هەواڵەکان
لە چوارچێوەی ئۆپراسیۆنی بەرەبەیان، سەرۆك وەزیرانی عیراق فەرمانێكی نوێی دەركرد و پاداشتی دارایی شایستە دەدرێتە ئەو كەسانەی گەندەڵی ئاشكرادەكەن.
نووسینگەی راگەیاندنی عەلی زەیدی، سەرۆك وەزیرانی عیراق، لە راگەیەنراوێكدا ئاشكرایان كرد، عەلی زەیدی داوا لە تەواوی هاووڵاتیان دەكات زانیاری بدەن لەسەر ئەو سامان و پارە گشتییانەی كە بەهۆی گەندەڵییەوە براون، بەمەبەستی بەشداریكردن لە ئاشكراكردن و گێڕانەوەیان بۆ دەوڵەت، ئەمەش لە سۆنگەی بەرپرسیارێتی شەرعی، ئەخلاقی و نیشتمانی و لەپێناو پاراستنی ماڵی گشتیدا.
وتیشی، ئەو كەسانەی زانیاری پێویست لەبارەیەوە دەدەنەوە پاداشتی دارایی شایستەی پێدەدرێت.
هەروەها ئاماژە بەوەشكراوە، لایەنە پەیوەندیدارەكان لە داهاتوویەكی نزیكدا لینكێكی ئەلیكترۆنی تایبەت بە وەرگرتنی ئەو جۆرە سكاڵا و زانیارییانە رادەگەیەنن.
ماوەی نزیكە دوو هەفتیە ئۆپراسیۆنی بەرەبەیانی لە لایەن هێزە ئەمنیەكانی عیراقەوە بە فەرمانی سەرۆك وەزیرانی عیراق بۆ دەستگیكردنی گەندوڵكاران و گێرانەوەی سامانی گشتی دەستپێكردوە بە وتەی حكومەتی عیراق تا ئێستا نزیكەی 30 كەس بەو تۆمەتە دەستگیركراون.
ژمارەی قوربانیانی دوو بوومەلەرزەكەی ئەم دواییە ڤەنزوێلا نزیكبووەوە لە سێ هەزار گیانلەدەستدان.
خۆرخی رۆدریگێز، سەرۆكی كۆمەڵەی نیشتمانی لە پەرلەمان ڤەنزوێلا رایگەیاند، ژمارەی گیانلەدەستدان بەهۆی ئەو دوو بوومەلەرزە یەك لەدوای یەكەی كە وڵاتەكەی گرتەوە، بۆ لانیكەم دوو هەزار و 954 كەس بەرزبووەتەوە، لە كاتێكدا زیاتر لە 16 هەوار و 500 كەسی دیكەش بریندار بوون، تا ئێستاش گەران بەدوای كەسانی بێسەروشێن بەردەوامە.
لەو كاتەوەی كە دوو بوومەلەرزە بەهێزەكە لە 24ی حوزەیرانی رابردوودا بە گوڕی 7.2 پلە و 7.5 پلە بەپێی پێوەری ڕێختەر ئەو وڵاتەیان هەژاند، دەسەڵاتداران 942 پاشكۆبوومەلەرزەیان تۆماركردووە.
بەپێی ئامارەكانی ڤەنزوێلا زیانی باڵەخانەكان لە كاتی بوومەلەرزە سەرەكییەكاندا نزیكەی 190باڵەخانە بە تەواوی رووخاون و 850باڵەخانەی دیكەش زیانیان بەركەوتووە.
هەروەها، زیاتر لە 16هەزار كەس بەهۆی ئەو كارەساتە سروشتییەوە ماڵ و حاڵی خۆیان لەدەستداوە و ئاوارەبوون.
نزار ئامێدی، سەرۆك كۆماری عیراق لە چاوپێكەوتنێكیدا لەگەڵ كەناڵی "الحدث" رایگەیاند، هیچ بژاردەیەك لە بەردەم یەكێتیی نیشتمانیی كوردستان و پارتی دیموكراتی كوردستاندا نییە، جگە لە رێككەوتن لەسەر پێكهێنانی حكومەتێك كە تێیدا هاوبەشی راستەقینە بن.
لە چاوپێكەوتنەكەدا ئەوەشی خستەڕوو، پێویستە لە هەرێمی كوردستان یاسای بوودجە دەربكرێت و پەرلەمان كارابكرێتەوە و رۆڵی چاودێری خۆی بگێڕێت و چاودێری كاروبارەكانی حكومەت و ئەو شایستە داراییانە بكات لە چوارچێوەی یاسای بودجە بۆ حكومەتی هەرێم دەچێت.
سەرۆك كۆمار ئاماژەی بەوەشدا، پێكهێنانی حكومەتی نوێی هەرێم بە هاوبەشی راستەقینە لەنێوان یەكێتی و پارتی، كلیلی چارەسەری كێشەكانی نێوان عیراق و هەرێمە.
هەروەها دووپاتیكردەوە، پێویستە پەیوەندییەكانی نێوان عیراق و هەرێم لەسەر بنەمای دەستوور پەرەی پێ بدرێت.
پۆلیسی گەرمیان راگەیەندراوێکی بڵاوکردوەتەوە و دەڵێت؛ لەگەڵ بەرزبوونەوەی پلەی گەرما لە وەرزی هاوین، هەندێک دیاردەی کۆمەڵایەتی و کێشەی ئەمنی روی لە زیادبوون دەکات.
لە راگەیەندراوەکدا هاتووە؛ توێژینەوەکان ئەوەیانخستوەتەڕوو، گەرمای توند دەتوانێت ببێتە هۆی زیادبوونی تووڕەیی، کەمبوونەوەی ئارامی دەروونی و هەندێک هەڵسوکەوتی خێرا و نەگونجاو، کە لە هەندێک حاڵەتدا دەگاتە مشتومڕ و توندوتیژی.
ا پۆلیسی گەرمیان داوا لە هاووڵاتیانیش دەکات، ئارامی خۆیان بپارێزن و لە کاتی تووڕەبووندا بڕیارێکی خێرا نەدەن و لە مشتومڕ و ناکۆکی دوور بکەونەوە و گفتوگۆی ئارام هەڵبژێرن.
خانەی راگەیاندنی ئەمنی عیراق بڵاویکردەوە، فڕۆکە جەنگییەکانی عیراق لە جۆری F-16یی هێرشێکی ئاسمانی سەرکەوتوو و وردیان کردووەتە سەر چەند حەشارگە و مۆڵگەیەکی تاقمە تیرۆریستییەکان لە سنووری کەرکوک.
خانەی راگەیاندنی ئەمنی حێراق راگەیەندراوێکی بڵاوکردوەتەوە و تییدا هاتووە؛ ئەم ئۆپراسیۆنە خێرایە دوای پلان داڕشتن و بەدواداچونێکی وردی پێنج رۆژەی بەردەوام بووە.
ئاماژەی بەوەشکردوە، هێرشەکان لە رێگەی هەماهەنگییەکی باڵا لە نێوان خانەی بەئامانجگرتن لە فەرماندەیی ئۆپراسیۆنە هاوبەشەکان، زانیارییە هەواڵگرییە پشتڕاستکراوەکانی دەزگای هەواڵگری نیشتمانی عیراق و بە هاوکاریی لەگەڵ دەزگای دژەتیرۆری عیراق ئەنجام دراوە.
بە گوێرەی زانیارییەکان، چەند جارێک حەشارگەکانی تیرۆرستان کراونەتە ئامانج و دوابەدوای هێرشە ئاسمانییەکان هێزەکانی کۆماندۆی کوردستان و دژەتیرۆری عیراق دەستیان بە کێوماڵکردنی ناوچەکە کردووە.
دوای ئەوەی ئێوارەی ئەمڕۆ بۆ جاری دووەم لە ماوەی چەند رۆژی رابردودا، ئاگر لە سنوری گوندی زەڵمی هەورامان کەوتەوە، دوای ئەوەی روبەڕێکی زۆری پوشوپاوان و درەخت سوتان، توانرا لەلایەن هاووڵاتییانی و تیمەکانی بەرگریی شارساتنی خورماڵەوە کۆنتڕۆڵ بکرێت.
لەبارەی ئاگرەکەوە، سەرچاوەیەکی تایبەتی بە کوردسات نیوزی راگەیاند، گومانیان هەیە ئاگرەکەی زەڵم بەدەست ئەنقەست کرابێتەوە و لێکۆڵینەوەش لە روداوەکە بەردەوامە.
لای خۆشیەوە، بەڕێوەبەری ناحیەی خورماڵ بە پەیامنێری کوردسات نیوزی راگەیاند، ئاگرکەوتنەوەی سنوری گوندی زەڵم سروشتی نییە و بەیانی لەگەڵ لایەنە پەیوەندایدارەکان بەمەیدانی دەچنە شوێن ئاگرەکە و بەدواداچونی بۆ دەکەن.
"گومان دەکرێت ئاگرەکە لەلایەن دوو ماتۆرسکیلەوە کرابیتەوە و لێکۆڵینەوەیان لە روداوەکە دەستپێکردوە"، ئەمەش لێدوانی وتەبێژی پۆلیسی بەرگریی شارستانی هەڵەبجەیە بۆ کوردسات نیوز.
جێی باسە ئەمە دووەم جارە ئاگر لەو سنورە بکەوێتەوە، لە ماوەی چوار رۆژی رابردوودا و رۆژی پێنجشەممەی رابردووش بە هەمان شێوە ئاگر کەوتوەوە و دوای چەندین سەعات بەهۆی فراوانی ئاگرەکەوە لە لایەن هاووڵاتیانی ناوچەکە و تیمەکانی بەرگریی شارستانی بە زەحمەت توانرا کۆنتڕۆڵ بکرێت.
دۆناڵد ترەمپ بە پێگەی ئەکسیۆسی راگەیاند، بنیامین ناتانیاهۆ داوای کردوە لە کۆشکی سپی لەگەڵیدا کۆببێتەوە و رەنگە هەفتەی داهاتوو کۆبوونەوەکە ئەنجام بدەن
سەرۆکی ئەمریکا ئاماژەی بەوەشکردوە، ناتانیاهۆ دەزانێت کێ سەرۆکە و پەیوەندی نێوانیان زۆر باشە.
لەبارەی پرسی ئێرانیشەوە دۆناڵد ترەمپ رایگەیاند، لەگەڵ ئێرانییەکان رێککەوتوون هەفتەیەک پشوبدەن لە دانوستانەکانی نێوانیان تا پرسەی عەلی خامنەیی، رابەری پێشوی باڵای ئێران کۆتایی دێت.
هەروەها سەرسامی خۆی دەربڕیوە، کاتێک بینیویەتی خەڵکی ئێران دەگرین لە پرسەی عەلی خامنەییدا، چونکە ئەو پێیوابوە ئێرانییەکان رقیان لێیەتی.
سەرۆکی ئەمریکا جارێکیتریش دوپاتی کردوەتەوە، ئێرانییەکان تکادەکەن بۆ ئەوەی لەگەڵیاندا رێکبکەوێت و لەکاتی پرسەی عەلی خامنیەشدا هیچ لایەنێک هێرش ئەنجام نادات.
ئەمشەو ئەنجومەنی وەزیرانی عیراق کۆدەبێتەوە و سەرچاوەیەکی تایبەت لە حکومەتی هەرێمی کوردستانەوە بە پەیامنێری کوردسات نیوزی راگەیاندووە، چاوەڕوان دەکرێت ئەمشەو لە کۆبوونەوەکەدا، وەزیرە کوردەکان لەگەڵ عەلی زەیدی سەرۆک وەزیران، پرسی داهاتی نانەوتی هەرێم تاوتوێ بکەن، ئەمەش دوای ئەوەی لە کۆبوونەوەکانی کۆتایی هەفتەی رابردووی نێوان وەفدی باڵای هەرێم و وەزارەتی دارایی عیراق نەگەیشتوونەتە هیچ رێککەوتنێک.
بە گوێرەی زانیارییەکانی کوردسات نیوز، کە لە سەرچاوەیەکی تایبەتەوە وەریگرتوە، فالح ساری، وەزیری دارایی عیراق بە وەفدی هەرێمی راگەیاندووە، ئەگەر بۆ ئەم مانگەش بڕی 120 ملیار دینار وەک داهاتی نانەوتی رادەست نەکەن، ئەوا پارەی موچەی مانگی شەشی فەرمانبەرانی هەرێم بە لێبڕینی ئەو بڕە پارەیەوە رەوانە دەکرێت.
جەختیشی کردووەتەوە، رادەستکردنی ئەم بڕە پارەیە مانگانە بەردەوام دەبێت تا یەکلاییکردنەوەی پرسەکە، چونکە گۆڕانکاری لەم بڕیارەدا تەنها لە دەسەڵاتی سەرۆک وەزیران و کابینەی وەزاری عیراقدایە.
لە بەرانبەردا، سەرچاوەکە ئاماژەی بەوە کردووە، هەرێم ئەوەی لەسەر شانی بووە جێبەجێی کردووە، بەڵام لە توانایدا نییە بۆ ئەم مانگانە بڕی 120 ملیار دینار کۆبکاتەوە؛ هەر بۆیە داوایان لە وەفدی دیوانی چاودێری دارایی عیراق کردووە کە ئێستا لە هەرێمن، وردبینی بۆ داهاتی مانگەکانی چوار تا شەش بکەن و راپۆرتەکەیان بۆ وەزارەتی دارایی عیراق بەرز بکەنەوە تا قەبارەی راستەقینەی کەمبوونەوەی داهاتی نانەوتی هەرێم رون بێتەوە.
سەرۆك وەزیرانی عیراق رایگەیاند، ئاستەنگییەكانی بەردەمیان هەرچەند سەخت بێت پاشەكشە ناكەن لە راوەدونانی گەندەڵكاران و گێڕانەوەی موڵكی دەوڵەت، هاوکات سوپاسی یەکێتی نیشتیمانی کوردستانیش دەکات بۆ پشتیوانیکردن لە بەرەنگاربونەوەی گەندەڵی.
عەلی زەیدی، سەرۆك وەزیرانی عیراق لە تۆڕی كۆمەڵایەتی ئێكس بڵاویكردەوە، حكومەتی عیراق بە خۆڕاگری و پێداگرییەوە هەنگاوی باشی ناوە لە راوەدونانی گەندەڵكاران، گێڕانەوەی موڵكی دەوڵەت و پتەوكردنی دامودەزگاكان و چەسپاندنی دادپەروەری، هەر چەند ئاستەنگییەكانی بەردەمیشیان سەخت بێت پاشەكشە ناكەن لەو رێبازەی گرتویانەتە بەر.
ئەویشی خستەڕو، سوپاسی و ستایشی هاوڵاتییان و هەموو ئەو لایەنە حكومی و ئەمنی و سیاسییانە دەكەن پشتیوانیان بوون لە بەرەنگاربوونەوەی گەندەڵی لەنێو لایەنە سیاسییەكانیشدا یەكێتی نیشتمانی كوردستان.
سەرۆك وەزیرانی عیراق دەشڵێت، ئەو پشتیوانییە فراوانەی بۆ هەڵمەتی بەرەنگاربوونەوەی گەندەڵی هاتووەتە ئاراوە، دەرخەری ئەو راستییەیە بەرەنگاربوونەوەی گەندەڵی تەنها ئەركی حكومەت نییە، بەڵكو ئەركێكە هەموو گەلی عیراق تێیدا یەكدەگرن بۆ بەرگریكردن لە موڵكی گستی، سەروەری یاسا و داهاتووی عیراق.
میدیاکانی ئێران ناوی کۆتایی ئەو کەسانەیان راگەیاند ،کە رێبەرایەتی نوێژی پرسەی عەلی خامنەیی رێبەری پێشووی باڵای ئێران دەکەن لە شارەکانی تاران، قوم و مەشهەد و ئاماژەیان بەوەشکردوە موجتەبا خامنەیی بەشداری لە پرسەی باوکیدا ناکات.
دوای ئەوەی رۆژنامەی نیویۆرک تایمز بڵاویکردوەتەوە، کە موجتەبا خامنەیی بە لێپرسراوانی ئێرانی راگەیاندووە، دەیەوێت لە پرسەی باوکی لە مەزارگەی ئیمامی هەشتەمی ئێزدی لە شاری مەشهەد بەسداری بکات، میدیاکانی ئێران ئەوە رەت دەکەنەوە.
بە پێی راپۆرتە سەرەتاییەکان، دوای گۆرانکاری لە ناوی ئەو کەسانەی لە هەرسێ شاری ئێران رابەرایەتی نوێژی پرسەکە دەکەن، بە رەسمی رایان گەیاندوە، موجتەبا خامنەیی بەشداری ناکات.
ئەمە لە کاتێکدایە، پێشتر نیویۆرک تایمز بە پشتبەستن چەند سەرچاوەیەک رایگەیاندبوو، تا ئێستا بەرپرسانی ئەمنی دژی ئامادەبوونی موجتەبا خامنەیین لە رێورەسمی بەخاکسپاردنی باوکیدا.
رۆژنامەکە ئەوەی خستبوەڕوو، لێپرسراوانی ئێران ترسیان هەیە ئیسرائیل ئەو روداوە بەکاربهێنێت بۆ کوشتنی یان شوێنپێهەڵگرتنی و دواتر بیکاتە ئامانج.
وەزارەتی دارایی و ئابووریی حکومەتی هەرێمی کوردستان، ئەمڕۆ شەممە، راگەیەنراوێکی بڵاوکردەوە و تێیدا سەرجەم ئەو تۆمەت و دەنگۆیانە رەتدەکاتەوە کە باس لەوە دەکەن، وەفدی هەرێم لە بەغداد داوای دواخستنی ناردنی موچەی مانگی حوزەیرانی کردبێت.
وەزارەتی دارایی رایگەیاند، ماوەی چەند رۆژێکە هەڵمەتێکی چەواشەکارانە لەلایەن بەشێک لە میدیا و پەیجەکانی سۆشیاڵ میدیاوە دەستیپێکردووە. رایدەگەیەنین کە هەرکەس و لایەنێک باسی لەوە کردبێت وەفدی هەرێم داوای نەناردنی موچەی کردووە، درۆ دەکات."
جەختیشیکردەوە کە وەفدی هەرێم و وەزارەتی دارایی پابەندن بە بڕیاری دادگای فیدراڵییەوە کە موچەی بەدەرکردووە لە سەرجەم کێشە و بابەتە سیاسی و تەکنیکییەکان، بۆیە راگرتن یان دواخستنی موچە بە هیچ پاساوێک قبوڵکراو نییە.
وەزارەتی دارایی ئاشکرایکرد، سەردانی وەفدەکە بۆ بەغداد تایبەت بووە بە گفتوگۆکردن لەسەر ئەم سێ پرسە سەرەکییە، یەکەم، کێشەکانی تایبەت بە گومرگ و قۆناغەکانی جێبەجێکردنی سیستمی (ئەسیکۆدا). دووەم، کێشەکانی تایبەت بە باج و کۆمپانیاکانی هەرێمی کوردستان. سێههم، کێشەکانی لێخۆشبوونی گومرگی، پاراستنی بەرهەمی ناوخۆیی و پرسی کوالیتی کۆنترۆڵ.
پرسی داهاتی ناوخۆ و ناردنی ڕاپۆرتەکان:
سەبارەت بە داهاتی ناوخۆ، وەزارەتی دارایی ئەوەشی خستەڕوو، لە کۆبوونەوەیەکی لاوەکیدا لەگەڵ وەزیری دارایی عێراق گفتوگۆ کراوە، و وەفدی هەرێم داوای کردووە مامەڵەکە بەپێی یاسای بودجە و یاسای ئیدارەدانی دارایی بێت، بە شێوازێک کە (50٪)ی داهاتی ناوخۆ بدرێتە حکومەتی فیدراڵ لەسەر بنەمای راپۆرتی تەرازووی پێداچوونەوەی مانگانە.
سەرۆک کۆماری عیراق مەرسومێکی کۆماریی دەرکرد، کە تێیدا بڕیاردراوە بە خانەنشینکردنی محەمەد شیاع سودانی، سەرۆک وەزیرانی پێشوو و ئەندامانی کابینە وزارییەکەی.
بەپێی ئەو بەڵگەنامەیەی کە بڵاوکراوەتەوە، مەرسومی کۆماریی ژمارە (24) پاڵپشت بە ئەحکامەکانی بەندی (حەوتمەم) لە مادەی (73)ی دەستور، و بەندی (یەکەم) لە مادەی (14)ی یاسای خانەنشینیی یەکگرتووی ژمارە (9)ی ساڵی 2014، و لەسەر پێشنیازی سەرۆک وەزیرانی ئێستای عیراق دەرکراوە.
بەپێی زانیارییەکان، ئەم مەرسومە ئەو وەزیرانە ناگرێتەوە کە لە پێکهاتەی حکومەتی نوێی ئێستادا پۆستەکانی خۆیان پاراستووە، لەوانەش فوئاد حوسێن، وەزیری دەرەوە و خالید شوانی، وەزیری داد.
مەرسومەکە لە بڕگەی یەکەمیدا بڕیاری داوە بە خانەنشینکردنی سەرۆک و ئەندامانی ئەنجومەنی وەزیرانی پێشوو کە ئەمانەن:
1-محەمەد شیاع سودانی، سەرۆک وەزیرانی پێشوو
2-حەیان عەبدولغەنی وەزیری نەوت
3- تەیف سامی وەزیری دارایی
4-عەبدولئەمیر کامیل عەبدوڵا وەزیری ناوخۆ
5-ساڵح مەهدی مەتڵەب وەزیری تەندروستی
6- خالید بەتال نەجم وەزیری پیشەسازی و کانزاکان
7-ئەسیر داود سەلمان وەزیری بازرگانی
8-عەون زیاب عەبدوڵا وەزیری سەرچاوەکانی ئاو
9-ئەحمەد فەکاک ئەحمەد وەزیری رۆشنبیری، گەشتوگوزار و شوێنەوار
10- ئەحمەد جاسم سابیر وەزیری کار و کاروباری کۆمەڵایەتی
11-هەڵۆ مستەفا عەسکەری وەزیری ژینگە
12-بەنگین عەبدوڵا رێکانی وەزیری ئاوەدانکردنەوە و نیشتەجێکردن و شارەوانییە گشتییەکان
بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە جۆشوا هاریس، هەڵسوڕێنەری باڵیۆزخانەی ئه‌مریکا لە عیراق کرد.
لە کۆبوونەوەکەدا سەرۆک بافڵ پیرۆزبایی رۆژی سەربەخۆیی ئەمریکای لە جۆشوا هاریس و گەلی ئەمریکا کرد.
دوایین گۆڕانکارییەکانی رەوشت سیاسیی ناوچەکە و عیراق و پێکهێنانی حکومەتی هەرێمی کوردستان خرانەبەر باس و بافڵ جەلال تاڵەبانی جەختی لە گرنگیی هەوڵە هاوبەش و دیپلۆماسییەکان کردەوە بۆ کەمکردنەوەی گرژییەکان، لەپێناو چەسپاندنی ئاشتی و سەقامگیری لە ناوچەکەدا.
وەزارەتی دەرەوەی ئێران، جەختدەکاتەوە، ناکرێت گەروی هورمز ببێتە گۆڕەپانی نمایشکردنی هێزی سەربازی لەلایەن ئەو هێزانەی کە سەر بەم ناوچەیە نین.
کازم غەریب ئابادی، جێگری وەزیری دەرەوەی ئێران بۆ کاروباری یاسایی و نێودەوڵەتی رایگەیاند: "وڵاتەکەی هۆشداری دەدات لە هەر جووڵەیەکی سەربازی لە ناوچەکەدا کە ببێتە هۆی زیاترکردنی گرژییەکان."
ئاماژەی بەوەشکرد، ئەو دەوڵەتانەی کە دەکەونە سەر کەناراوەکانی گەروی هورمز، خۆیان بەرپرسیارێتیی دەستەبەرکردنی ئاسایش و سەقامگیرییەکەی دەگرنە ئەستۆ، هاوكات دووپاتی کردەوە کە "هەر لایەنێک هەوڵی نانەوەی قەیران بدات، خۆی بەرپرسیار دەبێت لە دەرئەنجامی سەرکێشییەکانی."
ئەم لێدوانانەی وەزارەتی دەرەوەی ئێران لە کاتێکدا دێن، کە گرژییە ناوچەیییەکانی پەیوەست بە هاتوچۆی دەریایی لە گەروی هورمزدا بەردەوامییان هەیە، کە یەکێکە لە گرنگترین رێڕەوە ستراتیژییەکانی جیهان بۆ هەناردەکردنی نەوت.
کەشناسیی هەرێم ئاشکرایکرد، پلەکانی گەرما نزم دەبنەوە و لە کاتەکانی شەویشدا ئەگەری نمەباران لە ناوچە شاخاوییەکان هەیە.
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، پێشبینییەکانی کەشوهەوای بۆ 48 کاتژمێری داهاتوو راگەیاند، بەپێی پێشبینییەکانیش پلەکانی گەرما نزمبوونەوە بەخۆیانەوە دەبینن.
کەشناسی هەرێم رایگەیاند، ئەمڕۆ ئاسمان ساماڵ دەبێت لەگەڵ دروستبوونی هەندێک پەڵەهەور لە هەندێک کاتدا، لە کاتەکانی شەودا، ئەگەری بارینی نمەبارانێکی کەم هەیە، بەتایبەتی لە ناوچە شاخاوییە سنورییەکانی ئیدارەی سەربەخۆی سۆران و سنوری پارێزگای دهۆک و زاخۆ.
ئاماژەی بەوەشکرد، پلەکانی گەرما بەراورد بە تۆمارکراوەکانی دوێنێ، دوو بۆ سێ پلە نزم دەبنەوە.
کەشناسی هەرێم ئەوەشی خستەڕوو، سبەینێ ئاسمان ساماڵ دەبێت لەگەڵ دروستبوونی هەندێک پەڵەهەور لە کات و شوێنی جیاجیادا.، هاوکات پلەکانی گەرما نزیک دەبێتەوە لەو پلانەی بۆ ئەمڕۆ شەممە تۆمار دەکرێن.
بەرزترین پلەکانی گەرمای پێشبینیکراو بە پلەی سیلیزی
هەولێر: 41 پلەی سیلیزی
سلێمانی: 40 پلەی سیلیزی
دهۆک: 40 پلەی سیلیزی
هەڵەبجە: 41 پلەی سیلیزی
چەمچەماڵ: 41 پلەی سیلیزی
زاخۆ : 41 پلەی سیلیزی
ئاکرێ : 40 پلەی سیلیزی
پیرمام: 36 پلەی سیلیزی
حاجی ئۆمەران : 32 پلەی سیلیزی
گەرمیان : 43 پلەی سیلیزی
سەرۆکی ئەمریکا رایدەگەیەنێت؛ وڵاتەکەی ورەی شەڕکردنی ئێرانی تێکشکاندووە و لەبەرانبەریشدا بۆ بەڕێوەبەردنی رێوڕەسمی بەخاکسپاردنی عەلی خامنەیی، رابەری باڵای پێشووی ئێران، هەفتەیەک مۆڵەت و ئارامیی پێداون.
دۆناڵد ترەمپ، سەرۆکی ئەمریکا لە وتارێکدا بەبۆنەی یادی 250 ساڵەی سەربەخۆیی ئەمریکا لە چیای "راشمۆر" رایگەیاند: ململانێکانیان لەگەڵ ڤەنزوێلا تەنها لە یەک رۆژدا یەکلاکردەوە، هاوكات گورزی زۆر کوشندە و بەهێزیان لە ئێران وەشاند.
ترەمپ ئاماژەی بەوەشکرد، لە ئێستادا لایەنی ئێرانی بە پەرۆشەوەیە و بە هەموو شێوازێک هەوڵدەدات بۆ ئەوەی لەگەڵ ئەمریکادا بگاتە رێککەوتن و چارەسەرێکی سیاسی.
سەرۆکی ئەمریکا وتیشی: "ئێمە لە ڕووی بەخشندەیی و میهرەبانیی خۆمانەوە، مۆڵەتی هەفتەیەکمان بە ئێران داوە بۆ راگرتنی ئۆپراسیۆنەکان، تا بتوانن رێوڕەسمی بەخاکسپاردنی رابەرەکەیان ئەنجام بدەن."
ئەم لێدوانانەی ترەمپ لە کاتێکدا دێن کە لە بەیانی دوێنێ هەینییەوە، رێوڕەسمی بەڕێکردنی تەرمی عەلی خامنەیی، رابەری کۆچکردووی ئێران بە ئامادەبوونی وەفدە بیانییەکان و کەسایەتییە سیاسی و گشتییەکان دەستیپێکردووە. بڕیاریشە رێورەسمەکە بۆ ماوەی حەوت رۆژ بەردەوام بێت و تەرمەکەی بە شارەکانی تاران و قوم و وڵاتی عیراقدا تێپەڕێت، تا دواجار لە زێدی خۆی لە شاری "مەشەدە" بە خاک بسپێردرێت.