بانکی "گوڵدمان ساکس" هۆشداری دەدات لەوەی ئەگەر هێرشەکانی سەر کەشتییەکان لە رۆژهەڵاتی ناوەڕاست پەرەبستێنن، بەرمیلێک نەوت بگاتە 120 دۆلار، هاوکات پێشبینی دەکرێت نرخەکانی گازی سروشتی و دیزڵیش بەرزبوونەوەی بەرچاو بەخۆیانەوە ببێنن.

دان سترۆیڤن، هاوسەرۆکی توێژینەوەی کاڵا جیهانییەکان لە کۆمەڵەی گوڵدمان ساکس رایگەیاند، ئاڵۆزییەکانی ئەم دواییە ئاماژەن بۆ ئەوەی مەترسییەکانی پەککەوتنی گواستنەوەی دەریایی بوونەتە هۆکارێکی سەرەکی کە پێویستە چاودێری بکرێن.

لە لایەکی ترەوە، بانکەکە ئاماژەی بەوە کردووە: ئەگەر هەناردەکردنی نەوتی ناوچەکە بگەڕێتەوە ئاستی ئاسایی خۆی، ئەوا نرخی بەرمیلێک نەوت بۆ دەوروبەری 80 دۆلار دادەبەزێت، ئەمەش لە کاتێکدایە بەپێی زانیارییەکانی بلومبێرگ، نرخی نەوتی خاوی برێنت لە دەوروبەری 97 دۆلاردا مامەڵەی پێوە دەکرێت.

بەپێی پێشبینییەکانی گوڵدمان ساکس، تێکچوونی دابینکردن لە بازاڕەکانی گازی سروشتی و بەرهەمە پاڵێوراوەکانی نەوت وەک دیزڵ، کاریگەرییەکەی توندتر دەبێت لەسەر بازاڕی نەوتی خاو.

ئەم بەرزبوونەوەیەی نرخی نەوت لە کاتێکدایە کە ترس لە پەککەوتنی درێژخایەنی دابینکردنی وزە لە رۆژهەڵاتی ناوەڕاست رووی لە زیادبوون کردووە، بەتایبەت لەگەڵ ئاڵوگۆڕی هێرشەکانی نێوان ئەمریکا و ئێران بۆ سەر کەشتی و نەوتکێشەکان لە گەرووی هورمز و ناوچەکانی تردا.

ئیدارەی زانیاریی وزەی ئەمریکا (EIA) ئاشکرای کرد کە دوای هەفتەیەک لە تۆمارکردنی ئاستی "سفر"، هەناردەکردنی نەوتی خاوی عیراق بۆ ئەمریکا لە هەفتەی رابردوودا دەستی پێکردووەتەوە و گەیشتووەتە تێکڕای 38 هەزار بەرمیل لە رۆژێکدا.

بەپێی ئامارەکان، عیراق لە ریزبەندی نۆیەمینی گەورەترین دابینکەرانی نەوتی خاو بۆ ئەمریکا هاتووە لەو ماوەیەدا.

لە بەرانبەردا، کەنەدا بە کۆنترۆڵکردنی تەواوەتیی پێشەنگی ریزبەندییەکە سەرووی لیستەکەی گرتووە بە تێکڕای4.011 ملیۆن بەرمیل لە رۆژێکدا.

ریزبەندیی وڵاتانی هەناردەکار بۆ ئەمریکا لەو هەفتەیەدا بەم شێوەیە بووە:

_کەنەدا: 4.011 ملیۆن بەرمیل لە رۆژێکدا

_فەنزوێلا: 598 هەزار بەرمیل

_سعودییە: 379 هەزار بەرمیل

_مەکسیک: 210 هەزار بەرمیل

_بەڕازیل: 137 هەزار بەرمیل

_کۆلۆمبیا: 111 هەزار بەرمیل

_ئیکوادۆر: 101 هەزار بەرمیل

_نەیجیریا: 71هەزار بەرمیل

_عیراق: 38 هەزار بەرمیل

_لیبیا: 1.000 بەرمیل لە رۆژێکدا

ئەم ژمارانە دەریدەخەن کە پاڵاوگە ئەمریکییەکان بۆ دابینکردنی بەشە هەرە گەورەی پێداویستییەکانیان لە نەوتی خاو، نزیکەی بە تەواوەتی پشتیان بە هاوردەکردن لە کەنەدابەستووە لە بەراورد لەگەڵ بڕە جیاواز و بپچڕپچڕەکانی تری وڵاتانی بەرهەمهێنەر لە سەرانسەری جیهاندا.

بە بڕیاری عەلی زەیدی، سەرۆک وەزیرانی عیراق، یەک ملیۆن پارچە زەوی لە پارێزگاکانی عیراق بەسەر هاووڵاتیاندا دابەش دەکرێت بە سەرجەم خزمەتگوزارییەکانیشەوە.

نووسینگەی راگەیاندنی عەلی زەیدی، سەرۆک وەزیرانی عیراق لە راگەیندراوێکدا دەڵێت: بە بڕیاری سەرۆک وەزیرانی عیراق و لەژێر ناونیشانی 'دەستپێشخەری نیشتمانی'، یەک ملیۆن پارچە زەوی بە سەرجەم خزمەتگوزارییەکانی وەک ئاو، کارەبا و خزمەتگوزارییەکانی دیکە بەسەر هاووڵاتیاندا دابەشدەکرێت.

بەپێی راگەیەندراوەکە، هاووڵاتیانی پارێزگاکانی عیراق لەو بڕیارە سودمەند دەبن و باس لە پارێزگاکانی هەرێم نەکراوە، هەروەها ئەو خێزانانە مافی وەرگرتنیان هەیە کە، هیچ ئەندامێکیان زەوی یان یەکەی نیشتەجێبوونی بەناوەوە نەبێت.

سەبارەت بە ناوتۆمارکردن، بەپێی زانیارییەکانی نوسینگەی راگەیاندنی سەرۆک وەزیرانی عیراق، لە مانگی 10ـی ئەمساڵدا، هاووڵاتیان دەتوانن لە رێگەی لینکێکەوە ناوی خۆیان تۆمار بکەن و لە قۆناغی یەکەمدا 216 هەزار پارچە زەوی دابەشدەکرێت.

سوتەمەنییە شلەکە، کە سەرچاوەی یەکەمی وزەیە لە جیهاندا نرخەکەی بەردەوام لە گۆڕاندایە و بەراورد بە دوێنێش هەریەکە لە نەوتی خاوى برێنت و تەکساسی ئەمەریکیش  بەرزبونەوەیان تۆمار کرد، بەرمیلێک نەوتی برێنت  لە سەرو 95 دۆلارەوە مامەڵەی پێوەدەکرێت.

ئەمڕۆ هەینی، بەهۆی گرژییەکانەوە نرخی نەوت بە ناجێگیری ماوەتەوە وبەردەوامە لە بەرزبوونەوە؛  لە ئێستادا بەرمیلێک نەوتی خاوی برێنت لە بازاڕەكانی جیهان بە 95 دۆلار و 74 سەنت مامەڵەی پێوە دەکرێت.

هاوكات جیا لە نەوتی برێنت، نرخی بەرمیلێک نەوتی رۆژئاوای تێكساسیش  بە  92 دۆلار و 10سەنت لە بازاڕەکاندا مامەڵەی پێوەدەکرێت.

نرخی بەنزینی جۆری E10 لە ئەڵمانیا گەیشتە ئاستێکی مێژویی و پێوانەیی، ئەوەش بەهۆی هەڵکشانی گرژییە جیۆپۆلەتیکییەکانی نێوان ویلایەتە یەکگرتووەکانی ئەمریکا و ئێران و کارگەرییە ژینگەیییەکانەوە.

بەپێی ئامارەکانی یانەی ئۆتۆمبێلی ئەڵمانی (ADAC)، ناوەندی نرخی لیترێک بەنزینی E10 بووەتە 2.21  یۆرۆ، بەمەش ریکۆردی پێشووی مانگی ئاداری 2022ی تێپەڕاند کە 2.2 یۆرۆ بوو.

شارەزایان ئاماژە بەوە دەکەن کە ئەم ریکۆردە لەسەر بنەمای نرخی ناوی هەژمارکراوە، بەوپێیەی بە هەژمارکردنی رێژەی هەڵئاوسان، نرخەکان لە ساڵی 2012دا بەراورد بە ئێستا بەرزتر بوون.

هاوتەریب لەگەڵ ئاڵۆزییەکانی رۆژهەڵاتی ناوەڕاست، شەپۆلێکی وشکەساڵی بەردەوام گوشارەکانی سەر بازاڕی سووتەمەنی زیاتر کردووە.

دابەزینی ئاستی ئاوی رووبارە سەرەکییەکان گواستنەوەی بەرهەمە نەوتییەکانی لە رێگەی ئاوییەوە تووشی ئاستەنگ کردووە، ئەمەش کۆمپانیا دابینکەرەکانی ناچارکردووە بۆ گواستنەوە پەنا بباتە بەر رێگەی وشکانی یان تێچوویەکی زیاتر بۆ بارکردنی ئاوی بدەن.

لەلایەکی ترەوە، ئەم شەپۆلی بەرزبوونەوەیە وڵاتانی دراوسێشی گرتووەتەوە، لە هۆڵەندا نرخی سووتەمەنی ئاستێکی پێوانەیی نوێی تۆمارکرد و لە وێستگە گەورەکاندا نرخی لیترێک بەنزین گەیشتە 2.26 یۆرۆ، کە بە بەرزترین ئاست لە مێژووی ئەو وڵاتەدا دادەنرێت.

وەزیری نەوتی عیراق جەخت لە زیادکردنی ئاستی بەرهەمهێنان و هەناردەکردنی نەوت دەکاتەوە و دەڵێت، پلانێکی نوێ بۆ پشتگیریکردنی بودجەی گشتیی عیراق دەستپێدەکات.

وەزارەتی نەوتی عیراق لە راگەیەنراوێکدا ئاشکرایکرد، باسم محەمەد، وەزیری نەوت سەرپەرشتی کۆبوونەوەی وەزارەتەکەی کردووە بە ئامادەبوونی بریکار و راوێژکار و بەڕێوەبەرە گشتییەکان، لە کۆبوونەوەکەدا جەختی لەپێکەوە کاردن کردووەتەوە بۆ زاڵبوون بەسەر کێشەکاندا.

لە کۆبوونەوەکەدا باسم محەمەد پێویستە تەواوی ئاستەنگەکانی بەردەم کەرتی نەوت چارەسەر بكرێن و ئاستی بەرهەمهێنان و هەناردەکردن زیاد بکرێت، بە مەبەستی پشتگیریکردنی بودجەی گشتیی دەوڵەت.

لە راگەیەنراوەکەدا هاتووە، وەزیری نەوت راسپاردەکانی سەرۆک وەزیران عەلی زەیدی گەیاندووەتە ئامادەبووان بۆ دابینکردنی پشتگیریی تەواو بۆ ستافی وەزارەت، بە ئامانجی جێبەجێکردن و خێراکردنی پڕۆژەکان لە وادەی دیاریکراوی خۆیاندا.

وەزیری نەوت ئاماژەی بەوەشکرد، ئاڕاستەی ئەرکەکانیان لەم قۆناغەدا پشت بە هەڵسەنگاندنی بەردەوام دەبەستێت بۆ بەڕێوەبەرانی کۆمپانیا و فەرمانگەکان لەسەر بنەمای دەستپاکی و لێهاتوویی، جەختیشی لە بەردەوامیی هەوڵەکان کردەوە بۆ رووبەڕووبوونەوەی گەندەڵی.

لە بەشێکی تری قسەکانیدا دڵنیاییدا لەوەی شێوازی ئابوریی نوێ بۆ کەرتی پاڵاوتن و دابەشکردن دەستکاریی شایستە داراییەکانی فەرمانبەران ناکات و مافەکانیان "هێڵی سورە"، دەشڵێت ئەم شێوازە نوێیە بۆ ماوەی چوار مانگ دەخرێتە ژێر هەڵسەنگاندنەوە.

سوتەمەنییە شلەکە، کە سەرچاوەی یەکەمی وزەیە لە جیهاندا نرخەکەی بەردەوام لە گۆڕاندایە و بەراورد بە دوێنێش هەریەکە لە نەوتی خاوى برێنت و تەکساسی ئەمەریکیش  بەرزبونەوەیان تۆمار کرد، بەرمیلێک نەوتی برێنت  لە سەرو 91دۆلارەوە مامەڵەی پێوەدەکرێت.

ئەمڕۆ سێشەممە، بەهۆی گرژییەکانەوە نرخی نەوت بە ناجێگیری ماوەتەوە، لە ئێستادا بەرمیلێک نەوتی خاوی برێنت لە بازاڕەكانی جیهان بە 91 دۆلار و 37 سەنت مامەڵەی پێوە دەکرێت.

هاوكات جیا لە نەوتی برێنت، نرخی بەرمیلێک نەوتی رۆژئاوای تێكساسیش  بە  86 دۆلار و 98سەنت لە بازاڕەکاندا مامەڵەی پێوە دەکرێت.

سبەینی کرێکارانی خانەنسینکراو موچەی مانگی هەشت وەردەگرن و داوایان لیدەکرێت سەردانی بانکی فیدڕاڵی بکەن.

بەڕێوەبەرایەتیی گشتیی کار و دەستەبەری کۆمەڵایەتی بڵاویکردوەتەوە،  سبەینێ موچەی کرێکارانی خانەنشین کراو دەتوانن موچەکانیان بۆ مانگی هەشت وەرگرن.

بەرێوەبەرایەتییەکە راگەیەندراوێکی بڵاوکردوەتەوە و تێیدا هاتووە؛ ئاگاداری کرێکارانی خانەنشینکراو دەکات، سبەینێ  دەست بە دابەشکردنی موچەکانیان بۆ مانگی ئاب دەکرێت.

ئاماژە بەوەشکراوە، بۆ وەرگرتنی موچەکانیان، کرێکارانی خانەنشینکراو دەتوانن سەردانی بانکی فیدراڵی بکەن.

پشتگیری سەرۆکی ئەنجومەنی نوێنەرانی عیراق و ئیمزای پێویست بۆ سێ داواکاری گرنگ لە کۆکراوەتەوە و ئاڕاستەی لیژنەی دارایی ئەنجومەنەکە کراوە.

د. بڕیار رەشید، ئەندامی ئەنجومەنی نوێنەرانی عیراق رایگەیاندووە: بە ئیمزای بەشێک لە پەرلەمانتاران و پشتگیری سەرۆکی پەرلەمان؛ سێ داواکاریی گرنگ ئاڕاستەی لیژنەی دارایی کران، تا لە بودجەی داهاتوودا چارەسەر بکرێن.

د. بڕیار رەشید دەڵێت: لە ماوەی رابردوودا، بۆ هەر یەکێک لەو سێ داواکارییە گرنگە، ئیمزای پێویستی ئەندامانی ئەنجومەنی نوێنەرانی عیراقمان کۆکردووەتەوە و بە پشتگیری سەرۆکی پەرلەمانەوە، بە شێوەیەکی رەسمی ئاڕاستەی لیژنەی دارایی کراون، بۆ ئەوەی لە چوارچێوەی بودجەی گشتیی داهاتوودا چارەسەرێکی یاسایی و دارایییان بۆ بدۆزرێتەوە

د. بڕیار رەشید دەڵێت سێ داواکارییەکە بریتین لە:

یەکەم؛ دەرچووانی کۆلێژەکانی پزیشکی ددان و دەرمانسازی، داواکاری بۆ دابینکردنی دەرفەتی دامەزراندن و تەرخانکردنی پلەی تایبەت بۆ ئەو دەرچووانەی کە بەهۆی بارودۆخی دارایی و ئابووریی ساڵانی رابردووەوە، دەرفەتی دامەزراندنیان بۆ نەڕەخساوە، بە تایبەتی لەبەر پێویستیی بەردەوامی نەخۆشخانە و دامەزراوە تەندروستییەکان بە پسپۆڕییەکانیان.

دووەم؛ پلەبەرزکردنەوە و شایستە داراییەکانی فەرمانبەرانی هەرێمی کوردستان، داوامان کردووە ماف و شایستە دارایی و کارگێڕییەکانی پلەبەرزکردنەوەی فەرمانبەران، کە لە ساڵانی رابردوودا بەهۆی کێشە داراییەکان دواخراون، بە شێوەیەکی دادپەروەرانە جێبەجێ بکرێن و جیاوازی لەنێوان فەرمانبەرانی هەرێم و ناوچەکانی دیکەی عیراق نەکرێت.

سێهەم؛ مامۆستایانی وانەبێژی لادراو، پشتیوانیمان لە داواکاریی نزیکەی 700 مامۆستای وانەبێژ کردووە، کە هەندێکیان بۆ ماوەی 10 تا 12 ساڵ خزمەتیان کردووە، بەڵام لە پرۆسەی گۆڕینی وانەبێژان بۆ گرێبەست بەشدار نەکراون داوامان کردووە مافیان بگەڕێندرێتەوە، خزمەتەکانیان لەبەرچاو بگیرێت و پێداویستیی دارایی بۆ گەڕاندنەوەیان بۆ دامەزراوە پەروەردەییەکان دابین بکرێت.

د. بڕیار رەشید ئاماژەی بەوەشداوە: ئەم هەنگاوانە لە چوارچێوەی هەوڵ و کاری پەرلەمانیدان و بە مانای دڵنیایی سەد لە سەدی جێبەجێبوونیان نییە، بەڵام بەدواداچوونمان بەردەوام دەبێت، هیوامان وایە سەرجەم پەرلەمانتاران، لە هەموو فراکسیۆنەکان و بەتایبەتی فراکسیۆنە کوردستانییەکان، هاوکار و پشتیوانی ئەم داواکارییانە بن تا بە هەوڵی هاوبەش بگەنە ئەنجام.

نرخی نەوت لە بازاڕەکانی جیهاندا بە رێژەی %3 بەرزبووەوە و نرخی هەر بەرمیلێک نەوتی خاوی برێنت 90 دۆلاری تێپەڕاند.

هاوکات لەگەڵ نەوتی برێنتدا، نرخی نەوتی خاوی تێکساسی ئەمریکیش بەرزبووەوە و گەیشتە سەروو 85 دۆلار بۆ هەر بەرمیلێک، لە ئێستادا بازاڕە جیهانییەکان بە وردی چاودێری پێشهاتە ئەمنییەکان دەکەن، بە تایبەت کە هەر دەستکەوتنێک لە جووڵەی کەشتیگەلی نەوتدەرهێنەرەکان لە ناوچەی کەنداو کاریگەریی راستەوخۆی لەسەر نرخەکان دەبێت.

ئەم بەرزبوونەوە خێرایەی نرخەکان دوای ئەوە هات کە گرژییە سەربازییەکانی ئەمریکا و ئێران لە ناوچەکەدا توندتر بوونەوە، ئەمەش نیگەرانییەکی زۆری لای وەبەرهێنەران دروستکردووە کە بێت و پرۆسەی هەناردەکردنی نەوت لە رێگەی گەروی هورمزەوە رووبەڕووی پەککەوتن یان ئاستەنگ ببێتەوە.

لە قەزای دوکان، رۆژانە 50 لیتر بەنزین بە نرخی 750 دیناری دابەشدەکرێت و لە سەعات 7ـی بەیانییەوە شۆفێران دەتوانن وەریبگرن.

قائیمقامیەتی قەزای دوکان رایگەیاندووە: لەپێناو خزمەتکردن و دابینکردنی پێداویستیی هاووڵاتییان، لە رۆژانی داهاتوودا بۆ هەر ئۆتۆمبێلێک تەنها بڕی 50 لیتر بەنزینی پاڵپشتیکراوی حکومی بەنرخی 750 دینار دابەش دەکرێت.

قائیمقامیەتی دوکان دەشڵێت: بەبڕیاری وەزارەتی سامانە سروشتییەکان، پێدانی بەنزین تەنها لەسەنتەری قەزاکان دابەش دەکرێت و لەئێستادا هیچ بڕیارێک نیە بۆ ناحیەکان، تێکردنی بەنزین بە دەبە بە هەموو شێوەیەک قەدەغەیە، هەرکەسێکیش ئەو کارە بکات، رووبەڕووی رێکاری توندی یاسایی دەبێتەوە.

بەپێی راگەیەندراوەکەی قائیمقامیەتی قەزای دوکان، رۆژانە دابەشکردنی بەنزین لە سەعات 7ـی بەیانی بەردەوام دەبێت تا ئەوکاتەی بڕی بەنزینی دیارکراو کۆتایی دێت.

سبەینێ موچەی مامۆستایانی گرێبەستی وەزارەتی پەروەردە و خوێندنی باڵاو توێژینەوەی زانستی دەکرێت.

وەزارەتی دارایی حکومەتی هەرێم رایگەیاندووە: رۆژی یەکشەممە 30ـی 8ـی 2026، دەست بە دابەشکردنی موچەی مانگی حەوتی مامۆستایانی گرێبەستی وەزارەتی پەروەردە و خوێندنی باڵاو توێژینەوەی زانستی دەکرێت.

دارایی هەرێم دەشڵێت: هاوکات لەهەمان کاتدا دەست بە دابەشکردنی موچەی مانگی حەوتی سەرجەم ئەو فەرمانبەرانە دەکرێت کە لەدوای ( 1ـی 7ـی 2024) بە شێوەی گرێبەست و هەمیشەیی لەسەر میلاکی دامەزراوەکانی حکومەتی هەرێم دامەزراون و شایستەکانیان لەسەر داهاتی ناوخۆی هەرێمی کوردستان خەرج دەکرێت.

دەستەی دەستپاکی عیراق دۆسیەیەکی گەورەی گەندەڵی لە پارێزگای سەڵاحەدین ئاشکرادەکات.

بەپێی راگەیەندراوێکی دەستەی دەستپاکی عیراق، لە ماڵی جێگری بەڕێوەبەری تۆماری خانوبەرەی پارێزگای سەڵاحەدین، دەستیان بەسەر تاپۆی 95 موڵک و خانودا گرتووە.

لە راگەیەندراوەکەشدا هاتووە، ژنە تۆمەتبارەکە موڵکەکانی بەناوی خزم و کەسە نزیکەکانیەوە کردووە، هەروەها موڵکەکان لە هەر سێ پارێزگای (بەغداد، دیالە و سەڵاحەدین)ـن.

لە ماڵی ئەو ژنە بەرپرسەدا، دەست بەسەر پارە و زێڕیشدا گیراوە، لە هەمان کاتدا هاوسەری تۆمەتباریش دەستگیرکراوە کە 27 موڵکی بەناوەوە کراوە.

نرخی نەوت، ئەمڕۆ هەینی، رووی لە دابەزین کرد و بەرەو کۆتاییهێنان بەو بەرزبوونەوەیە دەڕوات کە بۆ پێنج هەفتە بەردەوام بوو، ئەوەش بەپێچەوانەی بەرزبوونەوەی نرخەکەی لە کاتی داخستنی دانیشتنی پێشوودا.

بەپیی راپۆرتەکان، نرخی خاوی برێنت 25 سەنت یان بە رێژەی 0.3٪ دابەزی و گەیشتە 89.45 دۆلار بۆ هەر بەرمیلێک، هەروەها خاوی تێکساسی ئەمریکیش 22 سەنت یان بە رێژەی 0.3٪ دابەزی و گەیشتە83.31 دۆلار.

هەردوو جۆرەکەی نەوتی خاو بەرەو ئەوە دەچن ئەم هەفتەیە بە دابەزین کۆتایی پێبهێنن، بەجۆرێک خاوی برێنت بە رێژەی5.3٪ و خاوی ڕۆژئاوای تێکساس بە رێژەی 4.3٪ دابەزینیان تۆمارکردووە.

ئاژانسی بلۆمبێرگ لە سەرچاوەیەکی ئاگادارەوە گواستوویەتییەوە کە ڤێنزیوێلا بە جددی تاوتوێی کشانەوە لە رێکخراوی وڵاتانی هەناردەکاری نەوت (ئۆپێک) دەکات.

سەرچاوەکان ئاماژەیان بەوە داوە کە بیرۆکەی کشانەوەکە لە کاتی گفتوگۆکانی نێوان بەرپرسانی ڤێنزیوێلا و ئەمریکادا خراوەتەڕوو، بەڵام تا ئێستا هیچ بڕیارێکی کۆتایی لەو بارەیەوە نەدراوە.

ئەگەر ڤێنزیوێلا بەرەو ئەم هەنگاوە بڕوات، رەنگدانەوەی قەبارەی ئەو وەرچەرخانە رامیارییە دەبێت کە وڵاتەکە بەخۆیەوەی دەبینێت، بەتایبەت دوای دوورخستنەوەی سەرۆکی پێشووی ڤێنزیوێلا نیکۆلاس مادۆرۆ لەلایەن سەرۆکی ئەمریکا دۆناڵد ترەمپ و کۆنترۆڵکردنی بەڕێوەبردنی هەناردەی نەوتی ڤێنزیوێلا لەلایەن واشنتۆنەوە.

هەروەها هەژموونی روولەزیادی ئەمریکا لەو دانوستانانەدا دەردەکەوێت کە ئێستا لە نێوان بەرپرسانی هەردوو وڵاتدا بەڕێوەدەچێت، لەبارەی بەدەستهێنانی پشکێکی گەورە لە کێڵگە نەوتییەکانی ڤێنزیوێلا لەلایەن لایەنە ئەمریکییەکانەوە.

بەپێی سەرچاوەکان، هەردوو لایەن تاوتوێی رێککەوتنی ئەگەرییان کردووە، لەوانە بەخشینی گرێبەستی بەکرێدانی درێژخایەن کە رەنگە بگاتە 100ساڵ بۆ ژمارەیەک لە کێڵگە نەوتییەکان.

لە لایەکی ترەوە، هیچ لێدوانێکی دەستبەجێ لە کۆشکی سپییەوە لەبارەی ئەگەری چوونەدەرەوەی ڤێنزیوێلا لە ئۆپێک یان دانوستانە تایبەتەکان بە کێڵگە نەوتییەکان دەرنەچووە، لە کاتێکدا وەزارەتی زانیاریی ڤێنزیوێلا وەڵامی داواکارییەکان بۆ لێدواندان لەم بارەیەوە نەداوەتەوە.

بانکی ناوەندیی عیراق بە رەسمی ئەو دەنگۆیانەی رەتکردەوە کە باس لە چاپکردنی بڕێک دراوی نوێی عیراقی بە سڕینەوەی سفرەکانەوە دەکەن و ئاشکرایکرد، هەموو ئەو هەواڵانەی لەو بارەیەوە بڵاوکراونەتەوە دوورن لە راستییەوە.

بانکی ناوەندیی عیراق لە رایەگەیەنراوێکدا بڵاویکردەوە، ئەو هەواڵانەی لە هەندێک لە دەزگاکانی راگەیاندن لەبارەی چاپکردنی دراوی نوێ و لادانی سفرەکان بڵاوبوونەتەوە، پشتیان بە هیچ سەرچاوەیەکی رەسمی نەبەستووە و رەتیدەکەنەوە.

جەختی کردووەتەوە، هەر پڕۆژەیەکی داهاتوو بۆ دووبارە رێکخستنەوەی دراو یان سڕینەوەی سفرەکان، لە کاتی دەرکردنی بڕیاری رەسمیدا، پێویستی بە تێپەڕبوون بە چەندین قۆناغی یاسایی، رێکخستن و هونەریدا هەیە.

هەر لە راگەیەنراوەکەی بانکی ناوەندیدا ئاماژە بەوەکراوە، پڕۆژەیەکی لەو شێوەیە پەسەند بکرێت، لە رێگەی کەناڵە رەسمییەکانەوە رادەگەیەنرێت و ماوەیەکی گونجاو بۆ گواستنەوە دیاری دەکرێت تا هاووڵاتییان، بانکەکان و دامەزراوەکان بە شێوازێکی ئارام و رێکخراو دراوەکان بگۆڕنەوە، بە شێوەیەک کە مافی دارایی هەمووان پارێزراو بێت.

بانکی ناوەندیی عیراق داوا لە هاووڵاتییان و دەزگاکانی راگەیاندن دەکات بۆ وەرگرتنی هەر زانیارییەکی تایبەت بە سیاسەتی دراو تەنها پشت بە کەناڵ و راگەیەنراوە رەسمییەکان بانکەکە ببەستن، چونکە رەنگە بڵاوبوونەوەیان ببێتە هۆی سەرلێشێواوی یان زیان بە بەرژەوەندییە داراییەکانی هاووڵاتیان.