هاوپەیمانی بەرێوەبردنی دەوڵەت بە ئامادەبوونی سەرۆك كۆمار، سەرۆك وەزیران، سەرۆكی پەرلەمان، سەرۆكی ئەنجومەنی باڵای دادوەری و سەرۆكی هەرێمی كوردستان بەڕێوەچوو. 

لە كۆبوونەوەكەدا رەوشی سیاسی، ئاسایش، ئابووری و خزمەتگوزارییەكان بەوردی تاوتوێ كران و بەتوندی سەركۆنەی هێرشەكانی سەر هێزە چەكدارەكانی عیراق كرا.

لە كۆبوونەوەكەدا جەخت لە كۆنتڕۆڵكردنی چەك لەدەستی دەوڵەتدا كرایەوە و ئاماژە بەوە كرا كە دوای 30ی ئەیلوولی 2026، بەپێی یاسای دژەتیرۆر مامەڵە لەگەڵ هەر چالاكییەكی چەكداری لەدەرەوەی چوارچێوەی دەوڵەتدا دەكرێت.

لە لایەكی ترەوە، بەشداربووان جەختیان لە هەمەجۆركردنی دەروازەكانی هەناردەكردنی نەوت، زیادكردنی داهاتی نانەوتی و بەرەنگاربوونەوەی گەندەڵی كردەوە. 

لەسەر ئاستی هەرێمیش، پشتیوانی عیراق بۆ دانوستان، پاراستنی ئاسایشی سنوورەكان و پەرەپێدانی پەیوەندییەكان لەسەر بنەمای ڕێزگرتن لە سەروەریی ولاتان دووپات كرایەوە. 

لە كۆتاییدا داواكرا پەلە بكڕێت لە تەواوكردنی كابینەی حكومەت و ناردنی بەرنامەكەی بۆ پەرلەمان.

ئەم هاوپەیمانییە سیاسیە لە لایەنە سەرەكییەكانی شیعە و سوننە و كورد بۆ بەڕێوەبردنی حكومەت و پاراستنی سەقامگیری لە ئەیلولی 2022 پێكهێنراوە.

 

جەی دی ڤانس، جێگری سەرۆکی ئەمریکا لە چاوپێکەوتنێکدا لەگەڵ "فۆکس نیوز" رایگەیاند دانوستان لەگەڵ ئێران بۆ گەیشتن بە رێککەوتن ئاڵۆز و دژوار دەبێت و کاتی دەوێت، چونکە ئێرانییەکان مامەڵەکردن لەگەڵیان قورسە.

ڤانس وتیشی: ئەرکی ئیدارەی ئەمریکا بەڕێوەبردنی ئەم دۆسیەیەیە بە شێوازێک کە باشترین ئەنجام بۆ گەلی ئەمریکا و سەرۆکی ویلایەتە یەکگرتووەکان بەدەستبهێنێت.

لە هەمان کاتدا، ڤانس پێشبینی کرد کە پێشهاتە چاوەڕوانکراوەکان لە کۆتاییدا ببنە هۆی دابەزینی نرخەکانی نەوت و مانەوەیان لە ئاستێکی نزمدا، لەگەڵ رێگریکردنی لە ئێران بۆ دەستگەیشتن بە چەکی ئەتۆمی، کە ئەوەش پێگەی ستراتیژیی ویلایەتە یەکگرتووەکان بەهێزتر دەکات.

ناوبراو روونیشی کردەوە، نرخی نەوت لەمرۆدا لە ئاستی 79 دۆلارە بۆ هەر بەرمیلێک، و ئاماژەی بەوە دا پرۆسەی دانوستاندنەکە هێشتا بەردەوامە، وهەندێک هەوڵ بۆ پێشبینیکردنی ئەنجامەکان یان بڕیاردانی پێشوەختە لەسەر بەڕێوەچوونی پرۆسەکە لەم قۆناغەدا دروست نین.

ئەم لێدوانانە لە کاتێکدا دێن کە تاران ئەنجامدانی دانوستاندنی راستەوخۆ لەگەڵ واشنتۆن رەت دەکاتەوە و رایگەیاندووە هێشتا بڕیاری لەسەر جێبەجێکردنی یاداشتی لێکتێگەیشتنی نێوانیان نەداوە.

 

ترەمپ دەنگۆی کەمیی کۆگاکانی چەک و تەقەمەنیی وڵاتەکەی رەتدەکاتەوە و دزەپێکردنی ئەو زانیارییانەش بە "خیانەت لە نیشتمان" وەسف دەکات.

دۆناڵد ترەمپ، سەرۆکی ئەمریکا رایگەیاند، وڵاتەکەی خاوەنی بڕێکی زۆر و بێشومار لە تەقەمەنییە، بەتایبەتی لە جۆرە دیاریکراو و تایبەتەکان، هەروەها ئەو راپۆرتانەشی رەتکردەوە کە باس لە هەبوونی کەمیی موشەک و تەقەمەنی لە کۆگاکانی سوپای ئەمریکادا دەکەن.

ترەمپ جەختیکردەوە، لە ئێستادا وڵاتەکەی بڕێکی زۆر لە تەقەمەنی بەرهەمدێنێت و بەپێی پێویستی راستەوخۆ رەوانەی ناوخۆی دەکات، ئاماژەی بەوەشکرد، کە کۆمپانیاکانی پیشەسازیی بەرگریی ئەمریکا سەرقاڵی دروستکردنی گەورەترین ژمارەی دامەزراوە و کارگەکانن لە مێژووی وڵاتەکەدا.

لە لایەکی ترەوە، سەرۆکی ئەمریکا دزەپێکردنی راپۆرتەکانی پەیوەندیدار بە کەمیی تەقەمەنی بە "خیانەت لە نیشتمان" وەسف کرد و بەڵێنیدا رووبەڕووی لێپرسراوانی ئەو دزەپێکردنانە بێتەوە و داوای سزای زیندانیکردنی درێژخایەنیان بۆ بکات.

ئەم لێدوانەی ترەمپ وەک وەڵامێک بوو بۆ ئەو راپۆرتانەی کە لەلایەن دەزگاکانی راگەیاندنی وەک (CNN) و ئاژانسی (رۆیتەرز) بڵاوکرابوونەوە، کە تێیدا بانگەشەی ئەوەیان دەکرد واشنتۆن بەشێکی زۆری موشەکە بەرگرییکارەکان و موشەکە دوورهاوێژە وردەکانی 'وەک ئاتاکمس و پرزم' لە ماوەی جەنگی پێنج مانگەی رابردوویدا لەگەڵ ئێران بەکارهێناوە.

هاوکات، پێت هێگسێس وەزیری جەنگی ئەمریکا، ئەو هەواڵانەی رەتکردەوە و بە "ناراست" وەسفیکردن، جەختیشی کردەوە لە ئامادەیی تەواوی سوپا بۆ جێبەجێکردنی تەواوی فەرمانە ستراتیژییەکان.

وەزارەتی بەرگریی روسیا تێکشکاندنی دوو کەشتیی بارهەڵگری پێداویستیی سەربازیی لە ئاوەکانی دەریای رەش لە نزیک بەندەری ئۆدێسا راگەیاند.

لە راگەیەنراوێکدا وەزارەتی بەرگریی روسیا ئاشکرایکرد، هێزەکانیان لە رێگەی فڕۆکەی بێفڕۆکەوانەوە دوو کەشتیی بارهەڵگریان لە ئاوەکانی دەریای رەش لە باشور و رۆژهەڵاتی شاری ئۆدێسا کردووەتە ئامانج، کە پێداویستی و کەرەستەی سەربازییان بۆ سوپای ئۆکراین دەگواستەوە.

بەرگریی روسیا ئاماژەی بەوەشکردووە، هێرشەکان بەردەوام دەبن بۆ سەر تەواوی ئەو کەشتییانەی بۆ مەبەستی سەربازیی لەلایەن ئۆکراینەوە بەکاردەهێنرێن، ئەوەش لە کاتێکدایە رۆژی چوارشەممەی رابردووش سێ کەشتیی دتری هاوشێوە لە هەمان ناوچە کرابوونە ئامانج.

ئەم بەئامانجگرتنانە لە چوارچێوەی هەوڵەکانی موسکۆدایە بۆ پەکخستنی هێڵەکانی ناردنی هاوکاریی سەربازیی رۆژئاوا بۆ ئۆکرایب، بەتایبەت لە رێگەی بەندەرە سەرەکییەکانی وەکو چۆرنۆمۆرسک و میکۆلایڤ.

سەرۆكی ئەمریكا دەڵێت، ئێران داوای دانوستان دەكات و نكۆڵی دەكات؛ جێگرەكەشی دەڵێت رێككەوتن لەگەڵ ئێران ئاسان نییە.

دۆناڵد ترەمپ سەرۆكی ئەمریكا رایگەیاند، پێی باشە بگاتە رێككەوتنێك لەگەڵ ئێران، چونكە نایەوێت خەڵك بكوژرێت، وتیشی ئەوان قسە لەگەڵ ئێرانییەكان دەكەن و چاوەڕوانن بزانن چی روودەدات.

سەرۆكی ئەمریكا ئاماژەی بەوەشدا، گفتوگۆكان سەبارەت بە گەروی هورمز بە باشی بەڕێوەدەچین بەڵام نەگەیشتونەتە رێككەوتنی كۆتایی، وتیشی وڵاتەكەی ئامادەبووە بۆ ئەنجامدانی گەورەترین هێرش لە مێژوودا لە دوای جەنگی دووەمی جیهانییەوە، بەڵام ئێرانییەكان داوای ئەنجامدانی گفتوگۆیان لێكردووە، بەڵام ئێرانیەكان نكۆڵی لەوە دەكەن.

 لە هەمان چوارچێوەدا، جەی دی ڤانس جێگری سەرۆكی ئەمریكا، رایگەیاند، حكومەتی ئێران تێكشكاوە، پێی وایە دوو باڵ لەناوخۆیدا بوونیان هەیە، یەكێكیان پاڵ بە جەنگەوە دەنێت، لە كاتێكدا ئەوەی تریان هەوڵی كۆتاییهێنانی دەدات، هەروەها جێگری سەرۆكی ئەمریكا ئەوەشی خستەڕوو، دانوستانەكان لەگەڵ ئێران كاتێكی پێویست دەبێت و ئاسان نابێت.

لەلای خۆیەوە كازم غەریب ئابادی جێگری وەزیری دەرەوەی ئێران، رایگەیاند ئەمریكا لە رێگەی نێوەندگیرانەوە نامەیەكی پێشكەش كردوون سەبارەت بە ئامادەیی بۆ گەڕانەوە بۆ پابەندبوون بە یاداشتی لێكتێگەیشتنەكە.

لەدوایین وێستگەی سەردانە مەیدانییەکەیدا لە شاری سلێمانی، خاتوو شاناز ئیبراهیم ئەحمەد ئەندامی مەکتەبی سیاسی یەکێتیی نیشتمانیی کوردستان، هێزی پێشمەرگەی ژنانی بەسەرکردەوە و لەلایەن عەمید رێزان رەشید فەرەج فەرماندەی یەکەی 735ـەەوە بە گەرمی پێشوازی لێکرا. 

لەو سەردانەدا عەمید رێزان و ئەفسەران راپۆرتێکی زارەکیان خستەڕوو دەربارەی کەموکورتییەکانی بینا و پێداویستیە سەربازییەکان، سەرباری داواکاری بەهێزترکردنی هێزەکە لەڕووی هونەری و مەعنەوییەوە، لەم بارەیەوە خاتوو شاناز ئیبراهیم ئەحمەدیان بە فریادڕەسی هێزی پێشمەرگەی ژنان وەسفکرد تا بتوانێ بەتەنگ داواکارییەکانیانەوە بچێت.

دوای ئەوەی لە نزیکەوە چەند بەش و هۆبەیەکی ناو فەرماندەییەکەی بەسەر کردەوە، خاتوو شاناز بەڵێنی دا بەدواداچونی جددی بکات تا بارەگایەکی شایستە لەئاست گەورەیی رۆڵی ئەو هێزانە دابین بکرێت وەک هەموو هێزەکانی تری سەر بە وەزارەتی پێشمەرگەی هەرێمی کوردستان.

سێنتکۆم رایدەگەیەنێت، تا 5ـی ئاب رێڕەوی 48 کەشتیی بازرگانییانی سەر بە ئێران لە کەنداو گۆڕیوە و چەندین کەشتیی تریشیان پەکخستووە.

فەرماندەیی ناوەندیی هێزەکانی ئەمەریکا 'سێنتکۆم' رایگەیاند، هێزەکانیان لە سەرەتای دووبارە سەپاندنەوەی گەمارۆی دەریایی بۆ سەر ئێران، رێڕەوی 48 کەشتیی بازرگانییان گۆڕیوە.

فەرماندەیی ناوەندیی ئەمەریکا لە راگەیەنراوێکدا لە تۆڕی کۆمەڵایەتیی "ئێکس" ئاشکرای کرد، ئاماری ئۆپراسیۆنەکان تا 5ـی ئاب بریتی بووە لە گۆڕینی ئاراستەی 48 کەشتیی بازرگانی، پەکخستنی دوو کەشتی و دوو کەشتیی تریش پشکنین و دڵنیابوونەوەیان لە پابەندبوونیان بە رێکارە دیاریکراوەکان بۆ ئەنجامدراوە.

ئەم پێشهاتانە لە کاتێکدان کە گرژییەکانی کەنداو بەردەوامن و هاوکات هەوڵە دیپلۆماسییەکان لەلایەن نێوەندگیرانی ناوچەکەوە چڕکراونەتەوە، بە مەبەستی گەیشتن بە لێکتێگەیشتن لەگەڵ تاران بۆ دووبارە کردنەوەی گەروی هورمز و دەستەبەرکردنی ئازادیی کەشتیوانی.

لە هەنگاوێکی نیشتمانی و بەرپرسیارانەدا، ئەمڕۆ گۆڕەپانی فەرماندەیی گشتی لە شاری سلێمانی، جموجۆڵێکی پڕ لە وەفاداری و پەرۆشی بەخۆوە بینی بۆ بەهێزترکردنی ورەی ئەو هێزە ئەمنییانەی گیانی خۆیان لە پێناو ئارامی و سەقامگیرییدا خستووەتە مەترسییەوە.

لەو میانەیەشدا خاتوو شاناز ئیبراهیم ئەحمەد، ئەندامی مەکتەبی سیاسی یەکێتیی نیشتمانیی کوردستان، بارەگای سەرەکی دەزگای دژەتیرۆری بەسەرکردەوە و چاویکەوت بە وەهاب هەڵەبجەیی، بەڕێوەبەری گشتی و ژمارەیەک لە فەرماندەکانی دەزگاکە.

لەدیدارەکەدا خاتوو شاناز ئیبراهیم ئەحمەد خۆشحاڵی نیشاندا کەئەفسەر و کارمەندانی دژەتیرۆر سەلامەت بوون لەو هێرشانەی لەماوەی رابردوودا بەهۆی پەرەسەندنی جەنگە ئیقلیمیەکانەوە هەندێ لە بارەگاکانیانی کردە ئامانج. 

لەبەرانبەردا فەرماندە وەهاب هەڵەبجەیی سەردانەکەی خاتوو شانازی بەپشتیوانییەکی مەعنەوی گەورە وەسفکرد بۆ هێزەکانیان.

 جێی ئاماژەیە سەردانەکە پەیامێکی روون و متمانەبەخشە بۆ خەڵکی کوردستان و هێزە ئەمنییەکان، کە سەرکردایەتیی سیاسی لە هەموو بارودۆخێکدا پشتیوانی پارێزەرانی ئارامی و سەقامگیرییە.

ئێران و عوممان لەسەر دیاریکردنی رێڕەوێکی نوێ لە گەروی هورمز گەیشتنە رێککەوتن.

ئیسماعیل بەقائی، وتەبێژی وەزارەتی دەرەوەی ئێران ئێران رایگەیاند، لەگەڵ عومان لەسەر تایبەتمەندییە جوگرافییەکانی رێڕەوی کەشتیوانی لە گەروی هورمز گەیشتوونەتە رێککەوتن.

وتیشی، لە دوو مانگی رابردووەوە وەک دوو وڵاتی هاوسنوری گەروەکە دانوستانەکانیان بەردەوام بووە تا رێڕەوێکی ئارام بۆ کەشتیوانیی بازرگانی دیاری بکان و لایەنە تەکنیکی، یاسایی، ئاسایش و ژینگەیییەکانی لەلایەن دامەزراوە پەیوەندیدارەکانەوە تاوتوێ کراون.

وتەبێژی وەزارەتی دەرەوەی ئێران ئەوەشی خستەڕوو، "لە نەبوونی رێگریی لایەنی سێیەمدا"، راگەیەندراوی هەڵسەنگاندن و داڕشتنەوەی کۆتایی راگەیەندراوی هاوبەشی نێوان تاران و ەمسقەت بڵاودەکرێتەوە، بەڵام هاوكات جەختی کردەوە کە رێککەوتنی هەردوو وڵات "بە تەنیا" بە مانای ئارامبوونی گەرووی هورمز نایەت.

ئەمڕۆ جێگری سەرۆکی یەکێتی، سەردانی فەرماندەیی هێزەکانی 70، فه‌رمانده‌یی پێشمه‌رگه‌ی به‌رگری و فریاكه‌وتن، بەڕێوبەرایەتی دژەتیرۆر و فەرماندەیی هێزەکانی کۆماندۆی کوردستانی کرد، لە دیدارەکاندا رۆڵی قارەمانانەی ئەو هێزانەی بەرز نرخاند.

رەفعەت عەبدوڵا، جێگری سەرۆکی یەکێتیی نیشتمانیی کوردستان، سەردانی فەرماندەیی هێزەکانی 70ـی کردوو لەلایەن فەریق ڕوکن عومەر ساڵح فەرماندەی فەرماندەیی هێزەکانی 70ـەوە، پێشوازیکرا .

جێگری سەرۆک رایگەیاند، پشتیوانی هێزێکی یەکگرتووی نیشتمانی و بەدیسپلین و پەروەردەکراو بەزانستی سەربازیین لەسەر بنەمای هاوسەنگی و پاراستنی بەها باڵاکانی پێشمەرگەی کوردستان.

هەر ئەمڕۆ رەفعەت عەبدوڵا، جێگری سەرۆکی یەکێتیی نیشتمانیی کوردستان، سەردانی فه‌رمانده‌یی پێشمه‌رگه‌ی به‌رگری و فریاكه‌وتنی کردو لەلایەن لیوا روكن رزگار جه‌بار محه‌مه‌د فه‌رمانده‌ی فه‌رمانده‌یی پێشمه‌رگه‌ی به‌رگری و فریاكه‌وتنەوە پێشوازیکرا .

جێگری سەرۆکی یەکێتی باسی لەتۆکمەکردن و پێشخستنی هێزەکان کرد بۆ ئەوەی هەمیشە وەک قەڵغانی بەرگری لەگەلی کوردو کوردستان رۆڵی قارەمانانەی خۆیان بگێڕن.

لەلایەکی ترەوە رەفعەت عەبدوڵا، جێگری سەرۆکی یەکێتیی نیشتمانیی کوردستان، سەردانی بەڕێوبەرایەتی دژەتیرۆری کردوو، لەلایەن وەهاب هەڵەبجەیی، فەرماندەی گشتی دژەتیرۆرەوە پێشوازی کرا، جێگری سەرۆک ڕۆڵی بەرچاوی هێزەکانی دژە تیرۆری لەڕووبەڕووبونەوەی تیرۆردا بەپێزانینەوە هەڵسەنگاندو هیوای خواست لەگەڵ هاوبەش و هاوپەیمانەکان بەردەوامبن لەڕیشەکێشکردنی تیرۆرو تیرۆریستاندا.

لە کۆتایی سەردانەکەیدا جێگری سەرۆکی یەکێتیی نیشتمانیی کوردستان، سەردانی فەرماندەیی هێزەکانی کۆماندۆی کوردستانی کردوو لەلایەن دیار عومەر فەرماندەی فەرماندەیی هێزەکانی کۆماندۆوە پێشوازیکرا، لەدیدارەکەدا کەخاتوو شاناز ئیبراهیم ئەحمەد، ئەندامی مەکتەبی سیاسی ئامادەیبوو،جێگری سەرۆک رایگەیاند هێزەکانی کۆماندۆ لەبەرگری و موقاوەمەتی خاكی پیرۆزی كوردستاندا جێگە دەستیان دیارەو لەکاتی ئاشتیشدا دەستی هاوکاری و یارمەتیدانتان شایانی پێزانینە.

خاتوو شاناز ئیبراهیم ئەحمەد، ئەندامی مەکتەبی سیاسی یەکێتیی نیشتمانیی کورستان بەڕێوەبەرایەتی گشتیی ئۆپراسیۆنەکانی ئاسایشی لە سلێمانی بەسەرکردەوە و لە دیدارێکدا لەگەڵ سەرخێڵ کەمال، گفتوگۆیان لەبارەی هەوڵەکانی پاراستنی سەقامگیری و ئارامی کرا.

دواتر و لە کۆبوونەوەیەکدا لەگەڵ ژمارەیەک لە ئەفسەر و پلەداران، خاتوو شاناز ئیبراهیم ئەحمەد سوپاسی کردن کە هەردەم هوشیار و چاوکراوەن و بە گیانبازییەکی بێوێنە، پاسەوانیی سەروماڵی هاووڵاتیانن و رۆڵی ستراتیژیی دەبینن لە بنبڕکردنی تیرۆردا.

هەر لەو کۆبوونەوەیەدا خاتوو شاناز ئیبراهیم ئەحمەد رایگەیاند، "دەستخۆشی و رێزم هەیە بۆ هەوڵی بێ وچانتان و هەردەم پشتیوانتان دەبم".

بەڕێوەبەری گشتی ئۆپراسیۆنەکانی ئاسایش خۆشحاڵی بەم بەسەرکردنەوەیە دەربڕی و سوپاسی پشتیوانییە بەردەوامەکانی خاتوو شاناز ئیبراهیم ئەحمەدی کرد، کە هەموو کات هەواڵی ئەم هێزانەی پرسیوە و لە خەمی سەلامەتییاندا بووە.

ئەنجوومەنی وەزیرانی هەرێمی کوردستان، لەسەر پێشنیازی لیژنەیەکی تایبەت بە چۆنیەتی رێکخستنی ماوەی خزمەت، رەزامەندی لەسەر پەسەندکردنی کۆنووسی هەژمارکردنی ماوەی خزمەتی سەربازی و ئەمنی بە شێوازی (ساڵێک بە دوو ساڵ) "دوو چەندانە" دەربڕی. 

وەزارەتی پێشمەرگەی هەرێمی کوردستان لە راگەیەنراوێکدا بڵاویکردەوە، ​بەپێی ناوەرۆکی نووسراوەکە کە ئاراستەی وەزارەتی پێشمەرگە و وەزارەتی ناوخۆ و ئەنجوومەن و دەزگای ئاسایشی هەرێم کراوە، ماوەی هەژمارکردنی ئەم خزمەتە لە رۆژی 4ـی تەمموزی 1992، لە راگەیاندنی یەکەم کابینەی حکومەتەوە دەستپێدەکات تا کۆتایهێنان بە ڕاژەکانیان، هەروەها پاڵپشت بە بڕیارەکانی ئەنجوومەنی وەزیران، دوا وادە بۆ هەژمارکردنی ئەم خزمەتە بە شێوازی ساڵێک بە دوو ساڵ تا رۆژی 31ـی کانوونی یەکەمی 2024 دیاریکراوە.

​ئاماژەی بەوەشکردووە، پرۆسەی هەژمارکردنی ئەم خزمەتە بە مەرجێک دەبێت کە کارمەند یان ئەفسەرەکە خانەنشینی ئەو ساڵانە لە موچەی بنەڕەتی بداتەوە. بەپێی زانیارییەکان، هەر پێشمەرگەیەک پێویستە %10ـی موچەی بنەڕەتیی 10 ساڵ بداتەوە کە دەکاتە نزیکەی سێ ملیۆن و 936 هەزار دینار، بۆ ئەفسەرانیش بڕەکە دەگاتە شەش ملیۆن و 336 هەزار دینار. سەرەڕای ئەوەش، جێبەجێکردنی ئەم بڕیارە زۆرەملێ نییە و بابەتێکی ئارەزوومەندانەیە، بەجۆرێک کە پێویستە فەرمانبەر یان ئەفسەرەکە خۆی داواکاری رەسمی بۆ هەژمارکردنی ئاراستەی فەرمانگەکەی بکات.

​وەزارەتی پێشمەرگە سەبارەت بە گواستنەوەی راژە ئەوەشی خستووەتەڕوو، بڕیارەکە جیاوازی لەنێوان سێکتەرەکاندا دەکات؛ بەجۆرێک ئەو کەسانەی لە هێزە سەربازی و ئەمنیەکانەوە راژەکەیان بۆ بەشی شارستانی گوێزراوەتەوە یان دەگوێزرێتەوە، هەژمارکردنی ساڵێک بە دوو ساڵ نەیانگرێتەوە، بەڵام ئەو کارمەند و ئەفسەرانەی میلاکیان لەنێوان دامەزراوە سەربازی و ئەمنیەکانی وەک پێشمەرگە، ناوخۆ و ئاسایشدا دەگوێزرێتەوە، مافی هەژمارکردنی خزمەتەکەیان بە ساڵێک بە دوو ساڵ بۆ دەپارێزرێت.

بانكی ناوەندیی سوریا پڕۆسەی گۆڕینەوەی دراوی كۆن بە دراوی نوێی لە سێ پارێزگای رۆژهەڵاتی وڵاتەكە تا 20ی ئاب درێژكردەوە.

سەفوەت رەسڵان، پارێزگاری بانكی ناوەندیی سوریا لە تۆڕی كۆمەڵایەتی ئێكس بڵاویكردەوە، بڕیاریان داوە پڕۆسەی گۆڕینەوەی دراوە كۆنەكانی وڵاتەكە بە دراوی نوێ لە پارێزگاكانی حەسەكە و رەققە و دێرەزوور تا 20ی ئاب درێژ بكەنەوە.

ئاماژەی بەوەشكرد، هاووڵاتییان دەتوانن لە رێگەی لقەكانی بانكی ناوەندیی سوریا و ناوەندەكانی دامەزراوەی پۆستەی سوریاوە تا ئەو رێكەوتە دراوە كۆنەكانیان رادەست بكەن و دراوی نوێ وەربگرن.

جەختیشی كردەوە، ئەوان لە كاریگەرییەكانی قۆناغەكە لەسەر ژیانی هاووڵاتییان تێدەگەن و بە بەرپرسیارێتی خۆیانی دەزانن لە واقیعەوە نزیك بن و بەدواداچوون بۆ پێویستییەكانی هاووڵاتییان بكەن.

بەلیغ ئەبو کلەل، سەرۆکی جێبەجێکاری دەستەی راگەیاندن و پەیوەندییەکانی عیراق رایگەیاند، ئامارەکان سەرکەوتنی پلانی نیشتمانیی پەیوەندییەکان دەسەلمێنن کە بە هەماهەنگی لەگەڵ کۆمپانیاکانی مۆبایل و لایەنە پەیوەندیدارەکان لە میانی زیارەتی چلەدا جێبەجێ کرا.

ئەبو کلەل لە راگەیەندراوێکدا ئاماژەی بەوە کرد: لە ماوەی نێوان 21ی تەمووز تا 4ی ئابی 2026، کۆی گشتیی پەیوەندییە تەلەفۆنییە ئەنجامدراوەکان لە پارێزگای کەربەلا گەیشتووەتە 208.4 ملیۆن پەیوەندی، کە بەسەر (205.6) ملیۆن پەیوەندیی ناوخۆیی و (2) ملیۆن پەیوەندیی نێودەوڵەتیدا دابەش بوون.

هەروەها کۆی گشتیی کورتە نامەکان (SMS) گەیشتووەتە 25.6 ملیۆن نامە (21.3 ملیۆن ناوخۆیی و 4.2 ملیۆن نێودەوڵەتی).

سەرۆکی جێبەجێکاری دەستەکە روونیشی کردەوە: قەبارەی هێڵی ئینتەرنێت و داتای ئاڵوگۆڕکراو لە رێگەی تۆڕەکانەوە گەیشتووەتە 30.5 هەزار تیرابایت، کە ئەمەش توانای ژێرخانی تۆڕەکانی پەیوەندی دەردەخات لە لەخۆگرتنی ملیۆنان بەکارهێنەر و پاراستنی کوالیتیی خزمەتگوزارییەکان.

سەبارەت بە بەکارهێنانی تۆڕە کۆمەڵایەتییەکان، ئەپڵیکەیشنی "تیک تۆک" لە پلەی یەکەمدایە بە قەبارەی 4.3 هەزار تیرابایت داتا، دوای ئەویش:

ئینستاگرام: 2.9 هەزار تیرابایت

فەیسبووک: 2.5 هەزار تیرابایت

یووتیووب: 1.2 هەزار تیرابایت

واتسئەپ: 867 تیرابایت

تێلیگرام: 376 تیرابایت

 دامەزراوەیەكی ژینگەییی ئاشكرایدەكات، لە ماوەی سێ دەیەی رابردوودا 15جۆر كارەساتی ژینگەیی لە عیراقدا تۆماركراون،  هۆشداریشیدا لە فراوانبوونی بە بیابانبوون.

روانگەی عیراقی سەوز راپۆرتێكی بڵاویكردەوە، کە تییدا ئاماژەبەوە دەکات کە لە ماوەی سێ دەیەی رابردوودا 15جۆر كارەساتی ژینگەیی، و مرۆیی لە عیراقدا تۆمار كراون، كە بوونە هۆی تێكچوونێكی سامانە سروشتییەكان و سیستمی ژینگەیی و كەمبوونەوەی بەرهەمی كشتوكاڵی و قووڵبوونەوەی فشارەكان لەسەر سامانە ئاوییەكان.

راپۆرتەكە ئاماژەی بەوەشداوە، نوێترین داتای نیشتمانی دەردەخات نزیكەی 55.5%ی رووبەری عیراق هەڕەشەی بیابانبوونی لەسەرە، لە كاتێكدا رێژەی زەوییە تێكچووەكان نزیكەی 23.2%ی رووبەری وڵات پێكدەهێنێت، ئەمەش قەبارەی فراوانبوونی ئاڵنگارییە ژینگەیییەكان دەردەخات. 

روانگەكە هۆشدارییدا لەوەی، بەردەوامبوونی ئەم كارەساتە كەڵەكەبووانە هەڕەشە لە ئاسایشی ئاو، خۆراك و تەندروستی هاووڵاتییانی عیراق دەكات و داواشی كرد پلانێكی نیشتمانی بۆ بەرەنگاربوونەوەی بیابانبوون دابنرێت.

 

بانكی ناوەندیی سوریا پڕۆسەی گۆڕینەوەی دراوی كۆن بە دراوی نوێی لە سێ پارێزگای رۆژهەڵاتی وڵاتەكە تا 20ی ئاب درێژكردەوە.

سەفوەت رەسڵان، پارێزگاری بانكی ناوەندیی سوریا لە تۆڕی كۆمەڵایەتی ئێكس بڵاویكردەوە، بڕیاریان داوە پڕۆسەی گۆڕینەوەی دراوە كۆنەكانی وڵاتەكە بە دراوی نوێ لە پارێزگاكانی حەسەكە و رەققە و دێرەزوور تا 20ی ئاب درێژ بكەنەوە.

ئاماژەی بەوەشكرد، هاووڵاتییان دەتوانن لە رێگەی لقەكانی بانكی ناوەندیی سوریا و ناوەندەكانی دامەزراوەی پۆستەی سوریاوە تا ئەو رێكەوتە دراوە كۆنەكانیان رادەست بكەن و دراوی نوێ وەربگرن.

جەختیشی كردەوە، ئەوان لە كاریگەرییەكانی قۆناغەكە لەسەر ژیانی هاووڵاتییان تێدەگەن و بە بەرپرسیارێتی خۆیانی دەزانن لە واقیعەوە نزیك بن و بەدواداچوون بۆ پێویستییەكانی هاووڵاتییان بكەن.