بەمەبەستی جێبەجێكردنی رێككەوتنەكەی نێوان مەزڵوم کۆبانێ و ئەحمەد شەرع و پاراستنی بەنداوی تشرین لە هێرشە سەربازییەکان، سەرۆكی لیژنەی راسپێردراوی حكومەتی نوێی سوریا سەردانی فەرماندەی گشتی هێزەكانی سوریای دیموكراتی كرد.

ناوەندی راگەیاندنی هێزەكانی سوریای دیموكرات (هەسەدە) لە راگەیەندراوێکدا بڵاوی کردەوە كە مەزڵوم کۆبانێ، فەرماندەی گشتی هەسەدە و رۆژهەڵات عەفرینی، فەرماندەی گشتی یەكینەكانی پاراستنی ژنان لە شاری حەسەكە پێشوازیان لە حسێن سەلامە، سەرۆكی لیژنەی راسپێردراوی حكومەتی دیمەشق كردووە.

بەپێی راگەیەندراوەکە، سەردانەکە بۆ جێبەجێكردنی رێككەوتنی (10ـی ئازاری 2025) بووە کە لە نێوان مەزڵوم کۆبانێ و ئەحمەد شەرع، سەرۆكی سوریا بۆ قۆناغی راگوزەر ئەنجامدراوە.

لە دیدارەکەدا، هەردوولا جەختیان لە جێبەجێکردنی بڕگەکانی رێککەوتنەکە كردەوە و باسیان لە پێویستی بەردەوامبوون لە کەمکردنەوەی توندوتیژی و وەستاندنی شەڕ و پێکدادانەکان لە سوریا کرد، بەتایبەتی پاراستنی بەنداوی تشرین لە هێرشە سەربازییەکان.

ناوەندی راگەیاندنی هێزەكانی سوریای دیموكرات روونی كردەوە كە لە كۆبوونەوەكەی نێوان هەسەدە و سەرۆكی لیژنەی راسپێردراوی حكومەتی دیمەشق، باس لە پێکهێنانی لیژنەیەک کرا بۆ تاوتوێکردنی گەڕانەوەی ئاوارەکان لە هەموو ناوچەکانی سوریا.

هەروەها لە کۆبوونەوەکەدا، بۆ گفتوگۆكردن لەگەڵ حكومەتی دیمەشق، ناوی ئەندامەكانی ئەو لیژنەیە ئاشکرا کرا کە نوێنەرایەتی رۆژئاوا دەکەن و بڕیاریش وایە دەست بە كارەكانیان بكەن.

کۆشکی سپی لە راگەیێندراوێکدا سەبارەت بە گفتوگۆی نێوان ئەمریکا و ئێران رایگەیاند کە "گفتوگۆکان لەگەڵ ئێران ئەرێنی و بونیادنەر بوون"، ئەمەش دوای ئەو دیدارە دێت کە لە نێوان بەرپرسانی هەردوو وڵات ئەنجامدرا.

بەپێی راگەیێندراوی کۆشکی سپی، ستیڤ ویتکۆف، نێردەی تایبەتی ئەمریکا بۆ رۆژهەڵاتی ناوەڕاست، وەزیری دەرەوەی ئێرانی دڵنیاکردۆتەوە کە لە لایەن سەرۆکی ئەمریکاوە راسپێردراوە "بۆئەوەی تا بکرێت، لە رێگەی گفتوگۆ و دیپلۆماسییەوە کێشەکانی نێوان هەردوو وڵات چارەسەر بکرێن".

راگەیەندراوەکەی کۆشکی سپی ئاماژەی بەوەش کردووە: "ئەو کۆبوونەوەی ئەم رۆ ئەنجامدرا، هەنگاوێکە بۆ بەرەو پێش بردنی هەوڵەکانب بۆ بەدیهێنانی ئەنجامێک کە سودی بۆ هەردوولا هەبێت".

لە راگەیێندراوەکەدا ئاماژە بەوەدراوە: "هەردوولا رێککەوتن شەممەی داهاتوو جارێکی دیکە کۆببنەوە"و بەردەوامبن لە گفتوگۆ.

ئەم لێدوانە هاوکاتە لەگەڵ لێدوانی عەباس عراقچی وەزیری دەرەوەی ئێران کە بەهەمان شێوەم گفتوگۆکانی بە بونیادنەر وەسفکرد.

وەزیری دەرەوەی ئێران رایگەیاند کە وڵاتەکەی و ئەمریکا نزیکن لە گەیشتن بە رێککەوتنێک لەسەر ناوەرۆکی دانوستانەکانیان سەبارەت بە بەرنامەی ئەتۆمی ئێران.

ئەمڕۆ شەممە، دوای کۆتاییهاتنی گەڕی یەکەمی دانوستانەکان لە مەسقەتی پایتەختی عومان، عەباس عراقچی، وەزیری دەرەوەی ئێران لە لێدوانێکدا رایگەیاند: "ئەمریکا دەیەوێت بە زووترین کات رێککەوتنێکی نوێ و ئەرێنی لە بارەی بەرنامەی ئەتۆمیی تاران بکات".

وەزیری دەرەوەی ئێران جەختی کردەوە کە "ئەوە کارێکی ئاسان نییە، بەڵکو پێویستی بە ویست و نیازپاکی هەردوو لایەنی بەشداربوو لە کۆبوونەوەکە هەیە".

بەپێی ئاژانسی (تەسنیم)ـی ئێران، دانوستانەکان لە نێوان شاندی ئێران بە سەرۆکایەتیی عەباس عراقچی و ستیڤ ویتکۆف، نێردەی تایبەتی سەرۆکی ئەمەریکا بۆ ڕۆژهەڵاتی ناوەڕاست ئەنجام دراون و ئەرێنی بوون.

ئاژانسەکە رونی کردووەتەوە کە دانوستانەکانی گەڕی یەکەم بە شێوەییەکی ناڕاستەوخۆ بەڕێوە چوون، دوو کاتژمێریان خایاندووە و لە دوو هۆڵی جیاواز ئەنجام دراون.

عراقچی هەروەها رایگەیاند کە دانوستانەکانی نێوان هەردوو وڵات هەفتەی داهاتوو بەردەوامیان دەبێت.