لە "پنتاگۆن" وەزیری بەرگری ئیسڕائیل لەگەڵ "لوید ئۆستن" ھاوتا ئەمریکییەکەی و "مارک میلی" سەرۆکی دەستەی ئەرکانی ھاوبەشی ئەمریکی کۆبووەوە.

دوای ئەو کۆبوونەوەیە، "جۆن کیربی" وتەبێژی "پنتاگۆن" ڕایگەیاند، پەیوەندییەکی بەھێزیان لەگەڵ "ئیسڕائیل" ھەیە و ئەمریکا بوون و توانای بەھێزی ھەیە لە خۆرھەڵاتی ناوەڕاست و جوڵاندنی ھێزەکانیشیان لە ناوچەیەکەوە بۆ یەکێکی تر ئاساییە، ئەوەش وەک ئاماژەیەک بە کشانەوەی ٨ سیستمی مووشەکی "پاتریۆت" و گۆڕینی پاترییەکانیان لە چەند ناوچەیەکی خۆرھەڵاتی ناوەڕاست. "کیربی" ڕاشیگەیاند کشانەوەی ھێزەکانی ئەمریکا لە ئەفغانستان بەردەوامە و لە کاتی خۆیدا تەواوی دەکەن.

نوێنەرایەتی یەکێتیی ئەوروپا لە عێراق لە تویتێکدا ڕایگەیاند، جۆزێف بۆریل بەرپرسی سیاسیەتی دەرەوەی یەکێتیی ئەوروپا، ئامادەیی یەکێتییەکەی بۆ ھاوکاریکردنی عێراق لە ئەنجامدانی ھەڵبژاردنێکی پاک و ئازاد پیشانداوە و لەسەر داوای حکومەتی عێراق، تیمی چاودێری ڕەوانەی عێراق دەکەن، بە مەبەستی چاودێریکردنی ھەڵبژاردنی پێشوەختی ئەنجومەنی نوێنەرانی عێراق، کە بڕیارە ١٠ی مانگی ١٠ی ئەمساڵ بەڕێوەبچێت.

ئەردۆغان لە وتەیەکدا ڕایگەیاند، کێشەکانیان لەگەڵ ئەمریکا لە کاتێکی گوونجاودا چارەسەر دەکەن و ئێستا پەیوەندییەکانیان چووەتە قۆناغی ھەماھەنگی، داواشی لە ئەمریکا کرد، ڕێز لە ماف و سەروەرییەکانی تورکیا بگرێت، ئەوەش وەک ئاماژەیەک بۆ بەردەوام بوون لە کڕینی سیستمی بەرگری ئاسمانی ئێس ٤٠٠ لە ڕووسیا و پەلامارەکانی بۆ سەر ھێزە کوردییەکان لە سوریا.

لەلایەکی ترەوە جۆزێف بۆریل، بەرپرسی سیاسیەتی دەرەوەی یەکێتیی ئەوروپا ڕایگەیاند، لە کۆبوونەوەی وەزیرانی دەرەوەی یەکێتیی ئەوروپا لە ڕۆژانی ٢٤ و ٢٥ی ئەم مانگە، پرسی تورکیا یەکێک دەبێت لە تەوەرەکانی گفتوگۆکانیان، بەڵام بە قوڵی پەیوەندییەکانیان لەگەڵ تورکیا تاوتوێ ناکەن.

لە کۆبوونەوەیەکدا ئەمڕۆ لە ھەولێر، قوباد تاڵەبانی، سەرەتا پیرۆزبایی دەستبەکاربوونی لە کونسوڵی نوێی یۆنان کرد لە ئەرکی نوێیدا و داوایکرد ھەرچی دەتوانێت بیکات بۆ برەودانی زیاتری پەپوەندییەکانی نێوان ھەولێر و ئەسینا بە تایبەت لە بوارەکانی گەشتیاری و خوێندنی باڵا و کەلەپوور و بازرگانی. 

دواتر قوباد تاڵەبانی پوختەیەکی لە بارەی کارنامەی حکومەتی ھەرێم پێشکەش بە کونسوڵی یۆنان کرد و جەختیکردەوە، حکومەتی ھەرێم کار بۆ فرەجۆرکردنی سەرچاوەکانی داھات دەکات و ستایشی نموونەی یۆنانی کرد لە گرنگیدان بە گەشتوگوزار کە دەکرێت ببێتە وانە و ئەزموون بۆ ھەرێمی کوردستان. 

لای خۆیەوە کونسوڵ ئامادەیی وڵاتەکەی دەربڕی بۆ پەرەپێدانی ھاریکاری زیاتر لەگەڵ ھەرێمی کوردستان بە تایبەت لە دروستکردنی پەیوەندی نێوان شارەکانی ھەرێمی کوردستان و شارەکانی یۆنان. ھەروەھا بە گرنگییەوە باسی لەوەشکرد بڕیارە بەم نزیکانە سەرۆک وەزیرانی یۆنان بێتە عێراق و ھەرێمی کوردستانیش یەکێک دەبێت لە وێستگەکانی سەردانەکەی.

بە پێی زانیارییەکان، ڕاکان جبوری بە نیاز بووە لە ڕێگەی فڕۆکەخانەی نێودەوڵەتی بەغدادەوە سەردانی تورکیا بکات، بەڵام لەلایەن بەرپرسانی فڕۆکەخانەوەکە ڕێگەی گەشتکردنی پێنەدراوە، بەو پێیەی لە دادگا سکاڵای لەسەر تۆمارکراوە.

لە ماوەی ڕابردووشدا گەشتی دەرەوە لە چەند بەرپرسێکی کەرکوک قەدەغەکراوە کە بە تۆمەتی گەندەڵی دارایی و ئیداری لە دادگا سکاڵایان لەسەر تۆمارکراوە. ھەروەھا ڕاکان جبوری پارێزگاری بە وەکالەتی کەرکوک زیاتر لە ٢٥ سکاڵای لەسەر تۆمارکراوە و تۆمەتبارکراوە بە گەندەڵی دارایی و ئیدارەی.

لە کۆبوونەوەکەدا ئەمڕۆ لە ھەولێر، قوباد تاڵەبانی جەختیکردەوە،  لە ڕێکخستنەوەی شێوازی کۆکردنەوەی داھاتی دەروازە سنوورییەکان و ھەروەھا ڕێکخستنەوەی میکانیزمی جێبەجێ کردنی ئەو رێنماییانەی تایبەتن بە کاروباری دەروازە سنورییەکان. 
جێگری سەرۆک وەزیران ئاماژەی بەوەکرد، گرنگە وەزارەتە پەیوەندیدارەکانی پەیوەست بەکاری دەروازەکان، کار لەسەر کەمکردنەوەی ڕۆتین بکەن، لەپێناو ئاسانکاری زیاتر بۆ بازرگانان کە ئەمەش ھۆکارێکە بۆ چالاکترکردنی جموجۆڵی بازرگانی و بەھێزکردنی کەرتی تایبەت، ھەر بۆ ئەو مەبەستەش پێداگری کرد لەسەر داڕشتنی پەیڕەوێکی کاری ھاوبەش لەگەڵ دیاریکردنی میکانیزم بۆ چۆنییەتی جێبەجێکردنی لە دەروازە سنوورییەکان. 
لە کۆبوونەوەکەدا وەزیرانی ناوخۆ، دارایی و ئابوری، پلاندانان، شارەوانی و گەشتوگوزار، ئاوەدانکردنەوە، تەندروستی، گواستنەوەو گەیاندن، سەرۆکی دیوانی ئەنجومەنی وەزیران، بەڕێوبەری گشتی گومرگ، نوێنەری وەزارەتی کشتوکاڵ و بەرێوەبەری گشتی بازرگانی ئامادەبوون.
ئەم کۆبوونەوەیە تەواوکەری کۆبوونەوەی ھەفتەی رابردووی قوباد تاڵەبانی بوو لەگەڵ بەڕێوبەرانی گومرگەکانی ھەرێمی کوردستان و بانکە بازرگانییەکان کە تیایدا جەخت کرایەوە لەسەر چاکسازی کردن و ڕێکخستنەوەی کاری گومرگەکان و دەروازە سنورییەکان و کەمکردنەوەی ڕۆتین بە مەبەستی زیادکردن و ھەمەجۆرکردنی داھاتی دارایی و چالاکترکردنی جموجوڵی بازرگانی.

وەزارەتی پێشمەرگە لە راگەیەندراوەکە باسی لەوە کردووە، جوانڕۆ کەریم قادر ناسراو بە جوانڕۆی باڵەبان کارمەندی وەزارەتەکەیان بووە و دوابەدوای بەدواداچوونی یەکە سەبازییەکەی لەگەڵ ھێزە ئەمنییەکان و ئاسایش، تەرمی ناوبراو بە دەستبەستراوی لە نزیک گوندی پەلکەڕەشی نێوان کەسنەزان و دێگەڵە دۆزراوەتەوە.

ئاماژە بەوەش کراوە، وەزارەتی پێشمەرگە بەدواداچوون و رێوشوێنی پێویستی لەبارەی ئەم تاوانەوە گرتووەتەبەر و لە ئێستادا لەلایەن پۆلیسەوە دۆسییەی لێکۆڵینەوەی بۆ کراوەتەوە و چاوەڕێی دەرئەنجامی لیکۆڵینەوەکانن.

سەرچاوەیەک لە دادگای دھۆک بە کوردسات نیوزی راگەیاند، ئومێد بەرۆشکی یەکێک لە دەستگیرکراوانی بادینان دادگایی کراوەو لەسەر دوو سکاڵا و بە پێی یاسای خراپ بەکارھێنانی ئامێرە ئەلکترۆنییەکان، سزای ساڵێک زیندانی بەسەردا سەپێنراوەو لە سەر سکایەکی تریش بەپێی یاسای سزادانی عێراقی سزای دارایی ٢٤٠ ھەزار دیناری بەسەردا سەپێنراوە. پارێزەرانی ئومێد بەرۆشکی رایانگەیاندوە، لە دادگای تەمیز تانە لە بڕیارەکەی دادگا دەدەن.

بەڕێوەبەرایەتی هاتوچۆی سلێمانی رایگەیاند، ئەو كۆدەی بۆ ئۆتۆمبێلی بێ سەرەتا دروست كراوە بە مەبەستی وەرگرتنی ئامار بووە و بە بەڵگەنامەی ڕێگەپێدان ئەژمار ناكرێت. جەختیشیكردەوە، بوونی ئەو ئۆتۆمبێلانە لەسەر شەقامەكان كارێكی نایاساییە و هەركاتێك بكەونە مەفرەزەكانی پۆلیسی هاتوچۆ یان سەرپێچی ئەنجام بدەن دەستیان بەسەردا دەگیرێت. لە ماوەی رابردوودا بەڕێوەبەرایەتی گشتی هاتوچۆی هەرێم بڕیاردا بە ئاماركردنی ئۆتۆمبێلی بێ سەرەتا و لە تۆڕەكۆمەڵایەتییەكان گومانی ئەوە لای هاوڵاتیان دروستكرا كە ئەو ئاماركردنە مەبەست لێی دروستكردنی سەرتایە بۆیان.

کاروان رەزا بەڕێوەبەری گشتی پۆستەو گەیاندن لە وەزارەتی گواستنەوەو گەیاندنی حکومەتی ھەرێمی کوردستان بە کوردسات نیوز رایگەیاند،  تاوەکو ئێستا ھیچ رێنماییەکی تایبەت بۆ دیاریکردنی باج لەسەر ھێڵەکانی ئینتەرنێت دەرنەچووەو رێککەوتنی لەسەر نەکراوە.

سەبارەت بە نرخ و گەیاندنی خزمەتگوزارییەکانیش، وتی، "لە ئێستا ھێڵەکانی ئینتەرنێت لە ھەرێمی کوردستان ھاوشێوەی وڵاتانە لە خزمەتگوزارییەکانی و نرخەکانیش بەراورد بە ھەندێک وڵات کەمترە و بەراورد بە عیراق و چەند وڵاتێکی دیکەش زۆر پێشکەوتوترە". 

لە ١٠ی کانونی دووەمی ٢٠٢١ حکومەتی ھەرێمی کوردستان بڕیاریدا بە رێکخستنەوەی سیستەمی کۆرکردنەوەی باج و یەکێک لە بڕگەکان تایبەت بوو بە ھێڵەکانی ئینتەرنێت و وەرگرتنی ٢٠% باجی فرۆشراوەکان ھاوشێوەی کۆمپانیاکانی دیکە لە عیراق کە پابەند کراون