هەواڵەکان
بافڵ جەلال تاڵەبانی، سەرۆکی یەکێتیی نیشتمانیی کوردستان، بەبۆنەی کۆچی دوایی تێکۆشەری دێرین، عەبدوڵڵا مەسیحا ئەحمەد، پەیامێکی سەرەخۆشی ئاڕاستەی کەسوکاری و خزمانی نهێلی کرد.
دەقی پرسەنامەکە:
بەڕێزانمان لە خزمانی نهێلی و گوندی رەشاڤەیی
بەداخ و خەمێکی زۆرەوە، هەواڵی کۆچی دوایی تێکۆشەری دێرینی کوردایەتی و یەکێتی و دەڤەری بادینان، هەڤاڵ عەبدوڵا مەسیحا ئەحمەد، پێشمەرگەری دێرین و پارتیزانمان پێگەیشت.
بۆ ئەم خەمە پرسە و سەرەخۆشی ئاڕاستەی کەس و کارو بنەماڵە تێکۆشەرو سەربەرزەکەیان و گوندی رەشاڤەیی و خزمانی نهێلی دەکەم کە رۆڵتان لە خەباتی بزووتنەوەی رزگاریخوازی کوردایەتی دیارو بەرچاوە.
لەخوای گەورە داواکارم گیانی هەڤاڵی کۆچکردوومان بەبەهەشتی بەرین شادبکات، سەبووری و ئارامی بە هەموولایەک ببەخشێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
بەڕێوەبەرایەتی گشتیی کەشناسی و بوومەلەرزەزانی هەرێم رایگەیاند، لە شەوی هەینییەوە شەپۆلێکی بەفر و بارانبارین روو لە ناوچەکە دەکات و پلەکانی گەرما زۆر دادەبەزن.
بەپێی پێشبینییەکانی کەشناسی، ئەمڕۆ پێنجشەممە ئاسمان نیمچە هەور دەبێت و پلەکانی گەرما لە ناوچە شاخاوییەکان 1 بۆ 2 پلە دادەبەزن، خێرایی با لەسەرخۆ دەبێت.
کەشناسی ئاماژەی بەوەش کردووە، سبەینێ هەینی ئاسمان دەگۆڕێت بۆ هەوری تەواو، لە کاتەکانی شەودا نمەباران لە ناوچە سنوورییەکانی پارێزگای هەڵەبجە دەستپێدەکات و لە ناوچە شاخاوییە سنوورییەکان بەفرێکی کەم دەبارێت، پاشان کاریگەرییەکەی پارێزگای دهۆکیش دەگرێتەوە.
روونیشیکردووەتەوە، بەیانیی رۆژی شەممە ناسەقامگیریی کەشوهەوا زۆربەی ناوچەکانی هەرێم دەگرێتەوە، بەجۆرێک پلەکانی گەرما بەشێوەیەکی بەرچاو روو لە دابەزین دەکەن، نمەباران لە ناوچە جیاجیاکان دەبارێت و لە ناوچە شاخاوییە بەرز و نیمچە بەرزەکان بەفرێکی کەم بۆ مامناوەند دەبارێت.
بەرزترین پلەکانی گەرمای پێشبینیکراو بۆ سبەینێ هەینی:
-
گەرمیان: 14 پلە
-
کەرکوک: 13 پلە
-
هەولێر: 12 پلە
-
دهۆک، زاخۆ و هەڵەبجە: 11 پلە
-
سلێمانی: 10 پلە
-
سۆران: 9 پلە
بەڕێوەبەرایەتی گشتیی کشتوکاڵی هەڵەبجە ئاماری بارانبارینی 24 سەعاتی رابردوو و کۆی گشتیی بارانبارینی ئەمساڵی بڵاوکردەوە، کە تێیدا ناحیەی سیروان زۆرترین بڕی بارانی لێ باریوە.
بەپێی ئامارەکانی هۆبەی کەشناسیی سەر بە بەڕێوەبەرایەتی گشتیی کشتوکاڵی هەڵەبجە بۆ رۆژی 25ی کانونی یەکەمی 2025، لە ماوەی 24 سەعاتی رابردوودا لە ناحیەی سیروان 2.6 ملم باران باریوە، بەوەش کۆی گشتیی بارانبارینی ئەمساڵ لەو ناحیەیە گەیشتووەتە 267 ملم، کە زۆرترین بڕە لەسەر ئاستی پارێزگاکە.
لە سەنتەری شاری هەڵەبجە 2.4 ملم باران باریوە و کۆی گشتیی ئەمساڵ گەیشتووەتە 243.3 ملم، لە کاتێکدا پارساڵ تا ئەم کاتە 228.2 ملم باران باریبوو، واتە رێژەی بارانبارین لە سەنتەری شار زیادیکردووە.
لە ناحیەی خورماڵ 2.5 ملم باران باریوە و کۆی گشتیی ئەمساڵ 224.3 ملم بووە، لە بیارە 1.1 ملم و لە تەوێڵە 1.2 ملم باران باریوە.
بەپێی ئامارەکە، جگە لە سەنتەری هەڵەبجە و سیروان، رێژەی بارانبارینی ئەمساڵ لە خورماڵ، بیارە و تەوێڵە تا ئێستا کەمترە بەراورد بە ساڵی رابردوو.
دکتۆر لەتیف رەشید، سەرۆک کۆماری عیراق پیرۆزبایی جەژنی لەدایکبوونی حەزرەتی مەسیح لە کریستیانەکان دەکات و رایدەگەیەنێت، شانازی بە رۆڵی رەسەنی ئەوان لە مێژوو و ئێستای نیشتماندا دەکەن.
لە پەیامێکدا بەبۆنەی جەژنی لەدایکبوونی مەسیح (د.خ)، سەرۆک کۆمار پیرۆزبایی لە کریستیانەکانی عیراق و جیهان کرد و رایگەیاند: "لە کاتێکدا هاوبەشی خۆشییەکانیانین لەم بۆنە پیرۆزەدا، جەخت لە شانازیی قوڵی خۆمان دەکەینەوە بە رۆڵی رەسەنی ئەوان لە مێژوو و ئێستای نیشتمانەکەماندا و بە بەشدارییە نیشتمانی، کولتووری و شارستانییەکانیان".
دکتۆر لەتیف رەشید داوای کردووە وەک تاک و هێزە سیاسییەکان، لەم یادەدا ئیلهام لە بەها و فێرکارییە ئیمانی و مرۆییەکان وەربگرن بۆ بونیادنانی وڵات و بەهێزکردنی پێشکەوتنەکان و پاراستنی ئاسایش و سەقامگیری.
لە کۆتایی پەیامەکەیدا هاتووە: "هیوادارین ئاشتی، ئارامی، خۆشەویستی و تەبایی، تەواوی عیراق و هەموو جیهان بگرێتەوە".
میدیاکانی ئیسرائیل ئاشکرایان کرد، ئەمریکا و لایەنە نێوەندگیرەکان گەیشتوونەتە رێککەوتن بۆ کردنەوەی دەروازەی رەفەح بە هەردوو ئاڕاستەدا و رادەستکردنی ئیدارەکەی بە دەسەڵاتی فەلەستین.
دەستەی پەخشی ئیسرائیل بڵاویکردەوە، تێگەیشتنێکی نوێ لە نێوان ئەمریکا و نێوەندگیرەکان دروست بووە کە بەپێی ئەوە دەروازەی رەفەح دەکرێتەوە و دەسەڵاتی فەلەستین بەشداری لە بەڕێوەبردنیدا دەکات.
هاوکات کەناڵی 13ی ئیسرائیل لە زاری سەرچاوەکانەوە رایگەیاند، ستیڤ ویتکۆف، نێردەی ئەمریکا لایەنەکان و بزووتنەوەی حەماسی ئاگادار کردووەتەوە کە گواستنەوە بۆ قۆناغی دووەمی رێککەوتنی ئاگربەست لە سەرەتای ساڵی داهاتوو و لە ماوەی چەند هەفتەیەکدا دەستپێدەکات.
بەپێی میدیاکان، حکومەتی ئیسرائیل تێبینی لەسەر ئەم هەنگاوە هەیە و دەیەوێت لە کۆبوونەوەی داهاتووی بنیامین نەتەنیاهوو و دۆناڵد ترەمپ، سەرۆکی ئەمریکا یەکلایی بکرێتەوە، بەتایبەت کە ئیسرائیل مەرجی چەککردنی حەماس و رادەستکردنەوەی تەرمی بارمتەیەکی هەیە.
ئەمە لە کاتێکدایە بەپێی پلانی ترەمپ بۆ ئاگربەست، دەبوو رۆژانە 600 بارهەڵگری هاوکاری بچێتە غەززە، بەڵام هێشتا ئیسرائیل رێگری دەکات و پرۆسەکە بە خاوی بەڕێوەدەچێت.
سعودیە هۆشداریدا لە جوڵە سەربازییەکانی ئەنجومەنی کاتی لە حەزرەمەوت و مەهرە و رایگەیاند، جوڵەکان تاکلایەنە بوون و بێ هەماهەنگی کراون، بۆیە دەبێت بەپەلە هێزەکانیان لەو دوو پارێزگایە بکشێننەوە.
وەزارەتی دەرەوەی سعودیە لە راگەیەندراوێکدا ئاشکرای کرد، جوڵە سەربازییەکانی ئەنجومەنی کاتی لە حەزرەمەوت و مەهرە بەبێ رەزامەندیی ئەنجومەنی سەرکردایەتی و هەماهەنگیی هاوپەیمانان کراون، ئەمەش بووەتە هۆی گرژییەکی بێ پاساو.
راگەیەندراوەکە ئاماژەی بەوە کردووە، سعودیە لەگەڵ ئیمارات و سەرۆکی ئەنجومەنی سەرکردایەتیی یەمەن هەوڵی هێورکردنەوەی دۆخەکە دەدەن و تیمێکی سەربازیی هاوبەش رەوانەی عەدەن کراوە بۆ رێکخستنی کشانەوەی هێزەکانی ئینتیقالی بۆ شوێنەکانی پێشوویان.
سعودیە دووپاتیشی کردەوە، چاوەڕوانن ئەنجومەنی کاتی بەرژەوەندیی گشتی لەبەرچاو بگرێت و بەپەلە هێزەکانی لەو دوو پارێزگایە بکشێنێتەوە و رادەستی هێزەکانی قەڵغانی نیشتمان و دەسەڵاتی خۆجێیی بکات.
د.لەتیف رەشید، سەرۆک کۆماری عیراق پیرۆزبایی سەدەمین ساڵیادی دامەزراندنی دادگای تێهەڵچونەوە لە سەرۆکی ئەنجومەنی باڵای دادوەری دەکات
د.لەتیف رەشید، سەرۆک کۆماری عیراق لە دەقی پیرۆزباییەکەیدا دەڵێت:
بۆ سەرۆکی ئەنجومەنی باڵای دادوەری بەڕێز، دادوەر فائق زەیدان
سڵاو و سەلامی خودای گەورەتان لێ بێت.
بە بۆنەی سەدەمین ساڵیادی دامەزراندنی دادگای تێهەڵچونەوە، بە خۆشحاڵییەوە پیرۆزبایی خۆمتان ئاراستە دەکەم، هەروەها لە ڕێگەی ئێوەوە پیرۆزبایی دەنێرم بۆ تەواوی دادوەرە بەڕێزەکان و ئەندامانی دەسەڵاتی دادوەری بەڕێز.
سەروەری یاسا و هێنانەدی دادپەروەری، پایەی بنەڕەتین بۆ بنیاتنانی سیستەمێکی دیموکراسی ڕاستەقینە. کۆمەڵ بەبێ دەسەڵاتێکی دادوەری تەندروست و سیستەمێکی یاسایی پتەو ناتوانێت بگۆڕێت بۆ کۆمەڵێکی شارستانی و مۆدێرن.
سەرەڕای ئەو هەلومەرج و ئاڵەنگارییانەی وڵاتەکەمان ڕووبەڕووی بووەتەوە، دەسەڵاتی دادوەری لە سایەی ویستی نەگۆڕ و سەربەخۆیی پیشەیی خۆیدا، بوێرانە و دادپەروەرانە وەستاوە، ڕۆڵی دەستووری خۆی لە چەسپاندنی ڕاستییەکان و پاراستنی دادپەروەریدا بەرز ڕاگرتووە.
وێڕای دووپاتکردنەوەی پاڵپشتی تەواومان بۆ دەسەڵاتی دادوەری، هاوکات جەخت لەسەر گرنگی پاراستن و ڕێزگرتن لە مافەکانی مرۆڤ و ئازادییە گشتی و تایبەتەکان دەکەینەوە، بەو پێیەی کە کرۆکی دادپەروەری و ئامانجی کۆتایی دەوڵەتێکی دەستوورین.
هیوای سەرکەوتنی بەردەوامتان بۆ دەخوازین، هەروەها بۆ دەسەڵاتی دادوەری عێراق پێشکەوتنی زیاتر و دادپەروەری بەردەوام بەدیبێت.
گەرمترین ڕێز و پێزانینمان قبوڵ بکەن.
د.لەتیف جمال ڕەشید، سەرۆک کۆمار
وەزارەتى خوێندنى باڵا و توێژینەوەى زانستى زەمالەی خوێندنى ماستەر لە وڵاتی چین رادەگەیەنێت.
وەزارەتى خوێندنى باڵا و توێژینەوەى زانستیی حکومەتی هەرێمی کوردستان مامۆستایان، فەرمانبەران و هاوڵاتییانی هەرێمی کوردستان ئاگاداردەکاتەوە، کە وڵاتی کۆماری چینی میللی، لە چوارچێوەی بەرنامەی گەنجی سەرکەوتوو لە کۆماری چینی میللی (Youth of Excellence scheme of China Program) زەمالەی خوێندنى ماستەری پێشکەش بە هەرێمی کوردستان کردووە بەم شێوەی خوارەوە:
هەرکەسێک ئەم مەرجانەی خوارەوەی تێدا بەرجەستەبێت و ئارەزووی خوێندنی لە زانکۆکانی وڵاتی کۆماری چینی میللی هەبێت، بە لەبەرچاوگرتنی ئەم تێبینییانەی خوارەوە، سەردانی ئەم لینکەی خوارەوە بکەن:
مەرج و داواکاریی لایەنی کۆماری چینی میللی:
1- بڕوانامەی دەرچوون کە پشتڕاستکرابێتەوە لەلایەن وەزارەتەکەمان و وەزارەتی داد و فەرمانگەی پەیوەندییەکانی دەرەوە و نووسینگەی پشتڕاستکردنی بڕوانامەکانی سەر بە وەزارەتی دەرەوەی عێراق لە هەرێمی کوردستان.
2- بڕوانامەی بە نمرە بە هەمان شێوەی خاڵی یەکەم.
3- بڕوانامەی تایبەت بە نەبوونی پێشینەی تاوان و ئەستۆپاکی، کە لەلایەن وەزارەتی داد و فەرمانگەی پەیوەندییەکانی دەرەوە، پشتڕاستکرابێتەوە.
4- بڕوانامەی تەندروستی لەلایەن وەزارەتی تەندروستی و وەزارەتی داد و فەرمانگەی پەیوەندییەکانی دەرەوە و نووسینگەی پشتڕاستکردنی بڕوانامەی سەر بە وەزارەتی دەرەوەی عێراق لە هەرێمی کوردستان.
5- تێستی زمانی ئینگلیزییەکانی وەک تۆیفل و ئایلتس کە ئاستەکان لە زانکۆیەک بۆ زانکۆیەک جیاوازە، بەپێی داواکاریی ئەو زانکۆیەی کە داواکاری بۆ پێشکەشدەکەیت.
6- تەمەنی پێشکەشکار لە (45) ساڵ زیاتر نەبێت.
7- دەبێت بە لایەنی کەم (3) سێ ساڵ ئەزموونی کارکردنی هەبێت و بە نووسراوی رەسمی، پشتگیری لە ماوەی ئەزموونی کارکردنەکەی بکرێت.
8- پاسپۆرت کە ماوەی بەسەرچوونی لە شەش مانگ کەمتر نەبێت.
9- سی ڤی و پێرسنەڵ ستەیتمێنتی داواکار.
10- سکرینشۆتی ئەو ماڵپەڕەی کە داواکارییەکەى پێشکەشکردووە بۆ ئەوەی بیسەلمێنیت، کە داواکارییەکەت بە سەرکەوتوویی پێشکەشکراوە.
11- بۆ هەر پرسیارێک، پەیوەندی بەم ژمارە تەلەفۆنە (009647511378422) و ئیمێڵى ([email protected]) بکەن.
مەرجەکانى وەزارەتی خوێندنی باڵا:
– پێشکەشکار دەبێت هاوڵاتیی هەرێمی کوردستان بێت.
– پێشکەشکار ئەگەر فەرمانبەر یان مامۆستا بێت لە دامودەزگاکانی هەرێمی کوردستان، ئەوا دەبێت بە لایەنی کەم دوو ساڵ خزمەتی هەبێت لە پاش بە دەستهێنانی دوایین بڕوانامە.
– پێشکەشکار دەبێت کۆنمرەی بەکالۆریۆسی لە (65) کەمتر نەبێت.
– ئاستی توانستی زمانی داواکراو لە بەرنامەیەک بۆ بەرنامەیەک جیاوازە، بۆیە بەر لە پێشکەشکردن، تکایە تەواوی وردەکارییەکانی ئەم بەرنامەیە بخوێننەوە کە داواکاریی بۆ پێشکەشدەکەن.
– داواکار دەبێت لە هەمان بواری خۆی داواکاریی بۆ بەرنامەی ماستەر پێشکەشبکات، (واتا بەکالۆریۆس و ماستەرەکەی لە هەمان بوار بێت).
– کاندیدی سەرکەوتوو ئەگەر دامەزراو بێت، لەلایەن وەزارەتی پەیوەندیدار تەنیا مۆڵەتی خوێندنی پێدەدرێت، (واتا بە مووچەی بنەڕەتی و دەرماڵە جێگیرەکان).
– کاندیدی سەرکەوتوو، لەلایەن وڵاتی چین پشتگیریی دارایی دەکرێت، بۆ وردەکاریی زیاتر، سەردانی ماڵپەڕی زەمالەکە بکەن.
– کاندیدی ئەم زەمالەیە، مەرجە هیچ پێشینەیەکی تاوانی نەبێت و ئەستۆپاکیی لەلایەن لایەنی پەیوەندیدارەوە، سەلمێندرابێت.
– پێشکەشکردن راستەوخۆ و تەنیا لە رێگەی ماڵپەڕی سەرەکیی زەمالەکە (چین) دەبێت.
وەزارەتی خوێندنی باڵا دەشڵێت، ئەوانەی داواکاری پێشکەشدەکەن و دوای پێشکەشکردنی داواکارییەکەیان لە رێگەی ئۆنلاین، دەبێت تا رۆژی (2026/2/24)، ئەم زانیارییانەى خوارەوە بۆ ئەم ئیمەیڵە رەوانەبکەن ([email protected]):
– ناوی تەواو وەک ئەوەی کە لە پاسپۆرت نووسراوە.
– شوێنی کار
– بەرنامەی پێشکەشکراو واتا ماستەر لە بواری…
– ئیمێڵ
– تەلەفۆن (ژمارەی ئەو تەلەفۆنەی کە واتسئەپی لەسەرە).
– کۆپیی پاسپۆرت.
– نووسراوی پشتگیری کە ماوەی ئەزموونی کاری بسەلمێنێت.
– بڕوانامەی دەرچوون کە پشتڕاستکرابێتەوە لەلایەن وەزارەتەکەمان و وەزارەتی داد و فەرمانگەی پەیوەندییەکانی دەرەوە و نووسینگەی پشتڕاستکردنی بڕوانامەکانی سەر بە وەزارەتی دەرەوەی عێراق لە هەرێمی کوردستان.
– بڕوانامەی بە نمرە بە هەمان شێوەی خاڵی یەکەم.
– بڕوانامەی تایبەت بە نەبوونی پێشینەی تاوان و ئەستۆپاکی کە لەلایەن وەزارەتی داد و فەرمانگەی پەیوەندییەکانی دەرەوە پشتڕاستکرابێتەوە.
– بڕوانامەی تەندروستی کە لەلایەن وەزارەتی تەندروستی و وەزارەتی داد و فەرمانگەی پەیوەندییەکانی دەرەوە و نووسینگەی پشتڕاستکردنی بڕوانامەی سەر بە وەزارەتی دەرەوەی عێراق لە هەرێمی کوردستان.
– تێستی زمانی ئینگلیزییەکانی.
– پاسپۆرت کە ماوەی بەسەرچوونی لە شەش مانگ کەمتر نەبێت.
– سی ڤی و پێرسنەڵ ستەیتمێنتی داواکار.
– سکرینشۆتی ئەو ماڵپەرەی کە داواکارییەکەى بۆ پێشکەشکردووە.
کەشناسی هەرێم: لە رۆژی شەممە ٢٧ـی ١٢، تا سێ رۆژ هەرێم دەکەوێتە ژێر کاریگەری شەپۆلێکی بەفر و باران و زۆرترین ماوەی دابارین رۆژی دووشەممە دەبێت.
ئەمڕۆ چوارشەممە 24ـی 12ـی 2025، بەڕێوبەرایەتی گشتی کەشناسی و بومەلەرزەزانی هەرێم لە بڵاوکراوەیەکدا رایگەیاند، رۆژی شەممە ناوچەکە دەکەوێتە ژێر کاریگەری نزمەپاڵەپەستۆی دەریای ناوەڕاست و بارستە هەوایەکی سارد روو لە ناوچەکە دەکات و سەرەتای شەپۆلەکە بە بەفربارین و نمە باران لە ناوچە سنووریەکان و ناوچە شاخاوییە بەرزەکان دەستپێدەکات و پاشان کاریگەرییەکەی درێژدەبێتەوە بۆ ناوچە جیاجیاکانی تر.
هەر لە بڵاوکراوەکەیدا ئاماژەی بەوەشکرد، ئاستی بارانبارین مامناوەند دەبێت و زۆرترین ماوەی دابارین دەکەوێتە رۆژی دووشەممە و رۆژی سێشەممە لەگەڵ نزمبوونەوەی زیاتری پلەکانی گەرما، ئەگەری بەفربارین هەیە بە تێکەڵی لەگەل نمەباران لە سەنتەری پارێزگای سلێمانی و دهۆک.
وتیشی، رۆژی یەکشەممە و دووشەممە خێرایی با زیاد دەکات و هەندێک کات دەگاتە سەرووی ٤٠ کیلۆمەتر لە کاتژمێرێکدا و پلەکانی گەرما نزم دەبنەوە و لو ناوچە شاخاوییەکان پلەکانی گەرما بۆ ژێر سفر دادەبەزێت. دوانیوەڕۆی رۆژی سێشەممە کاریگەری ئەم شەپۆلە کۆتایی دێت.
بافڵ جەلال تاڵەبانی سەرۆکی یەکێتیی نیشتمانیی کوردستان پەیامێکی بڵاوکردووەتەوە و تێیداهاتووە و پیرۆزبایی لە کریستیانەکان دەکات
دەقی پەیامەکە
بەبۆنەی جەژنی لەدایکبوونی حەزرەتی مەسیح (سڵاوی خوای لێبێت) پیرۆزبایی لە خوشک و برایانی کریستیان لە کوردستان و عیراق و جیهان دەکەم، هیوادارم جەژن لە خۆشی و شادیدا بەسەرببەن.
یەکێتیی نیشتمانیی کوردستان بە ئەرکی خۆی دەزانێت پارێزەر و داکۆکیکاری سەرسەختی کریستیانەکان بێت تاوەکو لە سەرجەم دامەزراوەکانی وڵاتەکەماندا مافەکانیان پارێزراوبێت و نوێنەرایەتیی راستەقینەی خۆیان بکەن.
بافڵ جەلال تاڵەبانی، سەرۆکی یەکێتیی نیشتمانیی کوردستان
سەرۆک کۆمار پێشوازی لە نوێنەری سکرتێری گشتی نەتەوە یەکگرتووەکان دەکات بە بۆنەی کۆتایی هاتنی ئەرکەکەی.
د. لەتیف رەشید سەرۆک کۆماری عیراق، ئەمڕۆ چوارشەممە 24ـی 12ـی 2025، لە شاری سلێمانی پێشوازی لە محەمەد حەسان نوێنەری سکرتێری گشتی نەتەوە یەکگرتووەکان لە عیراق کرد بەبۆنەی کۆتاییهاتنی ئەرکەکەی.
لە میانی دیدارەکەدا سەرۆک کۆمار ستایشی ئەو هەوڵانەی محەمەد حەسان و نوێنەرایەتی نەتەوە یەکگرتووەکان کرد لە پاڵپشتیکردنی پرۆسەی سیاسی و دیموکراسی لە عیراق و بەشداریکردن لە چەسپاندنی بناغەکانی ئاسایش و سەقامگیری، جەختیکردەوە کە کۆتایی هاتنی ئەرکی نوێنەرایەتی نەتەوە یەکگرتووەکان سەرەتای دەستپێکردنی قۆناغێکی نوێی هاوکاری و هەماهەنگی هاوبەشی نێوان هەردوولایە و سەرۆک کۆمار هیوای سەرکەوتنی بۆ محەمەد حەسان خواست لە ئەرک و هەوڵی داهاتوویدا.
لای خۆیەوە نوێنەری سکرتێری گشتی نەتەوە یەکگرتووەکان، سوپاس و پێزانینی خۆی بۆ سەرۆک کۆمار دەربڕی کە بەردەوام پشتیوانی لە کارەکانی نوێنەرایەتی نەتەوە یەکگرتووەکان و ڕۆڵی لە پتەوکردنی هاریکاری نێوان عیراق و نەتەوە یەکگرتووەکان لە بوارە جیاجیاکاندا کردوە.
ڤۆلۆدیمیر زیلینسکی، سەرۆکی ئۆکرانیا رایگەیاند، سەرەڕای ئەوەی لەگەڵ واشنتۆن نەگەشتونەتە رێککەوتن لەسەر پرسی خاک، چاوەڕوانی وەڵامدانەوەی مۆسکۆن سەبارەت بە دوایین رەشنووسی پلانی کۆتایی هێنان بە شەڕ، کە لەگەڵ ئەمریکا گفتوگۆیان لەسەر کردوە.
زیلینسکی لە لێدوانێکیدا بۆ رۆژنامەنوسان، کە ئەمڕۆ چوارشەممە بڵاوکراوەتەوە وتویەتی؛ لە چاوەڕوانی وەڵامی مۆسکۆدان سەبارەت بە پلانەکەی ئەمریکا بۆ کۆتایی هێنان بە جەنگی ئۆکراین و روسیا، کە 20 خاڵە و لە کۆتایی هەفتەی رابردوو لە میامی لەگەڵ ئەمریکییەکان لەسەری رێککەوتوون.
سەرۆکی ئۆکراین، جەختیکردوەتەوە، کە دانوستانکارانی ئەمریکا و ئۆکراین لە دانوستانەکانیاندا بە ئامانجی کۆتایی هێنان بە شەڕ لەگەڵ روسیا نەیانتوانیوە لەبارەی پرس خاکەوە بگەنە رێککەوتن، داواشی کرد ئەو پرسانە لە ئاستی سەرکردایەتیدا تاوتوێ بکرێن.
لای خۆیەوە ئاژانسی فرانس پرێس، لەزاری زیلینسکیەوە بڵاویکردوەتەوە، ئۆکراین و ئەمریکا سەبارەت بە خاکی ناوچەی دۆنێتسک و وێستگەی ئەتۆمی زاپۆریژیا نەگەیشتونەتە رێککەوتن و بەگوێرەی ئەو رەشنوسەی لە پلانی ئاشتیدا هاتووە؛ واشنتۆن، کیێڤ و مۆسکۆ بە هاوبەشی وێستگەی ئەتۆمی زاپۆریژیا بەڕێوەدەبەن.
زیلینسکی ئەوەشی خستوەتەڕو، ئامادەن لەسەر ئاستی سەرکردایەتی کۆبونەوە لەگەڵ ئەمریکا ئەنجامبدەن، بۆ چارەسەرکردنی پرسە هەستیارەکانی وەک بابەتەکانی پرسی خاک.
سەرۆکی ئۆکراین دەشڵێت؛ پلانی ئاشتیی شەڕ رادەگرێت و رێگە خۆش دەکات بۆ ئەگەری دروستکردنی ناوچەی دابرێندراو لەشەڕ و لە ئەگەری سەرکەوتنی ئەو پلانەشدا، کیێڤ هەڵبژاردن ئەنجام دەدات دوای واژۆکردنی پلانی ئاشتی.
لە کۆتایشدا سەرۆکی ئۆکراین رایگەیاندوە، پڕۆژە یاسای ئاشتی کیێڤ ناچار ناکات بە رەسمی دەستبەرداری هەوڵەکانی ببێت بۆ ئەنداموون لە هاوپەیمانی باکووری ئەتڵەسی "ناتۆ".
کارەبای سلێمانی بڵاویکردوەتەوە، بەپێی داتاكانی بەڕێوەبەرایەتی كۆنترۆڵ و گەیاندنی كارەبای سلێمانی، لەماوەی ساڵێكدا لە دوای جێبەجێكردنی "پرۆژەی رووناكی" خواست لەسەر بەكارهێنانی كارەبا بە رێژەی (42%) كەمیكردوه و هۆکارکەشی بۆ هۆشیاری هاووڵاتییان گەڕاندوەتەوە.
ئەمڕۆ چوارشەممە، بڕێوەبەرایەتی کارەبای سلێمانی راگەیەندراوێکی بڵاوکردوەتەوە و تێیدا هاتووە؛ بەراورد هەمان کاتی ساڵی رابردوو، رێژەی بەکارهێنانی کارەبا زیاتر لە 800 مێگاوات کەمی کردوە و بە تێکرا 14 سەعات کارەباش دەدەنە ئەو شوێنانەی بەشدارنین لە پڕۆژەی روناکیدا.
ئەندازیار، غالب محمد بەڕێوەبەری كۆنترۆڵ و گەیاندنی كارەبای سلێمانی رایگەیاندوە، لە مانگی 12ی ساڵی 2024، خواست لهسهر بەكارهێنانی كارەبا بەتێكڕایی (1912) مێگاوات بووە و لەو مانگەدا بەتێكڕایی 8 سەعات و 31 خولەک كارەبا بە هاووڵاتییان دراوە.
ئاماژەی بەوەشکردوە، ئەمساڵ دوای جێبەجێكردنی (پرۆژەی رووناكی) لە مانگی 12 خواست لەسەر بەكارهێنانی كارهبا بەراورد بە مانگی 12ـی ساڵی رابردوو دابەزیوە بۆ (1107 مێگاوات)، بەوەش خواست لەسەر كارەبا بەرێژەی (42%) كەمیكردوە، دەشڵێت؛ ئەو شوێنانەی لە لەچوارچێوەی پرۆژەی رووناكیدا نین، بە بەردهوام لەم مانگەدا بەتێكڕایی (14) سەعات كارەبایان هەبووە.
کارەبای سلێمانی هۆكاری كەمبوونەوەی خواستی لەسەر کارەبای بۆ ئەوە گێراوەتەوە، لە ئێستادا هاووڵاتییان هۆشیارانە و بەرپرسیارانەتر كارەبا بەكاردەهێنن، ئەوەشیان خستوەتەڕوو، كە كارەبا بەردەوام بێت، سیستم و تۆڕی كارەبا سەقامگیرتر دەبێت و کێشە کەمتر دەبێت، ئەمەش وادەکات بەردەوام کارەبا هەبێت و خواست كەم ببێتەوە.
بەڕێوەبەرایەتی گشتی کەشاسناسی و بومەلەرزەزانی هەرێم، ئاماری بارانبارینی 24 سەعاتی رابردووی لە چەند ناوچەیەکی هەرێم بڵاوکردەوە و بە گوێرەی ئامارەکانیش، لە قەزای چوارتا و ناحیەی سەرکەپکان و گوندی نازەنین زۆترین بڕی بارانبارین تۆمارکراوە.
بەگوێرەی ئامارەکانی کەشناسی لە سنوری سلێمانی زۆترین باران باریوە؛ لە قەزای چوارتا 38.5 ملم لە ناو سەنتەری پارێزگاکەش 21.7 ملیم باریوە.
هاوکات لە هەمان کاتدا، لە سنوری پارێزگای هەولێر، لە ناحیەی سەرکەپکان 23.1 ملم بارانباریوە و لە گوندی نازەنینیش زۆترین بارانبارین تۆمارکراوە کە 26.9 ملم و لە سەنتەری پارێزگاکەش 14 ملیم بارانباریوە .
کەشناسی ئاماری پارێزگای دهۆکی بڵاونەکردوەتەوە و لە پارێزگای هەڵەبجەش کەمترین بڕی بارانبارین تۆمارکراوە، کە تەنها 1.5 ملم باریوە و لە شارۆچکەی تەوێڵەش 2 ملم و لە هەریەکە لە قەزای خورماڵ و ناحەیەی سیروانیش 1.3 ملم باریوە.
پێشتریش کەشناسی رایگەیاندبوو، لە دوانیوەڕۆی ئەمڕۆوە شەپۆلی بارانبارین کۆتایی دێت و کەشەکە ئاساییی دەبێتەوە، پلەکانی گەرماش بەراورد بە دوێنێ کەمێک نزمدەبنەوە.
سەرەڕای هۆشداری چەند شارەزایەکی کەشوهەوا، لە ئەگەری لێزمەباران، کەشناسی هەرێم رایگەیاند، پلەکانی گەرما نزمدەبنەوە و شەپۆلی بارانبارینیش لە دوانیوەڕۆی ئەمڕۆوە بەرەو کۆتایی دەچێت، لە بارەی کەشی سبەینێشەوە دەڵێت؛ پلەکانی گەرما نزیک دەبن لە تۆمارکراوەکانی ئەمڕۆ.
ئەمڕۆ چوارشەممە، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی بۆ 48 سەعاتی داهاتوو بڵاوکردوەتەوە و بە گوێرەی پێشبینییەکانیش لە سنوری پارێزگای هەولێر و دهۆک نیمچە هەور و پەڵە هەور دەبێت و شەپۆلی بارانبارین کۆتایی هاتووە.
سەرەڕای ئەوەی چەند شارەزایەکی کەشوهەوا هۆشداری دەدەن لە ئەگەری لێزمە باران، بەڵام کەشناسی دەڵێت؛ لەسنوری پارێزگاکانی سلێمانی و هەڵەبجە و کەرکوک و ئیدارەکانی گەرمیان و راپەرین بە شێوەی نمە بارانی پچر پچر بەردەوامی دەبێت تا دوای نیوەرۆ و دواتر کەشەکە ئاسایی دەبێتەوە.
لە بارەی پلەکانی گەرماشەوە، ئاماژەی بەوەکردوە، بەراورد بە تۆمارکراوەکانی دوێنێ کەمێک نزمدەبنەوە.
کەشناسی پێشبینی بۆ سبەینێ پێنجشەمەش کردوە و ئاسمان ساماڵ و پەڵە هەور و هەندێ کات نیمچە هەور دەبێت و پلەکانی گەرماش نزیک دەبن لە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی بۆ رۆژی پێنجشەممە بەمشێوەیەیە؛
هەولێر : 15 پلەی سیلیزی
سلێمانی : 13 پلەی سیلیزی
دهۆک : 16 پلەی سیلیزی
زاخۆ :16 پلەی سیلیزی
کەرکوک : 16 پلەی سیلیزی
هەڵەبجە : 12 پلەی سیلیزی
سۆران: 11 پلەی سیلیزی
گەرمیان : 18 پلەی سیلیزی