هەواڵەکان
بنیامین ناتانیاھۆ، سەرۆک وەزیرانی ئیسرائیل، لە چاوپێکەوتنێکدا لەگەڵ بەرنامەی 60 خولەکی کەناڵی CBSی ئەمریکی، باسی رەوشی موجتەبا خامنەیی، رێبەر باڵای ئێران کرد و رایگەیاند، کە ناوبراو لە ئێستادا لە حەشارگەدایە، بەڵام هیچکات ناتوانێت دەسەڵاتەکانی باوکی هەبێت.
ناتانیاھۆ لە وەڵامی پرسیارێکدا سەبارەت بەوەی ئاخۆ موجتەبا خامنەیی لە ژیاندا ماوە یان نا، وتی: "بە بڕوای من ئەو زیندوە، بەڵام دیاریکردنی رەوشی کارێکی ئەستەمە؛ ئەو هەوڵ دەدات دەسەڵات و هەژموون بەدەست بهێنێت، بەڵام هەرگیز ناتوانێت بگاتە ئەو ئاستە لە هێز و لایەنگرییەی، کە باوکی هەیبووە.
ناتانیاهۆ ئاماژەی بەوەش کرد، کە ململانێی موجتەبا خامنەیی بۆ دەسەڵات، بوەتە هۆی دروستبوونی درز و ئاڵۆزی زیاتر لە ناوخۆی پێکهاتەی دەسەڵاتی ئێراندا، ئەوەشی وەک پەرەسەندنێکی ئەرێنی لە قەڵەمداوە و وتویەتی ئە کێشەیە شتێکی خراپ نییە و باشە.
ناتانیاهۆ ئەوەشی خستوەتەڕوو بۆ کەناڵي ئەمریکییەکە، کە زیانێکی بەرچاویان بە تواناکانی ئێران گەیاندووە، بەڵام هێشتا کار ماوە ئەنجامی بدەن، چونکە تاران بەردەوامە لە پشتیوانیکردنی بریکارەکانی ناوچەکە و کار لەسەر بەرهەمهێنانی موشەکی بالیستیکی دەکات.
لەسەر دەنگۆی بوونی سەربازگەی نهێنی ئیسرائیل لە بیابانەكانی عیراق، ئەنجومەنی نوێنەران هەردوو وەزیری ناوخۆ و بەرگری بانگهێشت دەكات.
ماڵپەری "عەرەبی جدید" لە زاری لێپرسراوێكی باڵای حكومەتی عیراقەوە ئاشكرایكردووە، لەسەر ئەو دەنگۆیانەی بڵاوكراونەتەوە كە سەربازگەی نهێنی ئیسرائیل لە بیابانەكانی نوخێب لە عیراق هەیە، بە دیاریكراویش هەواڵەكەی رۆژنامەی "وۆڵ ستریت جۆرناڵ"ی ئەمریكی كە یەكەم رۆژنامە بوو ئەو دەنگۆیەی بڵاوكردەوە، ئەنجومەنی نوێنەرانی عیراق بڕیاریداوە هەردوو وەزیری ناوخۆ و بەرگری بانگهێشت بكات بە مەبەستی لێكۆڵینەوە لە راستی و دروستی ئەو دەنگۆیانە.
رائید مالكی ئەندامی ئەنجومەنی نوێنەرانی عیراقیش رایگەیاندووە، ئەمریكا لە كاتی جەنگی ئێراندا ئاسمان و خاكی عیراقی پێشكەشی ئیسرائیل كرد و فەرمانی بە عیراقیش كردبوو رادارەكانی سیستمی بەرگری ئاسمانیی و فڕۆكە لەكاربخات.
جەختیشیكردەوە، دروستكردنی سەربازگە لە بیابانەكانی عیراق لەلایەن ئیسرائیلەوە، پێشلكارییەكی گەورەیە و پێویستە لەسەر ئەو دۆسێیەش لێپرسینەوە لەگەڵ سەرجەم لایەنە ئەمنی و هەواڵگرییەكانی عیراقدا بكرێت.
لە چوارچێوەی رێككەوتنەكەی 29ی كانوونی دووەمی ئەمساڵ تائێستا هەزار و 523 زیندانی لەلایەن هەسەدە و حكومەتی سوریاوە ئازادكراون.
ئاژانسی هاوار نیوز بڵاویكردووەتەوە، لە چوارچێوەی رێككەوتنەكەی 29ی كانوونی دووەمی ئەمساڵ لە نێوان هێزەكانی سوریای دیموكرات (هەسەدە) و حكومەتی سوریا، تائێستا هەزار و 32 زیندانی لەلایەن حكومەتی سوریاوە ئازادكراون و 491 زیندانیش لەلایەن هێزەكانی هەسەدە و ئازادكراون، زیاتر لە 200 شەڕڤانیش ماونەتەوە و چاوەڕوانی ئازادكردنن.
ئاماژە بەوەشكراوە، لەگەڵ هەر هەنگاوێكی ئازادكردنی زیندانییەكان، كاروانێكی ئاوارەكانی عەفرینیش دەگەڕێنرێنەوە بۆ زێدی خۆیان، چاوەڕوانیش دەكرێت لە داهاتوویەكی نزیكدا بەشێكی تر لە زیندانییەكان ئازاد بكرێن.
قەتەر بەكارهێنانی گەروی هورمز وەك كارتی فشار لەلایەن ئێرانەوە بە هۆكاری گرژییەكان دادەنێت و رەتیشیدەكاتەوە سازش لەسەر ئازادیی دەریاوانی بكات.
وەزارەتی دەرەوەی قەتەر رایگەیاند، محەمەد بن عەبدولڕەحمان ئال سانی سەرۆك وەزیرانی ئەو وڵاتە لە پەیوەندییەكی تەلەفۆنیدا لەگەڵ عەباس عراقچی وەزیری دەرەوەی ئێران جەختیكردووەتەوە، داخستنی گەروی هورمز یان بەكارهێنانی وەك كارتێكی فشار، تەنها دەبێتە هۆی قووڵتركردنەوەی گرژیی و قەیرانەكان و مەترسیی دروستكردن لەسەر بەرژەوەندییەكانی وڵاتانی ناوچەكە.
ئاماژەی بەوەشكردووە، ئازادیی دەریاوانی بنەمایەكی جێگیرە و جێگەی سازش نییە، داخستنی گەروی هومزیش لێكەوتەی نەرێنیی هەبووە لەسەر دابینكردنی وزە و خۆراك بۆ جیهان و سەقامگیریی بازاڕەكان و دابینكردنی كاڵا جۆراوجۆرەكان.
بە ئامادەبوونی قوباد تاڵەبانی لە پارکی ئازادی شاری سلێمانی رێورەسمێک بەڕێوەچوو کە تێیدا رێزلێنان پێشکەشی چەند رۆژنامەنووسێک کرا.
قوباد تاڵەبانی جێگری سەرۆکی ئەنجومەنی وەزیرانی حکومەتی هەرێمی کوردستان رایگەیاند: سلێمانی ئازاترین شاری عیراقە و بێدەنگ ناکرێت.
جێگری سەرۆک وەزیران ئاماژەی بەوەشدا: راگەیاندکاران پارێزەری حەقیقەتن، ئەو کەسانەی خەڵک چەواشە دەکەن دوژمنی ئازادین و کۆمەڵگەی مەدەنی لە سلێمانی بەرانبەر هەڵەکان بێدەنگ نابێت.
قوباد تاڵەبانی ئەوەشیخستەڕوو: کەسانێک لە رەخنە دەترسن دوژمنی ئازادین، هەروەها روبەڕوی ئەو کەسانە دەبینەوە کە دژی ئازادی و رادەربڕینن.
نوێدەکرێتەوە...
دۆناڵد ترەمپ، سەرۆکی ئەمریکا، ئەمڕۆ یەکشەممە، جەختی کردەوە کە ئێران لە رووی سەربازییەوە تێکشکاوە، هاوکات روونیشی کردەوە کە ئۆپەراسیۆنە شەڕکەرەکان دژی ئێران کۆتایییان نەهاتووە.
ترەمپ لە لێدوانێکی رۆژنامەوانیدا رایگەیاند: لە قۆناغێکدا دەگەینە یۆرانیۆمی پیتێنراوی ئێران کە لە قووڵایی ژێر وێرانەکاندا نێژراوە و دەیخەینە ژێر چاودێرییەوە، هێزی بۆشایی ئاسمانی ئەمریکاش ئەرکی ئەو کارەی لە ئەستۆیە.
هەروەها وتی: هەرگیز ناتوانین رێگە بدەین ئێران ببێتە خاوەنی چەکی ئەتۆمی،"
و ئاماژەی بەوەش کرد: نەموتووە ئۆپەراسیۆنە شەڕکەرەکان دژی ئێران کۆتایییان هاتووە، بەڵکوو گوتم کە ئەوان تووشی شکست بوون.
لە بەردەوامی قسەکانیدا ترامپ وتی: ئێران نە هێزی دەریایی، نە هێزی ئاسمانی و نە چەکی دژە فڕۆکەی ماوە،"
تیشکی خستە سەر ئەوەش کە "سێ چینی سەرکردایەتی ئێران لەناو براون، بەڵام پێموایە ئێمە مامەڵە لەگەڵ کەسانێکدا دەکەین کە جۆرە هێزێکی دیاریکراویان هەیە.
لە مەزادێکی شارستانی دێربی شایەری بەریتانیا، بووکەڵەیەکی دارین کە مێژووەکەی بۆ سەرەتای سەدەی 19 دەگەڕێتەوە و بە "ترسناکترین بووکەڵەی جیهان" وەسف دەکرێت، بە بڕی 3هەزار پاوەند فرۆشرا.
بەرپرسانی مەزادەکە پێشبینییان دەکرد نرخەکەی تەنها نزیکەی 300 پاوەند بێت، بەڵام ئارەزووی کۆکەرەوەکانی شتومەکی کۆن بۆ خاوەندارێتی کردنی، نرخەکەی بۆ دە هێندە بەرز کردەوە و لە کۆتاییدا بە کۆکەرەوەیەکی تایبەت فرۆشرا.
ئەوەی جێی سەرنجە، بووکەڵە دارینەکە بە تەواوی جلی رەسەنی خۆی پاراستووە، ئەمەش بووەتە هۆی زیادبوونی بایەخی مێژوویی و سەرنجڕاکێشیی لای ئەو کەسانەی خولیای کۆکەرەوەی شتومەکەکانی سەدەی نۆزدەهەمن.
راپۆرتێکی رۆژنامەوانی ئاشکرای کردووە کە کۆریای باکوور دەستوورەکەی هەموار کردووەتەوە، بە شێوەیەک پابەندی دەکات بە وەشاندنی لێدانێکی ئەتۆمی تۆڵەسێنەرەوە لە ئەگەری کوشتنی "کیم جۆنگ ئون"ی رێبەری ئەو وڵاتە.
بەگوێرەی راپۆرتەکەی رۆژنامەی "تێلێگراف"ی بەریتانی، ئەم هەموارکردنە دەستوورییە لە میانی هەڵکشانی گرژییە جیهانییەکاندا هاتووە، دوای کوژرانی "عەلی خامنەیی" رێبەری ئێران و ژمارەیەک لە لێپرسراوانی ئەو وڵاتە لە هێرشێکی سەربازیدا کە سەرەتای ئەمساڵ تاران-ی کردە ئامانج.
هەموارکردنەکە لە 22ی ئازاردا و لە کاتی کۆبوونەوەی ئەنجومەنی گەلی باڵا لە پیۆنگ یانگ، کە بەرزترین دەسەڵاتی یاسادانان و دەستوورییە لە وڵاتدا، پەسەند کراوە.
هاوکات دەزگای هەواڵگریی کۆریای باشوور لێپرسراوانی باڵای حکومەتی وڵاتەکەی لە وردەکارییەکانی ئەم نوێکردنەوە دەستوورییە ئاگادار کردووەتەوە.
دەقە هەموارکراوەکە میکانیزمەکانی وەڵامدانەوە لە کاتی پەککەوتن یان بە ئامانجگرتنی سیستەمی سەرکردایەتی لە کۆریای باکور دیاری دەکات و تێیدا هاتووە: ئەگەر سیستەمی فەرماندەیی و کۆنترۆڵکردنی هێزە ئەتۆمییەکانی دەوڵەت بەهۆی هێرشی هێزە دوژمنەکانەوە رووبەڕووی مەترسی بێتەوە، لێدانێکی ئەتۆمی بە شێوەیەکی ئۆتۆماتیکی و دەستبەجێ ئەنجام دەدرێت.
کۆریای باکور پێشتریش چەند هەموارێکی تری دەستووریی ئەنجامداوە، لەوانە پێناسەکردنی سنوورەکانی لەگەڵ کۆریای باشور و سڕینەوەی هەر ئاماژەیەک بۆ یەکگرتنەوەی هەردوو کۆریا؛ ئەمەش رەنگدانەوەی سیاسەتی کیم جۆنگ ئون-ـە بۆ مامەڵەکردن لەگەڵ کۆریای باشور وەک دەوڵەتێکی جیاواز و نەیار.
هەروەها رێبەری کۆریای باکور مانگی رابردوو بەڵێنیدا بەردەوام بێت لە بەهێزکردنی توانای ئەتۆمی وڵاتەکەی و هەڵوێستێکی توندی بەرامبەر کۆریای باشوور وەرگرت کە بە "دوژمنترین دەوڵەت" ناوزەندی کرد.
کیم جۆنگ ئون ویلایەتە یەکگرتووەکانی ئەمریکاشی بە ئەنجامدانی "تیرۆر و دەستدرێژی رەسمی" تۆمەتبار کرد و ئاماژەی بەوە کرد کە رەنگە وڵاتەکەی لە بەرەوڕووبوونەوەی واشنتۆن-دا دەورێکی چالاکتر بگێڕێت.
تەیف سامی وەزیری دارایی عیراق ئیمزای لەسەر خەرجكردنی موچەی مانگی چواری هەرێمی كوردستان كرد.
بێستون سەلام پەیامنێری کوردسات نیوز لە بەغداد رایگەیاند: کەمێک پێش ئێستا وەزیری دارایی عیراق ئیمزای لەسەر خەرجکردنی موچەی مانگی چواری هەرێمی کوردستان کردووە.
لە سبەینێوە شەپۆلێكی خۆڵبارین و گەرما روو لە سەرتاسەری عیراق دەكات و تا رۆژی پێنج شەممە بەردەوام دەبێت.
دەستەی كەشناسی عیراق لە راگەیەنراوێكدا رایگەیاندووە، سبەینێ ئاسمان نیمچە هەور دەبێت و پلەكانی گەرما بۆ سەرو 30 پلە بەرزدەبنەوە و خۆڵبارینی مامناوەندیش لە زۆربەی ناوچەكان دەستپێدەكات.
دەشڵێت، رۆژی سێشەممە باران لە شێوەی نمە و تاوە باران لە ناوچە شاخاوییەكان دەبارێت و رەشەبا هەڵدەكات و خێراییەكەی دەگاتە 40 كیلۆمەتر لە سەعاتێكدا و شەپۆلی خۆڵبارینەكە زیاتر دەكات و مەودای بینین كەم دەكاتەوە.
بەپێی كەشناسی، تا رۆژی چوارشەممە خۆڵبارین بەردەوام دەبێت، بەڵام پلەكانی گەرما لە ناوەڕاست و باشوری عیراق كەم دەبنەوە و رۆژی پێنجشەممەش شەپۆلی خۆڵبارینەكە كۆتایی دێت.
هاوكات كەشناسی هەرێمی كوردستان رایگەیاندووە، لەمڕۆوە پلەكانی گەرما بەرزبوونەتەوە و لە بەشێك لە پارێزگاكان گەیشتووەتە سەروو 30 پلە.
وەزارەتی بەرگری ئیمارات، ئەمڕۆ یەکشەممە، سەرکەوتنی سیستمەکانی بەرگری ئاسمانی وڵاتەکەی لە تێکشکاندنی دوو فڕۆکەی بێفڕۆکەوانی راگەیاند کە لە خاکی ئێرانەوە ئاڕاستە کرابوون، هاوکات جەختیشی کردەوە کە لە چەند کاتژمێری رابردوودا هیچ زیانێکی گیانی تۆمار نەکراوە.
وەزارەتەکە لە بەیاننامەیەکدا رایگەیاند: لە رێکەوتی 10ی ئایاری 2026، سیستمەکانی بەرگری ئاسمانی ئیمارات توانییان دوو فڕۆکەی بێفڕۆکەوان راو بکەن و تێکبشکێنن کە لە ئێرانەوە رەوانە کرابوون."
لە بەشێکی تری بەیاننامەکەدا هاتووە کە لە سەرەتای دەستپێکردنی ئەم هێرشانەوە، بەرگری ئاسمانی ئیمارات بەرپەرچی ٥٥١ مووشەکی بالیستی، 29 مووشەکی کرووز و2265 فڕۆکەی بێفڕۆکەوانی داوەتەوە.
سەبارەت بە زیانەکان، وەزارەتی بەرگری ئاماژەی بەوە کردووە کە لە کاتژمێرەکانی رابردوودا هیچ حاڵەتێکی گیانلەدەستدان یان برینداربوون تۆمار نەکراوە، بەڵام ئاماری گشتی قوربانییان لە سەرەتای هێرشەکانەوە گەیشتووەتە دوو کوژراو لە هێزە چەکدارەکان و هاووڵاتییەکی مەغریبی کە گرێبەستی لەگەڵ سوپادا هەبووە. هەروەها ژمارەی کوژراوە مەدەنییەکان گەیشتووەتە 10 کەس لە رەگەزنامە جیاوازەکانی (پاکستانی، نیپاڵی، بەنگلادیشی، فەڵەستینی، هیندی و میسری)، ژمارەی بریندارەکانیش گەیشتووەتە 230 کەس.
لە کۆتاییدا، وەزارەتی بەرگری ئیمارات جەختی لەسەر ئامادەیی تەواوی هێزەکانی کردەوە بۆ بەرپەرچدانەوەی هەر هەڕەشەیەک و رایگەیاند: "بە توندی رووبەڕووی هەر هەوڵێک دەبینەوە کە ئامانجی تێکدانی ئاسایشی وڵات بێت، بە جۆرێک کە پارێزگاری لە سەروەری و سەقامگیری ئیمارات مسۆگەر بکات."
سەرۆک کۆماری ئێران جەخت لە گۆڕینی ستراتیژیی نەیارانی وڵاتەکەی دەکاتەوە بۆ تێکدانی رەوش و بواری دارایی، پاش ئەوەی لە مەیدانی سەربازیدا نەیانتوانی ئامانجەکانیان بپێکن.
مەسعود پزیشکیان، سەرۆک کۆماری ئێران رایگەیاند، دوای ئەوەی "دوژمنان" لە شەڕی سەربازیدا سەرکەوتوو نەبوون، ئێستا هەوڵ دەدەن شەڕەکە بگوازنەوە بۆ بواری ئابوری و جەختی لەوەش کردەوە کە پێویستە گەل بە رۆڵی خۆیان ئەم پیلانە پووچەڵ بکەنەوە.
ئاماژەی بەوەشکرد، وڵات پێویستی بە جوڵەیەکی گشتگیری جەماوەری هەیە بۆ چاکسازی لە شێوازی بەکارهێنان و بەهێزکردنی بەشداریی کۆمەڵایەتی.
مەسعود پزیشکیان ئەوەشی خستەڕوو، هێزە چەکدارەکان ئەرکی خۆیان لە رووبەڕووبوونەوەی دوژمن بە باشی جێبەجێ دەکەن، بەڵام پێویستە خەڵکیش لەم مەیدانەدا پشکی خۆیان هەبێت، ئەویش لە رێگەی دەستپێوەگرتن و میانداری لە بەکارهێنانی وزەدا.
وەزارەتی دارایی هەرێم داهاتی نانەوتی بۆ مانگی نیسان رەوانەی بەغداد كرد و چاوەڕوان دەکرێت لە چەند رۆژی داهاتوودا موچەی مانگی چواری موچەخۆرانی هەرێم خەرج بکرێت.
وەزارەتی دارایی و ئابوری هەرێم لە راگەیەنراوێکدا بڵاویکردەوە،، ئەمڕۆ 50 ملیار دینار و 292 ملیۆن دینار وەك داهاتی نانەوتی مانگی نیسان خرایە سەر هەژماری بانكی وەزارەتی دارایی عیراق.
ئاماژەی بەوەشکرد، داهاتی نانەوتی مانگی نیسان بەشێوەی کاش خرایە سەر هەژماری بانکی وەزارەتی دارایی حکومەتی فیدراڵ لە لقی هەولێری بانکی ناوەندی عیراق.
لەلایەکی ترەوە، بڕیار محەمەد پەیامنێری کوردسات نیوز لە هەولێر رایگەیاند، بەغداد لە چەند رۆژی داهاتوودا بڕیار لەسەر خەرجکردنی موچەی موچەخۆرانی هەرێم دەدات.
وتیشی، سەرچاوەیەکی باڵا لە وەزارەتی دارایی هەرێم بە کوردسات نیوزی راگەیاندووە، قسە لەگەڵ بەغداد کراوە و رێکارەکانی خەرجکردنی مووچە خێراتر دەکرێت.
پەیامنێری کوردسات نیوز ئاشکراشیکرد، چاوەڕوان دەکرێت رۆژی چوارشەممە یاخود پێنجشەممە، وەزارەتی دارایی عیراق پارە موچەی مانگی چواری فەرمانبەرانی هەرێم بخاتە سەر هەژماری وەزارەتی دارایی هەرێم.
ئەندامێكی ئەنجومەنی نوێنەرانی عیراق ئاشكرایدەكات، لەم هەفتەیەدا دەنگدان بە كابینەی حكومەتەكەی عەلی زەیدی دەستپێدەكات.
سەفیە جیزانی ئەندامی ئەنجومەنی نوێنەران بە رۆژنامەی سەباحی عیراقی راگەیاندووە، لەم هەفتەیەدا دەنگدان لەسەر حكومەتی نوێ دەستپێدەكات، بەڵام رۆژەكەی دیاری نەكراوە.
هاوكات محەمەد هادی ئەندامی ئەنجومەنی نوێنەران دەڵێت، كابینەی نوێ بە نزیكەیی تەواو بووە، پێشبینی دەكرێت زەیدی نزیكەی 80٪ی پێكهاتەی حكومەتەكەی پێشكەش بكات و هیچ ئاستەنگێكی بنچینەیی نییە بۆ رێگریكردن لە دەنگدان لەسەری.
رۆژنامەكە ئاماژە بەوە دەكات، لەگەڵ راگەیاندنی نزیكبونەوەی دەنگدان لەسەر حكومەتەكەی عەلی زەیدی، پرۆسەی سیاسیش چووەتە قۆناغێكی پێشكەوتووی لێكتێگەیشتن و تێپەڕاندنی خاڵە ناكۆكییەكانی پەیوەست بە دابەشكردنی پۆستە وەزارییەكان.
تەندروستی جیهانی دڵنیایی دەدات، ڤایرۆسی "هانتا" مەترسییەکی گەورە نییە و وەک کۆرۆنا بڵاونابێتەوە.
تیدرۆس ئەدهانۆم بەڕێوەبەری گشتی رێكخراوی تەندروستیی جیهانیی، پەیامێکی دڵنیایی ئاراستەی دانیشتوانی دوورگەکانی کەناری و گەشتیارانی ناو کەشتی "MV Hondius" کرد، جەختی لەوە کردەوە کە هێشتا مەترسییەکانی ڤایرۆسی "هانتا" لە ئاستێکی نزمدا ماونەتەوە.
تیدرۆس ئەدهانۆم رایگەیاند، "ئەم نەخۆشییە کۆرۆنا نییە، ئەوان وەک رێکخراوی تەندروستی جیهانی چەندین جار ئەوەیان دووپات کردووەتەوە." ئاماژەی بەوەش کرد کە نیگەرانییەکانی کۆمەڵگەی نێودەوڵەتی بەهۆی ئەزموونی تاڵی جیهان لەگەڵ پەتای کۆرۆنا "بڕ پاساوە"، بەڵام رەوشی ئێستا زۆر باشترە.
بەڕێوەبەری گشتی رێكخراوی تەندروستیی جیهانیی ئەوەشی خستەڕوو، ئەم جۆرە ڤایرۆسە بە ئاسانی کۆرۆنا ناگوازرێتەوە، هەروەها هەنگاوی پێویست نراوە بۆ گرتنەبەری رێکاری پێویست بۆ هەر ئەگەرێکی نەخوازراو.
گومان دەکرێت تووشبووانی سەر کەشتییەکە تووشی ڤایرۆسی "ئەندێز" (Andes virus) بووبێتن، کە تەنها جۆری "هانتا"یە توانای گواستنەوەی لە کەسێکەوە بۆ کەسێکی تری هەبێت، بەڵام پسپۆڕان دەڵێن ئەمە تەنها لە حاڵەتی "بەرکەوتنی زۆر نزیک و درێژخایەن"دا رودەدات، وەک ئەندامانی یەک خێزان یان کارمەندانی تەندروستی.
بڕیارە ئەمڕۆ یەکشەممە، کەشتییەکە بگاتە دوورگەی "تێنێریف"ی ئیسپانی و نزیکەی 150 سەرنشین دابەزێنرێن. وەزیرانی تەندروستی و ناوخۆی ئیسپانیا دڵنیایییان داوە کە "هیچ بەرکەوتنێک" لە نێوان گەشتیاران و دانیشتوانی ناوچەکەدا رونادات و گەشتیارەکان راستەوخۆ بە پاسی تایبەت بۆ فڕۆکەخانە دەگوازرێنەوە تا بگەڕێنەوە وڵاتەکانی خۆیان.
جێگەی ئاماژەیە، تا ئێستا سێ کەس (ژنێکی ئەڵمانی و ژن و مێردێکی هۆڵەندی) لەسەر کەشتییەکە گیانیان لەدەستداوە، هاوکات گەشتیارێکی بەریتانی بەهۆی ناجێگیری باری تەندروستییەوە بە فڕۆکە بۆ ئەفریقای باشور گواستراوەتەوە.
بەپێی راپۆرتە تەندروستییەکان، ماوەی مانەوەی ڤایرۆسەکە لە جەستەدا (Incubation period) لە نێوان یەک بۆ هەشت هەفتە دەخایەنێت، تا ئێستاش هیچ ڤاکسین یان چارەسەرێکی تایبەت بۆ ئەم ڤایرۆسە نییە و تەنها چارەسەری پاڵپشتیکار بۆ نەخۆشەکان دەکرێت.
تاقیكردنەوەی پۆلە ناكۆتاكان لە سەرتاسەری هەرێمی كوردستان دەستپێدەكەن و تا 20ی ئەم مانگە بەردەوام دەبن.
ئەمڕۆ لە سەرتاسەری هەرێمی كوردستان تاقیكردنەوەی وەرزی دووەمی پۆلە ناكۆتاكان بە بەشداری زیاتر لە یەك ملیۆن خوێندكار دەستپێدەكەن.
بەپێی زانیارییەكانی كوردسات نیوز، حەوت هەزار و 585 خوێندنگەی حكومی و ئەهلی لە هەرێمی كوردستان تاقیكردنەوەیان تێدا بەڕێوەدەچێت و نزیكەی 150 هەزار مامۆستاش چاودێری پرۆسەكە دەكەن كە تا 20ی ئەم مانگە بەردەوام دەبن.
ئەمساڵ بەهۆی جەنگی ئێرانەوە، نزیكەی 42 رۆژ دەوامی خوێندن راگیراو بەشێك لە پرۆگرامەكانی خوێندن تەواو نەكران.