لەسەر بانگهێشتی یەكێتیی نیشتمانیی كوردستان  ئەمڕۆ كۆنفرانسی هاوپەیمانی سۆسیال دیموكراتی وڵاتانی عەرەبی لە سلێمانی بەرێوەدەچێت.

كۆنفرانسەكە لە 27 تاك 30ی ئەم مانگە بەردەوام دەبێت، ، یەكەم رۆژی كۆنفرانسەكەش تایبەت دەبێت بە ژنان و هەر ئەمڕۆ سەرۆكی ژنانی رێكخراوی سۆسیال دیموكرات و جێگیرەكانی هەڵبژردرێت، هەروەها شاناز ئیبراهیم ئەحمەد خانمی یەكەمی عیراق وتارێك لە بارەی رۆڵی ژنان پێشكەش دەكات.

بڕیاریشە لە رۆژی دووەمی كۆنفراسەكەدا، د. لە تیف رەشید سەرۆك كۆماری عیراق و نێچیرڤان بارزانی سەرۆكی هەرێم و چەندین كەسایەتی سیاسی و ئەندامی ئەو رێكخراوە لە وڵاتانی عەرەبی و ئەمریكاو ئەوروپا  بەشداری تیدا دەكەن وتار پێشكەش بكەن.

هەر بە پێی ئەجێندای كۆنفرانسەكە  لە ماوەی ئەو چوار رۆژەدا چەندین تەوەر تاوتویی َدەكرێن لەوانە گەنجان و ژنان و سیاسی و كلتور چەندین بابەتی دیكە.

 

بەڕێوەبەرایەتی ئاسایشی هەولێر دەستگیركردنی بكوژی كرێكارە عەرەبەكەی بازاڕی عەلوەی هەولێری راگەیاند.

بەڕێوەبەرایەتی ئاسایشی هەولێر بڵاویكردەوە، دوای ئەوەی لە رووداوێكی تەقەكردندا لە بازاڕی عەلوەی هەولێر هاوڵاتییەكی بە نەتەوە عەرەب كە پیشەی كوژرا، دەستبەجێ لەلایەن تیمەكانی ئاسایشی هەولێرەوە لێكۆڵینەوە لە رووداوەكە دەستیپێكرد و دەركەوت تۆمەتبارانی كوشتنی ئەو هاوڵاتییە عەرەبە لە چوار كەس پێكهاتوون.

ئەوەشی خستووەتەڕو، ئەو چوار تۆمەتبارە دوای ئەنجامدانی تاوانەكە بۆ دەرەوەی شاری هەولێر هەڵهاتوون، دوای وەرگرتنی فەرمانی دادوەری لێكۆڵینەوەی ئاسایش و بە هەماهەنگی ئاسایشی بازگەكانیش، توانراوە چوار تۆمەتبارەكە دەستیگربكرێن، كە ئەوانیش بە نەتەوە عەرەبن و نیشتەجێی ناحیەی رەبیعەن لە پارێزگای موسڵ.

ئاسایشی هەولێر ئاماژەی بەوەشكردووە، لە پەراوێزی لێكۆڵینەوە و بەدواداچوون بۆ رووداوەكە دەركەوتووە، تۆمەتباران بەهۆی كێشەیەكی كۆمەڵایەتییەوە كە مێژووەكەی دەگەڕێتەوە بۆ ساڵی 2020 هەڵساون بە ئەنجامدانی تاوانە و لەكاتی دەستگیركردنیشیاندا دەستگیراوە بەسەر ئەو چەك و ئۆتۆمبێلەی تاوانەكەیان پێ ئەنجامداوە.

سەلمان ئەمین، ناسراو بە ئەژی پیلانداڕێژەری یاخیبوونەكەی لالەزار بووە، بە هەماهەنگی بەردەوام لەگەڵ لاهور جەنگی بورهان لە سلێمانی.

كوردسات نیوز زانیوێتی كە دەزگای ئاسایش و تیمە ئەمنییەكانی حكومەت لە سلێمانی هەستیان بە جموجۆڵی نامۆ و نایاسایی گرووپە چەكدارە نایاساییەكانی لالەزار  كردووە كە چەند مانگێكە لەژێر فەرمانی لاهور جەنگی بورهان و سەلمان  ئەمین ناسراو بە ئەژی ئەو جموجوڵانە هەبووە، بە مەبەستی پیلانی كودەتای سەربازی و تیرۆركردنی بەرپرسانی باڵای حیزبی و حكومیی و ئەمنییەكانی سلێمانی، لەسەروو هەمووشیانەوە تیرۆركردنی بافڵ جەلال تاڵەبانی، سەرۆكی یەكێتیی نیشتمانیی كوردستان لە سلێمانی و لە هەولێریش پیلانی تیرۆركردنی قوباد تاڵەبانی، جێگری سەرۆكی حكومەتی هەرێمی كوردستان هەبووە. هەر لە هەفتەی رابردووش ئەو گروپە كۆبونەتەوە بۆ تاوتوێكردنی دەستبەسەراگرتنی دامەزراوە حكومییەكان و یەكێتیی نیشتمانی كوردستان لە سلێمانی.

لاهور جەنگی بورهان، چەندین مانگە بە هەماهەنگی لەگەڵ چەند لایەنێكی دیكە و بەتایبەتی سەلمان ئەمین، كە لە هەولێرە، هەوڵی ئەم پیلانگێڕییەیان داوە، هەموو ئامادەكارییەكی سەربازییان كردووە، هەموو جۆرە چەكێكی قورس و سووك، درۆنی چاودێری و بۆمبڕێژكراو، ئار پی جی، تەنانەت نیشانشكێنی بێدەنگیان داوەتە خەڵكی راهێنراو بۆ جێبەجێكردنی ئەم پیلانە لەناوسەنتەری شار و شوێنی نیشتەجێبوونی خەڵك.

لە ئێستادا بەپێی بڕیاری بەرێز دادوەر سەلمان ئەمین دوو فەرمانی دەستگیركردنی هەیە، یەكێكیان بە ماددەی 56ـی لە یاسای سزادانی عیراقییە، كە هەوڵدانە بۆ تێكدانی ئاسایشی نیشتمانی، فەرمانەكەی دیكەی بەگوێرەی ماددەی 406ـە لە یاسای سزادانی عیراقییە، كە تایبەتە بە هەوڵدان بۆ تیرۆر و نانەوەی پشێوی و كوشتنی خەڵكی سڤیل. بەڵام لە ئێستادا ئەو تۆمەتبارە وەك بەرپرسێكی باڵای ئەنجوومەنی ئاسایش خۆی ناساندووە و لە هەولێر دادەنیشێت، هەموو جۆرە چەك و كەلوپەلێكی سەربازیی بۆ ئەم گرووپەی لالەزار لە سلێمانی و دەروبەری دابینكردووە، پێشتریش هەر لە هەولێر هەوڵی  هێرشەكردنە سەر ماڵی جێگری سەرۆكی ئەنجوومەنی وەزیرانی داوە لە ساڵی 2022.

 

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە غەریب حەسۆ، هاوسەرۆکی پارتی یەکێتیی دیموکرات (پەیەدە) و ساڵح موسلیم، ئەندامی دەستەی سەرۆکایەتیی پارتی یەکێتیی دیموکرات (پەیەدە) کرد.

لە دیدارێکدا کە دەرباز کۆسرەت رەسوڵ، لێپرسراوی مەکتەبی پەیوەندییەکان و سالار لالە سەرحەد، لێپرسراوی بەشی پەیوەندییە کوردستانییەکان ئامادەیبوون، نوێترین پێشهاتەکانی رۆژئاوای کوردستان و سوریا گفتوگۆیان لەبارەوەکرا.

 بافڵ جەلال تاڵەبانی پەرۆشی یەکێتیی نیشتمانیی کوردستانی بۆ پاراستنی بەرژەوەندییەکانی کوردانی رۆژئاوای کوردستان دووپاتکردەوە و رایگەیاند، دەبێت مافی کورد لە سوریای نوێدا مسۆگەر بێت و وڵاتەکە بە هاوبەشیی هەموولایەک بەڕێوەبچێت و حکومەتی سوریا نوێنەرایەتیی هەموو پێکهاتەکان بکات.

لای خۆیەوە، وەفدی پەیەدە سڵاوی مەزڵوم کۆبانێیان گەیاندە سەرۆک بافڵ و پشتیوانی پەیەدە و هەسەدەیان جارێکی دیکە بۆی دووپاتکردەوە.

ئەمڕۆ لە کۆبونەوەی ئەنجومەنی وەزیرانی عیراق رەزامەندی لەسەر خەرجکردنی موچەی مانگی شەشی موچەخۆرانی هەرێم درا.
هەڵۆ عەسکەری وەزیری ژینگەی عیراق بە کوردسات نیوزی راگەیاند، لە کۆتا بڕگەری کۆبونەوەی ئەمڕۆی ئەنجومەنی وەزیرانی عیراق تاوتوێی پرسی موچەی مانگی شەشی موچەخۆرانی هەرێمی کوردستان کراو و لە ئەنجامی لە ئەنجامدا محەمەد شیاع سودانی بڕیاریدا  دەستبکرێت بە خەرجکردنی موچەی مانگی شەشی موچەخۆرانی هەرێم.
ئاماژەی بەوەشکرد، لیژنەیەک پێکدەهێنرێت بۆ پێداچوونەوە بە خاڵەناکۆکەکانی نێوان عیراق وهەرێم چارەسەردکردنی و  رێککەوتن لەبارەیەوە، ئەگەریش ئەو خاڵە ناکۆکانە چارەسەرنەکرا، پەنادەبرێتە بەر دادگای فیدراڵی و ئەنجومەنی دەوڵەت بۆ یەکلایکردەنەوەی ئەو نوسراوە یاساییانەی کە شیکردنەوەی جیاوازی بۆ دەکرێت. 
 هەڵۆ عەسکەری راشیگەیاند، لەنێو کۆبونەوەی ئەنجومەنی وەزیراندا بەشێوەیەکی ئەرێنی و بەپەرۆشیەوە باس لە چارەسەری کێشەی موچەی موچەخۆرانی هەرێم کراوە.

دەستەی سەربەخۆی مافی مرۆڤ سەردانی لاهور جەنگی بورهان و بەشێک لە دەستگیراوەکانی لالەزاریان کرد و ئاماژەیان بەوەکرد، لاهور جەنگی بورهان رووبەڕووی هیچ توندوتیژی و ئەشکەنجەیەک نەبووەتەوە

دەستەی سەربەخۆی مافی مروڤ لە هەرێمی کوردستان لە راگەیەنراوێکدا بڵاویکردەوە، ئەمڕؤ وەفدێکی باڵای دەستەی سەربەخۆی مافی مرۆڤ بەڕاسپاردەی سەرۆکی دەستە د.مونا یاقۆ سەردانی شاری سلێمانیان کرد، هاوکات لەگرتوخانەی کانی گۆمە چاویان کەوت بە لاهور جەنگی بورهان و لەنزیکەوە گفتوگۆیان لەگەڵ کرد دەربارەی رەوشی تەندروستی و شوێنی حەوانەوە و رێکارەکان پرسیاریان لێکرد.

دەستەی مافی مروڤ ئەوەشی خستەڕوو، لاهور جەنگی بورهان رایگەیاندووە،  تەندروستی باشە و لەژورێکی تایبەت دانراوە و تەواوی پێداویستیەکانی بۆ دابین کراوە، هەروەها بەڤیدیۆ لەگەڵ خێزانەکەی قسەی کردووە و هەروەها داوای کتێبی کردبوو، لەئاسایش کومەڵێک کتێبیان بۆهێناوە، ئاماژەی بەوەشکردووە لەوکاتەی کە هاتووە بۆ زیندانی ئاسایش لەکانی گۆمە، رووبەڕووی هیچ توندوتیژی و ئەشکەنجەیەک نەبووەتەوە.

دواتر لاهور جەنگی بورهان داوای کردووە کە دۆسیەکەی بەرێکاری یاسایی بروات و دەستەش چاودێری بکات.

هەروەها ئاماژەی بەوەکردووە، لەکاتی لێکۆڵینەوەکان هیچ توندوتیژیەکی بەرانبەر نەکراوەو هیچ دان پێدانێکی بەزۆری  لێی وەرنەگیراوە، هەروەها لەوەڵامی پرسیاری  تیمی دەستە سەبارەت بە ڤیدیۆکردن لەکاتی لێکولینەوە ئاماژەی بەوەکردووە، هیچ کامێرا و ئامێری تۆمارکردن نەبووە لەکاتی لێکولینەوە.

لە رۆژی پێنجشەممەوە کامێراکانی تیژڕەوی لەنێوان رێگای نێوان سلێمانی – تاسڵوجە، بە پێچەوانەشەوە دەکەونە کار بە سیستمی یەک خاڵ سەرپێچی تۆماردەکات.

بەڕێوبەرایەتی هاتوچۆی سلێمانی لە راگەیەنراوێکدا بڵاویکردەوە، لە رۆژی پێنجشەممە لە کاتژمێر 10ـی سەر لەبەیانی کامێراکانی رێگای نێوان سلێمانی – تاسڵووجە وە بە پێچەوانەوە (کامێراکانی تۆمارکردنی تیژڕەوی) دەکەونە کار.

ئاماژەی بەوەشکرد، تۆمارکردنی سەرپێچی تیژڕەوی بە سیستەمی One Point (یەک خاڵ) و بەپێی ئەو خێراییانەی کە لە هێماکانی هاتوچۆی تەنیشت رێگاکە دانراون تۆمار دەکات.

هاتوچۆی سلێمانی راشیگەیاندووە، سەبارەت بە رێگای نێوان سلێمانی – وارماوا بەهەمان شێوە کامێراکان دانراون لە رۆژی 28/8/2025 کاتژمێر 10 ـی سەرلەبەیانی سزای سەرپێچی خێرایی تۆمار دەکەن بە سیستەمی Point to Point  (خاڵ بۆ خاڵ) بەپێی ئەو خێراییانەی دیاریکراوە لە رێگەی هێماکانی هاتوچۆوە.

ئەوەشی خستەڕوو، خێرایی رێگەپێدراو لە کامێراکانی خێرایی بۆ ئۆتۆمبێلی بچووک (پێنج) کیلۆمەترە وە بۆ بارهەڵگر (سێ) کیلۆمەترە.

هاتوچۆی سلێمانی ئاگاداری شۆفێران دەکاتەوە، بە میکانیزمی تۆمارکردنی سەرپێچی تیژڕەوی لەو کامێرایانەی بە سیستەمی Point to Point کار دەکەن، تێکڕای خێرایی لە هەموو کامێراکان هەژمار دەکرێت، بۆ نموونە لە نێوان دوو کامێرا پێویستە شۆفێر بە خێرایی ریگەپێدراو کە دیاریکراوە شۆفێری بکات بە پێچەوانەوە سزای دیاریکراو دەدرێت.

هەروەها لەنێوان کامێراکانی دیکەدا ئەگەر شۆفێر لەسەر تیژڕەوی بەردەوام بوو هەمان سزا دووبارە دەیگرێتەوە.

 

بەڕێوەبەرایەتیی گشتیی حەج و عومرەی هەرێمی کوردستان رایگەیاند، دوای وەرگرتنی بەڵێننامەی یاسایی لە کۆمپانیاکان، گەشتە ئاسمانییەکان بۆ عومرە دەستیانپێکردەوە.

ئەمڕۆ سێشەممە، لە دیوانی بەڕێوەبەرایەتیی گشتیی حەج و عومرە، شێخ نیاز ڕاغب نەقشبەندی، بەڕێوەبەری گشتی، لەگەڵ سەرجەم خاوەن کۆمپانیاکانی تایبەت بە عومرە کۆبووەوە.

لە کۆبوونەوەکەدا، جەخت لەوە کراوەتەوە، کە مافی هاووڵاتیان و عومرەکاران "هێڵی سوورە" و دەبێت بە باشترین شێوە خزمەت بکرێن و هیچ دواکەوتنێک لە گەشتەکانیاندا قبووڵکراو نییە.

بەڕێوەبەری گشتیی حەج و عومرە رایگەیاند، کۆمپانیاکان دەبێت بەرپرسیارێتیی تەواوی دواکەوتنی گەشتەکان هەڵبگرن و بە پێچەوانەوە روبەروی لێپێچینەوەی یاسایی، کارگێڕی و دارایی دەبنەوە.

لە بەرانبەردا، هەر حەوت کۆمپانیاکەی بواری عومرە لە هەرێمی کوردستان، بەڵێننامەیان لە دادنووس پڕکردەوە و پابەندبوونی خۆیان بە سەرجەم رێنماییەکان و گەڕاندنەوەی عومرەکاران لە کاتی دیاریکراوی خۆیدا دووپاتکردەوە.

دوای تەواوبوونی رێکارە یاساییەکان، بەڕێوەبەرایەتیی گشتیی حەج و عومڕە بڕیاریدا هەر ئەمڕۆوە گەشتە ئاسمانییەکان بۆ عومرە دەستپێبکرێنەوە و گەشتەکان ئاسایی ببنەوە، بەشێوەیەک کە تەواوی مافی عومرەکاران گەرەنتی کراوە.

جێی باسە، پێشتر رۆژی 19ی ئابی 2025، بەڕێوەبەرایەتیی گشتیی حەج و عومرە بەهۆی دواکەوتنی گەڕانەوەی عومرەکاران، بڕیاری راگرتنی سەرجەم گەشتەکانی عومرەی دەرکردبوو.

 

لە سەردانێکدا بۆ سلێمانی ساڵح موسلیم، سەردانی مەزاری سەرۆک مام جەلالی کرد لە سلێمانی و لە یاداشتێکدا رێز و وەفای خۆی بۆ ئەو سەرکردە مێژووییە دووپاتکردەوە.

ساڵح موسلیم لە یاداشتەکەیدا کە بە دەستوخەتی خۆی لەسەر مەزاری مام جەلال نووسیوێتی؛

"بەهۆی ئەو پیلانە سیاسیانەوە کە لە دژی دەگێردرێت، کوردستان ئەمڕۆ لە هەمووکاتێک زیاتر پێویستی بە ئێوەیە، بەڵێنتان پێدەدەین کە لەسەر ئەو رێچکەیە بڕۆین کە ئێوە و سەرۆک ئاپۆ نەخشەتان کێشاوە، تاکو ئازادی و سەقامگیری بەرقەرار دەبێت بۆ گەلەکەمان و ناوچەکە."

ئەم پەیامە لە کاتێکدایە کە ناوچەکە بە دۆخێکی هەستیاردا تێدەپەڕێت و جەخت لە ڕۆڵ و پێگەی مێژوویی مام جەلال دەکاتەوە وەک سەرکردەیەک کە هەمیشە پشتیوانی گەلانی ناوچەکە بووە بۆ بەدەستهێنانی مافەکانیان.

سەردان و پەیامەکەی ساڵح موسلیم نیشانەی بەردەوامیی ئەو پەیوەندییە سیاسی و نەتەوەییەیە کە مام جەلال دایڕشتبوو و جارێکی دیکە ئەو راستییە دەسەلمێنێت کە کۆچی دوایی ئەو سەرکردەیە بۆشاییەکی گەورەی لە گۆڕەپانی سیاسیی کوردستان و ناوچەکەدا دروست کردووە.

وەزارەتی دارایی و ئابووریی حکومەتی هەرێمی کوردستان، لە بڕیارێکی نوێدا لێخۆشبوونی بۆ ئەو هاووڵاتییە خاوەن پێداویستییە تایبەتانە دەرکرد کە پێشتر سوودمەند بوون لە پێشینەی هاوسەرگیری.

بەپێی گشتاندنێکی رەسمی کە بە ئیمزای، وەزیری دارایی و ئابووری دەرچووە و ئاڕاستەی سەرجەم دامودەزگاکانی حکومەت کراوە، بڕیاردراوە بە بەخشینی پاشماوەی قەرزی پێشینەی هاوسەرگیری لە ئەستۆی ئەو کەسانەی کە خاوەن پێداویستیی تایبەتن.

لە رێنماییە داراییەکەدا کە بە ژمارە (حەوت)ی ساڵی 2025 دەرچووە، هاتووە کە لێخۆشبوونەکە ئەو کەسانە دەگرێتەوە کە پێش ساڵی 2013 پێشینەی هاوسەرگیرییان وەرگرتووە، واتە پێش دەرچوونی بڕیاری راگرتنی پێشینەکە.

ئەم بڕیارە پاڵپشتە بە نووسراوی ئەنجومەنی وەزیران و وەزارەتی دارایی سەرجەم لایەنە پەیوەندیدارەکانی ئاگادار کردووەتەوە بۆ کارکردن بەپێی ئەم رێنماییە نوێیە و جێبەجێکردنی.

دەقی نووسراوەکە کە دەست کوردسات نیوز کەوتووە:

بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە هەڤاڵ شێخ جەعفەر شێخ مستەفا، لێپرسراوی ئەنجوومەنی پاراستنی بەرژەوەندییە باڵاکانی یەکێتیی نیشتمانیی کوردستان کرد.

لە دیدارێکدا پێشهاتە سیاسییە ناوخۆییەکانی هەرێمی کوردستان، کاری رێکخراوەیی و رێکخستنەوەی ئۆرگانەکانی یەکێتی تاوتوێکران.

هەڤاڵ شێخ جەعفەر شێخ مستەفا جەختی لە درێژەپێدانی سیاسەتی سەرۆک مام جەلال بە سەرۆکایەتیی سەرۆک بافڵ کردەوە و وتی، پێویستە هەموو ئۆرگانەكانی یەکێتی هاوكار و هەماهەنگبن لەپێناو خزمەتكردنی خەڵك و بەدەمەوەچوونی داواكارییەكانیان.

بڕیارە ئەمڕۆ ئەنجومەنی وەزیرانی عیراق کۆببێتەوە و یەکێک لە تەوەرەکانی کۆبوونەوەکەش بریتیدەبێت لە بابەتی نەوت و موچەی هەرێمی کوردستان.

بەپێی زانیارییەکانی محەمەد عەبدولرەحمان، پەیامنێری کوردسات نیوز لە بەغداد، پرسی نەوت و خەرجکردنی مووچەی هەرێمی کوردستان، وەک بابەتێکی لە کارنامەی دانیشتنەکەی ئەمڕۆی ئەنجومەنی وەزیرانی عیراقدا جێگیر کراوە.
پەیامنێری کوردستان نیوز راشیگەیاند، بڕیارە لە دانیشتنەکەی ئەمڕۆدا گفتوگۆ لەبارەی ئەم دوو پرسە بکرێت و هەوڵبدرێت بڕیاری پێویست لەسەریان بدرێت.

کۆبوونەوەی ئەنجومەنی وەزیرانی  عیراق ئەمرۆ سەعات یەک دەستپێدەکات.

ئەمڕۆ، لە شاری مۆسکۆی پایتەختی روسیا، رێکخراوی یەکێتیی کوردناسان بەمەبەستی بەهێزکردنی پەیوەندییە زانستی و فەرهەنگییەکانی نێوان روسیا و کوردستان، بە شێوەیەکی رەسمی دامەزرا.

کۆنفرانسی دامەزراندنی رێکخراوەکە بە بەشداریی ژمارەیەکی بەرچاو لە نوێنەرانی رێکخراوە کوردییەکان و نوێنەری شەش دامەزراوەی زانستی و ئەکادیمی بەرێوەچوو، کە کار لەسەر پرسی کورد دەکەن. هەروەها، پەیام و پشتیوانیی سەرجەم پارت و لایەنە سیاسییەکانی هەر چوار پارچەی کوردستان بە کۆنفرانسەکە گەیشتبوو.

ئامانجی سەرەکیی یەکێتیی کوردناسان بریتییە لە بەهێزکردنی پەیوەندییە زانستی و فەرهەنگییەکانی نێوان روسیا و کوردستان. هەروەها، ئەم رێکخراوە هەوڵدەدات وەک پلاتفۆرمێک بۆ کۆکردنەوەی سەرجەم لایەنە سیاسییە جیاوازەکانی کوردستان کار بکات. یەکێکی دیکە لە ئامانجەکان ئەوەیە کە توێژینەوەکانی تایبەت بە مێژوو، فەرهەنگ، ئایین و بارودۆخی سیاسیی کورد، لە روانگەیەکی کوردیانەوە و لەلایەن توێژەرانی کوردەوە ئامادە بکرێن و بڵاو بکرێنەوە، هاوکات هاوکاریی توێژەران و کوردناسانیش بکرێت.

لە یەکەم کۆنفرانسی خۆیدا، دەستەی بەڕێوەبەرایەتیی یەکێتییەکە هەڵبژێردرا، کە پێکهاتبوو لە:

• سوارە شاکەلی، وەک سکرتێری رێکخراو

• ئیلیا ڤیدێنێڤ، ئەندامی دەستەی بەڕێوەبەرایەتی

• شۆڕش ئابی، ئەندامی دەستەی بەڕێوەبەرایەتی

• تاتیانە ئۆدینسۆڤا، ئەندامی دەستەی بەڕێوەبەرایەتی

• وەزیری کاشاخی، ئەندامی دەستەی بەڕێوەبەرایەتی
  
  
  وێنەکان: 
  
  
  

دوای روداوەکەی شەوی 21 لەسەر 22ی ئەم مانگە، سەرۆکایەتی داواکاری گشتیی هەرێمی کوردستان راگەیەندراوێکی بڵاوکردەوە و تێیدا داواکاری گشتیی سلێمانی راسپاردووە بۆ بەدواداچوونی روداوەکە.

لە راگەیەندراوەکەدا، کە ئەمڕۆ دەرچووە، سەرۆکایەتی داواکاری گشتی ئاماژەی بەوە کردووە کە ئامانجی سەرەکیی یاساکان پاراستنی ماف و ئازادی و ئاسایشی هاوڵاتیانە و پێویستە لە کاتی جێبەجێکردنی هەر فەرمانێکی دادگادا، دەسەڵاتی جێبەجێکار "بەوپەڕی پەرۆشییەوە رەچاوی بنەما یاسایی و دەستوورییەکان بکات لە پاراستنی گیان و کەرامەتی هاوڵاتیان و پاراستنی سامانی گشتی و تایبەت."

هەروەها جەخت لەوە کراوەتەوە کە یاسا رێوشوێنی گونجاوی دیاریکردووە بۆ جێبەجێکردنی بڕیارەکان بە شێوەیەک کە نەبێتە هۆی "پشێوی و نائارامی و زیان گەیاندن بە سامانی گشتی و تایبەتی هاوڵاتیان".

داواکاری گشتی داوا لە سەرجەم دەزگاکانی راگەیاندن و خاوەنی پەیج و هەژمارەکانی تۆڕە کۆمەڵایەتییەکانیش دەکات کە "بە شێوەیەکی بەرپرسانە و دوور لە ئاڵۆزکردنی زیاتر، مامەڵە لەگەڵ ئەم روداوە و لێکەوتەکانی بکەن."

لە کۆتایی ڕاگەیەندراوەکەدا، سەرۆکایەتی داواکاری گشتی، فەرمانگەی داواکاری گشتیی سلێمانی ڕاسپاردووە بۆ بەدواداچوونی وردی ڕووداوەکە و "پاراستنی مافی هەمووان لە چوارچێوەی یاسا و دەستوردا.

داواکاری گشتی بۆ دەزگاکانی راگەیاندن وخاوەنی پەیج وهەژمارەکانی تۆڕە کۆمەڵایەتیەکان: بە شێوەیەکی بەرپرسانە و دوور لە ئاڵۆزکردنی زیاتر، مامەڵە لەگەڵ ئەم روداوە و لێکەوتەکانی بکەن

لیژنەی باڵای تاقیکردنەوە گشتییەکان لە وەزارەتی پەروەردەی حکومەتی هەرێمی کوردستان، سەرجەم قوتابیان و خوێندکارانی پۆلی 12ی ئامادەیی ئاگاداردەکاتەوە کە پرسیار و وەڵامی تاقیکردنەوەکانی خولی دووەمی ساڵی خوێندنی (2024_2025) رۆژانە بڵاودەکرێتەوە.

بەپێی راگەیەندراوێکی لیژنەی باڵای تاقیکردنەوە گشتییەکان، قوتابیان و خوێندکاران دەتوانن لەدوای تەواوبوونی هەر تاقیکردنەوەیەک، لە رێگەی لینکێکی دیاریکراوەوە دەستیان بە پرسیار و وەڵامە رەسمییەکان بگات. ئەم هەنگاوە بەمەبەستی ئاسانکاری بۆ قوتابیان و دڵنیابوونەوەیان لە وەڵامەکانیان نراوە.

لە راگەیەندراوەکەدا ئاماژە بەوەشکراوە کە پرۆسەکە بە تاقیکردنەوەی بابەتی (زمان و ئەدەبی کوردی) دەستیپێکردووە و پرسیار و وەڵامەکانی لەسەر هەمان لینک بەردەستە، هەروەها رۆژانە و بەپێی خشتەی تاقیکردنەوەکان، پرسیار و وەڵامی وانەکانی دیکەش دادەنرێت.

وەزارەتی پەروەردە جەختی لەوە کردووەتەوە کە ئەم لینکە تاکە سەرچاوەیرەسمییە بۆ وەرگرتنی پرسیار و وەڵامەکان و داوا لە قوتابیان دەکات پشت بە هیچ سەرچاوەیەکی نافەرمی نەبەستن.

وەفدی حکومەتی هەرێم لەگەڵ تەیف سامی وەزیری دارایی عیراق کۆبوونەوە، سەرجەم گرفت و خاڵی ناکۆکەکان گفتوگۆیان لەبارەوە کرا، هاوکات رۆژی سێشەممە لە کۆبوونەوەی ئەنجومەنی وەزیران بڕیار لەسەر موچەی مانگی شەش دەدرێت.

بەپێی زانیارییەکانی محەمەد عەبدولرەحمان پەیامنێری کوردسات نیوز لە بەغداد، ئەمڕۆ وەفدی حکومەتی هەرێمی کوردستان کە پێکهاتبوون لە سێ بەڕێوەبەری گشتی وەزارەتی دارایی و  سێ بەڕێوەبەری گشتی دیوانی چاودێری دارایی سێ کۆبونەوەیان ئەنجامداوە، لەگەڵ وەزارەتی دارایی عیراق و دیوانی چاودێری دارایی و محەمەد تمیمی سەرۆکی لیژنە وزارییەکەی حکومەتی عیراق.

پەیامنێری کوردسات نیوز ئاشکرای دەکات، وەفدی هەرێم لەگەڵ وەزارەتی دارایی عیراق و بە ئامادەبوونی تەیف سامی وەزیری دارایی و راوێژکارێکی سەرۆک وەزیرانی عیراق، کۆبونەوەیەکی چڕییان ئەنجامداوە و تێدا سەرجەم خاڵی ناکۆک و گرفتەکان لەبارەی داهاتی نانەوتی هەرێمەوە گفتوگۆی لەبارەوەکراوە، بەڵام لە کۆبوونەوەکەدا نەگەیشتوون بە خاڵێکی هاوبەش و کۆتایی لەبارەی داهاتی نانەوتیی هەرێم.

بەپێی زانایرییەکانی پەیامنێری کوردسات نیوز لە بەغداد، وەفدی هەرێم لەگەڵ محەمەد تمیمی سەرۆکی لیژنە وزراییەکەی حکومەتی عیراقیش کۆبوەتەوە و تێیدا، تێبینی و داواکارییەکانی حکومەتی هەرێمی لە راپۆرتێکدا پێشکەش بە سەرۆکی لیژنەکە کردووە. 

پەیامنێری کوردسات نیوز راشیگەیاند، چاوەڕوان دەکرێت رۆژی سێشەممە لە کۆبونەوەی ئەنجومەنی وەزیرانی عیراق، لیژنە وزارییەکە راپۆرتی وەفدی هەرێم و وەزارەتی دارایی عیراق، پێشکەش بە سەرۆک وەزیرانی عیراق بکات و ئەوکات بڕیار لەسەر چارەنووسی موچەی مانگی شەشی هەرێم دەدرێت.