هەواڵەکان
د.لەتیف جەمال ڕەشید، سەرۆک کۆمار عیراق پێشوازیکرد لە موسەنا سامەڕایی، سەرۆکی هاوپەیمانی عەزم.
لە دیدارەکەدا باس لە چەند پرسێکی سیاسی و نیشتمانی و دوایین پەرەسەندنەکانی گۆڕەپانی عێراق کرا.
سەرۆک کۆمار جەختی لە گرنگی بەهێزکردنی سەقامگیری سیاسی و پشتگیریکردنی ڕێڕەوەکانی دیالۆگی نیشتمانی کردەوە، بەو جۆرەی کە یارمەتیدەر بێت لە پتەوکردنی کاری دیموکراسی و تەواوکردنی شایستە دەستوورییەکان و هەنگاونان بەرەو پێکهێنانی حکومەتێکی نیشتمانی کە ئامانجی خزمەتکردنی بەرژەوەندییەکانی هاووڵاتییان بێت.
هەروەها ئاماژە بە پێویستی چەسپاندنی بنەماکانی هەماهەنگی لە نێوان هێزە سیاسییەکان و پشتگیریکردنی ئەو هەوڵانە کرا کە ئامانجیان ڕووبەڕووبوونەوەی تەحەدییەکانی ئێستا و بەدیهێنانی گەشەپێدانی گشتگیرە.
دەزگای میدیایی کوردسات لەگەڵ چەند رێکخراوێکیتر هەڵمەتێکی نیشتمانی بۆ کۆکردنەوەی هاوکاری بۆ کوردانی رۆژئاوا رادەگەیەنێت.
دەزگای میدیایی کوردسات رایگەیاند، وەک ئەرکێکی نیشتمانی، نەتەوەیی و مرۆڤایەتی، هەڵمەتی کۆکردنەوەی کۆمەک و هاوکاری بۆ کوردانی رۆژئاوای کوردستان دەستپێدەکەن.
ئەم هەڵمەتە لە چوارچێوەی ئەو دۆخە سەختەدایە کە رووی لە رۆژئاوای کوردستان کردووە و ئامانج لێی گەیاندنی هاوکاریی مرۆییە بە لێقەوماوان.
ئەکادیمیای زانست و هونەرە سینەمايیەکان (ئۆسکار) لیستی پاڵێوراوانی بۆ 98ـەمین خولی خەڵاتەکان بڵاوکردەوە و فیلمی "Sinners" بە بەدەستهێنانی 16 پاڵێوراو پێشەنگی گرتووە و بەمەش ژمارەی پێوانەیی لە مێژووی خەڵاتەکەدا تۆمار کرد.
بەپێی لیستەکە، فیلمی "Sinners" کە لە دەرهێنانی رایان کوگلەر-ە، زۆرترین جار پاڵێوراوە، لە دوای ئەویش فیلمی "One Battle After Another"ـی دەرهێنەر پۆڵ تۆماس ئەندەرسن دێت کە 13جار پاڵێوراوە.
بڕیارە رێوڕەسمی دابەشکردنی خەڵاتەکان لە 15ی ئازاری 2026لە لۆس ئەنجلەس بەڕێوەبچێت.
لیستی بەشێک لە پاڵێوراوە سەرەکییەکان:
باشترین فیلم:
(Bugonia, F1, Frankenstein, Hamnet, Marty Supreme, One Battle After Another, The Secret Agent, Sentimental Value, Sinners, Train Dreams).
باشترین ئەکتەری پیاو:
تیمۆسی شالامێ (Marty Supreme)، لیۆناردۆ دیکاپریۆ (One Battle After Another)، ئیسان هۆک (Blue Moon)، مایکڵ بی جۆردن (Sinners)، ڤاگنەر مۆرا (The Secret Agent).
باشترین خانمە ئەکتەر:
جێسی بەکلی (Hamnet)، رۆز Бێرن (If I Had Legs I’d Kick You)، رینات رێنسڤ (Sentimental Value)، ئێما ستۆن (Bugonia)، کەیت هەدسۆن (Song Sung Blue).
باشترین دەرهێنەر:
پۆڵ تۆماس ئەندەرسن، رایان کوگلەر، کلۆی ژاو، جۆش سەفدی، یواکیم تریەر.
باشترین فیلمی نێودەوڵەتی:
The Secret Agent (بەرازیل)، It Was Just an Accident (فەرەنسا)، Sentimental Value (نەرویج)، Sirât (ئیسپانیا)، The Voice of Hind Rajab (تونس).
د. لەتیف رەشید سەرۆک کۆماری عیراق، لە بەغداد پێشوازیکرد لە محەمەد حەلبوسی سەرۆکی پارتی تەقەدوم.
لە میانی دیدارەکەدا کە رۆژی پێنجشەممە 22- 1- 2026 بەڕێوەچوو ، باس لە بارودۆخی گشتی وڵات کرا و جەختکرایەوە لەسەر پتەوکردنی سەقامگیری سیاسی و پاڵپشتیکردنی هەوڵە نیشتمانییە هاوبەشەکان بۆ خزمەتکردنی بەرژەوەندییەکانی گەلی عیراق.
سەرۆک کۆمار جەختیکردەوە لە گرنگی پەلەکردن لە تەواوکردنی مەرجە دەستوورییەکان لە ماوەی دیاریکراوی خۆیاندا و ئاماژەیکرد کە پابەندبوون بەم وادانە پایەیەکی بنەڕەتییە بۆ چەسپاندنی سیستەمی دیموکراسی و بەهێزکردنی متمانەی هاووڵاتیان بە دامەزراوە دەستوورییەکان.
سەرۆک کۆمار جەختیکردەوە لە سەر گرنگی چڕکردنەوەی هەوڵەکان و هاریکاری نێوان هەموو هێزە سیاسییەکان و کارکردن بە گیانی بەرپرسیارێتی نیشتمانی بۆ تێپەڕاندنی ئاستەنگەکانی ئێستا و هێنانەدی گەشەسەندنی هەمەلایەنە و چەسپاندنی ئاسایش و سەقامگیری لە سەرتاسەری وڵات.
هەروەها لە دیدارەکەدا باس لە پێشهاتی ئیقلیمی و نێودەوڵەتیی و کاریگەرییان لە سەر گۆڕەپانی عێراق و هەروەها پێویستی پاڵپشتیکردنی هەوڵە نێودەوڵەتییەکان کرا بۆ بەرەوپێشبردنی ئاشتی و ئاسایش لە ناوچەکە و جیهاندا.
لای خۆیەوە محەمەد حەلبوسی سوپاس و پێزانینی خۆی بۆ سەرۆک کۆمار دەربڕی و جەختیکردەوە لە پەرۆشی خۆی بۆ پشتیوانی لە هەوڵەکان بە ئامانجی پتەوکردنی سەقامگیری سیاسی و هەنگاونان بەرەو پێشەوە لە جێبەجێکردنی ئەرکە نیشتمانییەکان بە شێوەیەک کە ویستی گەلی عێراق بەدیبێنێت.
بۆردی داکۆکی لە ئازادی و مافی رۆژنامەنووسان لە سەندیکای رۆژنامەنووسانی کوردستان، ستایشی هەڵوێستی یەکگرتووی میدیاکانی باشوری کوردستان دەکات بەرانبەر رووداوەکانی رۆژئاوا و داوای چاودێریکردنی دۆخی رۆژنامەنووسانیش دەکات.
لە راگەیەندراوێکدا بۆردەکە ئاماژەی بەوەکردووە، ئەو هەڵوێستە "جوان و یەکانگیرەی" میدیاکارانی باشوری کوردستان و یەک وتاریی سەرجەم میدیاکان (بینراو، بیستراو، خوێنراو و ئەلکترۆنی) بەرامبەر ئەو ستەمەی لە رۆژئاوای کوردستان دەکرێت، جێگای پێزانینە و هیوادارن لە پرسە نیشتمانییەکانی دیکەشدا بەم شێوەیە بن.
سەندیکای رۆژنامەنووسان نیگەرانیی خۆی نیشانداوە سەبارەت بە سەلامەتیی میدیاکارانی باشور و رۆژئاوا لە ناوچەکانی شەڕ و دەڵێت: "هێشتا ئامارێکی وردمان بەدەست نەگەیشتووە لەسەر زیانی نووسینگە و کەلوپەلی میدیاکاران".
لە بەشێکی دیکەی راگەیەندراوەکەدا هاتووە، دەنگی خۆیان دەخەنە پاڵ رێکخراوە میدیاییەکانی رۆژئاوا و داوا لە رێکخراوە جیهانییەکان دەکەن چاودێریی وردی دۆخەکە بکەن، چونکە "لایەنی هێرشبەر خاوەنی ئایدیایەکی میدیایی ئاشکرا نییە و نازانرێت چۆن لە ئازادیی بیروڕا دەڕوانێت"، کە ئەمەش مەترسییە بۆ سەر ژیانی رۆژنامەنووسان.
ئیمانیۆل ماکرۆن، سەرۆکی فەرەنسا رایدەگەیەنێت، هێزی دەریاوانیی وڵاتەکەی دەستی بەسەر کەشتییەکی نەوتهەڵگری روسیدا گرتووە کە گوماندەکرێت ئاڵایەکی ساختەی بەکارهێنابێت و سزای نێودەوڵەتیی لەسەر بێت.
ماکرۆن لە پەیامێکدا رایگەیاند: "بەیانیی ئەمڕۆ هێزی دەریاوانیی فەرەنسا لە دەریای ناوەڕاست دەستی بەسەر کەشتییەکی نەوتهەڵگری روسیدا گرت کە سزای نێودەوڵەتیی لەسەرە و گومان دەکرێت ئاڵای ساختەی بەکارهێنابێت".
سەرۆکی فەرەنسا ئاماژەی بەوەشکردووە، ئۆپەراسیۆنەکە بە هاوکاریی چەند هاوپەیمانێک و بەپێی یاسای دەریایی نەتەوە یەکگرتووەکان ئەنجامدراوە.
جەختیشی کردووەتەوە کە "لێکۆڵینەوەی دادوەری دەستیپێکردووە و رێڕەوی کەشتییەکە گۆڕدراوە"، هۆشداریشی داوە کە چالاکیی "گەشتییە خێوەکان" (کەشتییە نهێنییەکان) یارمەتیدەرن لە پارەدارکردنی جەنگی دژی ئۆکراین.
وتەبێژی کۆشکی سپی: رێژەی کوشتن لە ئەمریکا گەیشتووەتە نزمترین ئاست لە مێژوودا
کارۆلین لیڤیت، وتەبێژی کۆشکی سپی رایدەگەیەنێت، سیاسەتەکانی دۆناڵد ترەمپ بۆ گەڕاندنەوەی یاسا و رێکوپێکی، بووەتە هۆی ئەوەی رێژەی کوشتن لە ئەمریکا بگاتە نزمترین ئاست لە ساڵی 1900ـەوە.
لیڤیت لە پۆستێکدا لە تۆڕی کۆمەڵایەتیی ئێکس نووسیویەتی: "سەرۆک ترەمپ بەڵێنی دا یاسا و رێکوپێکی بۆ ویلایەتە یەکگرتووەکان بگەڕێنێتەوە، ئەوەش روودەدات کاتێک سەرۆکێک هێزە فیدڕاڵییەکان بە تەواوی بۆ دەستگیرکردنی تاوانبارە مەترسیدارەکان و کۆچبەرە نایاساییەکان بەکاردەهێنێت".
بەپێی ئەو ئامارەی بڵاویکردووەتەوە، رێژەی کوشتن لە نێوان ساڵانی 1900 بۆ 2025، لە ئێستادا لە نزمترین ئاستدایە. وتەبێژەکە جەختی لەوە کردووەتەوە: "بەڵێن درا، بەڵێنەکەش جێبەجێ کرا".
د. لەتیف رەشید سەرۆک کۆماری عیراق، ئەمڕۆ پێنجشەممە ٢٢ی کانونی دووەمی ٢٠٢٦ لە کۆشکی بەغداد، پێشوازی لە ئاتول کێهاری، بریکاری ئەمینداری گشتیی نەتەوە یەکگرتووەکان بۆ کاروباری پشتیوانی ئۆپەراسیۆنەکان و وەفدی هاورێی کرد.
لە دیدارەکەدا، تاوتوێی میکانیزمەکانی هەماهەنگی هاوبەش لە نێوان لایەنە حکومییە پەیوەندیدارەکان و نەتەوەیەکگرتووەکان کرا بە ئامانجی دەستەبەرکردنی تەواوکردنی رێکارەکانی کۆتاییهێنان بە ئەرکەکانی نێردەی نێودەوڵەتی لە عیراق.
سەرۆک کۆمار جەختی لە گرنگی بەردەوامیی هاوکارییە بونیادنەرەکان لەگەڵ رێکخراوی نەتەوە یەکگرتووەکان و ئاژانسە تایبەتەکانی کردەوە، هاوکات ستایشی ئەو رۆڵەی کرد کە نێردەی (یۆنامی) لە ماوەی کارکردنیدا گێڕاویەتی و ئەو پاڵپشتییانەی لە بوارە جیاجیاکاندا پێشکەشی کردوون.
هەروەها ئاماژەی بە پەرۆشیی عیراق کرد بۆ بەهێزکردنی شەراکەت لەگەڵ رێکخراوەکە بەو ئاراستەیەی کە خزمەت بە ئامانجەکانی گەشەپێدان و سەقامگیری لە هەموو ئاستەکاندا بکات.
لە لایەن خۆیانەوە، ئەندامانی وەفدی نەتەوە یەکگرتووەکان هەنگاوەکانی کۆتاییهێنان بە ئەرکەکانی نێردەکەیان خستەڕوو و پێزانینی خۆیان بۆ ئەو هاوکاری و پاڵپشتییە دەربڕی کە عیراق بۆ سەرخستنی ئەم پرۆسەیە پێشکەشی دەکات، هەروەها پابەندیی نەتەوە یەکگرتووەکانیان بە بەردەوامیی کارکردنی دووقۆڵی هاوبەش لە بوارە جۆراوجۆرەکاندا دوپاتکردەوە.
بەپێی پێشبینییەکانی کەشناسی لە 48 سەعاتی داهاتوودا بەفربارین بەردەوام دەبێت و ناوەندی ئیدارەی گەرمیان و پارێزگای کەرکوکیش دەگرێتەوە.
بەڕێوەبەرایەتی گشتی کەشناسی هەرێم بڵاویکردەوە، ئەمڕۆ بە گشتی ئاسمان نیمچەهەور دەبێت ولە شەو درەنگدا دەگۆڕێت بۆ هەوری تەواو، لەگەڵ دەست پێکردنی شەپۆڵێکی بەفربارین لەسەر ناوچەکە.
ئاماژەی بەوەشکرد، سبەینێ هەینی بارستە هەوایەکی ساردی جەمسەری لەگەڵ شەپۆڵێکی بەفربارین سەرجەم ناوچەکانی هەرێمی کوردستان دەگرێتەوە .
کەشناسی راشیگەیاند، بەفربارین لە ئەمشەوەوە دەستپێدەکات و تەنانەت ناوەندی ئیدارەی گەرمیان و پارێزگای کەرکوکیش دەگرێتەوە.
بەرزترین پلەکانی گەرمای پێشبینیکراو بە پلەی سیلیزی
هەولێر : 3 پلەی سیلیزی
پیرمام : -1 پلەی سیلیزی
سۆران : -1 پلەی سیلیزی
حاجی ئۆمەران : -4 پلەی سیلیزی
سلێمانی : 1 پلەی سیلیزی
چەمچەماڵ: 2 پلەی سیلیزی
هەڵەبجە : 3 پلەی سیلیزی
دهۆک : 1 پلەی سیلیزی
زاخۆ : 3 پلەی سیلیزی
هەڵەبجە : 4 پلەی سیلیزی
ئاکرێ : 2 پلەی سیلیزی
ئیدارەی خۆسەر راگەیەنراوێكی لەبارەی رەوشی رۆژئاوای كوردستان بڵاوكردەوە و دەڵێت: پابەندین بەو ئاگربەستەی كە راگەیەنراوە بەڵام چەکدارانی سوریا رێککەوتن پێشێل دەکەن.
ئیدارەی خۆبەڕێوەبەری باکور و رۆژهەڵاتی سوریا رایگەیاند، كۆبانێ كە بەرگری لە هەموو جیهان كرد ئێستا ئاو و كارەبا و خزمەتگوزاری لێبڕدراوە.
ئاماژەی بەوەشکرد، هێرشی چەكدارانی سوریا و گەمارۆدانی بۆ شكاندنی ئیرادەی خەڵكی كۆبانێیە .
ئیدارەی خۆسەر ئەوەشی خستەڕوو، داوای پشتیوانیی لە كوردانی هەر چوار پارچەی كوردستان و جیهان دەكەین بەردەوام بن لە پشتیوانیكردنمان.
لە ساڵی 2016وە تا کۆتایی 2025 لە سەنتەری چاندنی مۆخی ئێسکی نەخۆشخانەی هیوا 484 نەخۆش چاندنەوەیان بۆ ئەنجامدراوە.
نەخۆشخانەی هیوا لە سلێمانی ئامارێکی سەبارەت بە چاندنی مۆخ لە نەخۆشخانەکە بڵاوکردەوە و ئاماژەی بەوەکرد، لە سەرەتای ساڵی 2016 تا کۆتای سالی 2025 کۆی گشتی ئەو نەخۆشانەی کە چاندنی مۆخیان بۆ ئەنجامدراوە بریتیە لە (484) نەخۆش لە هەردوو جۆری چاندن، کە بریتین لە (293) جۆری یەکەم(Autologous) واتە خۆوەخواز، هەروەها (191) جۆری دووەم (Allogenic) واتە لە نزیکترین کەسی خێزانەکەی مۆخەکەی وەردەگیرێت وکاری چاندنەکەی بۆ ئەنجام دەدرێت.
نەخۆشخانەی هیوا راشیگەیاند، سەرەرای بوونی قەیرانی دارایی لە هەرێمی کوردستان کاری چاندنی مۆخ لە سلێمانی ببێ بەرانبەر بۆ نەخۆش ئەنجام دەدرێت، لە کاتێکدا کاری چاندنی مۆخ لە دەرەوی ووڵات بۆ یەک نەخۆش بڕی 77 ملیۆن دینار تێچووەکەی دەبێت.
ئەوەشی خستەڕوو، ئەم سەنتەرە لەلایەن تیمێکی وڵاتی ئیتاڵیا سەرپەرشتی دامەزراندن و وەرگرتنی نەخۆشیان دەکرد، پاشان لەلایەن پزیشکانی پسپۆرانی نەخۆشیەکانی خوێن و پسپۆریە جیاوازەکان کاری چاندنی مۆخ ئەنجامدرا.
نەخۆشخانەی هیوا ئاشکرایکرد، وەک تاکە سەنتەری هەرێمی کوردستان و عیراق چاندنی مۆخی ئێسک لەم سەنتەرە بێ بەرانبەر ئەنجامدەدرێت لە زاخۆ و تا بەسرە.
بەپێی ئامارەکەی نەخۆشخانەی هیوا ژمارەی نەخۆشەکان دابەشبوون بەسەر شارەکانی هەرێمی کوردستان و شارەکانی تری عیراق...
سلێمانی: 222 نەخۆش
هەولێر: 129 نەخۆش
دهۆک: 22 نەخۆش
هەڵەبجە: 9 نەخۆش
زاخۆ: 7 نەخۆش
شارەکانی دیکەی عیراق: 95 نەخۆش
سوپای ئیسرائیل بە ئامانجگرتنی 4 دەروازەی سنوری لە نێوان سوریا و لوبنان راگەیاند كە لەلایەن حزبوڵاوە بۆ گواستنەوەی چەك بەكاردەهێنرێت .
سوپای ئیسرائیل رایگەیاندووە ، لە ناوچەی هەرمل بۆردومانی 4 دەروازەی سنوریی نێوان سوریا و لوبنانیان كردوە كە حزبوڵا بەكاریهێناون بۆ گواستنەوەی چەك و كەرەستەی جەنگیی، هاوكات لە بۆردومانێكیشدا لە ناوچەی سەیدا لە باشوری لوبنان گەورە بازرگانێكی چەك كوژراوە كە چەكی بۆ حزبوڵا دابینكردووە .
سەرباری راگەیاندنی ئاگربەست لە لوبنان كە لە مانگی 11 ی ساڵی 2024 ەوە راگەیەندراوە ، بەڵام بۆردومانەكانی ئیسرائیل بۆ سەر پێگەكانی حزبوڵا لە لوبنان بەردەوامە ، تا ئێستاش هێزەكانی ئیسرائیل لە 5 ناوچەی لوبنان نەكشاونەتەوە كە تەلئەبیب بە ناوچەی ستراتیژیی ناویان دەبات .
پزیشكانی بێ سنور هۆشداری دەدان لە بەردەوامی هێرشەكانی گروپە چەكدارەكانی نزیك لە حكومەتی سوریا بۆ باكور و رۆژهەڵاتی ئەو وڵاتە.
رێكخراوی پزیشكانی بێسنور لە راگەیەنراوێكدا هۆشداریدا لە دەرئەنجامەكانی هێرشەكانی گروپە چەكدارەكانی نزیك لە حكومەتی سوریا بۆ سەر باكوری رۆژهەڵاتی ئەو وڵاتە و دووپاتی كردەوە كە هەزاران هاووڵاتی مەدەنی ناچاربوون لە وەرزی زستاندا هەڵبێن و ئاوارە ببین و رووبەڕووی كەمیی شوێنی مانەوە و گەرماو و خزمەتگوزارییە سەرەتاییەكان بوونەتەوە.
رێكخراوەكە ئاماژەی بەوەشكردووە، پەناگە كاتییەكانی قامیشلۆ و دێریك كە زۆرجار لە قوتابخانە و مزگەوتەكانن، خۆیان بەدەست ژێرخانی ناتەواوەوە دەناڵێنن و پێداویستی پێویستیان نییە بۆ جێگیركردنی ژمارەیەكی زیاتری ئاوارە، ئەمەش قەیرانە مرۆییەكانیان گەورەتر دەكات.
پزیشكی بێ سنور دووپاتی كردەوە، كە بەپەلە هاوكاریە مرۆییەكانیان گەیاندوەتەوە ئەو ناوچانە، هەروەها كلینیكێكی پزیشكی گەڕۆكیشیان لە شاری دێریك دامەزراندووە بۆ دابینكردنی چاودێری تەندروستی پێویست بۆ ئاوارەكان.
جێرمی کۆربین، پەرلەمانتاری بەریتانیا لە نامەیەکدا بۆ وەزیری دەرەوەی وڵاتەکەی، نیگەرانیی خۆی لە دۆخی کوردانی سوریا دەردەبڕێت و داوا دەکات حکومەتی بەریتانیا پشتیوانی لە داننان بە ناسنامە و زمانی کوردی بکات لە دەستووری ئەو وڵاتەدا.
کۆربین لە نامەکەیدا ئاماژەی بەوەکردووە، سەرەڕای رێککەوتنی ئاگربەست لە نێوان حکومەتی نوێی سوریا و هێزەکانی سوریای دیموکرات (هەسەدە)، بەڵام شەڕ دەستیپێکردووەتەوە و هۆشداری دەدات کە "هەر گرژییەکی زیاتر دەبێتە هۆی کوشتن و وێرانکاری و ئاوارەبوونی زیاتر".
پەرلەمانتارە بەریتانییە چوار داواکاریی خستووەتە بەردەم وەزیری دەرەوە:
1- پشتیوانیکردن لە دانوستانی گشتگیر بۆ گەیشتن بە ئاگربەستی دەستبەجێ.
2- داواکردنی پاراستنی مەدەنییەکان و کەمینەکان.
3- داکۆکیکردن لە دانپێدانانی دەستووری بە ناسنامە و زمانی کوردی و خۆبەڕێوەبەریی ناوخۆیی.
4-. پشتیوانیکردن لە میکانیزمی چاودێریی سەربەخۆ بۆ چاودێریکردنی ئاگربەست.
کۆربین لە بەشێکی نامەکەیدا دەڵێت: "کورد یەکێکە لە گەورەترین نەتەوەکانی جیهان کە دەوڵەتی نییە و مافی چارەی خۆنووسینی لێ زەوت کراوە. گرنگە هەموومان دان بە مافی کورددا بنێین لە سوریا، عیراق، ئێران و تورکیا بۆ دیاریکردنی داهاتووی خۆیان".
فەرماندەی ناوەندیی سوپای ئەمریکا (سێنتکۆم) لە پەیوەندییەکی تەلەفۆنیدا لەگەڵ سەرۆکی سوریا، داوایکرد هێزەکانی حکومەت پابەندی ئاگربەست بن لەگەڵ هێزەکانی سوریای دیموکرات (هەسەدە) و رێگری لە گواستنەوەی زیندانییانی داعش نەکەن.
تیم هۆکینز، وتەبێژی سێنتکۆم رایگەیاند، ئەدمیراڵ براد کوپەر، فەرماندەی سێنتکۆم ئەمڕۆ 21ـی کانونی دووەم پەیوەندی بە ئەحمەد شەرع، سەرۆکی سوریاوە کردووە.
بەپێی راگەیەندراوەکە، کوپەر داوای لە شەرع کردووە پابەندبن بە ئاگربەست لەگەڵ هەسەدە و پشتیوانی لە گواستنەوەی زیندانییانی داعش بکەن لە سوریاوە بۆ عیراق.
فەرماندەکەی ئەمریکا پلانی سێنتکۆمی بۆ سەرۆکی سوریا روونکردووەتەوە سەبارەت بە گواستنەوەی نزیکەی 7000 زیندانیی داعش بە شێوەیەکی رێکخراو و پارێزراو، داواشی کردووە هێزەکانی سوریا و هێزەکانی دیکە خۆیان لە هەر کارێک بەدوور بگرن کە ببێتە هۆی تێکدانی ئەو پرۆسەیە.
وەزارەتی گەنجینەی ئەمریکا سزای بەسەر شەش رێکخراوی ناو غەززەدا سەپاند و تۆمەتباری کردن بەوەی لەژێر پەردەی کاری خێرخوازی و تەندروستیدا، پارە بۆ باڵی سەربازیی حەماس کۆدەکەنەوە.
لە راگەیەندراوێکدا وەزارەتەکە ئاشکرای کردووە، بزوتنەوەی حەماس نهێنیی کاری ئەم رێکخراوانەی بەکارهێناوە بۆ کۆکردنەوەی هاوکاری لە بەخشەرانی نێودەوڵەتی، بەڵام پارەکە بۆ "چالاکییە تیرۆریستییەکان" بەکارهاتووە نەک بۆ هاووڵاتیانی مەدەنی.
جۆن کەی هێرلی، بریکاری وەزارەتی گەنجینەی ئەمریکا رایگەیاند: "حەماس ژیانی گەلی فەلەستینی پشتگوێ خستووە، ئیدارەی ترەمپ رێگە نادات سیستمە داراییەکان بۆ پارەدارکردنی تیرۆر بەکاربهێنرێن".
بەپێی راگەیەندراوەکە، ئەو شەش رێکخراوە بانگەشەی پێشکەشکردنی خزمەتگوزاریی پزیشکییان کردووە، بەڵام لە واقیعدا سەر بە کەتیبەکانی عیزەدین قەسام بوون و بەڵگەنامەکانی دوای 7ـی ئۆکتۆبەری 2023 ئەوەیان سەلماندووە.
ئەمریکا جەختیکردووەتەوە، ئەم سزایانە رێگر نابن لە گەیشتنی هاوکاریی مرۆیی بۆ هاووڵاتیانی غەززە بەپێی مۆڵەتە رەسمییەکان.