سەرچاوەیەک لە وەزارەتی پەروەردەی ھەرێم بە کوردسات نیوزی راگەیاند، ھەوڵەکانی وەزارەتی پەروەردە چڕکراونەتەوە بۆ دەستپێکردنەوەی پڕۆسەی خوێندن لەو ناوچانەی لەسەرەتای وەرزی خوێندنی ئەمساڵەوە بایکۆت تێیاندا بەردەوامە.

وتیشی، چەند رۆژی رابردوو کۆبوونەوە لەوبارەیەوە کراوە، بڕیارە ھەفتەی داھاتووش ئەنجومەنی وەزارەتی پەروەردە کۆببێتەوە و یاداشت و داواکاری مامۆستایان بۆ دەستپێکردنەوەی پڕۆسەی خوێندن ئاڕاستەی ئەنجومەنی وەزیران بکات.

ئەو سەرچاوەیە ئاماژەی بۆ ئەوەشکرد، داواکاری پلە بەرزکردنەوە و دامەزراندنی مامۆستایانی وانەبێژ لەو داواکارییانەن کە بە نوسراوی رەسمی رەوانەی ئەنجومەنی وەزیران دەکرێن.

ھاوکات محەمەد کەریم بەڕێوەبەری گشتی پەروەردەی راپەرین لە بەرنامەی رەھەندی کوردسات نیوزدا ئاماژەی بەوەکرد، کار لەسەر ئەوە دەکرێت یاداشتی مامۆستایان وەڵام بدرێتەوە و ئاماژەی ئەرێنی باش ھەیە بۆ جێبەجێکردنی داواکاری مامۆستایان لەلایەن حکومەتەوە.

 لای خۆیەوە، عادل حەسەن یەکێک لە نوێنەرانی مامۆستایانی ناڕازیی رایگەیاند، داواکارییەکانی مامۆستایان قورس نین کە بریتین لە دەستپێکردنەوەی پلە بەرزکردنەوە و دامەراندنی مامۆستایان وانەبێژ و دابەشکردنی مووچە لەوادەی خۆی و دیاریکردنی چارەنوسی ئەو مووچانەی بە ناوی پاشەکەوت و لێبڕین دابەش نەکراون.

مەریوان بەگۆک عەزیز بەڕێوەبەری گشتیی کارو دەستەبەری کۆمەڵایەتی رایگەیاند، لە ئێستادا ١٤٤ ھەزار و ٩٣٠ کرێکار ناویان لە دەستەبەری کۆمەڵایەتی تۆمارکراوە و بەپێی یاسای خانەنشینی و دەستەبەری کۆمەڵایەتیی ژمارە ٣٩ی ١٩٧١ و یاسای کاری ژمارە ٧١ی ساڵی ١٩٨٧ پارێزگاری لە مافی کرێکاران دەکەن.

ئاماژەی بەوەشکرد، پێویستە ھەر خاوەن پرۆژەیەک کرێکارەکانی بۆ بەڕێوەبەرایەتیی دەستەبەری کۆمەڵایەتی بنێرێت تاوەکو خۆیان دەستەبەر بکەن.

وتیشی، لەو دەستەبەرەدا، ٥٪ی مووچەی کرێکار و ١٢٪ی داھاتی خاوەن پرۆژە دەخرێتە سەر سندوقی خانەنشینی و دوای ئەوەی کرێکارەکە خانەنشین بوو، خانەنشینییەکەی پێ دەدرێت.

دەشڵێت، بەپێی یاسا تەمەنی خانەنشینی پیاوان پێویستە کەسەکە تەمەنی گەیشتبێتە ٦٠ ساڵ بێت و ھەروەھا دەبێت ٢٠ ساڵ خزمەتی ھەبێت، بۆ ژنانیش دەبێت تەمەنی ٥٥ ساڵ بێت و ٢٠ ساڵیش خزمەتی ھەبێت.

ئاماژەی بەوەشکردووە، جگە لە پرسی خانەنشینی و دەستەبەری کۆمەڵایەتی، نابێت مووچەی کرێکار لە ٣٥٠ ھەزار دینار کەمتر بێت.

سیروان سەرحەد، قائیمقامی قەزای دوکان بە کوردسات نیوزی راگەیاند، شەوی پێنج شەممە لەگەڵ نوێنەرانی ٣٧ گوندی ناحییەکانی خەلەکان و خدران کۆبوونەوە و لەکۆبوونەوەکەدا راستەوخۆ بڕیاری چارەسەری بەشێک لە کێشەکانیان دەرچووە.

وتیشی، بەڵێنیان پێداون لە داھاتوویەکی نزیکدا سەرجەم کێشەکانی دیکەشیان بۆ چارەسەر بکەن، لە بەرامبەریشدا دانیشتوانی ئەو گوندانە بڕیاریاندا کۆتایی بە خۆپیشاندان و داخستنی رێگای دوکان-رانیە بەڕووی ئۆتۆمبێلە بارھەڵگرەکان بھێنن و بگەڕێنەوە بۆ ماڵەوە.

قائیمقامی قەزای دوکان ئەوەشی خستەڕوو، بە ھەوڵی نوسینگەی قوباد تاڵەبانی، جێگری سەرۆکی حکومەتی ھەرێم چارەسەری کێشەی دانیشتوانی ناحییەی خەلەکان و خدران کراوە و کار بۆ جێبەجێکردنی داواکارییەکانی دیکەشیان دەکەن.

عەلی رەحمون، ئەندامی لیژنەی سەرۆکایەتی ئەنجومەنی سوریای دیموکرات (مەسەدە) رایگەیاند، مەسەدە لە ھەموو کۆبوونەوەکانی پێشوتریدا داوای کۆنگرەیەکی نیشتیمانی بەبەشداری ھەموو لایەنەکانی سوریای کردووە، بەپێی ئامادەکارییەکانیش بەھاری داھاتوو رۆژئاوای کوردستان پێشوازی لەو کۆنگرەیە دەکات.

وتیشی، لەو کۆنگرەیەدا ھەوڵ دەدەن سورییەکان لەسەر پڕۆژەیەک بگەنە رێککەوتن و بە کرداری ھەنگاوی پێکەوەیی بۆ چارەسەری قەیرانەکانی سوریا بنرێت.

بڕیاربوو ئەو کۆنگرەیە حوزەیرانی رابردو ئەنجامبدرێت، بەڵام بەھۆی ھەڵوێستەکانی تورکیا و نەیاری حکومەتی سوریا و رووداوەکانی دێرەزور، مەسەدە سازدانی ئەو کۆنگرەیەی بۆ کاتێکی دیکە دواخست.

کاروخ عەبدوڵا، نوێنەرانی مامۆستایانی وانەبێژ بە کوردسات نیوزی راگەیاند، لە وەزارەتی پەروەردەوە پێیان راگەیەندراوە، سەرەتای ھەفتەی داھاتوو نووسراوێکی وەزارەت دەردەچێت تایبەت بە دامەزراندنی مامۆستایانی وانەبێژ بەشێوەی گرێبەست و دەستپێکردنەوەی پلەبەرزکردنەوەی مامۆستایانی ھەمیشەیی.

ئەوەشی خستەڕوو، نووسراوەکە لە چوارچێوەی ھەوڵەکانی وەزارەتی پەروەردەیە بۆ جێبەجێکردنی داواکارییەکانی مامۆستایانی وانەبێژ و دەستپێکردنەوەی خوێندن لەوناوچانەی بەھۆی بایکۆتی مامۆستایانەوە خوێندن تیایاندا راگیراوە.

ئەوەش لەکاتێکدایە، لە مانگی ئەیلولی ساڵی ڕابردووەوە، مامۆستایانی سنووری پارێزگای سلێمانی و ھەڵەبجە و ئیدارەکانی گەرمیان و ڕاپەڕین، بەھۆی دواکەوتنی مووچە و راگرتنی پلەبەرزکردنەوە بایکۆتی خوێندنیان کردووە و بەوھۆیەشەوە پرۆسەی خوێندن لە بەشێکی زۆری قوتابخانەکانی ئەو ناوچانە ڕاگیراوە.

بافڵ جەلال تاڵەبانی سەرۆکی یەکێتیی نیشتمانیی کوردستان پەیامێکی بەبۆنەی تەقینەوەکانی شاری کرمانی ئێران بڵاوکردەوە و رایگەیاند، بە توندی ئیدانەی ھێرشە تیرۆریستییەکەی شاری کرمان دەکات و پرسە و ھاوخەمیی قووڵی خۆیان ئاڕاستەی گەلی ئێران و کەسوکاری قوربانییەکان دەکات.

ھەروەھا جەخت لەوەدەکاتەوە، ‏‎ئەرکی ھەموولایەکە بە یەکگرتووییەوە ھەوڵەکانیان بۆ رووبەڕووبوونەوەی تیرۆر و تیرۆریستان یەکبخەن و ئاسایش و سەقامگیریی ناوچەکە بپارێزن.

‏‎ئاماژەی بۆ ئەوەشکردووە، یەکێتیی نیشتمانیی کوردستان ھاوسۆزە لەگەڵ کۆماری ئیسلامیی ئێران و ھیوای زوو چاکبوونەوە بۆ بریندارەکان دەخوازێت.

دادوەر عومەر ئەحمەد سەرۆکی کۆمیسیۆنی باڵای سەربەخۆی ھەڵبژاردنەکانی عێراق بە کوردسات نیوزی راگەیاند، ناتوانن لەو وادەیەی لەلایەن سەرۆکی ھەرێمەوە دیاریکراوە کە ٢٥ی شوباتی ئەمساڵە، ھەڵبژاردنی پەرلەمانی کوردستان ئەنجامبدەن، ھەفتەی داھاتووش بۆ ئەو مەبەستە لەگەڵ لێپرسرسراوانی ھەرێمی کوردستان کۆدەبنەوە.

وتیشی، بە نوسراوێکی رەسمی داوایان لە سەرۆکایەتی ھەرێم کردووە وادەیەکی نوێ بۆ ھەڵبژاردنی پەرلەمانی کوردستان دیاری بکات.

حەیان عەبدولغەنی وەزیری نەوتی عێراق رایگەیاندوە، پلانیان ھەیە لە ساڵی نوێدا ژمارەیەک پڕۆژەی ستراتیژی لە بواری نەوتدا جێبەجێبکەن بە مەبەستی زیادکردنی ئاستی بەرھەمھێنانی نەوت، لە وچارچێوەیەشدا کار دەکەن بۆ دەستپێکردنەوەی ھەناردەی نەوتی ھەرێم لە رێگای بەندەری جەیھانەوە.

وتیشی، گەشەسەندنێکی بەرچاویان لە کەرتی پاڵاوتندا بەدەستھێناوە و پلانیان ھەیە بگەنە خۆبژێوی و راگرتنی ھاوردەکردن.

ئاماژەی بۆ ئەوەشکردووە، ساڵی رابردوو سەرکەوتو بوون لە پێشخستنی پڕۆژەکانی وەبەرھێنانی غازو بۆ ساڵی نوێش بەھەمانشێوە سەرکەوتن لەو بوارەدا بەدەستدەھێنن.

بەڕێوەبەرایەتی گشتی کارەبای سلێمانی لە ڕاگەیەندراوێکدا رایانگەیاند، ئەمڕۆ لیژنەی دیاریکردنی نرخی مۆلیدە ئەھلییەکان کۆبووەوە و بە پێی نرخی سوتەمەنی لە بازاڕەکاندا نرخی ھەر سەعاتێک بۆ یەک ئەمپێر٤٤ دینارە،‌ بەمەش نرخی یەک ئەمپێڕی کارەبای مۆلیدەی ئەھلی گەڕەکەکان لە ناوشاری سلێمانی لەنێوان ١٣.٥٠٠ بۆ ١٤.٥٠٠هەزار دینارە، بەھۆی جیاوازی کارکردنیان نرخی ئەمپێرێک لە گەڕەکێک بۆ گەڕەکێکی دیکە جیاواز دەبێت.

ڕاشیانگەیاند، ھەروەھا ئەو شوێنانەی بەرنامەی کارکردنی مۆلیدەکانیان لە حەوتی بەیانی بۆ یەکی شەوە، نرخی ئەمپێریان ١٧.٠٠٠ بۆ ١٨.٠٠٠ دینارە.ئەو موەلیدانەش کە کارکردنیان ٢٤ کاتژمێرییە نرخی ئەمپێریان ٢١.٠٠٠ بۆ ٢٢.٢٥٠ دینارە.

کارەبای سلێمانی لە ڕاگەیەندراوەکەدا ئاماژەی بەوەشکردووە، لیژنەی دیاریکردنی نرخی مۆلیدە ئەھلییەکان، لەکۆنووسەکەدا جەختیان لەوە کردوەتەوە کە لەکاتی کوژاندنەوەی کارەبای نیشتیمانی نابێت کارپێکردنی مۆلیدە و پێدانی کارەبا بەھاوڵاتیان لە ١٠ خولەک زیاتر بخایەنێت، بەپێچەوانەوە خاوەن موەلیدەکە سزادەدرێت.

باسیانلەوەکردووە، خشتەی کارپێکردنی مۆلیدە بۆ مانگی یەک گۆڕانکاری تێدادەکرێت و مۆلیدەکان لەنێوان ١ی پاشنیوەڕۆ تا ١ی شەو ئەگەر کارەبای نیشتیمانی کوژایەوە کاردەکەن، بەیانیانیش لەکاتژمێر ٦:٣٠ تا ٨:٠٠ی بەیانی کاردەکەن. رۆژانی ھەینی و پشووە ڕەسمییەکان بەیانیان کارناکەن لەبری ئەوە سەعات ١١ی پێشنیوەڕۆ کاردەکەن.

 

بەڕێوبەرایەتی گشتی فڕۆکەخانەی نێودەوڵەتی ھەولێر لە راگەیەنراوێکدا ئاماژەی بۆ ئەوەکرد، بەپێی پێشبینییەکانی بەشی کەشناسی فڕۆکەخانە، پێشبینیکراوە دوای سەعات دووی بەرەبەیان، بەھۆی تەمومژی زۆر و کەمبوونەوەی ئاستی بینین، گەشتەکان بەشێوەیەکی کاتی رابگیرێن.

راشیگەیاند، ھەر کاتێک کەشوھەوا ئاسایی ببێتەوە دوبارە گەشتە ئاسمانییەکان دەستپێدەکەنەوە.

دەقی پەیامەکە...

"بۆ کەناڵی کوردسات  "

کەناڵی کوردسات یان کەناڵی نیشتیمان، یان کەناڵی چڵە نێرگزەکە، یان کەناڵی کوردان و ماڵی ھەموان، ھەموو ئەو ناوانە بۆ کەناڵی کوردسات کەمن و زۆرنین .

لە یادی ساڵڕۆژی دامەزراندنی کەناڵی چڵە نێرگزەکە دا، ئەم چەندە پەیڤە دەکەم بە ملوانکەی بۆ وتنی چەند راستیەک  بۆ خزمەتە زۆرە کانی ئەم کەناڵە ئازیزە، کە پێشکەشی کردووە و بەردەوامیشە لە پێشکەشکردنی خزمەتە، بە فەرھەنگ و ئەدب و زمان و کەلتورو فۆلکلۆری ئاوازی ڕەسەنی  کوردی لە ھەر چوار پارچەی کوردستان، جێگای خۆیەتی ئاماژە بە دەوری کوردسات بکەین لە بواری دۆبلاژیش خزمەتێکی زۆری تاک بەتاک و خێزانی کوردی کردوە، دەکرێت ئاماژە بەدەوری ئەلقە دۆبلاژکراوەکان و بەرنامەی بەرنامە و دەیان نمونەی تر بدەین، ناکرێت باسی کورد ئایدڵیش نەکەین کە جوانترین دیاری کوردسات بوو بۆ کچ و کورانی ھەر چوار پارچەی کوردستان، لە ڕێگای ئەم بەرنامە جوانیدا کوردانی ھەر چوار پارچەی لە دەوری خۆی کۆکردەوە، ڕاستگۆیانە کەناڵی ھەموان بوو، کەناڵی کوردان بوو، کەناڵی دڵخوازی خێزانی کورد بوو، لە ڕاستیا دەست پێشخەریەکانی ئەوەندە زۆرن لە ئەژمار نایەن، بەڵام ھەمیشە بڵندگۆی پەیامی کوردانە و مرۆڤ دۆستانە بوە ، لە خۆشی و ناخۆشیەکانیشدا ئەوا خەمی ھەموانی کردۆتە کۆڵ و کەوتۆتە ڕاگەیاندنی چەندان کەمپین بۆ گەیاندنی پەیامی ھاوکاری ماددی و مەعنەوی ، بۆیە لەم یادە فرە قەشەنگ و ئامادە لە ڕۆحدا، ناکرێت ھیوای کاری باشتری بۆ نەخوازین وداوای کاری باشتری لێنەکەین، لەم یادەدا داواکارم کوردسات درێژە بە بەرنامەی کورد ئایدڵ بدات،  دەستبکات بە بەرھەم ھێنانی فیلمی کوردی مێژوی و دۆکۆمێنتاری لەسەر مێژووی کورد و کەسایەتییە سیاسی و ھونەری و کۆمەڵایەتیەکانی کورد، بۆ ئەمەش کە تاکە کەناڵە دورە لە بەرنامەی سیاسی و حزبی، ھیوادارم بەردەوام خۆی بەدوربکرێت لە پەیامی حزبی، جێگای خۆیەتی داوا لە کەسایەتیە خواپێداوەکان بکات بۆ سەرخستنی پڕۆژە نیشتیمانیەکان چونکە لە ڕاستیدا کەناڵی کوردسات بڵندگۆ و خەمخۆری ئەدەب و فەرھەنگی کوردە.

جێگای خۆیەتی بەم بۆنەیەشەوە سڵاو ڕێزو چەپکە گوڵی ڕێزو وەفا و خۆشەویستی پێشکەش بە خاتوو ھێرۆخان " بکەین کە دامەزرێنەرو دەوری کاریگەری ھەبوە لە سەرخستنی ئەم پرۆژە نیشتیمانیە ، "  داخەکەم پێگەی سیاسیەکەی غەدری زۆری لەم خاتوونە کردوە ، خۆزگە شارەوانی و ھونەرمەند و ئەدەب دۆستان بەیەکەوە  بە پەیکەرێکی شایستەی ھێرۆخان سوچێکی شاریان دەرازاندەوە ،لێرەوە ھیوای تەندروست باشی بۆ دەخوازم ، جێگای خۆیەتی پیرۆزبای لە کارمەندان و  ستافی کوردسات  و ھەموو ئەوانەی بکەین کە ڕۆژێک لە ڕۆژان، بەھەر رێگایەک خزمەتێکی ئەم کەناڵەیان کردوە، چەپکێ نێرگز بۆ بینەرانی کوردسات و تەوای 
ستافی کوردسات.

سلێمان مستەفا حەسەن

رۆژی سێشەممە ھێزێکی سوپای عێراق چونەتە سەر گەڕەکی نەورۆز لە شاری کەرکوک و داوای چۆڵکردنی گەڕەکەکەیان لە دانیشتووانەکەی کرد.

خالید شوانی وەزیری دادی عێراق بە کوردسات نیوزی راگەیاند، سکاڵای لەسەر ھێزەکەی سوپای عێراق تۆمار کردوە و ئەو پیشێلکارییەی سوپای عێراقی گەیاندوەتە محەمەد شیاع سودانی سەرۆکوەزیرانی عێراق و وەزیری بەرگری.

وتیشی سەرۆکوەزیران و وەزیری بەرگری جەختیان کردووەتەوە کە ھەوڵدەدەن کێشەکە چارەسەر بکەن و ئەو خانوانەی داگیرکراون بگەڕێندرێنەوە بۆ خاوەنەکانیان.

ھاوکات سەباح حەبیب ئەندامی فراکسیۆنی یەکێتی لە ئەنجومەنی نوێنەران بە کوردسات نیوزی راگەیاند، نوێنەرانی کورد و فراکسیۆنی یەکێتی لەسەر خەتن بۆ چارەسەرکردنی ئەو کێشەیە و رۆژی چوارشەممە رێکارە یاساییەکان دەگرنە بەر بۆ کشانەوەی ئەو ھێزە.

وتیشی، ھەڵکوتانە سەر ئەو ماڵانە گونجاو و قبوڵکراو نییە و لەگەڵ خەڵکی گەڕەکەکە ھەموو رێکارێکی یاسایی دەگرنە بەر بۆ کشانەوەی سوپا و دۆزینەوەی چارەسەرێکی گونجاو بۆ کێشەی خانووەکانی ئەو گەڕەکە.

ئەم دوو کچە کە ناویان ( زەینەب خالد، ھەیام خالد)ە، ساڵی ١٩٧٩ لەکاتێکدا تەمەنیان چوار ساڵان و شەش ساڵان بوو، بەھۆی ئەوەی باوکیان پێشمەرگە بوو، لە لایەن حکومەتی بەعسەوە رفێنراون و دواتر بە سوریا فرۆشران، دایک و کەسە نزیکەکانی دیکەشیان دەستگیرکران.

ئەو دوو کچە دواتر ھەر لە وڵاتی سوریا ھاوسەرگیریان لەگەڵ دوو کوردی رۆژئاوای کوردستان کردووە و یەکێکیان لە ساڵی ١٩٩٩ و  ئەوەی دیکەشیان لە ٢٠١١ چووەتە ئەڵمانیا.

مەسعود خالید برای کچەکان دەڵێت، لە رێگەی کەسوکاریانەوە زانیویانە کە دوو خوشکەکەی لە ئەڵمانیان  و لە رێگەی پشکنینی (دی، ئێن، ئەی) یەوە پشتراست بووەتەوە کە خوشکی ئەون و بەیەک گەیشتوونەتەوە.

پەیامنێری کوردسات نیوز رایگەیاند، ئێوارەی سێشەممە لە ھۆتێل مەسایە لە شاری ھەولێر تەرمی تاریق عماش بەڕێوەبەری جێنەجێکاری گوندی لوبنانی و ھۆتێل مەسایە دۆزرایەوە، تا ئێستاش ھۆکاری گیانلەدەستدانەکەی ئاشکرا نەکراوە.

وتیشی، بەڕێوەبەری راگەیاندنی گوندی لوبنانی رەتی کردوەتەوە، تارق عماش لە ھۆتێل کوژرابێت یا خود گیانیلەدەستدابێت، بەڵکو دوای تێکچونی باری تەندروستی ڕەوانەی نەخۆشخانەکراوە و دواتر گیانیلەدەستداوە.

تاریق عماش بەڕێوەبەری جێبەجێکاری گوندی لوبنانی و ھۆتیل مەسایە لەھەولێر خەڵکی لوبنانە، لە بنەماڵەی سەعد حەریری سەرۆکوەزیرانی پێشووی لوبنانە، بڕیارە رۆژی چوارشەممە تەرمەکەی بگەڕێندرێتەوە زێدی خۆی لە لوبنان.