هەواڵەکان
میدیا عیراقییەکان بڵاویانکردەوە، سەرچاوە باڵاکانی حکومەتی عیراق ئاشکرایان کردوە، کە ئەنجومەنی وەزاری بۆ ئاسایشی نیشتمانی، بڕیارێکی گرنگی دەرکردووە و تێیدا دەسەڵاتی تەواوی داوە بە دەستەی حەشدی شەعبی و سەرجەم دەزگا ئەمنییەکانی تری وڵات، تاوەکو بەپێی پرەنسیپی مافی وەڵامدانەوە و بەرگری لە خۆکردن مامەڵە بکەن.
بەگوێرەی زانیارییەکان، بڕیاری دەسەڵاتی وەڵامدانەوە بە حەشدی شەعبی، بە مەبەستی روبەڕووبوونەوەی ئەو هێرشە سەربازییانەیە، کە دەکرێنە سەر بنکە و بارەگاکانیان، بەجۆرێک هێزەکان دەتوانن دەستبەجێ بەرپەرچی هەر دەستدرێژییەک بدەنەوە.
لای خۆیەوەئاژانسی هەواڵی عیراقی (واع) لە زاری بەرپرسانی عیراقەوە رایگەیاندوە، کە ئەنجومەنەکە بڕیارێکی توندتری دەرکردووە سەبارەت بە تێکدەرانی ئاسایشی ناوخۆ و بەپێی بڕیارەکە، فەرمانی دەستگیرکردن بۆ هەموو ئەو کەسانە جێبەجێ دەکرێت کە تێوەگلاون لە هێرشکردنە سەر دامەزراوە ئەمنییەکان، بەرژەوەندییەکانی هاووڵاتیان و نێردە دیپلۆماسییەکان.
هەروەها جەخت کراوەتەوە کە پێویستە ئەو لایەنانەی لە پشت ئەم هێرشانەوەن بۆ رای گشتی ئاشکرا بکرێن.
ئەم هەنگاوانە لە کاتیكدایە، کە گرژییە ئەمنی و سەربازییەکان لە ناوچەکە زیادیان کردووە و حکومەتی عیراق دەیەوێت لە رێگەی ئەم دەسەڵاتانەوە پارێزگاری لە سەروەریی خاکی وڵات و سەلامەتیی هێزە چەکدارەکانی بکات
دۆناڵد ترەمپ، سەرۆکی ئەمریکا رایگەیاند، ئەوان لە ئێران ئەنجامی باشیان بەدەستهێناوە و لە ئێشتادا دەیانەویط بە هەرنرخێک بێت رێککەوتنمان لەگەڵدا بکەن.
سەرۆکی ئەمریکا تەواوی سەرکردەکانی ئێرانیان کردوەتە ئامانجو ئەو وڵاتە هێزی ئاسمانی و دەریاییان نەماوە و بە تەواوەتی لەناوبراوە.
ئاماژەی بەوەشکردوە؛ ئیتر هیچ چەکێکی دژە فڕۆکە و سیستمی رادار و فەرماندەیان نییە وبە ئازادی بەسەر ئاسمانی پایتەختی تاراندا دەفڕن و هەرچی پێمان خۆشە لەوێ دەیکەین
سەرۆکی ئەمریکا جەختیکردەوە، لە ئێران سەرکەوتنیان بەدەستهێنا و ئێرانییەکان بە پەرۆشن بۆ ئەوەی لەگەڵیان رێککەوتن بکەن
سەبارەت بە دانوستانەکانیشیان، دۆناڵد ترمپ دەڵێت؛ لەگەڵ کەسی شیاو لە گفتوگۆدان لە ئێران بۆ گەیشتن بەرێککەوتن و چاوەروانی دەرئەنجامی گفتوگۆکانن
بەهۆی ناسەقامگیریی باری کەشوهەوا و بەردەوامیی باران بارین، شانەی قەیران و کارەساتەکان لە پارێزگای کەرکوک باری نائاسایی راگەیاند، پارێزگاری شارەکەش بڕیاریدا بە راگرتنی خوێندن بۆ ماوەی دوو رۆژ.
شانەی قەیران و کارەساتەکان، هۆشداری دەداتە هاووڵاتیان، کە بەهۆی بەرزبوونەوەی ئاستی ئاوی چەم و بەنداوەکان، مەترسیی هەڵسانی لافاو لە ئارادایە و رێبوار تەها، پارێزگاری کەرکوکیش بریاریدا بە راگرتنی دەوامی خوێندن بۆ رۆژانی چوارشەممە و پێنجشەممە بەهۆی ناسەقامگیری کەشوهەواوە.
لای خۆیەوە شآنەی قەیرانەکان، ئاماژەبەکردوە، ئامادەکاری کراوە بۆ بەرزترین ئاستی ئامادەباشی و سەرجەم فەرمانگە خزمەتگوزارییەکان خراونەتە حاڵەتی ئامادەباشییەوە.
هەروەها تیمی تایبەتی فریاکەوتن و ئامێری پێویست تەرخانکراون بۆ ئەوەی لە ئەگەری هەر کارەساتێکی سروشتیدا، دەستبەجێ بەهانای هاووڵاتیانەوە بچن.
لایەنە پەیوەندیدارەکانی کەرکوک داوا لە هاووڵاتیان دەکەن بۆ پاراستنی گیانیان، بە هیچ شێوەیەک لە رێڕەوەکانی ئاو، دۆڵ و چەمەکان نزیک نەبنەوە و رێنماییەکان جێبەجێ بکەن.
وەزارەتی پێشمەرگە، لە راگەیەندراوێكدا، ژمارەیەک رێنمایی نوێ و توندی بۆ گشت ئەفسەر و پێشمەرگەکان بڵاوکردەوە و تێیدا جەخت لە قەدەغەکردنی هەموو جۆرە لێدوانێکی رۆژنامەوانی و پێدانی زانیاری بە میدیاکان دەکاتەوە.
بە گوێرەی رێنماییەکان هاتنی دەزگاکانی ڕاگەیاندن بۆ ناو بارەگا و شوێنە سەربازییەکان بە هەموو شێوەیەک رێگری لێ دەکرێت و قەدەغەیە، داواش لە میدیاکان کراوە خۆیان لە وێنەگرتنی بنکە و بارەگاکان بەدوور بگرن.
دەقی راگەیەندراوەکە
بۆ گشت ئەفسەر و پێشمەرگەکان
١. جەخت دەکەینەوە، کە بە هیچ شێوەیەک رێگەپێدراو نیە راگەیاندنەکان بێنە ناو بارەگاو شوێنە سەربازییەكانتان، بۆ ئەم مەبەستە داوا لە كەناڵ و میدیاكان دەكەین خۆیان بە دوور بگرن لە گرتنی وێنەو ڤیدیۆی بارەگا سەربازییەكان.
٢. لێدوان و پێدانی زانیاری بە ڕاگەیاندنەکان لە لایەن فەرماندەو ئەفسەران و پێشمەرگەوە بە هەموو شێوەیەک قەدەغەیە.
٣. بە هەموو شێوەیەک بڵاوکردنەوەی وێنە، ڤیدیۆ و زانیاری تایبەت بە سەنگەر و بارەگاکان لە تۆڕە کۆمەڵایەتییەکان و پۆستکردنیان قەدەغەیە.
٤. بە مەبەستی پاراستنی ئاسایشی زانیاری، تکایە هەر پەیج و ئەکاونتێک دەبینن کە بە ناوی پێشمەرگەوە زانیاریی سەربازی بڵاو دەکاتەوە، لینکی پەیجەکەمان بۆ بنێرن تاوەکو لە ڕێگەی لایەنە پەیوەندیدارەکانەوە ڕێکاری یاساییان بەرامبەر بگیرێتە بەر.
٥. هەر ئەفسەر و پێشمەرگەیەک پێشێلی ڕێنماییەکان بکات، ڕووبەڕووی توندترین سزای سەربازی و کارگێڕی دەبێتەوە و لەمبارەیەوە چاودێری وردی سۆشیال میدیا دەکرێت.
٦. پێویستە ئەفسەرانی راگەیاندن و هۆشیاری لە یەكە سەربازییەكان، ئۆپەراسیۆنەکان، هەواڵگری، چاودێری وردی تەواوی جموجوڵەکانی پێشمەرگە و ئەفسەران بکەن و هەروەها ئەو ڕێنماییانە پەخش بکەن.
٧. ئێمەش لە بەرێوەبەڕایەتی گشتی راگەیاندن و هۆشیاری نیشتێمانی چاودێری وردی سۆشیال میدیا دەكەین بۆ هەر سەرپێچییەك لەم خاڵانە و وەرگرتنی رێكاری سەربازی و یاسایی بە هەماهەنگی لەگەڵ سەرووی خۆمان.
بەڕێوەبەرایەتی گشتی راگەیاندن و هۆشیاری نیشتمانی
وەزارەتی پێشمەرگە
٢٤ی ئاداری ٢٠٢٦
بافڵ جەلال تاڵەبانی ئیدانەی هێرشکردنە سەر پێشمەرگە دەکات و رایگەیاند؛ بە توندی ناڕەزایەتی خۆمان دەردەبڕین بە شەهیدبوون و برینداربوونی ژمارەیەک پێشمەرگەی قارەمان
لە راگەیەندراوێكدا، بافڵ جەلال تاڵەبانی سەرۆکی یەکێتیی نیشتمانی کوردستان، پرسە و سەرەخۆشی ئاڕاستەی کەسوکار و بنەماڵە و هاوسەنگەرانی شەهیدەکان دەکات و هیوای زوو چاکبوونەوەش بۆ بریندارەکان دەخوازێت.
جەختیشیکردوەتەوە، بە ئامانجگرتنی هێزی پێشمەرگەی کوردستان پێشێلکردنی سەروەری خاکی عیراق و هەرێمی کوردستانە و سەرکۆنەی دەکەن.
داواش لە حکومەتی عیراق و کۆمەڵگەی نێودەوڵەتی دەکات هەوڵەکانیان بخەنەگەڕ بۆ رێگریکردن لە دووبارەبوونەوەی هەر جۆرە هێرشێکی هاوشێوە.
ئاماژەی بەوەشکردوە، هیچ کاتێک هەرێمی کوردستان بەشێک نەبووە لەم جەنگە، بەڵکو هەوڵە دیپلۆماسییەکانیان خستووەتەگەڕ تاوەکو بەشێکبن لە دۆزینەوەی چارەسەری ئاشتییانە لە رێگەی گفتوگۆوە بۆ ئەوەی سەقامگیریی بۆ ناوچەکە بگەڕێتەوە.
دوای 25 رۆژ لە جەنگەکە، وەزارەتی پەروەردەی ئێران ئاماری ئەو خوێندکارو مامۆستایانەی بڵاوکردەوە کە بەهۆی جەنگەکەوە بون بە قوربانی و بە گوێرەی ئامارەکە زیاتر لە 400 خوێندکار و مامۆستان.
ئەمڕۆ سێشەممە، وەزارەتی پەروەردەی ئێران رایگەیاند، لە سەرەتای جەنگەکەوە تا ئێستا، 230 خوێندکار و مامۆستا گیانیان لەدەستداوە و 177 خوێندکارو مامۆستای تریش بریندارن.
لە راگەیەندراوەکەی وەزارەتی پەروەردەدا ئاماژە بەوەشکراوە، بەهۆی جەنگەکەوە زیاتر لە 600 دامەزراوەی پەروەردەیی و رۆشنبیری لەناوچوون.
مەسعود بارزانی سەرۆکی پارتی دیموکراتی کوردستان پەیامێکی بڵاوکردووەتەوە و تێیداهاتووە: زۆر بە توندی ئیدانەی ئەو پەلامارە دەكەم کە بەرەبەیانیی ئەمڕۆ بە موشەکی ئێرانی كرایە سەر بارەگاكانی هێزی پێشمەرگەی كوردستان.
دەقی پەیامەکە
بەناوی خودای مەزن و دلۆڤان
زۆر بە توندی ئیدانەی ئەو پەلامارە دەكەم کە بەرەبەیانیی ئەمڕۆ بە موشەکی ئێرانی كرایە سەر بارەگاكانی هێزی پێشمەرگەی كوردستان. بە داخێكی زۆرەوە لە ئەنجامدا ژمارەیەك پێشمەرگەی قارەمان شەهید و ژمارەیەكی تریش بریندار بوون. پرسە و سەرەخۆشیی خۆم ئاراستەی خانەوادەی شەهیدانی ئەو پەلامارە ناڕەوایە دەكەم و خۆم بە هاوبەشی خەمیان دەزانم و هیوای چاكبوونەوەی خێرا بۆ برینداران دەخوازم.
ئەو پەلامارە دوژمنكارانەیە و، هیچ پاساوێك هەڵناگرێت. ئەوە بۆ جاری چەندەمە ئەم جۆرە هێرشانە بە بێ گوێدانە بنەماكانی دراوسێتی و یاسای نێودەوڵەتی بەرانبەر هەرێمی كوردستان ئەنجام دەدرێت. ئەوە لە حاڵێكدایە كە هەرێمی كوردستان بەشێک نەبووە لەم شەڕەی ئێستا لە ناوچەکەدا هەیە و هیچكات هەڕەشە نەبووە بۆ سەر دراوسێکان.
پێشمەرگە ئازیزترین و بەنرخترین سەرمایەی گەلەکەمانە.
مسعود بارزانی
24ی ئاداری 2026
سەرۆکایەتی کۆمار ئیدانەی بۆردومانکردنی هێزەکانی پێشمەرگە دەکات و لە پەیامێکدا دەڵێت: جەخت دەکەینەوە کە هێزەکانی پێشمەرگە هەمیشە کۆڵەکەیەکی سەرەکی بوون لە سیستمی بەرگریی نیشتمانیدا و بەشداریکی کاریگەریان هەبووە لە بەرەنگاربوونەوەی تیرۆر و چەسپاندنی ئاسایش و سەقامگیری.
دەقی پەیامەکەی سەرۆکایەتی کۆمار
سەرۆکایەتی کۆمار بە توندترین شێوە سەرکۆنە و ئیدانەی ئەو بۆردومانە دەکات کە هێزەکانی پێشمەرگەی لە سنووری ناوچەی سۆران کردە ئامانج، کە بووە هۆی شەهیدبوونی ژمارەیەک تێکۆشەر و برینداربوونی چەندانی دیکە.
وێڕای ئاراستەکردنی پرسە و سەرەخۆشی و هاوخەمی قووڵمان بۆ بنەماڵەی شەهیدانی سەربەرز، بە شکۆوە یادی قوربانیدانی پێشمەرگە قارەمانەکان دەکەینەوە کە گیانی خۆیان لە پێناو پاراستنی ئاسایش و سەقامگیریدا بەخت کرد، هەروەها هیوای چاکبوونەوەی خێرا بۆ بریندارەکان دەخوازین.
سەرۆکایەتی کۆمار جەخت دەکاتەوە کە هێزەکانی پێشمەرگە هەمیشە کۆڵەکەیەکی سەرەکی بوون لە سیستمی بەرگریی نیشتمانیدا و بەشداریکی کاریگەریان هەبووە لە بەرەنگاربوونەوەی تیرۆر و چەسپاندنی ئاسایش و سەقامگیری.
لەکاتێکدا داوای پێویستیی ڕێزگرتن لە سەروەریی عێراق و ڕەتکردنەوەی هەموو جۆرە دەستدرێژییەک دەکەین کە هێزە ئەمنییەکان دەکاتە ئامانج، جەختیش دەکەینەوە سەر گرنگیی بەهێزکردنی هەماهەنگی و هاوکاری نێوان هەموو هێزە نیشتمانییەکان، بەو شێوەیەی کە ئاسایشی وڵات بپارێزێت و خوێنی ڕۆڵەکانی بپارێزێت.
سەرۆکایەتی کۆمار
٢٤ی ئاداری ٢٠٢٦
قوباد تاڵەبانی، جێگری سەرۆکی ئەنجومەنی وەزیرانی هەرێم لە پەیامێکدا دەڵێت: بە توندی ئیدانەی بە ئامانجگرتنی هێزی پێشمەرگەی کوردستان دەکەین و ئەم هێرشە بە پێشێلکردنی سەروەری خاکی عێراق و هەرێمی کوردستان و پێچەوانەی بنەماکانی دراوسێیەتی باش دەزانین.
دەقی پەیامەکە
لەگەڵ ئەوەی هەر لە دەستپێکی ئەم جەنگەوە، بە راشکاوی هەڵوێستی خۆمان بۆ هەموو لایەک روون کردەوە کە هەرێمی کوردستان و هێزی پێشمەرگەی کوردستان بەشێک نییە لەم جەنگە، کەچی بە داخەوە لەم ماوەیەدا هەرێمی کوردستان بە دەیان جار کراوەتە ئامانج و لە دواین حاڵەتیشدا بەهۆی هێرشی موشەکییەوە لە سنووری سۆران، شەش پێشمەرگەی کوردستان شەهید و ژمارەیەکیش برینداربوون.
بە توندی ئیدانەی بە ئامانجگرتنی هێزی پێشمەرگەی کوردستان دەکەین و ئەم هێرشە بە پێشێلکردنی سەروەری خاکی عێراق و هەرێمی کوردستان و پێچەوانەی بنەماکانی دراوسێیەتی باش دەزانین.
لە کۆتاییدا پرسە و سەرەخۆشی خۆمان ئاراستەی خانەوادە و کەسوکاری هەر شەش شەهیدەکە دەکەین و هیوای چاکبوونەوەی خێراش بۆ بریندارەکان دەخوازین.
قوباد تاڵەبانی ئیدانەی هێرشکردنە سەر هێزەکانی پێشمەرگە دەکات و دەڵێت: هەرێمی کوردستان بەشێک نییە لەو شەڕەی لە ناوچەکەدا هەیە.
قوباد تاڵەبانی، جێگری سەرۆکی حکومەتی هەرێم لە لێدوانێکی رۆژنامەوانیدا رایگەیاند، ئیدانەی ئەو هێرشە نایاساییانە دەکەن کە کرایە سەر هێزەکانی پێشمەرگە لە سۆران و بووە هۆی شەهیدبوونی شەش پێشمەرگە.
وتیشی، پرسە و سەرەخۆشی لە کەسوکاری ئەو پێشمەرگە قارەمانانە دەکەم کە شەهیدبوون.
ئاماژەی بەوەکرد، هەرێمی کوردستان بەشێک نییە لەم جەنگە و لە داهاتووشدا بە بێلایەنی دەمێنێتەوە.
جێگری سەرۆکی حکومەتی هەرێم دەشڵێت، هەموو هەوڵێکیان بۆ هێورکردنەوەی رەوشەکە و دوورخستنەوەی هەرێمە لە ئاڵۆزییەکان.
قوباد تاڵەبانی ئەوەشی خستەڕوو، لەم رەوشەدا پێویستە هەموو لایەنەکان یەکڕیز و یەکدەنگ بن، نابێت ناکۆکییەکانی نێوان لایەنەکان درزێک دروستبکات نەیارەکان وەکو هەلێک بیقۆزنەوە.
بارەگاکانی فیرقەی 5 و 7ـی هێزی پێشمەرگە لە سنوری سۆران کەوتنەبەر هێرشی موشەکی و بەو هۆیەشەوە ژمارەیەک پێشمەرگە شەهید بوون.
وەزارەتی پێشمەرگە رایگەیاند، بەرەبەیانی ئەمڕۆ بارەگاکانی فیرقەی 5 و 7 لە سنووری سۆران بە شەش موشەکی بالیستی کرانە ئامانج. بەپێی راگەیەندراوەکە، لە ئەنجامی ئەم هێرشە رەسمییەدا ٦ پێشمەرگە شەهید بوون و 30 پێشمەرگەی تر بریندار بوون کە برینی هەندێکیان سەختە.
ئاماژەی بەوەکرد، ئەم هێرشە تیرۆریستیانە بە توندترین شێوە شەرمەزار دەکەن و مافی بەرپەرچدانەوەی هەر دەستدرێژییەکیان هەیە. جەختیشیان کردەوە کە پێویستە فشار بخرێتە سەر لایەنی هێرشبەر بۆ ئەوەی چیتر خاک و گەلی هەرێمی کوردستان نەکەنە ئامانج.
وەزارەتی پێشمەرگە داوای لە حکومەتی فیدراڵ و کۆمەڵگەی نێودەوڵەتی کرد سنورێک بۆ ئەم هێرشانە دابنێن و چیتر بەرانبەر ئەم دەستدرێژییانە بێدەنگ نەبن.
میدیاکانی ئیسرائیل ئاشکرایانکرد، ئێران رەزامەندی لەسەر دەستپێکردنی دانوستان لەگەڵ ئەمریکا دەربڕیوە.
رۆژنامەی "یەدیعۆت ئەحرەنۆت"ی ئیسرائیلی لە راپۆرتێکدا ئاشکرایکرد، گۆڕانکارییەکی جیاواز لە هەڵوێستی تاراندا ەویداوە و باڵاترین دەسەڵاتی ئێران رەزامەندی لەسەر دەستپێکردنی دانوستانی راستەوخۆ لەگەڵ واشنتۆن دەربڕیوە.
عەباس عراقچی، وەزیری دەرەوەی ئێران، بە نهێنی ستیڤ ویتکۆف، نێردەی تایبەتی ئەمریکای ئاگادار کردووەتەوە کە موجتەبا خامنەیی، رابەری نوێی ئێران، رەزامەندی نیشانداوە بۆ ئەنجامدانی دانوستان و گەیشتن بە رێککەوتن.
رۆژنامەکە ئەوەشی خستووەتەڕوو، رابەری نوێی ئێران خواستی خۆی بۆ کۆتاییهێنانی خێرا بە جەنگ دەربڕیوە، بەڵام بەپێی ئەو مەرجانەی کە تاران دەستنیشانیان دەکات.
ئەم پێشهاتە لە کاتێکدایە کە دۆناڵد ترەمپ، سەرۆکی ئەمریکا، بە شێوەیەکی کتوپڕ بڕیاریدا بۆ ماوەی پێنج رۆژ هەر هێرشێکی سەربازی بۆ سەر وێستگەکانی وزەی ئێران دوابخات، ئەمەش دوای ئەوەی پێشتر مۆڵەتی 48 سەعاتی دابوو بە تاران بۆ کردنەوەی گەرووی هورمز.
لە ئەنجامی هاتنی نزمەپاڵەپەستۆیەکی بارانبارین، رەوشی ئاسمان دەگۆڕێت و پێشبینی دەکرێت لە زۆربەی ناوچەکان باران بە رێژەی جیاواز ببارێت.
بەڕێوەبەرایەتی گشتی کەشناسی و بوومەلەرزەزانی هەرێم رایگەیاند، ئەمڕۆ سێشەممە ئاسمانی هەرێم دەبێتە هەوری تەواو و شەپۆلێکی بارانبارین سەرەتا لە کەرکوک و گەرمیانەوە دەست پێدەکات و پاشان تەواوی ناوچەکانی تر دەگرێتەوە.
ئاماژەی بەوەشکرد، بۆ سبەی چوارشەممە بارانبارین بەردەوام دەبێت و لە هەندێک شوێن بە لێزمە دەبارێت، هەروەها پلەکانی گەرما بەراورد بە رۆژانی رابردوو نزم دەبنەوە.
چاوەڕوان دەکرێت ئەم شەپۆلە تا بەیانی رۆژی پێنجشەممە بەردەوام بێت و لە ناوچە شاخاوییە سنورییەکانیش بەفرێکی کەم ببارێت.
بەرزترین پلەکانی گەرمای پێشبینیکراو بۆ ئەمرۆ:
هەولێر 18 پلەی سیلیزی
پیرمام 15 پلەی سیلیزی
سۆران 15 پلەی سیلیزی
حاجی ئۆمەران 8 پلەی سیلیزی
سلێمانی 16 پلەی سیلیزی
چەمچەماڵ 18پلەی سیلیزی
دهۆک 16 پلەی سیلیزی
زاخۆ 16 پلەی سیلیزی
هەڵەبجە : 16 پلەی سیلیزی
گەرمیان : 19 پلەی سیلیزی
لیژنەی خاچی سوری نێودەوڵەتی هۆشداری دەدات لە رەوشی رۆژهەڵاتی ناوەڕاست و دەڵیت ئەگەر رەوشەكە بەم شێوەیە بەردەوام بێت دەگاتە خاڵی نەگەڕانەوە.
میریانا سپۆلیاریتش سەرۆكی لیژنەی نێودەوڵەتی خاچی سور رایگەیاندووە، بە ئامانجگرتن و لەناوبردنی ژێرخانی وزە و سەرچاوەكانی ئاو و چاودێری تەندروستی لە رۆژهەڵاتی ناوەڕاست، هەڕەشەیەكی گەورەیە و دەكرێت رەوشەكە بگەیەنێتە خاڵێك گەڕانەوەی نەبێت.
وتیشی، گەورەترین سەرچاوەی نیگەرانیی ئەو زیانەیە كە پێدەچێت بەر دامەزراوە ئەتۆمییەكان بكەوێت، چونكە زیانێكی لێدەكەوێتەوە كە دواتر چاككردنەوەی ئەستەم دەبێت.
لە 28ی شوباتی رابردووەوە هێرشی ئیسرائیل و ئەمریكا بۆسەر ئێران دەستیپێكردووە و لە بەرانبەریشدا ئێران لە رێی موشەك و درۆنەوە بەرژوەندییەكانی ئەو دوو وڵاتەی لە ناوچەكە كردووەتە ئامانج.
ئەنجومەنی هاریكاری كەنداو دوپاتیدەكاتەوە هەر رێككەوتنێك لەگەڵ ئێران بكرێت، دەبێت داواكاریی وڵاتانی كەنداویش لەخۆبگرێت.
جاسم بدێوی، ئەمینداری گشتی ئەنجومەنی هاریكاری كەنداو رایگەیاند، هێرشەكانی ئێران بۆسەر وڵاتانی كەنداو بە موشەك و درۆن، كاریگەری گەورەی لەسەر پەیوەندییەكانیان دروستكردووە و خاڵێكی وەچەرخان و گەورە بوو نەك تەنها لەسەر ئاستی ئاسایشی نەتەوەیی، بەڵكو لەسەر ئاستی ئاسایش و سەقامگیری جیهانییش، داخستنی گەروی هورمزیش لەلایەن ئێرانەوە شۆكێكی گەورە بوو بۆ ئابوری جیهان.
لەبارەی رێككەوتنیش لەگەڵ ئێران دەڵێت، هەر رێككەوتنێك لەگەڵ ئێران بكرێت، دەبێت وڵاتانی ئەنجومەنی هاریكاری كەنداو رۆڵێكی بەرچاویان هەبێت لە داڕشتنی و داواكارییەكانیشیان لە خۆبگرێت.
بنیامین ناتانیاهۆ سەرۆک وەزیرانی ئیسرائیل پەیامێکی ڤیدیۆیی بڵاوکردەوە و تێیدا دەڵێت: هێرشەکانیان بۆسەر ئێران بەردەوام دەبێت و بەرنامەی ئەتۆمییەکەشی لەناودەبەن
وتیشی، دۆناڵ ترەمپ سەرۆکی ئەمریکا دەوێت رێککەوتنێک ئەنجام بدات کە ئامانجەكانی شەڕ بەدیبهێنێت و دەشیەوێت بەرژەوەندییەکانی ئەمریکا و ئیسرائیلیش بپارێزێت.