بەهۆی راگرتنی هێرشەكانی ئەمریكا و ئێرانەوە، نرخی نەوت بە نزیكەی 5% دابەزی و نرخی زێر و زیویش بەرزبونەوە.

ئەمرۆ لەگەڵ كردنەوەی بازارەكانی نەوتدا، بەرمیلێك نەوتی برێنت بە 87 دۆلار و 24 سەنت مامەڵەی پێوەكرا، ئەوەش بەراورد بە دوێنێ 4.81% بەهاكەی لە دەستداوە.

هەروەها بەرمیلێك نەوتی تەكساس بە 84 دۆلار و 51 سەنت مامەڵەی پێوە كرا كە بە رێژەی 5.37% بەهاكەی لەدەستداوە.

هەر بەهۆی پێشهاتەكانی جەنگی ئێرانەوە، نرخی زێڕ و زیو لە بازارەكانی جیهاندا بەرزبووەتەوە و ئۆنسەیەك زێر بە 4 هەزار و 87 دۆلار مامەڵەی پێوە دەكرێت و بەهاكەی بەرێژەی 0.86% بەرزبووەتەوە، هەروەها ئۆنسەیەك زیو بە 59 دۆلار مامەڵەی پێوە دەكرێت و بەهاكەی بە رێژەی 1.15% بەرزبووەتەوە.

راوێژكارێكی دارایی عیراق رایگەیاند، حكومەت پلانی هەیە بۆ بەرزكردنەوەی داهاتی نانەوتی بۆ 46% لە ماوەی دە ساڵی داهاتوودا.

مەزهەر محەمەد ساڵح راوێژكاری دارایی سەرۆك وەزیرانی عیراق رایگەیاند، حكومەت پلانێكی ستراتیژی داناوە بۆ بەرزكردنەوەی رێژەی داهاتە نانەوتییەكان بۆ 46% لە ماوەی دە ساڵی داهاتوودا.

هەروەها جەختیلەوەشكردەوە، حكومەت لە هەوڵدایە بۆ بەرزكردنەوەی بەشداری كەرتی تایبەت لە 37% بۆ 54% لە دەیەی داهاتوودا لە كۆی بەرهەمی ناوخۆیی، ئەوەش هۆكارێك دەبێت بۆ كەمكردنەوەی رێژەی بێكاری لە ئاستی ئێستای كە 13%ە بۆ كەمتر لە 3%.

راوێژكاری سەرۆك وەزیران جەختیلەوەشكردەوە، گەشەپێدانی ئابوری عیراق پشت بە هاوبەشی كارا دەبەستێت لە نێوان دەوڵەت و بازاڕدا، بە ئامانجی دروستكردنی ئابورییەكی هەمەچەشن و توانادار لە رووبەڕووبوونەوەی ئاڵینگاریەكاندا.

 

فڕۆکەکەی نـاتانیـاهۆ دوای رێگری لە دوو فڕۆکەی بێفڕۆکەوان لەسەر سنووری ئوردن، لە بنکەیەکەوە لە نەقەب بەرەو واشنتۆن بەڕێکەوت.

میدیاکانی ئیسرائیل، ئەمڕۆ دووشەممە، بڵاویانکردەوە، فڕۆکەی بنیامین نـاتانیــاهۆ سەرۆک وەزیرانی ئیسرائیل، لە بنکەیەکی سەربازییەوە لە ناوچەی نەقەب بەرەو واشنتۆنی پایتەختی ئەمریکا بەڕێکەوتووە.

ئەم بەرێکەوتنە دوای ماوەیەکی کەم هات لە راگەیەندراوێکی سوپای ئیسرائیل کە تێیدا ئاماژەی بە رێگریکردن لە دوو فڕۆکەی بێفڕۆکەوان  کرد لە نزیک سنوورەکانی ئوردن، کە پێش بەزاندنی ئاسمانی ئیسرائیل خراونەتە خوارەوە.

سوپای ئیسرائیل ئەمڕۆ دووشەممە لە راگەیەندراوێکدا رایگەیاند، رێگرییان لە دوو فڕۆکەی بێفڕۆکەوان کردووە کە لە ناوچەی سنووری لەگەڵ ئوردن بەدی کرابوون.

بەپێی رۆژنامەی "تایمز ئۆف ئیسرائیل"، پرۆسەی رێگریکردنەکە لە ئاسمانی نزیک ناوچەی دەریای مردوو رویداوە، و سوپای ئیسرائیل لە راگەیەندراوەکەیدا جەختی کردووەتەوە کە ئەو دوو فڕۆکە بێفڕۆکەوانە نەچوونەتە ناو خاکی ئیسرائیل و بەزاندنی سنووریان ئەنجام نەداوە.