هەواڵەکان
سەرۆک وەزیرانی ئیسرائیل رایگەیاند، ئەگەر تاوەکو رۆژی شەممە دیلەکانی وڵاتەکەی ئازاد نەکرێن، ئەوا ئاگربەست لەگەڵ غەززە رادەگرن.
بنیامین ناتانیاهۆ سەرۆکوەزیرانی ئیسرائیل رایگەیاندووە، "ئەگەر تاوەکو رۆژی شەممە دیلەکان ئازاد نەکرێن، ئەوا رێککەوتنی ئاگربەست لە غەززە کۆتایی پێ دێت و هێرشەکان بە چڕی دەست پێ دەکەنەوە و هەتا لەناوبردنی حەماس بەردەوام دەبێت".
ئاماژەی بەوەشکردووە، حەماس پابەندی بەڵێنەکانی رێککەوتنی نێوانیان نەبووە و هەر بۆیە دانوستانەکانی پەیوەندیدار بە قۆناغی دووەمی رێککەوتنەکە هەڵدەپەسێردرێت. وتیشی، پێشوازی لە پلانی سەرۆکی ئەمریکا دەکەن بۆ داهاتووی غەززە.
پێشتریش لە راگەیاندراوێکدا دەسەڵاتدارانی ئیسرائیل ئەوەیان خستبووە روو، دانوستانەکانی قۆناغی دووەمی رێککەوتنی نێوان وڵاتەکەیان و بزووتنەوەی حەماس، تا ئەو کاتەی کە ٩ دیلی دەست حەماس ئازاد نەکرێن، دەست پێ ناکات.
ئەوەش لە کاتێکدایە، عیزەدین قەسام وتەبێژی لیواکانی باڵی سەربازیی بزوتنەوەی حەماس لە کەرتی غەززە رایگەیاند، خولێکی دیکەی ئاڵوگۆڕی دیلەکان لە چوارچێوەی رێککەوتنی نێوان بزووتنەوەکەیان و ئیسرائیل کە بڕیارە هەفتەی داهاتوو جێبەجێ بکرێت، بەهۆی پابەند نەبوونی ئیسرائیل بە ڕێککەوتنەکەوە، دوادەخرێت.
دوێنێش دۆناڵد تڕەمپی سەرۆکی ئەمریکا رایگەیاند، تاوەکو رۆژی شەممە چاوەڕوانی حەماس دەکات بۆ ئازادکردنی دیلەکان، دوای ئەو وادەیە دەرگای دۆزەخ دەکرێتەوە.
بەهۆی جیاوازی لۆگۆکەی لە دەرەوە و ناوەوە، هاتوچۆی هەولێر پێدانی تابلۆ بە جۆرە ئۆتۆمبێلێکی چینی راگرت و دەڵێت: پێویستە کێشەکە بەڕێوەبەرایەتی گومرگ یەکلایی بکاتەوە.
بەڕێوەبەرایەتی هاتوچۆی هەولێر لە راگەیەنراوێکدا ئاگاداری هاووڵاتیانی شاری هەولێر دەکاتەوە، لەئێستا جۆرە ئۆتۆمبێلێک لە بازاڕەکان کرین و فرۆشتنی پێوە دەکرێت، "کە لە رووکاری دەرەوەیدا لۆگۆی ئۆتۆمبێلی (MG) پێوەیە، بەڵام لەناوەوەی ئۆتۆمبێلەکە لۆگۆی (ROE WE) لەسەر سوکانەکەی هەیە".
ئاماژەی بەوەشکرد، ئەو جۆرە ئۆتۆمبێلە لە ئێستادا تۆمار ناکرێت و ژمارە و تابلۆی پێنادرێت، تا ئەو کاتەی کێشەکەی لە بەڕێوەبەرایەتی گومرگ یەکلایی دەکرێتەوە.
هاوکات هاتوچۆی هەولێر داوا لە هاووڵاتیانیش دەکات مامەڵەی تۆمارکردنی ئەم جۆرە ئۆتۆمبێلە نەهێنن بۆ بەڕێوەبەرایەتییەکەیان.
دۆناڵد ترەمپ و شای ئوردن لە كۆشكی سپی كۆبوونەوە، ترەمپ سووربونی خۆی لەسەر راگواستنی دانیشتوانی غەززە و كۆنترۆڵكردنیی شارەكە لەلایەن ئەمریكاوە دووپاتكردەوە.
دۆناڵد ترەمپ دوای كۆبوونەوەی لەگەڵ شا عەبدوڵای دووەم شای ئوردن لە كۆشكی سپی، بە رۆژنامەنوسانی راگەیاند، فەلەستینییەكان جگە لە غەززە دەتوانن لە شوێنێكی تر بە ئارامی بژین و جەختیكردەوە، پرۆسەی لكاندنی كەناری رۆژئاوا بە ئیسرائیلەوە سەركەوتوو دەبێت.
ترەمپ ئاماژەی بەوەشكرد، ئەمریكا دەست بەسەر كەرتی غەززەدا دەگرێت و دەیكات بە مرواری، وتیشی، گواستنەوەی دوو ملیۆن دانیشتوی كەرتی غەززە ئەركێكی قورس نییە و لە ئوردن و میسر زەوییان بۆ تەرخان دەكەن.
لای خۆیەوە شای ئوردن وتی، باشترین بڕیار بۆ وڵاتەكەی دەدات لەبارەی داهاتووی غەززەو ئاشكرایكرد، وڵاتانی عەرەبی دێنە ئەمریكا بۆ وەڵامدانەوەی پێشنیارەكەی ترەمپ سەبارەت بە غەززە.
قوباد تاڵەبانی جێگری سەرۆک وەزیرانی هەرێم لە ئیمارات، لە میانەی لوتکەی جیهانیی حکومەتەکان، لەگەڵ سەعید محەمەد ئەلتایەر، سەرۆکی کۆمپانیای نەوتی نیشتمانی ئیمارات(ENOC)و وەفدێکی یاوەری، لەبارەی ئەزموونی سەرکەوتووی ئەو وڵاتە لە کەرتەکانی نەوت و گازدا کۆبووەوە و دەرفەتەكانی گواستنەوەیان بۆ كوردستان تاوتوێكرد.
هەر لەو لوتكەیەدا قوباد تاڵەبانی لەگەڵ مەتەر ئەلتایەر، سەرۆکی ئەنجوومەنی بەڕێوەبردنی دەستەی رێگاوبان و گواستنەوەی دوبەی (RTA)، لە بارەی پرۆژەكانی رێگاوبان و چۆنێتیی سوودوەرگرتن لە ئەزموونی ئیمارات، لە بواری گواستنەوەی گشتی (پاس و ترام) و سوودوەرگرتن لە شارەزایانی وڵاتەكەیان گفتوگۆیان كرد.
حەماس وەڵامی هەڕەشەكانی ترەمپ دەداتەوە سەبارەت بەغەززەو دەڵێت، هیچ بەهایەكیان نییە، لەلایەكی ترەوە خۆی بۆ سیناریۆی دەستپێكردنەوەی شەڕ ئامادە دەكات.
سامی حەمدان، وتەبێژی حەماس رایگەیاند، رێزگرتن لە رێككەوتنی ئاگربەستی نێوان بزوتنەوەكە و ئیسرائیل تاكە رێگەیە بۆ گەڕانەوەی بارمتەكان، ئەوەش لە وەڵامی هۆشدارییەكەی دۆناڵد ترەمپ، سەرۆكی ئەمریكا بۆ فەلەستینییەكان بوو كە رایگەیاندبوو دەروازەكانی دۆزەخ دەكاتەوە ئەگەر تا شەممەی داهاتوو هەموو بارمتە ئیسرائیلییەكان ئازاد نەكرێن.
زوهری ئاماژەی بەوەشكرد، زمانی هەڕەشە هیچ بەهایەكی نییە و بابەتە زیاتر ئاڵۆزتر دەكات.
رۆژی دوو شەممە حەماس بڕیاریدا ئازادكردنی بارمتەكانی ئیسرایلی دواخست بۆ كاتێكی نادیار و ئیسرائیلیشی تۆمەتبار كرد بە پێشێلكردنی مەرجەكانی رێككەوتنەكە، ئەوەش لەكاتێكدایە سەرچاوەكانی حەماس پشتڕاستیانكردۆتەوە، خۆیان بۆ ئەگەری سیناریۆی دەستپێكردنەوەی شەڕ ئامادە دەكەن، بەوتەی خۆشیان ئیسرائیل خیانەتی لێكردوون.
بەڕێوەبەری جێبەجێكاری دەستپێشخەری ئاسایشی وزەی ئەوروپا دەڵێت، چارەسەركردنی كێشەی تێچووی بەرهەمهێنانی نەوت لە هەرێمی كوردستان هەنگاوێكی گرنگە، بۆ دەستپێكردنەوەی هەناردەی نەوتی هەرێم لە رێگەی توركیاوە.
ئەلبێریك مۆنگرینیەر، بەڕێوەبەری جێبەجێكاری دەستپێشخەری ئاسایشی وزەی ئەوروپا رایگەیاند، ئەو رێككەوتنانەی لەنێوان حكومەتی هەرێم و حكومەتی عیراق كراوە لەبارەی تێچووی بەرهەمهێنانی نەوت لە هەرێمی كوردستان هەنگاوێكی گرنگە، بەڵام پێویستە هەردوو حكومەت لەسەر دامەزراندنی لیژنەیەكی راوێژكارێكی سەربەخۆ رێكبكەون بۆ هەڵسەنگاندنی ئەو تێچووەی بۆ بەرهەمهێنان و گواستنەوەی نەوتی هەرێم تەرخانكراوە.
ئەوەشی خستەڕوو، رەنگە دەستپێكردنەوەی هەناردەی نەوتی هەرێم هاوكاربێت بۆ بەرەوپێشبردن و باشتركردنی پەیوەندییەكانی نێوان عیراق و توركیا، كە پێشتر بەهۆی رووداوەكانی سوریاوە سست ببوو.
مۆنگرینیەر ئاماژەی بەوەشدا، پێدەچێت دەستپێكردنەوەی هەناردەی نەوتی هەرێم، كاریگەری نەرێنی لەسەر رێكخراوی ئۆپیك دروستبكات، هاوكات، چاوەڕوان دەكرێت پابەندبوونی عیراق بە كەمكردنەوەی بەرهەمهێنانی نەوت سەختتر بكات.
دادگای فیدراڵی عیراق ئەو تانانەی رەتكردەوە كە لە سێ یاسا مشتومڕهەڵگرەكەی ئەنجومەنی نوێنەران درابوون، هاوكات لە كۆی چوار سكاڵای تایبەت بە هەرێمی كوردستانیش، سێ سكاڵایانی رەتكردەوە
پەیامنێری كوردسات نیوز رایگەیاند، دادگای فیدراڵی بڕیاریدا ئەو سكاڵا و تانانە رەتبكاتەوە كە لەلایەن 10 ئەندامی ئەنجومەن نوێنەران تۆماركرابوون و تیایدا تانەیان دابوو لە یاساكانی لێبوردنی گشتی و باری كەسێتی و گەڕاندنەوەی ماڵ و موڵك و زەوی و زار بۆ خاوەنەكانیان، هاوكات بڕیاریشدا بە راگرتنی فەرمانە وەلائییەكەی خۆی و جێبەجێكردنی سێ یاساكە كە پێشتر بەهۆی ئەو سكاڵایەوە راگیرابوون.
لە بەشێكی تری دانیشتنەكەدا، سێ سكاڵا كە پەیوەدنییان بە هەرێمەوە هەبوو رەتكراونەتەوە، كە تایبەت بوون بە رێنماییەكانی پێبژاردنی هاتووچۆ و رسوماتی مەرجی توندوتۆڵی، كە لەسەر سەرۆكی حكومەتی هەرێم و وەزیری ناوخۆ تۆماركراوبوون و تیایدا داواكرابوو سەرپشككردنی وەزیری ناوخۆ بە زیادكردن یان كەمكردنەوەی رسومات و پێبژاردنی هاتووچۆ بە نادەستوریی بناسێنرێت، لەگەڵ سكاڵای تایبەت بە هەڵوەشاندنەوەی وەزارەتەكانی كاروباری شەهیدان و ئەنفالكراون و ئەوقاف و كاروباری ئایینی هەرێم.
هەروەها، دادگای فیدڕاڵی تاوتوێكرنی سكاڵای تایبەت بە لابردنی مەرجەكانی فرەژنی و یاسای باری كەسێتی كە لە پەرلەمانی كوردستان هەمواركراوەتەوە دواخست بۆ 25 ی مانگی داهاتوو.
کەشناسی هەرێم پێشبینیەکانی بۆ چەند رۆژی ئایندە بڵاوکردەوە و رایگەیاند؛ لە دوا نیوەڕۆی رۆژی پێنج شەممەوە کەشی ناوچەکە دەگۆڕێت و شەپۆلێکی بەفر و باران ناوەندی شارەکان دەگرێتەوە.
لە راگەیەندراوەکەی ئەمڕۆی کەشناسیدا هاتووە؛ لە ناوەندی پارێزگاى سلێمانى و ناوەندی پارێزگاى دهۆک بە تێکەڵى لەگەڵ باران بەفریش دەبارێت و زۆرترین کاتى بەفر بارین لە شەوى پێنجشەمە لەسەر جومعە و کاتەکانى بەرەبەیانى ڕۆژى جومعە دەبێت.
ئەوەش هاتووە؛ بارستە هەوایەکى سارد لە ناوەڕاستى ئەوروپاوە روو لە ناوچەکەمان دەکات و پلەکانى گەرما زیاتر نزم دەکاتەوە.
دادگای باڵای فیدراڵی عیراق لە كۆبونەوەدایە بۆ تاوتوێكردنی چەند سكاڵایەك، كە چواریان پەیوەندییان بە هەرێمی كوردستانەوە هەیە.
دانیشتنی دادگای فیدراڵی لەسەر 13 سكاڵا دەستی پێكردوە، كە چوارسكاڵایان پەوەندییان بە هەرێمی كوردستانەوەهەیە، ئەو سكاڵایانە تایبەتن بە رێنماییەكانی پێبژاردنی هاتووچۆ و رسوماتی مەرجی توندوتۆڵی، كە سكاڵاكە لەسەر سەرۆكی حكومەتی هەرێم و وەزیری ناوخۆ تۆماركراوە، داوا كراوە سەرپشككردنی وەزیری ناوخۆ بە زیادكردن یان كەمكردنەوەی رسومات و پێبژاردنی هاتووچۆ بە نادەستووری بناسێنرێت.
هەروەها لە دانیشتنەكەدا، بڕیاردەدرێت لەبارەی سكاڵایەك بۆ لابردنی مەرجەكانی فرەژنی و یاسای باری كەسێتی كە لە پەرلەمانی كوردستان هەمواركراوەتەوە. هەروەها هەڵوەشاندنەوەی وەزارەتەكانی كاروباری شەهیدان و ئەنفالكراون و ئەوقاف كاروباری ئایینی هەرێم.
سزای نزیكەی چوار ساڵ زیندانیكردن بەسەر هاوسەرۆكی گەورە شارەوانی واندا سەپێنرا
دادگای توركیا سزای سێ ساڵ و 9 مانگ زیندانیكردنی بەسەر هاوسەرۆكی گەورە شارەوانی واندا سەپاند.
ئەمڕۆ لە دادگای باڵای تاوانەکانی پێنجەمی دیاربەکر دادگاییکردنی عەبدوڵڵا زەێدان هاوسەرۆکی گەورە شارەوانیی وان بەڕێوەچوو تیایدا بەتۆمەتی "هاندانی تیرۆر لە کاتی خۆپیشاندانەکاندا" سزای سێ ساڵ و 9مانگ زیندانی بەسەر زەیداندا سەپاند.
عەبدوڵڵا زەیدان سەبارەت بەو سزایە وتی: بۆ ئێمە ئەم بڕیارە بڕیارێکی سیاسییە و هیچی تر.
زەیدان وتیشی: ئەوانەی لە 31ـی ئازاردا نەیانتوانی لە رێگەی دیموکراسییەوە خەڵکی وان بشکێنن، هەوڵەدەن جارێکی تر لە رێگەی دادوەرییەوە ئیهانەی ئیرادەی خەڵکی وان بکەن، ئێمەش لە بەرامبەردا تا کۆتایی بەرگری لە دیموکراسی و دادپەروەری و ئیرادەی گەل دەکەین.
هەشتەمین دانیشتی دادگایكردنی عەبدوڵا زەیدان لە دادگای سزا قورسەكانی ئامەد، بەبێ ئامادەبوونی خۆی بەڕێوەچوو .
محەمەد ئەمین ئەكتەر پارێزەری دۆسیەكەی عەبدوڵا زەیدان هاوسەرۆكی گەورە شارەوانی وان رایگەیاند، دادگایكردنەكە دادپەروەرانە نەبووە و پێشَلكارییەكی روونە. وتیشی، دژی ئەو بڕیارە تانە لە بڕیارەكەی دادگا دەدەن.
نوێنەری هەمیشەیی روسیا لە نەتەوە یەكگرتووەكان دەڵێت، تائێستا هیچ پەیامێكی رەسمییان لە ئەمریكاوە پێنەگەیشتووە لەبارەی شەڕی ئۆكراین و ئاساییكردنەوەی پەیوەندییەكانیان.
فاسیلی نیبینزیا نوێنەری هەمیشەیی روسیا لە نەتەوە یەكگرتووەكان رایگەیاند، مۆسكۆ بە وردی چاودێری هەڵوێستەكانی ئەمریكا دەكات سەبارەت بە ئۆكراین بەتایبەتیش ترەمپ، وتیشی، تا ئێستا بەرەسمی هیچ پەیامێكیان لە واشنتۆنەوە سەبارەت بە ئاساییكردنەوەی پەیوەندییەكانیان پێنەگەیشتووە.
وتیشی، دەرگایان كراوەیە بۆ گفتوگۆ لەسەر بنەمای یەكسانی و ڕێزگرتن لە یەكتر، سەبارەت بە پرسی ئۆكراینیش تائێستا تەنها دروشمیان بیستووە.
ئەوەش لە كاتێكدایە، رۆژی یەك شەممە ترەمپ رایگەیاند، لە رێگەی تەلەفۆنەوە قسەی لەگەڵ ڤلادیمیر پوتن هاوتا روسییەكەی كردووە، وەك هەوڵێك بۆ گفتوگۆ و دانوستان بە مەبەستی كۆتاییهێنان بە جەنگی ئۆكراین، وتیشی، پلانێكی یەكلاكەرەوەی هەیە بۆ كۆتاییهێنان بەو جەنگە.
دەسەڵاتدارانی ویلایەتی ئەریزۆنا رایانگەیاند، درەنگانی شەوی دووشەممە لە فڕۆکەخانەی سکۆتسدەیل پێکدادان لەنێوان دوو فڕۆکەی تایبەتدا روویدا و بەهۆیەوە کەسێک گیانی لەدەستدا و ژمارەیەکی دیکەش برینداربوون.
بەپێی میدیا ئەمریکیەکان، یەکێک لە فڕۆکەکان خاوەندارێتیەکەی بۆ گۆرانیبێژ مۆتلی کرو ڤینس نیل- دەگەڕێتەوە.
ئیدارەی فڕۆکەوانی ئەریزۆنا لە راگەیەندراوێکی فەرمیدا رایگەیاندووە، رووداوەکە درەنگانی شەوی دووشەممە روویداوە، دوو فرۆکە خۆیان بە یەکدا کێشاوە و بەهۆیەوە کەسێک گیانی لەدەستداوەو چەند کەسێکیش بریندار بوون.
تا دێت روداوی بەیەکدا کێشان وکەوتنە خوارەوەی فرۆکە لە ئەمریکا و جیهان زۆردەبن، ئەم روداوە هاوکاتە لەگەڵ ئەوەی چەند رۆژ پێش ئێستا فڕۆكەیەكی سەربازی ئەمریكا بە چوار سەرنشینەوە لە فلیپین تێكشكا و سەرجەمیان گیانیان لەدەستدا، پێشتریش، فڕۆکەیەکی ژاپۆنی لە فرۆکەخانەی تاکۆما لە سیاتڵ، خۆی کێشا بە کلکی فڕۆکەیەکی ئەمریکیدا بەڵام هیچ زیانێکی گیانی لێنەکەوتەوە، ئەم ڕوداوانە دوای تەنیا لە دوو هەفتە دێن لە پێکدا کێشانی نێوان فڕۆکەیەک و هێلیکۆپتەرێکی سەربازی لە ئەمریکا، کە بووە هۆی گیان لەدەست دانی 86 کەس.
سەرۆكایەتی كۆماری عیراق راگەینراوێکی بڵاوکردەوە و رایگەیاند، دژایەتی هیچ دەسەڵاتێكی دەستووری ناكەن و ئەو سكاڵایەی لە دادگای فیدراڵی تۆماركراوە، بۆ چارەسەركردنی قەیرانی موچەی موچەخۆرانی هەرێمە.
دەقی راگەیەنراوی رۆژنامەوانی هاوڕێ تۆفیق بەڕێوەبەری گشتی لە سەرۆکایەتی کۆمار :
به ناوی خوای بەخشندەی میهرەبان
سڵاو و رەحمەت و بەرەکەتی خوای گەورەتان لەسەربێت
دەمانەوێت بۆ هاونیشتیمانیانی عیراقی ئازیزمان روونی بکەینەوە کە وڵاتەکەمان بە قۆناغێکی گرنگدا تێدەپەڕێت و پێویستە هەمووان پابەند بن بە یەکڕیزی نیشتمانی و هەستکردن بەبەرپرسیارێتییەکی باڵا بەرانبەر بە پرسە گرنگەکان.
سەرۆک کۆمار وەک پارێزەری دەستور و سیمبولی یەکڕیزیی گەل لەگەڵ هەمووان لە یەک دووری دەوەستێت.
لەماوەی دەیان ساڵدا گەلی عیراقیمان خوێن و قوربانییەکی گەورەی داوە لەپێناو بەدیهێنانی سیستمێکی دیموکراتی نوێنەرایەتی فیدراڵی کە تێیدا شکۆمەندی و ژیانێکی خۆشگوزەرانی هەبێت.
هەمووان دەزانن کە یاسای بودجەی سێ ساڵی فیدراڵی کە لەساڵی 2023 پەسەند کرا نەخشە رێگایەکە بۆ دابەشکردنی سەروەت و سامانی عێراق بەسەر هاووڵاتیانی خۆیدا کە بەگوێرەی ئەو ماف و ئەرکانەی سەر حکومەتی فیدراڵی و حکومەتی هەرێم سەرهەڵدەدەن
بۆیە دەمانەوێت ئەمانەی خوارەوە بە روونی و بە کورتی باس بکەین:
1. سەرۆکایەتی کۆمار پاڵپشتی سەرەکی حکومەتی فیدراڵی و حکومەتی هەرێمە لە دۆزینەوەی چارەسەری گونجاو بەپێی یاساکانی کارپێکراو و لەژێر چەتری دەستوور.
2 . سەرۆک کۆمار دژایەتی هیچ دەسەڵاتێکی دەستووری وڵات ناکات و ئەو سکاڵایەی سەرۆکایەتی کۆمار لەبەردەم دادگای فیدراڵی بۆ چارەسەرکردنی قەیرانی موچەی فەرمانبەرانی هەرێمی کوردستانە لەهەستکردن بە بەرپرسیارێتی نیشتیمانی لەبەرانبەر ئازاری بەشێکی زۆری عیراقییەکان سەرچاوەی گرتووە و خۆپیشاندانی جەماوەری و مانگرتن لە خواردن بۆ کۆمەڵێک مامۆستا و فەرمانبەر کە بۆتە هۆی داخستنی چەندین قوتابخانە و پەکخستنی هەزاران خوێندکار و ئامانجی ئەم داوایە بۆ دۆزینەوەی چارەسەرێکی گونجاو و دەستوورییە لەنێوان حکومەتی فیدراڵ و حکومەتی هەرێم وێڕای بەرزنرخاندنی هەموو هەوڵەکانی سەرۆک وەزیران لەگەڵ حکومەتی هەرێم بۆ دۆزینەوەی چارەسەرێک بۆ کێشە داراییەکان و تەئکیدیکردەوە لەسەر گرنگی پابەندبوونی حکومەتی هەرێم بەجێبەجێکردنی بڕگەکانی هەموارکردنی یاسای بودجەی فیدراڵی و رادەستکردنی داهاتی نەوت و غەیرە نەوتی خۆی بۆ حکومەتی فیدراڵی.
3. سەرۆک کۆمار لەرێگەی راپەڕاندنی ئەرکەکانییەوە و بەدواداچوونی بۆ ڕەوشی ژیانی هاوڵاتیان و سەردانەکانی بۆ پارێزگا ئازیزەکانمان (بەسرە و نەینەوا و هەولێر و نەجەف و واست و موسەننا و ئەنبار) هەمیشە پەرۆشە بۆ بەدیهێنانی مافەکانی گەلەکەمان بەهەموو پێکهاتەکانیەوە و گوێ لە دەنگ و داخوازییەکانیان دەگرێت .
لە کۆتاییدا سەرۆکایەتی کۆمار دامەزراوەیەکی دەستوورییە کە ئامانجی پاراستنی سیستەمی دەستووری، پاراستنی مافەکانی هەموو خەڵکە بەبێ جیاوازی و پشتیوانی لە هەموو دەسەڵاتەکان، تەئکید لەوە دەکاتەوە کە هەرکاتێک دەنگی گەلەکەمان یەکگرتوو بێت، وڵاتەکەمان خۆشگوزەرانی و بەختەوەری بەدی دەهێنێت.
رۆژنامەی "پرێنسا لیبرێ"ـی پایتەختی گواتیمالا بڵاویکردەوە، ئەمڕۆ دووشەممە پاسێک لە پردێکەوە کەوتۆتە خوارەوە بۆ ناو روبارێک و بەهۆیەوە 51 کەس گیانیان لەدەستدا.
ماینۆر روانۆ، وتەبێژی ئاگرکوژێنەوە و فریاکەوتنی شارەکە، ئەمڕۆ دووشەممە بە رۆژنامەنووسانی راگەیاند کە هەوڵەکان لە ئارادان "بۆ رزگارکردنی ئەو کەسانەی دیکە کە بەهۆی رووداوەکەوە گیریان خواردووە"، وتیشی: تەرمی 36 پیاو و 15 ژن رەوانەی مردووخانەی پارێزگاکە کراون.
بێرناردۆ ئارێڤالۆ، سەرۆکی گواتیمالا سێ رۆژ ماتەمینی گشتی بەهۆی روداوەکەوە راگەیاند و سوپا و دەزگا تایبەت بە کارەساتەکانی راسپارد بۆ یارمەتیدانی زیان لێکەوتووانی روداوەکە.
لە سبەینێوە هەناردەكردنی مریشك لە هەرێمی كوردستانەوە بۆ پارێزگاكانی دیكەی عیراق دەستپێدەكاتەوە و بەهۆیەوە نرخی مریشك لە هەرێم بەرز دەبێتەوە.
نازم عەبدوڵا، سەرۆكی كێڵگە پەلەوەرییەكانی سلێمانی بە كوردسات نیوزی راگەیاند، دوای سێ مانگ لە راگرتنی، بە هەوڵی فراكسیۆنی یەكێتی لە ئەنجومەنی نوێنەرانی عیراق لە سبەینێوە هەناردەكردنی مریشك و بەرهەمەكانی پەلەوەری هەرێمی كوردستان لە رێگەی كەركوكەوە بۆ شارەكانی عیراق دەستپێدەكاتەوە.
بڕیاری ڕاگرتنی هەناردە كردنی مریشك و پەلەوەر دوای ئەوە دێت كە عیراق بەبیانووی بڵاوبوونەوەی نەخۆشی لەنێو پەلەوەرخانەكان، هاوردەكردنی مریشكی لە هەرێم قەدەغە كرد.
رۆژی چواری ئەم مانگە وەفدێكی كشتوكاڵی عێراق سەردانی هەولێریان كرد و سامپڵیان لە مریشكەكان وەرگرت، ئەمڕۆش پشكنینەكانیان لە بەغداد گەڕانەوە و بێ كێشەبوون، هەربۆیە بڕیاردرا سبەی هەناردەكردنی مریشك دەستپێبكاتەوە.
دووبارە هەناردەكردنەوەی مریشك بۆ كەركوك و ناوچەكانی عیراق، وادەكات نرخی مریشك بەشێوەیەكی بەرچاو لە هەرێمی كوردستان بەرز ببێتەوە.
ئەبو عوبەیدە، وتەبێژی باڵی سەربازی حەماس، کەمێک پێش ئێستا (دووشەممە) رایگەیاند، رادەستکردنی ئەو زیندانییە ئیسرائیلیانەی بڕیار بوو شەممەی داهاتوو ئازاد بکرێن، بەهۆی پێشێلکارییە بەردەوامەکانی ئیسرائیل بەرامبەر ئاگربەستەکە دواخرا.
ئەبو عوبەیدە لە بەیاننامەیەکدا رایگەیاند: "لە ماوەی سێ هەفتەی ڕابردوودا سەرکردایەتی حەماس، چاودێری پێشێلکارییەکانی دوژمن و پابەندنەبوون بە مەرجەکانی ڕێککەوتنەکەیان کردووە، لەوانە دواخستنی گەڕانەوەی ئاوارەکان بۆ باکووری کەرتی غەززە، بە ئامانجکردنیان بە بۆردومان و تەقەکردن لە ناوچە جیاجیاکانی کەرتی غەززە، هەروەها نەهێنانی ئەو کەرەستە فریا گوزارییانەی رێککەوتنیان لەسەر کرابوو"
هاوکات وتیشی: بۆیە رادەستکردنی زیندانیانی ئیسرائیلی کە بڕیار بوو رۆژی شەممەی داهاتوو ئازاد بکرێن، تا ئەوکاتەی داگیر کار پابەند دەبێت بە ئاگر بەستەو قەرەبوو کردنەوەی کارەکانی هەفتەی داهاتوو دوادەخرێت.