عەلی زەیدی رێنمایی دەركرد بۆ پەلەكردن لە لێكۆڵینەوەكانی هێرشەكەی شەوی شەممەی رابردووی سەر كێڵگەی غازی كۆرمۆر لە چەمچەماڵ، ئەنجومەنی نوێنەرانی عیراقیش بە نیازە لیژنەیەك بۆ لێكۆڵینەوە لەو هێرشە پێكبهێنێت.

سەباح نوعمان، وتەبێژی فەرماندەیی گشتی هێزە چەكدارەكانی عیراق رایگەیاند، عەلی زەیدی فەرماندەی گشتی هێزە چەكدارەكانی عیراق ئاگاداری دوایین بەرەوپێشچوونەكانە لە لێكۆڵینەوەكانی هێرشەكەی شەوی شەممەی رابردووی سەر كێڵگەی غازی كۆرمۆر، رێنمایشی دەركردووە پەلەبكرێت لە تەواوكردنی لێكۆڵینەوەكان و ئامادەكردنی راپۆڕتی كۆتایی لەسەر هێرشەكە.

ئەوەشی خستەڕو، عەلی زەیدی پێداگرە لەسەر گرتنەبەری رێوشوێنی یاسایی پێویست بەرامبەر لایەنی پشت ئەو هێرشە و رێگریكردن لە دووبارەبوونەوەی.

هاوكات، چەند سەرچاوەیەك لە ئەنجومەنی نوێنەرانی عیراق بۆ كەناڵی " ئەلعەرەبیە"ـی ئاشكراكردووە، ئەنجومەنی نوێنەران بە نیازە لیژنەیەكی لێكۆڵینەوە پێكبهێنێت بۆ بەدواداچوون و لێكۆڵینەوە لە سێ دۆسێ، ئەوانیش هێرشەكانی سەر كێڵگەی غازی كۆرمۆر، بەقاچاخبردنی نەوت لە جورفل سەخڕ و هەرێمی كوردستان.

سەرۆکایەتیی شارەوانیی سلێمانی، لە چوارچێوەی پەرەپێدانی خزمەتگوزارییە گشتییەکاندا، دوو هۆڵی تایبەت بە پرسە و بۆنەی لە گەڕەکەکانی "بەختیاری" و "چوارباخ" ئامادەکردووە بۆ خزمەتی هاووڵاتیان.

شارەوانی سلێمانی رایگەیاند، بە مەبەستی زیاتر خزمەتکردنی هاووڵاتیان و کەمکردنەوەی ئەرکی سەرشانیان، دوو هۆڵی پرسە  وبۆنەکانیان و بە تەواوی پێداویستییە سەرەکییەکان و سیستمی ساردکەرەوە و گەرمکەرەوەوە، بێبەرانبەر خستوەتە خزمەت هاووڵاتیانەوە.

شارەوانی سلێمانی ئاماژەی بەوەکردوە، ئامانج لە جێبەجێکردنی ئەم هەنگاوە، کەمکردنەوەی بارگرانیی دارایی سەر شانی هاووڵاتییان، دابینکردنی شوێنێکی ئارام و گونجاو لە کەشوهەوای زستان و هاویندا.

هەروەها  رێگریکردنە لە دروستبوونی ئاستەنگ بۆ هاتوچۆی پیادە و ئۆتۆمبێل کە پێشتر بەهۆی هەڵدانی خێمەی پرسە لەسەر شەقام و کۆڵانەکاندا دروست دەبوو.

 لەو چوارچێوەیەدا شارەوانیی سلێمانی داوا لە هاووڵاتییان دەکات لەجیاتی ماڵەکان یان دانانی خێمە لە کۆڵانەکاندا، سوود لەم هۆڵە ئامادەکراوانە وەربگرن.

وەزارەتی کشتوکاڵی عیراق پلانی نوێی بۆ پاڵپشتیکردنی خاوەن پڕۆژەکانی پەلەوەر و ئاسانکاریکردن بۆ کارەکانیان راگەیاند، ئاماژەی بەوەشکردوە بۆ خۆبژێوی ساڵانە پێویستیان بە نۆ ملیار هێلکە هەیە.

ئەمڕۆ چوارشەممە، وەزارەتی کشتوکاڵی عیراق رایگەیاند، بەپێی رێنماییەکان کار بۆ پاڵپشتیکردنی کەرتی تایبەت دەکات و یەکێک لە سەرەکیترین ئامانجەکانیان لابردنی ئاڵنگارییەکانی بەردەم بەرهەمهێنەرانی پەلەوەرە.

وەزارەتی کشتوکاڵی عیراق ئاماژەی بەوەکردوە، لە ئێستادا کۆی بەرهەمی ناوخۆیی ساڵانەی هێلکە دەگاتە شەش ملیار هێلکە، لە کاتێکدا بازاڕی عیراق ساڵانە پێویستی بە  نۆ ملیار هێلکە هەیە تاوەکو بتوانرێت خۆبژێوی لەو بەرھەمەدا بەدەستبێت.

وەزارەتەکە ئاماژەی بەوە کرد، هەوڵەکانییان چڕکردوەتەوە بۆ پڕکردنەوەی ئەو جیاوازیە و کورتهێنانەی کە سێ ملیار هێلکەیە لە ناوخۆدا.