هەواڵەکان
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکردووە، ئەمڕۆ و سبەینێ پلەکانی گەرما بەرز دەبنەوە و ئەگەری نمەباران و هەورەتریشقە هەیە.
کەشناسیی هەرێم رایگەیاند، ئەمڕۆ سێشەممە، ئاسمان پەڵەهەور دەبێت و لە ناوچەکانى باکور و باکورى رۆژهەڵاتى هەرێم نیمچەهەور دەبێت، لەگەڵ ئەگەرى کەمێک نمەباران و هەورەبروسکە .
ئەوەشی خستووەتە روو، سبەینێ چوارشەممە، ئاسمان پەڵەهەور دەبێت و لە ناوچە شاخاوییە سنوريیەکانى باکور نیمچەهەوردەبێت، لەگەڵ بوونى تۆزێکى سوک لە هەوادا.
بەپێی پێشبینییەکانی کەشناسی، ئەمڕۆ پلەکانی گەرما بەرزتر دەبنەوە لە تۆمارکراوەکانی دوێنێ و سبەینێش یەک بۆ دوو پلەی دیکە بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی بەم جۆرە دەبن:
هەولێر : 33 پلەی سیلیزی
سلێمانی : 30 پلەی سیلیزی
دهۆک : 33 پلەی سیلیزی
کەرکوک : 34 پلەی سیلیزی
زاخۆ : 34 پلەی سیلیزی
هەڵەبجە : 29 پلەی سیلیزی
سۆران : 29 پلەی سیلیزی
حاجی ئۆمەران : 23 پلەی سیلیزی
گەرمیان :37 پلەی سیلیزی
وەزارەتی کاروباری کۆمەڵایەتی عیراق رایگەیاند کرێکارانی وڵاتانی سوریا، ئەندەنوسیا، پاکستان، بەنگلادیش و فلیپین، بۆیان نیە بۆ کارکردن بێنە ناو عیراقەوە.
ئەمڕۆ سێشەممە، وەزارەتی کاروکاروباری کۆمەڵایەتی عیراق بڵاویکردەوە، دەستیانکردوە بە جێبەجێکردنی بڕیارێکی ئەنجومەنی وەزیران کە تایبەت بە دامەزراندنی (80٪)ـی هێزی کاری نیشتمانی و دامەزراندنی تەنها (20٪)ـی هێزی کاری بیانی، لەو چوارچێوەیەشدا رێگری لە هاتنەناوەوەی کرێکارانی ئەو پێنج وڵاتە دەکرێت بێنە عێراق و کاربکەن.
حەسەن خوام، وتەبێژی وەزارەتەکە ئاماژەی بەوەشکردوە، لەهەمانکاتدا کارلەسەر پلاتفۆرمی (پیشە)ـی سەر بە وەزارەتی کار دەکەن بۆ دامەزراندنی کرێکارانی ناوخۆیی لە پرۆژەکاندا.
بەڕێوەبەرایەتی خۆپاراستنی تەندروستیی هەڵەبجە رایگەیاند، دوای ئەنجامدانی گەڕان و پشکنین، چەند خاوەنکارێکیان سزا داوە و مۆڵەتی کارکردنیشیان بۆ هەتا هەتایە لە گۆشتفرۆشێک وەرگرتووەتەوە.
بەڕێوەبەرایەتی خۆپاراستنی تەندروستیی هەڵەبجە رایگەیاند، لە هەڵمەتێکی گەڕان و پشکنیندا دەستیان بەسەر بڕێکی زۆر لە خۆراک و کەلوپەلی ناتەندروستدا گرتووە و چوار خاوەنکاریان سزا داوە.
ئاماژەی بەوەشکردووە، تیمەکانی چاودێری تەندروستی هەڵمەتێکی چڕی گەڕان و پشکنینیان بۆ خواردنگە و شوێنە گشتییەکان ئەنجام دا و سەردانی چەندین مارکێت و گۆشتفرۆش و خواردنگەیان کرد.
ئەوەش هاتووە، بەهۆی پابەند نەبوون بە رێنماییەکانی کارکردن سێ شوێن بە پێبژاردن سزا دران و گۆشتفرۆشێکیش سەرەڕای پێبژاردن بڕیاردرا بە هەڵوەشانەوەی مۆڵەتەکەی و بێبەشکردنی لە پێدانی مۆڵەت بە یەکجاری.
دەم پارتی: دەبێت ئەو یاسایانەی دژی كورد لە توركیا پەسەندكراون هەموار بكرێنەوە
دەم پارتی داوای هەمواركردنەوەی ئەو یاسایانە دەكات كە پێشتر لە دژی كورد لە توركیا پەسەند كراون، داواش دەكات توركیا هەنگاوی ئەرێنی بنێت بۆ چارەسەری پرسی كورد.
گوڵستان كلچ، هاوسەرۆكی فراكسیۆنی پارتی یەكسانی و دیموكراسی گەلان - دەم پارتی لە پەرلەمانی توركیا رایگەیاند، بۆ چارەسەری پرسی كورد، دەبێت هەموو یاسایانەی بوونەتە هۆی سەرهەڵدانی پرسی كورد، هەموار بكرێنەوە، حكومەتی توركیاش هەنگاوی ئەرێنی بنێت بۆ رەواندنەوەی گومانەكان.
راشیگەیاند، تەنیا بە دانانی چەك لەلایەن پەكەكەوە، پرۆسەی ئاشتی سەركەوتوو نابێت، بەڵكو دەبێت ئەوانەی بەهۆی پەكەكەوە لە زیندانن، ئازاد بكرێن.
پێشبینی دەکرێت پارتی لیبراڵی کەنەدا بۆ چوارەمین جاری یەک لە دوای یەک لە هەڵبژاردنی فیدراڵی وڵاتەکەیدا سەرکەوتوو بێت.
بەپێی ئەنجامە بەراییەکان، لیبراڵەکان، بە سەرکردایەتی سەرۆک وەزیرانی کەنەدا مارک کارنی، کە دوای دەستلەکارکێشانەوەی جەستن ترۆدۆ لە سەرەتای ئەمساڵدا پۆستەکەی وەرگرت، لە هەڵبژاردنەکاندا زۆرینەیان بەدەستهێناوە.
مارک کارنی، بە ناوبانگە بە لێدوانە توندەکانی بەرانبەر دۆناڵد ترەمپ و وەستانەوەی لە بەرانبەر لێدوانەکانی لەسەر کەنەدا، کە باس لە لکاندنی دەکات بە ئەمریکاوە.
تا درەنگانی دوێنێ دووشەممە، پارتی لیبراڵ بە بەدەستهێنانی161 کورسی لە پەرلەمان لە پێشەوە بوو لە بەرامبەر 150 کورسی پارتی پارێزگاران. بەپێی یاسای هەڵبژاردن، بۆ بەدەست هێنانی زۆرینە، پارتێک پێویستی بە بردنەوەی 172 کورسی لە کۆی 343 کورسی پەرلەمان هەیە.
ئیلۆن مەسک، ئەو گەنجەی بە داهێنانەکانی جیهانی بەخۆیەوە سەرقاڵ کردووە، جارێکی دیکە جیهانی سەرسام کردووە بە باسکردنی رۆڵی سەرەکی رۆبۆتەکان لە داهاتووی زانستی پزیشکیدا.
ئیلۆن مەسک ملیاردێری ئەمریکی و خاوەن و جێبەجێکاری کۆمپانیای سپەیس ئێکس و سەرۆکی تێسلا باس لەوەدەکات، لەماوەی چەند ساڵێکی کەمدا رۆبۆتەکان تواناکانی پزیشکێکی باش تێدەپەڕێنن لە ئەنجامدانی نەشتەرگەریدا، هەروەها تەنها لەماوەی پێنج ساڵی داهاتوودا توانای باشترین پزیشکەکانی ئەو بوارە تێدەپەڕێنن.
مەسک باسی لەوەشکردووە، یەکێک لە کۆمپانیاکانی بەناوی "نیورالینک" بۆ تەکنەلۆجیای تایبەتمەند بە مێشک و دەمار، رۆبۆتێکی بەکارهێناوە بۆ چاندنی چەند ئەلیکترۆکۆدێک لە مێشکدا، کە ئەوە زۆر ئەستەم بووە بۆ مرۆڤەکان بتوانن لەو ماوە کەمەدا و بەو وردییە ئەو کارە بکەن.
داهێنانەکانی مەسک لە بواری تەکنەلۆجیادا لەماوەی ئەم چەند ساڵەی کۆتاییدا وای کردووە، مەسک لە پێشەنگی بوارەکەدا بمێنێتەوە و رۆژ بە رۆژ میدیاکان بە بابەتی سەرسوڕهێنەرەوە سەرقاڵ دەکات.
لەماوەی رابردووشدا توانیویەتی لەرێگای چاندنی چیپی بچووک لە مێشکی مرۆڤەکاندا، توانای گفتوگۆ و قسەکردن بگەڕێنێتەوە بۆ ئەو کەسانەی توانای قسەکردنیان نییە.
ئەمڕۆ دووشەممە 28ـی 4ـی 2025، وەفدی باڵای یەکێتیی نیشتمانیی کوردستان و پارتی دیموکراتی کوردستان بە سەرۆکایەتی بافڵ جەلال تاڵەبانی و مەسرور بارزانی لە هاوینەهەواری دوکان کۆبونەوە.
وتەبێژی یەكێتیی نیشتمانیی كوردستان لەگەڵ کونسوڵی گشتی کۆماری ئیسلامی ئێران لە هەرێمی کوردستان کۆبووەوە و رایگەیاند، یەكێتی خوازیاری چارەسەری دیبلۆماسیانەی کێشە سیاسییەکانە لەسەر بنەمای دەستوری عیراق.
ئەمڕۆ دووشەممە سەعدی ئەحمەد پیرە وتەبێژی یەكێتیی نیشتمانیی كوردستان، لە هەولێر پێشوازی لە فەرامەرز ئەسەدی، کونسوڵی گشتی کۆماری ئیسلامی ئێران لە هەرێمی کوردستان كرد و لەمیانی دیدارێکدا بارودۆخی سیاسی ناوچەکە بە گشتی و عیراق و ھەرێمی کوردستان بە تایبەتی تاوتوێکرا.
لە کۆبوونەوەکەدا كونسوڵی گشتی كۆماری ئیسلامی ئیران رایگەیاند، ئێران بە بایەخ و گرنگییەکی زۆرەوە دەڕوانێتە بارودۆخی سیاسی عیراق بە گشتی و هەرێمی کوردستان بە تایبەتی لەپێناو سەقامگیری سیاسی و ئاشتی و بەرەوپێشچوونی پرۆسەی سیاسی و گەشەسەندنی ئابوری و ئاوەدانی زیاتر و بەھێزترکردنی دیموکراسی لە ناوچەکەدا.
هاوکات سەعدی ئەحمەد پیرە جەختیکردەوە، یەكێتی خوازیاری چارەسەری دیبلۆماسیانەی کێشە سیاسییەکانە لەسەر بنەمای دەستوری عیراق لە رێگەی گفتوگۆی ئاشتیانە و گەیشتن بە ئاڕاستەی چارەسەری گونجاو، کە ببێتە مایەی سەقامگیری بۆ عیراق.
کارەبای سلێمانی رایگەیاند، نرخی کارەبای موەلیدەی سیتییەکان بۆ مانگی چوار دیاری کراوە و یەک کیلۆوات بە 262 دینار دانراوە.
بەڕێوەبەرایەتی گشتیی کارەبای سلێمانی رایگەیاند، ئەمڕۆ دووشەممە، لیژنەی باڵای دیاریکردنی نرخی کارەبای کۆمەڵگەکانی نیشتەجێبوون 'سیتییەکان' کۆبووەوە و لە کۆبوونەوەکەدا نرخی کارەبای موەلیدەیان بۆ مانگی نیسان دیاری کرد.
بەپێی راگەیەنراوەکە، نرخی هەر کیلۆواتێکی کارەبا بە 262 دینار دیاری کراوە.
ئاماژەی بەوەشکردووە، بۆ ئەو سیتیانەش كە تاكە سەرچاوەی كارەبایان موەلیدەیە و كارەبای نشتمانیان نییە، نرخی كیلۆواتێک کارەبا 233 دینارە.
ئەوەش هاتووە، پێویستە سەرجەم سیتییەکان پابەند بن بەو نرخەوە و بەپێچەوانەوە ئەگەر زیاتر لەو نرخە وەربگرن رووبەڕووی رێکاری یاسایی دەکرێنەوە.
کەشەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و باس لەوە دەکات، سبەینێ لە بەشێک لە ناوچەکانی دەڤەری پشدەر ئەگەری تاوەباران و هەورەبروسکە هەیە.
کەشناسیی هەرێم رایگەیاند، ئەمڕۆ دووشەممە، ئاسمان بەگشتى نیمچەهەور دەبێت و پلەکانی گەرما نزیک دەبنەوە لە پلەکانی گەرمای دوێنێ، تەنها لە ناوچە شاخاوییەکان نەبێت نزم دەبنەوە.
کەشناسیی هەرێم راشیگەیاندووە، سبەینێ سێشەممە، ئاسمان نیمچەهەور دەبێت و لە ناوچە شاخاوییە سنووريیەکان هەوری تەواو دەبێت، لە کاتەکانی دوای نیوەڕۆ لە ناوچە سنووریيەکانی رۆژهەڵات و له هەندێک لە ناوچەکانی دهڤهرى پشدەر ئەگەری کەمێک تاوەباران و بروسکە هەیە.
بەپێی پێشبینییەکانی کەشناسی، سبەینێش پلەکانی گەرما هاوشێوەی ئەمڕۆ دەبن.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەم جۆرە دەبن:
هەولێر : 32 پلەی سیلیزی
سلێمانی : 28 پلەی سیلیزی
دهۆک : 28 پلەی سیلیزی
کەرکوک : 33 پلەی سیلیزی
زاخۆ : 29 پلەی سیلیزی
هەڵەبجە : 29 پلەی سیلیزی
سۆران : 25 پلەی سیلیزی
حاجی ئۆمەران : 17 پلەی سیلیزی
گەرمیان :35 پلەی سیلیزی
سوپای ئەمریكا دەڵێت، هێرشەكانیان لە دژی حوسییەكان بەردەوام دەبێت و لە دوایین بۆردومانیشدا 30 كەس كوژران.
فەرماندەیی ناوەندیی هێزەكانی ئەمریكا كە بە ینتكۆم ناسراوە لە راگەیەندراوێكدا بڵاویكردووەتەوە، بۆ پاراستنی ئاسایشی ئۆپراسیۆنەكانیان، سنوریان بۆ ئاشكراكردنی وردەكاری هێرشەكانیان لە یەمەن داناوە و لە داهاتووشدا وردەكاری ئۆپراسیۆنەكان ئاشكرا ناكەن.
ئاماژەی بەوەشكردووە، هێرشەكانی ئەمریكا كاریگەری گەورە و كوشندەی لەسەر حوسییەكان هەیە.
حوسییەكانیش ئاشكرایكردوە، لە بۆردومانێكی ئەمریكا بۆسەر سەنتەری داڵدەدانی پەنابەرانی ئەفریقا لە شاری سەعدە لە باكوری یەمەن 30 كەس كوژراون، ئێوارەی یەكشەممەش ئەمریكا دوو بەڕێوەبەرایەتی لە یەمەن كردووەتە ئامانج و بەهۆیەوە هەشت كەس كوژراون كە لە نێویاندا ژن و منداڵ هەن.
بەپێی داتاكانی سوپای ئەمریكا، لە مانگی ئازارەوە تائێستا زیاتر لە 800 جار حوسییەكانیان بۆردومانكردووە و سەدان چەكدار و ژمارەیەكی زۆری سەركردەی حوسیی كوژراون و چەندین دامەزراوەی سەربازیشیان لەناوبراون.
سەرۆك وەزیرانی ئیسرائیل داوا دەكات بە تەواوی ژێرخان و سیستمی ئەتۆمی ئێران لەناو ببرێت.
بنیامین ناتانیاهۆ سەرۆك وەزیرانی ئیسرائیل سەبارەت بە دانوستانەكانی نێوان ئەمریكا و ئێران رایگەیاند، تەنها رێککەوتنێک كە باش بێت لەنێوان تاران و واشنتۆندا، رێككەوتنێكە كە لە رێگەیەوە بە تەواوی ژێرخان و سیستمی ئەتۆمی ئێران لەناوببرێت، هاوشێوەی ئەو رێككەوتنەی لیبیا كە لە ساڵی 2003 لەگەڵ وڵاتانی رۆژئاوا كردی و بە تەواوی دەستبەرداری بەرنامە ئەتۆمییەكەی و چەكە كیمیایی و بایلۆجی و موشەكییەكانی بوو.
ناتانیاهۆ دووپاتیشیكردەوە، لە پەیوەندی بەردەوامدان لەگەڵ ئەمریكا و سورن لەسەر ئەوەی كە نابێت ئێران چەكی ئەتۆمیی هەبێت.
پەیامنێری کورددسات نیوز باسی لەوەکرد، بەهۆی تەزووی کارەباوە کرێکارێک لە کەرکوک لە کاتی کارکردندا گیانی لەدەستدا.
پەیامنێری کوردسات نیوز ئاماژەی بەوەکرد، روداوەکە ئێوارەی دوێنێ رویداوە لە گەڕەکی تەپەی شاری کەرکوک.
وتیشی، کرێکارەکە ناوی ئاراس عەلی بووە و پیشەی تەختەبەستی سەربان بووە، لەکاتی کارکردندا بەهۆی بەرکەوتن بە تەلی کارەباوە، دوای گەیاندنی بە نەخۆشخانە گیانی لەدەستداوە.
ئاراس عەلی، دانیشتووی گەڕەکی رەحیماوا بووە و باوکی دوو منداڵ بووە.
د.لەتیف رەشید سەرۆک کۆماری عیراق، بانگهێشتنامەیەکی رەسمی لە لایەن ئیمانوێل ماکرۆن سەرۆکی فەڕەنسا پێگەیشت بۆ بەشداریکردن لە لووتکەی نیس بۆ ئۆقیانوسەکان.
ئەمڕۆ یەکشەممە سەرۆک کۆماری عییراق، لە کۆشکی بەغداد پێشوازی لە ئەمەش لە پاتریک دۆڕێل باڵیۆزی فەرەنسا له عیراق کرد و سڵاو و رێزی سەرۆکی فەرەنسای گەیەندرایە سەرۆک کۆماری عیراق.
د.لەتیف رەشید، جەختی لەسەر گرنگی پتەوکردنی پەیوەندییە دووقۆڵییەکانی نێوان هەردوو وڵاتی دۆست و پێویستی پەرەپێدانیان بەشێوەیەک کردەوە کە خزمەت بە بەرژەوەندییەکانی گەلانی عیراق و فەرەنسا بکات .
سەرۆک کۆمار سڵاو و سوپاسی بۆ هاوتا فەڕەنسییەکەی بە باڵیۆز دۆرێلدا نارد و سوپاسی دەربڕی بۆ ئەو بانگهێشتنامەیە و هیوای خواست لوتکەکە ئەنجامە خوازراوەکانی بەدەست بهێنێت و لەبەرژەوەندی ژینگەیی و ئابووری گەلانی جیهان بێت.
لای خۆیەوە باڵیۆزی فەڕەنسا هەڵوێستی وڵاتەکەی دووپاتکردەوە بۆ پشتیوانیکردن لە عێراق لەپاراستنی ئاسایش و سەقامگیریدا و ستایشی ڕۆڵی ئیجابی عێراقیشی کرد لەپتەوکردنی ئاشتی لەناوچەکەدا.
سوپای توركیا لە برادۆست بازگە دادەنێت و رێگریی لە هاتوچۆی دانیشتوانی ئەو ناوچەیە دەكات، پەكەكەش دەڵێت، سەرەڕای ئاگربەست هێرشەكانی توركیا بەردەوامن.
پەیامنێری كوردسات نیوز لە برادۆست رایگەیاند، سوپای توركیا لە ناوچەی گەروی سیران بازگەی داناوە و لێپێچینەوە لە دانیشتووانی ناوچەكە و ئەو كەسانە دەكات كە لەو رێگایەوە هاتوچۆ دەكەن.
سوپای توركیا بە دروستكردنی ئەو بازگەیە هاتوچۆی دانیشتووانی ناوچەی دەشتەهێرتی قەزای سیدەکان و گوندەكانی رووبەڕووی كێشە كردووەتەوە، هاوکات، رێگە نادرێت ئۆتۆمبێل لەو ناوچەیەدا هاتوچۆ بكات.
ئەو هەنگاوی توركیا لە كاتێكدایە، لە وەرزی بەهاردا سەدان كەس لە دانیشتووانی گوندەكان سەردانی ئەو ناوچانە دەكەن بە مەبەستی هێنانی گیای بەهارە.
هاوكات ناوەندی راگەیاندنی هێزەكانی پاراستنی گەل 'هەپەگە' بڵاوی كردووەتەوە، سوپای توركیا لە سێ رۆژی رابردوودا لە چیای جودی و ناوچەی زاپ هێرشی كردووەتە سەر گەریلا و بەهۆی هێرشەكانەوە دوو گەریلا گیانیان لەدەستداوە.
روداوێکی هاتوچۆ لەسەر شەقامی پشتێنەیی کەرکوک رویدا و بەهۆیەوە سێ کەس بریندار بوون.
پاشنیوەڕۆی ئەمڕۆ روداوێکی هاتوچۆ لەسەر رێگای شەقامی پشتێنەیی کەرکوک رویدا و بەهۆیەوە سێ کەس بریندار بوون و بۆ نەخۆشخانە گواستراونەتەوە.
روداوەکە بە جۆرێک بووە، بەپێی وتەی شایەتحاڵەکان بەهۆی تیژڕەوییەوە ئۆتۆمبێلی یەکەم کە لە جۆری پاجیرۆ بووە کۆنتڕۆڵی لەدەستداوە و خۆی کێشاوە بە دورگەی ناوەندی شەقامەکەدا، دواتر خۆی کێشاوە بە ئۆتۆمبێلێکی دیکەدا و وەرگەڕاوە.
لە ئەنجامی روداوەکەدا سێ سەرنشینی ئۆتۆمبێلی یەکەم بریندار بوون، وەک شایەتحاڵەکانیش باسی دەکەن، بەپێی ئەوەی ئەوان بینیویانە، یەکێکیان شانی دەرچووە و یەکێکی دیکەشیان بەهەمان شێوە شانی دەرچووە و پشتیشی زیانی پێگەیشتووە.
باسیان لەوەشکرد، ئۆتۆمبێلەکە شەش کەسی تێدا بووە و لە بەغداوە هاتوون.
بەشێوەیەکی گشتی دانیشتووانی ئەو شوێنە باس لەوەدەکەن، زۆرینەی روداوەکانی هاتوچۆ لەسەر ئەو شەقامە بەهۆی تیژڕۆیی و نەشارەزاییەوەیە، کە خەڵکی دەرەوەی کەرکوک شارەزای ئەو شەقامە نین و هەندێک جار خێرایی ئۆتۆمبێلەکانیان دەگاتە سەروو 150 کیلۆمەتر لە سەعاتێکدا، بەوهۆیەشەوە لەکاتی پێچکردنەوەیەک یان شتێکی کتوپڕدا کۆنتڕۆڵی دۆخەکەیان پێ ناکرێت.