ئابووری
وەزارەتی دارایی هەرێم لیستی موچەی مانگی 10ـی فەرمانبەرانی بڵاوکردەوە و بە گوێرەی لیستەکە لە رۆژی یەکشەممەوە دەستدەکرێت بە دابەشکردنی و چوار رۆژ دەخایەنێت.
ئەمڕۆ یەکشەممە، وەزارەتی دارایی هەرێم لیستی دابەشکردنی موچەی مانگی 10ـی موچەخۆرانی هەرێمی بڵاوکردەوە، بە گوێرەی لیستەکە رۆژی یەکشەمە دەستبەدابەشکردنی دەکرێت و رۆژی چوارشەممە کۆتایی دێت.
وەزارەتی دارایی هەرێم پێشتر رایگەیاندبوو، 834 ملیار و 920 ملیۆن دینار وەک تەمویلی موچەی مانگی 10ـی موچەخۆران بۆ هەرێم نێردراوە، بەڵام بەهۆی تەواو بونی دەوامی رەسمی وەزارەتەکەیان رێکاری وەرگرتنەکەی دەکەوێتە سبەینێ پێنجشەممە.
دارایی هەرێم ئاماژەی بەوەشکردبوو، وەک مانگەکانی رابردوو، عیراق 120 ملیار دیناری لە کۆی تەمویلی موچە بڕیوە و بەهۆی رێکارەکانەوە، دابەشکردنی دەکەوێتە رۆژی یەکشەممە.
وەزارەتی دارایی هەرێم کاتی بڵاوکردنەوەی لیستی موچەی ئاشکراکرد و دەشڵێت، " رێکارەکانی گواستنەوەی پارە بۆ سەر هەژماری موچەخۆران دەکەوێتە رۆژی یەکشەممە".
وەزارەتی دارایی هەرێم رایگەیاندووە:: 834 ملیار و 920 ملیۆن دینار وەک تەمویلی موچەی مانگی 10ـی موچەخۆران بۆ هەرێم نێردراوە ، هەروەها دارایی عیراق 120 ملیار دیناری لە کۆی تەمویلی موچە بڕیوە.
دارایی هەرێم ئاماژەی بەوەشداوە، عیراق 4 ملیار و 476 ملیۆن و 540 هەزار دیناری لە تەمویلی موچەی مانگی تشرینی یەکەم نەناردووە کە بریتییە لە شایستەی موچەی مانگەکانی رابردووی خانەنشینانی شارستانی و سەربازی.
دارایی هەرێم سەبارەت بە بڵاوکردنەوەی لیستی موچە و کاتی دابەشکردن رایگەیاندووە: لەبەرئەوەی کاتی داخڵبوونی پارە بۆ سەر هەژماری وەزارەتمان کەوتە کۆتایی دەوامی رەسمی، بەو هۆیەوە تەواوکردنی رێکارەکان و وەرگرتنی پارەکە لە لقی هەولێری بانکی ناوەندی عیراق دەکەوێتە سبەینێ لە کاتی دەوامی رەسمی، هەروەها ئەمڕۆ چوارشەممە لیستی موچەی سەرجەم موچەخۆران بڵاودەکرێتەوە.
"بەهۆی ئەوەی رێکارەکانی گواستنەوەی پارە بۆ سەر هەژماری بانکی موچەخۆران پێویستی بە رێکاری تەکنیکییە لە بانکی ناوەندی عیراق بە سیستەمی ( ACH ) و جێبەجێکردنی ئەو رێکارەش پێویستی بە ماوەی رۆژێکی تەواو هەیە، ئەوەش وادەکات تەواو کردنی رێکارەکانی گواستنەوەی پارە بۆ سەر هەژماری موچەخۆران بکەوێتە رۆژی یەکشەممە، چونکە رۆژی هەینی و شەممە پشووی رەسمییە لە بانکی ناوەندی عیراق و ناتوانرێت لەکاتی پشودا ئەو رێکارانە ئەنجام بدرێت"، وەزارەتی دارایی هەرێم وادەڵێت.
بێستون سەلام، پەیامنێری کوردسات نیوز رایگەیاند: موچەی مانگی 10ـی موچەخۆرانی هەرێم خەرجکرا.
بەپێی زانیارییەکانی کوردسات نیوز: موچەی مانگی 10ی موچەخۆرانی هەرێم خراوەتە سەر هەژماری وەزارەتی دارایی هەرێم، هەروەها ئەمڕۆ لیستی دابەشکردنی موچە بڵاودەکرێتەوە و سبەینێ دەست بە دابەشکردن دەکرێت.
نوێدەکرێتەوە...
وەزیری دادی عیراق باس لە کۆبوونەوەیان لەگەڵ سەرۆک وەزیران دەکات و رایگەیاندووە، " بە سوپاسەوە جەنابی سەرۆک وەزیران چەند بڕیارێکی گرنگی بۆ کەرکوک دەرکرد".
د. خالد شوانی وەزیری دادی عیراق رایگەیاندووە: لە کۆبوونەوەی ئەمڕۆماندا لەگەڵ جەنابی سەرۆک وەزیران عەلی زەیدی، دوای تاوتوێکردنی کێشەی کەمیی کارەبا و نیگەرانییەکانی هاووڵاتیانی شارەکە، بە سوپاسەوە جەنابی سەرۆک وەزیران چەند بڕیارێکی گرنگی بۆ کەرکوک دەرکرد؛ دابینکردنی 5 ملیۆن لیتر گاز و زیادکردنی 150 مێگاوات کارەبا بۆ چارەسەرکردنی بنەڕەتیی کێشەی کارەبا و دابینکردنی هەلی کار بۆ خەڵکی کەرکوک لەلایەن ئەو کۆمپانیا بیانییانەی کە لە پارێزگاکەدا کار دەکەن.
وەزیری دادی عیراق ئاماژەی بەوەشداوە: بەناوی خۆمان و نوێنەرانی کەرکوکەوە، سوپاس و پێزانینی زۆرمان ئاڕاستەی جەنابی سەرۆک وەزیران دەکەین بۆ هاوکاری و بەدەنگەوەهاتنی بەردەوامی بەمەبەستی چاککردنی دۆخی شارەکەمان.
بانکی ناوەندیی عیراق بڕیاریداپشکی دۆلاری گەشتیاران لە دوو هەزارەوە بۆ سێ هەزار دۆلار بەرز بکاتەوە، هاوکات دیاریکردووە کە دوو مانگ جارێک گەشتیار دەتوانێت لە رێگە رەسمییەکانەوە ئەم پشکە وەربگرێت.
بانکی ناوەندیی عیراق، ئەمڕۆ ئاشکرایکرد، لە سبەینێ سێشەممە، 3ـی تشرینی دووەمی 2026وە، پشکی دۆلاری کاشیی گەشتیاران لە دوو هەزار دۆلارەوە بۆ سێ هەزار دۆلار بەرز دەکرێتەوە، بەجۆرێکیش لە ساڵێکدا بەپێی رێکار و مەرجە پەسەندکراوەکان زۆرترین رێگەپێدان شەش جار دەبێت.
نووسینگەی راگەیاندنی بانکی ناوەندی لە راگەیەنراوێکدا ئاماژەی بەوەکرد، لەپێناو دابینکردنی پێداویستییەکانی هاووڵاتییان لە دراوی بیانی لە کاتی گەشتکردنیان بۆ دەرەوەی وڵات، بانکی ناوەندی بڕیاریدا پشکی گەشتیاران بۆ سێ هەزار دۆلاری ئەمریکی بەرز بکاتەوە.
ئەوەشی خستەڕوو، پێدانی ئەم پشکە دوو مانگ جارێک دەبێت، واتە زۆرترین رێگەپێدان شەش جارە لە ساڵێکدا بەپێی رێنماییە پەسەندکراوەکان.
بانکی ناوەندی ئاشکراشیکرد، ئەم هەنگاوە بە ئامانجی رەخساندنی ئاسانکاریی زیاترە بۆ گەشتیاران تا بتوانن لە رێگە رەسمییەکانەوە دراوی بیانی بۆ داپۆشینی خەرجییەکانیان دەستبکەوێت.
ئاژانسی فرانس پرێس بڵاویكرده‌وه، بەهۆی بەرەوەپێشچوونی دیپلۆماسی لە رۆژهەڵاتی ناوەڕاست، نرخەکانی نەوت بەشێوەیەکی بەرچاو دابەزین، لە ئێستاشدا نرخی بەرمیلێک خاوی برێنت بە 106 دۆلار مامەڵەی پێوەدەکرێت.
ئاژانسی فرانس پرێس ئاشکرایکرد، هۆکاری دابەزینی نرخی نەوت دەگەڕێتەوە بۆ دروستبوونی ئومێد بەرانبەر بەدیهێنانی پێشڕەویی دیپلۆماسی لە رۆژهەڵاتی ناوەڕاست، ئەوەش دوای ئەوەی چەندین راپۆرتی رۆژنامەوانی ئاماژەیان بە هەوڵەکانی واشنتۆن و تاران کرد بۆ لەپێشینەدان بە دیالۆگ و دانوستان بەرانبەر ئاڵۆزبوونی زیاتری رەوشەکە.
بەپێی ئاژانسەکە، نرخى یەک بەرمیل نەوتی خاوی برێنت بۆ بە ڕێژەی %6 دابەزی و گەیشتە 106 دۆلار، هاوکات نرخی بەرمیلێک نەوتی خاوی تەکساسی ئەمریکیش بە رێژەی %6دابەزی و گەیشتە 97 دۆلار.
وەزیری دارایی عیراق ئیمزای لەسەر تەمویلکردنی موچەی مانگی 10ـی موچەخۆرانی هەرێم کردووە و نووسراوەکە ئاڕاستەی بەشی ژمێریاری وەزارەتی دارایی کراوە.
بێستون سەلام، پەیامنێری کوردسات نیوز رایگەیاند: فالح ساری، وەزیریی دارایی عیراق فەرمانیداوە بە تەمویلکردنی موچەی مانگی 10ـی موچەخۆرانی هەرێم و نووسراوەکە ئاڕاستەی بەشی ژمێریاری وەزارەتی دارایی عیراق کراوە.
بەپێی زانیارییەکانی پەیامنێری کوردسات نیوز، رێکارەکان لە بەشی ژمێریاری جێبەجێ دەکرێن و دواتر موچەی هەرێم دەخرێرتە سەر هەژماری وەزارەتیی دارایی هەرێم.
جێگری سەرۆک وەزیرانی عیراق بۆ کاروباری ئابوری دەڵێت؛ نرخی دۆلار لە بازاڕدا بە شێوەیەکی بەرچاوە دادەبەزێت و زۆر نزیک دەبێتەوە لە نرخی رەسمی.
محەمەد تەمیم جێگری سەرۆک وەزیرانی عیراق بۆ کاروباری ئابوری رایگەیاند، پەیوەندییەکانی حکومەتی عیراق لەگەڵ ئەمریکادا لەسەر بنەمای بەهێز و متمانە دامەزراون، ئاماژەی بەوەشکرد، لە دوو مانگی رابردوودا ئەمریکا رێوشوێنی پێویستی گرتووەتەبەر بۆ ناردنی سێ ملیار دۆلاری کاش بۆ عیراق.
جەختیشیکردەوە، رۆژی پێنجشەممەی رابردوو بەشێکی دۆلارەکە گەیشتووەتە عیراق و سبەینێش بەشێکی تر بە بەهای زیاتر لە 500 ملیۆن دۆلار دەگاتە عیراق.
جێگری سەرۆک وەزیرانی عیراق ئەوەشی خستەڕوو، ئەو رێوشوێنانەی لەلایەن حکومەت و بڕیاری بانکی ناوەندییەوە دەگیرێنەبەر، لەگەڵ خستنەڕووی ئەو بڕە زیادەیەی دۆلار لە بازاڕدا، دەبنە هۆی دابەزینی نرخی دۆلار و نزیکبوونەوەی لە نرخی رەسمی، یان تەنانەت یەکسانبوونی وەک ئەوەی لە هەندێک لە وڵاتانی دراوسێدا هەیە.
نرخی زێڕ لە بازاڕەكانی جیهان و هەرێمی كوردستان دابەزی و سەندیكای زێڕنگەرانیش هۆكارەكەی بۆ پێشهاتە سیاسییە نێودەوڵەتییەكان دەگەڕێنێتەوە.
هەندرێن وەرتی سەرۆكی لقی هەولێری سەندیكای زێڕنگەرانی كوردستان لە لێدوانێكدا بۆ كوردسات نیوز وتی، دابەزینی نرخەكان راستەوخۆ پەیوەستن بە بازاڕی جیهانیی و ئەو پێشهاتە سیاسی و ئابوورییانەی لەسەر ئاستی نێودەوڵەتی رودەدەن.
وتیشی، روداوە نێودەوڵەتییەكان راستەوخۆ و ناڕاستەوخۆ كاریگەرییان لەسەر نرخی زێڕ هەیە، داواشی لە هاووڵاتیان كرد لە كاتی مامەڵەكردن و كڕین و فرۆشتنی زێڕدا بە وریایی و ئاگادارییەوە هەنگاو بنێن، بۆئەوەی لە ئەگەری ناجێگیریی نرخەكاندا زیان نەكەن.
نرخی زێڕ لە هەولێر
نرخی داندراو لەلایەن سەندیکای زێڕنگران
ئەمڕۆ
یەک ئۆنسی زێڕ=3875$
نرخی فرۆشتن
مسقاڵێک زێڕ عەیار 22=977,000
مسقاڵێک زێڕ عەیار 21=933,000
مسقاڵێک زێڕعەیار 18=800,000
مسقاڵێک زێڕعەیار 14=622,000
مسقاڵێک زێڕعەیار 12=533,000
مسقاڵێک زێڕعەیار 9=400,000
سوتەمەنییە شلەکە، کە سەرچاوەی یەکەمی وزەیە لە جیهاندا نرخەکەی بەردەوام لە گۆڕاندایە و بەراورد بە دوێنێش هەریەکە لە نەوتی خاوى برێنت و تەکساسی ئەمەریکیش نزمبونەوەیان تۆمار کرد، نەوتی برێنت لە سەرو 114 دۆلارەوە مامەڵەی پێوەدەکرێت.
ئەمڕۆ پێنجشممە، بەهۆی گرژییەکانەوە نرخی نەوت بەردەوامە لە ناجێگیرییەکەی و بەراورد بە دوێنی نزمبوەتەوە؛ لە ئێستادا بەرمیلێک نەوتی خاوی برێنت لە بازاڕەكانی جیهان بە 114 دۆلار و 10 سەنت مامەڵەی پێوە دەکرێت.
هاوكات جیا لە نەوتی برێنت، نرخی بەرمیلێک نەوتی رۆژئاوای تێكساسیش بە 101 دۆلار و 40 سەنت لە بازاڕەکاندا مامەڵەی پێوەدەکرێت.
وردبینی لیستی موچەی مانگی 10ـی موچەخۆرانی هەرێم کۆتاییهاتووە و دوای ئیمزای وەزیری دارایی عیراق، موچە بۆ هەرێم دەنێردرێت.
بێستون سەلام، پەیامنێری کوردسات نیوز رایگەیاند: سەرچاوەیەکی تایبەت پێیراگەیاندم کە، وردبینی لیستی موچەی مانگی 10ـی موچەخۆرانی هەرێم کۆتاییهاتووە نوسراوەکە ئاڕاستەی نوسینگەی فالح ساری وەزیری دارایی عیراق کراوە بۆ ئەوەی ئیمزای تەمویلکردنەکە بکات.
بەپێی زانیارییەکان، هەرکات وەزیری دارایی عیراق ئیمزای کرد، موچەی مانگی 10 بۆ هەرێم دەنێردرێت.
رەزامەندی ئەنجومەنی نوێنەران وەرگیراوە بۆ دابەشکردنی 200 لیتر نەوت بە نرخی پاڵپشتیکرا بۆ هەر ماڵێکی ناوچە شاخاوییەکان.
ئەندامانی فراکسیۆنی یەکێتیی نیشتمانیی کوردستان لە ئەنجومەنی نوێنەران رایانگەیاند: رەزامەندی سەرۆکی ئەنجومەنی نوێنەران وەرگیراوە بۆئەوەی 200 لیتر نەوت بۆ هەر ماڵێکی ناوچە شاخاوییەکان بە نرخی پاڵپشتیکراو دابەشبکرێت.
ئاماژەیان بەوەشداوە: 110 ملیۆن لیتر نەوت بۆ پارێزگاکانی سلێمانی و هەڵەبجە دابینکراوە، هەروەها 140 ملیۆن لیتر نەوت بۆ پارێزگاکانی دهۆک و هەولێر.
قائیمقامییەتی سلێمانی نرخی راگرتنی ئۆتۆمبێلی لە گەراجەکاندا دیاریکرد و دەشڵێت، "بەکارهێنانی شەقام و شۆستەکان بۆ راگرتنی ئۆتۆمبێل بە هەموو شێوەیەک قەدەغەیە".
قائیمقامیەتی سلێمانی رایگەیاندووە، نرخەکانی راگرتنی ئوتۆمبێل لە گەراجەکاندا بۆ ماوەی پێنج سەعات بەم شێوەیە دیاریکراون؛ گەراجی زەوی گڵ 1000 دینار، گەراجی کۆنکرێت و سەرداپۆشراو 1250 دینار، گەراجی داخراو1500 دینار.
بابان ئەحمەد، سەرۆکی لیژنە هاوبەشەکانی قائیمقامیەتی سلێمانی ئاماژەی بەوەشداوە: دوای تێپەڕبوونی پێنج سەعاتەکە ، نرخەکان دەبنە دووهێندە، هەروەها بەکارهێنانی شەقام و شۆستەکان بۆ راگرتنی ئۆتۆمبێل بە هەموو شێوەیەک قەدەغەیە و دانانی کامێرای چاودێریش لە تەواوی گەراجەکاندا کراوەتە مەرجێکی سەرەکی.
سەبارەت بە سزای سەرپێچیکاران، بابان ئەحمەد دەڵێت: هەر خاوەن گەراجێک رێنماییەکان پێشێل بکات و نرخی زیاد لە شۆفێران وەربگرێت، رووبەڕووی سزای دارایی توند دەبێتەوە کە لە 50 هەزار دینارەوە دەستپێدەکات تا پێنج ملیۆن دینار، تەنانەت لەئەگەری بەردەوامی سەرپێچی مۆڵەتی کارکردنی لێ دەسەندرێتەوە.
سەرۆکی لیژنە هاوبەشەکان دەشڵێت، "ئەم بڕیارە رێنماییەکی نوێ نییە، بەڵکو پێشتر لە ساڵی 2021دا بڕیاری لێدراوە و تەواوی گەراجەکان پێی پابەند کراون، بەڵام بەردەوام چاودێری و بەدواداچوونی بۆ دەکرێت بۆ رێگری لە هەر سەرپێچییەک، هەروەها قائیمقامیەتی سلێمانی داوا لە هاووڵاتییان دەکات لە کاتی بەدیکردنی هەر سەرپێچییەک لە نرخەکان یان رێنماییەکاندا، لە رێگەی ژمارە هێڵی گەرمی (07708677777) پەیوەندی بکەن و سکاڵاکانیان تۆمار بکەن.
سەرچاوەیەک لە دارایی هەرێم رایدەگەیەنێت؛ پێداچوونەوە بە لیستی موچەی موچەخۆرانی هەرێم لە بەغداد دەستیپێنەکردووە، بەڵام پێشبینی ناکرێت وەک مانگەکانی رابردوو دوا بکەوێت.
سەرچاوەیەک لە وەزارەتی دارایی هەرێم بەکوردسات نیوزی راگەیاند، تائێستا وردبینی لە لیستی موچەی موچەخۆرانی هەرێمی کوردستان لەبەغداد نەکراوە.
ئەوەشی خستەڕوو، ئەمڕۆ پەیوەندییان بە وەزارەتی دارایی عیراقەوە کردوە و پێیان راگەیاندوون، هێشتا پێداچونەوە بە لیستی موچەی موچەخۆرانی هەرێمی کوردستان دەستیپێنەکردووە.
ئەو سەرچاوەیە ئاشکراشیکرد، کاری پێداچوونەوە لەلایەن بەشی موازەنە لە وەزارەتی دارایی عیراق بەڕێوەدەچێت.
راشیگەیاند، پێشبینی ناکەن پێداچونەوەی لیستی موچەی فەرمانبەرانی هەرێم وەکو مانگەکانی رابردوو بکەوێتە دوای تەمویلکردنی هەموو وەزارەت و دەستە و دامەزراوەکانی عیراقەوە.
جێگەی ئاماژەیە، وەزاەتی دارایی هەرێمی کوردستان لەکۆتایی هەفتەی رابردووە لیستی موچەی فەرمانبەرانی هەرێمی کوردستانی رادەستی وەزارەتی دارایی عیراق کردووە.
بانکی ناوەندی عیراق بڵاویکردەوە، یەدەگی عیراق لە 70 ملیار دۆلارەوە گەیشتووەتە 80 ملیار دۆلار و نزیکەی ملیارێک دۆلاری کاشیش گەیشتووەتە عیراق.
بانکی ناوەندی عێراق، ئەمڕۆ، بوژانەوە و بەرزبوونەوەی یەدەگی دۆلاری عیراقی بۆ نزیکەی 80 ملیار دۆلار لە ماوەی مانگەکانی ئەیلول و تشرینی یەکەمی ئەمساڵدا راگەیاند، هاوکات پەیامێکی دڵنیایی ئاڕاستەی هاووڵاتیان کرد سەبارەت بە بەردەستبوونی دۆلاری کاش و ئاماژەی بە بەردەوامیی گەیشتنی دۆلاری نوێی لە رۆژانی داهاتوودا کرد.
وتەبێژی بانکی ناوەندی عیراق رایگەیاند، کۆی یەدەگی دراوی دۆلار، چ لە هەژماری بانکی ناوەندی بێت یان لە هەژماری حکومەت لە بانکى فیدراڵی، لە ماوەی مانگەکانی ئەیلول و تشرینی یەکەمی ساڵی 2026دا باشتر بووە دوای ئەوەی پێشتر بۆ 73 ملیار دۆلار دابەزیبوو، بەڵام ئێستا یەدەگەکە گەڕاوەتەوە بۆ نزیکەی 80 ملیار دۆلار."
وتیشی، رەوشی یەدەگی زێڕ هیچ گۆڕانکارییەکی بەسەردا نەهاتووە و بڕەکەی لە 170 تۆندا ماوەتەوە.
وتەبێژی بانکی ناوەندی جەختیکردەوە، باشبوونی یەدەگی دۆلار لەم دوو مانگەدا بەهۆی داهاتی هەناردەکردنی نەوت بووە کە گەیشتووەتە نزیکەی شەش ملیار دۆلار، ئەمەش ئاستێکی پەسەندکراوە لە سایەی قەیرانی ئێستادا.
ئاماژەی بەوەشکرد، گرفتە سەرەکییەکەی عیراق پشتبەستنی زۆرە بە نەوت وەک داهاتی گشتی و بۆ دابینکردنی خەرجییەکان، بەتایبەت موچە.
وتەبێژی وەزارەتی بانکی ناوەندی، داوای لە وەزارەتی دارایی کرد هەوڵەکانی چڕبکاتەوە بۆ دۆزینەوەی سەرچاوەی دیکە تا پشتبەستن بە یەدەگەکان کەمبکرێتەوە.
لە بەشێکی تری قسەکانیدا ئەوەشی خستەڕوو، عەلی زەیدی سەرۆکی ئەنجومەنی وەزیران خۆی بە شێوەیەکی راستەوخۆ چاودێری گەیشتنی دۆلاری کاش دەکات، کە هەر فڕۆکەیەکی بارهەڵگر نزیکەی نیو ملیار دۆلاری تێدایە.
وتیشی، دوو فڕۆکەی بارهەڵگر بەبڕی پێویستی دۆلاری کاش گەیشتوونەتە وڵات و لە رۆژانی داهاتوودا دۆلاری تری کاش دەگاتە عیراق.
وتەبێژی بانکی ناوەندی ئەوەشی خستەڕوو، گەیشتنی بەردەوامی دۆلاری کاش بەستراوەتەوە بە بارودۆخی ئەمنییەوە، چونکە هەڵگیرسانی هەر شەڕ یان ئاڵۆزییەک دەبێتە ئاستەنگ لەبەرانبەر دابینکردنی پاراستنی پێویست بۆ گواستنەوەی ئەو بڕە پارانە کە هەر بارێکیان نیو ملیار دۆلارە.
پڕۆژەی رووناکی ئاگادارییەکی ئاراستەی هاوبەشانی کارەبا دەکات و رایدەگەیەنێت، لە رۆژی دەرچوونی پسووڵەوە 50 رۆژ مۆڵەت دەدرێت بۆ دانەوەی ئابوونەی کارەبا، بە پێچەوانەوە کارەبای سەرپێچیکاران دەپچڕێندرێت.
پڕۆژەی رووناکی لە راگەیەنراوێکدا هاوبەشانی کارەبا ئاگادار دەکاتەوە کە ماوەی پارەدانی پسووڵەی کارەبا 50 رۆژە. ئەم ماوەیەی پارەدان لە رۆژی دەرچوونی پسووڵەکەوە لەسەر سەکۆی "ئی-پسوولە" (e-Psula) دەست پێ دەکات، نەک لە کاتی گەیشتنی پسووڵەی کاغەزی.
ئاماژەی بەوەشکرد، ئەو هاوبەشانەی لە ماوەی دیاریکراودا '50 رۆژ' پارەی پسووڵەکەیان نادەن، رێکاری یاساییان لەسەر جێبەجێ دەکرێت و کارەباکەیان دەپچڕێندرێت.
پڕۆژەی رووناکی ئەوەشی خستەڕوو، لە حاڵەتی پچڕانی کارەبادا بەهۆی پارەنەدانەوە، گەڕاندنەوەی کارەبا تەنها دوای دانی تەواوی بڕی پسووڵەکە دەست پێ دەکات و بە گشتی تا 24 سەعات دەخایەنێت؛ بەڵام ئەگەر پارەکە لەڕێگەی کارمەندی کۆکەرەوەوە درابێت، پرۆسەکە کاتێکی زیاتری دەوێت.
راشیگەیاند، لە ئێستادا نوێترین پسووڵەی کارەبا بۆ زۆربەی هاوبەشان لە سەکۆی "ئی-پسوولە" بەردەستە و داوا لە هاوبەشان دەکرێت مانگانە بەدواداوچوون بۆ پسووڵەکانیان بکەن.
لەکۆتایی راگەیەنراوەکەدا، بۆ ئاگاداربوون لە دەرچوونی پسوولە و زانیارییە نوێیەکان بە بەردەوامی، پڕۆژەی رووناکی داوا لە هاوبەشان دەکات یەکەکانیان لە رێگەی ماڵپەڕی رەسمیی رووناکییەوە تۆمار بکەن.