هەواڵەکان
د.لەتیف رەشید سەرۆک کۆماری عیراق، ئەمڕۆ دووشەممە، بەیاوەری قوباد تاڵەبانی جێگری سەرۆکی حکومەتی هەرێم، گەیشتە میسر بۆ بەشداریکردن لە کارەکانی لوتکەی نائاسایی عەرەبی.
بەپێی سەرچاوە رەسمییەکان، کۆبوونەوەی نائاسایی سەرانی وڵاتانی عەرەبی بڕیارە سبەینێ لە قاهیرە دەستپێبکات و تایبەت دەبێت بە دواین پەرەسەندنەکانی کەرتی غەززە و خاکی فەلەستین.
شایانی باسە ژمارەیەک بەرپرسانی حکومەت و راوێژکار و کەسایەتییە سیاسییەکان، لەناویاندا جێگری سەرۆکی حکومەت، قوباد تاڵەبانی، یاوەری سەرۆک کۆمار دەکەن لەم سەردانەدا.
شایەنی ئاماژەپێدانە، لە فڕۆکەخانەی نێودەوڵەتی قاهیرە، ژمارەیەک لە بەرپرسانی باڵای میسری پێشوازییان لە سەرۆک کۆمار کرد.
لە بڕگەی لە رەمەزاندا هەر رۆژە و بابەتێک پەیوەست بە مانگی رەمەزان و رۆژوو باسدەکەین، ئەمڕۆش باس لەو هەڵانە دەکەین کە نابێت لەدوای بەربانگ ئەنجام بدرێت.
بچۆ سەر بەشی تەندروستیی سایتی کوردسات نیوز بۆ بینینی سەرجەم بڕگەکانی "لە رەمەزاندا"
رۆژووەوانان لەکاتی بەرۆژووبووندا زیاتر لە 13 سەعات هیچ خواردن و خواردنەوەیەک ناخۆن و ناخۆنەوە، بەو جۆرەش جەستە هەوڵ دەدات خۆی لە ژەهرەکان پاک بکاتەوە، بۆیە گرنگە دوای رۆژووشکاندن چەند هەڵەیەک نەکرێت کە جەستە ئازار بدەن و ئەو سیستمی پاککردنەوەیە تێکبدەن.
نابێت لەکاتی رۆژووشکاندن و دوای بەربانگ ئاو بە رێژەیەکی زۆر بخورێتەوە، ئەو ئاوەشی دەخورێتەوە دەبێت شلەتێن بێت و سارد نەبێت.
پزیشکەکان ئەوە باس دەکەن، باشترین کار ئەوەیە دوای بەربانگ چا نەخورێتەوە، چونکە دەبێتە هۆی تێکدانی کاری ریخۆڵەکان و کرداری هەرس سست دەکەن، هەروەها رێگە لە ریخۆڵە دەگرن کە ڤیتامینی خواردنەکان هەڵمژن.
لە باشترین کارەکان ئەوەیە دوای بەربانگ شیرینی نەخورێت، جگە لەوەی شکاندنی رۆژوو بە شیرینی خراپە، دوای بەربانگیش زیانی زۆری هەیە و چەوری کەڵەکەبووی جەستە زیاد دەکات.
نابێت دوای رۆژووشکاندن راستەوخۆ وەرزش بکرێت، چونکە جەستە لە سەرەتای هەرسکردنی ژەمێکی سەرەکیدایە دوای 13 سەعات لە نەخواردنی نان، باشترین کات بۆ وەرزشکردن لانیکەم دوو کاتژمێر و نیو دوای بەربانگکردنەوەیە.
هەروەها گرنگە رۆژووەوانان خواردنی ماست و سەوزەکان لەبیر نەکەن، چونکە وزەی پێویست دەدەن بە جەستە و لە وشکبوونەوە دەیپارێزن.
میدیاکانی ئیسرائیل بڵاویانکردەوە، لە ئەنجامی هێرشی کەسێک بەچەقۆ، بۆسەر هاووڵاتیان لە وێستگەی پاسەکانی حەیفا کەسێک کوژراوە و لانیکەم چوار کەسی تریش برینداربوون، بزوتنەوەی حەماسیش لای خۆیەوە، بەرپرسیارێتی روداوەکە لە ئەستۆ دەگرێت و داوا لە لایەنگرانی دەکات چالاکییەکانیان دژ بە ئیسرائیل چڕ بکەنەوە.
لەپاش ئاگربەستی نێوان بزوتنەوەی حەماس و ئیسرائیل کە 19ـی مانگ کەوتە بواری جێبەجێکردنەوە، ئەمە بە یەکەم هێرش دادەنرێت کە حەماس بەرپرسیارێتیەکەی هەڵبگرێت.
وتەبێژی پۆلیسی حەیفا، گیان لەدەستدانی پیاوێکی 70ساڵ و برینداربوونی 4 هاوڵاتی تری پشتڕاست کردەوە.
ڕوونیشیکردەوە، لەناو بریندارەکاندا کوڕێکی 15ساڵی تێدایە و سیانیتریش کە برینی هەندێکیان سەختە.
ئەم هێرشە لە کاتێکدایە دوێنێ یەکشەممە، ئیسرائیل رایگەیاند، رێگەنادات کاڵا و شمەکی زیاتر داغڵی کەرتی غەزە بێت و هۆشداریشیدا لە گرتنەبەری رێگەی توندتر دژ بە حەماس، ئەگەر ئاگربەست قبوڵ نەکات.
وەزارەتی پەروەوردە رایگەیاند، تاقیکردنەوەکانی نیوەی وەرزی دووەم لە دوو کاتی جیاوازدا ئەنجام دەدرێن و پشوو دەکەوێتە نێوانیانەوە.
وەزارەتی پەروەردەی حکومەتی هەرێم رایگەیاند، لە سەرجەم قوتابخانە حکومی و ناحکومییەکان 'جگە لە نێودەوڵەتییەکان' بەهۆی پشووەکانی مانگی ئازار و نەورۆزەوە، تاقیکردنەوەی نیوەی وەرزی دووەمەوە دەبن بە دوو بەشەوە.
ئاماژەی بەوەشکردووە، لە رۆژانی 4 تاوەکو 9ی ئازار، تاقیکردنەوە ئەنجام دەدرێت، پاشان چوار رۆژ لەدوای جەژنی نەورۆزەوە کە دەکاتە 24 تاوەکو 27ی ئازار، تاقیکردنەوەکان تەواو دەکرێن.
ئەوەش لە کاتێکدایە، دوێنێ وەزارەتی پەروەردە پشووی بەهارە و جەژنی نەورۆزی راگەیاند و ئاماژەی بەوەکرد، کە 11 تاوەکو 23ی ئازار پشوو دەبێت.
کەشناسی پێشبینی نوێی کەشوهەوای راگەیاند و ئاماژەی بەوەکردووە، شەپۆلێکی نوێی بەفر و باران روو لە هەرێم دەکات.
کەشناسیی هەرێم رایگەیاند، ئەمڕۆ دووشەممە، ئاسمان لەنێوان نیمچە هەور بۆ هەوری تەواو دەبێت بەتایبەتی لە ناوچە شاخاوییەکان و لەکاتەکانی ئێوارەدا ئەگەری کەمێک بەفربارین هەیە بەتایبەتی لەناوچە شاخاوییە سنووریەکانی باکوور و رۆژهەڵات .
ئاماژەی بەوەشکردووە، سبەی سێشەممە، ئاسمان تەنکەهەوری بەرز دەبێت لە زۆربەی کاتەکاندا.
کەشناسیی هەرێم دەشڵێت، ئەمڕۆ پلەکانی گەرما 1 بۆ 3 پلەی سیلیزی نزم دەبنەوە، بەڵام سبەینێش بە گشتی 2 بۆ 4 پلە بەرزدەبنەوە.
لەلایەکی دیکەوە کەشناسیی عیراق ئاماژەی بەوەکردووە، لە کۆتایی ئەم هەفتەیەدا شەپۆلێکی بارانبارین بە گشتی عیراق و بە پچڕ پچڕی هەرێم دەگرێتەوە.
بەرزترین پلەکانی گەرمای پێشبینیکراو بە پلەی سیلیزی :
هەولێر: 18 پلەى سیلیزى
سلێمانی: 13 پلەى سیلیزى
دهۆک: 15 پلەى سیلیزى
کەرکوک: 19 پلەى سیلیزى
زاخۆ: 16 پلەى سیلیزى
هەڵەبجە: 14 پلەى سیلیزى
حاجی ئۆمەران: 2 پلەى سیلیزى
سۆران: 14 پلەى سیلیزى
گەرمیان: 18 پلەى سیلیزى
رەفتاری رۆبۆتێک لە چین نیگەرانی دروست دەکات و باس لەو مەترسییە دەکرێت کە لە ئەگەری بەکارهێنانی زیرەکی دەستکرددا دەکەوێتەوە و توێژەران دەڵێن، روون نییە لەداهاتوودا تاوەکو چەند ئەگەری ئەوە هەیە رۆبۆتۆکان لە کۆنتڕۆڵ دەربچن و خۆیان سەربەخۆ رەفتار بکەن.
ماڵپەڕی the economic times ڤیدیۆیەکی بڵاوکردووەتەوە، کە تیایدا رۆبۆتێک لە کۆنتڕۆڵ دەردەچێت و هێرشدەکاتە سەر ئامادەبووانی فیستیڤاڵێک لە چین.
رۆبۆتەکە نزیکە لەوەی لە ئامادەبووانی فێستیڤاڵەکە بدات، بەڵام هەرزوو لەلایەن ستافی رێکخەری فێستیڤاڵەکەوە دووردەخرێتەوە.
رێکخەرانی فێستیڤاڵەکە ئەو رەفتارەی رۆبۆتەکەیان بە هەڵەیەکی سادەی رۆبۆتی ناوهێناوە و باس لەوەدەکەن، کلۆمپانیای بەرهەمهێنەری رۆبۆتەکە بەتەواوی پشکنینی نوێ بۆ رۆبۆتەکە ئەنجام دەدات و رێگە نادەن رووداوی لەو جۆرە دووبارە ببێتەوە.
لەلایەکی دیکەوە بەشێکی توێژەران باس لەوەدەکەن، لە ئەگەری بەکارهێنانی زیرەکی دەستکرد لە رۆبۆتەکاندا، هیچ گرەنتییەک نییە کە رەفتاری رۆبۆتەکان لە کۆنتڕۆڵ دەرنەچێت و رۆبۆتەکان سەربەخۆ رەفتار نەکەن، بۆیە پێویستە لەکاتی دروستکردنی رۆبۆتەکاندا بە دڵنیاییەوە ئەو خاڵە لەبەرچاو بگیرێت.
Chinese AI robot goes rogue and attacks a person before getting shut down! ?? ?
— Global Dissident (@GlobalDiss) February 20, 2025
Just a little preview of our bright future.. pic.twitter.com/esZRSWOBJP
دۆناڵد تڕەمپ لێکۆڵینەوە دەکات بۆ دانانی پێنج دراوی ئەلیکترۆنی وەک "یەدەگی ستراتیجی" ئەمریکا، کە بەهۆیەوە ئێستا نرخی هەریەک لەو دراوانە بەشێوەیەکی بەرچاو بەرز بوونەتەوە.
دوای ئەوەی دۆناڵد تڕەمپ لە تۆڕی کۆمەڵایەتی truth ئاماژەی بەوە کرد دەیانەوێت ئەو دراوانە وەک یەدەگی ستراتیجی وڵاتەکەی بەکاربهێنن، کە هەریەک لە دراوە ئەلیکترۆنییەکانی "ئێکس ئاڕ پی و سۆلانا و کاردانۆ"ی تێدایە، نرخەکانیان بەشێوەیەکی بەرچاو بەرزبوونەوە.
لە ئێستادا نرخی ئێکس ئاڕ تی بەرێژەی 34٪ و سۆلانا بەرێژەی 22٪ و کاردانۆش بەرێژەی 63٪ زیادیان کردووە.
لەلایەکی دیکەوە تڕەمپ باسی لەوەکرد، دوو دراو وەک گەوهەری یەدەگی ستراتیجی وڵاتەکەی وان کە ئەوانیش "بیتکۆین و ئیسریۆم"م. کە دوابەدوای ئەوەش نرخی ئەو دوو دراوە بەرزبوونەوە.
لە ئێستادا بیتکۆین بەرێژەی 10٪ و ئیسریۆمیش بەرێژەی 12٪ بەرزبووەوە.
ئەوەش لەکاتێکدایە، دوای کشانەوەی چەند وەبەرهێنەرێکی گەورەی ئەمریکا لە مامەڵەی دراوە ئەلیکترۆنییەکان نرخی ئەو دراوانە گۆڕانکاریی بەرچاویان بەخۆیانەوە بینی، بەتایبەت نرخی بیتکۆین بەشێوەیەکی بەرچاو دابەزی.
دۆناڵد تڕەمپ بەو سەرۆکە دەناسرێت کە پشتگیرییەکی زۆری دراوە ئەلیکترۆنییەکان دەکات، لە هەڵمەتی هەڵبژاردنەکانیشدا پشتگیری بەرچاوی خۆی بۆ ئەو دراوانە راگەیاند.
قەیس خەزعەلی رایگەیاند، لە هەڵبژاردنی خولی شەشەمی ئەنجومەنی نوێنەرانی عیراقدا، چوارچیوەی هەماهەنگی بە چەند لیستێکی جیاواز بەشداری دەکات.
قەیس خەزعەلی سكرتێری گشتیی بزووتنەوەی عەسائیبی ئەهلی حەق رایگەیاند، بۆ هەڵبژاردنی ئەمساڵی ئەنجومەنی نوێنەرانی عیراق بە چەند لیستێکی جیاواز بەشداری دەکەن و وەک پێشووتر بە یەک لیست دانابەزن.
لەلایەکی دیکەوە باسی لە هێرشەکانی تورکیا کرد و ئەوەی خستە روو، هێشتا هێرش و پێشێلکارییەکانی تورکیا بۆسەر خاکی عێراق و شکاندنی سەروەری عیراق بەردەوامە.
خەزعەلی وتیشی، حەشدی شەعبی هەڵناوەشێتەوە، ئەو هەوڵانەشی هەیە بۆ لێسەندنەوەی چەک لە گروپە چەکدارەکان بۆ ئەوەیە چەکی یەدەکی عیراق لەلای گروپەکان نەبێت.
ئەوەش لە کاتێکدایە، بڕیارە مانگی 10ی ئەم ساڵ هەڵبژاردنی خولی شەشەمی پەرلەمانی عیراق بەڕێوەبچێت.
دەستەی گشتی كەشناسی عیراق رایگەیاند، مانگی رابردوو 30 بومەلەرزە لە وڵاتەكەدا تۆمار كراوە كە 11ی لە پارێزگای سلێمانی بووە .
دەستەی گشتی كەشناسی عیراق لە راپۆرتێكدا ئاشكرایكرد ، بەپێی داتا تۆماركراوەكانی تۆڕی تۆماری بومەلەرزەزانیی عیراقی ، مانگی شوبات 66 بومەلەرزە لە عیراق و وڵاتانی دراوسێی تۆماركراوە و لەو ژمارەیە 30 بومەلەرزە لە عیراق و 31 لە ئێران و 5 بومەلەرزەش لە توركیا بووە .
لە كۆی ئەو 30 بومەلەرزانەش كە لە عیراق تۆمار كراوە ، 11 ی لە پارێزگای سلێمانی و 8 ی لە دیالە و 4 لە واست و 2 بومەلەرزە لە هەولێر و 2 لە دهۆك و 2 لە نەینەوا و بومەلەرزەیەكیش لە پارێزگای سەڵاحەدین تۆمار كراوە .
لە بڕگەی لە رەمەزاندا هەر رۆژە و بابەتێک پەیوەست بە مانگی رەمەزان و رۆژوو باسدەکەین، ئەمڕۆش باس لەوەدەکەین باشترین خواردنەکان بۆ رۆژوو شکاندن چین.
بچۆ سەر بەشی تەندروستیی سایتی کوردسات نیوز بۆ بینینی سەرجەم بڕگەکانی "لە رەمەزاندا"
پزیشکەکان ئامۆژگاری ئەو کەسانە دەکەن کە بە رۆژوو دەبن، هەرگیز رۆژووەکانیان بە خواردنی قورس و چەور و شیرینی دەستکرد نەشکێنن.
بەپێی ئامۆژگاریی پزیشکەکان، باشترین رێگا بۆ شکاندنی رۆژوو بۆ ئەو کەسانەی تەندروستیان باشە و هیچ نەخۆشییەکی درێژخایەنیان نییە، خواردنی دەنکێک خورمایە.
بەهۆی ئەوەی شەکری ناو خورما شەکرێکی تەندروستە و دەستکرد نییە، دەکرێت لەدوای ئەو کاتە زۆرەی گەدەت بەتاڵ بووە، بە خورما رۆژووەکەت بشکێنیت، بەڵام نابێت لەوەشدا زۆرخۆری بکرێت و یەک دەنگ خورما گونجاوترین بژاردەیە.
لەبارەی شلەمەنییەکانیشەوە، نیو پەرداخ یان یەک پەرداخ ئاوی شلەتێن، یانیش شەربەتێکی فرێش کە لە ماڵەوە دروست کرابێت، بەڵام ئەویش سارد نەبێت و شلەتێن بێت، چونکە ئەگەر ئاو یان شەربەت سارد بێت، توشی ئازاری گەدە و تێکچوونی کرداری هەرست دەکات.
لەدوای خواردنی خورما و ئاو، خواردنی شۆربایەک باشترین بژاردەیە، کە لە ماڵەوە دروستکرابێت و شۆربای ئامادەکراو نەبێت، لەدوای ئەوەش پێویستە رۆژووەوانان نوێژەکانیان بکەن و لانیکەم 15 خولەک چاوەڕێ بکەن، پاشان دەست بکەن بە خواردنی ژەمی سەرەکی.
قائیمقامییەتی سلێمانی رایگەیاند، دەستیان بەسەر زیاتر لە 60 تۆن گۆشتی بەستووی ئاژەلدا کە هاوردەی سلێمانی کرابوو.
قائیمقامییەتی سلێمانی ئاماژەی بەوەکردووە، ئەو گۆشتە لە کۆگایەکدا دانرابوو و لیژنەکان دەستیان بەسەردا گرتووە، کە هەندێکیان پارچە پارچە کراون و هەندێکیان لاکی ئاژەڵن و لەناو کارتۆندان.
ئەوەشی خستە روو، گۆشتەکە دووجار پشکنینی بۆکراوە شیاو نییە بۆ خواردن، بۆیە لەلایەن لیژنەکانەوە لەناو دەبرێت.
بەهۆی نزمبوونەوەی بەرچاوی نرخی تمەنەوە، پەرلەمانی ئێران متمانەی لە وەزیری دارایی و ئابووری وڵاتەکەی سەندەوە.
تەلەفزیۆنی رەسمی ئێران رایگەیاندووە، بەهۆی ئەو نزمبوونەوە بەرچاوەی تمەن بەرانبەر بە نرخی دۆلار دیویەتی، پەرلەمانی ئێران عەبدولناسڕ هیممەتی وەزیری دارایی و ئابووری ئێران لەسەر کار لابرد.
لە 19ی مانگی رابردوودا، ئەحمەد نادری پەرلەمانتار ئەوەی خستە روو، پەرلەمان داواکاری پێگەیشتووە بۆ لێپرسینەوە لە وەزیری دارایی و ئابووری، کە رەنگە دانیشتنەکان بە لێسەندنەوەی متمانە لەو وەزیرە کۆتایی پێبێت.
بەپێی یاسای ئێران، ئەو وەزیرەی سکاڵای لەسەرە و داوادەکرێت لێپرسینەوەی لێبکرێت، مۆڵەتی 10 رۆژی لەبەردەمدایە بۆ ئامادەبوون لە پەرلەمان و وەڵامدانەوەی پرسیاری پەرلەمانتارەکان، بۆ وەزیری داراییش، پێویست بوو روونکردنەوەی تەواو بدات لەسەر دۆخی ئابووری وڵات، بەر لەوەی دەستبکرێت بە دەنگدان بۆ لێسەندنەوەی متمانە لێی.
پێشتریش ئەو وەزیرە لە پۆستی پارێزگاری بانکی ناوەندی ئێراندا بووە و بەهەمان شێوە متمانەی لێسەندراوەتەوە.
دوای ئەوەی ساڵی 2018 دۆناڵد تڕەمپ لە رێککەوتنی ئەتۆمی ئێران کشایەوە، چەندین سزای بەسەر ئەو وڵاتەدا سەپاند و ئێران کەوتە ناو قەیرانێکی ئابووری قوڵەوە، بەهۆی سزاکانی ئەمریکاشەوە، ماوەی چەند ساڵێکە نرخی تمەن بەشێوەیەکی بەرچاو دابەزیوە، لەدوای رووخانی رژێمی بەشار ئەسەدیشەوە لە سوریا لە مانگی 12ی ساڵی رابردوودا، نرخی تمەن زیاتر رووی لە دابەزین کرد.
لە ئێستادا لە بازاڕەکانی هەرێم 100 دۆلار بەرانبەر بە نۆ ملیۆن و 210 هەزار تمەنە.
حکومەتی هەرێم راگەیاند، بەهۆی مانگی رەمەزانەوە یەک سەعات دەوامی رەسمی سەرجەم فەرمانگەکان کەمکرانەوە.
حکومەتی هەرێم رایگەیاند، بەهۆی مانگی رەمەزانەوە لە سەرجەم دامودەزگا رەسمییەکانی حکومەتی هەرێم یەک سەعات دەوامی فەرمیی کەمدەکرێتەوە و فەرمانبەران یەک سەعات زووتر دەچنەوە ماڵەوە.
ئەوەش لە کاتێکدایە، بەر لە دەستپێکی مانگی رەمەزان حکومەتی هەرێم دەوامی قوتابخانەکانی یەک کاتژمێر کەمکردەوە.
ساڵانە لەگەڵ هاتنی مانگی رەمەزاندا بەشێوەیەکی گشتی دەوام لە ناوەندە حکومی و بەشێکی کەرتی تایبەتیشدا کەمدەکرێتەوە.
کەشناسیی هەرێم پێشبینییەکانی کەشوهەوای ئەمڕۆ و سبەینێی ئاشکرا کرد و رایگەیاند، بەگشتیی کەش جێگیر دەبێت و پلەکانی گەرما بەرز دەبنەوە.
کەشناسیی هەرێم رایگەیاندووە، ئەمڕۆ یەکشەممە، ئاسمان ساماڵ و پەڵەهەور دەبێت و پلەکانی گەرما 1 بۆ 2 پلەی سیلیزی بەرز دەبنەوە.
ئاماژەی بەوەشکردووە، سبەی دووشەممە، ئاسمان ساماڵ و پەڵەهەور دەبێت و لە کاتەکانى دواى نیوەڕۆدا دەگۆرێت بۆ نیمچەهەور پلەکانی گەرماش 1 بۆ 2 پلەی دیکە بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی :
هەولێر: 16 پلەى سیلیزى
سلێمانی: 12 پلەى سیلیزى
دهۆک: 14 پلەى سیلیزى
کەرکوک: 17 پلەى سیلیزى
زاخۆ: 16 پلەى سیلیزى
هەڵەبجە: 12 پلەى سیلیزى
حاجی ئۆمەران: 2 پلەى سیلیزى
سۆران: 12 پلەى سیلیزى
گەرمیان: 18 پلەى سیلیزى
کارەبای سلێمانی رایگەیاند، نرخی یەک ئەمپێری کارەبای موەلیدە بۆ مانگی رابردوو لەنێوان 14 بۆ 15 هەزار دیناردایە. لیژنەی ئەنجومەنی موەلیدە ئەهلییەکانی هەولێریش رایگەیاندووە، نرخی یەک ئەمپێر بەپێی کارکردنی کاتژمێرەکانیان، لەنێوان 14 هەزار و 500 بۆ 22 هەزار و 500 دینارە.
بەڕێوەبەرایەتی گشتیی کارەبای سلێمانی رایگەیاند، نرخی هەرکاتژمێرێکی کارکردنی کارەبای موەلیدە بە 44 دینار دیاریکراوە و بەوەش لەناو شاری سلێمانی بۆ مانگی رابردوو نرخی یەک ئەمپێر لەنێوان 14 بۆ 15 هەزار دیناردایە.
لیژنەی ئەنجومەنی موەلیدە ئەهلییەکانی هەولێریش رایگەیاندووە، کارەبای موەلیدە لە هەولێر لە گەڕەکەکاندا بەشێوەی جیاواز کاردەکات، بەپێی جیاوازی کاتژمێرەکانی کارکردنیان نرخەکەی لەنێوان 14 هەزار و 500 بۆ 22 هەزار و 500 دیناردایە.
لە دهۆکیش هێشتا بە فەرمی نرخی موەلیدە دیاری نەکراوە، بەڵام پێشبینی دەکرێت نرخی یەک ئەمپێر لەنێوان 19 بۆ 20 هەزار دیناردا بێت.
لە هەرێم موەلیدە ئەهلییەکان هاوشانی کارەبای نیشتمانی، کارەبا بۆ ماڵان دابین دەکەن، لە وەرزە سارد و گەرمەکانیشدا کە کارەبای نیشتمانی کەمدەبێتەوە و زۆرکات تەنها 4 سەعات لە رۆژێکدا دەدرێتە هاووڵاتیان، موەلیدە ئەهلییەکان تەواوکەری پێدانی کارەبا دەبن، بەوەش لەو مانگانەدا نرخەکەی بەشێوەیەکی بەرچاو زیاد دەکات بەراورد بە مانگەکانی دیکە.
ئیسرائیل پێشنیازەكەی نێردەی ئەمریكای سەبارەت بە ئاگربەستێكی كاتیی بۆ مانگ و جەژنی رەمەزان لە غەززە پەسەند كرد، بزوتنەوەی حەماسیش رەتیدەكاتەوە .
مەحمود مەرداوی سەركردە لە بزوتنەوەی حەماس رایگەیاند ، بزوتنەوەكە پێشنیاری ئاگربەستی كاتیی بۆ مانگ و جەژنی رەمەزان لە غەززە رەتدەكاتەوە و داوا دەكات قۆناغی دووەمی رێككەوتنی ئاگربەست جێبەجێ بكرێت.
راشیگەیاندوە ، تەنها رێگە بۆ سەقامگیری ناوچەكە و گەرانەوەی بارمتەكان ، جێبەجێكردنی سەرجەم قۆناغەكانی رێككەوتنی ئاگربەستە و قۆناغی دوەمیش گرەنتی ئاگربەستی هەمیشەیی و كشانەوەی ئیسرائیل و ئاوەدانكردنەوەی غەززە و رزگاركردنی بارمتەكان دەكات ، هەربۆیە سورن لەسەر جێبەجێكردنی .
ئەوە لەكاتێكدایە كە نوسینگەی بنیامین ناتانیاهۆ سەرۆك وەزیرانی ئیسرائیل رایگەیاندوە ، تەلئەبیب پێشنیازەكەی ستیڤز ویتكۆڤ نێردەی ئەمریكای بۆ راگەیاندنی ئاگربەستی كاتیی لە مانگ و جەژنی رەمەزان لە غەززە پەسەند كردوە .