"مارتن گریفیس" بریکاری سکرتێری گشتی نەتەوە یەکگرتووەکان بۆ کاروباری مرۆیی ڕایگەیاند، لە کۆی سێ ھاووڵاتی ئەفغانی یەکێکیان بە ئەستەم خۆراک پەیدا دەکات و توانیوویانە لەو کۆنگرەیە زیاتر لە یەک ملیار دۆلار کۆبکەنەوە. 

ھاوکات "ھایکۆ ماس" وەزیری دەرەوەی ئەڵمانیا ڕایگەیاند، بڕی ھاوکارییە مرۆییەکانیان بۆ "ئەفغانستان" بە تێکڕای ١٠٠ ملیۆن یۆرۆ زیاد دەکەن و پلانیشیان ھەیە کە ٥٠٠ ملیۆن یۆرۆی تر بۆ ئەو وڵاتە تەرخان بکەن. 

"لیندا توماس" باڵیۆزی ئەمریکاش لە نەتەوە یەکگرتووەکان ڕایگەیاند، بە بڕی ٦٤ ملیۆن دۆلار ھاوکاری پێشکەش دەکەن و مەرجی ئەوەیان ھەیە کە بزووتنەوەی "تاڵیبان" بە نوسراو پابەندی بە پێشکەش کردنی ھاوکارییە مرۆییەکان و پاراستنی مافی ژنان و کەمە نەتەوەکان ڕابگەیەنێت.

ئاشتی مەھدی عارف کاندیدی ھاوپەیمانی کوردستان لە بازنەی ٢ی کەرکوک ڕایگەیاند، ھاوپەیمانی کوردستان بێ جیاوازی ھەموو گەڕەکەکانی کەرکوک پاکدەکاتەوە و لە داھاتووشدا لە ئەنجومەنی نوێنەرانی عێراق، کار بۆ زیادکردنی بودجەی پاککردنەوەی شارەکە دەکەن.

بە چاودێری "قوباد تاڵەبانی" جێگری سەرۆکی حکومەتی ھەرێم، ئەمڕۆ زانکۆی پۆلیتەکنیکی سلێمانی و سەنتەری توێژینەوە بە ھاوبەشی نەخۆشخانەی ھیوا و فەرمانگەی ژینگەی سلێمانی، سیمپۆزیۆمێکیان لە بارەی گرنگی وزەی بەردەوام لە پاراستنی ژینگە ڕێکخست و لە دوو پانێڵدا پاراستنی ژینگە و باشترکردن و بەرزکردنەوەی ئاستی بەرھەمھێنان لە کارگەی چیمنەتۆ و پاڵاوگەکان و کاریگەری ژینگەیە لەسەر تووشبوون بە شێرپەنجە تاوتوێ دەکرێن.

 

 

 

"ئەحمەد ھۆشیار" بەڕێوەبەری گشتی فڕۆکەخانەی نێودەوڵەتی ھەولێر ڕایگەیاند، ھێڵی فڕۆکەوانی لوتفھانزا بڕیاردراوە لە ٢١ی ئەم مانگەوە گەشتەکانی لە نێوان ھەولێر و فرانکفۆرت دەستپێبکاتەوە. ڕاشیگەیاند، گەشتەکان لە ڕۆژانی شەممە و سێشەممەی ھەموو ھەفتەیەک ئەنجام دەدرێن. 

ھاوکات "ئەحمەد سەحاف" وتەبێژی وەزارەتی دەرەوەی عێراق لە ڕاگەیەندراوێکدا ئاماژەی بۆ ئەوەکردووە، لەسەر داوای عێراق لە ڕۆژی ٢١ی ئەم مانگەوە گەشتە ئاسمانییەکانی نێوان ڕووسیا و عێراق دەستپێدەکاتەوە.

ئاماژەی بەوەشدا تووشبووەکان لە ژێر چاودێری پزیشکیدان، و ھەوڵی بنەبڕکردنی نەخۆشیەکە دەدرێت.

پارێزگاری سلێمانیش ئاماژە بۆ ئەوە دەکات، ژمارەی بنکەکان لە یەک بنکەوە زیادکراون بۆ ١٣ بنکەی ڤاکسین، ھەروەھا تیمی گەڕۆکیشیان زیادکردووە و خۆیان دەچنە لای ھاوڵاتیان و مامۆستایان.

لە کۆبوونەوەیەکدا ئەمڕۆ لە ھەولێر، قوباد تاڵەبانی وێڕای پیرۆزبایی لە ستافی نوێی کۆنسوڵخانەی بەریتانیا، داوای کرد کاربکەن لە پێناو دەستەبەرکردنی پشتیوانی بەریتانیا بۆ پرۆسەی چاکسازی و پەرەپێدانی حوکمڕانی لە کوردستان بۆ ئەوەی بتوانرێت لەو ڕێگەیەوە خزمەتگوزاری باشتر پێشکەش بە کۆمەڵانی خەڵکی کوردستان بکرێت.

ھەردوولا ھاوڕابوون لەبارەی گرنگی ھەڵبژاردنی ١٠ی مانگی داھاتوو، جەختیشیان کردەوە دەبێت بە شێوازێکی تەندروست و پاکوبێگەرد بەڕێوەبچێت. شاندە بەریتانییەکە ئامادەیی وڵاتەکەیان دەربڕی بۆ ڕەوانەکردنی چاودێر بۆ ھەڵسەنگاندنی چۆنییەتی بەڕێوەچوونی پڕۆسەکە و دڵنیابوونەوە لە جێبەجێکردنی بەند و باوە یاسایی و دیموکراسییەکان. 

قوباد تاڵەبانی داوایکرد بەریتانیا گەرمتر لە جاران پەیوەندییە دوو قۆڵییەکان لەگەڵ ھەرێمی کوردستان بباتە پێشەوە، شاندەکەش پابەندی وڵاتەکەیان دووپات کردەوە بە درێژەدان بە ھاوکارییەکان و پەیوەندییەکان و باشترکردنیان لە قۆناغی داھاتوودا بە تایبەت پاش کشانەوەی ھێزە شەڕکەرەکانی ئەمەریکا و ھاوپەیمانان لە کۆتایی ئەم ساڵ. 

جێگری سەرۆک وەزیران داوای لە کونسوڵخانەی بەریتانیا کرد لە سەردان و چالاکییەکانیاندا سەرجەم دەڤەر و ناوچە جیاجیاکانی کوردستان بەسەر بکەنەوە و چالاکییەکانیان تەنھا لە سەنتەری شارە گەورەکاندا چڕ نەکەنەوە، شاندەکەش بە گرنگییەوە پێشنیارەکەیان وەرگرت.

لەھۆڵی شەھید ئارام لەبارەگای مەڵبەندی ١ی رێکخستنی سلێمانی، شاناز ئیبراھیم ئەحمەد، بەئامادەبوونی فە‌ھمی بورھان سەرپەرشتیاری مەکتەبی رێکخراوە دیموکراتییەکان، لەگەڵ کادرانی مەکتەبەکە لەسنوری سلێمانی کۆبووەوە.
لەکۆبوونەوەکەدا، شاناز ئیبراھیم ئەحمەد رایگەیاند: ھەڵبژاردنی ئەمجارە گرنگە، بۆیە ئەرکی ھەمووانە بەیەکەوە کاربکەن بۆ سەرخستنی ھاوپەیمانی کوردستان، بۆ گەیشتن بە ئامانجە باڵاکانیان دەبێت پێگەی کورد لەبەغدا بەھێزتر بێت، یەکێتیش سەلماندویەتی بەھێزبوونی بەغداد لە قازانجی ھەموواندایە.
لای خۆیەوە، فەھمی بورھان سەرپەرشتیاری مەکتەبی رێکخراوە دیموکراتییەکان رایگەیاند، داواکاری ھەمووان یەکریزی و یەک دەنگی کوردە، ئەوەتا یەکێتی و گۆڕان ئەو یەکڕیزییەیان دروستکردووە، بۆیە پێویستە ھەموومان پشتگیری بکەن و ببنە ھۆکاری دروستکردنی یەکدەنگی و یەکگوتاری کورد لەبەغداد، ئەمەش بە دەنگدان دەبێت بە لیستی ھاوپەیمانی کوردستان. وتیشی: دەنگدان مافێکی یاسایی و دیموکراسی و دەستوری ھەموو تاکێکەو ئەم دەنگدانەش بۆ دیاریکردنی نوێنەری ڕاستەقینەو بەرگریکاری مافە نەتەوەیی و داراییەکانی خەڵکی کوردستانە.

سەعدی ئەحمەد پیرە ئاماژەی بە رەوشی بەرێوەچوونی هەڵمەتەکانی هەڵبژاردنکرد ، ووتیشی: بەداخەوە لە هەندێک کەمپەکانی ئاوارەکان بەناوی ئاژانسەکانی سەربەنەتەوە یەکگرتووەکان رێگری دەکرێت لەبەشێک لە کاندیدان بۆ بانگەشەکردن لەکاتێکدا هەر بەناوی ئاژانسەکانی نەتەوەیەکگرتووەکانەوە ڕێگە دەدرێت بە بەشێکی تر لە کاندیدەکان بەئازادی خۆیان بچنە ناو کەمپەکان و بانگەشە بکەن .

لەبەرامبەردا بەڕێز ریکاردۆ رۆدریگێز بەرپرسی نوسینگەی یونامی لە هەرێمی کوردستان نیگەرانی خۆی لەسەر ئەم جۆرە هەڵسو کەوتانە نیشاندا و تەئکیدی کردەوە کە بەگوێرەی یاسای هەڵبژاردن بانگەشەکردن لە کەمپەکان ئازادە بۆ هەموو لایەنەکان ، بەکاندیدە سەربەخۆکانیشەوە ، بێ ئاگایی خۆشی لەو شێوازی مامەڵەکردنە نیشاندا و نیگەران بوو بەوەی کەناوی ئاژانسەکانی سەر بەنەتەوە یەکگرتووەکان بەکاربهێندرێت بۆ بەرژەوەندی هەر لایەن و گروپێک ، تەئکیدی کردەوە کە نەتەوە یەکگرتووەکان و ئاژانسەکانی سەربە نەتەوە یەکگرتووەکان بەشێک نین لە هەڵمەتی بانگەشەی هەڵبژاردنەکان بەڵکو تەنها لایەنی چاودێر و هەماهەنگی کارن بۆ بەرێوەچوونی هەڵبژاردنێکی سەرکەوتووانە و دەوڵەمەند بە پرەنسیپەکانی ئازادی بیر وڕاو دەنگدان .

هەر لەو کۆبوونەوەیەدا هەڤاڵ سەعدی ئەحمەد پیرە سوپاسی ئاژانسەکانی نەتەوەیەکگرتووەکانی کرد کە لەماوەی رابردوودا لە هەرێمی کوردستان لایەنێکی گرنگی بەرەو پێش چوونی دامو دەزگاکانی هەرێمی کوردستانن لەسەرجەم بوارەکاندا ، هاوکات هاوکاری و کۆمەکە مرۆییەکانیان لە رووداوەکاندا بەشیکی سەرەکی چارەسەری کێشە و گرفتەکان بوون ، ئەمە جگە لەوەی لە رووی سیاسی و داڕشتنی یاساکانی هەرێمی کوردستان پاڵپشتییەکی بەهێزبوون .

 لە کۆنفرانسەکەدا، ئەپڵ نەوەی نوێی سمارتفۆنەکانی خستەڕوو، کە "ئایفۆن ١٣ و ئایفۆن ١٣ مینی و ئایفۆن ١٣ پرۆ و ئایفۆن ١٣ پرۆ ماکس"ن، کە کامێرا و شاشە و خێراییەکانیان باشتر کراوە و تەمەنی پاترییەکەی درێژترە، دژە ئاو و خۆڵیشن، بە ٥ رەنگیش بەردەستە و کێشەکانی مۆبایلەکانی پێشووی تێدا چارەسەر کراوە،  ھەروەھا ئایپادی ٩ و ئایپاد مینی ٦ و ئەپڵ وۆچ ٧ راگەیەندران. 
کۆنفرانسەکەی ئەپڵ بەھۆی کۆرۆناوە، بۆ دووەمین ساڵ لەسەر یەک لەڕێی ئۆنلاینەوە رێکخرابوو.

عەبدولحەکیم خەسرۆ سەرۆکی فەرمانگەی ھەماھەنگی و بەدواداچوونی حکومەتی ھەرێمی کوردستان بە کوردسات نیوزی رایگەیاند، بەپێی بڕیاری ژمارە ٣٣ی ئەنجومەنی وەزیرانی ھەرێم لیژنەی رێکخستنەوەی ھەیکەلیەتی وەزارەتەکانی حکومەتی ھەرێم لەگەڵ لیژنەی باڵای بایۆمەتری بەردەوامن لە کارەکانیان و پێداچوونەوەو رێکخستن بۆ سەرجەم وەزارەتەکانی حکومەتی ھەرێم دەکرێت.

وتیشی، پێداچوونەوەی ھەیکەلیەتی وەزارەتەکانی حکومەتی ھەرێم پرۆسەیەکی وردە و کاتی زۆری پێویستە، بەڵام لە رێگەی ئەو پێداچوونەوانەو بەپێی پێشکەشکردنی خزمەتگوزاری وەزارتەکان رێکخستنەوەکان دەکرێت و ئەگەر پێویستیش بکات گواستنەوەی فەرمانبەرانیان بۆ دەکرێت.

شانەی روبەڕوبوونەوەی قەیرانەکان لە موسڵ رایگەیاند، ئەو کەسەی بە تای خوێن بەربوون گیانی لەدەستداوە لە رۆژی پێنج شەممەوە لە نەخۆشخانە بووە و گۆشت فرۆش بووە و ھەموو ئەو کەسانەشی لەگەڵیدا تێکەڵ بوون کەرەنتین کراون. 

بەپێی پسپۆڕانی تەندروستی و ڤێتێنەری، تای خوێن بەربوون نەخۆشییەکی گوازراوەیە لە ئاژەڵەوە بۆ مرۆڤ و رێژەی گیانلەدەستدان دەگاتە ٦٠%، لە قۆناغی یەکەمدا نیشانەکانی ھاوشێوەی ئەنفلۆنزایە، وەک تا و سەرئێشە و رشانەوە و ئازاری ماسولکە، لە ھەفتەی دووەمیشدا خوێن بەربوون بۆ ماوەی ١٠ رۆژ روودەدات و پاشان گیانلەدەستدانی لێدەکەوێتەوە.

زوھەیر ئەعرەجی قائیمقامی موسڵیش داوای لە ھاوڵاتیان کرد گۆشت لە شوێنە رەسمییەکان بکڕن و لایەنە تەندروستییەکان بەرپرسیارێتی پاکوخاوێنی بگرنە ئەستۆ.  
لە چەند مانگی رابردووشدا چەند حاڵەتێکی توشبوون و گیانلەدەستدان بە تای خوێن بەربوون لەچەند ناوچەیەکی عێراق تۆمارکران.

ئیرەج مەسجدی باڵیۆزی ئێران لە بەغداد لە بارەی ھەڵگرتنی ڤیزا لەنێوان ئێران و عێراق رایگەیاند، ئەو بڕیارە لەئێستادا تەنھا ئەو گەشتیارانە دەگرێتەوە کە گەشتی ئاسمانی دەکەن و جێبەجێکردنی ئەو بڕیارەش دوای تەواوبوونی رێوڕەسمەکانی چلەی ئیمام حوسێن دەبێت.

وتیشی، لەگەڵ کەمبوونەوەی مەترسییەکانی کۆرۆنا رەنگە ھەڵگرتنی ڤیزا گەشتە وشکانییەکانیش لە نێوان ئەو دوو وڵاتە بگرێتەوە.

مەسجدی راشیگەیاند، سەردانەکەی مستەفا کازمی سەرۆک وەزیرانی عێراق بۆ ئێران، بە ئامانجی فراوانکردنی پەیوەندییە ھاوبەشەکانیان بووە لە بوارەکانی سیاسی و ئابوری و رۆشنبیری و ئەمنی. 

کۆریای باکور تاقیکردنەوەی موشەکێکی  دوور مەودای لە جۆری کروز بە سەرکەوتویی راگەیاند، کە ھەزار و ٥٠٠ کیلۆمەتری بڕیوە و لە ئاوە ھەرێمییەکانی ئەو وڵاتە کەوتووە. 

وەزارەتی بەرگری ئەمریکاش پنتاگۆن لە راگەیەندراوێکدا بڵاویکردەوە، چاودێری تاقیکردنەوە موشەکیەکانی پیۆنگ یانگ دەکەن و ئەو تاقیکردنەوەیەش بە ھەڕەشە دەزانن.

وتیشی، واشنتۆن لەگەڵ ھاوپەیمانەکانی ھەماھەنگی دەکات لەبارەی لێکەوتەکانی ئەو تاقیکردنەوەیە و پابەندن بە بەرگریکردن لە کۆریای باشور و ژاپۆن. 

پنتاگۆن راشیگەیاند، پیۆنگ یانگ  سورە لەسەر پەرەدان بە پرۆگرامی سەربازیی ، کە ھەڕەشەیە بۆ سەر دراوسێکانی و کۆمەڵی نێودەوڵەتی.