سەرۆکایەتیی شارەوانیی سلێمانی، لە چوارچێوەی پەرەپێدانی خزمەتگوزارییە گشتییەکاندا، دوو هۆڵی تایبەت بە پرسە و بۆنەی لە گەڕەکەکانی "بەختیاری" و "چوارباخ" ئامادەکردووە بۆ خزمەتی هاووڵاتیان.

شارەوانی سلێمانی رایگەیاند، بە مەبەستی زیاتر خزمەتکردنی هاووڵاتیان و کەمکردنەوەی ئەرکی سەرشانیان، دوو هۆڵی پرسە  وبۆنەکانیان و بە تەواوی پێداویستییە سەرەکییەکان و سیستمی ساردکەرەوە و گەرمکەرەوەوە، بێبەرانبەر خستوەتە خزمەت هاووڵاتیانەوە.

شارەوانی سلێمانی ئاماژەی بەوەکردوە، ئامانج لە جێبەجێکردنی ئەم هەنگاوە، کەمکردنەوەی بارگرانیی دارایی سەر شانی هاووڵاتییان، دابینکردنی شوێنێکی ئارام و گونجاو لە کەشوهەوای زستان و هاویندا.

هەروەها  رێگریکردنە لە دروستبوونی ئاستەنگ بۆ هاتوچۆی پیادە و ئۆتۆمبێل کە پێشتر بەهۆی هەڵدانی خێمەی پرسە لەسەر شەقام و کۆڵانەکاندا دروست دەبوو.

 لەو چوارچێوەیەدا شارەوانیی سلێمانی داوا لە هاووڵاتییان دەکات لەجیاتی ماڵەکان یان دانانی خێمە لە کۆڵانەکاندا، سوود لەم هۆڵە ئامادەکراوانە وەربگرن.

وەزارەتی کشتوکاڵی عیراق پلانی نوێی بۆ پاڵپشتیکردنی خاوەن پڕۆژەکانی پەلەوەر و ئاسانکاریکردن بۆ کارەکانیان راگەیاند، ئاماژەی بەوەشکردوە بۆ خۆبژێوی ساڵانە پێویستیان بە نۆ ملیار هێلکە هەیە.

ئەمڕۆ چوارشەممە، وەزارەتی کشتوکاڵی عیراق رایگەیاند، بەپێی رێنماییەکان کار بۆ پاڵپشتیکردنی کەرتی تایبەت دەکات و یەکێک لە سەرەکیترین ئامانجەکانیان لابردنی ئاڵنگارییەکانی بەردەم بەرهەمهێنەرانی پەلەوەرە.

وەزارەتی کشتوکاڵی عیراق ئاماژەی بەوەکردوە، لە ئێستادا کۆی بەرهەمی ناوخۆیی ساڵانەی هێلکە دەگاتە شەش ملیار هێلکە، لە کاتێکدا بازاڕی عیراق ساڵانە پێویستی بە  نۆ ملیار هێلکە هەیە تاوەکو بتوانرێت خۆبژێوی لەو بەرھەمەدا بەدەستبێت.

وەزارەتەکە ئاماژەی بەوە کرد، هەوڵەکانییان چڕکردوەتەوە بۆ پڕکردنەوەی ئەو جیاوازیە و کورتهێنانەی کە سێ ملیار هێلکەیە لە ناوخۆدا.

کۆمپانیای بیمە و خزمەتگوزاری دارایی ئالیانز لە راپۆرتێکدا خەمڵاندنی نوێی بۆ زیانەکانی جەنگی ئێران لە وڵاتانی کەنداو خستوەتەڕوو، ئاماژەی بەوەکردوە زیانەکان 200 ملیار دۆلاری تێپەڕاندوە  و تا ساڵی 2030 دەگاتە 790 ملیار دۆلار.

ئەمڕۆ چوارشەممە، لە راپۆرتێکیدا، کۆمپانیای بیمە و خزمەتگوزاری دارایی ئالیانز ئاماژەی بەوەکردوە، زیاتر لە 80 دامەزراوەی وزە لەماوەی جەنگدا کراونەتە ئامانج و نزیکەی یەک لەسەر سێیان بە تەواوەتی خاپور بوون و زۆرترین زیان بە ژێرخانی وزەی کوەیت، قەتەر و بەحرەین کەوتووە.

کۆمپانیاکە، پێشبینی دەکات، کە زیانە ئابورییە کەڵەکەبووەکانی وڵاتانی کەنداو لە نێوان ساڵانی 2026 بۆ 2030 یەکسان دەبێت بە رێژەی 9.5٪ـی داهاتی ناوخۆی گشتیی پێشبینیکراوی پێش جەنگی وڵاتانی کەنداو.

هەروەها باس لەوەشدەکات، کە دەرئەنجامەکانی ئەو جەنگە تەنیا لە دامەزراوەکانی نەوت وغازدا سنوردار نییە و کەرتەکانی گەشتیاریی و خانووبەرە و بازرگانیش لە ساڵانی داهاتوودا روبەڕووی گەشەی کەمتر دەبنەوە.