وەزارەتی کارەبای ھەرێم لە راگەیەندراوێکدا بڵاویکردەوە، ڕۆژی ھەینی کارەبای گوندەکانی (ئورە - سەرەرو - دشێشێ - ئەدنێ) لە سنوری ناحیەی کانی ماسێ سەر بە پارێزگای دھۆک، بەھۆی تۆپبارانی سوپای تورکیاوە پچڕاوە، ئەوەش دوای ئەوەی تیمەکانی کارەبا رۆژێک پاش ئەو بۆردومانە، کارەبای ئەو گوندانەی چاککردبووە.

راشیگەیاند، لە ماوەی کەمتر لە حەوت رۆژدا، بۆ جاری سێیەمە کارەبای ناوچەکە بەھۆی تۆپبارانەوە پچڕاوە و لە ئێستاشدا تیمەکان، کارەبای ھەموو ئەو گوندانەیان چاککردوەتەوە.

وەفدێکی یەکێتیی نیشتمانیی کوردستان بە سەرۆکایەتی ئەمین بابەشێخ، ئەندامی مەکتەبی سیاسی و لێپرسراوی مەکتەبی پەیوەندیەکان، سەردانی بارەگای مەکتەبی سیاسی کۆمەڵی دادگەری کوردستانی کرد و لە لایەن محەمەد حەکیم و فاروق عەلی، ئەندامانی ئەنجومەنی باڵای کۆمەڵی دادگەریەوە پیشوازیان لێکرا. 

لە کۆبوونەوەکدا تیشک خرایە سەر ئەو ئاڵنگاریانەی کە ئێستا رووبەڕووی عێراق و ھەرێمی کوردستان و ناوچەکە بووەتەوە، ھەردوولا ھاوڕابوون لە سەر ئەوەی کە پێویستە تەواوی کێشەکان بە دانوستان و لەڕێگەی دەستوورەوە چارەسەر بکرێن، ئەوەشیان خستەڕوو کە پیشوازی لە ھەر دەستپێشخەریەک دەکەن بۆ ھێورکردنەوەی ئەو بارودۆخە سیاسیەی ئێستا، بەشێوەیەک لەگەڵ بەرژەوەندیەکانی گەلی کورد و پاراستنی مافە دەستورییەکانیدا بێت.

نەوزاد شێخ کامیل بەڕێوەبەری گشتی بازرگانی لە وەزارەتی بازرگانی و پیشەسازی ھەرێمی کوردستان ڕایگەیاند، بڕی ٩٧٫٣٦٢٫٠٠٠٫٠٠٠ نەوەد و حەوت ملیار و سێ سەد و شەست و دوو ملیون دینار ھاتووەتە سەر حسابی وەزارەتی بازرگانی و پیشەسازی ھەرێمی کوردستان، کە بەشێکی تری شایستە داراییەکانی جوتیارانە بۆ ساڵی ٢٠٢٢.

وتیشی، لەو بڕە پارەی ھاتووە بڕی ٥٠ پەنجا ملیار  ٣٦٢٫٠٠٠٫٠٠٠ دیناری بۆ سلێمانی و بڕی ٣٠ ملیار دیناری بۆ ھەولێر و ١٧ ملیار دیناریشی بۆ دھۆکە.

ئاشکراشیکرد، پاش تەواوبوونی ڕێکارە کارگێری و داراییەکان لە ئایندەیەکی نزیک دەست بە دابەش کردنی دەکرێت بەسەر جوتیاران بەپێی ڕۆژی ڕادەستکردنی گەنم بەسایلۆکان.

دەقی پەیامەکە...

بەرێز مەکتەبی سیاسی پارتی سۆسیال دیموکراتی کوردستان

بەبۆنەی یادی (٤٦)ساڵەی دامەزراندنی پارتەکەتانەوە، پیرۆزباییەکی گەرم ئاراستەی سەرۆک و سەرکردایەتی و ئەندامانی  پارتە تێکۆشەرەکەتان دەکەین.

پارتی سۆسیال دیموکرات لە سەرەتای شۆڕشی نوێی گەلەکەمانەوە رۆڵی بەرچاوی ھەبووە لەخەبات بۆ بەدیھێنانی ئازادی و ئامانجەکانی کۆمەڵانی خەڵکی کوردستان و لەم پێناوەشدا قوربانی زۆری داوە و ھەمیشە بەشێک بووە لەبەرەی پێکەوەیی و ھاو خەباتی و پێشمان وایە بۆ ئەمرۆشچ ھەروا دەبێت . بۆیەک وەک یەکێتیی ھەمیشە ئەم ھاوسەنگەرییەمان لەگەڵ پارتەکەتان بە بەشێک لە ھێزی میللەتەکەمان زانیووە و  بۆ ئەم قۆناغەی ئێستاشمان  پەرۆشی پەرەپێدانی ئەو  پەیوەندییەین ، لەپێناو یەکریزی  و یەکخستنی ھەوڵەکان بۆ گرتنەبەری چاکسازییەکی راستەقینە لەگشت بوارەکاندا.

دووبارە پیرۆزبێت یادی دامەزراندنی پارتی سۆسیال دیموکراتی کوردستان.

 مەکتەبی سیاسی                                                                                                                                                                                                 

یەکێتیی نیشتمانیی کوردستان

بڕیار رەشید ئەندامی ئەنجومەنی نوێنەرانی عێراق لە فراکسیۆنی یەکێتی رایگەیاند، دوای ھەوڵە بەردەوامەکانیان ئەمڕۆ بەزارەکی ئاگادارکرانەوە، کە وەزیری نەوتی عێراق ڕەزامەندی دەربڕیوە لەسەر زیادکردنی بەشە بەنزینی پارێزگایی سلێمانی.

وتیشی، لەئێستادا کۆی گشتی بەنزینی نێردراو لە بەغدادەوە بۆ سلێمانی بەپێی داتایی وەزارەتی نەوتی عێراق ٥٤۰ ھەزار لیتر بەنزینـە، بەمزووانە بەگوێرەی بەڵێنەکانی وەزارەتی نەوت دەگاتە سلێمانی.

ئاشکراشیکرد،  بەپێی قسەی وەزیری نەوتی عێراق ئەمە یەکەمین جارە ئەو ڕێژە زۆرە بڕیاری لێ بدرێت بۆ پارێزگایی سلێمانی تەرخان بکرێت.

بەپێی ھەواڵی کۆڵبەرنیوز، لە سنووری سەرداڤ سووراو لە شارۆچکەی بانە لە ڕۆژھەڵاتی کوردستان، ھێزەکانی ئێران تەقەیان لە کۆلبەرێک بە ناوی ھەژار فەرەجی کردووە، لە ئەنجامدا لە شوێنی ڕووداوەکە گیانی لەدەستداوە.

ھەروەھا لە سنووری گوندی نۆدشە سەر بە مەریوان سەربازانی ئێران کۆلبەرێک دەگرن و ئەشکەنجەی دەدەن.

لە لایەکی ترەوە چالاکوانێکی ژینگەپارێزی لە شاری سنە و چالاکوانێکی دیکە لە مەریوان لەلایەن ھێزە ئەمنیەکانی ئێرانەوە دەستبەسەر کراون و ھیچ زانیارییەک لەبارەی چارەنووسییان نییە.

دەستەی سەربەخۆی مافی مرۆڤی ھەرێم لە رونکردنەوەیەکدا بۆ رایگشتی رایگەیاند، وەفدێکی باڵای دەستەکەیان سەردانی بەڕێوەبەرایەتی چاکسازی گەورانی ھەولێریان کردوە بۆ لە نزیکەوە ئاگاداربوون لە رەوشی سزادراوانی ناو چاکسازی و رەوشی تەندروستی سزادراوان ومانگرتنیان.

راشیگەیاندوە، رەوشی تەندروستی مانگرتوانی ناو چاکسازی گەورانی ھەولێر جێگیرە، بەڵام لە حاڵەتی بەردەوام بوونیان لە مانگرتن رەنگە مەترسی لەسەر ژیانیان و تەندروستیان دروست بێت.

لە بەشێکی تری راگەیەنراوەکەدا ھاتووە، بنکەی تەندروستی چاکسازی وەکو پێویست نییە لە رووی نەبوونی پزیشکی پسپۆر و پێداویستی پزیشکی سزادراوان، بۆ ئەو مەبەستەش ئەو بابەتە لەگەڵ وەزارەتی تەندروستی تاوتوێ دەکەن بە تایبەت کە ئێستا چەند سزادراوێک توشی نەخۆشی پێست بوون.

"ئومێد ئەحمەد"وتەبێژی وەزارەتی کارەبای ھەرێم رایگەیاندوە، لەئێستادا بەھۆی شەپۆلی گەرما، خواست لەسەر بەکارھێنانی کارەبا زۆر زیادیکردوە و گوشار لەسەر تۆڕەکانی کارەباش دروستبووە، ئەوەش بوەتە ھۆی کەمکردنەوەی سەعاتەکانی پێدانی کارەبای نیشتمانی.

وتیشی، ھەوڵێکی زۆر ھەیە بۆ ئەوەی پێدانی کارەبای نیشتمانی بە ھاووڵاتیان زیاد بکەنەوە بۆ ١٥ سەعات، بۆ ئەو مەبەستەش پڕۆژەیەک لە بازیان ھەیە و بڕیارە لە مانگی تشرینی یەکەمی ئەمساڵ بڕی ٥٠٠ مێگاوات کارەبا زیاد بکرێت.

حەمدان عەبد جێگری ھاوسەرۆکی ئەنجومەنی جێبەجێکاری خۆبەڕێوەبەری باکور و رۆژھەڵاتی سوریا راگەیاند، خۆبەڕێوەبەری رۆژئاوای کوردستان و باکور و رۆژھەڵاتی سوریا کراوەیە بۆ دیالۆگی سوری – سوری و پاراستنی یەکگرتووی خاکی سوریا، وتیشی، چاوەڕێی دیالۆگێکی جددی دەکەن لەگەڵ دیمەشق بۆ چارەسەرکردنی قەیرانی سوریا لەڕووی سیاسییەوە، نەک لەڕووی سەربازییەوە.

عەبد ئاماژەی بەوەشکرد، وەک خۆبەڕێوەبەی چاوەڕێی پاراستنی ھەموو سنورەکان دەکەن، ھەروەک چاوەڕێی داڕشتنی دەستورێکن کە ھەمووان لە سوریا لە ماف و ئەرکەکاندا کۆک بن.

فەرمانگەی میدیا و زانیاری حکومەتی ھەرێمی کوردستان رایگەیاند، رۆژی دووشەممە ٨ی ئابی ٢٠٢٢، کە دەکاتە رۆژی ١٠ی موحەڕڕەمی ١٤٤٤ی کۆچی، لە تەواوی دامودەزگا رەسمییەکانی ھەرێمی کوردستان پشووی رەسمییە. 

ئاماژەی بەوەشکردووە، رۆژی سێشەممە ٩ی ئابی ٢٠٢٢ لە ھەموو دامودەزگاکان دەوامی رەسمی دەبێت.

"کامەران وریا" بەڕێوەبەری سایلۆی سلێمانی بە کوردسات نیوزی راگەیاند، لەسەر داوای وەزارەتی بازرگانی عێراق جارێکی تر پڕۆسەی وەرگرتنی گەنم دەستپێدەکەنەوە بۆ ئەو جوتیارانەی کە تائێستا بڕی تەواوی گەنمەکەیان رادەستی سایلۆ نەکردوە، وتیشی، لە بەرژەوەندی جوتیاران ماوەی وەرگرتنی گەنم درێژکراوەتەوە.

ئاماژەی بەوەشکرد، رۆژی یەکشەممە پرۆسەی وەرگرتنی گەنم لە سایلۆی سلێمانی دەستپێدەکاتەوە و تا رۆژی پێنجشەممە بەردەوام دەبێت.

بە پێی میدیاکانی باکوری کوردستان، دادگای تورکیا بریاری ئازادکردنی ئایسەڵ توغلوک پەرلەمانتاری پێشووی (ھەدەپە)ی دەرکردووە کە تووشی نەخۆشی بیرچوونەوە بووە، بەڵام بە ھۆی کەیسێکی دیکەوە دەستبەسەرکردنی بەردەوام دەبێت. 

لەلایەکی دیکەوە، زیندانیانی سیاسی وان دژی زیادبوونی ئازار و ئەشکەنجە لە ناو زیندانەکە، مانگرتنیان لە خواردن راگەیاندووە.

مانگرتنی زیندانیانی سیاسی وان، دوای ئەوە دێت، بەڕێوەبەرایەتی زیندانەکە دەستیگرت بە سەر سکاڵانامەیەکی زیندانیان کە ئاراستەی پەرلەمان و وەزارەتی داد و داواکاری گشتی تورکیایان کردبوو.

بە پێی ھەواڵی میدیاکانی باکوری کوردستان،"عەبدوڵا تارھان"جێگری سەرۆکی شارەوانی ناوچەی حەسەنکێفی ئێلیح کە سەر بە پارتی داد و گەشپێدان"ئاکەپە"یە، بەھۆی بونی گەندەڵی دەستی لە کارکێشاوەتەوە، ناوبراو رایگەیاندوە، گەندەڵی لە ئاستێکدایە چیتر مایەی دانبەخۆداگرتن نییە.

ھاوکات لە نامەی دەستلەکارکێشانەوەکەیدا ئاماژەی بۆ ئەوەکردوە، لە ناوچەکە ھەموو گەنجان بێکارن، لە بەرامبەردا لێپرسراوانی سەر بە ئاکەپە لە شار و ناوچەکان، خزموکەسوکاری خۆیان لە شارەوانی و دامودەزگاکانی تر دامەزراندوە، "تارھان" بەرامبەر ئەو گەندەڵیانەش داوای لێبوردنی کردووە و رایگەیاندووە، لە حزبەکەی دەکێشێتەوە.

"د. کامەران یونس"سەرۆکی زانکۆی سەڵاحەدین رایگەیاند، بۆ ساڵی نوێی خوێندنی ٢٠٢٢ - ٢٠٢٣ سیستمی یەکپۆشی جلوبەرگی خوێندکاران لە ھەموو کۆلێژەکانی زانکۆ جێبەجێ دەکەن، وتیشی، دوو ڕەنگی جلوبەرگی"رەساسی و سپی لەگەڵ ڕەش و سپی"یان بۆ خوێندکاران دیاریکردوە، کۆلێژەکانیش ئازادن کام رەنگ ھەڵدەبژێرن.

ئاماژەی بەوەشکرد، سیستمی یەکپۆشی بۆ کەمکردنەوەی جیاوازی کۆمەڵایەتی و چینایەتییە، ھەروەھا ھۆکارە بۆ کەمکردنەوەی ئەرکی سەرشانی بنەماڵەی خوێندکاران.

روانگەی سوری بۆ مافەکانی مرۆڤ بڵاویکردەوە، بنکەی سەربازی تورکیا لە گوندی عەناب لە خۆرھەڵاتی شاری عەفرین تۆپباران کراوە و لە ئەنجامدا چوار سەربازی تورکیا و سێ چەکداری نزیک لەو وڵاتە بریندار بوون.

 ئاماژە بەوەشکراوە، سەرچاوەی تۆپبارانەکە ناوچەکانی ژێر کۆنتڕۆلی حکومەتی سوریا و ھێزە کوردییەکان بووە لە ریفی حەلەب.

لە بەرامبەردا سوپای تورکیا و گروپە چەکدارەکانی نزیک لەو وڵاتە، چەند گوندێکیان لە ناحیەی شەرا و ناوچەی شەھبا تۆپباران کردووە. 

ھاوکات لە گوندی مەرعەناز لە باکوری شاری حەلەب، شەڕ و پێکدادان لە نێوان ھێزەکانی حکومەتی سوریا و گروپە چەکدارەکان روویداوە. 

لە راگەیەندراوێکی دەستەی نوێنەرایەتی فەرمانبەرانی گرێبەستدا ھاتووە، ئەمڕۆ شەممە خۆپیشاندان لەلایەن جوڵانەوەی نەوەی نوێ ڕێکدەخرێت و لەلایەن کەناڵی رەسمی ئەو حزبەشەوە ئەوە ڕاگەیەندراوە فەرمانبەرانی گرێبەست بەڵێنی پشتیوانی و بەشداریکردنیان داوە لەم خۆپیشاندانە، ئێمە وەک دەستەی نوێنەرایەتی فەرمانبەرانی گرێبەست سەرلەبەری ئەو ھەواڵە ڕەتدەکەینەوە.

لە راگەیەندراوەکە ئاماژە بەوەشکراوە، ئەوان پشتیوانی داوای ڕەوای سەرجەم چین و توێژەکانین بەڵام بەھیچ جۆرێک بەشداری لەو خۆپیشاندانە ناکەن و نایانەوێت پرسەکەیان تێکەڵی ململانێی حزبی بکرێت، داواکاریشین ھیچ ھێز و لایەنێکی سیاسی بۆ مەرامی حزبی بەناوی فەرمانبەرانی گرێبەستەوە لێدوان نەدەن.