هەواڵەکان
یاریدەدەری سەرۆكی روسیا دەڵێت، پێویستە دانوستانی ئاگربەست لە ئۆكراین تەنها لە نێوان ئەمریكا و روسیا بێت و رازی نابن وڵاتانی ئەوروپا بچنە ناو ئەو بابەتەوە.
نیكۆلای پاترۆشیڤ یاریدەدەری ڤلادیمیر پوتن سەرۆكی روسیا رایگەیاند، سیاسییەكانی ئێستای ئەمریكا دابەشبوون و ئاڕاستەیەكی كاركردنی بەشێك لە سیاسیەكانی ئەمریكا بەو شێوەیە، كە رەنگە رێگە بە ترەمپ نەدەن لەگەڵ روسیا لەسەر شەڕی ئۆكراین بگاتە رێككەوتن.
وتیشی، هەڵوێستی وڵاتەكەی سەبارەت بە ئۆكراین نەگۆڕاوە و ئەوەی بۆ روسیا زۆر گرنگە گەیشتن بە ئامانجەكانی و پێویستە دانوستانی ئاگربەست لە ئۆكراین تەنها لە نێوان ئەمریكا و وڵاتەكەی بێت و رازی نابن وڵاتانی ئەوروپا بچنە ناو ئەو بابەتەوە.
هاوكات، مارك روتە سكرتێری گشتی ناتۆ رایگەیاند، لە ئێستادا ئۆكراین لە پێگەیەكی بەهێزدا نییە بۆ دەستپێكردنی دانوستانی ئاشتی لەگەڵ روسیا.
ئیتاڵیا و سعودیە رێککەوتنێکی پێنج ساڵەیان لە بواری وزە ئیمزا کرد، وەزارەتی دەرەوەی ئیتاڵیاش رایگەیاندووە، بەم رێککەوتنە وڵاتەکەی دەبێتە رێرەوی گواستنەوەی وزە نوێبووەکان بۆ وڵاتانی ئەوروپا.
جیلبێرتۆ بیچێتۆ فراتین، وەزیری وزە و ژینگەی ئیتاڵیا ئاشکرایکرد، وڵاتەکەی و سعودیە رێککەوتنێکیان ئیمزاکردووە بۆ بەرزکردنەوەی کەرتی وزە، لەناو رێککەوتنەکەش ئەگەری دابینکردنی هایدرۆجینی دروستکراوی سعودیە هەیە بۆ ئەوروپا.
ئاژانسی سکای نیوز ئاشکرایکردووە، وه زیری وزەی ئیتاڵیا له ریاز چاوی به هاوتا سعودیه که ی شازاده عه بدولعه زیز بن سه لمان ئال سعود کەوتوە، یاداشتنامه ی لێکتێگه یشتنیان بۆ ماوەی پێنج ساڵ سەبارەت بەبەرهەمهێنانی وزە لەنێوان هەردوولا ئیمزاکردووە
وەزارەتی دەرەوەی ئیتاڵیا رایگەیاندووە، ڕێککەوتنەکە تیشک دەخاتە سەر وزەی نوێبووە، پەیوەندیی کارەبایی، هایدرۆجین و کەم دەردانی گازی ژەهراوی، هەروەها سیستمی وەرگرتن و هەڵگرتنی کاربۆن.
بەم هەنگاوە، ئیتاڵیا دەتوانێت لە رێگەی سعودیەوە وزە نوێبووەکان بنێرێتە وڵاتانی ئەوروپا.
وتەبێژی یەكێتی نیشتمانی كوردستان دەڵێت، گفتوگۆكانیان لەگەڵ پارتی بۆ پێكهێنانی حكومەتی نوێ بەردەوامە و پێداگرن لەسەر ئەوەی حكومەتی نوێ، حكومەتێكی سەقامگیربێت و بێ جیاوازی خزمەتی هەموو لایەك بكات.
سەعدی ئەحمەد پیرە، وتەبێژی یەكێتیی نیشتمانیی كوردستان بە كوردسات نیوزی راگەیاند، لەسەر بنەمای بوونە هاوبەشی راستەقینە لە حكومەتدا، گفتوگۆكانیان لەگەڵ پارتی بۆ پێكهێنانی حكومەتی نوێ بەردەوامە و لیژنەی دانووستانكاری هەردوولا كارە هونەرییەكان جێبەجێدەكەن، كە تایبەتە بە تاوتوێكردنی بەرپرسیارێتییەكان و سیاسیەتی پێكەوە كاركردن و هەروەها ئەو پرسانەی كە دەبێت كاری لەپێشینەی حكومەتی نوێ بێت.
ئەوەشی خستەڕوو، تاكو ئێستا لەگەڵ پارتی گفتوگۆیان لەسەر دابەشكردنی پۆستەكان نەكردووە، بەڵام وەكو یەكێتی پێداگرن لەسەرئەوەی حكومەتی نوێ، حكومەتێكی سەقامگیر بێت و تێیدا كەسی شیاو لەشوێنی شیاو دابنرێت، تاكو بێ جیاوازی خزمەت پێشكەشی هاووڵاتیان بكرێت.
وتەبێژی یەكێتی لەبارەی كێشەی موچەی فەرمانبەرانەوە ئاماژەی بەوەشدا، پێویستە هەردوو حكومەتی هەرێم و عیراق هاوكار و هەماهەنگ بۆ چارەسەركردنی ئەو كێشەیە، هۆشداریشدا لەوەی خەڵكی كوردستان چیتر ئارام ناگرن لەسەر دابینكردنی پێداویستییەكانیان.
بافڵ جەلال تاڵەبانی سەرۆکی یەکێتیی نیشتمانیی کوردستان، بەبۆنەی جەژنی سێ شەوەی یاران (قەوڵتاس) پەیامێکی پیرۆزبایی ئاڕاستەی کاکەیی و سەرجەم یارسانەکانی کوردستان دەکات و دەڵێت، " هیوادارم ئەم جەژنە ببێتە مایەی قووڵبوونەوەی ئاشتی و پێکەوەژیان، یەکڕیزیی کورد و بەهێزتربوونی هەرێمەکەمان".
دەقی پەیامەکە...
جەژنی سێ شەوەی یاران (قەوڵتاس) لە خوشک و برایانی کاکەیی و سەرجەم یارسانەکان لە کوردستان و جیهان پیرۆزبێت.
هیوادارم ئەم جەژنە ببێتە مایەی قووڵبوونەوەی ئاشتی و پێکەوەژیان، یەکڕیزیی کورد و بەهێزتربوونی هەرێمەکەمان.
یەکێتیی نیشتمانیی کوردستان پابەندە بە پارێزگاریکردن لە ماف و تایبەتمەندییەکانی کاکەییەکان و سەرجەم پێکهاتەکانیتری کوردستان و بەرگریکردن لە جیاوازییەکان.
دووبارە جەژنتان پیرۆزبێت و لە دڵخۆشی و کامەرانیدابن
بافڵ جەلال تاڵەبانی
سەرۆکی یەکێتیی نیشتمانیی کوردستان
ڕیزبەندی بەهێزترین پاسپۆرتەکانی جیهان بڵاوکرایەوە، سەنگافورە پلەی یەکەمی گرتوە و عیراقیش لەپلەی 104دایە.
کۆمپانیای هێنڵی پارتنەرز ریزبەندی بەهێزترین پاسپۆرتی جیهان بڵاوکردەوە ، سەنگافورە خاوەنی بەهێزترین پاسپۆرتی جیهانە و هەڵگرانی ئەم پاسپۆرتە دەتوانن بەبێ هەبوونی ڤیزە سەردانی 195 وڵات بکەن، هاوکات ژاپۆن لە پلەی دووەمی ڕیزبەندیەکەیەو هاوڵاتیانی ئەو وڵاتە دەتوانن سەردانی 193 وڵات بکەن بەبێ هەبوونی ڤیزەی پێشوەخت.
هەر بەپێی ریزبەندیەکە وڵاتەکانی ''ئەڵمانیا، فەڕەنسا، ئیتاڵیا، ئیسپانیا، فینلەندا ، کۆریای باشور'' لەپلەی سێهەمدان و بۆ سەردانیکردنی 191 وڵات پێویستیان بە ڤیزە نیە.
ئەوەشخراوەتە روو، پاسپۆرتی سوری لەپلەی 105هەمدایە و تەنها دەتوانرێت سەردانی 27 وڵاتی پێبکرێت، ئەفغانستانیش پلەی 106هەمی گرتووە و بۆ سەردانی 26 وڵات پێویست بە وەرگرتنی ڤیزە ناکات.
جێگەی ئاماژە بۆکردنە، لەڕیزبەندیەکەدا عیراق لەپلەی 104مدایە و هەڵگرانی پاسپۆرتی عیراق دەتوانن سەردانی 31 وڵات بکەن بەبێ هەبوونی ڤیزە.
یەكێتی ئەوروپا مەرجەكانی بۆ هەڵوەشاندنەوەی سزاكان لە دژی سوریا راگەیاند.
كایا كالاس بەرپرسی سیاسەتی دەرەوەی یەكێتی ئەوروپا لە لێدوانێكی رۆژنامەوانیدا رایگەیاندووە، یەكێتییەكە بە مەرجی گواستنەوەی ئاشتییانەی دەسەڵات و پاراستنی مافی هەموو پێكهاتەكان ئامادەیە سزاكان لەسەر سوریا هەڵبگرێت.
كالاس وتیشی، پێویستە ئیدارەی نوێی سوریا پڕۆسەیەكی ئاشتیخوازانە بۆ گواستنەوەی دەسەڵات دەست پێ بكات كە مافی هەموو پێكهاتەكانی تێدا پارێزراو بێت.
ئەوەش لەكاتێكدایە، شەش وڵاتی ئەندامی یەكێتی ئەوروپا داوایانكردووە سزاكانی سەر سوریا لە بواری بازرگانی و وزە و بانكدا بۆ ماوەیەكی كاتی هەڵبگیرێن و بڕیارە وەزیرانی دەرەوەی وڵاتانی ئەندام لە كۆتایی ئەم مانگە بۆ ئەو مەبەستە كۆببنەوە.
هۆبەی تۆماری شێرپەنجەی پارێزگای سلێمانی رایگەیاندووە، ساڵی رابردوو سێ هەزار و ٣١٠ توشبووی نوێی شێرپەنجەیان تۆمار کردووە، کە ٢٠١یان منداڵن.
هۆبەی تۆماری شێرپەنجەی پارێزگای سلێمانی رایگەیاندووە، ئەو توشبووە نوێیانەی لە سنووری پارێزگاکە تۆمارکراون، ٩١.٨٪یان دانیشتووی پارێزگاکەن، ٢.٤٪یان دانیشتووی ناوچەکانی دیکەی هەرێمن و ٥.٩٪یان خەڵکی شارەکانی دیکەی عیراقن.
بەپێی ئامارەکە، لەو ژمارەیە رێژەی ٤٥،٤٠٪یان لە رەگەزی مێ و ٥٤.٦٠٪ی لە رەگەزی نێرن.
هۆبەری تۆماری شێرپەنجەی پارێزگای سلێمانی ئەوەشی خستووەتە روو، بەپێی ئامارەکە کە ١٩.٥٪ی توشبووان شێرپەنجەی مەمکیان هەبووە و ئەو جۆرەی شێرپەنجە زۆرترین توشبووی هەبووە و لە پلەی یەکەمدایە، لە پلەی دووەمیشدا شێرپەنجەی سی و بۆریەکانی هەناسە بوون کە رێژەکەی ٧٪ بووە.
دوای روخانی رژێمی سوریا، رەوشی ئەمنی لە ناوچەكانی باكور و رۆژهەڵاتی سوریا ناجێگیرە، بەڕێوەبەرایەتیی خۆسەریش دەڵێت، هۆكارەكەی هێرشەكانی توركیا و گروپە چەكدارەكانی هاوپەیمانی ئەو وڵاتەن.
ئیلهام ئەحمەد لێپرسراوی پەیوەندییەكانی دەرەوەی بەڕێوەبەرایەتیی خۆسەر لە باكوور و رۆژهەڵاتی سوریا رایگەیاندووە، لە ئێستادا پێشكەوتنی گەورە لە دیالۆگی نێوان كورد و سوریادا هەیە.
راشیگەیاندووە، دوای رووخانی رژێمی سوریا لە بەشێكی ناوچەكانی باكور و رۆژهەڵاتی سوریا، پێكدادان لە نێوان هێزەكانی سووریای دیموكرات "هەسەدە" و گروپە چەكدارەكان روودەدات.
دەشڵێت، "تێكچوونی رەوشی ئەو ناوچانە بەهۆی هەنگاوەكانی توركیایە، چونكە توركیا نایەوێت رەوشی ئەمنی لە ناوچە كوردییەكان سەقامگیر بێت".
رۆژی ٨ی مانگی رابردوو بە رەسمی رووخانی ژێمی سوریا راگەیەنرا و لەو کاتەشەوە لە ناوچە جیاوازەکانی سوریا و رۆژئاوای کوردستاندا رووبەڕووبوونەوەی گروپە چەکدارەکانی هاوپەیمانی تورکیا و گروپە چەکدارەکانی دیکە لەگەڵ هێزە رەسمیەکانی ئەو ناوچانەدا بەردەوامە.
حوسییەكانی یەمەن ڕایانگەیاند، وەزارەتی بەرگری ئیسرائیلیان بە موشەكی بالیستیكی هایپەر سۆنیك كردووەتە ئامانج.
حوسییەكان لە بەیاننامەیەكدا بڵاویانكردەوە، لە چوارچێوەی وەڵامدانەوەی هێرشەكانی ئیسرائیل بۆ سەر وڵاتەكەیان، وەزارەتی بەرگری ئیسرائیلیان لە ناوچەی یافا بە موشەكێكی بالیستیكی هایپەر سۆنیك لە جۆری "فەلەستین دوو" كردووەتە ئامانج، ئەوەش سێیەم هێرشە لە ماوەی 12 كاتژمێردا دژی ئیسرائیل ئەنجامیان دابێت.
حوسییەكان ئاماژەیان بەوەشداوە كە موشەكەكە ئامانجەكەی پێكاوە و سیستمەكانی بەرگری ئیسرائیل نەیانتوانیوە ڕێگری لێبكەن.
لەبەرامبەردا سوپای ئیسرائیل لە بەیاننامەیەكدا رایگەیاندووە، هێزی ئاسمانی وڵاتەكەی ڕێگری لە موشەكێك كردووە كە لە یەمەنەوە هەڵدراوە و پێش ئەوەی بگاتە نێو خاكی ئیسرائیل تێكشكێنراوە.
دوای ئەوەی دوێنێ نرخی نەوت بەشێوەیەکی بەرچاو بەرزبووەوە و گەیشتە بەرزترین ئاستی چوار مانگی رابردووی، ئەمڕۆ نرخەکەی کەمێک دابەزیوە.
ئەمڕۆ سێشەممە، نرخی یەک بەرمیل نەوتی خاوی برێنت بە ٨٠ دۆلار و ٥٣ سەنت مامەڵەی پێوەدەکرێت، بەمەش بەراورد بە دوێنێ یەک دۆلار لە نرخەکەی دابەزیوە، بەڵام هێشتا لە بەرزترین ئاستی چوار مانگی رابردوویدایە.
هاوکات، نرخی یەک بەرمیل نەوتی خاوی رۆژئاوای تەکساس بەرانبەرە بە ٧٨ دۆلار و ٤٣ سەنت، بەمەش بەراورد بە دوێنێ نرخەکەی بەهەمان شێوەی برێنت کەمێک دابەزیوە.
بەرزبوونەوەی نرخی نەوت بەو رێژەیە بۆ چەند هۆکارێک دەگەڕێتەوە، کە یەکێک لەوانە ئەو شەپۆلە سەرمایەیە کە ئەمریکای گرتووەتەوە و ئەوەش خواستی دەستڕاگەیشتن بە نەوتی زیاتر کردووە.
لەلایەکی دیکە ئەو سزایانەی کە هەینی رابردوو وەزارەتی گەنجینەی ئەمریکا بەسەر چەند کۆمپانیایەکی نەوتیی روسیادا سەپاندی هۆکارێکی دیکەن، کە بەهۆیەوە چین و هیندستان بەدوای جێگرەوەیەکی دیکەدا دەگەڕێن.
بۆردومانەکانی تورکیا و هێرشی گروپە چەکدارەکانی سەر بەو وڵاتە لە بۆ سەر بەنداوی تشرین بەردەوامە ، هێزەکانی ''هەسەدە''ش بڵاویکردۆتەوە لە 24 سەعاتی رابردودا، 23 چەکداری هێزەکانی سەر بە تورکیا کوژراون و حەوتی دیکەش برینداربوون.
لەگەڵ بەردەوامی بۆردوومانەکانی تورکیا و هێرشی گروپە چەکدارەکانی سەر بەو وڵاتە لە بۆ سەر بەنداوی تشرین هێزەکانی سوریای دیموکراتیش ''هەسەدە'' روبەروی ئەو هێرشانە وەستاونەتەوە و بەنداوەکە لەژێر کۆنتڕۆڵی هێزەکانی ''هەسەدە''یە.
سەنتەری راگەیاندنی هێزەکانی سوریای دیموکرات لە راگەیەنراوێکدا، ئاماری 24 سەعاتی رابردووی بڵاوکردووەتەوە و دەڵێت، لە ناوچەکانی باشوری مەنبەج، 23 چەکداری هێزەکانی سەر بە تورکیا کوژراون و حەوتی دیکەش برینداربوون.
لەلایەکی دیکەشەوە بەپێی ئامارەکانی روانگەی سوری، لەماوەی زیاتر لە مانگێکی هێرشی گروپە چەکدارەکانی سەر بە تورکیا بۆ سەر بەنداوی تشرین، تا ئێستا 370 کەس کوژراون کە زۆربەیان لە ریزی گروپە چەکدارەکانن.
بەنداوی تشرین دەکەوێتە ناوچەیەکی ستراتیژیی لەنێوان پارێزگاکانی حەلەب و رەققە و حەسەکە، بەیەکێک لە گرنگترین بەنداوەکانی سوریا دادەنرێت کە لە ساڵی 1999 لەسەر روباری فورات دروستکراوە و سەرچاوەی وزەی کارەبا و ئاوی ناوچەیەکی بەرفراوانی ناوچەکانی باکوری سوریایە.
نەواف سەلام كە سەرۆكی دادگای تاوانی نێودەوڵەتی ناسراو بە لاهایە، دوای چوار ڕۆژ لە هەڵبژاردنی سەرۆكی لوبنان و دوای كێبڕكێیەكی توند لەگەڵ نەجیب میقاتی توانی پۆس سەرۆكی حكومەتی لوبنان بەدەستبهێنێت.
هەڵبژاردنی دادوەر نەواف سەلام بۆ پۆستی سەرۆكی حكومەتی لوبنان لەكاتێكدایە، ئەندامانی حزبوڵڵا و بزوتنەوەی ئەمەل خۆیان لە دەنگدان بە هەر كاندیدێك بەدوور گرت و بەشداری هەڵبژاردنەكەیان نەكرد.
هاوكات لە دەنگدانی پەرلەمانی لوبنان، نەجیب میقاتی سەرۆكوەزیرانی پێشتر تەنها 9 دەنگی بەدەستهێناوە و 34 دەنگیش بەهیچ كاندیدێك نەدراوە.
نەواف سەلام، پارێزەر و دیپلۆماتکارێکی دێرینە، لەئێستادا سەرۆکی دادگای نێودەوڵەتییە، لە ساڵی ٢٠٠٧ تا ٢٠١٧ باڵیۆز و نوێنەری هەمیشەیی لوبنان بووە لە بارەگای نەتەوە یەکگرتووەکان لەشاری نیویۆرک.
نوێنەری مامۆستایانی گرێبەست داوا دەكات حكومەتی هەرێم و وەزارەتی دارایی بە زووترین كات موچەی مانگی 12ی مامۆستایانی گرێبەست دابەش بكەن.
نوێنەری گشتی مامۆستایانی گرێبەست لە راگەیەنراوێكدا داوا دەكات، حكومەتی هەرێم و وەزارەتی دارایی بەزووترین كاتدا موچەی مانگی 12ی مامۆستایانی گرێبەست دابەش بكەن، چونكە موچەكەنیان لەداهاتی ناوخۆیە و پەیوەندی نییە بە هاتنی پارە لە بەغدادوە.
راشیگەیاندوە، كۆی موچەكانیان بۆ هەر مانگێك نزیكەی 19 ملیار دینارە بۆ سەرجەم مامۆستایانی گرێبەست كە ژمارەیان نزیكەی 38 هەزار مامۆستایە.
ئاماژەی بۆ ئەوەشكرد، تائێستا مامۆستایانی گرێبەستی سنوری پەروەردەكانی هەولێر و دهۆك و كەركوك شایستەی مانگەكانی 7 و 8ی ساڵی 2024 یان وەرنەگرتووە.
جۆ بایدن سەرۆكی ئەمریكا لە پەیوەندییەكی تەلەفۆنیدا لەگەڵ ناتانیاهۆ داوای ئاگربەستێكی دەستبەجێی كرد لە غەززە.
كۆشكی سپی بڵاویكردەوە، بایدن و ناتانیاهۆ لە پەیوەندییە تەلەفۆنییەكەی نێوانیاندا تاوتوێی هەوڵەكانییان كردووە بۆ گەیشتن بە ڕێككەوتنێك بۆ ڕاگرتنی شەڕ لە غەززە و ئازادكردنی ئەو بارمتانەی كە هێشتا لە غەززە ماونەتەوە.
ئەوەش هاتووە، بایدن جەختی كردووەتەوە بۆ ئاگربەستێكی دەستبەجێ لە غەززە و گەڕانەوەی بارمتەكان و زیادكردنی یارمەتییە مرۆییەكان.
هاوكات بەرپرسانی تەندروستی غەززە دەڵێن، بەهۆی شەڕەكەوە تا ئێستا زیاتر لە 46 هەزار فەلەستینی لە غەززە كوژراون، ئەو ناوچەیەش ڕووبەڕووی قەیرانێكی سەختی مرۆیی بووەتەوە و زۆربەی دانیشتوانەكەشی ئاوارەبوون.
لە وەتسئەپ چیتر پێویست بەداخڵکردنی ژمارە تەلەفۆن نییە و دەتوانیت بەبێ ژمارە تەلەفۆن سوود لە تایبەندمەندیەکانی ئەو ئەپە ببینیت، لەکاتێکدا پێشتر بەناچاری دەبوو ژمارە تەلەفۆنت هەبێت
لە نوێترین زیادکراوی کۆمپانیایی مێتا بەشی ناوی بەکارهێنەر بۆ وەتسئەپ زیاد دەکرێت، لەمەودوا پێویست بە ژمارە تەلەفۆن نامێنیت بۆ پەیوەندیکردن یاخود ناردنی نامە کۆمپانیای مێتا رێگە بە بەکارهێنەرانی دەدات، ناوێک لە بەرنامەکەدا بۆ خۆیان هەڵبژێرن و بەبێ هەبوونی ژمارە پەیوەندی بکەن بەیەکترەوە.
ئەکاونتێک دروست بکە، پەیوەندی بکەن بەیەکەوە بەبێ ژمارە تەلەفۆن
کۆمپانیای مێتا لەمەودوا رێگە بە بەکارهێنەرانی لە وەتسئەپ دەدات ئەکاونتێک بۆ خۆیان دروست بکەن لەم رێگەیەوە بەدوای ئەکاونتەدا بگەرێیت کە دەتەوێت پەیوەندی پێوەبکەیت یان نامەی بۆ بنێریت، لەئێستادا هەبوونی ژمارە تەلەفۆن بژاردەیەکی ناچاریە لەناو بەرنامە سەوزەکەدا بەڵام بەم گۆرانکاریە کارئاسانی .بۆ بەکارهێنەرانی بەرنامەکە دەکرێت، و ژمارە تەلەفۆنیش دەمێنیتەوە بەڵام بەناچاری نییە و بەپێی خواستی بەکارهێنەرە
پێشتر تەلیگرام هەمان کاری بۆ بەکارهێنەرانی ئەنجامداوە
ئەمە لەکاتێکدایە لە زۆربەی تۆڕەکۆمەڵایەتییەکاندا بۆ دروستکردنی ئەکاونت پێویستت بەژمارە تەلەفۆن دەبێت، بەڵام کۆمپانیای مێتا دەیەوێت لەرێگەیەوە ئاسانکاری بۆ بەکارهێنەرانی لە وەتسئەپەوە بکات.
لەلایەکی دیکەشەوە پێشتر ئەپی تەلیگرام هەمان تایبەتمەندی زیادکردوە کە لەناوەوەی بەرنامەکە هەموو کارەکان ئەنجامدەدەیت لەرێگەی دروستکردنی یوسەرنەیمەوە دەتوانیت بەبێ ژمارە تەلەفۆن، نامە و پەیوەندنی ئەنجام بدەیت.
ئەنجومەنی نوێنەران خوێندنەوەی دووەمی بۆ هەمواری یاسای بودجەی فیدڕاڵی تایبەت بە تێچووی بەرهەمهێنان و گواستنەوەی نەوتی هەرێم كرد.
د. نەرمین مەعروف، ئەندامی لیژنەی دارایی ئەنجومەنی نوێنەران بە كوردسات نیوزی راگەیاند، لە دانیشتنەكەدا خوێندنەوەی دووەم كرا بۆ هەمواری یاسای بودجەی فیدراڵی بۆ ساڵەكانی 2023، 2024، 2025 و ماددەی 12، بڕگەی جیم كە تایبەتە بە تێچووی بەرهەمهێنان و گواستنەوەی نەوتی هەرێم.
وتیشی، لە دانیشتنەكەدا تەنها خوێندنەوەی دووەم كرا بۆ هەمواری یاساكە، لیژنەی دارایی و ئەندامانی ئەنجومەن چەند تێبینییەكیان لەسەر هەموارەكە هەبووە، بۆیە لیژنەی درایی داوایكردوە هەموو سەرنج و تێبینییەكان بە نوسراو رەوانەی لیژنەی دارایی بكەن بۆ ئەوەی پێداچوونەوە بە هەموارەكەدا بكرێت و لە داهاتوویەكی نزیكدا پرۆژەكە بخریتە دەنگدانەوە.
هەروەها د.بڕیار رەشید ئەندامی ئەنجومەنی نوێنەران بە كوردسات نیوزی راگەیاند، بە زۆرینەی دەنگ درێژكردنەوەی تەمەنی كۆمیسیۆنی باڵای سەربەخۆی هەڵبژاردنەكانی عیراق بۆ ماوەی دوو ساڵ پەسەندكرا.
هەر لە كۆبونەوەكەدا دەنگدرا لەسەر پێشنیازی هەمواری یەكەمی پاسپۆرت، هەمواری یاسای دەزگای هەڵگریش دواخرا، خوێندنەوەی یەكەمیش بۆ پێشنیازەیاسای خاوەن پێداویستی تایبەت كرا، هەروەها دەنگدانیش لەسەر پرۆژە یاسای هەمواری چوارەمی یاسای وەبەرهێنانی پیشەسازی دواخرا.