هەواڵەکان
پەرلەمانتارێكی عیراق نرخی خەمڵێنراوی نەوت لە پرۆژە یاسای بودجەی ئەمساڵدا ئاشكرا دەكات و دەشڵێت پرۆژەیاساكە زیادكردنی داهاتی نانەوتی لە خۆدەگرێت.
حەورا عەزیز موسەوی، لیژنەی نەوت و غاز و سامانە سروشتییەكانی ئەنجومەنی نوێنەران ئاشكرایكرد، پرۆژە یاسای بودجەی 2026 پشت بە چوار كۆڵەكەی بنەڕەتی دەبەستێت، كە ئەوانیش بریتین لەدەستنیشانكردنی نرخی نەوت بە نزیكەی (60) دۆلار بۆ هەر بەرمیلێك، و كەمكردنەوەی خەرجییە گشتییەكان، زیادكردنی داهاتە نانەوتییەكان، هەروەها كەمكردنەوەی پشتبەستن بە نەوت وەك سەرچاوەی سەرەكی بۆ دابینكردنی دارایی بودجە.
ئاماژەی بەوەشكرد، گفتوگۆكان لە ناو لیژنەكەدا بەردەوامن بۆ دۆزینەوەی رێگاكانی كەمكردنەوەی كورتهێنانی دارایی، بەتایبەتی لە كاتێكدا پێشبینی دەكرێت نرخی نەوت روو لە دابەزین بكات.
لەلایەكی دیكەوە، عەلی زیرجاوی، ئەندامی هاوپەیمانی دەوڵەتی یاسا، داوای كرد، پێویستە پلانێكی فریاگوزاری هاوشێوەی یاسای ئاسایشی خۆراك ئامادە بكرێت، بۆ حاڵەتێك ئەگەر نەتوانرا بودجەی 2026 لە وادە دەستوورییەكانی خۆیدا پەسند بكرێت.
باڵیۆزی توركیا لە عیراق رایگەیاند هەوڵی زیادكردنی قەبارەی ئاڵوگۆڕی بازرگانی لەگەڵ عیراق دەدەن و بەمنزیكانەش كۆتایی بە دۆسیەی وەرگرتنەوەی داعشەكانی وڵاتەكەیان دەهێنن.
ئەنیل بورا ئینان باڵیۆزی توركیا لە عیراق بە رۆژنامەی سەباحی راگەیاند، عیراق پێنجەم گەورەترین هاوبەشە بۆ توركیا و هاوردەی توركیا بۆ ئەو وڵاتە لە ساڵی 2025دا گەیشتووەتە 12.3 ملیار دۆلار، هەوڵیش دەدەن قەبارەی ئاڵوگۆڕی بازرگانی لە ماوەی ساڵێكدا بۆ 30 ملیار دۆلار بەرز بكەنەوە.
لەبارەی رەوشی ئەمنییشەوە ئاماژەی بەوەدا، لەگەڵ لایەنە عیراقییەكان لە هەماهەنگیدان بۆ وەرگرتنەوەی داعشە توركەكان كە لە عیراق دەستگیركراون، پێشبینی ئەوەشی كردووە ئەمنزیكانە ئەو دۆسیەیە كۆتایی پێبێت و داوایكردووە وڵاتانی تریش ئەو هەنگاوە بنێن.
ئیسماعیل بەقائی، وتەبێژی وەزارەتی دەرەوەی ئێران رایگەیاند، ئەمریكا تەنها گرنگی بە بەرژەوەندی خۆی دەدات و بەردەوام هەڵوێستەكانی دەگۆڕێت.
وتەبێژی وەزارەتی دەرەوە و تیمی دانوستانکاری ئێران، ئیسماعیل بەقایی جەختی کردەوە کە تاران پێداگرە لەسەر بەڕێوەچوونی باشترین شێواز بۆ پاراستنی بەرژەوەندییەکانی ئێران و ئێمە بەستراوەی ئەوەوە نین کە دوژمنان چییان دەوێت.
پاشان بەقایی لە لێدوانێکی رۆژنامەوانیدا رایگەیاند: کەس ناتوانێت بڵێت واژۆکردنی رێککەوتنێک لە نێوان ئێران و ئەمریکادا نزیک بووەتەوە، پەرەسەندنەکانی ئەم دوایییەش دەرەنجامی گفتوگۆکانی چەند هەفتەی رابردوودان، ئاماژەی بەوەش کرد: وەک چۆن بە هێزەوە لە مەیدانەکانی جەنگدا بەرگریمان دەکرد، بە هەمان شێوەش بە وریایی و چاوی کراوەوە دانوستان دەکەین.
لە درێژەی قسەکانیدا وتی: گفتوگۆکان لەگەڵ ویلایەتە یەکگرتووەکان جەخت لەسەر کۆتاییهێنان بە شەڕ دەکەنەوە و لە ئێستادا دانوستان لەسەر مەلەفی ئەتۆمی ناکەین، هەروەها وتیشی: هیچ گەرەنتییەک نییە بۆ پابەندبوونی واشنتۆن بە بەڵێنەکانی، ئێمە گوێ بە هەڕەشەکان نادەین و تەرکیزمان لەسەر دەستەبەرکردنی بەرژەوەندییەکانمانە.
زیادیشی کرد: ئەو وڵاتەی کە لە ماوەی 40 رۆژدا توانی لە بەرامبەر دوو دەوڵەتی ئەتۆمیدا خۆڕاگر بێت، توانای دابینکردنی مافەکانی خۆشی هەیە، روونیشیکردەوە: بۆ حکومەتی ئەمریکا لە رۆژئاوای ئاسیا هیچ شتێک گرنگ نییە جگە لە (ئیسرائیل)، وە هەر کارێکی دوژمنکارانە دژی ئێران، لە لایەن ئێمەوە بە وەڵامدانەوەیەکی حەتمی روبەڕوو دەبێتەوە.
حکومەتی هەرێم رایگەیاند، بە بۆنەی جەژی قوربانی پیرۆزەوە، لە سبەینێ سێشەممە (26ی ئایاری 2026) تا رۆژی شەممە (30ی ئایاری 2026) پشوی رەسمی دەبێت.
لە راگەیەندراوێکدا، فەرمانگەی میدیا و زانیاری بڵاویکردوەتەوە، بەبۆنەی هاتنی جەژنی پیرۆزی قوربان، رۆژی سێشەممە (26ی ئایاری 2026) تا رۆژی شەممە (30ی ئایاری 2026)، لە سەرجەم دامودەزگاکانی هەرێمی کوردستان، پشووی رەسمی دەبێت.
ئاماژە بەوەشکراوە، پشوەکە فەرمانگە خزمەتگوزارییەکان ناگرێتەوە و دەوام بەشێوەی ئێشکگری بەردەوام دەبێت و رۆژی یەکشەممە (31ی ئایاری 2026) دەوامی رەسمی دەست پێ دەکاتەوە.
بەرپرسانی ئیسرائیل هۆشداری دەدەن، کە ئەو رێککەوتنەی ئێستا لە نێوان ئەمریکا و ئێراندا لە ئارادایە، "رێککەوتنێکی خراپە"، چونکە مەترسییە سەرەکییەکانی تاران کە لە دەرەوەی بەرنامە ئەتۆمییەکەن، پشتگوێ دەخات.
لێپرسراوێکی ئیسرائیلی بە رۆژنامەی "ئۆرشەلیم پۆست"ی راگەیاندووە، تەنانەت ئەگەر رێککەوتنی کۆتاییش ئیمزا بکرێت و هەموو یۆرانیۆمی پیتێنراویش لە ئێران ببڕێتە دەرەوە، کە ئەمەش جێی گومانێکی جدییە، هێشتا رێککەوتنەکە چارەسەری بەرنامە موشەکییەکەی ئێران و ئەو گروپانەی سەر بەئێرانن لە ناوچەکەدا ناکات.
رۆژنامە ئیسرائیلییەکە ئاماژەی بەوەکردوە، دامەزراوە ئەمنییەکانی ئیسرائیل نیگەرانن لەوەی ئەم رێککەوتنە ئازادیی جوڵەی وڵاتەکەیان لە لوبنان بەرتەسک بکاتەوە و توانای بەرپەرچدانەوەی مەترسییەکانی تاران لە ناوچەکەدا کەم بکاتەوە.
نیگەرانییەکان لەوەوەیە، کە یەکێک لە خاڵە ناکۆکەکان داواکاریی تارانە بۆ گواستنەوەی حزبوڵا بۆ ناو رێککەوتنی ئاگربەست و راگرتنی ئۆپراسیۆنە سەربازییەکانی ئیسرائیل.
ناوەندە ئەمنییەکانی ئیسرائیل پێیان وایە کە حکومەتی ئێستای ئێران هەرگیز بە تەواوی دەستبەرداری بەرنامە ئەتۆمییەکەی نابێت و تەنیا دەیەوێت رێککەوتنەکە بۆ کڕینی کات و دواخستنی روبەڕووبوونەوەکان بەکاربهێنێت.
رۆژنامەکە ئەوەشی خستوەتەڕوو، لە ناوخۆی ئیسرائیلدا هەر رێککەوتنێک رێگە بە ئێران بدات ژێرخانە ئەتۆمییەکەی لەژێر ناوی "پڕۆژەی مەدەنی"دا بهێڵێتەوە، وەک شکستێکی گەورە سەیردەکرێت لە بەرژەوەندی تاران.
بلومبێرگ بڵاویکردوەتەوە بەهۆی نەبوونی پەیوەندی راستەوخۆ و بەئەستەم گەیشتن بە موجتەبا خامنەیی، رەنگە رێککەوتنی نێوان ئەمریکا و ئێران دوابکەوێت .
ئاژانسی بلومبێرگ لە زاری چەند سەرچاوەیەکی هەواڵگریی ئەمریکییەوە، کە ویستیان بووە ناویان ئاشکرا نەکرێت رایگەیاند، بەهۆی بوونی ئاستەنگ و دژواری لە پەیوەندیکردن لەگەڵ موجتەبا خامنەیی، ئەگەری دواکەوتنی راگەیاندنی رێککەوتنی نێوان واشنتۆن و تاران هەیە.
بەپێی ڕاپۆرتەکە، رابەری سێیەمی کۆماری ئیسلامی ئێران، کە ماوەی سێ مانگە هیچ وێنە یان تۆمارێکی دەنگی نوێی بڵاونەکراوەتەوە، لە شوێنێکی نادیاردا خۆی حەشارداوە، کە تەنانەت شاندی دانوستانکاری ئێرانی لەگەڵ ئەمریکاش شوێنەکەی نازانن.
ئاژانسەکە ئەوەشیخستوەتەروو، کە لە ئێستادا پەیوەندیکردن لەگەڵیدا تەنیا لە رێگەی نامەبەرێک یان نێردراوی تایبەتەوە ئەنجام دەدرێت.
پێشتریش ئاماژە بەوە کرابوو کە تەنیا ئەحمەد وەحیدی، فەرماندەی سوپای پاسداران، توانای پەیوەندیکردنی راستەوخۆی لەگەڵیدا هەیە.
ئەمە لە کاتێکدایە، درەنگانی شەوی شەممە، لەرێگەی تویتێکەوە، دۆناڵد ترەمپی سەرۆکی ئەمریکا رایگەیاند، لەگەڵ ئێران لەسەر زۆربەی خاڵەکان گەیشتونەتە رێککەوتن.
وەزیری دەرەوەی ئەمریکا رایگەیاند، هێشتا ئەگەری ئیمزاکردنی رێککەوتنێک بۆ کۆتاییهێنان بە گرژی و شەڕ لەگەڵ ئێران لە ئارادایە و رەنگە هەر ئەمڕۆش بێتە دی و هیوایشی خواست کە بتوانن ئەو ئامانجە بپێکن.
مارکۆ رۆبیۆ، وەزیری دەرەوەی ئەمریکا رایگەیاند، وڵاتەکەی هەموو چانسێک بە دیپلۆماسیەت دەدات بۆ ئەوەی بگەنە ئەنجام پێش ئەوەی بیر لە بژاردەی تربکەنەوە.
رۆبیۆ لەگەڵ ئەوەی گەشبینی خۆی بە رێککەوتن نیشاندەدات هۆشداریشدەدات، کە پێویستە بگەنە رێککەوتنێکی باش، ئەگەر نا بە پێچەوانەوە ناچار دەبن بە شێوازێکی دیکە مامەڵە لەگەڵ رەوشەکەدابکەن، کە مەبەستی دوبارە هێرشکردنە سەر تارانە.
هاوکات جەختیشی کردەوە، ئیسرائیل مافی تەواوی خۆیەتی بەرگری لە خۆی بکات دژی هەر هێرشێک لە هەر سنورێکەوە بکرێتە سەری.
وەزیرەکەی ئەمریکا هیواشی خواست کە پێش ئەوەی دەست بۆ بژاردەی تر ببەن، لەگەڵ ئێراندا بگەنەرێککەوتن و ئاماژەی بەوەشکرد رەنگە ئەمڕۆ ئەوە روبدات.
ئەمە لە کاتێکدایە، ئاژانسی بلومبێرگ بڵاویکردوەتەوە، بەهۆی نەبوونی پەیوەندی راستەوخۆ و بەئەستەم گەیشتن بە موجتەبا خامنەیی، رەنگە رێککەوتنی نێوان ئەمریکا و ئێران دوابکەوێت.
لیوا موحسین رەزایی، ئەندامی کۆمەڵەی دەستنیشانکردنی بەرژەوەندییەکانی کۆماری ئیسلامیی ئێران، هۆشداریی دایە دۆناڵد ترەمپ، سەرۆکی ئەمریکا و سوپاکەی لەوەی کە ئەگەر بچنە ناو جەنگ لەگەڵ ئێراندا، روبەڕووی "رێڕەوێکی تاریکی بێبڕانەوە" دەبنەوە.
لیوا رەزایی رایگەیاند: ئەمڕۆ ترەمپ و سوپای ئەمریکا خۆیان لەناو بنبەستێکی تەواوەتیدا دەبیننەوە، ئەگەر بچنە ناو جەنگەوە، روبەڕووی رێڕەوێکی تاریکی بێبڕانەوە دەبنەوە.. رێڕەوێک کە لە گەروی هورمزەوە دەست پێدەکات و درێژ دەبێتەوە بۆ کەنداو، دەریای عومان، گەروی بابولمەندەب و زەریای هیندی، ئەمەش جەنگێکی زۆر بەربڵاوی لێ دەکەوێتەوە.
ناوبراو رونکردنەوەی زیاتری دا و وتی: گەروی هورمز بەڕوی بازرگانیی ئازاددا دانەخراوە، بەڵکو بەڕوی هێزە سەربازییەکان و هەڵگیرسێنەرانی جەنگ لە ناوچەکەدا داخراوە، بەڕێوەبردنی ئێستای هێزە دەریاییەکانی سەر بە سوپای پاسداران وایکردووە کە کەشتییەکانی وڵاتە جیاوازەکان دوای ناسینەوە و تۆمارکردنیان، بە سەلامەتی لەم رێڕەوەوە تێپەڕن.
بەریتانیا و ئەمریكا ئامادەكاری بۆ كردنەوەی گەروی هورمز دەكەن و ناتۆش پشتیوانییان دەكات.
وەزارەتی بەرگری بەریتانیا رایگەیاند، ژێردەریاییەكانی وڵاتەكەی ئامادەكاری بۆ ئەنجامدانی ئۆپراسیۆنی هەڵگرتنەوەی مین لە گەروی هورمز دەكەن لە حاڵەتی پێویستدا.
وەزارەتی دەرەوەی بەریتانیاش هەماهەنگی تەواوی لەگەڵ واشنتۆن دووپاتكردەوە بۆ سەرلەنوێ كردنەوەی گەروی هورمز بەرووی هاتوچۆی دەریایی نێودەوڵەتیدا.
ئاماژەی بەوەشكردووە، پاراستنی ئازادیی كەشتیوانی هێڵێكی سوورە و بەریتانیا لە بەرانبەر سیاسەتی داخستنی گەرووە نێودەوڵەتییەكان بێدەنگ نابێت.
وەزیری دارایی عیراق ئیمزای لەسەر ناردنی موچەی مانگی پێنج بۆ هەرێم کرد.
بەپێی زانیارییەکانی کوردسات نیوز، لەگەڵ گەیشتنی پارەی موچەی مانگی پێنجی موچەخۆرانی هەرێم، راستەوخۆ لیستی دابەشکردنی موچە بڵاودەکرێتەوە.
نوێدەکرێتەوە...
لەگەڵ نزیكبونەوەی هاتنی وەرزی هاوین حاڵەتەكانی توشبون و گیان لەدەستدان بە تای خوێن بەربون لە عیراق لە زیادبوندان و لە پارێزگای زیقار 4 حاڵەتی گیان لەدەستدان و 41 حاڵەتی توشبون تۆماركراون .
راپۆرتە تەندروستییەكان ئاماژە بە بەرزبوونەوەی ژمارەی تووشبووان بە تای خوێنبەربوون دەكەن لە عیراقدا دەكەن، بەجۆرێك لە سەرەتای ئەمساڵەوە تا ئێستا، لە پارێزگای زیقار 4 حاڵەتی گیانلەدەستدان و 41 حاڵەتی توشبون تۆمار كراوە ئەوەش بەرزترین رێژەیە لەسەر ئاستی عیراق .
هەروەها لە ناحیەی گەیارە لە نەینەوا لە ماوەی كەمتر لە سێ رۆژدا دوو گەنجی تەمەن 20 و 24 ساڵ تووشی تای خوێن بەربوون .
دكتۆر عەلی عەبدولحسێن، بەڕێوەبەری نەخۆشخانەی ڤێتێرنەری لە زیقار دەڵێت، پێویستە لایەنە حكومی و تەندروستییەكان پێش هاتنی جەژنی قوربان هەنگاوی خێرا بنێن بۆ رێگریكردن لە بڵاوبوونەوەی زیاتری نەخۆشیەكە.
سەرۆكی حكومەتی هەرێم رایگەیاند، بەغداد بەڵێنی داوە ئەمرۆ موچەی مانگی پێنجی موچەخۆرانی هەرێم رەوانە بكات.
لە وەڵامی پرسیارێكی بێستون سەلام پەیامنێری كوردسات نیوز، مەسرور بارزانی سەرۆكی حكومەتی هەرێم رایگەیاند ، بەغداد بەڵێنی داوە ئەمرۆ موچەی فەرمانبەرانی هەرێم رەوانە بكات .
لای خۆیەوە چنار دەربەندی ئەندامی ئەنجومەنی نوێنەرانی عیراق لە فراكسیۆنی یەكێتی رایگەیاند، رێككەوتنێك هەیە لەنێوان بەغداد و هەرێم بۆ ناردنی موچەی هەرێم كە پێویستە هەرێم داهاتی نانەوتی رەوانە بكات، بەڵام لە ئێستادا هەوڵێك هەیە بە بێ داهاتی نانەوتیش موچە پێش جەژنی قوربان رەوانەی هەرێم بكرێت.
خاتوو شاناز ئیبراهیم ئەحمەد پەیامێکی هاوخەمی بۆ کۆچی دوایی محەمەد عەلی عەبدوڵا بڵاوکردەوە.
دەقی پەیامەکەی خاتوو شاناز ئیبراهیم ئەحمەد:
بەبیستنی هەواڵی ماڵئاوایی یەکجارەکی کاک (محەمەد عەلی)، زۆر غەمباربووم.
پرسەو سەرەخۆشی لە دکتۆر شێرکۆ و خێزان و کەسوکارەکەی ئەکەم و هاوبەشی خەم و پەژارەیانم.
خواى گەورە لەکۆچکردوو خۆش بێت و جێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.
لە دوای نیگەرانییەكانی ئیسرائیل لە ئەگەری رێككەوتنی نێوان ئەمریكا و ئێران، ترەمپ دڵنیایی داوەتە سەرۆك وەزیرانی ئیسرائیل.
سەرچاوەیەكی ئاگادار بە كەناڵی 12ی ئیسرائیلی راگەیاندووە، بنیامین ناتانیاهۆ، سەرۆك وەزیرانی ئیسرائیل، لە میانی پەیوەندییەكی تەلەفۆنیدا لەگەڵ دۆناڵد ترەمپ، جەختی لەوە كردووەتەوە كە ئیسرائیل مافی هێرشكردن بۆ سەر هەموو گۆڕەپانەكان لەنێویشیاندا لوبنان، بۆ خۆی دەهێڵێتەوە.
هەروەها هۆشداری داوەتە ترەمپ لە دواخستنی بڕیارنامەیەك سەبارەت بە پرسی ئەتۆمی ئێران.
جەختی لەوەش كردووەتەوە كە تاران دانوستانەكان دەقۆزێتەوە بۆ كڕینی كات و دواخستنی بڕیارنامەیەك سەبارەت بە بەرنامە ئەتۆمییەكەی.
لە بەرانبەردا دۆناڵد ترەمپ پاڵپشتی خۆی بۆ ئەو خواستەی ئیسرائیل دوپاتكردووەتەوە، هەروەها رونكردنەوەی داوە لەسەر ئەوەی كە پابەند دەبێت بە داواكارییە نەگۆڕەكانی خۆی لە هەر رێككەوتنێك لەگەڵ ئێران، بەتایبەت هەڵوەشاندنەوەی تەواوی بەرنامەی ئەتۆمیی ئێران و دەركردنی سەرجەم یۆرانیۆمی پیتێندراو لە خاكی ئێراندا.
دەزگای دژەتیرۆری عیراق، ئەمڕۆ یەکشەممە، رایگەیاند کە سێ سەرباز کوژراون و چواری تریش بریندار بوون، بەهۆی تەقینەوەی بۆمبێکی چێندراوی پاشماوەکانی چەکدارانی تێرۆریستی داعش لە پارێزگای نەینەوا.
لە راگەیەندراوێکی دەزگاکەدا هاتووە: لە چوارچێوەی هەڵمەتە مەیدانییەکانی پشکنین کە پاڵەوانانی دەزگای دژەتیرۆر لە پارێزگا جیاجیاکانی عیراقدا ئەنجامی دەدەن، گروپێک لە مەفرەزە ئەمنییەکانمان روبەڕووی تەقینەوەی بۆمبێکی چێندراو بوونەوە کە لە پاشماوەکانی چەکدارانی تێرۆریستی داعش بوو، لە بیابانی حەزەر لە باشووری رۆژئاوای پارێزگای نەینەوا.
تێیدا ئاماژە بەوەش کراوە: روداوەکە بووە هۆی کوژرانی سێ شەڕکەر و برینداربوونی چوار کەسی تر لە پاڵەوانانی دەزگاکەمان.
راگەیەندراوەکە جەختیشی کردووەتەوە: پاڵەوانانی دەزگای دژەتیرۆر بەردەوام دەبن لە راپەڕاندنی ئەرکە نیشتمانییەکانیان بە هەموو ئازایەتی و پێداگرییەکەوە، جەختیشی کردەوە لەوەی کە: خوێنی پاکی شەهیدان دەبێتە پاڵنەرێک بۆمان بۆ بەردەوامبوون لە راوەدووڕانی پاشماوەکانی تێرۆر و پاراستنی ئاسایش و سەقامگیریی عیراق.
ئەمڕۆ یەکشەممە لە بارەگای مەکتەبی سیاسی لەشاری سلێمانی، وەفدێکی باڵای یەکێتیی نیشتمانیی کوردستان بە سەرۆکایەتیی دەرباز کۆسرەت رەسوڵ، پێشوازیکرد لە وەفدێکی باڵای کۆمەڵی دادگەریی کوردستان بەسەرپەرشتی محمەد حەکیم، ئەندامی ئەنجوومەنی سیاسیی کۆمەڵی دادگەری.
لە کۆبوونەوەکەدا، هەردوولا بەوردی گفتوگۆیان لەبارەی دوایین پێشهاتە سیاسییەکانی هەرێمی کوردستان و عیراق و دیدگا و بەرنامەی سیاسیی بۆ حکومەتی نوێی پێکهێنراوی عیراق کرد.
لەکۆبوونەوەکەدا یەکێتیی نیشتمانیی کوردستان و کۆمەڵی دادگەریی جەختیان لە لێک نزیکبوونەوەی زیاتری لایەنە سیاسییەکان و یەکڕیزیی نیشتمانی و بەرپرسیارێتیی هەموو لایەنەکانە بۆ خزمەتکردنی باشتر بە کۆمەڵانی خەڵکی کوردستان کردەوە .
لە بەشێکی تری گفتوگۆکاندا، پرسی عیراق و پەیوەندییەکانی نێوان هەرێم و بەغداد تەوەرێکی گرنگی کۆبوونەوەکە بوو، تیشک خرایە سەر گرنگیی هەماهەنگی نێوان هێزە کوردستانییەکان بۆ پاراستنی مافە دەستورییەکان، تا لەڕێگەی دیدگایەکی هاوبەش و یەک دەنگییەوە لەبەغداد، داکۆکی لە شایستە دارایی و سیاسییەکانی گەلی کورد بکرێت.