کوردستان
فەرماندەی گشتی هێزەكانی سوریای دیموكرات رایگەیاند، كۆنگرەیەك بۆ كۆكردنەوەی سەرجەم لایەنە كوردییەكان دەبەسترێت، لەسەر داوای ئەحمەد شەرعیش لە بەنداوی تشرین و حەڵەب كشاونەتەوە.
مەزڵوم كۆبانێ فەرماندەی گشتی هێزەكانی سوریای دیموكرات ناسراو بە هەسەدە بە ماڵپەڕی مۆنیتەری راگەیاند، كۆنگرەیەك بۆ داڕشتنی هەڵوێستێكی سیاسی هاوبەش لەنێوان هەموو لایەنە كوردییەكان رێكدەخەن بۆ پێكهێنانی وەفدێكی یەكگرتوو بۆ نوێنەرایەتیكردنی ناوچەكە بۆ گفتوگۆ كردن لەگەڵ دیمەشق.
كۆبانێ راشیگەیاند، ئەوان حوكمڕانی ناوخۆییان دەوێت و ئەمەش شتێكە گفتوگۆی لەسەر دەكەن، هاوكات بەشێك لە هێزە كوردییەكان پێداگری لە فیدڕاڵیزم دەكەن.
سەبارەت بە رێككەوتنی گەڕەكی شێخ مەقسود و ئەشرەفیەش وتی، رێككەوتنەكە گرنگییەكی زۆری هەیە و بۆ ماوەیەكی كاتییە و لەسەر داوای ئەحمەد شەرع لەو ناوچانە كشاونەتەوە.
وتیشی، لەگەڵ دیمەشق رێككەوتوون بۆ ئەوەی بەڕێوەبردن و كارمەندانی بەنداوی تشرین لە شوێنی خۆیان بمێننەوە بۆ دڵنیابوون لە كاركردنی بەنداوەكە بە رێكوپێكی.
وەزیری دەرەوەی ئەمریكا داوا دەكات بە زووترین كات بۆری نەوتی كەركوك-جەیهانی توركی بكرێتەوە و هەناردەكردنەوەی نەوتی هەرێم دەستپێبكاتەوە.
تامی بروس وتەبێژی وەزارەتی دەرەوەی ئەمریكا رایگەیاند، ماركۆ رۆبیۆ وەزیری دەرەوەی ئەمریكا وتویەتی هاوبەشی نێوان وڵاتەكەی و هەرێمی كوردستان بەهێزە لە بواری بازرگانی و بەرەوپێشچوونی سەقامگیری ناوچەكە و بەهێزكردنی دیموكراسی.
وەزیری دەرەوەی ئەمریكا داواشیكردووە لە زووترین كاتدا بۆری نەوتی كەركوك-بەندەری جەیهانی توركی بكرێتەوە و هەناردەی نەوتی هەرێمی كوردستان دەستپێبكاتەوە بۆ پاراستنی وەبەرهێنانی ئەمریكا لە رابردوودا و لەگەڵ راكێشانی وەبەرهێنەران لە داهاتوودا.
وتەبێژی كۆشكی سپیش رایگەیاند، ئەو لێدوانەی وەزیری دەرەوەی ئەمریكا لە چوارچێوەی پەیوەندییەكی تەلەفۆنیدا بووە لەگەڵ سەرۆكی حكومەتی هەرێمی كوردستان.
پارێزەرێكی دەستگیركراوانی بادینان ئاشكرایكرد، ئومێد بەرۆشكی یەكێك لە چالاكوانە دەستگیركراوەكانی بادینان لە زیندان سزایەكی دیکەی بەسەردا سەپێنراوە.
بەشدار حەسەن ئەندامی تیمی دۆسیەی پارێزەرانی بادینان رایگەیاند، ئومێد بەرۆشكی یەكێك لە چالاكوانە دەستگیركراوەكانی بادینان، جارێكی دیکە لەناو زیندان سزایەكی تری بەسەردا سەپێنراوە كە رێگەی پێنادرێت لە زیندانەوە پەیوەندی بە خانەوادەكەیەوە بكات.
وتیشی، ئەو شێوازی سزادانە پێشێلكاریكردنە بەرامبەر مافی بەندكراوان، لە كاتێكدا چاوەڕوانی پێداچوونەوەن بەهەڵوەشاندنەوەی بڕیاری دادگای كەتنی دهۆك لەسەر سزادانی ئومێد بەرۆشكی، بەڵام لەناو زیندان بەدەر لەیاسا رووبەڕووی سزایەكی تر دەكرێتەوە، ئەوەش لە كاتێكدایە لە ساڵی 2022ـەوە ئومێد بەرۆشكی، بە تۆمەتی ناوزڕاندن دەستگیركراوە.
کەمێک پێش ئێستا بریندارێکی روداوەکەی سنوری برادۆست بەهۆی سەختی برینەکەیەوە لە نەخۆشخانە گیانی لەدەستدا.
پەیامنێری کوردسات نیوز رایگەیاند، ئەلەند تەحسینی تەمەن 20 ساڵ، کە یەکێک بوو لەو سێ هاووڵاتییەی بەهۆی "تەقینەوەی گولـلە تۆپێک" لە سنوری برادۆست برینداربوون، کەمێک پێش ئێستا بەهۆی سەختی برینەکەیەوە گیانی لەدەستدا.
لە قەزای سیدەكانی سنووری برادۆست، سێ هاوڵاتی لەكاتی كۆكردنەوەی گژوگیای بەهارە، گولە تۆپێك پیایاندا تەقیەوە و بە سەختی برینداریكردن، ئەوەش سێیەمین حاڵەتی تەقینەوەی مین و گولە تۆپە لە 12 رۆژی رابردوودا بە هاوڵاتییان لە سنووری ناوچەكە، كە بەهۆیەوە دوو كەس گیانیان لەدەستداوە و چوار كەسی دیكەش برینداربوون.
وەفدێکی حکومەتی ناوەندی سوریا و هێزەکانی هاوپەیمانان و ئیدارەی خۆبەڕێوەبەری سەردانی بەنداوی تشرینیان کرد.
نوێدەکرێتەوە...
بەپێی پێشبینییەکانی کەشناسی هەرێم سبەینێ ئاسمان بەگشتی نیمچە هەور دەبێت و لەهەندێک شوێنیش نمە باران دەبارێت.
بەڕێوەبەرایەتی گشتی کەشناسی هەرێم بڵاویکردەوە، ئەمڕۆ ئاسمان نیمچە هەور دەبێت، هەروەها لە ناوچە شاخاوییەکانی باکوور و رۆژئاوای هەرێم هەوری تەواو دەبێت لەگەڵ بارینی نمە بارانی پچر پچر.
ئاماژەی بەوەشکردووە، سبەینێ بەگشتی ئاسمان نیمچە هەور دەبێت، لەکاتەکانی ئێوارەدا نمە باران بەشێوەی پچر پچر لەهەندێک شوێن بەکاتی جیاواز دەبارێت.
کەشناسی هەرێم راشیگەیاندوە، پلەکانی گەرما نزیک دەبێتەوە لە تۆمارکراوەکانی ئەمڕۆ
سەرۆك وەزیرانی عیراق سەردانی هەولێر دەكات و لەگەڵ لێپرسراوانی باڵای هەرێم كۆدەبێتەوە و پرسی هەڵبژاردن تاوتوێ دەكرێت.
پەیامنێری كوردسات نیوز رایگەیاند، محەمەد شیاع سودانی سەرۆكی ئەنجومەنی وەزیرانی عیراق سەردانی هەرێمی كوردستان دەكات و لەگەڵ مەسعود بارزانی سەرۆكی پارتی دیموكراتی كوردستان و سەرۆكی حكومەتی هەرێم كۆدەبێتەوە.
بەپێی زانیارییەكانی كوردسات نیوز، سودانی لە سەردانەكەیدا پرسی هەڵبژاردنی ئەنجومەنی نوێنەران و بابەتی هەناردەكردنەوەی نەوت و بودجەی هەرێم گفتوگۆیان تاوتوێ دەكات.
سەردانەكەی سودانی بۆ هەولێر لە كاتێكدایە، بڕیارە ئەم هەفتەیە گفتوگۆكانی نێوان هەرێم و بەغداد و كۆمپانیاكانی نەوت، لەسەر پرسی هەناردەكردنەوەی نەوتی هەرێمی كوردستان دەستپێبكاتەوە.
پۆلیسی سلێمانی رایدەگەیەنێت؛ بەتۆمەتی تەقەكردنی هەڕەمەكی و لە ژێرفشاری هێزەكانی پۆلیسدا تۆمەتبارێك خۆی رادەستکرد و دەستگیركرا.
بەڕێوەبەرایەتی پۆلیسی پارێزگای سلێمانی بڵاویکردەوە، دوای ئەوەی لەسنووری بنكەی پۆلیسی سەیوان دەنگی تەقە بیسترا ، هێزەكانی پۆلیس شوێن دەنگی تەقەكە كەوتن و دوای لێكۆڵینەوەو بەدواداچوونەكان ، لە ژێر فشاری مەفرەزەكانی بەشی پۆلیسی فریاكەوتن و بنكەی پۆلیسی سەیوان ، تۆمەتبار خۆی رادەستی هێزەكانی پۆلیسی سلێمانی كرد.
ئاماژەی بەوەشکرد، تۆمەتبار لە دایكبووی 2001، لە ئێستاشدا بەبڕیاری دادوەر راگیراوە.
وەزیری دەرەوەی ئەمریكا داوا دەكات بە زووترین كات بۆری نەوتی كەركوك-جەیهانی توركی بكرێتەوە و هەناردەكردنەوەی نەوتی هەرێم دەستپێبكاتەوە.
تامی بروس وتەبێژی وەزارەتی دەرەوەی ئەمریكا رایگەیاند، ماركۆ رۆبیۆ وەزیری دەرەوەی ئەمریكا وتویەتی هاوبەشیی نێوان وڵاتەكەی و هەرێمی كوردستان بە هێزە لە بواری بازرگانی و بەرەوپێشچوونی سەقامگیری ناوچەكە و بەهێزكردنی دیموكراسی.
وەزیری دەرەوەی ئەمریكا داواشیكردووە لە زووترین كاتدا بۆری نەوتی كەركوك-بەندەری جەیهانی توركی بكرێتەوە و هەناردەی نەوتی هەرێمی كوردستان دەستپێبكاتەوە بۆ پاراستنی وەبەرهێنانی ئەمریكا لە رابردوودا و لەگەڵ راكێشانی وەبەرهێنەران لە داهاتوودا.
وتەبێژی كۆشكی سپیش رایگەیاند، ئەو لێدوانەی وەزیری دەرەوەی ئەمریكا لە چوارچێوەی پەیوەندییەكی تەلەفۆنیدا بووە لەگەڵ سەرۆكی حكومەتی هەرێمی كوردستان.
پارێزەرێكی دەستگیركراوانی بادینان ئاشكرایكرد، ئومێد بەرۆشكی یەكێك لە چالاكوانە دەستگیركراوەكانی بادینان لە زیندان سزایەكی تری بەسەردا سەپێنراوە.
بەشدار حەسەن ئەندامی تیمی دۆسیەی پارێزەرانی بادینان رایگەیاند، ئومێد بەرۆشكی یەكێك لە چالاكوانە دەستگیركراوەكانی بادینان، جارێكیتر لەناو زیندان سزایەكی تری بەسەردا سەپێنراوە كە رێگەی پێنادرێت لە زیندانەوە پەیوەندی بە خانەوادەكەیەوە بكات.
وتیشی، ئەو شێوازی سزادانە پێشێلكاریكردنە بەرامبەر مافی بەندكراوان، لە كاتێكدا چاوەڕوانی پێداچوونەوەن بەهەڵوەشاندنەوەی بڕیاری دادگای كەتنی دهۆك لەسەر سزادانی ئومێد بەرۆشكی، بەڵام لەناو زیندان بەدەر لەیاسا روبەڕوی سزایەكی تر دەكرێتەوە، ئەوەش لە كاتێكدایە لە ساڵی 2022ەوە ئومێد بەرۆشكی، بە تۆمەتی ناوزڕاندن دەستگیركراوە.
روداوێکی هاتوچۆ لە چوارقوڕنە، گیانلەدەستدانی کەسێک و برینداربونی حەوت کەسی دیکەی لێکەوتەوە.
راگەیاندن و ھۆشیاری بەڕێوەبەرایەتی ھاتوچۆی راپەڕین، بڵاوی کردەوە؛ ئەمشەو، سەعات هەشتی شەو، روداوێکی دڵتەزێنی هاتوچۆ لە ناوچەی چوارقوڕنە رویدا کە تێیدا کەسێک گیانی لەدەستدا و حەوت کەسی دیکەش برینداربون.
بەپێی زانیارییەکانی پەیامنێری کوردسات نیوز، روداوەکە پێکدادانێک بووە لە نێوان دوو ئۆتۆمبێلی جۆری فۆرد و نیسان سەنی.
سەرچاوەیەکی نزیک لە نەخۆشخانەی فریاکەوتنی ناوچەکە بە کوردسات نیوزی راگەیاند، دوای گەیاندنی بریندارەکان بۆ نەخۆشخانە، بەداخەوە یەکێک لە بریندارەکان بەناوی "دەشتی حەمەدەمین" گیانی لەدەست دا.
وەزارەتی كشتوكاڵی هەرێم رایگەیاند، كوژاندنەوەی زەوی جوتیارانی دەشتی بەرانەتی لە هەولێر لە دەسەڵاتی ئەواندا نییە و وەزارەتی شارەوانی ئەو بڕیارەی داوە.
وەزارەتی كشتوكاڵ و سەرچاوەكانی ئاوی هەرێم راگەیەنراوێكی سەبارەت بە كێشەی زەوی جوتیارانی دەشتی بەرانەتی لە هەولێر بڵاوكردەوە و رایگەیاند، ئاگاداری كێشەی جوتیارانی ئەو ناوچەیەن، بەڵام چارەسەكردنی لە دەسەڵاتی وەزارەتەكەی ئەواندا نییە، چونكە ئەنجومەنی وەزیران بە نوسراوێك و بێ گەرانەوە بۆ وەزارەتی كشتوكاڵ دەسەڵاتی كوژاندنەوەی زەوی كشتوكاڵی بۆ زەوی ناكشتوكاڵی داوەتە دەسەڵاتی وەزارەتی شارەوانی و گەشتوگوزار.
ئاماژەی بۆ ئەوەشكرد، لە سۆنگەی لێپرسراوێتیان بە نوسراو داوایان لە وەزارەتی شارەوانی كردووە بۆ چارەسەكردنی ئەو كێشەیە، بەڵام شارەوانی لە وەڵامدا پێی راگەیاندوون جارێ وازبێنن لەو كێشەیە تا پێكهێنانی حكومەتی نوێی هەرێم.
قوباد تاڵەبانی، جێگری سەرۆک وەزیران لە پەراوێزی کۆڕبەندیی نێودەوڵەتیی دێڵفی لەگەڵ نیکۆس دێندیاس، وەزیری بەرگری یۆنان کۆبووەوە و پێکەوە دۆخی ئاسایش و سەقامگیری ناوچەکەیان تاوتوێ کرد.
لە کۆبوونەوەکەدا کە رۆژی هەینی (11/4/2025) بە ئامادەبوونی هەر یەکە لە دارا رەشید، وەزیری پلاندانان و دابان شەدەڵە، جێگری لێپرسراویی فەرمانگەی پەیوەندییەکانی دەرەوەی هەرێم بەڕێوەچوو، گفتوگۆ لەبارەی دۆخی ئاسایش و سەقامگیری ناوچەکە و چۆنییەتی بەرەنگاربوونەوەی تیرۆر کرا، هەردوولا هاوڕابوون کە پێویستە ئاستی هاوکارییە ئەمنی و سەربازییەکان بۆ پاراستنی سەقامگیری زیاتر بکرێت.
سەبارەت بە پەیوەندییەکانی نێوان هەرێمی کوردستان و وڵاتی یۆنانیش، جەختکرایەوە لەسەر پێویستیی بەهێزترکردنی هەماهەنگی و هاوکاری لەنێوان دامەزراوە ئەمنی و سەربازییەکانی هەردوولا، بە تایبەتیش لە پرسی بەرەنگاربوونەوەی تیرۆردا.
لە تەوەرێکی دیکەدا باسی دۆخی سیاسی ناوخۆی هەرێم و هەوڵەکانی پێکهێنانی کابینەی نوێی حکومەتی هەرێم کرا و لەمبارەیەوە جێگری سەرۆک وەزیران روونیکردەوە، هەنگاوی زۆر باش نراوە و بەپێی ئەو لێکتێگەیشتنەی کە ئێستا هەیە، گفتوگۆکانی نێوان یەکێتی و پارتی بەردەوام دەبن و گەشبینین لە نزیکترین دەرفەتدا دوو لایەن بگەنە رێککەوتنی کۆتایی.
ئۆفیسی پارێزگای سلێمانی كۆمیسیۆنی باڵای سەربەخۆی هەڵبژاردنەكانی عیراق رایدەگەیەنێت: رۆژانی هەینی و شەممە و سەرجەم رۆژەکانی هەفتە سەرەڕای پشووە رەسمییەکان، نوێکردنەوەی تۆماری بایۆمەتری بەردەوامە.
ئۆفیسی پارێزگای سلێمانی كۆمیسیۆنی باڵای سەربەخۆی هەڵبژاردنەكانی عیراق بڵاویکردەوە: ناوەندەكانمان بەدرێژایی رۆژەكانی هەفتە كراوەن بەڕووی هاووڵاتیان بۆ نوێ كردنەوەی تۆماری بایۆمەتری دەنگدەران و دابەش كردنەوەی كارتی دەنگدان.
ئاماژەی بەوەشکردوە، ئەوانەی لەدایکبووی ساڵی 2007ن دەتوانن سەردانی بنکەکان بکەن بۆ تۆمارکردنی بایۆمەتری دەنگدەر.
ئۆفیسی پارێزگای سلێمانی كۆمیسیۆنی باڵای سەربەخۆی هەڵبژاردنەكانی عیراق ئاگاداری هاووڵاتیانیش دەکاتەوە کاتێک سەردانی ناوەندەکان دەکەن بەپێی مامەڵەکانیان، ئەو بەڵگەنامانە لەگەڵ خۆیان بهێنن کە بەم شێوەیەی خوارەوە دیاریکراوە.......
-زیادکردن؛ بۆ ئەودەنگدەرانەی ناویان لە ھیچ جۆرە داتایەکدا نییە، بەڵگەنامەی پێویست بۆ ئەم حاڵەتە بریتیە لە:کارتی نیشتیمانی لەگەڵ کۆبونی خۆراک+کارتی زانیاری .
-تۆمارکردنی بایۆمەتری دەنگدەر بۆ یەکەمجار و بەتایبەت بۆ لەدایکبوانی (2007) بەڵگەنامەی پێویست بۆ ئەم حاڵەتە بریتیە لە:کارتی نیشتیمانی یان {پێناسی باری شارستانی و ڕەگەزنامەی عێراقی} لەگەڵ کۆبونی خۆراک .
-گواستنەوەی ناوەندی دەنگدان، بەڵگەنامەی پێویست بۆ ئەم حاڵەتە بریتیە (کارتی نیشتیمانی یان {پێناسی باری شارستانی و ڕەگەزنامەی عێراقی} +کارتی زانیاری لەگەڵ کۆبونی خۆراک کە لەساڵی2020-2021 دەرچوبێت تایبەت بەو پارێزگایەی دەیەوێت دەنگدانەکەی بۆ بگوازێتەوە بەمەبەستی سەلماندنی شوێنی نیشتەجێبوون، لەکاتی داواکردن بۆ گواستنەوەی شوێنی دەنگدان لە پارێزگایەک بۆ پارێزگایەکی دیکە ، یان کارتی نیشتەجێبوون لەکاتی نەبوونی کۆبونی خۆراک کە تەنھا بۆ گواستنەوەی شوێنی دەنگدان لە ناو سنوری یەک پارێزگا .
-راستکردنەوەی ناو یان ھەر ھەڵەیەکی دیکە لە زانیاری دەنگدەر،بەڵگەنامەی پێویست بۆ ئەم حاڵەتە بریتیە لە:(کارتی دەنگدانی کۆن ئەگەر ھەبێت+کارتی نیشتیمانی یان {پێناسی باری شارستانی و ڕەگەزنامەی عێراقی} لەگەڵ کۆبونی خۆراک .
-سڕینەوەی ناوی مردووان،بەڵگەنامەی پێویست بریتیە لە : (وێنەیەک لە بەڵگەنامەی مردووان یان وێنەی سڕینەوەی تۆمار یان قسام شرعی )
-تۆمارکردنی کارمەندانی ھێزە ئەمنیەکان .لە بارێکیشدا گەر کارمەندی ھێزە ئەمنیەکان خانەنشین بووبێت ئەوا دوای پێشکەشکردنی بەڵگەنامەی خانەنشین بوون دەنگدانەکەی لە تایبەت دەکرێت بە دەنگدانی گشتی.
-تۆمارکردنی ئاوارەی پارێزگاکان، سەبارەت بە پارێزگای سلێمانی ئاوارەکانی قەزای شنگال دەگرێتەوە بە تەنھا بەڵگەنامەکانیان بریتیە لە (کارتی نیشتیمانی یان {پێناسی باری شارستانی و ڕەگەزنامەی عێراقی} لەگەڵ کۆبونی خۆراک
كۆمپانیای ئاسیاسێڵ تۆڕی پەیوەندییەكان و سیستمەكانی كارپێكردنی بە شێوەیەكی تەواو نوێ كردەوە و بۆ ماوەی شەش سەعاتیش سەرجەم خزمەتگوزارییەكان بە خۆراِی بووە.
كۆمپانیای ئاسیاسێڵ لە راگەیەندراوێكدا بڵاویكردەوە، ئاسیاسێڵ سیستمەكانی كارپێكردنی بە شێوەیەكی تەواو نوێ كردووەتەوە لە پێناو ئامادەكاری بۆ پەیوەندییە پێشكەوتووەكان و تەكنەلۆژیای ژیریی دەستكرد.
ئاماژەی بۆ ئەوەش كرد، ماوەی ئەو نوێكردنەوە لە سەعات 12ی شەو بۆ 7ی بەیانی، واتە شەش سەعاتی خایاندووە، لەو ماوەیەشدا سەرجەم خزمەتگوزارییەكان بۆ هەر 20 ملیۆن بەشداربووەكەی ئاسیاسێڵ بە خۆراِی بووە.
راشیگەیاند، بەم نوێكردنەوەیە، ئاسیاسێڵ درێژە بە بەهێزكردنی پێگەی پێشەنگی خۆی دەدات وەك كۆمپانیایەكی پەیوەندییەكان لە عێراقدا كە خاوەنی باشترین خزمەتگوزاری و خێراترین تۆڕە لە بواری پەیوەندییەكاندا.
بەپێی پێشبینییەکانی کەشناسی ئەمڕۆ ئاسمان نیمچە هەور دەبێت و پلەکانی گەرما نزیک دەبێتەوە لە تۆمارکراوەکانی دوێنێ.
بەڕێوەبەرایەتی کەشناسی هەرێم بڵاویکردەوەتەوە، بەپێی پیشبینییەکانی کەشناسی ئەمڕۆ ئاسمان نیمچە هەور دەبێت، هاوکات لە ناوچە شاخاوییەکان هەوری تەواو دەبێت.
کەشناسی هەرێم ئاماژەی بەوەشکردووە، خێرای با لەسەرخۆ و مامناوەند دەبێت، خێرایەکەی دەگاتە (10-20) کم لە سەعاتیکدا .
راشیگەیاندوە، پلەکانی گەرمان نزیک دەبێتەوە لە تۆمارکراوەکانی دوێنێ، بەرزترین پلەکانی گەرمای پێشبینیکراو بەپلەی سیلیزی بەم شێوەیەی خوارەوەیە:
هەولێر : 26 پلەی سیلیزی
سلێمانی : 25 پلەی سیلیزی
دهۆک : 22 پلەی سیلیزی
کەرکوک : 29 پلەی سیلیزی
زاخۆ : 22 پلەی سیلیزی
هەڵەبجە : 26 پلەی سیلیزی
سۆران : 22 پلەی سیلیزی
حاجی ئۆمەران : 18 پلەی سیلیزی
گەرمیان :33 پلەی سیلیزی