بەهۆی ئەو شەپۆلە بارانبارینە بەخوڕەی هەرێمی کوردستانی گرتوەتەوە، تا ئێستا جگە لە زیانی زۆری مادیی، لە هەولێر دوو کەس گیانیان لەدەستداوە.

رامان مستەفا، پەیامنێری کوردسات نیوز رایگەیاند، تەرمی ئەو منداڵەی لە گەڕەکی هەولێری نوێ بێسەروشوێن بوبوو، دۆزرایەوە

بە گویڕەی زانیارییەکان منداڵەکە تەمەنی پێنج ساڵە و ناوی مستەفا سەرکەوتە و لەگەڵ باوکی دابووە لە ناو ئۆتۆمبێلدا و ئاو بردویەتی. 

هاوکات ئاماژەی بەوەش کرد کە تەرمی هاووڵاتییەکی تەمەن 28 ساڵیش دۆزراوەتەوە کە لە لافاوەکەی هەولێر و لە هیوا ستی بێسەروشوێن بوبوو. 

ئەم هاووڵاتییە شۆفێری شۆفڵ بووە و لە کاتی هەوڵدان بۆ رزگارکردن و کەسێک لە خنکان، گیانی لەدەست داوە؛ لە لێدوانێکدا بۆ کوردسات نیوز باوکی ناوبراو ئەوەی خستەڕوو، کە کوريکەی  خاوەنی دوو منداڵە  و تەمەنی 28 ساڵە.

ئێران واشنتۆن بە شكستخواردوو دەزانێت لە جەنگ و هەڵبژاردندا و دەڵێت تاران نازانێت پەیامەكانی ئاڕاستەی كێ بكات لە ئەمریكا.

موحسین رەزایی سكرتێری ئەنجومەنی باڵای ئاسایشی نیشتمانیی ئێران لە پەیامێكدا لەسەر تۆڕی كۆمەڵایەتی ئێكس رایگەیاند، واشنتۆن هەم لە جەنگ و هەم لە هەڵبژاردنیشدا شكستی هێناوە و دەیەوێت بە هەواڵ و لێدوانی ناڕاست و چەواشەكارەكانە وا نیشانی جیهانی بدات كە سەركەوتوو بوون.
وتیشی، جەی دی ڤانس جێگری دۆناڵد ترەمپ سەرۆكی ئەمریكا شكستەكەی قبووڵ كردووە، ماركۆ روبیۆ وەزیری دەرەوەش، دەیەوێت خۆی لە رەوشەكە بدزێتەوە و بەرەو دەرچوون هەنگاو دەنێت، هەروەها پیت هێگسێت، وەزیری جەنگی وڵاتەكە، نزیكە لەوەی لە كارەكەی دەربكرێت، فەرماندەی سێنتكۆمیش پێگەی خۆی لەدەستداوە و كاری بووەتە پێشكەشكردنی پۆدكاست.
جەختیشیكردەوە، ئەمریكا لە رەوشێكی باشدا نییە و ئێران نازانێت ئەگەر پەیامێكی هەبێت ئاڕاستەی كێی بكات.
سكرتێری ئەنجومەنی باڵای ئاسایشی نیشتمانیی ئێران هۆشداریشیدا، ئەگەر ئەمریكا جەنگ دەست پێ بكاتەوە، رووبەڕووی وەڵامێكی وێرانكەر دەبێتەوە.

کەشناسیی هەرێم رایدەگەیەنێت، شەپۆلی بارانبارین لە سلێمانی و هەڵەبجە و گەرمیان زیاد دەبێت، بەڵام لە هەولێر و دهۆک و ئیدارەی زاخۆ بارانبارین بە شێوەی پچڕپچڕ دەبێت.

بەڕێوەبەرایەتی گشتیی کەشناسیی و بوومەلەرزەزانیی هەرێم لە راگەیەنراوێکدا بڵاویکردەوە، کاریگەریی ئەو شەپۆلە بارانبارینەی رووی لە ناوچەکە کردووە بەردەوامی دەبێت.

ئاماژەی بەوەشكردووە، ئەمشەو کاریگەریی شەپۆلەکە لە پارێزگاکانی هەولێر و دهۆک و ئیدارەی سەربەخۆی زاخۆ بەرەو لاوازی دەچێت و بارانی کەم و پچڕپچڕ دەبارێت.

کەشناسیی هەرێم راشیگەیاندووە، لە سنووری پارێزگاکانی سلێمانی و هەڵەبجە و ئیدارەی سەربەخۆی گەرمیان، تاکو بەرەبەیان رێژەی دابارین روو لە زیادبوون دەکات و هەورەبروسکە و لێزمە باران بەردەوام بێت.