کوردستان
دوای روداوێکی تاوانی کوشتن لە تەنیشت پارکی ئاکرێ، بەڕێوەبەرایەتیی پۆلیسی ئاکرێ رونکردنەوەیەکی بڵاوکردەوە و تێیدا جەخت لەسەر پاراستنی ئارامی ئەمنی شارەکە دەکاتەوە.
پۆلیسی ئاکرێ راگەیەنراوێکی بڵاوکردەوە و تێدا داوا لە سەرجەم دەزگاکانی راگەیاندن و تۆڕە کۆمەڵایەتییەکان دەکات، بە شێوەیەکی بەرپرسانە مامەڵە لەگەڵ روداوەکەدا بکەن، تەنیا پشت بە سەرچاوە رەسمییەکانی پۆلیس ببەستن بۆ وەرگرتنی زانیاری.
هەر لە راگەیەنراوەکەدا هاووڵاتیان و دەزگاکانی راگەیاندن دڵنیا دەکاتەوە، کە هێزەکانیان لە ئامادەباشیی تەواودان و هەردوو دەزگای پۆلیس و ئاسایش بە هەماهەنگی لە بەدواداچوونی بەردەوامدان بۆ دەستگیرکردنی تۆمەتباری سەرەکی کە بە بڕیاری دادوەر و بەپێی ماددەی (406) لە یاسای سزادان فەرمانی دەستگیرکردنی بۆ دەرچووە و بە زووترین کاتیش دەستگیر دەکرێت.
لە کۆتاییشدا، پۆلیسی ئاکرێ داوا لە هاووڵاتییان دەکات لەپێناو پاراستنی ئاسایشی شارەکە، هاوکار و هەماهەنگ بن و لە کاتی بوونی هەر زانیارییەکدا، پەیوەندی بە ژووری کۆنترۆڵی پۆلیسی ئاکرێوە بکەن بە ژمارەی بێبەرانبەری 104.
ئەندامێکی مەكتەبی سیاسی یەكێتی دەڵێت، هیچ بەرەوپێشچوونێك لە گفتوگۆكانی نێوان یەكێتی و پارتی بە ئاراستەی باشتكردنی پەیوەندییەكانیان و پێكهێنانی حكومەت نییە.
سەعدی ئەحمەد پیرە، ئەندامی مەكتەبی سیاسی یەكێتیی نیشتمانیی کوردستان لە كۆنفڕانسێكی رۆژنامەوانیدا رایگەیاند، پێویستە یەكێتی و پارتی بە گفتوگۆ كێشە و ناكۆكییەكانیان لەبارەی پێكهێنانی حكومەتی نوێی هەرێم چارەسەربكەن.
سەعدی ئەحمەد پیرە لەبارەی دەنگۆكانی هەمواركردنەوەی دەستوری عیراق وتیشی، هەمواركردنەوەی دەستوری عیراق هیچ مەترسییەكی بۆ سەر هەرێمی كوردستان نابێت و دەتوانن بە سێ پارێزگا رێگری لە هەر هەموارێك بكەن كە دژی بەرژەوەندییەكانی هەرێمی كوردستان بێت.
بكوژی دوو براكەی ئاكرێ شەوی رابردوو لە سەنتەری ئاكرێ بە چەك رووبەڕووی هێزە ئەمنییەكانی قەزاكە بووە و دواتر بۆ شوێنێكی نادیار هەڵهات، گەڕان و بەدواداچوونی هێزە ئەمنییەكانیش بۆ دۆزینەوە و دەستگیركردنی ئەو بكوژە دەستیپێكردووە.
دڵبرین غازی پەیامنێری كوردسات نیوز لە ئاكرێ رایگەیاند، شەوی رابردوو هێزە ئەمنییەكانی ئاكرێ لە چالاكییەكەدا هەوڵیانداوە ئەو كەسە دەستگیربكەن كە بە تۆمەتی كوشتنی دوو براكەی ئاكرێ و برینداركردنی برایەكی تریان تۆمەتبارە، بەڵام ئەو تۆمەتبارە بە چەك رووبەڕوی هێزە ئەمنییەكان بووەتەوە و دواتر بۆ شوێنێكی نادیار هەڵهاتووە.
ئەوەشی خستەڕوو، دوابەدوای هەڵهاتنی ئەو تۆمەتبارە گەڕان و بەدواداچوونی هێزە ئەمنییەكان بۆ دۆزینەوە و دەستگیركردنی تۆمەتبارەكە دەستپێكردووە، بەڵام تاكو ئێستا دەستگیرنەكراوە.
ئەوەش لەدوای ئەوەدێت، لە چەند رۆژی رابردوودا بەهۆی كێشەی كۆمەڵایەتییەوە ئەو تۆمەتبارە دەسترێژی گوللەی لە سێ برا كرد و بەهۆیەوە دووانیان گیانیان لەدەستداوە و برایەكی تریشیان برینداربوو.
نوێترین زانیارییەکان و ساتی رووبەڕووبوونەوەکە لەم لینکەوە ببینە...
کەشناسیی هەرێم، پێشبینییەکانی کەشوهەوای بۆ 48 سەعاتی داهاتوو بڵاوکردەوە و ئاشکرایدەکات، سبەینێ ئەگەری نمەباران هەیە.
بەڕێوەبەرایەتیی گشتیی کەشناسی و بوومەلەرزەزانیی هەرێمی، ئاشکرایکرد، ئەمڕۆ ئاسمان بە گشتی ساماڵ دەبێت لەگەڵ دروستبوونی هەندێک پەڵە هەور، بە تایبەتی لە ناوچە شاخاوییەکاندا، پلەکانی گەرماش بەراورد بە تۆمارکراوەکانی دوێنێ کەمێک نزمتر دەبنەوە.
ئاماژەی بەوەشکردووە، سبەینێ ئاسمان ساماڵ و پەڵە هەور دەبێت و لە هەندێک کات و شوێندا دەگۆڕێت بۆ نیمچە هەور؛ لە کاتەکانی ئێوارەدا ئەگەری بارینی نمە بارانێکی کەم لە ناوچە شاخاوییە سنورییەکانی باکوری هەرێم هەیە و بەشێک لە سنووری پارێزگای دهۆکیش دەگرێتەوە.
بەرزترین پلەکانی گەرمای پێشبینیکراو بە پلەی سیلیزی
هەولێر: 28 پلەی سیلیزی
پیرمام: 26 پلەی سیلیزی
سلێمانی: 27 پلەی سیلیزی
هەڵەبجە: 29 پلەی سیلیزی
چەمچەماڵ: 28 پلەی سیلیزی
دهۆک: 28 پلەی سیلیزی
زاخۆ: 28 پلەی سیلیزی
ئاکرێ: 27 پلەی سیلیزی
گەرمیان: 33 پلەی سیلیزی
حاجی ئۆمەران: 19 پلەی سیلیزی
بافڵ جەلال تاڵەبانی ئیدانەی هێرشە تیرۆریستییەکەی ئوردن دەکات و دەڵێت: بەئامانجگرتنی شوێنە ئاینییەکان تاوانێکی قێزەونە دژی بەها مرۆییەکانە.
بافڵ جەلال تاڵەبانی، سەرۆکی یەکێتیی نیشتمانیی کوردستان، راگەیەندراوێکی سەبارەت بە هێرشەکەی سەر کەنیسەیەک لە ئوردن بڵاوکردەوە و بە توندی ئیدانەی روداوەکەی کرد.
لە راگەیەندراوەکەدا هاتووە:
«بە توندی سەرکۆنەی ئەو هێرشە تیرۆریستییە دەکەین کە کڵێسای 'مار جیۆرجیۆسی' لە ناوچەی حەموود لە پارێزگای کەرەک لە ئوردن کردە ئامانج و لە ئەنجامدا ژمارەیەک هاووڵاتیی مەدەنی بوونە قوربانی.
سەرۆکی یەکێتی جەختی لەوەش کردووەتەوە کە بەئامانجگرتنی شوێنە ئایینییەکان تاوانێکی قێزەونە دژ بە سەرجەم بەها مرۆیی و ئایینییەکان و هەوڵدانە بۆ لێدانی گیانی پێکەوەژیانی ئاشتییانە.
لە کۆتایی پەیامەکەیدا، بافڵ جەلال تاڵەبانی هاوسۆزیی خۆی دووپاتکردەوە و رایگەیاند:
وێڕای دووپاتکردنەوەی هاوسۆزیی تەواومان لەگەڵ سەرکردایەتی و گەلی ئوردن، پرسە و سەرەخۆشیی قووڵی خۆمان ئاڕاستەی کەسوکاری قوربانییان دەکەین و هیوای چاکبوونەوەی خێرا بۆ برینداران دەخوازین.
وەفدێکی هەرێمی کورسدتان بەمەبەستی بەدواداچون بۆ شایستەداراییەکان و پرسی بودجە لە ساڵی 2027 سەردانی بەغداد دەکات.
سەرچاوەیەک لەوەزارەتی دارایی هەرێم، بە کوردسات نیوزی راگەیاند، ئێوارەی ئەمڕۆ وەفدێکی حکومەتی هەرێم سەردانی بەغداد دەکات و لەگەڵ وەزیری دارایی عیراق کۆدەبێتەوە.
ئەو سەرچاوەیە ئاماژەی بەوەشکرد، وەفدەکە لە سەرۆکی دیوانی ئەنجومەنی وەزیران، سکرتێری ئەنجومەنی وەزیران، سەرۆکی فەرمانگەی هەماهەنگی و بەدواداچون، بریکاری وەزارەتی سامانە سروشتییەکان، بەڕێوەبەرانی گشتیی بودجە و ژمێرکاری لە وەزارەتی دارایی و ئابوریی هەرێمی کوردستان پێکدێن.
بە گوێرەی زانیارییەکان، وەفدەکە بەهەماهەنگی لەگەڵ نوێنەرە کوردستانییەکان لە دەسەڵاتە فیدڕاڵییەکان، لەگەڵ وەزیری دارایی عیراق کۆدەبنەوە و پرسەکانی گەیشتن بە تێگەیشتنێکی هاوبەش و دادپەروەرانە لەسەر پابەندییە دارایی و نەوتییەکانی هەرێمی کوردستان گفتوگۆ دەکەن.
هەروەها ماف و شایستە دارایییەکانی هەرێم لە بودجەی گشتیی فیدراڵی بۆ ساڵی 2027 بەشێکی تری گفتوگۆکانی نێوان وەفدەکەی هەرێم و وەزیری دارایی عیراق دەبن.
نەخۆشخانەی شار لە سلێمانی، دەستکەوتێکی تری پزیشکیی نێودەوڵەتی بەدەستهێنا و وەک یەکێک لە باشترین نەخۆشخانەکانی جیهان دەستنیشان کرا.
ئەمڕۆ هەینی، لە کۆنفرانسی ساڵانەی رێکخراوی جیهانیی جەڵتەی مێشک لە کۆریای باشور، نەخۆشخانەی شار وەک یەکێک لە باشترین و کاراترین سەنتەرەکانی چارەسەرکردنی جەڵتەی مێشک لەسەر ئاستی جیهان دەستنیشان کرا و خەڵاتی تایبەتی پێبەخشرا.
ئومێد هیدایەت، بەرێوەبەری کارگێری نەخۆشخانەی شار بەکوردسات نیوزی راگەیاند، وەک نەخۆشخانەی شار توانیویانە وەک باشترین سەنتەری جەڵتەی مێشک لەسەر ئاستی جیهان دەستنیشان بکرێت.
ئومێد هیدایەت رایگەیاند، ئێستا سەنتەری نەخۆشخانەی جەڵتەی مێشک لە نەخۆشخانەی شار لە ئاستی جیهاندا دانی پێدادەنرێت و لە تەواوی جیهانەوە دەتوانن سودمەنبن لە زانستە پزیشکییەکانی.
ناوبراو ئاماژەی بەوەشکرد، لە سەر ئاستی جیهان 90 وڵات توانیویانە ئەو دەستکەوتە بەدەستبهێنن و لە سەر ئاستی رۆژهەڵاتی ناوەراستیش تەنها نەخۆشخانەی شار و وڵاتی میسر ئەو دەستکەوتەیان بەدەستهێناوە.
بەڕێوەبەرایەتیی پۆلیسی گەرمیان بە رەسمی سەرجەم مارکێت و دوکاندار و فرۆشیارانی ناوچەکەی ئاگادارکردووەتەوە کە بە هیچ شێوەیەک جگەرە و ڤەیپ بە منداڵان و مێرمنداڵان نەفرۆشن، بە پێچەوانەوە سزادەدرێن.
عەقید سۆران حەمە غەریب، وتەبێژی پۆلیسی گەرمیان لە لێدوانێکی تایبەتدا بۆ کوردسات نیوز رایگەیاند، رێکاری یاسایی توند بەرانبەر هەر شوێنێک دەگیرێتە بەر کە سەرپێچی بکات و بەردەوام بێت لە فرۆشتنی ڤەیپ و جگەرە بە تەمەنە بچوکەکان، جەختیشیکردەوە روبەڕوی سزای یاساییان دەکەنەوە.
ئاماژەی بەوەشکرد ئەم بڕیارەیان لەسەر بنەمای مافی منداڵان دەرکردوە و مەبەستیان پاراستنی تەندروستیی منداڵەکانە، هەروەها کەسوکاری منداڵانیش داوایانکردوە چارەسەری ئەو پرسە بکەن.
وتەبێژی پۆلیسی گەرمیان داوای لە دایک و باوکان کرد هاوکاریان بن و ئاماژەی بەوە کرد، هەر خێزانێک هەست دەکات بەهۆی فرۆشتنی ئەو جۆرە بابەتانەوە منداڵەکەیان زەرەرمەند بوون، بەمەبەستی تۆمارکردنی سکاڵا دەتوانن سەردانی بنکەکانی پۆلیس بکەن.
سەبارەت بە هەنگاوەکانی داهاتوش، عەقید سۆران ئەوەی خستەڕوو، کە لە قۆناغی دوەمی پلانەکەیاندا ناوەندەکانی خوێندن دەگرێتەوە و تێیدا هەڵمەتێکی فراوانی هۆشیارکردنەوە بۆ خوێندکاران دەستپێدەکەن تا بە دوربن لە بەکارهێنانی جگەرە و ڤیب و هەموو ئەو بابەتانەی دەبنە هۆی زیانگەیاندن بە تەندروستیان.
ماڵپەری شەفافیەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان داهاتی ئەم هەفتەیەی بڵاوکردەوە کە زیاتر لە 10 ملیار و 712 ملیۆن دینارە.
ئەمڕۆ هەینی، ماڵپەری شەفافیەت بڵاویکردەوە، داهاتی یەک هەفتەی سلێمانی لە رۆژی(17ـی 10ـی 2026 بۆ 23ـی 10ـی 2026) داهاتی نانەوتی، لە سلێمانی و هەڵەبجە و هەردوو ئیدارەی راپەڕین و گەرمیان،10ملیار و 712 ملیۆن و 407هەزار دینار بووە.
دەشڵێت؛ لەو داهاتە لە 83%ی بەشێوەی نەختینەیە و 17%ی داهاتەكە بەشێوەی چەكە و بەراورد بە هەفتەی رابردوو داهات زیادی کردوە.
جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.
وەزارەتی ناوخۆی حکومەتی هەرێمی کوردستان، سەرلەبەری ئەو هەواڵ و دەنگۆیانە رەتکردەوە کە لە ژمارەیەک دەزگای راگەیاندندا بڵاوکرابوونەوە سەبارەت بە بوونی درۆن یان هێز و یەکەی سەربازیی ئۆکراینی لە خاکی هەرێمی کوردستاندا و جەخت دەکاتەوە کە ئەم بانگەشانە لە بنەڕەتدا ناڕاست و بێبنەمان.
بەگوێرەی راگەیەندراوەکەی وەزارەتی ناوخۆ، هەرێمی کوردستان هەڵوێستی نەگۆڕیوە لەسەر پەیڕەوکردنی سیاسەتی بێلایەنی و خۆبەدوورگرتن لە ناکۆکییە هەرێمی و نێودەوڵەتییەکان دووپات دەکاتەوە، هەروەها توندترین شێوە هەر هەوڵێک رەتدەکاتەوە کە خاکی هەرێم وەک پێگەیەک بۆ جووڵەی سەربازی یان دوژمنکارانە دژ بە هیچ وڵاتێک بەکاربهێنێت.
لە کۆتایی راگەیەندراوەکەدا، جەختکراوەتەوە کە پاراستنی ئاسایش و سەقامگیریی هەرێم لە پێشینەی کارەکانی حکومەتە و بە هیچ شێوەیەک رێگە بە تێوەگلان یان پەلکێشکردنی هەرێمی کوردستان بۆ ناو ئەو ململانێیانە نادرێت.
لەسەر راسپاردەی د. ئارام محەممەد قادر، وەزیری خوێندنی باڵا و توێژینەوەی زانستی، سەرجەم دەرچووانی خوێندنگە کوردییەکانی کەرکوک، خانەقین، شەنگال و ناوچە کوردستانییەکانی دەرەوەی ئیدارەی هەرێمی کوردستان لە زانکۆ و پەیمانگەکانی هەرێم وەرگیران.
دوای ئەوەی دەرگای پێشکەشکردن لە رێگەی سیستمی زانکۆلاین بۆ دەرچووانی پۆلی 12ی بەشی کوردی لەو ناوچانە کرایەوە، لە قۆناغی یەکەمدا رەزامەندی لەسەر وەرگرتنی 878 خوێندکار نیشاندرا بە هەمان پێوەر و کۆنمرەی خوێندکارانی هەرێمی کوردستان بۆ ساڵی خوێندنی 2026-2027.
بەپێی ئامارەکانی وەزارەت، 13,005 دەرچووی خوێندنگە کوردییەکانی ناوچە کوردستانییەکان داواکارییان پێشکەش کردووە. ئەوانەی ناویشیان لەم قۆناغەدا نەگەڕاوەتەوە، لە قۆناغەکانی داهاتوودا بەپێی کۆنمرەکانیان لە شوێنی شایستەی خۆیان وەردەگیرێن و بەمەش رێژەی وەرگرتنی سەرجەم پێشکەشکاران دەبێتە سەدا سەد.
وەزارەتی خوێندنی باڵا و توێژینەوەی زانستی پیرۆزبایی لە دەرچووان کردووە و جەختی کردووەتەوە کە خەڵکی ئەم ناوچانە بەشێکی رەسەن و دانەبڕاوی کوردستانن. لە ئێستاشدا دەرچووان دەتوانن لەڕێگەی ماڵپەڕی رێگەی زانکۆ regayzanko.com ئەنجامەکانیان وەربگرنەوە.
پاش گواستنەوەی ئەزموونی سەرکەوتووی وڵاتی ئەرمینیا بۆ کوردستان، قوباد تاڵەبانی ئاشکرای دەکات کە ژیریی دەستکرد و تەکنەلۆژیای نوێ دەبنە ئاراستەکەری ئابوریی داهاتووی وڵات و ناوەندی "ئارمات"یش سەرەتای ئەو هەنگاوەیە.
قوباد تاڵەبانی ئەم وێنانەی بڵاوکردووەتەوە و نووسیویەتی، بیرۆکەی داهێنەرانە، تەکنەلۆژیای نوێ و ژیریی دەستکرد بناغە و ئاراستەکەری ئابوریی داهاتووی جیهانن، بەبێ ئامادەکردنی ژێرخانێکی پتەو لەم بوارانەدا ناتوانین گەرەنتیی داهاتووی ئابوریی وڵاتەکەمان بکەین.
ئاماژەی بەوەشکرد، هەربۆیە کردنەوەی یەکەمین ناوەندی ئارمات لە دەزگای پەرەپێدانی ناوچەیی راپەڕین هەوڵێکی گرنگە بۆ پەروەردەکردنی منداڵان و پەرەپێدانی تواناکانی گەنجەکانمان بۆ ئەوەی بتوانن بە بیرۆکەی داهێنەرانە و بە پشتبەستن بە تەکنەلۆژیای نوێ رۆڵی گرنگ ببینن لە داهاتووی ئابووریی وڵاتەکەماندا.
قوباد تاڵەبانی راشیگەیاند، ئارمات پێشتر لە ئەرمینیا و چەندین وڵاتی تری جیهاندا ئەزمونێکی سەرکەوتووی پێشکەش کردووە و لە دوای سەردانم بۆ ئەرمینیا بڕیارماندا ئەزموونەکەیان بۆ کوردستان بگوازینەوە.
ئەوەشی خستەڕوو، سوپاسی حکومەتی ئەرمینیا دەکەم کە هاوکار و پشتیوانمان بوون.
قوباد تاڵەبانی رایگەیاند، پێكنەهێنانی حکومەت هێندەی نەماوە ببێتە پەڵەیەکی رەش لە سەر هەرێمی کوردستان و دۆستەکانیان لە کۆمەڵگەی نێودەوڵتی لەسەر ئەو پرۆسەیە خەریکە نائومێد دەبن.
ئەمڕۆ پێنجشەممە، لە میانی سەردانیکردنی بۆ دەڤەری راپەرێن و کردنەوەی ناوەندیی ئارمات لە رانییە، قوباد تاڵەبانی جێگری سەرۆکی ئەنجومەنی وەزیرانی هەرێم بە رۆژنامەنوسانی راگەیاند، ئەم خەریکە دەستەکانیان لێیان بێ ئومێد دەبن.
قوباد تاڵەبانی رایگەیاند، ئەمڕۆ ناوەندیی ئارماتیان لە دەڤەری راپەرین کردەوە، کە ناوەندێکی فیرکاری ئەرمەنییە و ئەلیکترۆنییە لە بوارەکانی رۆبۆت و کۆمپویتەر و ئەی ئای کاردەکات.
ئاماژەی بەوەشکرد بونی ئەو ناوەندە لە دەڤەری راپەرین پێویستییە، وەک چۆن راپەرین لێرەوە سەریهەڵدا ئەمەش دەبێتە راپەرینێکی نوێ لە پێناو فێرکردن و گەشەسەندن لە پێشکەوتنی گەنجەکان و ئەو بوارانەی جیهان داوای دەکات.
لەبارەی خزمەتگوزارییەکانی دەڤەری راپەرینیش، قوباد تاڵەبانی جەختیکردەوە، لێشاوێکی ئاوەدانی رویکردوەتە دەڤەرەکە و هەوڵەکان چڕتربونەتەوە بۆخزمەتکردنی زیاتری دەڤەرەکە.
قوباد تاڵەبانی جەختیشیکردەوە، کاتی ئەوە هاتوە ناوچەکانی دەرەوەی سلێمانی و هەولێریش گەشە بکەن و هەمو هەوڵێکیش دەدەن بۆ ئەو پرۆسەیە
لە بارەی پێکنەهێنانی حکومەتیشەوە، قوباد تاڵەبانی رایگەیاند، ئێستا کاتیەتی حکومەت پێکبهێندرێت و ئەوەی دڵگرانی دەکات ئەوەیە، کە دۆستەکانیان لە کۆمەڵگەی نێودەوڵيتی خەریکە بێئومێد دەبن لەو پرۆسەیە.
ناوبراو جەختیکردەوە پێکنەهێنانی حکومەت خەریکە دەبێتە پەڵەیەکی رەش بەسەر هەرێمی کوردستانەوە و دەبێت تەواوی هەوڵەکان بۆ پێکهێنانی حکومەت بێت.
وەزارەتی کارەبای هەرێم رایگەیاند، چەند رۆژێکە بەهۆی زیان گەیشتن بە کێبڵی کارەبا، 72 هەزار هاووڵاتی دوچاری پچرانی کارەبا بونەتەوە، هەوڵدەدرێت لە ئەمشەوەوە رەوشی کارەبای ئەو هاووڵاتیانە ئاسایی بکرێتەوە.
ئەمڕۆ پێنجشەممە لە راگەیەندراوێکدا، وەزارەتی کارەبای هەرێم رایگەیاند، نزیکەی 72 هەزار هاووڵاتی لە ژمارەیەک گەڕەکی هەولێر دووچاری پچڕانی کارەبا بوونەتەوە و پێشبینی دەکرێت ئەمشەو کارەبای ئەو ناوچانە ئاسایی ببێتەوە.
کارەبای هەرێم دەڵێت؛ هۆکاری ئەم پچڕانە دەگەڕێتەوە بۆ ئەنجامدانی زنجیرەیەک کاری شارستانیی، کە بوە هۆی زیان گەیاندن بە 12 کێبڵی کارەبای 132 کەی ڤیی و پێدانی کارەبا بە وێستگەکان پچڕا.
ئاماژە بەوەشکراوە، تیمەکانی چاککردنەوەی وەزارەتی کارەبا و پڕۆژەی روناکی کار دەکەن بۆ ئەوەی بەزوترین کات کێشەکە چارەسەر بکەن و رەنگە لە ئەمشەوەوە رەوشيکە ئاسیی ببێتەوە.
شوێنەوارناسانی زانکۆی بوو عەلی سینای هەمەدان لە گۆڕستانێکی چاخی ئاسن لە باشوری رۆژئاوای سنە و لە داوێنی چیای ئاویەر، چەندین گۆڕ و شوێنەواری مێژویییان دۆزیوەتەوە کە تەمەنیان نزیکەی 3000 ساڵە.
میدیای ئێران لە زاری کازم مەلازادە، ئەندامی گروپی شوێنەوارناسی رایگەیاندوە، لە سوێنی دۆزینەوەی گۆڕەکان، پێنج شوێنیان هەڵکۆڵیوە و ژمارەیەک گۆڕیان دۆزیوەتەوە، لە سەر گردەکەش پاشماوەی شوێنی ژیان دۆزراوەتەوە کە ڕەنگە هی سەردەمی ئەشکانی یان ساسانی بێت.
هەر لە هەمان شوێن ژمارەیک گۆڕی تر دۆزراونەتەوە، کە نیشانەکان دەریدەخەن نوێترن و مێژویان بۆ 750 تا 500ساڵی پێش زایین دەگەڕێنەوە و بە شێوازی بەخاکسپاردنەکەیاندا، گریمانەی ئەوە دەکرێت رۆژ پەرستبوبن.
گۆڕستانەکە یەکەم جار ساڵی 2008 لە کاتی کارکردن لە شەقامێکدا دۆزرایەوە و قۆناغی دووەم دوای 18 ساڵ دەستی پێکردووە، داواش دەکرێت شوێنەکە بکەنە مۆزەخانە، بۆ ئەوەی خەڵک و گەشتیارانیش زیاتر لە مێژوەکەی ئاگاداربن.
پۆلیسی دارستانی سلێمانی رایگەند، بەهۆی کەوتنەوەی ئاگر لە سنوری گوندی گەڵناغاج لە سنوری ئاغجەلەر نزیکەی 300 دۆنم پوش وپاوان سوتا.
بەڕێوەبەرایەتی پۆلیسی دارستان و ژینگەی سلێمانی رایگەیاند، دوای کەوتنەوەی ئاگر لە سنوری گوندی گەڵناغاج، دەستبەجێ تیمەکانیان چونەتە شوێن روداوەکە و لەگەڵ هاووڵاتیاندا توانراوە ئاگرەکە کۆنتڕۆڵ بکرێت.
لە راگەیەندراوەکەدا ئاماژە بەوەکراوە، بەهۆی ئاگرەکەوە نزیکەی 300 دۆنم لەوەڕگا و پوش و پاوان سوتاون.
پۆلیسی دارستانی سلێمانی راشیگەیاندوە، دوای کۆنتڕۆڵکردنی ئاگرەکە، کەسێکیان دەستگیرکردوە بە تۆمەتی کردنەوەی ئاگەرکە و پەڕاوی لێکۆڵینەوەی بۆکراوەتەوە.