ھێزەکانی سوریای دیموکرات" ھەسەدە" بڵاویکردەوە، لە میانی ھەڵمەتێکی ئەمنی لە ریفی خۆرئاوای رەققە، بۆ کۆتاییھێنان بە مەترسییەکانی داعش و دەستگیرکردنی شانەنوستووەکانی ئەو گرووپە، ٣٤ تیرۆرستی داعش و ھاوکاری ئەو گرووپەیان دەستگیرکردووە، کە ھاوکاری لۆجستیان گەیاندۆتە تیرۆرستانی داعش.ھەسەدە ئاماژەی بەوەشکرد، لە میانی ھەڵمەتەکە بڕێکی زۆر چەکی تیرۆرستانی داعش دەستی بەسەردا گیراوە.
مانگی ئاداری ئەمساڵ لە میانی ئۆپراسیۆنێکی فراوانی ھەسەدە لە کەمپی ھۆڵ لە باکوری خۆرھەڵاتی سوریا، سەدان تیرۆرستی شانەنوستووەکانی داعش دەستگیرکران.

نوسینگەی رێکخراوی نەتەوەیەکگرتوەکان لە عێراق -یۆنامی- رایگەیاند: بە نیگەرانییەکی زۆرەوە دەڕوانن رەوشی مەترسیداری شەنگال، و دەببێت لێکۆڵینەوەیەکی خێرا ئەنجامبدرێت، بۆ دیاریکردنی بەرپرسیارێتی لەکوژران و برینداربونی دەیان ھاوڵاتی بێتاوان".
ئاماژەی بۆ ئەوەشکردووە" دەبێت ڕێکەوتننامەی شەنگال بەبێ دواخستن جێبەجێبکرێت، داواشی لە ھەموو لایەنەکان کردووە کە بەرژەوەندی و رەوشی خراپی ھاوڵاتیانی شەنگال لەبەرچاو بگرن.

رێکخراوی ناتۆ ئاماژەی بۆ ئەوەکردووە، ترسێکی گەورە لەناو ئەفغانستان بڵاوبۆتەوە و مەدەنییەکان ھەوڵی ھەڵھاتنی بە کۆمەڵ دەدەن، لەماوەی ٥ رۆژی رابردووش، زیاتر لە ١٨ ھەزار ئەفغانی لە رێگەی فرۆکەخانەوە وڵاتی خۆیان بە جێھێشتووە و بە ھەزارانی تریش بە رێگەی ووشکانی ھەڵھاتوون.
ئەمریکا و ئوسترالیا و کەنەدا و وڵاتانی ئەوروپا ئامادەییان نیشانداوە بۆ وەرگرتنی پەنابەرە ئەفغانییەکان.

بە پێی بەڵگەنامەیەکی نھێنی کە ناوەندی نەرویجی بۆ توێژینەوەی جیھانی (RHIPTO)، رادەستی رێکخراوی نەتەوە یەکگرتووەکانی کردووە، چەکدارانی تاڵیبان، بۆ دۆزینەوە و دەستگیرکردنی ئەو کەسانەی ھاوکاری ھێزەکانی ناتۆ و حکومەتی پێشووی ئەفغانستانیان کردووە، ماڵ بە ماڵ دەگەڕێن و ھەڕەشە لە بنەماڵەکانیان دەکەن.
کریستیان نێلیمان بەڕێوەبەری (ئاڕ ئێچ ئای پی تی ئۆ) رایگەیاندووە، کەسانێکی زۆر لەناو لیستی رەشی تاڵیباندان و لەئێستادا مەترسی جددیان لەسەرە، دەشڵێت، ئەگەر ئەو کەسانە خۆیان تەسلیم نەکەن، ئەندامانی بنەماڵەکانیان لەلایەن تاڵیبانەوە دەستگیردەکرێن و سزا دەدرێن.
ئەوەش لەکاتێکدایە، پاش کۆنتڕۆڵکردنی کابوڵ، بزوتنەوەی تاڵیبان رایگەیاند، بەدوای تۆڵەسەندنەوە نییە و داوای لە خەڵکی ئەفغانستان کرد، نەترسن و بگەڕێنەوە سەر کارەکانیان.

روانگەی سوریا بۆ مافەکانی مرۆڤ بڵاویکردەوە، بەرەبەیانی ئەمڕۆ سوپای ئیسرائیل چەند موشەکێکی ئاڕاستەی پێگەکانی حزبوڵا و گروپەکانی نزیک لە ئێران لە خۆرئاوای دیمەشق و باشوری حومس کردووە و دوای ھێرشەکەش دوکەڵێکی زۆر لە ئاسمانی دیمەشق بینراوە.
میدیای نزیک لە حکومەتی سوریا ھەواڵەکەی پشتڕاستکردووە و رایگەیاندووە، ھێزی ئاسمانی ئەو وڵاتە بەرپەرچی ھێرشەکەی داوەتەوە و توانیویەتی لە کۆی شەش موشەک، چوار موشەک لە ئاسماندا بتەقێنێتەوە و ھێرشەکە زیانێکی ئەوتۆی نەبووە.

 سەرچاوەیەک لە وەزارەتی دارایی بە کوردسات نیوزی راگەیاند، مووچەی مانگی ھەشتی فەرمانبەرانی ھەرێم لەکاتی خۆیدا و بەبێ لێرین دابەش دەکرێت، ئەو سەرچاوەیەی وەزارەتی دارایی وتیشی، داھاتی ئەم مانگەی حکومەتی ھەرێم زیادیکردووە. ئەوەش لەکاتێکدایە حکومەتی ھەرێم مانگی رابردوو مووچەی بەبێ لێبرین دابەش کرد.

زیاد جەبار سەرۆکی لیژنەی دارایی لە پەرلەمانی کوردستان بە کوردسات نیوزی راگەیاند: لەم مانگەوە خانەنشینی پلە باڵا و ئەندامانی پەرلەمان بەیاسای چاکسازی خەرج دەکرێت و زۆرترین مووچەش نابێت لە٥٠% کۆی مووچەکەی زیاتر بێت، ئاماژەی بۆ ئەوەشکرد" فەرمانبەرانی پلە باڵا کە تەمەنیان نەگەیشتبێتە ٤٥ بە لە٢٥% ی کۆی مووچەکەی خانەنشین دەکرێت.
وتیشی: پێشتر مووچەی خانەشینی پلە باڵاکان و پەرلەمانتاران دیاریی کرابوو بە لە٨٠% کۆی مووچەکانیان ، بەڵام بەپێی یاسا نوێکە ھیچ پلە باڵایەک نابێت لەسەرو ٥٠ % ی کۆی مووچەکەی وەربگرێت.

قەیس خەزعەلی لە تویتەر نوسیوویەتی، بێدەنگی لایەنە حکومی و ناحکومییەکان بەرامبەر ھێرشەکانی تورکیا بۆ سەر شەنگال، جێگەی نیگەرانی و سەرسوڕمانە، وتیشی، ئەو بێدەنگیە وادەکات تورکیا درێژە بە کارە داگیرکاری و پێشلێکارییەکانی لە عێراق بدات، کە سەردەکێشێت بۆ ئاستێکی مەترسیدار
ھەفتەی رابردوو فڕۆکەی بێ فڕۆکەوانی تورکیا ناوەندێکی تەندروستیان لە گوندی سنکێ لە قەزای شەنگال بۆردومانکرد و بەھۆیەوە چەند کەسێک بوونەقوربانی.

بڕیارە لە سەرەتایی مانگی ئەیلوول پرۆسەی خوێندن لەنێو پۆلدا لە سەرجەم خوێندنگاکانی ھەرێم دەستپێبکاتەوە، وەک ئامادەکارییەکیش وەزارەتی پەروەردە بڕیاریداوە کە مامۆستایانی ڤاکسینی بە کۆرۆنا وەربگرن، 
لایخۆشیەوە (ئاسۆ حەوێز) وتەبێژی وەزارەتی تەندروستی ھەرێمی کوردستان بە کوردسات نیوزی راگەیاند: لە کۆبوونەوەی لیژنەی باڵای ڕووبەڕبوونەوەی کۆرۆنا کە بەم نزیکانە ئەنجامدەدرێت، بە ڕەچاوکردنی رەوشی کۆرۆنا، بڕیار و راسپاردەکان بۆ دەستپێکردنەوەی پرۆسەی خوێندنی ئەمساڵ، بڕیاری لێدەدرێت.
(ئاسۆ حەوێز) وتیشی، وەک ئامادەکارییەک بۆ ھەڵگرتنی ئاستەنگەکان بەردەم پرۆسەی خوێندنی ئەمساڵ، لەسەرجەم سەنتەرەکانی دابەشکردنی ڤاکسین، رۆژێک تایبەت کراوە بە مامۆستایان بۆ ئەوەی پرۆسەی پێدانی  ڤاکسین بە فەرمانبەرانی پەروەردە و مامۆستایان خێراتر بکرێت.

(ئاری جەلال) سەرۆکی دەزگای لوتکە بۆ کاروباری ئاوارە و پەنابەران ڕایگەیاند: لەمساڵدا ٣٥ ھەزار عێراقی داوای مافی پەنابەرییان لە وڵاتانی ئەوروپا کردووە، کە لەو ڕێژەیەش زیاتر لە ٧٠٪ی خەڵکی ھەرێمی کوردستانن.
سەرۆکی دەزگای لوتکە ئاماژەی بۆ ئەوەکردووە، زۆرینەی ئەوانەی لە ھەرێمی کوردستانەوە کۆچ دەکەن لە چینی گەنجانن و ھۆکارەکەشی خراپی گوزەران و نەبوونی خزمەتگوزاری و بێکارییە.

دەشلێت" دەیان گەنجی ھەرێمی کوردستان، لە تورکیا و یۆنان و لیتوانیا زیندانی کراون یان بێسەروشوێن بوون.

تاوەکو ئێستاش ئیدارەی کەرکوک نەیتوانیوە لە بوارەکانی کارەبا و شارەوانی، خزمەتی پێویست بکات، ئەوەش لە کاتێکدایە لە ساڵی ڕابردوودا چەندین جۆر بودجە بۆ ئەو پارێزگایە تەرخانکراوە.
پێشتر و بەو ھۆکارانە، پەرلەمانتارانی کورد لە کەرکوک، ئیدارەی شارەکەیان بە گەندەڵ وەسفکردووە.

 

ھەرچەندە ڕۆژی سەردانەکەی کازمی بۆ کوەیت دیاری نەکراوە، بەڵام وەزارەتی دەرەوەی عێراق ئاشکرایکردووە کە ھەفتەی داھاتوو کازمی سەردانی ئەو وڵاتە دەکات و ڕاکێشانی وەبەرھێنەرانی بیانی بۆ عێراق بابەتی سەرەکی سەردانەکەی دەبێت.

 

بیسمیلا محەمەدی وەزیری بەرگری ئەفغانستان لە تویتەر ڕایگەیاند، ھێزە بەرگرییە میلییەکان ھەر سێ ناوچەی بەلحیسار و دەسەڵاح و بەنوی سەر بە ویلایەتی بەغلانیان لە ژێر دەستی چەکدارەکانی تاڵیبان دەرھێناوە. ئاماژەی بەوەش کردووە، تا ئێستا ڕووبەڕووبوونەوە بەردەوامە.

بە پێی زانیاریی بەشێک لە میدیا ئەفغانییەکانیش خەڵکی ناوچەی ئەندرابی بەغلان ڕووبەڕووی چەکدارانی تاڵیبان بوونەتەوە و حەوت کەسیان لێ کوشتوون و ١٣ی تریشیان لێ بەدیل گرتوون.

بە پێی ئاماری بەڕێوەبەرایەتییەکانی بەرگری شارستانی ھەر چوار پارێزگای ھەرێم، لە ماوەی ھەشت مانگی سەرەتای ئەمساڵ ١٤ کەس لە سنوری پارێزگای ھەولێر لە ئاوی ڕووبار و دەریاچەکاندا خنکاون و لە سنوری سلێمانی ٧ کەس و لە دھۆک ١٠ کەس و لە ھەڵەبجەش ٢ کەس خنکاون.

بە پێی بەدواداچوونی بەڕێوەبەرایەتییەکانی بەرگری شارستانی، ژمارەیەکی زۆر لەو کەسانەی لە ئاودا خنکاون، بەھۆی نە شارەزایی بووە لە مەلەکردن.

لە دوایین ڕووداوی خنکانیشدا، پێشمەرگەیەک دوای وەرگرتنی مووچەکەی بۆ خۆفێنککردنەوە لە ئاوی زێی بچوک لە نزیک ناحیەی پردێ مەلەی کرد و لە ئاوەکەدا خنکا، ٢٠ ڕۆژ بەسەر ئەو ڕووداوەدا تێپەڕیوە و تا ئێستا تەرمی ئەو پێشمەرگەیە نەدۆزراوەتەوە.