هەواڵەکان
وتەبێژی وەزارەتی تەندروستیی عیراق رایگەیاند، پێنج حاڵەتی نوێی توشبوون بە تای خوێنبەربوون تۆمار کراون.
سەیف بەدر وتەبێژی وەزارەتی تەندروستیی عیراق رایگەیاند، پێنج حاڵەتی نوێی توشبوون بە تای خوێنبەربوون لە عیراق تۆمار کران، بەوەش کۆی گشتی ژمارەی توشبووان گەیشتە 19 کەس.
وتیشی، ئامارەکە بەم جۆرەیە: حەوت توشبوو لە زیقار، چوار توشبوو لە کەرکوک، سێ توشبوو لە موسەنا، لە هەر یەک لە بەغداد، نەینەوا، واست، بەسڕە و میسانیش یەک توشبوو تۆمار کراوە.
تای خوێنبەربوون؛ ئێستا یەخەی چەند شارێکی عیراقی گرتووە، پەتایەکی ڤایرۆسیی درمە، بەهۆی ئاژەڵ و مێش و مەگەزەوە بۆ مرۆڤ دەگوازرێتەوە و لەنێوان مرۆڤەکانیشدا گوازراوەیە.
ئەگەر نەخۆشییەکە لە سەرەتادا دیاری بکرێت، ئەوا چارەسەرەکەی ئاسانتر دەبێت، باشترین رێگای خۆپارێزیش پاکوخاوێنییە.
رێژەی گیانلەدەستدان بە تای خوێنبەربوون لەنێوان 15٪ بۆ 30٪دایە و پێکوتەی دیاریکراوی نییە، نیشانەکانی لەرێگای پێدانی دەرمانەوە کەمدەکرێنەوە.
هۆکاری سەرەکی توشبوون، بەرکەوتنە بە ئاژەڵ و مێرووی هەڵگری ڤایرۆسەکە یان سەربڕین و خواردنی گۆشتی ئاژەڵی توشبوو. لەنێوان مرۆڤیشدا بەهۆی کارکردن و تێکەڵبوون و بەکارهێنانی سرنج و دەرزی کەسانی توشبوو، هەروەها پەیوەندی جەستەیی و بەرکەوتن بە خوێن یان هەر شلەیەکی دیکەی کەسی توشبوو، دەگوازرێتەوە و بڵاو دەبێتەوە.
نیشانە سەرەکییەکانی، دڵتێکەڵهاتن و رشانەوە، ئازاری جومگە، سکچون، تا، هیلاکی و لاوازین، نیشانە توندەکانیشی مەترسیان لەسەر ژیان هەیە بریتین لە، بێهۆشبوون، ناڕێکی لە ئیشوکاری کۆئەندامی دەمار، پەککەوتنی جگەر، گورچیلە یان سییەکان، هەروەها خوێنبەربوونی ژێر پێست
قوباد تاڵەبانی جێگری سەرۆک وەزیرانی هەرێم بۆ کۆچی دوایی پاپا فرانسیس پەیامێکی بڵاوکردەوە و رایگەیاند، پاپا فرانسیس رێزی لە هەموو ئاینییەکان دەگرت و دژی هەموو جۆرە دەمارگیری و توندڕەوییەکی ئایینی بوو.
دەقی پەیامەکەی قوباد تاڵەبانی...
کۆچی دوایی پاپا فرانسیس نەک تەنها بۆ مەسیحییەکان و شوێنکەوتووانەکەی، بەڵکو بۆ هەموو جیهان هەواڵێکی ناخۆش بوو، بۆچوون و هەوڵە ئاشتیخوازانەکانی لای هەموو مرۆڤێکی ئاشتیخوازی جیهان بە هەر بیروباوڕێکەوە جێگەی رێز و پێزانینە.
پاپا فرانسیس رێزی لە هەموو ئاینییەکان دەگرت و دژی هەموو جۆرە دەمارگیری و توندڕەوییەکی ئایینی بوو، خوازیاری گفتوگۆی نێوان ئاینییەکان و بە تایبەتیش دوو ئایینی ئیسلام و مەسیحی بوو و بەردەوام جەختی لە چارەسەرکردنی کێشە سیاسییەکانی جیهان لە ڕێگەی گفتوگۆ و چەسپاندنی ئاشتی و دادپەروەری دەکردەوە.
بەم بۆنەیەوە پرسە و سەرەخۆشی ئاراستەی هەموو شوێنکەوتووانی لە هەموو جیهان دەکەم، هیوادارین ئاشتی و ئارامی و دادپەروەری باڵ بەسەر هەموو جیهاندا بکێشێت کە بەردەوام هەوڵی بۆ دەدا.
سەرۆکی یەکێتیی نیشتمانیی کوردستان پرسەنامەیەکی بەهۆی کۆچی دوایی پاپای ڤاتیکان بڵاوکردەوە و رایگەیاند، هاوبەشی ئازاری لەدەستدانی کەسایەتییەکین هەموو ژیانی خستبووە خزمەت مرۆڤایەتی و پێکەوەژیان و بەخشندەیی.
بافڵ جەلال تاڵەبانی سەرۆکی یەکێتیی نیشتمانیی کوردستان پرسەنامەیەکی بەهۆی کۆچی دوایی پاپای ڤاتیکانەوە بڵاوکردەوە و رایگەیاندووە، "لە دڵەوە نیگەران و خەمبارین بە کۆچی دوایی قهداسهتی پاپای ڤاتيكان، پاپا فرانسیس. بۆ ئەم خەمە پرسە و سەرەخۆشی خۆمان دەگەیەنینە تەواوی برا مەسیحییەکانمان لە کوردستان، عیراق و جیهان".
ئاماژەی بەوەشکردووە، "لە گەڵیاندا هاوبەشی ئەم ئازارەین بۆ لەدەستدانی کەسایەتییەک کە هەموو ژیانی خستبووە خزمەتی مرۆڤایەتی و پێکەوەژیان و بەخشندەیی نێوان گەلان".
ئەوەشی خستووەتە روو، "پاپا فرانسیس هەمیشە دەستێکی خێربوو بۆ برایەتی، بیروباوەڕە ئاشتیخوازەکانی لە دوای خۆشی بۆ مرۆڤایەتی دەمێنێتەوە".
ئەمڕۆ دووشەممە، 21ی نیسان، پاپا فرانسیس، پاپای ڤاتیکان لە تەمەنی 88 ساڵیدا کۆچی دوایی کرد.
کەمێک پێش ئێستا، راکان جبوری پاریزگرای پێشوی کەرکوک بە وەکالەت، دەستگیرکرا.
دیلان غەفور ئەندامی ئەنجومەنی نوێنەرانی عیراق بە کوردسات نیوزی راگەیاند: پێشتر لیژنەیەک لەلایەن ئەنجومەنی وەزیرانی عیراق لەسەر کەیسی وەرگرتنی هاوکاری لە دەوڵەتی تورکیا بەبێ ئاگادار کردنەوە و رەزامەندی حکومەتی عیراق و دۆسیەی گەندەڵیەکانی سەرۆکی راوێژکارانی پارێزگای کەرکوک، لەسەر ڕاکان جبوری پارێزگاری پێشوی کەرکوک بە وەکالەت پێکهێندرابوو، ئەمڕۆش لەسەر ئەو دوو دۆسیەیە دەستگیرکراوە".
بەپێی زانیارییەکان، دەستگیردنەکەی راکان جبوری لەسەر داوای دەستەی دەسپاکی عیراق بوە، دوای بەدواداچونی ورد لەسەر سکاڵای نوێنەرانی کەرکوکی فراکسیۆنی یەکێتی لە ئەنجومەنی نوێنەران.
لە راپۆرتەکەدا نوێنەرانی یەکێتی سکاڵایان دژی دەستەی دەسپاکی کەرکوکیش تۆمارکردوە، کە چاوپۆشی لە خراپ بەکارهێنانی دەسەڵات و گەندەڵییەکانی راکان جبوری کردوە.
گرنگترین ئەو بابەتانەی کە لە راپۆرتی سکاڵاکە هاتوە و سەرۆکی ئەنجومەنی وەزیرانی لێ ئاگادار کراوەتەوە؛
1- هاتنی وەفدی تورکیا بەمەبەستی دابەشکردنی پێداویستی مرۆیی بێ ئەوەی مۆڵەت لە حکومەتی عیراق و لایەنە پەیوەندیدارەکان وەربگیرێت.
2- بابەتی دابەشکردنی زەوی بەسەر فەرمانبەرانی ئەنجومەنی پارێزگای کەرکوک دا.
3- وەرگرتن و دیار نەمانی نۆ ئۆتۆمبێل تایبەت بە ئەنجومەنی پارێزگا و چەندین دۆسییەی گەندەڵی دیکە و خراپ بەکارهێنانی دەسەڵاتەکەی.
د. لەتیف رەشید سەرۆک کۆماری عیراق، بەهۆی کۆچی دوایی پاپا فرانسیس، پەیامێکی بڵاوکردوەتەوە و ئاماژەی بەوەداوە، "بە کۆچی دواییان هەموو جیهان کەسایەتییەکی ئایینی و مرۆڤدۆستی بێهاوتای لە دەستدا کە لە ماوەی ژیانیدا خزمەتێکی گەورەی بە پرسەکانی ئاشتی و لێبوردەیی ئایینی کردووە".
دەقی پەیامەکەی سەرۆک کۆمار
بە خەمێکی زۆرەوە هەواڵی کۆچی دوایی پاپا فرانسیسمان پێگەیشت کە کاریگەرییەکی لەبیرنەچووی بەجێهێشت لە پابەندبوون بە هەڵوێستە مرۆییەکان و ڕەتکردنەوەی جەنگ و توندوتیژی و بانگەشەی ئاشتی و پێکەوەژیان لە نێوان هەموو گەلاندا.
بە کۆچی دواییان هەموو جیهان کەسایەتییەکی ئایینی و مرۆڤدۆستی بێهاوتای لە دەستدا کە لە ماوەی ژیانیدا خزمەتێکی گەورەی بە پرسەکانی ئاشتی و لێبوردەیی ئایینی کردووە.
سەرەخۆشی لە کڵێسای کاسۆلیکی و مەسیحییەکان و هەموو جیهان دەکەین بەبۆنەی کۆچی دوایی کەسایەتی پیرۆزیان و بەزەیی و سۆز بۆ ڕۆحیان.
خانمی یەکەمی عیراق پرسەنامەیەکی بەهۆی گیانلەدەستدانی پاپای ڤاتیکان بڵاوکردەوە و رایگەیاندووە، ئەو رابەرە رۆحییە بوو ژیانی خۆی تەرخان کرد بۆ ئاشتی و لێبوردەیی ئایینیی.
شاناز ئیبراهیم ئەحمەد خانمی یەکەمی عیراق پرسەنامەیەکی بەهۆی گیانلەدەستدانی پاپای ڤاتیکان بڵاوکردەوە و رایگەیاندووە، "دڵسۆزانەترین پرسە و سەرەخۆشی لە مەسیحییەکانی جیهان، بەتایبەت کاسۆلیکییەکان دەکەم بۆ لەدەستدانی ئەو رابەرە رۆحییەی ژیانی خۆی تەرخان کرد لەپێناو ئاشتی و لێبوردەیی ئایینییدا".
ئاماژەی بەوەشکردووە، سەردانە مێژووییەکەی بۆ عێراق لە ساڵی 2021دا دەستپێشخەرییەکی بەهێز بوو بۆ پشتیووانی و هیوا، هەروەها گەواهیدەری پابەندبوونی بوو بە گفتوگۆی نێوان ئایینەکان.
ئەوەشی خستووەتە روو، "تێکۆشانی لەپێناو ئەم بنەمایانەدا رێزێکی زۆری ئایینزا جیاوازەکانی پێبەخشی".
ئەمڕۆ پاپا فرانسیس، پاپای ڤاتیکان لە تەمەنی 88 ساڵیدا کۆچی دوایی کرد.
کەشناسیی هەرێم پێشبینی نوێی بۆ کەشوهەوای ئەمڕۆ و سبەینێ بڵاوکردەوە و ئاماژەی بەوەکردووە، تاوەباران دەست پێ دەکات و خێرایی با زیاد دەکات.
کەشناسیی هەرێم رایگەیاند، ئەمڕۆ دووشەممە، ئاسمان نیمچەهەور دەبێت و لە ناوچە شاخاوییەکان هەندێک کات هەوری تەواو دەبێت، هەروەها لە ناوچە سنوریەکانی باکور ئەگەری کەمێک تاوەباران هەیە.
ئەوەش هاتووە، سبەینێ سێشەممە، ئاسمان لەنێوان هەور و نیمچەهەوردا دەبێت لەگەڵ کەمێک تاوەباران لە ناوچە سنوریەکانی باکور و رۆژهەڵات.
بەپێی پێشبینییەکانی کەشناسی، ئەمڕۆ خێرایی با لەنێوان 10 بۆ 20 کیلۆمەتردا دەبێت لە سەعاتێکدا، هەندێک کاتیش دەگاتە سەروو 30 کیلۆمەتر.
کەشناسی باسی لەوەشکردووە، ئەمڕۆ پلەکانی گەرما هاوشێوەی دوێنێ دەبن و سبەینێ کەمێک نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەم جۆرە دەبن:
هەولێر : 32 پلەی سیلیزی
سلێمانی : 27 پلەی سیلیزی
دهۆک : 28 پلەی سیلیزی
کەرکوک : 33 پلەی سیلیزی
زاخۆ : 27 پلەی سیلیزی
هەڵەبجە : 27 پلەی سیلیزی
سۆران : 25 پلەی سیلیزی
حاجی ئۆمەران : 20 پلەی سیلیزی
گەرمیان :34 پلەی سیلیزی
نرخی زێڕ گەیشتووەتە بەرزترین نرخ لە مێژووی خۆیدا و شارەزایانی بواری ئابووریش باس لەوە دەکەن، نرخی ئۆنسەیەک زێڕ لە دەرگای سێ هەزار و 400 دۆلاری داوە و هێندەی نەماوە بچێتە ژوورەوە.
لە ئێستادا نرخی یەک ئۆنسە زێڕ لە بازاڕەکانی جیهاندا بە سێ هەزار و 389 دۆلار مامەڵەی پێوەدەکرێت.
هاوکات، نرخی یەک کیلۆگرام زێڕ بەرانبەرە بە 108 هەزار و 98 دۆلار و یەک گرامیش بە 108 دۆلار و 98 سەنتە.
نرخی یەک ئۆنسە زێڕ زۆر نزیکە لەوەی بگاتە سێ هەزار و 400 دۆلار، شارەزایانی بواری ئابووریش باس لەوەدەکەن، نرخی زێڕ لە دەرگای نرخە نوێیەکەی داوە، هەر ئەوەندەی ماوە دەرگاکەی لێ بکرێتەوە و بچێتە ژوورەوە.
بەرزبوونەوەی بەرچاوی نرخی زێڕ چەندین هۆکاری لە پشتە. لەماوەی پێنج ساڵی رابردوودا نرخەکەی بە نزیکەی دوو هێندە زیادی کردووە، پێشبینی ئابووریناسانیش زیاتر بەرزبوونەوەی نرخەیەکەتی.
ئەگەرچی زێڕ وەک پارێزبەندییەک لە زیادبوونی هەڵئاوسان دەبینرێت، بەڵام لە سەرەتای ئەمساڵەوە 27٪ نرخەکەی بەرزبووەتەوە.
دوای سەپاندنی باجی گومرگی ترەمپ بەسەر کەلوپەلی چیندا، کە ئەو دوو وڵاتە وڵاتی زلهێزی جیهانن لەرووی بازرگانییەوە، هەروەها دوای ئەوەی نرخی دۆلار بۆ نزمترین ئاستی سێ ساڵی رابردووی دابەزی و ترسی پاشەکشەی ئابووری لە شەڕی بازرگانی نێوان ویلایەتە یەکگرتووەکان و هاوبەشە سەرەکییەکانیدا، وای لە وەبەرهێنەران کردووە هەوڵی بەدەستهێنانی پەناگەیەکی پارێزراوتر بدەن بۆ پاراستی بازرگانییەکەیان.
هەموو ئەوانەش بەشێکن لە هۆکارەکانی بەرزبوونەوەی نرخی زێڕ.
د.لەتیف رەشید سەرۆک کۆماری عیراق، ئەمڕۆ یەکشەممە 20ـی 4ـی 2025 لە کۆشکی بەغداد، پێشوازی لە محەممەد ئەحمەد یەماحی سەرۆکی پەرلەمانی عەرەبی و وەفدی یاوەری کرد.
سەرۆک کۆماری عیراق جەختی لەپێویستی کارەکانیان کرد کە وەک سەکۆیەک بۆ لێکنزیکبوونەوە و دیالۆگ لە نێوان لایەنە جیاوازەکاندا و بزوێنەرێک بۆ دەستپێشخەرییەکانی خزمەت بە ئاسایشی نەتەوەیی عەرەب و رەنگدانەوەی نیگەرانییەکانی هاووڵاتیانی عەرەب.
سەرۆک کۆمار ئاماژەی بەوەدا کە عیراق لە ماوەی پێشودا روبەڕوی رژێمێکی دیکتاتۆر و جەنگ و تیرۆر بوەوە، ئێستاش رۆڵی سەرەکی خۆی بەدەستهێناوەتەوە، بەو پێیەی سەقامگیری ئەمنی لە هەموو شارەکاندا هەبوو، و شایەتحاڵی گەشەسەندنە لە خزمەتگوزاری و پڕۆژەکانی وەبەرهێناندا، هەروەها جەختیکردوە کەدەرگاکانی عیراق کراوەن بەڕوی براکانیدا و پەرۆشی بۆ پتەوکردنی پەیوەندییەکانی لەگەڵ هەموو وڵاتانی برا و دۆست، هەروەها هیوای خواست کە زۆرێک لە کۆمپانیاکان لە عیراق کاربکەن.
هاوکات باسی لەڕۆڵی سەرۆکایەتی کۆمار کرد لە پێشکەشکردنی چەندین رەشنووسی یاسای پەیوەست بە داواکاری هاووڵاتیان بۆ ئەنجومەنی نوێنەران بۆ دەنگدان، ئەمە جگە لەهەوڵەکانی بۆ ئازادکردنی هەزاران دەستگیرکراو کە سزاکانیان بەسەرچووبوو.
سەرۆک کۆمار ئاماژەی بەوەشکرد کە میوانداریی بەغداد بۆ کارەکانی پەرلەمانی عەرەبی و کۆبوونەوەکانی لیژنەکانی پەرلەمانی عەرەبی گوزارشتە لە پابەندبوونی عیراق بۆ پشتیوانی کردن لە کاری هاوبەش و چەسپاندنی رۆڵی سەرەکی خۆی لە لەچوارچێوەی سیستمی ناوچەکەدا.
دوپاتیٍشی کردەوە لە پێویستی هەستانی پەرلەمانە عەرەبییەکان بە بەرپرسیارێتی خۆیان سەبارەت بە دەستدرێژییە بەردەوامەکان، گەمارۆی ناڕەوا و بارودۆخی توندی مرۆیی لە کەرتی غەززە، بە فشارکردن بۆ راگرتنی پەرەسەندنەکان و کۆتاییهێنان بە شەڕ و رێگەدان بە چونە ناوەوەی یارمەتییە مرۆییەکان.
لەلای خۆیەوە یەماحی، سوپاس و پێزانینی خۆی بۆ سەرۆک کۆمار دەربڕی بۆ ئەو پێشوازییە گەرم و میواندارییە بەخشندەیە و ستایشی رۆڵی پێشەنگی عیراقی کرد لە پشتیوانیکردنی دۆزی نەتەوەیی و بەهێزکردنی رێگاکانی هاوبەشی عەرەبی.
یەماحی هەروەها جەختی لەپەرۆشی پەرلەمانی عەرەبی بۆ قووڵکردنەوەی هاوکاری و راوێژ لەگەڵ عیراق و کراوەیی بەرامبەر دیدگا و دەستپێشخەرییەکانی کردەوە، بە لەبەرچاوگرتنی کاریگەرەکانی لە بەهێزکردنی هاودەنگیی عەرەبی و بەهێزکردنی پێگەی ناوچەکە.
سەرۆکی پەرلەمانی عەرەبی هەروەها ستایشی هەڵوێستی پاڵپشتیکاری عیراقی لەبارەی پرسە عەرەبییەکان کرد و پاڵپشتیی پەرلەمانی بۆ هەوڵەکانی عیراق بۆ پاراستنی ئاسایش و سەقامگیری وڵاتەکەی دوپات کردەوە.
د.لەتیف رەشید سەرۆک کۆماری عیراق، ئەمڕۆ سێشەممە 20ـی 4ـی 2025 لەکۆشکی بەغداد، پێشوازی لە خالد بەتال نەجم وەزیری پیشەسازی کرد.
لەمیانی دیدارەکەدا سەرۆک کۆمار ئاماژەی بەوەدا کە عیراق خاوەنی سەرچاوەیەکی بەرفراوان و هەمەچەشنەیە کە دەتوانرێت وەبەربهێنرێت لە پاڵپشتیکردنی ئابووری عیراق و پەرەپێدانی پیشەسازی ناوخۆیی. هەر لە دیدارەکەدا پلانە ستراتیژییەکان بەئامانجی هاندانی کاری کارگەکان بۆ دابینکردنی پێداویستییەکانی بازاڕی ناوخۆیی تاوتوێ کرا و تێیدا سەرۆک کۆمار جەختی لە گرنگی ئەم کارە لە بەهێزکردنی دۆخی ئابووری کردەوە و ئاماژەیشی بە پێویستی هاندان و پشتیوانی کەرتی تایبەت کرد بۆ ئەوەی بتوانێت شانبەشانی کەرتی گشتی بەشداری بکات لە گەیشتن بە گەشەسەندنی بەردەوام لە وڵاتدا.
لەلای خۆیەوە وەزیری پیشەسازی ، سوپاس و پێزانینی خۆی بۆ گرنگیدان و ڕێنماییە بەنرخەکانی سەرۆک کۆمار دەربڕی و ڕونکردنەوەیەکی سەبارەت بەکارەکانی وەزارەت و پڕۆژە بەردەوامەکان و پلانەکانی بۆ بەهێزکردنی کەرتی پیشەسازی لەعیراقدا خستەڕوو.
بافڵ جەلال تاڵەبانی سەرۆکی یەکێتیی نیشتمانیی کوردستان بەبۆنەی هاتنی جەژنی قیامەی مەسیحیەکانەوە پەیامێکی بڵاوکردەوە و رایگەیاند، هیوادارم ئەم بۆنەیە، ببێتە مایەی تەبایی و برایەتی زیاتر لە نێوان سەرجەم نەتەوە و پێکهاتەکانی وڵاتەکەماندا و وێنای هەرێمەکەشمان کە هەمیشە مەڵبەندی پێکەوەژیانی ئایینی و نەتەوەیی و پێکهاتە جیاوازەکان بووە.
دەقی پەیامەکەی سەرۆک بافڵ...
بەبۆنەی جەژنی هەستانەوە (قیامە)ـی حەزرەتی مەسیح (سڵاوی خودای لێبێت ) پیرۆزبایی گەرم لە سەرجەم خوشک و برایانی کریستیان دەکەم و ئاواتەخوازم لە کەشێکی ئارام و شادیدا ئەم جەژنە بەڕێبکەن.
هیوادارم ئەم بۆنەیە، ببێتە مایەی تەبایی و برایەتی زیاتر لە نێوان سەرجەم نەتەوە و پێکهاتەکانی وڵاتەکەماندا و وێنای هەرێمەکەشمان کە هەمیشە مەڵبەندی پێکەوەژیانی ئایینی و نەتەوەیی و پێکهاتە جیاوازەکان بووە جوانتر و گەشاوەتری بکەین.
جەژنتان پیرۆز و هەر شادبن.
بافڵ جەلال تاڵەبانی
سەرۆکی یەکێتیی نیشتمانیی کوردستان
پۆلیسی راپەڕین بڵاوی کردەوە کە بە تاوانی دزینی بڕێکی زۆر پارە لە هاووڵاتیەک تۆمەتبارێکیان دەستگیرکردوە.
بەپێی راگەیاندنی بەڕێوەبەرایەتی پۆلیسی راپەڕین، لە 15ـی نیسانی 2025 هاووڵاتییەک کە دانیشتووی دەرەوەی سنووری ئیدارەی راپەڕینە، بۆ بەشداریکردن لە پرسەیەک سەردانی شاری رانیەی کردووە، بەڵام لەلایەن کەسێکەوە بڕی سێ هەزار دۆلاری ئەمریکی و حەوت ملیۆن دیناری عیراقی لەناو ئۆتۆمبێلەکەی لێدزراوە.
هێزەکانی پۆلیس لە ماوەیەکی کەمتر لە 24 کاتژمێردا توانیان ناسنامەی تۆمەتبارەکە ئاشکرا بکەن کە دەرکەوت لە دایکبووی ساڵی 1985ـە و خەڵکی شاری رانیەیە، بەڵام لە دەرەوەی وڵات دەژی.
راگەیاندنی پۆلیسی راپەڕین ئاماژەی بەوەشکرد کە تۆمەتبارەکە دانی بە تاوانەکەیدا ناوە و لە کاتی دەستگیرکردنیشیدا دەست بەسەر بڕێک لە پارە دزراوەکەدا گیراوە.
هەروەها لە راگەیاندنەکەدا ئاشکراکراوە کە تۆمەتبار پێشینەی تاوانی هەیە و پێشتر دوو جار بە تۆمەتی دزیکردن سزادراوە و فەرمانی دەستگیرکردنی هەبووە.
قوباد تاڵەبانی جێگری سەرۆکی حکومەتی هەرێم بەبۆنەی هاتنی جەژنی قیامەتی مەسیحەکانەوە پەیامێکی بڵاوکردەوە و رایگەیاند، كریستیانەكان مێژوویەكی دێرینیان لە كوردستاندا هەیە. هەربۆیە پارێزگاریكردن لەو پێکهاتە رەسەنە و قوڵترکردنەوەی پێكەوەژیان ئەرکی لە پێشینەی هەموو لایەکمانە.
لە پەیامەکەدا قوباد تاڵەبانی دەڵێت، بە بۆنەی هاتنی جەژنی قیامەتی مەسیحەوە گەرمترین پیرۆزبایی لە خوشک و برایانی کریستیان لە کوردستان و عێراق و هەموو جیهان دەکەم و هیوای جەژنێکی پڕ لە خۆشی و ئارامییان بۆ دەخوازم.
راشيگەیاند، كریستیانەكان چ وەك پێکهاتەیەکی ئایینی و چ وەک گرووپە ئیتنیکییەكانیان بەشێكن لە جوانییەكانی فرەیی لە ناوچەكە و مێژوویەكی دێرینیان لە كوردستاندا هەیە. هەربۆیە پارێزگاریكردن لەو پێکهاتە رەسەنە و قوڵترکردنەوەی پێكەوەژیان ئەرکی لە پێشینەی هەموو لایەکمانە.
پەرلەمانتارێكی ئێران رایگەیاند، لە دوو ساڵی رابردوودا بە ئاگاداری رێبەری باڵای ئێران پەیوەندی نهێنیان لەگەڵ تیمی دۆناڵد ترەمپدا هەبووە.
محەمەد مەهدی شەهریاری، ئەندامی لیژنەی ئاسایشی نیشتمانی و سیاسەتی دەرەوە لە پەرلەمانی ئێران رایگەیاند، تاران لە ماوەی دوو ساڵی رابردوودا بە ئاگاداریی عەلی خامنەیی رێبەڕی باڵای ئێران بە نهێنی پەیوەندی لەگەڵ تیمی دۆناڵد ترەمپ سەرۆكی ئەمریكا هەبووە.
دەشڵێت، لە پەیوەندییە نهێنییەكان دا تەنها باس لە بەرنامە ئەتۆمییەكەی ئێران كراوە و راپۆرتی گفتوگۆكانیش دراوەتە عەلی خامنەیی.
وتیشی، لە ماوەی ئەو دوو ساڵەدا تاران هەر داواكارییەكی هەبووبێت ئەمریكا بۆی جێبەجێ كردووە.
لە سلێمانی رێكاری پێویست بۆ رێگریكردن لە بڵاوبونەوەی تای خوێنبەربون گیراوەتەبەر و تا ئێستا هیچ حاڵەتێكی توشبون بە نەخۆشییەكە تۆمار نەكراوە .
د. سامان عومەر پزیشكی ڤێتەرنەری پێشكەوتوو لە كوشتارگەی سلێمانی بە كوردسات نیوزی راگەیاند ، لە چوارچێوەی ئەو رێكارانەی بۆ رێگریكردن لە بڵاوبونەوەی تای خوێنبەربون گرتویانەتەبەر ، رۆژانە پیش سەربڕین و دوای سەربڕین پشكنین بۆ ئاژەڵەكان دەكەن و هەر ئاژەڵێكیش گومانی توشبونی بە تای خوێن بەربون لێبكرێت سەر نابڕێت، تا دوای ئەوەی چارەسەری تەواو وەردەگرێت و دڵنیا دەبنەوە لەوەی كە نەخۆشییەكەی نەماوە.
داواشی كرد هاوڵاتیان گۆشت لەسەر شەقامەكان و گۆشتی بێ مۆر نەكڕن و لە كاتی لێنانیشیدا رێكاری پێویستی پاكو خاوێنی بگرنەبەر و تا رادەیەكی زۆر باش گۆشتەكە بكوڵێندرێـت .
بەپێی سەرچاوە تەندروستییەكانیش ، تا ئێستا لە سلێمانی هیچ حاڵەتێكی توشبون بە تای خوێنبەربون تۆمار نەكراوە .
بەپێی راپۆرتی بەڕێوەبەرایەتی گشتی مادە هۆشبەرەکانی عیراق، تەنیا لە سێ مانگى یەکەمى 2025 دا، زیاتر لە سێ هەزار تۆمەتبارى مادەى هۆشبەر لە عێراق دەستگیرکراون.
بەڕێوەبەرایەتی گشتی مادە هۆشبەرەکان و کارتێکەرە دەرونییەکانى عیراق رایگەیاند، کە تەنیا لە سێ مانگی یەکەمی ئەمساڵدا سێ هەزار و شەش تۆمەتبارىان بە ماددەى هۆشبەرەوە دەستگیرکردووە و دەستیشیان بەسەر 2 تۆن و 166 کیلۆش مادەى هۆشبەردا گرتووە.
لە راگەیەنراوەکەدا ئاماژە بەوەشکراوە، لە ئەنجامى روبەڕوبونەوەیان لەگەڵ هێزە ئەمنییەکان دوو تۆمەتبار کوژراون و 13 کەسیشیان لێ بریندار بووە.