عیراق
هەسەدە 47 كەسی فەرەنسی رادەست عیراق دەكات و بەتۆمەتی تیرۆر و پەیوەندییان بە داعشەوە دادگایی دەكرێن.
ماڵپەری ئەسۆشیەتد پرێس لە زاری ژمارەیەك لێپرسراوی باڵای سەربازیی عیراقەوە بڵاویكردووەتەوە، 47 كەسی فەرەنسی، لە باكوری رۆژهەڵاتی سوریاوە دەگەڕێنرێنەوە بۆ عیراق و بە تۆمەتی تیرۆر و پەیوەندییان بە گروپی تیرۆریستی داعشەوە دادگایی دەكرێن.
ئاماژەیان بەوەشكردووە، ئەو كەسانە ئێستا لە یەكێك لە زیندانەكانی سوریان و لەژێر دەسەڵاتی هێزەكانی سوریای دیموكرات (هەسەدە) و هێزەكانی ئەمریكادان و هەر لەلایەن هەسەدەشەوە رادەستی عیراق دەكرێن، بەڵام تائێستا بە رەسمی لەگەڵ فەرەنسا قسەیان نەكردووە بە مەبەستی دەستكەوتنی زانیاری زیاتر لەسەر ئەو 47 كەسە.
ئەو لێپرسراوە سەربازییانە دەشڵێن، لەماوەی چەند ساڵی رابردوودا هەسەدە زیاتر لە سێ هەزار دەستگیركراوی تری خەڵكی وڵاتانی جیاجیای رادەستی عیراق كردووە.
سودانی دەڵێت، بەشداری نەكردن لە هەڵبژاردن چارەسەری هیچ پرسێك ناكات، بەڵكو دەبێتە دیارییەك بۆ گەندەڵكاران و دەبێت هەمووان بەشداری هەڵبژاردن بكەن.
محەمەد شیاع سودانی سەرۆك وەزیرانی عیراق رایگەیاند، گرنگە هەمووان بەشداری لە هەڵبژاردنەكەی مانگی 11ی ئەمساڵی ئەنجومەنی نوێنەرانی عیراقدا بكەن، چونكە بەشدارینەكردن لە هەڵبژاردن و نەچوون بۆ دەنگدان چارەسەر نییە بۆ هیچ پرسێك، بەڵكو دەبێتە دیارییەكی گەورە بۆ گەندەڵكاران.
وتیشی، بەشداریكردن لە هەڵبژاردن و دەنگدان، بڕینی نیوەی ئەو رێگەیەیە كە بەرەو ئاسایش و سەقامگیری و گەشەسەندن دەچێت، دەشڵێت، ئێستا وڵاتانی جیهان چاویان لەسەر عیراقە كە وڵاتێكی پارێزراو و گەشەسەندووە، هەر ئەوەش وایكردووە چەندین كۆمپانیای گەورەی جیهان وەبەرهێنانیان هێناوەتە عیراق و گۆڕانكاریی گەورەی ئابوریش لە وڵاتدا بەدیهێنراون.
د. لەتیف رەشید سەرۆک کۆماری عیراق، ئەمڕۆ پێنجشەممە 18ـی 9ـی 2025 لە بەغداد پێشوازی لە عەمار حەکیم سەرۆکی رەوتی حیکمەی نیشتمانی کرد.
لەدیدارەکەدا گفتوگۆکرا لەبارەی پێشهاتەکانی گۆڕەپانی ناوخۆ و ناوچەکە و جەختکرایەوە لەسەر گرنگی هەوڵدان بۆ پاراستنی سەقامگیری لە بوارەکانی ئەمنی و سیاسی و ئابووریدا و کارکردن بۆ بەرەوپێشبردنی لایەنی خزمەتگوزاری.
لە کۆبوونەوەکەدا تاوتوێی ئامادەکارییەکان کرا بۆ بەڕێوەچوونی هەڵبژاردنی پەرلەمانی داهاتوو بە شێوەیەکی سەرکەوتوو و دادپەروەرانە و شەفاف.
محەمەد شیاع سودانی، سەرۆکی ئەنجومەنی وەزیران، بڕیاریدا بە دوورخستنەوەی مشعان موحی خەزرەجی، سەرۆکی دیوانی وەقفی سوننی لە پۆستەکەی.
ئەم بڕیارە بە پشتبەستن بە نووسراوێکی "کۆڕبەندی فیقهی عیراقی" دەرچووە، کە لەلایەن خۆیەوە سێ ناوی جێگرەوەی بۆ وەرگرتنی پۆستەکە پێشنیاز کردبوو.
هەروەها، سەرۆک وەزیران، عامر شاکر جەنابیی راسپارد بۆ وەرگرتنی پۆستی سەرۆکی دیوانی وەقفی سوننی بە وەکالەت بۆ ماوەی شەش مانگ.
لە نوسراوەکەدا محەمەد شیاع سودانی دیوانەکە ئاگاداردەکاتەوە کە پێویستە خۆی لە هەر وتارێکی توندڕەوانە و نزیکبوونەوە لە سیاسەت بپارێزێت و کاربکات بۆ پتەوکردنی گیانی برایەتی.
پەیامنێری کوردسات نیوز لە بەغداد ئاشکرای دەکات، کۆبوونەوەی ئەنجومەنی دەوڵەتی عیراق کە ئەمڕۆ بەڕێوەچوو، بەبێ دەرکردنی رونکردنەوەی کۆتایی لەبارەی راپۆرتی لیژنە یاساییەکەی ئەنجومەنی وەزیرانی عیراق کۆتایی هات، ئەمەش بەهۆی ئامادەنەبوونی حکومەتی هەرێمی کوردستان بوو.
هۆکاری دواخستنەکە و هەڵوێستی هەرێم:
محەمەد عەبدولڕەحمان، پەیامنێری کوردسات نیوز زانیوێتی کە حکومەتی هەرێمی کوردستان رەتی نەکردووەتەوە کە ئامادەی دانیشتنەکەی ئەنجومەنی دەوڵەت نەبێت. بەڵکو بەهۆی دروستبوونی گرفتێکەوە کە بووەتە هۆی دواکەوتنیان، نەیانتوانیوە لە کۆبوونەوەکەی ئەمڕۆدا ئامادە بن. هەر بۆیە ئەنجومەنی دەوڵەت نەیتوانی رونکردنەوەی خۆی بڵاوبکاتەوە و بابەتەکە دواخراوە بۆ سەرەتای هەفتەی داهاتوو.
دڵنیایی ئەنجومەنی دەوڵەت و پابەندبوونی بە بڕیارەکانی:
پەیامنێری کوردسات نیوز لە زاری سەرچاوەیەکی باڵا لەنێو ئەنجومەنی دەوڵەتەوە ئاشکرای دەکات، ئەنجومەنی دەوڵەت دڵنیایی داوەتە حکومەتی هەرێمی کوردستان و بەرپرسانی کورد لە بەغدا، کە بێ لایەنانە رونکردنەوەی خۆیان دەردەکەن و مافی هاوڵاتیان و مووچەخۆرانی هەرێمی کوردستان لەبەرچاو دەگرن.
ئەو سەرچاوە باڵایە ئەوەشی وتووە، دەرکردنی رونکردنەوە لەلایەن ئەنجومەنی دەوڵەتەوە تەنها خۆی لە پێدانی بۆچوون نابینێتەوە، بەڵکو رونکردنەوەکە "پابەندییە و دەبێت جێبەجێ بکرێت." ئەمەش مانای وایە هەر بڕیارێک کە ئەنجومەن بیدات، دەبێت لەلایەن هەموو لایەنەکانەوە جێبەجێ بکرێت.
ئەمریكا چوار گرووپی چەكداری عیراقی خستە لیستی تیرۆری جیهانییەوە و دەڵێت ئەو گروپانە هاوپەیمانی ئێرانن.
وەزارەتی دەرەوەی ئەمریكا لە راگەیەندراوێكدا ئاماژەی بەوەكردووە، بزوتنەوەی نوجەبا، كەتائیبی سەید شوهەدا، بزوتنەوەی ئەنساروڵا، كەتائیبی ئیمام عەلی وەك گروپی چەكداری تیرۆریست پۆلێنكراون و خراونەتە لیستی تیرۆری جیهانییەوە.
ماركۆ رۆبیۆ وەزیری دەرەوەی ئەمریكا رایگەیاند، ئەو گرووپانە هاوپەیمانی ئێرانن و هێرشیان كردووەتەسەر باڵیۆزخانەی ئەمریكا لە بەغداد و بنكە سەربازییەكانی ئەمریكا و هێزەكانی هاوپەیمانان.
وتیشی، سزایان بەسەر ژمارەیەك كەس و لایەنی نزیك لە ئێرانیشدا سەپاندووە كە پارەی نەوتیان بۆ ئەو وڵاتە ئاڵوگۆڕ كردووە.
پەیامنێری کوردسات نیوز رایگەیاند، سبەینێ ئەنجومەنی دەوڵەت کۆبونەوەی کۆتایی ئەنجامدەدات بۆ دەرکردنی روونکردنەوە و پێدانی بۆچوونی خۆیان دەربارەی راپۆرتی لیژنە یاساییەکەی ئەنجومەنی وەزیرانی عیراق سەبارەت بە کێشە داراییەکانی نێوان هەرێم و عیراق.
سەرچاوەیەکی تایبەت لە ئەنجومەنی دەوڵەت بە محەمەد عەبدولرەحمان پەیامنێری کوردسات نیوزی رایگەیاندووە: ئەمڕۆ ئەنجومەنی دەوڵەت نەیتوانی روونکردنەوەی خۆی دەربکات، چونکە ناکۆکییە یاساییەکە لە نێوان هەرێم و بەغدا زۆرە.
ئەو سەرچاوە راشیگەیاندووە: بۆیە ئەنجومەنی دەوڵەت بە راوێژکردن لەگەڵ دەستەی گشتی ئەنجومەن، بڕیاریاندا سبەی پێنجشەممە کۆوەببنەوە (تفسیر) روونکردنەوەی خۆیان دەربکەن.
د.لەتیف ڕەشید، سەرۆک کۆماری عیراق کارنامەی کاری لی جون ئیلباڵیۆزی کۆماری کۆریای باشوور، و دیدیک ئیکۆ پوجیانتۆ باڵیۆزی کۆماری ئیندۆنیزیا و مەقسودل حەق باڵیۆزی کۆماری گەلی بەنگلادیش، وەرگرت.
لە میانی پێشوازیکردنی لە باڵیۆزانی نوێ، بە ئامادەبوونی فوئاد حسێن جێگری سەرۆک وەزیر و وەزیری دەرەوە، سەرۆک کۆمار پابەندبوونی عیراقی دووپاتکردەوە بۆ دروستکردنی پەیوەندی هاوسەنگ کە هەماهانگی زیاتر بکات و بەشداربێت لە بنیاتنانی هاوبەشی ڕاستەقینە کە خزمەت بە بەرژەوەندی هاوبەش دەکات.
سەرۆک کۆمار تیشکی خستەسەر هەوڵە بەردەوامەکانی عیراق بۆ چەسپاندنی ئاشتی و ئاسایشی نێودەوڵەتی، هیوای سەرکەوتنی بۆ باڵیۆزان خواست لە جێبەجێکردنی ئەرکە دیپلۆماسییەکانیان.
لە بەرامبەردا باڵیۆزان سوپاس و پێزانینی خۆیان بۆ سەرۆک کۆمار دەربڕی بۆ پەرۆشی بۆ ئاسانکاری بۆ جێبەجێکردنی ئەرکەکانیان، ویستی وڵاتەکانیان بۆ پتەوکردنی پەیوەندی دۆستانە و هەماهەنگی لەسەر مەسەلەکانی جێی بەرژەوەندی هاوبەش دووپاتکردەوە.
ئەنجومەنی دەوڵەت بۆ تاوتوێكردنی راپۆرتی لیژنەی یاسایی ئەنجومەنی وەزیرانی عیراق لەبارەی داهاتی نا نەوتی هەرێم لە كۆبوونەوەدایە و پێدەچێت ئەمرۆ بۆچونی خۆی لەوبارەیەوە بخاتەروو.
پەیامنێری كوردسات نیوز لەبەغداد رایگەیاند، ئەنجومەنی دەوڵەت بۆ تاوتوێكردنی بۆ تاوتوێكردنی راپۆرتی لیژنەی یاسایی ئەنجومەنی وەزیرانی عیراق لەبارەی داهاتی نا نەوتی هەرێم لە كۆبوونەوەدان.
وتیشی، كۆبونەوەكە بە سەرۆكایەتی سەرۆكی ئەنجومەنی دەوڵەت و بە ئامادەبوونی نوێنەرانی وەزارەتی دارایی عیراق و دیوانی چاودێری دارایی عیراق و بەڕێوەبەری فەرمانگەی یاسایی لە ئەمیندارێتی ئەنجومەنی وەزیرانی عیراق بەڕێوە دەرەچێت.
پەیامنێری كوردسات نیوز راشیگەیاند، پێدەچێت ئەمڕۆ ئەنجومەنی دەوڵەت، بۆچونی خۆی لەبارەی راپۆرتی لیژنە یاساییەكەی ئەنجومەنی وەزیرانی عیراقەوە بخاتەروو.
دووهەفتە لەمەوبەر، ئەنجومەنی وەزیرانی عیراق هەردوو راپۆرتی یاسایی وەزارەتی دارایی و ئابوری عیراق و هەرێمی سەبارەت بە داهاتی نانەوتی هەرێمی كوردستانی ئاراستەی ئەنجومەنی دەوڵەت كرد تاوەكە لە روویاساییكەوە تەفسیری خۆی بۆ بكات.
بۆ تاوێكردنی چەند بابەتێكی گرنگ، بڕیارە ئەمڕۆ سەرۆكی فەرەنسا بە سەردانێكی رەسمی بگاتە عیراق.
میدیا عیراقیەكان لە زاری سەرچاوەیەكەوە رایانگەیاند، بڕیارە ئیمانوێل ماكرۆن سەرۆكی فەرەنسا ئەمڕۆ چوارشەممە 17ـی 9ـی 2025 سەردانی عیراق بکات، بەپێی زانیارییەکان، ماكرۆن سەرۆكایەتی وەفدێكی وەزاری وڵاتەكەی دەكات، كە بەرپرسانی سەربازی و ئەمنی و ئابووری لەخۆدەگرێت. بڕیاریشە لەو سەردانەدانەیدا چەندین رێككەوتنی جۆراوجۆر لەنێوان هەردوو وڵاتدا ئیمزا بكرێت، دیارترینیان لە بوارەكانی وزە و چەكی سەربازیدا.
ئەمە بە دووەم سەردانی ئەو سەرۆكەی فەرەنسا دادەنرێت بۆ عیراق پێشتریش لە ساڵی 2020دا سەرۆكی فەرەنسا سەردانی عیراق كرد.
ئەنجومەنی وەزیرانی عیراق رازی بوو لەبری پارەی خەرجی بەرهەمهێنانی نەوت، نەوتی خاو بدرێت بە كۆمپانیاكان و رەزامەندی لەسەر ئەنجامدانی گرێبەستی سێقۆڵی لەنێوان بەغداد و هەولێر و كۆمپانیاكانیش دەربڕی.
نوسینگەی محەمەد شیاع سودانی سەرۆك وەزیرانی عیراق لە راگەیەنراوێكدا بڵاویكردەوە، ئەنجومەنی وەزیرانی عیراق لە كۆبوونەوەی هەفتانەی رۆژی سێشەممەدا دوو بڕگەی تایبەت بە نەوتی هەرێمی كوردستانی پەسەند كردووە.
لە بڕگەی یەكەمدا ئەنجومەنی وەزیران رازی بوو بەوەی كە لە بری پێدانی پارە بۆ تێچووی دەرهێنانی نەوت بە كۆمپانیا كە بۆ هەر بەرمیلێك بڕەكەی 16 دۆلارە، نەوتی خاویان پێبدرێت و بۆ خۆیان بیفرۆشن.
لە بڕگەی دووەمیشدا حكومەتی عیراق رەزامەندی دەربڕی لەسەر ئەنجامدانی گرێبەستێكی سێقۆڵی لەنێوان حكومەتی هەرێم و حكومەتی عیراق و كۆمپانیا نەوتییەكان.
ئاماژە بەوەشكراوە، ئەمیندانرێتی ئەنجومەنی وەزیران گرێبەستەكە بەرز دەكاتەوە بۆ لیژنەی راوێژكاریی وەزارەتی نەوتی عیراق و چاوەڕوان دەكرێت لیژنەكە لە ماوەی 48 سەعاتی داهاتوودا وەڵامی كۆتایی خۆی لەو بارەوە بداتەوە بە ئەنجومەنی وەزیران، تاوەكو گرێبەستە سێ قۆڵییەكە بە رەسمی ئەنجام بدرێت.
ئەوەش لە كاتێكدایە، رۆژی چوار شەممە ئەنجومەنی دەوڵەتی عیراق جارێكی تر كۆدەبێتەوە بۆ تەواوكردنی تاوتوێی یاسایی راپۆرتی لیژنەی یاسایی ئەنجومەنی وەزیران لەبارەی داهاتە نانەوتییەكانی هەرێم و دیاریكردنی پشكی هەردولا لە داهاتەكان.
د. لەتیف رەشید سەرۆک کۆماری عیراق پێشوازیکرد لە سێرگی شۆیگو سکرتێری گشتی ئەنجومەنی باڵای ئاسایشی نیشتمانیی روسیای فیدڕاڵ و وەفدی یاوەری.
لە میانەی دیدارەکەدا کە ئەمڕۆ سێشەممە 16-9-2025 لە کۆشکی بەغداد بەڕێوەچوو، قاسم ئەعرەجی راوێژکاری ئاسایشی نیشتمانی ئامادەی بوو، پەیوەندییەکانی نێوان عیراق و روسیا و چۆنیەتی پەرەپێدانیان بۆ هێنانەدی ویستی هەردوو وڵات بۆ پێشکەوتن و خۆشگوزەرانی تاوتوێ کرا.
سەرۆک کۆمار، بەخێرهاتنی وەفدەکەی کرد و سڵاوی خۆی گەیاندە ڤلادیمێر پوتن سەرۆکی روسیا ، جەختیشیکردەوە لە گرنگی پتەوکردنی پەیوەندیی دوو قۆڵی و فراوانکردنی ئاسۆی هاریکاری لەبواری ئەمنی و سەربازی و ئاڵوگۆڕی شارەزایی و زانیاری هەواڵگری و بەرەنگاربوونەوەی تیرۆر، کە بناغەکانی سەقامگیری و ئاسایش لە هەردوو وڵات و ناوچەکەدا دەچەسپێنێت.
هەروەها لە کۆبوونەوەکەدا هەڵوێستی عیراق بۆ رەتکردنەوەی هێرشەکانی ئیسرائیل بۆ سەر فەلەستینییەکان لە کەرتی غەززە و وڵاتانی دیکەی ناوچەکە تاوتوێکرا.
سەرۆک کۆمار جەختیکردەوە لە پێویستی دەربڕینی هەڵوێستێکی نێودەوڵەتی بۆ رووبەڕووبوونەوە و راگرتنی هەموو پێشێلکارییەکانی دژی خەڵکی مەدەنی و بێتاوان و دانان بە مافی دامەزراندنی دەوڵەتی سەربەخۆی بە گەلی فەلەستین.
سەرۆک کۆمار، هەڵوێستی پشتیوانی روسیای لەبارەی دۆزی فەلەستین بەرز نرخاند.
لای خۆیەوە سێرگی شۆیگو ویستی وڵاتەکەی دووپات کردەوە بۆ پەرەپێدانی پەیوەندییەکانی لەگەڵ عیراق بە شێوەیەک کە خزمەت بە بەرژەوەندییەکانی هەردوو وڵات و گەلی دۆست بکات.
لە کۆتایی کۆبوونەوەی ئەمڕۆیدا، ئەنجومەنی وەزیرانی عیراق دەنگی لەسەر دوو بڕیاری چارەنووسساز دا سەبارەت بە میکانیزمی مامەڵەکردن لەگەڵ کۆمپانیا نەوتییە بیانییەکان و پرسی نەوتی هەرێمی کوردستان.
بەپێی زانیارییەکان، بڕیارەکان بەم شێوەیەن:
یەکەم: پێدانی شایستەی دارایی کۆمپانیا نەوتییەکان بە نەوتی خاو
ئەنجومەنی وەزیران بڕیاریدا کە کرێی دەرهێنانی نەوت بۆ کۆمپانیا بیانییەکان، کە بۆ هەر بەرمیلێک بە 16 دۆلار دیاریکراوە، چیتر بە پارەی کاش نەدرێت. لە بری ئەوە، بڕی ئەو نەوتەیان پێدەدرێت کە هاوتای شایستە داراییەکانیانە و کۆمپانیاکان خۆیان بەرپرس دەبن لە فرۆشتنی ئەو نەوتە لە بازاڕەکاندا.
دووەم: رەزامەندی لەسەر گرێبەستی سێقۆڵی لەنێوان هەرێم، بەغدا و کۆمپانیاکان
ئەنجومەنی وەزیرانی عیراق رەزامەندیی سەرەتایی نیشاندا لەسەر ئەنجامدانی گرێبەستێکی سێقۆڵی لەنێوان (حکومەتی هەرێمی کوردستان - حکومەتی فیدراڵی عیراق - کۆمپانیا نەوتییە بیانییەکان).
مەرجی جێبەجێکردنی ئەم بڕیارە ئەوەیە کە حکومەتی عیراق گرێبەستەکە بەرز بکاتەوە بۆ لیژنەی راوێژکاریی وەزارەتی نەوتی عیراق. چاوەڕوان دەکرێت لیژنەکە لە ماوەی 48 کاتژمێری داهاتوودا وەڵامی کۆتایی خۆی بداتەوە، تاوەکو گرێبەستە سێ لایەنییەکە بە فەرمی ئەنجام بدرێت و بچێتە بواری جێبەجێکردنەوە.
ئەم دوو بڕیارە بە هەنگاوی گرنگ دادەنرێن بۆ کردنەوەی گرێکوێرەی هەناردەکردنەوەی نەوتی هەرێمی کوردستان و چارەسەرکردنی کێشە هەڵپەسێردراوەکانی نێوان هەولێر و بەغدا.
کاروان یاروەیس، ئەندامی ئەنجومەنی نوێنەران لە فراکسیۆنی یەکێتی لە پەرلەمانی عیراق لە بەرنامەی پرسی رۆژ رایگەیاند کە سەرەڕای هەموو هەوڵە یاساییەکان، کێشەی موچەی موچەخۆرانی هەرێمی کوردستان وەک خۆی ماوەتەوە، چونکە "ویست و ئیرادەی راستەقینە بۆ چارەسەرکردنی گرفتەکە لەلایەن هەرێم و ناوەندەوە نییە."
یاروەیس جەختی لەوە کردەوە کە "لە روی یاساییەوە هەموو هەوڵێکمانداوە بۆ چارەسەری کێشەی موچە،" بەڵام بەداخەوە "هەرێم و بەغدا وەک پێویست پابەندی بڕیارەکەی دادگای فیدراڵی نەبوون" و گرفتەکە "نە بە یاسای بودجە و نە بە بڕیاری دادگای فیدراڵی چارەسەر نەکرا."
"ئەنجومەنی دەوڵەت دەسەڵاتی بڕیاردانی نییە"
سەبارەت بە ڕۆڵی ئەنجومەنی دەوڵەت (شورا)، یاروەیس رونیکردەوە کە "ئەنجومەنی دەوڵەت دەسەڵاتی چارەسەرکردنی کێشەی موچەی نییە،" چونکە "کاری تەنها راوێژکارییە نەک دەرکردنی بڕیار."
"ساڵی داهاتوو سەخت دەبێت و چوار موچە دوادەکەون"
ناوبراو هۆشداری دا لە دۆخی موچەخۆران لە ساڵی داهاتودا و وتی: "ساڵی داهاتوو بۆ موچەخۆرانی هەرێمی کوردستان سەخت دەبێت." ئاشکراشی کرد کە "چوار موچەی موچەخۆرانی هەرێم دەکەوێتە ساڵی داهاتوو،" و ئاماژەی بەوەشکرد کە "موچەی مانگی 12ی ساڵی رابردوو لەنێوان هەرێم و بەغدادا دیار نەما."
"یاسای بودجەی سێ ساڵە هەڵەیەکی کوشندە بوو"
کاروان یاروەیس رەخنەی توندی لە یاسای بودجەی گشتیی عیراق گرت و وتی: "پەسەندکردنی یاسای بودجە بۆ سێ ساڵ هەڵەیەکی کوشندە بوو."
لە کۆتاییدا دووپاتی کردەوە کە "ویستی راستەقینە بۆ چارەسەری کێشەی موچەخۆرانی هەرێم نییە" و ئەمەش هۆکاری سەرەکیی بەردەوامیی قەیرانەکەیە.
بەپێی زانیاری چەند سەرچاوەیەكی ئەمنی و ناوخۆیی، حكومەتی عیراق لە چەند رۆژی رابردوودا هێزی زیاتری رەوانەی شەنگال كردووە.
بەپێی ئەو سەرچاوانە كە بە "عەرەبی جەدید"یان وتووە، هێزەكان لە سوپا و پۆلیسی فیدراڵی پێكهاتوون و لە ناوچەكانی سنونی و خانەسور و قیلبت، تا سێگۆشەی پیشخاپوری سنوری بە ئاراستەی خاكی سوریا جێگیركراون و ئاڵای عیراقیان لەسەر باڵەخانەكان بەرزكردووەتەوە و خاڵی پشكنینی و بەربەستیشیان دروستكردووە.
لێپرسراوێكی سەربازیی سوپای عیراقیش رایگەیاندووە، بڵاوكردنەوەی ئەو هێزانە تەنها بۆ سەپاندنی هەژموونی دەوڵەت و یاسایە، هەرچەندە تا ئێستا ژمارەیان ئاشكرا نەكراوە كە لەلایەن حكومەتی عیراقەوە رەوانە كراون، بەڵام بەپێی زانیارییەكان هەزاران سەرباز دەبن، لەگەڵ ئۆتۆمبێلی سەربازیی.
بەپێی زانیارییەکانی پەیامنێری کوردسات نیوز لە بەغدا، بڕیارە سبەی (چوارشەممە) ئەنجومەنی دەوڵەتی عیراق لەگەڵ دەستەی گشتیی خۆیدا کۆببێتەوە.
پەیامنێرمان رایگەیاند، کۆبوونەوەکە بە مەبەستی تاوتوێکردن و پێشکەشکردنی بۆچوونی رەسمی ئەنجومەنی دەوڵەتە، سەبارەت بەو راپۆرتەی کە لەلایەن لیژنەی یاسایی ئەنجومەنی وەزیرانی عیراقەوە ئامادە کراوە.
چاوەڕوان دەکرێت دەرئەنجامی ئەم کۆبوونەوەیە کاریگەری لەسەر بڕیارەکانی داهاتووی حکومەتی فیدراڵی هەبێت سەبارەت بەو بابەتانەی لە ڕاپۆرتەکەدا هاتوون.
زانیاری زیاتر...