وەزیری دەرەوەی ئێران رایگەیاند کە وڵاتەکەی و ئەمریکا نزیکن لە گەیشتن بە رێککەوتنێک لەسەر ناوەرۆکی دانوستانەکانیان سەبارەت بە بەرنامەی ئەتۆمی ئێران.

ئەمڕۆ شەممە، دوای کۆتاییهاتنی گەڕی یەکەمی دانوستانەکان لە مەسقەتی پایتەختی عومان، عەباس عراقچی، وەزیری دەرەوەی ئێران لە لێدوانێکدا رایگەیاند: "ئەمریکا دەیەوێت بە زووترین کات رێککەوتنێکی نوێ و ئەرێنی لە بارەی بەرنامەی ئەتۆمیی تاران بکات".

وەزیری دەرەوەی ئێران جەختی کردەوە کە "ئەوە کارێکی ئاسان نییە، بەڵکو پێویستی بە ویست و نیازپاکی هەردوو لایەنی بەشداربوو لە کۆبوونەوەکە هەیە".

بەپێی ئاژانسی (تەسنیم)ـی ئێران، دانوستانەکان لە نێوان شاندی ئێران بە سەرۆکایەتیی عەباس عراقچی و ستیڤ ویتکۆف، نێردەی تایبەتی سەرۆکی ئەمەریکا بۆ ڕۆژهەڵاتی ناوەڕاست ئەنجام دراون و ئەرێنی بوون.

ئاژانسەکە رونی کردووەتەوە کە دانوستانەکانی گەڕی یەکەم بە شێوەییەکی ناڕاستەوخۆ بەڕێوە چوون، دوو کاتژمێریان خایاندووە و لە دوو هۆڵی جیاواز ئەنجام دراون.

عراقچی هەروەها رایگەیاند کە دانوستانەکانی نێوان هەردوو وڵات هەفتەی داهاتوو بەردەوامیان دەبێت.

چین و ئیسپانیا هەوڵەكانیان دژی بڕیارەكانی سەرۆكی ئەمریكا یەك دەخەن و روبەڕووی ئاڵنگارییە ئابوورییەكان دەبنەوە.

پیدرۆ سانچێز سەرۆك وەزیرانی ئیسپانیا بەسەردانێك گەیشتە چین و لەگەڵ شی جین پینگ  سەرۆكی ئەو وڵاتە كۆبوویەوە.

هەردوولا جەختیان لە كاركردن بۆ بنیاتنانی هاوبەشییەكی بەهێزتر كردەوە بۆ روبەڕوبونەوەی ئاڵنگارییەكان لە پەراوێزی سەپاندنی زیاتری باج بەسەر چین و یەكێتی ئەوروپا لەلایەن ئەمریكاوە.

بڕیارە لە ناوەڕاستی ئەم مانگەشدا سەرۆكی چین هەوڵەكانی بۆ كەمكردنەوەی كاریگەرییەكانی سەپاندنی باج دەستپێبكات و سەردانی هەریەك لە وڵاتانی مالیزیا و كەمبۆدیا و ڤێتنام بكات.

هەر لە چوارچێوەی هەوڵەكانی چین بۆ بەهێزكردنی كۆدەنگی لەسەر بەگژاچوونەوەی بڕیاری باجەكان، وەزیری بازرگانی ئەو وڵاتە پەیوەندی تەلەفۆنی لەگەڵ هەریەكە لە هاوتاكانی لە یەكێتی ئەوروپا، مالیزیا، سعودیە و باشووری ئەفریقا ئەنجامدا.

کەمێک پێش ئێستا بریندارێکی روداوەکەی سنوری برادۆست بەهۆی سەختی برینەکەیەوە لە نەخۆشخانە گیانی لەدەستدا.

پەیامنێری کوردسات نیوز رایگەیاند، ئەلەند تەحسینی تەمەن 20 ساڵ، کە یەکێک بوو لەو سێ هاووڵاتییەی بەهۆی "تەقینەوەی گولـلە تۆپێک" لە سنوری برادۆست برینداربوون، کەمێک پێش ئێستا بەهۆی سەختی برینەکەیەوە گیانی لەدەستدا.

لە قەزای سیدەكانی سنووری برادۆست، سێ هاوڵاتی لەكاتی كۆكردنەوەی گژوگیای بەهارە، گولە تۆپێك پیایاندا تەقیەوە و بە سەختی برینداریكردن، ئەوەش سێیەمین حاڵەتی تەقینەوەی مین و گولە تۆپە لە 12 رۆژی رابردوودا بە هاوڵاتییان لە سنووری ناوچەكە، كە بەهۆیەوە دوو كەس گیانیان لەدەستداوە و چوار كەسی دیكەش برینداربوون.