایگەیاندوە، دۆناڵد ترەمپ بە باشی دەزانێت، کە چ وڵاتێک لە پشتی ئەم هێرشانەوەیە.
وەزارەتی دەرەوەی قەتەر بەردەوامبوونی هەوڵەکانی نێوەندگیری لە نێوان ویلایەتە یەکگرتووەکانی ئەمریکا و ئێران رادەگەیەنێت و ئاشکرای کرد کە رەشنووسی رێککەوتنێکی کورتخایەن لە نێوان لایەنەکاندا ئاڵوگۆڕ دەکرێت، بەبێ ئەوەی لە ئێستادا هیچ دانوستانێکی راستەوخۆ لە ئارادا بێت.
ماجد ئەلئەنساری، وتەبێژی وەزارەتی دەرەوەی قەتەر لە لێدوانێکدا بۆ دەزگاکانی راگەیاندن رایگەیاند: دەتوانین دووپاتی بکەینەوە کە هەوڵەکان لەگەڵ سەرجەم لایەنەکاندا بەردەوامن.
ئاماژەی بەوەش کرد کە ئێستا سەرنج لەسەر گەیشتن بە چارەسەرێکی کورتخایەنە بۆ یارمەتیدانی بووژاندنەوەی دانوستانەکان و گەڕانەوەی تەواوەتی بۆ هەوڵەکانی نێوەندگیری.
وتەبێژی وەزارەتی دەرەوەی قەتەر ئاشکراشی کرد کە بەندەکانی پەیوەست بە رێککەوتنێکی ئەگەری لە نێوان ئەمریکا و ئێراندا داڕێژراون و لە ئێستادا رەشنووسی رێککەوتنەکە لە نێوان لایەنەکاندا ئاڵوگۆڕ دەکرێت، بەڵام جەختی کردەوە کە لە ئێستادا هیچ رێکخستن یان پلانێک بۆ ئەنجامدانی دانوستانی راستەوخۆ لە نێوان هەردوو وڵاتدا نییە.
بەهۆی سەپاندنی باج بەسەر 60 وڵاتدا، لە 25 ویلایەتی ئەمریكا سكاڵا لەسەر ئیدارەكەی ترەمپ تۆمار دەكرێت.
بەپێی یاداشتنامەیەك لە 25 ویلایەتی ئەمریكا كە دوانیان لەلایەن كۆمارییەكانەوە بەڕێوەدەبرێن، سكاڵا لەسەر ئیدارەكەی دۆناڵد ترەمپ تۆماركراوە، بەهۆی ئەوەی باجی گومرگیی بەسەر 60 وڵاتدا سەپاندووە، چونكە پێیان وایە ترەمپ سنوری دەسەڵاتە رێگە پێدراوەكانی تێپەڕاندوە.
ئەو ویلایەتانە سكاڵاكەیان پێشكەشی دادگای بازرگانیی نێودەوڵەتی ئەمریكا كردووە لە نیویۆرك و بەپێی سكاڵاكەش هیچ پەیوەندییەكی لۆژیكی لە نێوان كێشەی هاوردەی نێودەوڵەتی و باجە گومرگییە جیهانییە گشتگیرەكاندا نییە.
هەینی رابردوو لەلایەن ئیدارەكەی ترەمپەوە باجی گومرگیی بەسەر 60 وڵاتی هاوبەشی بازرگانیی ئەمریكادا سەپێندرا.
كۆمپانیای ئارامكۆی سعودی و بی پی بەریتانی بڵاویانكردەوە، ئاڵۆزییەكانی رۆژهەڵاتی ناوەڕاست كاریگەری لەسەریان نەبووە و داهاتیان زیادیكردووە.
كۆمپانیای ئارامكۆی سعودیە بۆ نەوت بڵاویكردەوە، هێرشی حوسییەكان بۆسەر بنكە و دامەزراوەكانیان لە مانگی رابردوودا كاریگەری نەكردووەتە سەر تواناكانیان لە بەرهەمهێنانی نەوتدا.
راشیگەیاندووە، سەرباری جەنگ لە رۆژهەڵاتی ناوەڕاست، داهاتیان بە نزیكەی 44% لە چارەكی دووەمی ئەمساڵ زیادیكردووە، بەشێوەیەك داهاتیان لەو ماوەیەدا 32.7 ملیار دۆلار بووە لەكاتێكدا لە چارەكی دووەمی ساڵی 2025دا 22.67 ملیار دۆلار بووە.
كۆمپانیای بریتش پترۆلیۆمی بەریتانیش بڵاویكردەوە، داهاتیان لە چارەكی دووەمی ئەمساڵدا بەرزبووەتەوە، بەهۆی ئەوەی جەنگی رۆژهەڵاتی ناوەڕاست نرخی نەوت و غازی بەرز كردووەتەوە.
وەزارەتی نەوتی عیراق رایگەیاند، ئەو کەشتیانەی نەوتی عیراقیان هەڵگرتووە، بە سەلامەتی گەروی هورمزیان تێپەراند، ئاماژەی بەوەشکردوە بەردەوامن لە فرۆشتنی نەوتی خاو
سەلیم رکابی، وتەبێژی وەزارەتی نەوتی عیراق رایگەیاند، جوڵەی گواستنەوەی نەوتی خاوی عیراق لەرێگەی گەروی هورمزەوە بەردەوامە و کەشتییە نەوتهەڵگرەکانیان بە شێوەیەکی ئاسایی بە گەروەکەدا تێدەپەڕن.
ناوبراو ئاماژەی بەوەشکردوە ،دوا تێپەراندنی گەروەکە بەرپرسیارێتیی رێڕەوی کەشتییەکان و وەرگرتنی مۆڵەتە پێویستەکان و پرۆسەی گواستنەوەکە بەتەواوی دەکەوێتە ئەستۆی کڕیارەکان و وەزارەت خاوەندارێتی ئەو کەشتییانە ناکات کە بەشێکیان بارەکەیان دوو ملیۆن بەرمیل نەوتە.
وتەبێژی وەزارەتی نەوت باسی لەوەشکردوە، کۆمپانیای بەبازاڕکردنی نەوتی عیراق (سۆمۆ) راستەوخۆ لەڕێگەی سیستەمی جیهانیی چاودێرییەوە بەدواداچوون بۆ جوڵەی کەشتییەکان دەکات تاوەکو گەیشتنیان بە پاڵاوگەکان.
سەبارەت بە ئاستی هەناردەکردنیش، ناوبراو جەختی لەسەر بەرزبوونەوە و باشتربوونی پلە بە پلەی فرۆشی نەوتی عیراق کردەوە لە مانگەکانی دواییدا و رایگەیاند، ئەنجامی فرۆشتنی مانگی رابردوو لە مانگەکانی پێشوتر باشتر بووە، ئەمەش نیشانەی چاکبوونەوەی بەردەوامی ئاستی هەناردەکردنەوەیە بەراورد بەو قۆناغەی دوای قەیرانی هەناردەکردن لە ێگەی گەروی هورمزەوە هاتە ئاراوە.
ئەمەش لە کاتێكدایە، دوێنێ 3ـی8ـی2026، وەزیری نەوتی عیراق رایگەیاند لە گفتوگۆدان لەگەڵ ئێران تا کەشتیە نەوتهەڵگرەکانیان گەروی هورمز تێپەڕێنن.
بە بڕیاری قوباد تاڵەبانی بەشێكی زۆری رێگاكانی دەرەوەی سلێمانی دەكرێنە دووساید و نەخشەسازیی بەشێكیشیان تەواوكراوە.
بەڕێوەبەرایەتی رێگاوبانی سلێمانی رایگەیاند، دوای وەرگرتنی رەزامەندی قوباد تاڵەبانی، جێگری سەرۆک وەزیرانی هەرێم بڕیارە تەواوی رێگاکانی دەرەوەی سلیمانی بکرێن بە دوو ساید.
محەمەد جەلیل بەڕێوبەری رێگاوبانی سلێمانی لە لێدوانێكدا بۆ كوردسات نیوز رایگەیاند، لە چوارچێوەی بڕیارەكەی قوباد تاڵەبانی، هەریەکە لە رێگای سەرەكی ئیدارە سەربەخۆكان، قۆناغی دووەم و سێیەمی رێگای دوكان-چوارقوڕنە و رێگای وارماوا-دەربەندیخان بە مەبەستی کردنیان بە دوو ساید کارکردن تێیاندا بەردەوامە.
ناوبراو ئاماژەی بەوەشکرد، ژمارەیەک رێگای تریش هەن، کە زۆر پێویستە بکرێن بە دوو ساید ئەوانیش رێگای كەوڵۆس-پێنجوێن.
لەبارەی ئەو رێگانەشەوە، بەڕێوبەری رێگاوبانی سلێمانی دەڵێت؛ قوباد تاڵەبانی رەزامەندی لەسەریانداوە تا بکرێنە دوو ساید و نەخشەسازیی بەشێكیشیان تەواوكراوە.
تەندروستی سلێمانی ئاماری مانگی رابردوی سەردانیکەرانی نەخۆشخانەی شەهید ئاسۆی بڵاوکردەوە؛ نۆ هەزار و 368 هاووڵاتی چارەسەریان بۆ کراوە و نزیکەی هەزار نەشتەرگەریش ئەنجامدراوە.
بەپێی ئامارێکی بەڕێوەبەرایەتی گشتی تەندروستی سلێمانی، لە مانگی رابردودا و لە رۆژی 1بۆ 31ـی 7ـی 2026 نۆ هەزار و 368 هاووڵاتی لە نەخۆشخانەی شەهید ئاسۆ چارەسەریان بۆکراوە،
تەندروتسی سلێمانی ئاماژەی بەوەشکردوە، نزیکەی هەزار نەشتەرگەری ئەنجامدراوە، بە جۆرێک 649 نەشتەرگەری گەورە و 258 نەشتەرگەری بچوک ئەنجامدراون.
هاوکات زیاتر لە چوار هەزار و 100 پشکنینی پەستانی چاو، 856 ئۆ سی تی (OCT)، 249 پشکنینی گلێنەی چاو بۆ چارەخوازان کراوە.
هەروەها لە هەمان ماوەدا، دوو هەزار و 249 پشکنینی چاویلکە، 783 سۆنەری چاو، 216 تیشک و نزیکەی دوو هەزار پشکنینی تاقیگەیی لە نەخۆشخانەکەدا بەڕێوەچوون.
بەڕێوەبەرایەتی پۆلیسی دارستان و ژینگەی پارێزگای سلێمانی، بڵاویکردوەتەوە، داربەڕویەکی 400 ساڵە بەشێکی شکاوە و لێکۆڵینەوە لە هۆکارەکەی دەکەن.
ئەمڕۆ سێشەممە، بەڕێوەبەرایەتی پۆلیسی دارستان و ژینگەی پارێزگای سلێمانی رایگەیاند، دوای ئاگادارکردنەوەی بنکەی پۆلیسی دارستان و ژینگەی عەربەتی سەر بە بەڕێوەبەرایەتییان لەسەر روداوێکی شکان و زیانگەیاندن بە دار بەڕویەکی بەتەمەن، دەستیان بە لێکۆڵینەوە کردوە.
ئاماژەی بەوەشکردوە، دار بەڕوەکە تەمەنی 400 ساڵە ودەکەوێتە سنوری گوندی داربەڕو، دوای چونە شوێن روداوەکە دەستبەجێ رێکاری یاسایی گیراوەتەبەر بۆ پاراستنی ئەم سەروەتە سروشتییە.
پۆلیسی دارستانی سلێمانی دەشڵێت؛ پەراوی لێکۆڵینەوەیان کردوەتەوە و تیمەکانیان بەردەوامن لە بەدواداچونی مەیدانی و لێکۆڵینەوەی ورد بۆ دیاریکردنی ئەوەی، کە ئایا شکانەکە هۆکاری سروشتی (وەک با یان کۆنیی بونیاد) بووە، یان دەستکاری و هۆکاری مرۆیی لەپشتەوە بووە.
دوای دەنگۆی دەستلەکارکێشانەوە، مەسعود پزیشکیانی سەرۆکی کۆماری ئێران، رایگەیاند ئەو دەنگۆیانە دورە لە راستییەوە و ئەگەر بیەوێت دەست لەکاربکێشێتەوە، بە رەسمی رایدەگەیەنێت.
مەسعود پزیشکیان، لە چاوپێکەوتنێکی تەلەڤیزیۆنیدا، ئاماژیە بەوەکردوە، ئەگەر بڕیاری دەستلەکارکێشانەوە بدات، بە رەسمی رایدەگەیەنێت.
ناوبراو جەختیکردەوە بە هیچ شیوەیەک ناکۆکی لە نێوان ئەو رابەری باڵای ئێراندا نییە و کەسانێک دەیانەوێت ناکۆکی دروست بکەن.
ئەم ڕەتکردنەوەیە لە کاتێکدایە کە پێشتر محەممەد باقر خەرازی، ئەمینداری گشتی حزبوڵڵای ئێران، بانگەشەی ئەوەی کردبوو کە مەسعود پزیشکیان 28 جار داوای دەستلەکارکێشانەوە یان هەڕەشەی دەستلەکارکێشانەوە کردوە.