هەواڵەکان
دوای ئەوەی بەهۆی گرژییەكانی رۆژئاوا و پەلامارە بەردەوامەكانی گروپە چەكدارەكانی سوریا، هێزەكانی سوریای دیموكرات لەو ناوچانە كشانەوە كە ئەو گرتووخانانەیان تێدایە تیرۆرستانی داعشیان تێدا زیندانیكراون و سوپای عەرەبیی سوریا دەستیان بەسەر گرتووخانەكاندا گرتووە، دوای ئەو روداوانەش بڕیاردرا بە گواستنەوەی نزیكەی حەوت هەزار زیندانی داعش بۆ گرتووخانەكانی عیراق، وتەبێژی فەرماندەیی ناوەندیی هێزەكانی ئەمریكاش دەڵێت، گواستنەوەی زیندانییەكان بۆ عیراق ماوەی چەند رۆژێكی كەم دەخایەنێت.
تیم هۆكینز وتەبێژی فەرماندەیی ناوەندیی هێزەكانی ئەمریكا ناسراو بە سێنتكۆم دەڵێت، تیرۆریستەكانی داعش راستەوخۆ بە سەرپەرشتی سێنتكۆمدا دەگەیەنرێنە گرتووخانەكانی عیراق.
وەزارەتی جەنگیی ئەمریكاش رایگەیاند، ستایشی عیراق دەكەن كە رۆڵێكی پێشەنگ لە هاوپەیمانیی نێودەوڵەتی دژی داعش دەگێڕێت و لەخۆگرتنی دەستگیركراوانی داعشی گرتووەتە ئەستۆ.
دەشڵێت، هێشتنەوەی ئەو تیرۆریستانە لە گرتووخانەكانی عیراق كاتییە تا ئەو كاتەی وڵاتان هاووڵاتیانی خۆیان وەردەگرنەوە و لە وڵاتەكانیان و دادگاییان دەكەن.
لە چەند رۆژی رابردووشدا 150 تیرۆریستی داعش لە سوریاوە رادەستی عیراق كران كە بەشێكیان بیانین، ماركۆ رۆبیۆ وەزیری دەرەوەی ئەمریكا و تۆم باراك نێردەی تایبەتی ئەمریكاش بۆ سوریا، دەستپێشخەریی عیراق بۆ چاودێریكردنی ئەو تیرۆریستانە بەرز دەنرخێنن.
ماركۆ رۆبیۆ دەڵێت، ئەو هەوڵەی عیراق كارێكی ئازایانەیە و عیراق لە هێڵەكانی پێشەوەدایە بۆ روبەڕوبوونەوەی هەڕەشەكانی گروپی تیرۆرستی داعش بۆسەر هەموو وڵاتان.
تۆم باراكیش باس لەوە دەكات، ئەو هەڵوێستەی عیراق لەسەر ئاستی وڵاتانی ناوچەكە فراوانترین بەشدارییە لە بەهێزكردنی سەقامگیریی سوریا و رێگە بۆ ئاشتی و داهاتوویەكی گەشەسەندوو خۆش دەكات.
ئەگەرچی گواستنەوەی تیرۆریستانی دەستگیركراوی داعش بۆ عیراق لەلایەن شیكەرەوانی سیاسییەوە لێكدانەوەی جیاوازی بۆ دەكرێت، بەڵام دوایین لێدوانی تیم هۆكینز وتەبێژی فەرماندەیی ناوەندیی هێزەكانی ئەمریكا ئەو ترسانە دەڕەوێنێتەوە و دەڵێت، هۆكاری گواستنەوەی ئەو تیرۆریستانە بۆ عیراق بۆئەوەیە دڵنیابنەوە لە شوێنێكی پارێزراودا زیندانی دەكرێن و رێگە بە هەڵاتنیان نادرێت.
بەڕێوەبەرایەتیی هاتوچۆی سلێمانی رایدەگەیەنێت، بەهۆی بەفربارین و بەستنەوە، چەند رێگایەک لە سنوری سلێمانی داخران و تونێلی پێشڕەویش هێشتا کراوەیە.
لە ئاگادارییەکدا هاتوچۆی سلێمانی ئاماژەی بەوەکردووە، رێگاکانی (چاڤی لاند – گۆیژە) و (دۆڵەمیران – هەڕووتە – شاخی گۆیژە لە فلکەی ئەحمەد گرێدەرەوە) بەڕووی شۆفێراندا داخراون.
سەبارەت بە رێگای تونێلی پێشڕەو، روونیکردووەتەوە کە لە ئێستادا کراوەیە و کێشەی نییە، بەڵام ئەگەری هەیە لە چەند سەعاتی داهاتوودا گرفت دروست ببێت و دابخرێت.
هاتوچۆی سلێمانی داوا لە شۆفێران دەکات بۆ کاری زۆر پێویست نەبێت ئەو رێگایانە بەکارنەهێنن.
رەیان کلدانی، ئەمینداری گشتیی بزوتنەوەی بابلیون، پەیامێکی توند لەبارەی "بڕینی کەزیی کچە کوردێک" بڵاودەکاتەوە و رایدەگەیەنێت، ئەم کارە تەنیا بڕینی قژێک نییە، بەڵکو تاقیکردنەوەی مرۆڤبوونی هەمووانە.
لە پەیامێکدا کلدانی نووسیویەتی: "کاتێک کەزیی کچێک دەبڕدرێت، تەنها قژەکە نابڕدرێت، بەڵکو مانای مرۆڤبوون لە ناو هەمووماندا تاقی دەکرێتەوە. کەزی هێمای خۆبوونە، ئەوەی دەست دەبات بۆ ئەم هێمایە، ترسی خۆی لە جیاوازی ئاشکرا دەکات".
رەیان کلدانی بەناوی عیراقەوە دەڵێت: "کەرامەتی مرۆڤ پارچە ناکرێت، ئازاری کچێکی کورد بریندارکردنی ویژدانی هەموو عیراقە".
جەختیشی کردووەتەوە کە زمانی توندوتیژی و تۆڵە رەتدەکەنەوە و یەکترقبوڵکردن دەکەنە بنەمای پێکەوەژیان، چونکە "وڵات بە پاراستنی کەرامەت دروست دەبێت، نەک بە بڕین".
ئیلهام ئەحمەد سوپاس و پێزانینی خۆی ئاڕاستەی گەلی کورد لە ناوخۆ و تاراوگە دەکات بۆ پشتیوانییەکانیان لە ئیدارەی خۆبەڕێوەبەری و هێزەکانی لە سوریا.
لە پەیامێکدا ئیلهام ئەحمەد دەڵێت: "دەنگ، پشتیوانی و جوڵە سیاسی و میدیاییەکانی ئێوە، هێڵێکی بەرگریی راستەقینەی بۆ کەرامەتی گەلەکەمان و مافی ژیان لە ئازادی و ئاسایشدا دروستکرد".
هەروەها هانی کوردانی تاراوگە دەدات بە هەمان گوڕوتین بەردەوام بن تاوەکو مەترسیی جینۆساید لەسەر گەلی کورد کۆتایی دێت.
ماڵپەڕی شەفافییەت داهاتی ئەم هەفتەیەی سلێمانی بڵاوکردەووە، کە زیاتر لە 10 ملیار دینارە.
ماڵپەڕی شەفافییەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان بڵاویکردەووە، کە لە رۆژی 17ـی1ـی2026 تا 23ـی1ـی2026 داهاتی نانەوتی 10 ملیار و 512 ملیۆن و 158 هەزار دیناربووە.
ئاماژەی بەوەشکردووە، بە بەراورد بە هەفتەی رابردوو زیاتر لە سێ ملیار دینار داهات کەمی کردووە.
جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.
هاتوچۆی زۆربەی ناوچەکانی هەرێم ئاگاداری شۆفێران دەکەنەوە، لەئێستادا شەقامەکان مەترسی خزین و نەمانی کۆنترۆڵی ئۆتۆمبێلی لەسەرەم هاوکات داوادەکەن بۆ کاری زۆر پێویست نەبێت شۆفێری نەکەن.
ئاگادارییەک لە هاتوچۆی سلێمانییەوە بۆ شۆفێران؛ رێگای نێوان تاسڵوجە – سلێمانی و بە پێچەوانەوە بەکارمەهێنن
بەڕێوەبەرایەتی هاتوچۆی سلێمانی، ئاگاداری شۆفێران دەکاتەوە لە ئێستادا رێگای نێوان تاسڵوجە بە ئاڕاستەی راپەڕین و بەپێچەوانەوە، بەهۆی زۆری بەفربارین مەترسی خزین و نەمانی کۆنترۆڵی ئۆتۆمبێل هەیە.
ئاماژەی بەوەشکرد، داوا لە شۆفێران دەکات بۆ کاری زۆر پێویست نەبێت ئەو شەقامە بەکارنەهێنن و نەیەنە دەرەوە.
هاوکات هاتوچۆی چەمچەماڵ؛ ئاگاری شۆفێران دەکاتەوە لە ئێستادا بەهۆی زۆری بەفربارین رێگاکانی ناوشار و دەرەوەی شار مەترسی خزین و نەمانی کۆنترۆڵی لەسەرە بەتایبەت رێگای بانی مەقان.
داواش لەهاووڵاتیان دەکات بۆ کاری زۆر پێویستە نەبێت شۆفێری نەکەن و نەیەنە دەرەوە تا بەم شەپۆلی بەفربارینە کۆتایی دێت.
سیناتۆرێکی ئەمریکا دەڵێت: لەناو ئەنجومەنی پیرانی ئەمریکا کۆدەنگییەکی بەهێز هەیە بۆ ئەوەی کوردەکان بپارێزن.
لیندسی گراهام، سیناتۆری ئەمریکا لە تۆڕی کۆمەڵایەتی ئێسک بڵاویکردەوە، لە ئەنجومەنی پیرانی ئەمریکا نیگەرانییەکان لەبارەی رەوشی خراپی سوریا زیادیکردووە.
ئاماژەی بەوەشکرد، کۆدەنگی بەهێز هەیە بۆ پاراستنی ئەو کوردانەی کە لە شەڕی داعش هاوکارمان بوون و لەگەڵمان مانەوە.
گراهام ئەوەشی خستەڕوو، دەسەڵاتەکانی ئەنجومەنی پیران راستەقینەن، چاوەڕوان بن.
بەپێی پێشبینییەکانی کەشناسی لە 48 سەعاتی داهاتوودا بارستە هەوایەکی ساردی جەمسەری و شەپۆلێکی بەفر و بارانبارین ناوچەکە دەگرێتەوە.
بەڕێوەبەرایەتی گشتی کەشناسی هەرێم بڵاویکردەوە، ئەمڕۆ کەش نمەباران و بارانی مامناوەند هەندێک کات تێکەلەی وردە بەفر لەگەڵ باران دەبارێت، هەروەها لە زۆربەی ناوچەکان بەفر بارین هەبێت .
ئاماژەی بەوەشکرد، کاریگەری ئەم شەپۆڵە لەسەر ناوچەکەمان تا کاتەکانی ئێوارە بەردەموی دەبێت بە تایبەت لە ناوچە شاخاوییەکان و ناوچە سنوریەکانی پاشان بۆ شەو کەش ئاسایی دەبێتەوە کاریگەری ئەم شەپۆڵە کۆتایی دێت .
کەشناسی هەرێم راشیگەیاند، پلەکانی گەرما 4 بۆ 6 پلە نزمتر دەبنەوە بە بەراورد بە تۆمارکراوەکانی دوێنێ.
ئەوەشی خستەروو، سبەینێ ئاسمان لە نێوان پەڵە هەور و نیمچە هەور دەبێت لە ناوچە شاخاوییەکان هەندێک کات هەوری تەواو دەبێت.
کەشناسی بڕی بەفربارینی ئەمڕۆی ناوچەکانی هەرێمی بڵاوکردەوە، کە بەم شێوەیەیە:
دهۆک 0.2 سم
زاخۆ 1سم
سلێمانی 4 سم
پێنجوین 6.5 سم
باتیفا 13 سم
دەرکار 5 سم
باتێل 5 سم
پیرمام 8 سم
شقلاوە 7 سم
سیتەک 8 سم
قەرەداغ 12 سم
قڕگە 6 سم
یاخسەمەر 10 سم
تەکیەی کاکەمەند 8 سم
تەکیەی جەباری 6 سم
هەلەبجە 1 سم
بیارە 4 سم
تەوێڵە 10.5 سم
چوارتا 8 سم
چەمچەماڵ 9 سم
سەنگاو 2 سم
شوان 5 سم
وەزیری جەنگی ئەمریکا دەڵێت؛ داعشە بیانییەکان بەشێوەیەکی کاتی لە عیراق زیندانی دەکرێن تا وڵاتەکانی خۆیان دەیانگەڕێننەوە و دادگای دەکرێن.
پیت هێگسێس وەزیری جەنگی ئەمریکا رایگەیاند، تیرۆریستە بیانییەکانی داعش بە شێوەیەکی کاتی لە عیراق زیندانی دەکرێن، و ئێمە چاوەڕێین وڵاتەکانیان بیانگەڕێننەوە و دادگاییان بکەن.
وتیشی، ستایشی رۆڵی پێشەنگایەتی عیراق دەکەین لە هاوپەیمانی نێودەوڵەتی دژی داعش و رۆڵی لە پاراستنی دەستبەسەرکراوە تیرۆریستەکان.
لەلای خۆشیەوە باڵوێزخانەی ئەمریکا لە بەغداد ئاشکرایکرد، وڵاتەکەی چاوەڕوانە وڵاتان داعشە دەستبەسەرکراوەکانیان لەو شوێنانە وەربگرنەوە بۆ ئەوەی رووبەڕووی دادگایان بکەنەوە.
هاوکات ئاژانسی رۆیتەرز لە زاری لێپرسراوێکی ئەمریکی بڵاویکردووەتەوە، پێشبینی دەکرێت لە چەند رۆژی داهاتوودا، نزیکەی حەوت هەزار دەستگیرکراوی داعش لە زیندانەکانی سوریاوە بگوازێتەوە بۆ عیراق.
واشنتۆن بە رەسمی لە رێكخراوی تەندروستیی جیهانیی كشایەوە و دەڵێت لەمەودوا لە بواری تەندروستیدا راستەوخۆ مامەڵە لەگەڵ وڵاتان دەكەن.
میدیاكانی ئەمریكا بڵاویانكردووەتەوە، واشنتۆن بە رەسمی كشانەوەی لە رێكخراوی تەندروستیی جیهانیی راگەیاندووە و باسی لەوەكردووە، ئێستا لە ئاستێكی سنورداردا مامەڵە لەگەڵ رێكخراوەكەدا دەكات ئەویش تەنها بۆ جێبەجێكردنی رێكارەكانی كشانەوە.
واشنتۆن راشیگەیاندووە، بۆ لەمەودا لەبری ئەوەی لە رێگەی رێكخراوەكەوە بە وڵاتەكان بگەن لە بواری كەرتی تەندروستیدا، راستەوخۆ مامەڵە لەگەڵ وڵاتانی جیهاندا دەكەن.
لێپرسراوانی باڵای ئەمریكاش دەڵێن، وڵاتەكەیان هیچ خواستێكی نییە بۆئەوەی وەك چاودێر لە رێكخراوەكەدا بمێنێتەوە و نایەوێت لە داهاتووشدا ببێتەوە بە ئەندام تیایدا.
ماوەی ساڵێكە لەدوای دەستبەكاربوونەوەی وەك سەرۆكی ئەمریكا، چەندین جار دۆناڵد ترەمپ باسی لەوە كردووە بەهۆی گەندەڵی و شكستی تەندروستی جیهانیی لە روبەڕوبوونەوەی ڤایرۆسی كۆرۆنا، لە رێكخراوی تەندروستیی جیهانیی دەكشێنەوە.
مەزڵوم عەبدی، فەرماندەی گشتیی هێزەکانی سوریای دیموکرات (هەسەدە)، ئاشکرای کرد کە پەیوەندییەکی تەلەفۆنیی لەگەڵ ئیمانوێل ماکرۆن، سەرۆکی فەرەنسا، ئەنجام داوە.
عەبدی رایگەیاند، سەرۆکی فەرەنسا پشتگیری و هاوکاریی خۆی بۆ هەوڵەکانی هەسەدە و لایەنەکان دەربڕی کە کار بۆ راگرتنی تەقە و گەڕانەوە بۆ رێڕەوی دایەلۆگ و دانوستان لە سوریا دەکەن، بە ئامانجی گەیشتن بە چارەسەرێکی هەمیشەیی کە خزمەتی بەرژەوەندیی گشتیی تەواوی ناوچەکە بکات.
هەروەها لە پەیوەندییەکەدا باس لە جێبەجێکردنی رێککەوتنەکانی پێشووی نێوان هەسەدە و حکومەتی سوریا کرا، لەگەڵ جەختکردنەوە لەسەر پێویستیی پاراستنی مافەکانی پێکهاتەکان.
محەمەد شیاع سودانی، سەرۆکی ئەنجومەنی وەزیرانی عیراق، ئەمڕۆ پێنجشەممە، پێشوازی لە تۆماس باراک، نێردەی تایبەتی دۆناڵد ترەمپ، سەرۆکی ئەمریکا، بۆ سوریا کرد.
نووسینگەی راگەیاندنی سەرۆکی ئەنجومەنی وەزیران بڵاوی کردەوە، لە میانی دیدارەکەدا بارودۆخی ناوچەکە و پێشهاتەکانی سوریا تاوتوێ کران.
سودانی جەختی لە گرنگیی ئاسایش لە سوریا بۆ عیراق و ناوچەکە کردەوە، هەروەها ئاماژەی بە پێویستیی هاوکاری بۆ بەرقەرارکردنی سەقامگیری و دەستەبەرکردنی یەکگرتوویی خاکی سوریا دا.
لە بەشێکی دیکەی قسەکانیدا، سەرۆکی ئەنجومەنی وەزیران ئاماژەی بە هاوبەشیی بونیاتنەر لەنێوان عیراق و ویلایەتە یەکگرتووەکانی ئەمریکا کرد لە بەرەنگاربوونەوەی تیرۆر و دامەزراندنی بناغەکانی هاوکاریی ئابووری و گەشەپێدانی بەردەوام.
لای خۆیەوە، تۆماس باراک پێزانینی سەرۆکی ئەمریکای بە سودانی گەیاند بۆ هەوڵەکانی حکومەتی عیراق لە پشتگیریکردنی سەقامگیری لە ناوچەکە و بەڕێوەبردنی هەڵوێستی عیراق لەم قۆناغە هەستیارەدا.
باراک ستایشی هەنگاوەکانی سودانی و ئیدای هێزە ئەمنییەکانی عیراقی کرد لە بەرەنگاربوونەوەی تیرۆر و کرانەوەی عیراق بەڕووی وەبەرهێنانی نێودەوڵەتی و بونیاتنانی متمانەی ئابووریی هاوبەش، کە بە فاکتەرێکی گرنگ بۆ سەقامگیریی ناوچەکە دادەنرێت.
مەزڵوم عەبدی، فەرماندەی گشتیی هێزەکانی سوریای دیموکرات (هەسەدە)، رایگەیاند کە کۆبوونەوەیەکی "بونیاتنەر و بەرهەمداریان" لەگەڵ تۆم باراک و ئەدمیراڵ براد کۆپەر، فەرماندەی فەرماندەیی ناوەندیی ئەمریکا (سێنتکۆم)، لە هەرێمی کوردستان ئەنجام داوە.
عەبدی لە پۆستێکدا لە تۆڕی کۆمەڵایەتیی X، ئاماژەی بەوە دا کە پشتگیریی ویلایەتە یەکگرتووەکانی ئەمریکا و سیاسەتی دۆناڵد ترەمپ بۆ پرۆسەی راگرتنی تەقە "جیددییە، گرنگیی خۆی هەیە و جێگەی پێشوازییە."
مەزڵوم عەبدی هەروەها جەختی لەسەر هەوڵەکانی تۆم باراک کردەوە بۆ گەڕانەوە بۆ دایەلۆگ و دانوستان لەنێوان هەسەدە و حکومەتی سوریا.
فەرماندەی گشتیی هەسەدە دووپاتی کردەوە کە بە "هەموو تواناوە، بە شێوەیەکی جیددی" کار دەکەن بۆ وەدیهێنانی یەکگرتنێکی راستەقینە و پاراستنی ئاگربەستی ئێستا.
سەرۆک بافڵ جەلال تاڵەبانی پرسەنامەیەکی بەبۆنەی کۆچی دوایی خاتوو تارا، کچی شەهیدی فەرماندە (حەمەئەمین یاخیانی)ەوە ئاراستەی بنەماڵەکەیان کرد.
دەقی پرسەنامەکە:
دڵگران و غەمباربووم بە کۆچی دوای خاتوو تارا، کچی شەهیدی فەرماندە ( حەمەئەمین یاخیانی ) و برازای شەهید یوسف و هاوسەری هەڤاڵ شێرزاد شەهید سابیر لە دەستەی پاسەوانی سکرتارییەت.
بۆ ئەم خەمە پرسەو سەرەخۆشی ئاڕاستەی بنەماڵە سەربەرزو تێکۆشەرەکەیان دەکەم کە نموونەیەکی باڵان لە خەبات و تێکۆشان و هاوبەشی خەمیانم.
لەخوای گەورە داواکارم رۆحی کۆچکردوو بەبەهەشتی بەرین شادبکات، ئارامی و سەبووری بەهەموولایەک ببەخشێت.
بافڵ جەلال تاڵەبانی
سەرۆکی یەکێتیی نیشتمانیی کوردستان
برێت مەکگۆرک، رێکخەری پێشووی کۆشکی سپی بۆ کاروباری رۆژهەڵاتی ناوەڕاست و باکوری ئەفریقا، نیگەرانیی خۆی لە دۆخی باکوری رۆژهەڵاتی سوریا دەردەبڕێت و جەختدەکاتەوە دەبێت ئاگربەست بەردەوام بێت.
مەکگۆرک لە پەیامێکدا رایگەیاندووە: "دۆخی باکوری رۆژهەڵاتی سوریا جێگەی نیگەرانیی قوڵە. دەبێت ئاگربەست جێگیر بێت و بەردەوام بێت".
مەکگۆرک باڵاکەی کۆشکی سپی هۆشداریداوە کە "هەر تێکچوونێکی دۆخی ئەمنی، بەتایبەت لە زیندانەکانی داعش، دەرئەنجامی نێودەوڵەتیی لێدەکەوێتەوە".
مەکگۆرک ستایشی کوردی کردووە و دەڵێت: "کورد لە عیراق و سوریا هاوبەشی جێگیر و بەوەفان و دەبێت بەوشێوەیە مامەڵەیان لەگەڵ بکرێت، بەهۆی ئەوانەوە جیهان زۆر پارێزراوترە".
رۆن پرۆسۆر، باڵیۆزی ئیسرائیل لە ئەڵمانیا رەخنەی توند لە بێدەنگیی وڵاتانی ئەوروپا دەگرێت بەرامبەر ئەو دۆخەی لە ناوچە کوردییەکانی سوریا دەگوزەرێت و دەڵێت "خوێن لە دەماردا دەیبەستێت".
پرۆسۆر لە پەیامێکدا لە تۆڕی کۆمەڵایەتیی ئێکس نووسیویەتی: "ئەو دیمەنانەی لە ناوچە کوردییەکانی سوریاوە دەگەن، خوێن لە دەماردا دەیبەستن، ئەوروپاش لەم ئاستەدا گوێی کەڕ کردووە".
باڵیۆزەکەی ئیسرائیل کە پێشتر نوێنەری وڵاتەکەی بووە لە نەتەوە یەکگرتووەکان و بەریتانیا، دەڵێت: "کوردەکان باوەڕپێکراوترین هاوبەشی رۆژئاوا بوون لە سوریا و خاوەنی زۆرینەی بەهاکانی ئێمەن. ئەوان قوربانیی گەورەیان داوە و 'کاری قورس و پیس'ی رۆژئاوایان لە شەڕی دژی داعش ئەنجامدا".
لە کۆتایی پەیامەکەیدا، پرۆسۆر داوا دەکات کورد بەتەنیا جێ نەهێڵرێن و دەڵێت: "ئێستا کاتی ئەوەیە کە پێویستیان بە پشتیوانیی ئێمەیە، نابێت لەم ساتە تاریکەدا پشتیان تێبکەین و بەتەنیا جێیان بهێڵین".