هەواڵەکان
دۆناڵد ترەمپ، سەرۆکی ئەمریکا سوپاسی فیفای کرد بۆ هەڵوەشاندنەوەی کارتە سورەکەی هێرشبەری هەڵبژاردەی ئەمریکا فلۆریان بالۆگانی و ئاماژەی بەوەکردوە فیفا کارێکی دروستی ئەنجامداوە و نادادپەروەرییەکی گەورەیان راستکردەوە.
سەرۆکی ئەمریکا لە تیوتێکدا لە ترسو سۆشیال، کە خۆی خاوەندارتی دەکات رایگەیاندوە، سوپا بۆ فیفا کە کارتە سورەکەی فلۆریان بالۆگانی لابرد، ئەوان بەو کارەیان نادادپەروەرییەکی گەورەیان راستکردەوە.
بەبڕیاری فیفا، لە دوای لابردنی کارتەسورەکەی هێرشبەرەکی ئەمریکا، ئیتر دەتوانێت لە یاری قۆناغی 16ی جامی جیهانی 2026بەرانبەر بەلجیکا یاری بکات.
هێرشبەرە ئەمریکییەکە، لە یارییەکەی بەرانبەر بۆسنە و هەرسک بە کارتی سوری راستەوخۆ کرایە دەرەوەی و و بەپێی یاسا دەبوو بۆ یەک یاری رابگیرێت، بەڵام لیژنەی دادوەری فیفا بە ئاماژەدان بە مادەی 27ی یاسای دیسپلین، کارتەکەی سریەوە.
هێرشبەرە تەمەن 25 ساڵەکە، کاریگەری راستەوخۆی لەسەر ئاستی هەڵبژاردەکەی هەیە و توانیویەتی لە مۆندیالی 2026 سێ گۆڵ تۆمار بکات.
عەبدولـلەتیف ئەحمەد، راگەیەندراوێکی بڵاوکردووەتەوە و تێیداهاتووە: هەرچەندە لەلایەن ئەوقافەوە پێم راگەیەندرا کە بەردەوام بم لە پێشکەشکردنی وتارەکانم، بەڵام من چاک دەزانم کە فشاری زۆر و قورسیان لەسەرە و ئەوەی لە پشت پەردەوە دەگوزەرێت، پیلانێکی زۆر گەورەترە لەوەی دەبینرێت، بۆ ئەوەی باری سەر شانی ئەوانیش سووک بکەم و ڕێگری لە هەر گرژییەک بکەم، بڕیارم دا بۆ ماوەیەک پشوویەک بدەم و وتار نەدەم.
دەقی راگەیەندراوەکە
ئاگادارییەک بۆ موسوڵمانانی خۆشەویست و لایەنی پەیوەندی دار..
السلام عليكم ورحمة الله وبركاته
وەک هەموان ئاگادارن، لە ماوەی ڕابردوودا بڕیارێکی ناڕەوا و بێ بنەمای یاسایی دژی من دەرکرا، کە بەو هۆیەوە لە وەزیفەکەم دوورخرامەوە. بەڵام وا دیارە نەیاران و خاوەن دڵە نەخۆشەکان هێشتا ئۆقرەیان نەگرتووە و ئیسراحەتیان نەکردووە، بۆیە فشاری زۆریان خستووەتە سەر بەڕێوبەرایەتی ئەوقاف بەمەبەستی ڕێگریکردن لە وتاردانم.
لێرەوە بە پێویستی دەزانم ئەم چەند خاڵەتان بۆ ڕوون بکەمەوە:
- هەرچەندە لەلایەن ئەوقافەوە پێم ڕاگەیەندرا کە بەردەوام بم لە پێشکەشکردنی وتارەکانم، بەڵام من چاک دەزانم کە فشاری زۆر و قورسیان لەسەرە.
- ئەوەی لە پشت پەردەوە دەگوزەرێت، پیلانێکی زۆر گەورەترە لەوەی دەبینرێت.
- بۆ ئەوەی باری سەر شانی ئەوانیش سووک بکەم و ڕێگری لە هەر گرژییەک بکەم، بڕیارم دا بۆ ماوەیەک پشوویەک بدەم و وتار نەدەم.
- ئەم دوورکەوتنەوەیە کاتی دەبێت، تا ئەو کاتەی لە ڕێگەی دادگاوە بە پشتیوانی و سەرکەوتنی خوای گەورە، هەموو مافە یاسایی و شەرعییەکانی خۆم وەردەگرمەوە.
سپاسی بێپایان بۆ پشتگیری، دڵسۆزی و نزاکانی ئێوەی ئازیز. تکایە لە دوعای خێر بێبەشمان مەکەن.
دكتور عبداللطيف أحمد
5 / 7 / 2026 م
لە دیدارێکدا لەگەڵ محەمەد دەروێش، سەرۆکی ئەنجومەنی سەرکردایەتی مەکتەبی سیاسی حەماس، محەمەد باقر قالیباف، سەرۆکی پەرلەمانی ئێران رایگەیاند، ئاشتی لە نێوان ئەوان و ئەمریکادا نابێت و دان بە ئیسرائیلیشدا نانێن.
قالیباف، ئاماژەی بەوەکرد، دەبێت رێڕەوی دیپلۆماسی بتوانێت دەستکەوتەکان بەهێزتر بکات و خزمەت بە پاراستن و چەسپاندنی دەستکەوتە سەربازییەکان بکات.
ناوبراو جەختیکردەوە، دانوستانەکان کاتێک سەرکەوتوو دەبن، کە وڵات ئامادەیی بەرگریی کردن بێت لە خۆی، لە کاتی دانوستانەکانیشدا ئێران جەختی لە پاراستنی یەکپارچەیی خاکی وڵاتانی ناوچەکە و کۆتاییهێنان بە شەڕی هاوپەیمانەکانی لە بەرەی خۆڕاگریی کردووەتەوە.
سەرۆکی پەرلەمانی ئێران راشیگەیاند، هیچ ئاشتییەکیان لەگەڵ ئەمریکادا نییە و دان بە ئیسرائیلدا نانێن، بە شێوەی جۆراوجۆر بەردەوام دەبن لە پشتیوانیکردنی بەرەی خۆڕاگریی.
لایخۆشیەوە، محەممەد دەروێش یاداشتنامەی لێکتێگەیشتنی نێوان ئێران و ئەمریکای بە "سەرکەوتنێکی تەواو بۆ ئێران و شکستێک بۆ ئەمریکا" وەسف کرد باسی لەوەکردوە لە بەرژەوەندی بەرەی خۆراگرییە.
کۆمپانیای گشتیی نەوتی سوریا رایگەیاند، بە مەبەستی بەرزکردنەوەی ئاستی یەدەگی وێستگەکانی سووتەمەنی و دڵنیابوونەوە لە بەردەوامیی پرۆسەی دابەشکردن، زیاتر لە حەوت ملیۆن لیتر بەنزینیان رەوانەی تەواوی پارێزگاکانی ئەو وڵاتە کردووە.
کۆمپانیاکە ئاماژەی ب کردووە کە بە شێوەی 24 سەعاتی لە رێگەی سێ دەوامی یەکبەدوایەکەوە کار دەکەن بۆ دابینکردنی پێداویستییەکانی بازاڕی ناوخۆ لە هەردوو مادەی بەنزین و گاز..
کۆمپانیاکە رونیشیکردەوە، تەنیا لە یەک رۆژدا 305 تانکەری بەنزین لە هەردوو ناوەندی دابەشکردنی "بانیاس" و "حومس"ەوە بەڕێکەوتوون، کە بڕی هەر بارێکیان 24 هەزار لیتر بووە؛ بەمەش کۆی گشتیی سووتەمەنی نێردراو گەیشتووەتە حەوت ملیۆن و 320 هەزار لیتر.
کۆمپانیاکە جەختیکردوەتەوە، پشتبەستن بە بەرهەمی پاڵاوگەکانی ناوخۆ و هاوردەکردنی دەرەکی، بەشێکن لە پلانە لۆجستییەکانیان بۆ جێگیرکردنی رەوشی دابینکردنی وزە و پڕکردنەوەی پێداویستییەکانی دانیشتووان و کەرتە خزمەتگوزاریی و بەرهەمهێنەرەکان لە سوریادا.
ئەمە لە کاتێكدایە ماوەیەک لە تەواوی سوریا، کێشی کەمی سوتەمەنی هەیە و بۆ ئەو مەبەستەش چەندینجار هاووڵاتیان گردبونەتەوە و نارەزایەتییان دەربڕیوە، کە جگە لە کەمی سوتەمەنی بەرزی نرخەکەشی بوەتە بارگرانییەکی تر بۆ ژیانی رۆژانەیان.
بنیامین ناتانیاهۆ، سەرۆک وەزیرانی ئیسرائیل رایگەیاند ئاوەدانکردنەوەی کەرتی غەززە بەبێ هەڵوەشاندنەوەی پێکهاتەی سەربازی و چەکداماڵین لەو ناوچەیە سەرناگرێت.
ئەمڕۆ یەکشەممە بنیامین ناتانیاهۆ، سەرۆک وەزیرانی ئیسرائیل رایگەیاند، دانیشتوانی غەززە دەتوانن بڕیار لەسەر مانەوە یان جێهێشتنی خاکەکەیان بدەن، بەڵام ئەم هەڵبژاردنە نابێت ببێتە هەڕەشە بۆ سەر ئیسرائیل.
ناتانیاهۆ ئاماژەی بەوەشکرد، هەڕەشە ئەمنییەکان لە غەززەوە کەمبوونەتەوە و دروستکردنی ناوچەی پاراستن یارمەتیدەر بووە بۆ سەقامگیرکردنی ئەم رەوشەی ئێستا.
سەرۆک وەزیرانی ئیسرائیلی ئەوەشیخستوەتەڕوو، بەهۆی باشبونی رەوشی ئەمنییەوە خواست لەسەر خانووبەرە لە ناوچەکانی نزیک لە غەززە زیادی کردووە و دوپاتیکردەوە، ئاوەدانکردنەوەی کەرتی غەززە پەیوەستە بە هەڵوەشاندنەوەی پێکهاتەی سەربازی و داماڵینی چەک لەو ناوچەیە.
لەبارەی لوبنانیشەوە، سەرۆک وەزیرانی ئیسرائیل دەڵێت؛ سوپای وڵاتەکەی شەرعیەتی هەیە کە بە درێژایی "هێڵی زەرد" لە باشووری لوبنان ئامادە بێت و ئاشکراشی کرد، دۆناڵد ترەمپی سەرۆکی ئەمریکا داوای لە ئیسرائیل نەکردووە خۆی بەدور بگرێت لە هەنگاونان بەرانبەر هێرشەکانی حزبوڵا و لەناو بردنی پێگە و تونێلەکانی.
قوباد تاڵەبانی، جێگری سەرۆک وەزیرانی هەرێم رایگەیاند، تیمی کۆمپانیای هابیکا کۆبوەتەوە و بەدواداچونی کردوە بەدواداچونی کردوە بۆ چۆنییەتی بەڕێوەچوونی کارەکانی هەردوو پڕۆژەی ئاوی گۆپتەپە – چەمچەماڵ و هێڵی 3ـی دوکان – سلێمانی، جەختیشی کردوەتەوە لە تەواو کردنی پرۆژەکان لە وادەی خۆیاندا.
قوباد تاڵەبانی ئاماژەی بەوەشکردوە، بڕیاریداوە لەسەر خەرجکردنی بەشێک لە بودجەی پڕۆژەی ئاوی گۆپتەپە – چەمچەماڵ و دەسخۆشیشی لە کۆمپانیای جێبەجێکار کردوە، چونکە سەرکەوتوانە کارەکان جێبەچێ دەکەن.
هەروەها جەختیشیکردوەتەوە، بۆ ساڵی 2026 پڕۆژەی ئاوی گۆپتەپە – چەمچەماڵ لە کارە لە پێشینەکانیان دەبێت و پێویستە ئەو پڕۆژەیە لە وادەی خۆیدا تەواو بکرێت.
جێی باسە، پڕۆژەی ئاوی گۆپتەپە – چەمچەماڵ لە ساڵی 2024وە بە گوژمەی 139 ملیار دینار کەوتووەتە بواری جێبەجێکردنەوە و بڕیارە لە ماوەی 730 رۆژدا تەواو بکرێت، بە تەواوبوونی پڕۆژەکە جگە لەوەی کێشەی ئاوی چەمچەماڵ بە یەکجاری چارەسەر دەبێت، کەرتی کشتوکاڵ لە قەزاکە دەبووژێنێتەوە و زیاتر لە 30 گوندی ناوچەکەش لە پڕۆژەکە سوودمەند دەبن.
وەزارەتی پێشمەرگەی هەرێم لە راگەیەندراوێكدا رایگەیاند،دەست دەکەن بە دابەشکردنی هاوکاری دارایی هاوپەیمانان بۆ مانگی پێنج.
لە راگەیەندراوەکەی وەزارەتی پێشمەرگەدا هاتووە؛ ئەمڕۆ بەڕێوەبەرایەتى گشتى بودجە و بەرنامەکان (ژمێریارى سەربازى) رێکارە دارایی و ژمێڕیاریەکان تەواو دەکات.
ئاماژە بەوەشکراوە، دوای تەواو کردنی رێکارەکان، رۆژی دووشممە(6ـی 7ـی2026) دەست دەکەن بە دابەشکردنی هاوکارییەکە بەسەر پێشمەرگەکاندا.
نوسینگەی سەرۆکایەتی سوریا بەبێ دیاریکردنی کاتەکەی رایگەیاند، ئیمانوێل ماکرۆنی سەرۆکی فەرەنسا سەردانی دیمەشق دەکات، ئەمەش دەبێتە یەکەم سەردانی سەرۆکی وڵاتانی زلهێزی ئەوروپا بۆ سوریا لە دوای روخانی دەسەڵاتەکەی بەسار ئەسەدەوە.
ئەمڕۆ یەکشەممە لە راگەیەندراوێكدا، نوسینگەی سەرۆکایەتی سوریا بڵاویکردوەتەوە، ئیمانوێل ماکرۆنی سەرۆکی فەرەنسا سەردانی دیمەشق دەکات و لەگەڵ ئەحمەد شەرعی سەرۆکی کاتی سوریادا کۆدەبێتەوە بە بێ ئەوەی باس لە ناوەرؤکی کۆبونەوەکان بکرێت.
سەردانەکەی سەرۆکی فەرەنسا ئەگەر پشتڕاست بکرێتەوە، دەبێتە یەکەمین سەرکردەی زلهێزێکی ئەوروپی کە لەدوای روخانی بەشار ئەسەدەوە سەردانی سوریا بکات.
پێشتر، ئەمیری قەتەر و ڤۆلۆدیمیر زیلینسکی، سەرۆکی ئۆکراین، سەردانی سوریایان کردوە لە دوای گرتنەدەستی دەسەڵات لەلایەن ئەحمەد شەرعەوە.
جێ باسە، نیکۆلاس سارکۆزی دوایین سەرۆکی فەرەنسا بوو، کە ساڵی 2008 سەردانی سوریای کرد و دوای سەرکوتکردنی ناڕەزایەتییەکانی "بەهاری عەرەبی" پەیوەندییەکانی نێوان دیمەشق و پاریس لە ساڵی 2011دا پچڕا سەردانەکەی مارۆن دەبێتە یەکەم سەردانی سەرۆکی فەرەنسا بۆ سوریا دوای 18 ساڵ.
ئۆپراسیۆنی كێوماڵی داعش لە سنوری كەركوك بەردەوامە و هەوڵەكانیش چڕكراونەتەوە بۆ دۆزینەوەی ئەو جوتیارە كوردەی چەند رۆژێكە بێسەروشوێنە.
پەیامنێری كوردسات نیوز رایگەیاند، ئۆپراسیۆنی كێوماڵكردنی داعش لە سنوری كەركوك بەردەوامە و تا ئێستا گەورە تیرۆرستێكیش كوژراوە و ئەفسەرێكی سوپای عیراقیش لە ئۆپراسیۆنێكدا شەهید بووە.
وتیشی، هەوڵەكان چڕكراونەتەوە بۆ دۆزینەوەی هەردی زینەڵ ئەو جوتیارەی كە لە سنوری پردێ بێسەروشوێن بووە، چڕكراونەتەوە و تەنیا ئۆتۆمبێلەكەی دۆزراوەتەوە.
سەرۆکایەتیی زانکۆی سلێمانی دۆسییەی د. عەبدوللـەتیف ئەحمەدی ئاڕاستەی داواکاریی گشتیی کرد و داوای گرتنەبەری رێکاری یاسایی پێویست دەکات.
سەرۆکایەتیی زانکۆی سلێمانی، لە نووسراوێکی رەسمیدا کە ئاڕاستەی فەرمانگەی داواکاری گشتیی لە سلێمانی کردووە، داوای گرتنەبەری رێکاری یاسایی دەکات بەرانبەر (د. عەبدوللـەتیف ئەحمەد مستەفا)، مامۆستا لە کۆلێژی زانستە ئیسلامییەکان، ئەوەش دوای تەواوبوونی لێکۆڵینەوەکان لەسەر دۆسیەی نامە دەنگییەکانی.
بەپێی نووسراوەکە، کە ئیمزای د. کۆسار محەمەد عەلی، سەرۆکی زانکۆی سلێمانی لەسەرە، لێکۆڵینەوەکان لەسەر بنەمای نووسراوی پێشووی داواکاری گشتی و لە رێگەی لیژنەیەکی هاوبەشەوە ئەنجامدراون بۆ گەیشتن بە ڕاستی و ناڕاستی ئەو نامە دەنگیانەی بڵاوبوونەتەوە.
ئاماژەی بەوەشکردووە، سەرۆکایەتیی زانکۆی سلێمانی راشیگەیاندووە، سەرجەم بەرایی و بەڵگەنامەکانی تایبەت بەم دۆسیەیەی هاوپێچ کردووە و رادەستی لیژنەی تۆمارکردنی داوای مافی گشتی لە داواکاری گشتی سلێمانی کردووە بۆ تەواوکردنی رێڕەوی یاسایی دۆسیەکە.
کیم جۆنگ ئون، سەرۆکی کۆریای باکور سەرپەرشتی تاقیکردنەوەی نوێترین سیستمی چەک و تەقەمەنی تایبەت بە وێرانکەری دەریایی (کانگ کۆن)ی کرد، کە کێشەکەی دەگاتە پێنج هەزار تۆن، ئەم هەنگاوەش لە چوارچێوەی هەوڵەکانی پیۆنگیانگ دێت بۆ خێراکردنی پەرەپێدانی تواناکانی هێزی دەریایی.
ئاژانسی هەواڵی ناوەندیی کۆریای باکور بڵاویکردەوە، تاقیکردنەوەکان رۆژی هەینی ئەنجامدراون و پڕۆسەکەش هاویشتنی چەندین موشەکی کروز و بەکارهێنانی کەرەستەی شەڕی ئەلیکترۆنی لەخۆگرتووە، وێرانکەری "کانگ کۆن" هەمان ئەو کەشتییە جەنگییەیە کە ساڵی رابردوو لە کاتی رێوڕەسمی خستنەگەڕیدا بەشێکی وەرگەڕا، بەڵام دواتر لەلایەن دەسەڵاتدارانی وڵاتەکەوە نۆژەنکرایەوە.
ئاماژە بەوەشکراوە، ئەم تاقیکردنەوەیە دوای کەمتر لە دوو هەفتە دێت لە چوونەخزمەتی وێرانکەرێکی تری هاوشێوە بە ناوی "چوی هیۆن" کە ئەویش کێشەکەی پێنج هەزار تۆنە.
سەرۆکی کۆریای باکور پێشتر بەڵێنی دابوو هێزی دەریایی وڵاتەکەی بە چەکی ئەتۆمی پڕچەک بکات و کەشتیی جەنگیی نوێ دروست بکات کە کێشەکەیان بگاتە 10 هەزار تۆن.
ئاژانسەکە ئەوەشی خستووەتەڕوو، دوای تاقیکردنەوەکانی رۆژی هەینی، کیم جۆنگ ئون فەرمانیکرد وێرانکەری "کانگ کۆن" لە ماوەی دوو مانگی داهاتوودا بە رەسمی بچێتە خزمەتی هێزی دەریاییەوە.
سەرۆکی کۆریای باکور جارێکی تر جەختی لە پێویستی خێراکردنی توانای سەربازیی وڵاتەکەی کردەوە بۆ بەدەستهێنانی ئەوەی کە بە "هێزی رەها" ناوی برد.
دەستەی دەستپاكی عیراق رایگەیاند، نیوەی ئەو تۆمەتبارانەی دۆسیەی گەندەڵی گەڕێنراونەتەوە عیراق كە هەڵهاتبوون و بڕێكی زۆر لە پارەش گەڕێنراوەتەوە.
دەستەی دەستپاكی عیراق دووپاتی دەكاتەوە بەردەوامن لە بەدواداچوون بۆ دۆسیەكانی گەندەڵی و بەڵینیش دەدات، سوپرایزی گەورەیان دەبێت لە ئاشكراكردنی دۆسیەكانی گەندەڵی و كەسایەتی زۆر دیار و گەڕاندنەوەی بڕە پارەی زەبەلاح بۆناو عیراق.
دەستەی دەستپاكی رایگەیاندووە، لە ئێستادا نیوەی ئەو تۆمەتبارانەی دۆسیەی گەندەڵی كە تەنانەت لە ساڵەكانی رابردووشدا هەڵهاتبوون گەڕێنراونەتەوە عیراق و بڕێكی باش لەو پارانەش گەڕێنراونەتەوە بۆ خەزێنەی دەوڵەت كە برابوونە دەرەوەی عیراق.
بەپێی راگەیەنراوی دەستەكە، هەماهەنگییەكی باش هەبووە لەگەڵ پۆلیسی نێودەوڵەتی ئینتەرپوڵ و ئاماژە بەوەشكراوە، هێشتا بەربەست لە رێككەوتنی یاسایی لەگەڵ هەندێك وڵاتدا هەیە، بەهۆی جیاوازی لە یاسای وڵاتەكاندا، بۆیە ئەوەی لە عیراق جێبەجێ دەكرێت بە ئاسانی لە وڵاتانی تر بەدەست نایەت، هەروەها بەشێكی پارە دزراوەكان تێكەڵی ئابوری ئەو وڵاتانە بوون، ئەمەش پێویستی بە بەدواداچوونی ورد و كۆكردنەوەی بەڵگەی بەهێز هەیە بۆ سەلماندنی خاوەندارێتی عێراق بۆیان.
عەباس عراقچی، وەزیری دەرەوەی ئێران، ئەمڕۆ یەکشەممە، بە وەفدی بزووتنەوەی حەماس و حیزبوڵڵای راگەیاند، کە وڵاتەکەی بەردەوام دەبێت لە پاڵپشتیکردنی پرسی فەلەستین و هەوڵیش دەدات بۆ کۆتاییهێنان بە شەڕ لە لوبنان.
وەزارەتی دەرەوەی ئێران رایگەیاند: عەباس عراقچی لە کاتی کۆبوونەوەیدا لەگەڵ وەفدی حەماس، کە بەشداربوون لە رێوڕەسمی بەخاکسپاردنی عەلی خامنەیی، جەختی لەوە کردەوە کە ئێران بەردەوام دەبێت لە پاڵپشتیکردنی پرسی فەلەستین.
وەزارەتەکە ئاماژەی بەوەش کردووە: عراقچی بە وەفدی حزبوڵای راگەیاندووە، بەرگریی قارەمانانەی حزبوڵا جێگەی شانازییە بۆ لوبنان و جیهانی ئیسلامی، رونیشی کردەوە: ئێران کار دەکات بۆ بەدیهێنانی داواکاریی کۆتاییهێنان بە شەڕ لە لوبنان و کۆتاییهێنان بە داگیرکاری، ئەمەش بەپێی مادەی یەکەمی یاداشتی لێکتێگەیشتن.
سەرەتای هەفتەی داهاتوو، پاكستان میوانداری خولێكی نوێی دانوستانەكانی نێوان ئەمریكا و ئێران دەكات.
سەرچاوەیەكی ئاگادار بەكەناڵی حەدەسی راگەیاندووە، 11ی ئەم مانگە، پاكستان میوانداری خولێكی نوێی دانوستانەكانی نێوان ئەمریكا و ئێران دەكات، ئەو هەنگاوەش لە چوارچێوەی هەوڵە بەردەوامەكاندایە بۆ گەڕانەوە و دەستپێكردنەوەی ڕێڕەوی گفتوگۆكانی نێوان هەردوولا.
بەپێی زانیارییەكانی ئەو سەرچاوانە، ئەو خولە چاوەڕوانكراوەی دانوستانەكان سەرنج دەخاتە سەر سێ دۆسیەی سەرەكی و بنەڕەتی، كە ئەوانیش بریتین لە، تاوتوێكردنی ئەو سزا ئابوورییانەی كە لەلایەن واشنتۆنەوە بەسەر تاراندا سەپێنراون، پرسی پارە و داراییە بلۆكراوەكانی ئێران لە دەرەوەی وڵات، هەروەها گەییشتن بە لێكتێگەیشتن لەسەر بەرنامە ئەتۆمییەكەی ئێران.
سەبارەت بە وەفدی بەشداربوو، سەرچاوەكان ئاماژەیانبەوەكردووە، هێشتا ئاستی نوێنەرایەتیكردنی وەفدی ئێرانی لەم دانوستانانەدا بە تەواوی یەكلانەكراوەتەوە.
ئەمە لەكاتێكدایە، دۆناڵد ترەمپ سەرۆكی ئەمریكا رایگەیاند، دوای رێورەسمی ماڵئاوایكردن و بە خاكسپاردنی رابەری پێشوی ئێران دانوستانەكان واشنتۆن و تاران دەستپێدەكەنەوە.
ویلایەتە یەکگرتووەکانی ئەمریکا دەستی بە ئاهەنگگێڕانی بەرفراوان کرد بە بۆنەی تێپەڕبوونی 250 ساڵ بەسەر راگەیاندنی سەربەخۆیی وڵاتەکەیدا، لەو چوارچێوەیەشدا دۆناڵد ترەمپ، سەرۆکی ئەمریکا لە وتارێکدا رایگەیاند، وڵاتەکەی پێدەنێتە نێو "سەردەمێکی زێڕین"ەوە.
ترەمپ لە میانی بەشداریکردنی لە رێوڕەسمی (سڵاو لە ئەمریکای 250) کە لە گۆڕەپانی نیشتمانی لە واشنتنۆی پایتەخت بەڕێوەچوو، جەختی لەوەکردەوە، هێزی ئەمریکا جێگەی شانازییە نەک شەرمەزاربوون، وتارەکەی سەرۆکی ئەمریکا بەهۆی خراپیی کەشوهەوا و بارانبارینی بەخوڕەوە بۆ ماوەی نزیکەی دوو سەعات دواکەوت، بەڵام سەرەڕای ئەوەش هەزاران کەس لە شوێنی ئاهەنگەکە مانەوە تا گوێبیستی وتارەکەی بن کە تێیدا میلانیا ترەمپی خانمی یەکەمیش یاوەری دەکرد.
ترەمپ رایگەیاند، سەرەڕای تێپەڕبوونی دوو سەدە و نیو، ئەمریکا هێشتا لە سەرەتای رێگەدایە و وتی: "رەنگە کۆنترین کۆماری دەستوری بین لەسەر زەوی، بەڵام هێشتا باشترینی ئەمریکا نەهاتووەتە دی."
سەرۆکی ئەمریکا داوای پاراستنی باڵادەستیی وڵاتەکەی کرد لە بوارەکانی سەربازی و بۆشایی ئاسماندا و دووپاتیکردەوە کە ئەمریکا لە ساڵانی داهاتوودا گەورەتر، باشتر و بەهێزتر دەبێت.
ترەمپ رەخنەی لە سیاسەتەکانی پێشوو گرت بۆ داوای لێبووردن لە هێزی ئەمریکا و وتی: "هێز و هەژموونی ئەمریکا پێویستی بە داوای لێبووردن نییە، ئێمە گەورەترین هێزی بەدیهێنەری ئاشتی و دادپەروەری بووین لە سەدەی رابردوودا، ستەمکارانمان شکست پێهێنا و ئازادیمان پاراست."
بەڕێوەبەرایەتیی پۆلیسی هەولێر لە راگەیەنراوێکدا دەستگیرکردنی هەردوو هاووڵاتی (خورشید لەتیف) و (حەیدەر لەتیف)ی لە قەزای خەبات راگەیاند.
بەپێی راگەیەنراوەکەی پۆلیسی هەولێر، دەستگیرکردنی ئەو دوو ناوبراوە ئەمڕۆ یەکشەممە، لەسەر فەرمانی دادگا بووە، ئەمەش دوای بوونی چەند سکاڵایەک لەسەر چەند دۆسیەیەکی پەیوەندیدار بە ماوەی رابردوو لە ناوچەکەدا.
پۆلیسی هەولێر ئاماژەی بەوە کردووە کە رێوشوێنە یاساییەکان بەرانبەر بە هەردوو دەستگیرکراوەکە گیراونەتەبەر و لە ماوەی داهاتوودا دۆسییەکەیان لەژێر رۆشنایی یاسادا رەوانەی دادگا دەکرێت بۆ یەکلاییکردنەوەی تەواوی تۆمەتەکان.