(نێد پڕایس) وتەبێژی وەزارەتی دەرەوەی ئەمەریکا ڕایگەیاند: سەرەڕای ھەر گۆڕانکارییەک لە حکومەتی تەلئەبیب و سەرکەوتنی ھێزە ئۆپۆزسیۆنەکان، پشتیوانی بەھێزی ئەمەریکا بۆ ئیسڕائیل بەردەوام دەبێت، وتیشی "ئیسڕائیل ھەمیشە وەکو ھاوبەشێکی ستراتیژی گرنگی ئەمەریکا دەمێنێتەوە".

(نێد پڕایس) ئاماژەی بۆ ئەوەکرد: پێکھێنانی کابینەی نوێی حکومەت بابەتێکە پەیوەستە بەو حیزبانەوە کە بەشدارییان تێدا کردووە، کاریگەری نییە لەسەر پەیوەندییە ئەمنییەکانی نێوان ھەردوو وڵات.

ڕۆژی سێ شەممە (یائیر لاپید) ڕابەری ئۆپۆزسیۆنی ئیسڕائیل لەگەڵ حیزبە سیاسییەکان ڕێکەوتن لەسەر پێکھێنانی حکومەتی نوێی ئیسڕائیل، بەوەش کۆتاییان بە سەرۆکایەتی (بنیامین نەتانیاھو) ھێنا کە ماوەی  ١٢ ساڵە لە پۆستی سەرۆک وەزیران بەردەوامە.

ئاگرێکی گەورە لە کەمپی ئاوارەکانی کۆمەڵگەی شاریا کەوتەوە و زیاتر لە ٣٥٠ خێوەتی ئاوارەکان سوتان، دانیشتوانی کەمپەکەش گلەییان لە کەمتەرخەمی لێپرسراوانی کەمپەکە ھەیە.

پەیامنێری کوردسات نیوز رایگەیاند، نزیک سەعات دووی دوانیوەڕۆی ئەمڕۆ ئاگرێکی گەورە لە کەمپی ئاوارەکانی کۆمەڵگەی شاریای سەر بە پارێزگای دھۆک کەوتەوە و بەھۆیەوە زیاتر لە ٣٥٠ خێوەتی ئاوارەکان سوتان و تاوەکو ئێستاش ھۆکاری کەوتنەوەی ئاگرەکە ئاشکرا نەکراوە. 

ئاماژەی بەوەشکرد، کەمپەکە نزیکەی ٢٠ ھەزار ئاوارەی قەزای شەنگالی تێدایە و بە وتەی دانیشتوانی کەمپەکە لەسەرەتادا کە ئاگرەکە کەوتەوەتەوە ھانایان بۆ لێپرسراوانی کەمپەکە بردووە بەڵام لێپرسراوانی کەمپەکە پێیان وتوون ئۆتۆمبێلی ئاگرکوژێنەوەی کەمپەکە لەکار کەوتووە.

محەمەد جەواد زەریف وەزیری دەرەوەی ئێران لە پەیامێکیدا بەبۆنەی پێکھێنانی کابینەی نوێی حکومەت لە ئیسرائیل و کۆتایی بە دەسەڵاتی ١٢ ساڵەی بینامین ناتانیاھۆ وەک سەرۆک وەزیرانی ئەو وڵاتە وتی، ئێستا کاتی گۆڕینی و ھەڵویست و ئاراستەکانە لە بەرامبەر تاران.

محەمەد جەواد زەریف ئاماژەی بۆ ئەوەکرد، بینامین ناتانیاھۆش بە ھەمان شێوەی دۆناڵد ترامپ و مایک پۆمپیۆ و دژە ئێرانیەکان زەلیلانەی چووە ناو زبڵدانی مێژووەوە، ئەمەش چارەنووسی ھەموو ئەوانەیە کە بیریان لە زیانگەیاندن بە ئێران دەکردەوە، و ئێران بە سەربەرز ڕاوەستاوە.

رائید قادر فەقێ ڕەسول لێپرسراوی بنکەی ھاتوچۆی پیرەمەگروون بە کوردسات نیوزی راگەیاند، دوانیوەڕۆی ئەمڕۆ لە سەر رێگای سەرەکی دوکان - سلێمانی لە نزیک گوندی "کانی خان"ی سەر بە ناحیەی سورداش، ئۆتۆمبێلێک لە جۆری بارھەڵگر کە تانکیەی ئاوی ھەڵگرتبوو، بەھۆی بەرزی تانکی ئاوەکە خۆی کێشا بە ڕاگرێکی بۆری گواستەوەی ئاودا. 

ئاماژەی بۆ ئەوەشکرد، رووداوەکە ھیچ زیانێکی گیانی لێ نەکەوتەوە بەڵام بەھۆی کەوتنەخوارەی راگری بۆرییە ئاوەکە بۆ ماوەی زیاتر لە سەعاتێک  لە ھەردوو سایدی ھاتوچۆ رێگای سەرەکی دوکان - سلێمانی داخرا و دواتر بە ھاوکاری تیمەکانی ھاتوچۆ رێگاکە بە رووی ھاوڵاتیاندا کرایەوە.

پەیامنێری کوردسات نیوز رایگەیاند، لە کاتی سەردانکردنی ئۆتۆمبێلێک بۆ گوندی "شەڕانشێ" لە ناحیەی باتیفا، لەلایەن سوپای تورکیا بە چەکی جۆری دۆشکە تەقەی زۆر لێکرا و ئۆتۆمبێلەکە گەڕایەوە، ھاوکات بەھۆی تەقەکانەوە ئاگرێک لە پۆش و پاوانی گوندەکە کەوتەوەوە. 

وتیشی،  لەبەر بوونی بنکەی سەربازی تورکیا لە نزیک گوندی شەڕانشێ، ناتوانرێت زیانەکان دەستنیشان بکرێت.

لە ماوەی رابردوودا دانیشتوانی گوندی "شەڕانشێ" بەھۆی بۆردومانی بەردەوامی سوپای تورکیا گوندەکەیان چۆڵکردووە و لە ئێستادا رێگە نادرێت ھیچ کەسێک سەردانی بکات.

عەمید ئاسۆ تەھا بەڕێوەبەری پۆلیسی پارێزگای سلێمانی بە کوردسات نیوزی راگەیاند، ئەو تۆمەتبارەی ئێوارەی ئەمڕۆ لە گەڕەکی سەرچنار لە سلێمانی مامی خۆی کوشت لەلایەن ھێزەکانیانەوە لە شارەزور دەستگیر کرا.

بە پێی ڕاگەیەندراوێکی وەزارەتی تەندروستی ھەرێم، لە ماوەی ٢٤ سەعاتی ڕابردوو لە ھەرێمی کوردستان ٦١٠ کەسی تر تووشی ڤایرۆسی کۆرۆنا بوون و شەش تووشبووی تری کۆرۆنا گیانیان لە دەستدا و  ٧١٠ تووشبووی تری ڤایرۆسەکە چاکبوونەتەوە.

ڕاگەیاندراوی (٢٤) کاتژمێری تایبەت بە نەخۆشی ڤایرۆسی کۆڕۆنای نوێ   COVID١٩                         ژمارە (٤٦٤)

١. پشکنین: (٩٦١٩ پشکنینی نوێ) 
• (٣٢٣٢) ھەولێر
• (٢٢٨٣) سلێمانی
• (٣٥٥٢) دھۆک
• (١٨) ھەڵەبجە
• (٤٦٧) گەرمیان
• (٦٧) ڕاپەڕین
 
٢. تووشبوو: (٦١٠ تووشبووی نوێ)
• (٩٢) ھەولێر
• (٢٤٦) سلێمانی
• (٢٢٤) دھۆک
• (٥) ھەڵەبجە
• (٣٧) گەرمیان
• (٦) ڕاپەڕین

٣. چاکبوون: (٧١٠ چاکبوون)
• (٢١٠) ھەولێر
• (٢٢٩) سلێمانی
• (١٩٨) دھۆک
• (١٤) ھەڵەبجە
• (٥٠) گەرمیان
• (٩) ڕاپەڕین
 
٤. مردن: (٦ مردن)
• (١) ھەولێر
• (١) سلێمانی
• (٤) دھۆک
• (٠) ھەڵەبجە
• (.) گەرمیان
• (٠) ڕاپەڕین 

ئاماری گشتی:
کەڕەنتین ھاوڵاتی ٢١٨٧١ (٢١٨٧١ دەرچوو)
پشکنین ١٩١٣٩٥١ (٦٦٥٨٠٦ ھەولێر، ٤٦٠٣٤٠ سلێمانی، ٧٧٢١٤٨ دھۆک، ١٥٦٥٧ ھەڵەبجە)
تووشبوون ١٧٢٤٨٣ (٥٣٣٤٥ ھەولێر، ٥٥١٤٩ سلێمانی، ٦٠٢٦٨ دھۆک، ٣٧٢١ ھەڵەبجە)
چاکبوون ١٥٩٣٣٤ (٤٩٧٨٨ ھەولێر، ٤٨٤٢٠ سلێمانی، ٥٧٦٥٨ دھۆک، ٣٤٦٨ ھەڵەبجە)
لەژێر چارەسەر ٨٨٤١ (٢٣٨٢ ھەولێر، ٤٧٥٩ سلێمانی، ١٥٩٧ دھۆک، ١٠٣ ھەڵەبجە)
مردن ٤٣٠٨ (١١٧٥ ھەولێر، ١٩٧٠ سلێمانی، ١٠١٣ دھۆک، ١٥٠ ھەڵەبجە)
بۆ زانیاری زیاتر سەردانی داشبۆردی حکومەتی ھەرێمی کوردستان بکەن لەم لینکە

(https://gov.krd/coronavirus/dashboard/).

وێڕای دەستخۆشی بۆ پزیشکان و کارمەندانی تەندروستی و ھەموو تیمەکانی پزیشکی کە لە ئەرکدان، جەخت دەکەینەوە ھاووڵاتیان پابەندبن بە ڕێنماییەکانی تەندروستی و دورکەوتنەوە لە شوێنی قەڵەبالغ و دانانی ماسک و وەرگرتنی ڤاکسین، وە لەکاتی پێویستدا پەیوەندی بکەن بە ھێڵی گەرمی ژمارە (١٢٢). 

 وەزارەتی تەندروستی       
حکومەتی ھەرێمی کوردستان    
٤ی حوزەیران ٢٠٢١

لیژنەی ناوچە کوردستانییەکانی دەرەوەی ئیدارەی ھەرێم لە پەرلەمانی کوردستان لە راگەیەنراوێکدا ئیدانەی ئەو رەوشە دەکەن کە ڕۆژانە و بەشێوەی جیاواز ڕووبەڕووی ئێزدییەکان دەبنەوە و ئاماژەش بۆ ئەوە دەکات بەھۆی کەوتەوەی ئاگرەکەی کەمپی ئاوارەکانی کۆمەڵگەی شاریا لە دھۆک، زیاتر لە ٥٠٠ خێوەت سووتاوە، بۆ ئەوەوی ھاوڵاتیان بگەڕێنەوە سەر ماڵ و حاڵی خۆیان لیژنەکە داوا دەکات پەلە بکرێت لە جێبەجێکردنی ئەو ڕێککەوتنەی لە نێوان حکومەتی ھەرێم و عێراق بۆ ئاسایکردنەوەی ڕەوشی ئەمنی و دابینکردنی خزمەتگوزارییەکان بۆ شەنگال کراوە. 

لیژنەی ناوچە کوردستانییەکانی دەرەوەی ئیدارەی ھەرێم راشیگەیاند، رەوشی ناوچە کوردستانییەکان پێویستییان بە ئاساییکردنەوەیە و ناکرێ لەوە زیاتر دوابخرێت و ھاوڵاتیان ببنە قوربانی.

دەقی راگەیەندراوەکە...

وەکو لیژنەی ناوچەکوردستانییەکانی دەرەوەی ئیدارەی ھەرێم لە پەرلەمانی کوردستان، بەھەموو شێوەیەک ئیدانەی ئەم بارودۆخە دەکەین کە ڕۆژانەو بەشێوەی جیاواز ڕووبەڕووی خوشک و برایانی ئێزدییەکانمان دەبنەوە، ئەمڕۆش زیاتر لە ٥٠٠ خێوەت لە کەمپی شاریا سووتاوە، ئەم رووداوە گرنگی و پێویستیی دانوستانەکانی حکومەتی ھەرێمی کوردستان لەگەڵ حکومەتی عێراقی دووپات دەکاتەوە کەپێویستە پەلە بکرێت لە جێبەجێکردنی ئەو ڕێککەوتنەی بۆ شنگال کراوەو ڕەوشی ئەو ناوچەیە لەڕووی ئەمنی و خزمەتگوزارییەوە کاری لەسەر بکرێت، تاوەکو ھاووڵاتییانمان بگەڕێنەوە سەر ماڵ و حاڵی خۆیان.

لەکۆتاییدا ڕایدەگەیەنین کە دۆخی ناوچەکوردستانییەکان پێویستییان بە ئاساییکردنەوەیەو ناکرێ لەوە زیاتر دوابخرێ و ھاووڵاتییانمان ببنە قوربانی.

لیژنەی ناوچەکوردستانییەکانی دەرەوەی ئیدارەی ھەرێم لە پەرلەمانی کوردستان
٤ی حوزەیرانی ۲٠۲۱

ئەو ئەندامەی لیژنەی دارایی پەرلەمانی عیراق راشیدەگەیەنێت، ئەو بەرەوپێشچونانە دوای ئەوە ھاتونەتە دی لەماوەی رابردوو وەفدەکانی ھەرێم چەندین سەردانیان بۆ بەغدا ئەنجامداوە.

شیروان میرزا راشیگەیاند، لەدواین سەردانی شاندی ھەرێم بۆ بەغدا بەسەرۆکایەتی قوباد تاڵەبانی جێگری سەرۆک وەزیرانی ھەرێم چەندین دیداری گرنگ بۆ چارەسەرکردنی کێشە داراییەکانی ھەرێم ئەنجامدراون و پر بەرھەم بوون.

ریاز عەبدولئەمیر بەرێوەبەری فەرمانگەی گشتی وەزارەتی تەندروستیی عێراق رایگەیاند، کەڕووی رەش جۆرێک لە نەخۆشییەکانی کەڕوو بەھۆی لەدەستدانی بەرگری جەستە، لە ئەنجامی نەخۆشی شەکرە دروست دەبێت.

راشیگەیاند، تۆمارکردنی ئەو نەخۆشییە لە عێراق و زۆرینەی وڵاتانی جیھان نوێ نیە و پێش بڵاوبوونەوە کۆرۆناش، توشبوون بەونەخۆشییە ھەبووە.

وتیشی، بەشێک لە پارێزگاکانی باشووری عێراق رایانگەیاندووە، حاڵەتی توشبوون بەو نەخۆشییان تۆمارکردووە، بەڵام وەک وەزارەت تەنھا حاڵەتەکانی شاری ناسریەیان تۆمارکردووە و وەزارەتی تەندروستی لیژنەیەکی پێکھێناوە، بۆ چاودێریکردنی رەوشەکە لە شارەکانی بەغداد و ناسریە.

قوباد تاڵەبانی جێگری سەرۆکی حکومەتی ھەرێم دوای سەردانەکەی بۆ بەغداد کە چەند رۆژێکی خایاند و زنجیرەیەک کۆبوونەوەی لەگەڵ لێپرسراوانی حزبی و حکومی عێراق ئەنجامدا رایگەیاند، لەگەڵ حکومەتی عێراق نزیکن لە رێککەوتنی کۆتایی لەسەر میکانیزمەکانی جێبەجێکردنی یاسای بودجەی عێراق.
ئاماژەی بەوەشکردووە، نیازپاکی ھەردوولا بۆ پابەندبوون بە دەقی یاساکە، کاریگەری باشی دەبێت لەسەر رەوشی دارایی ھەرێم و پەیوەندییەکان لەگەڵ بەغداد و ھەرێمی کوردستانیش دەباتە قۆناغێکی نوێوە.

ئەنجومەنی ئاسایشی تورکیا لە راگەیەندراوێکدا دوای کۆبوونەوەی لەگەڵ "رەجەب تەیب ئەردۆغان" بڵاویکردەوە، "ئەنقەرە" سوورە لەسەر بەردەوامیدان بە ئۆپراسیۆنەکانی لە سنورەکانی خاکی سوریا و عێراق.
وتیشی، رێز لە سەروەری خاکی وڵاتانی دراوسێ دەگرن، بەڵام گەیشتن بە ئاشتی و ئاسایش لە ناوچەکە ئامانجی سەرەکییانە. 

ئەو راگەیەندراوەی ئەنجومەنی ئاسایشی تورکیا دوای لێدوانێکی "ئەردۆغان" دێت کە وتبووی، "مەخمور" ھێندەی "قەندیل" بۆ ئەوان گرنگە.

تورکیا لە ساڵی ٢٠١٦ەوە سێ ئۆپراسیۆنی سەربازیی لە باکوری سوریا ئەنجامداوە، کە پارێزگاکانی "حەلەب و رەققە و حەسەکە"ی گرتەوە، لەسەر خاکی عێراقیش لە ناوچە سنورییەکانی ھەرێم ئۆپراسیۆنەکانی بەردەوامە.

قوباد تاڵەبانی جێگری سەرۆکی حکومەتی ھەرێمی کوردستان لە مەراسیمێکدا لە قەزای کۆیە رایگەیاند،  لەگەڵ لایەنی عێراقی گفتوگۆمان لەسەر چۆنێتی جێبەجێکردنی بودجەی ٢٠٢١ کرد و لەماوەیەکی نزیکدا ھیچ بەربەستێک لەبەردەم حکومەتی فیدراڵ نامێنێت بۆ ناردنی شایستە داراییەکانی ھەرێم.

وتیشی، گەشبینم بەوەی لە ریشەوە بتوانین کێشەکانی نێوان ھەرێم و بەغداد چارەسەر بکەین، کە ھیچ بیانویەکیش نەما دەبێت فشار بخرێتە سەر حکومەتی فیدراڵی.

قوباد تاڵەبانی جێگری سەرۆکی حکومەتی ھەرێمی کوردستان لە مەراسیمی دابینکردنی ١٠ گۆڕەر بۆ ١٠ وێستگەی کارەبا لە کۆیە رایگەیاند، کەرتی کارەبا لە ئاستی چاوەڕوانی خەڵک و وەزارەت نییە و بۆ نەھێشتنی کێشەی کارەبا پێویستیان بە ھەماھەنگی زیاترە.

وتیشی، ھەرێم لە بەرھەمھێنانی کارەبا کێشەی نییە و کێشە لە گواستنەوە و دابەشکردنی کارەبا ھەیە.

رونیکردەوە، لە بەرھەمھێنانی کارەبا توانیویانە پشت نەبەستن بە گازۆیل و نەوتی رەش، بەڵام تێچووی کارەبا بۆ حکومەتی ھەرێم بەرزە و  پێویستیان بە ھاوکاری کەرتی تایبەت ھەیە.

قوباد تاڵەبانی دەشڵێت، لە پرسی کارەبا ھەماھەنگی لەگەڵ بەغداد گرنگە و رەنگە بتوانین کێشەی کارەبای حکومەتی فیدراڵ چارەسەر بکەین.

لای خۆشییەوە کەمال محەمەد ساڵح وەزیری کارەبای حکومەتی ھەرێم رایگەیاند، گرنگی بە سێکتەری بەرھەمھێنان و دابەشکردنی کارەبا دراوە و لە بواری دابەشکردنی کارەبا زیاتر لە ٤٠٠ پڕۆژە ئەنجامدراوە.

وتیشی، وێستگەکانی دێرەلوک و زاخۆ بە زووترین کات دەکەونەکار و کێشەی کارەباش لە وێستگەی دەربەندیخان چارەسەر کراوە.

ئێنریکی مۆرا نێردەی یەکێتی ئەوروپا کە رێکخەری دانوستانەکانی ڤییەننایە بۆ زیندوکردنەوەی رێککەوتنی ئەتۆمی ئێران رایگەیاندوە، دانوستانەکان پێشکەونێکی بەرچاویان بەخۆوە بینیوە و پێشبینی دەکەن لە خولی داھاتووی دانوستانەکاندا کە ھەفتەی ئایندە بەڕێوەدەچێت بگەنە رێککەوتن.

حەسەن رۆحانی سەرۆک کۆماری ئێرانیش رایگەیاند، لە دانوستانەکانی ڤییەننا پرسە سەرەکییەکانی نێوان ئەمریکا و ئێران چارەسەر بووە و تەنھا چەند بابەتێک ماوە، وتیشی، تاکە بژاردە لەبەردەم لایەنەکانی ناو رێککەوتنی ئەتۆمی گەڕانەوەیە بۆ سەر مێزی گفتوگۆ.

عەباس عێراقچی یاریدەدەری وەزیری دەرەوەی ئێرانیش رایگەیاند، لەگفتوگۆکانی ڤییەننا بەرەوپێشچونی باش بەدەستھاتون، لەگەڵ ئەوەشدا ژمارەیەک دۆسیەی سەرەکی ماون کە دەبێت یەکلایی بکرێنەوە.

رێکخراوی تەندروستی جیھانیی لە راگەیەندراوێکدا بڵاویکردووەتەوە، کەڕوی رەش نەخۆشییەک نییە نیگەرانی دروست بکات بەتایبەتی لە دوای تۆمارکردنی چەند حاڵەتێک لە وڵاتانی خۆرھەڵاتی ناوەڕاست لەدوای ھندستان. 

دوپاتیشیکردووەتەوە، نەخۆشییەکە دەگمەنە و ھەندێک کات توشی ئەو کەسانە دەبێت کە بەرگری لەشیان زۆر نزمە و لە ژینگەیەکی ناتەندروستدان.

لەلایەکی تریشەوە لە دوای تۆمارکردنی سێ حاڵەتی گیانلەدەستدان بە نەخۆشی کەڕوی رەش لە عێراق، وەزارەتی تەندروستی داوای کردووە ھاوڵاتیان بەشێوەیەکی فراوانتر ڤاکسینەکانی کۆرۆنا بەکاربھێنن بۆئەوەی بەرگرییان لەدژی ڤایرۆسەکە زیاد ببێت و پارێزراوبن لە توشبون بە نەخۆشییە مەترسییدارەکان.