میدیاکانی سوریا، ئەمڕۆ شەممە، وردەکاریی رێککەوتنی ئاگربەستیان لە پارێزگای سوەیدا ئاشکرا کرد، ئەمەش دوای چەند رۆژێک دێت لە پەرەسەندنی گرژییەکان، کە هێرشی ئاسمانیی ئیسرائیلیشی بۆ سەر دیمەشق و پێگە سەربازییەکانی سوریا لەخۆگرتبوو بۆ "پاراستنی کەمینەی درووزەکان".

تۆم باراک، نێردەی تایبەتی ئەمریکا بۆ کاروباری سوریا رایگەیاند: سوریا و ئیسرائیل لەسەر ئاگربەست لە سوەیدا رێککەوتوون، هەروەها بنیامین ناتانیاهۆ سەرۆک وەزیرانی ئیسرائیل و ئەحمەد شەرع سەرۆکی سوریا، بە پشتیوانی ئەمریکا، تورکیا، ئوردن و وڵاتانی دراوسێ لەسەر ئاگربەستەکە رێککەوتوون.

نێردە ئەمریکییەکە داوای لە درووز و بەدەوییەکان و پێکهاتەکانی دیکە کردووە چەکەکانیان دابنێن و پێکەوە کاربکەن بۆ بنیاتنانی سوریایەکی نوێی یەکگرتوو.

راگەیاندنی ئاگربەستەکە لە کاتێکدایە کە پێکدادانەکان لە سوەیدا بەردەوامە و بووەتە هۆی ئاوارەبوونی دەیان هەزار کەس لە ناو قەیرانێکی مرۆیی پەرەسەندوودا. پێشتر هێزەکانی حکومەت دوای رێککەوتنێکی ئاگربەست لەگەڵ گروپە درووزییەکان، لە پارێزگاکە کشابوونەوە.

هەڵوێستی سەرۆکایەتیی سوریا:

پێشتر سەرۆکایەتیی سوریا رایگەیاندبوو کە لایەنە پەیوەندیدارەکان کاردەکەن بۆ ناردنی هێزێکی تایبەتمەند بۆ کۆتاییهێنان بە پێکدادانەکان لە سوەیدا و چارەسەرکردنی ناکۆکییەکە بە شێوەیەکی ژیرانە. ئەمەش هاوتەریبە لەگەڵ رێوشوێنی سیاسی و ئەمنی کە ئامانج لێی چەسپاندنی سەقامگیری و گەڕاندنەوەی ئارامییە بۆ سوەیدا لە زووترین کاتدا.

سەرۆکایەتیی سوریا روداوەکانی باشوری وڵاتی بە دەرئەنجامی "زیادبوونی گروپە چەکدارە دەرچووە لە یاساکان" وەسف کرد کە چەکیان وەک ئامرازێک بۆ سەپاندنی ئەمری واقیع بەکارهێناوە. هەروەها جەختی لەوە کردەوە کە هێرشکردنە سەر خێزانە ئارامەکان و ترساندنی منداڵان و پێشێلکردنی کەرامەتی خەڵک، بە هەموو پێوەرێک سەرکۆنە و ڕەتکراوەیە.

خاڵە سەرەکییەکانی رێککەوتنی ئاگربەست لە سوەیدا:

• گەڕانەوەی دامەزراوە ئیداری و ئەمنییەکانی دەوڵەت بۆ پارێزگای سوەیدا.

• تێکەڵکردنی ئەندامانی گروپە چەکدارەکانی پارێزگاکە لەگەڵ دەزگا ئەمنییەکانی دەوڵەت.

• رادەستکردنی چەکی قورس و مامناوەند لەلایەن بەدەوی و درووزەکانەوە.

• بەشداریکردنی درووزەکان لە داهاتووی سیاسیی وڵات لە قۆناغی داهاتوودا.

• رێگەدان بەو کەسانەی رێککەوتنەکە رەتدەکەنەوە، لە رێگەیەکی ئارامەوە وڵات بەجێبهێڵن.

• لێپرسینەوە لە ئەنجامدەرانی پێشێلکارییەکان لە هەردوو لایەنی بەدەوی و درووز بەپێی یاسا.

• راسپاردنی ئەندامانی گروپە چەکدارەکانی سوەیدا بە هاوکاریکردنی یەکەکانی دیکە بۆ پاراستنی ئاسایشی ناوخۆی پارێزگاکە.

بەیانی ئەمڕۆ شەممە، میدیاکانی سوریا بڵاویانکردەوە کە هێزەکانی ئاسایشی گشتیی سوریا بەرەو شاری سوەیدا جوڵەیان پێکراوە بۆ کۆنترۆڵکردنی ئاسایش و جێبەجێکردنی خاڵەکانی رێککەوتنەکە، بەڵام دواتر وەزارەتی ناوخۆی سوریا ئەو هەواڵەی رەتکردەوە.

مەکتەبی سیاسی یەکێتی نیشتمانی کوردستان بەبۆنەی کۆچی دوایی (حاجی کەریم مام شریف شاناخسێی) باوکی عومەر کەریم، ئەندامی بۆردی مەکتەبی راگەیاندن و هۆشیاری پەیامێکی هاوخەمی بڵاوکردەوە.

 لە پەیامەکەدا هاتووە؛ "بۆ کۆچی دوایی (حاجی کەریم مام شریف شاناخسێی) باوکی بەڕێزتان لەناخی دڵەوە پرسەو ماتەمی خۆمان ئاڕاستەی کەسوکار و خانەوادە تێکۆشەر و بەڕێزەکەتان دەکەین.

لە یەزدانی مەزن داواکارین رۆحی کۆچکردوو بە بەهەشتی بەرین شادبکات و ئارامی بە گشت لایەک ببەخشێت.

پەیامنێری کوردسات نیوز باسی لەوەکرد، بەهۆی کێشەی زەوی و زارەوە لە گوندێکی ناحیەی قادرکەرەمی سەر بە قەزای چەمچەماڵ دوو کەس کوژران.

پەیامنێری کوردسات نیوز ئاماژەی بەوەشکرد، شەڕەکە لەنێوان دوو بنەماڵەدا دروست بووە کە خزمی یەکترن و بەهۆی گرفتی زەوی زارەوە بووە.

روونیشیکردەوە، روداوەکە بە جۆرێک بووە، سەرەتا کەسێک کوژراوە و دوو تۆمەتبارەکە هەڵهاتوو، دواتر کەسوکاری کوژراوەکە تۆمەتبارەکانیان لە گوندێکی دیکە دۆزیوەتەوە و تەقەیان لێکردوون، بەهۆیەوە یەکیان گیانی لەدەستداوە و ئەوەی دیکە بریندار بووە.

وتیشی، لە ئێستادا هێزە ئەمنییەکان لێکۆڵینەوەیان لە روداوەکە دەست پێ کردووە و ئەو کەسەشی بریندارە، دەستبەسەر کراوە.

کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکردووە، پلەکانی گەرما بەرز دەبنەوە.

کەشناسیی هەرێم رایگەیاند، ئەمڕۆ هەینی، ئاسمان ساماڵ دەبێـت و پلەکانی گەرما کەمێک بەرزتر دەبنەوە بەراورد بە دوێنێ.

ئاماژەی بەوەشکردووە، سبەینێ شەممە، بە گشتی ئاسمان ساماڵ دەبێت و پلەکانی گەرما بە هەمان شێوە 1 بۆ 2 پلەی دیکە بەرزتر دەبنەوە.

بەرزترین پلەکانی گەرمای پێشبینیکراو بە پلەی سیلیزی بۆ سبەینێ:

هەولێر :  43 پلەی سیلیزی 

سلێمانی : 42 پلەی سیلیزی

دهۆک :  42  پلەی سیلیزی

کەرکوک : 45 پلەی سیلیزی 

زاخۆ  :  43 پلەی سیلیزی

هەڵەبجە : 43 پلەی سیلیزی

سۆران :  41 پلەی سیلیزی

حاجی ئۆمەران : 32 پلەی سیلیزی

گەرمیان : 46  پلەی سیلیزی

روانگەی سوری بۆ مافەکانی مرۆڤ بڵاویکردەوە، لە سەرەتای توندوتیژییەکانی شاری سوەیداوە تاوەکو ئێستا نزیکەی 600 کەس کوژراون، کە بەشێکی زۆریان ژن و منداڵن.

روانگەی سوری بۆ مافەکانی مرۆڤ رایگەیاند، لە سەرەتای سەرهەڵدانی توندوتیژییەکان پارێزگای سوەیدا لە 13ی ئەم مانگەوە تاوەکو 16ی تەممووز، کە گرژی و ئاڵۆزی لەنێوان هۆزەکانی سوریا و گروپە چەکدارییە ناوخۆییەکان و هێزە ئەمنییەکاندا رویداوە، 597 کەس کوژراون.

ئاماژەی بەوەشکردووە، بەهۆی گرژی و پێکدادانەکانەوە بە دەیان هاووڵاتی مەدەنیش کوژراون کە ژن و منداڵیان تێدایە.

بەپێی ئاماری روانگەی سوری لەو ژمارەیەی کوژراون:

-71یان هاووڵاتی مەدەنی سوەیدان؛ کە چواریان منداڵ و چواری دیکەیان ژنن.

-275 کەسیان سەر بە هێزەکانی وەزارەتی بەرگریی و ئاسایشی گشتیی سوریان.

-15یان سەر بە هێزەکانی ناوخۆن.

-سێ کەسی دیکەیان ناسنامەکانیان نەناسراوەتەوە.

-یەک راگەیەندکار.

-83 هاووڵاتی مەدەنی دیکە بە ئاشکرا تەقەیان لێکراوە لەلایەن هێزەکانی سەر بە وەزارەتی بەرگریی و ناوخۆ، کە ژن و بەساڵاچوو لەنێوانیاندا بووە.

-هەروەها سێ کەسی دیکە کە دوانیان ژن و منداڵن، لە چەکدارانی سەر بە هۆزەکان.

قوباد تاڵەبانی، جێگری سەرۆکوەزیران لەگەڵ لیو جیون، کونسوڵی گشتیی چین لە هەرێمی کوردستان کۆبووەوە و پێکەوە لەبارەی چەند پرسێکی جێی بایەخی هەردوولا گفتوگۆیان کرد.

لە کۆبوونەوەکەدا کە ئەمڕۆ پێنجشەمە بەڕێوەچوو، قوباد تاڵەبانی سوپاسی هاوکارییەکانی حکومەتی چینی کرد بۆ هەرێمی کوردستان، بە تایبەت لەروی پەرەپێدانی توانا مرۆییەکان و گەشەپێدانی ئابورییەوە.

هیوای خواست لە داهاتوودا کاری زیاتر بکرێت بۆ ئەوەی ژمارەیەکی زیاتر لە هاوڵاتییانی هەرێم سودمەند بن لە بەرنامەی پەرەپێدانی تواناکان.

لە بەشێکی دیکەی کۆبوونەوەکەدا باس لە پەیوەندییەکانی هەرێم و بەغدا کرا. جێگری سەرۆکوەزیران رێککەوتنی هەرێم و بە‌غدا لەبارەی چارەسەرکردنی کێشەی موچە و هەناردەکردنەوەی نەوتی بۆ کونسوڵی چین روونکردەوە و جەختی کردەوە کە حکومەتی هەرێم ئامادەیە هەموو کێشەکان بەپێی دەستور لەگەڵ بەغدا چارەسەر بکات.

وەزارەتی ئاوەدانكردنەوەو نیشتەجێكردن رایگەیاند، رۆژی پێنج شەممەی داهاتوو یەكەكانی نیشتەجێبون بەسەر كرێنشین و كەمدەرامەتان دابەشدەكرێت.

وەزارەتی ئاوەدانكردنەوەو نیشتەجێكردن لە راگەیەنراوێكدا ئاماژەی بۆ ئەوەكردووە، رۆژی پێنجشەممەی داهاتوو، لە رێورەسمێكدا وەزارەتەكەیان، ناوی سودمەندان رادەگەیەنێت بۆ وەرگرتنی یەكەكانی نیشتەجێبوون و دواتر بەرەسمی بانگهێشتدەكرێن بۆ ئەنجامدانی گرێبەستی وەرگرتنی یەكەكانی نیشتەجێبون.

راشیگەیاند، ژمارەی یەكەكان زیاتر لە نۆ هەزار یەكەی نیشتەجێبونە لەسەرجەم شارەكانی هەرێمی كوردستان، بەشێكیان لە قۆناغی كۆتاییدان و بەشێكیان كاركردن تیایاندا بەردەوامە، سەرجەم یەكەكان دابەش دەكرێن بەوانەشی كە لەئێستادا تەواو نەكراون، بۆ ئەوەی خێزانی سودمەندبوو دڵنیا بێت لەوەی كە یەكەیەك كراوە بە ناویەوەو هەركات تەواوكرا تیایدا نیشتەجێ دەبێت.

لەرابردودا زیاتر لە (25)هەزار خێزان فۆرمی یەكەی نیشتەجێبونیان بەشێوەی ئۆنلاین پڕكردەوە، دواتر پرۆسەی وردبینی و جیاكردنەوەی ناوەكان بە خاڵبەندی ئەنجامدرا، یەكەكان بە قیستی درێژخایەن و بەبێ پێشەكی دەدرێت بە خێزانەكان و بەقیستی مانگانە و بە ماوەی 25 ساڵ پارەكەیان لێوەردەگیرێتەوە. 

خالید شوانی وەزیری دادی عیراق بە کوردسات نیوزی راگەیاند، سەردانەکەی بافڵ جەلا تاڵەبانی لێکتێگەیشتنەکەی گەیاندە ئەنجام.

خالید شوانی وەزیری دادی عیراق بە کوردسات نیوزی راگەیاند: لە دوو هەفتەی داهاتوودا دەستبە هەناردەکردنەوەی نەوتی هەرێم دەکرێت، هەروەها سەردانەکەی بافڵ جەلا تاڵەبانی لێکتێگەیشتنەکەی گەیاندە ئەنجام.

ئاماژەی بەوەشدا: بافڵ جەلال تاڵەبانی بەناوی هەموو کوردستانەوە لێکتێگەیشتنی لەگەڵ عیراق کردووە.

خالید شوانی: لێكتێگەیشتنی نێوان هەرێم و عیراق پێویستی بە هاودەنگی سیاسی بوو، هەروەها هەردوو حكومەتی هەرێم و عیراق پابەند كراون بە رێككەوتنەكە و حكومەتی هەرێم مانگانە 230 هەزار بەرمیل نەوت بە عیراق دەدات، هەروەها هەرێم 50 هەزار بەرمیل نەوت بۆ پێداویستی ناوخۆ بەرهەم دەهێنێت.

وەزیری دادی عیراق وتیشی: رێككەوتنەكە بنەمایەكە بۆ چارەسەری كێشەكان و ناردنی موچە بە بەردەوامی، هەروەها موچە مافی یاسایی و دەستووری موچەخۆرانە.

خالید شوانی سەبارەت بە موچەی مانگەکانی دیکە رایگەیاند: موچەی پێنج و شەش و مانگەكانی تریش بۆ موچەخۆران خەرج دەكرێت و رێككەوتنەكە دەبێت بە بنەما بۆ یاسای نوێی بودجەی لە عیراق، هەروەها رۆژی یەکشەممە تەمویلی موچەی مانگی پێنجی هەرێم دەکرێت.

محەمەد شیاع سودانی سەرۆحک وەزیرانی عیراق سوپاسی بافڵ جەلال تالەبانی دەکات و دەڵێت، "رۆڵی گرنگی بینیوە لە رێککەوتنی نێوان هەولێر و بەغداد".

ئەنجومەنی وەزیرانی عیراق ئەمڕۆ پێنجشەممە 17ـی 7ـی 2025، کۆبوونەوەیەکی نائاسایی ئەنجامدا کە تایبەت بوو بە پرسی موچە و نەوت و رێککەوتنی نێوان هەولێر و بەغداد.

لە سەرەتای کۆبوونەوەکەدا، سەرۆک وەزیرانی عیراق سوپاسی بافڵ جەلال تاڵەبانی کردووە و وتویەتی، "بافڵ جەلال تاڵەبانی سەرۆکی یەکێتیی نیشتمانیی کوردستان رۆڵی گرنگی بینیوە لە نزیکبوونەوەی هەولێر و بەغداد و ئەنجامدانی رێککەوتن".

ئەمە لەکاتێکدایە کە لە چەند رۆژی رابردوودا، بافڵ جەلال تاڵەبانی سەرۆکی یەکێتیی نیشتمانیی کوردستان، سەردانی بەغدادی کرد و چەند کۆبوونەوەیەکی گرنگی ئەنجامدا، دوابەدوای کۆبوونەوەکانی سەرۆکی یەکێتی، رێککەوتن لەنێوان هەولێر و بەغداد ئەنجامدرا.

بەپێی زانیارییەکانی کوردسات نیوز، رێککەوتنەکە تا رۆژی 31ـی 12ـی 2025 بەردەوام دەبێت، هەروەها لیژنەیەک لە حکومەتی هەرێم و بەغداد پێکهاتوون و بەمزووانە هەناردەکردنەوەی نەوتی هەرێم دەست پێ دەکات. لە چەند رۆژی داهاتووشدا بڕیار لە خەرجکردنی موچەی مانگی شەشی هەرێم دەدرێت.

سەرۆک کۆماری عیراق پرسە و سەرەخۆشی ئاراستەی کەسوکاری قوربانیانی روداوەکەی پارێزگای واست کردووە و داواش لە لایەنە پەیوەندیدارەکان دەکات، بە دڵنیابوونەوە لە جێبەجێکردنی رێکارەکانی سەلامەتی لەکاتی دروستکردنی باڵەخانەکاندا، رێگە نەدەن ئەو جۆرە روداوانە دووبارە ببنەوە.

د. لەتیف رەشید سەرۆک کۆماری عیراق رایگەیاندووە، "بەداخەوە هەواڵی ئەو روداوە بەئازارەی پارێزگای واستمان پێگەیشت، پرسە و سەرەخۆشی خۆمان ئاراستەی کەسوکاری قوربانییەکان دەکەین، هیوادارین خودا ئارامییان پێببەخشێت و شیفای بریندارەکانیش بدات".

سەرۆک کۆمار جەختی لە لێکۆڵینەوە بۆ دۆزینەوەی هۆکاری روداوەکە و لێپرسینەوە لەو کەسانەی کەمتەرخەمبوون؛ کردووەتەوە.

داواشی لە لایەنە پەیوەندیدارەکان کردووە، بەدواداچوون بکەن بۆ دڵنیابوونەوە لە جێبەجێکردنی رێکارە پیشەییە سەلامەتەکان لە باڵەخانەکاندا، بۆ ئەوەی رێگربن لە دووبارەبوونەوەی روداوی بەئازاری لەو جۆرە".

وەزارەتی ناوخۆی عیراق رایگەیاند، لە روداوی ئاگرەکەی پارێزگای واستدا 61 کەس گیانیان لەدەستداوە، کە زۆرینەیان بەهۆی دوکەڵەوە خنکاون، تەرمی 14 کەسیش بەهۆی زۆری رێژەی سوتانەوە ناناسرێتەوە.

وەزارەتی ناوخۆی عیراق رایگەیاند، ئەو مۆڵەی ئاگرەکەی تێدا کەوتووەتەوە تەنها حەوت رۆژە کراوەتەوە و لە پێنج نهۆم پێکهاتووە، کە هایپەرمارکێت و چێشتخانەی تێدا بووە.

ئاماژەی بەوەشکردووە، بەهۆی ئاگرەکەوە 61 کەس گیانیان لەدەستداوە، کە زۆرینەیان بەهۆی دوکەڵەوە خنکاون، تەرمی 14 کەسیش بەهۆی زۆری رێژەی سوتانەوە ناناسرێتەوە، هەروەها توانراوە 45 کەس رزگار بکرێن.

ئەوەشی خستووەتە روو، لە ئێستادا لیژنەیەک بۆ لێکۆڵینەوە لە روداوەکە و هۆکار و چۆنێتی سەرهەڵدانی ئاگرەکە دروستکراوە و لەوە دەکۆڵنەوە و دوای تەواوبوونی راپۆرتی لیژنەکە و گەشتنە ئەنجامی لێکۆڵینەوەکان، لێپرسینەوە لەو کەس و لایەنە دەکرێت کە کەمتەرخەم بووە و بەرپرسیارە لە روداوەکە.

بەیانی ئەمڕۆ ئاگر لە مۆڵێکی پارێزگای واست کەوتەوە و بەهۆیەوە تاوەکو ئێستا 61 کەس گیانیان لەدەستداوە.

بە دەستڕێژی گوللـە بەڕێوەبەری ناحیەی دارەتوو و کەسێکی دیکە بریندار کران.

نێچیرڤان فەخرەدین بەرپرسی راگەیاندنی تەندروستیی ئاکرێ بە کوردسات نیوزی راگەیاند، نزیکەی سەعات 9:00ی بەیانی ئەمڕۆ دوو بریندار گەیەنراونەتە فریاکەوتنی ئاکرێ کە یەکێکیان تەحسین عیسمەتی بەڕێوەبەری ناحیەی دارەتووی سەر بە قەزای بەردەڕەشی سنوری پارێزگای دهۆک بوو.

روداوەکە سەعات 8:00ی بەیانی ئەمڕۆ پێنجشەممە رویداوە و بەڕێوەبەری ناحیەی دارەتوو لە سەرەی نانکڕێندا بووە.

ئاماژەی بەوەشکرد، بریندارەکان شوێنەواری گوللـە بە جەستەیانەوە بووە و تەحسین عیسمەت سێ گوللـەی پێوە بووە.

وتیشی، ئەوەی دیکەشیان کە بریندار بووە کرێکارێک بووە لە نزیک روداوەکە بووە و یەک گوللـەی بەرکەوتووە.

هێشتا هیچ کام لە لایەنە ئەمنییەکان روونکردنەوەی رەسمیان لەسەر روداوەکە بڵاونکردووەتەوە.

وەزیری دەرەوەی ئەمریكا رایگەیاند، لەگەڵ لایەنە ناكۆكەكانی سوریا رێككەوتوون لەسەر چەند هەنگاوێك بۆ كۆتاییهێنان بە ئاڵۆزییەكانی سوەیدا و ئەمرۆش ئەنجومەنی ئاسایشی نێودەوڵەتی لەبارەی سوریاوە كۆدەبێتەوە. 

ماركۆ رۆبیۆ وەزیری دەرەوەی ئەمریكا رایگەیاندووە، پێشكەوتنێكی باش هەیە لە چارەسەركردنی ئالۆزییەكان لە باشوری سوریا و لەگەڵ هەموو ئەو لایەنانەی بەشدارن لەشەرو پێكدادانەكاندا پەیوەندییدان كردوە و رێككەوتون لەسەر چەند هەنگاوێك بۆ كۆتاییهێنان بەو رەوشە مەترسیدارە، داواشیكرد هەموو لایەنەكان پابەند بەو بەڵێنانەی داویانە . 

لەلایەكی تریشەوە ئەمرۆ ئەنجومەنی ئاسایشی نێودەوڵەتی سەبارەت بە بۆردومانەكانی ئیسرائیل بۆ سەر سوریا كۆدەبێتەوە  ، ئەوەش دوای ئەوەی حكومەتی دیمەشق داوای كرد كۆبونەوەیەكی بەپەلەی ئەنجومەنەكە رێكبخرێت و هێرشەكانی ئیسرائیل ئیدانە بكرێت و هێزەكانی ناچار بكرێن لە سوریا بكشێنەوە .

سەرۆكی سوریا ئیسرائیل تۆمەتبار دەكات بەنانەوەی ئاشوب لە ناوخۆی سوریادا، دەشڵێت دروزەكان بەشێكن لە هاوڵاتیانی وڵاتەكەیان، پاراستنیشیان لە پێشینەی كارەكانیانە.

لە یەكەم لێدوانیدا لە دوای رووداوەكانی ئەم دواییەی وڵاتەكەی، ئەحمەد شەرع، سەرۆكی سوریا، لە وتارێكدا كە بەرەبەیانی ئەمڕۆ پێشكەشی كرد، ئیسرائیلی تۆمەتبار كرد بە دروستكردنی ئاشوب لە ناوخۆی سوریادا، ئاماژەی بەوەشكرد، ئەو ئاشوبە بۆتە هۆی ئەوەی رەوشی پارێزگاری سوەیدا بەرەو ئالۆزی بڕوات.

شەرع راشیگەیاند، ئەوان  هەر هەوڵێك رەتدەكەنەوە كە ئامانج لێی دروستكردنی دووبەرەكی بێت لە ناو ریزەكانیاندا، بۆیە بڕیاریاریانداوە هێزە ناوخۆییەكان و پیاوانی ئایینی دروز بەرپرسیارێتی پاراستنی ئاسایش لە سوەیدا بگرنە ئەستۆ.

سەرۆك كۆماری سووریا وتیشی، ئێستا لەبەردەم دوو بژاردەدان، یان رووبەڕووی ئیسرائیل ببنەوە، یان چاكسازی لە بەرەی ناوخۆیاندا بكەن.

ئاماژەی بەوەشكرد، ئەوان لە شەڕ ناترسن، بەڵام لەگەڵ ئەوەشدا بەرژەوەندی سورییەكان لە پێشترە و نایانەوێت وڵاتەكە بەرەو شەڕێكی دیكەی ناوخۆی بەرنەوە.

وتیشی، لێپرسینەوە لەو كەسانە دەكەن كە سەرپێچییان لە دژی گەلی دروزەكانان كردووە و سوكایەتییان پێكردوون، نێوەندگیریی ئەمریكا، عەرەبی و توركیا نەبوایە ناوچەكە بەرەوە چارەنووسێكی نادیار دەرۆیشت.

بە سەرپەرشتی بافڵ تاڵەبانی، ئەنجومەنی سەركردایەتی یەكێتی لە سلێمانی لە كۆبونەوەدایە.

بەپێی زانیارییەكانی كوردسات نیوز، تەوەری سەرەكی كۆبوونەوەكە بۆ گفتوگۆكردنە لەبارەی ئەنجامی سەردانەكەی سەرۆكی یەكێتی بۆ بەغداد و ئەو لێكتێگەیشتنەی لە نێوان هەرێم و حكومەتی فیدڕاڵی هاتووەتە ئاراوە.

هەروەها لە كۆبونەوەكەدا دۆزینەوەی رێگەچارەی گونجاو بۆ چارەسەری یەكجاری كێشەی موچەی فەرمانبەرانی هەرێم و چەند پرسێكی پەیوەست بە هەرێم و ناوچەكە  تاوتوێ دەكرێت .