پرۆژەی شاری ٢٠٢٠ یەکێکە لە پڕۆژە ھاوبەشە ستراتیژییەکانی نێوان کەرتی گشتی و تایبەت و بە پاڵپشتی حکومەتی ھەرێمی کوردستان جێبەجێ دەکرێت، لە ساڵی ٢٠١٨ لەلایەن قوباد تاڵەبانی جێگری سەرۆکی حکومەت بەردی بناغەکەی دانراوە. 

حەوت ساڵ بەسەر کۆمەڵکوژی گوندی کۆجۆ لەلایەن داعشەوە تێدەپەڕێت و تائێستاش ١٤٠ کەس لە خەڵکی ئەو گوندە بێسەروشوێنن کە زۆربەیان کچ و ژنن، لە دوای تێپەڕبوونی ئەو حەوت ساڵە، زۆربەی دانیشتوانی کۆجۆ ئاوارەن و لە رەوشێکی خراپدا ژیان بەڕێ دەکەن، چەندین گۆڕی بە کۆمەڵیش لە گوندەکە ھەیە کە تا ئێستا ھەڵنەدراوەنەتەوە.

 

ژینگەپارێزانی چەمچەماڵ دەڵێن، دواکەوتنی موچەکانیان کاریگەری زۆری لەسەر ژیان و گوزەرانیان کردووە و لەسەروو ئەوەشەوە کارەکەیان رانەگرتووە و داوا دەکەن کێشەکەیان بۆ چارەسەر بکرێت، کۆمپانیای سەرپەرشتیاری پاککردنەوەی نەخۆشخانەکانی چەمچەماڵیش دەڵێت، حکومەتی ھەرێم بودجەی کۆمپانیاکەیانی راگرتووە.

بەڕێوەبەری گشتی بەنداوەکانیش دەڵێت، دەستپێکردنەوەی کارکردن لە بەنداوی "بێخمە" پێویستی بە ڕێککەوتنی سیاسی ھەیە، بەرێوەبەری ئاوی ھەولێریش ڕایدەگەیەنێت، گرفتی کەم ئاوی بەھۆی بەفیڕۆدانیەتی لەلایەن ھاووڵاتیانەوە.

سەرۆکی دەستەی دەروازە سنورییەکانیش داوا دەکات ھەرێمی کوردستان پابەندی یاسای ژمارە ١٣ی ساڵی ٢٠١٩ بێت بۆ کردنەوەی نوسینگەیەکی ھەماھەنگی نێوان ھەرێم ‌و بەغداد بۆ ئەوەی لەو ڕێگەیەوە ھەموو دەروازە سنورییەکان بە حکومەتی عێراقەوە ببەسترێتەوە.

ئەندامێکی لیژنەی چاودێری جێبەجێکردنی بەرنامەی حکومەتیش دەڵێت، ژمارەیەکی زۆر لە دەروازەی سنوری لە عێراق، لە ژێر دەسەڵاتی حکومەتدا نییە ‌و فەرمانی کردنەوەیان نییە.