كای كۆن و شەڕی كۆنەقین

 

‎ئەم عیراقە تاكە دەوڵەتە لەم سەرزەمینەو لە مێژووشدا، بە رەسمی لە جەنگدا نەبێت و هەردوولایەنی جەنگەكەش شەق و لەقە و جوتەی لێبوەشێنن، درۆن و موشەكی ئێران وەك تەرزەو باران بەسەرماندا دەبارێت، بۆردومانی فرۆكە و موشەكی ئەمریكا و ئیسرائیلیش هەموو ئاسمانی وڵاتەكەی تەنیوە.. لەهەمووی سەیرتر ئەوەیە كە ئەم وڵاتە نەچوەتە ناو هاوكێشەی جەنگەكەو نەبوەتە لایەنێكی شەڕكەر و لەسەر زاری سەرۆكی حكومەت و سەرۆك كۆمارەوە بێلایەنی خۆیی پاراستوە..

 

لە ئیدیۆمی كوردیدا دەوترێت:

(كای كۆن بە با كردن) یان (شەڕ بە كۆنەقین دەكرێت) ئێستا ناوچەی جوگرافیای شەڕ بە رەسمی خاكی ئێران و خاكی ئیسرائیلە، پریشكی شەڕ لەلایەن ئێرانەوە بەری ئیسرائیل و عیراق و چەند دەوڵەتێكی كەنداو و توركیا و ئازەربایجان كەوتوە، ئێرانیش لەلایەن ئەمریكا و ئیسرائیلەوە موشەك باران و بۆردومان دەكرێت، چەردەیەك لەم موشەك و بۆمبانەی ئەمریكاو ئیسرائیلیش دەنرێن بە عیراقەوە، بەس بۆچی عیراق؟؟.. جوگرافیاو شوێنی شەڕەكە ئاشكرا و روونە و بەرەكانی شەڕیش ئاشكراترن، شێوازی چەك و تەقەمەنی بەكارهاتووش وەك ریكلامی جەنگ زۆر بە بێ پەردە نیشاندەدرێن و چەندین ناوو ماركە و قەوارەی چەك باسیان لێدەكرێت، لەملاوە حیدر و خرمشهر و فتاح و خیبرشكن وووووو لەولاشەوە B2 و B52 و F35 و لینكۆڵن و دایكی بۆمبەكان و باوكی لێزەر و وووو.

 

ئەمریكا بۆ ئەم ریكلامانە نەهاتوە، بێگومان ئەویش بە كای كۆن و كۆنە قینەوە هاتوە، شۆڕشی موسەدەق و خۆماڵیكردنی نەوتی ئێران لە ساڵی 1951 و كودەتای بەریتانیاو ئەمریكا لە دژی ئەم سەرۆك وەزیرانە ساڵی 1953 بە دەستیCIA و MI6.. كۆنەقینێك بوو، كای كۆنێكی تریش ساڵی 1979 بوو كە باڵوێزخانەی ئەمریكا لە تاران دەستی بەسەردا گیراو 52 دیپلۆماتی ئەمریكا بۆ ماوەی 444 رۆژ لە ئێران دەستبەسەر كران، شكستێكی دیپلۆماتی و سەربازی گەورەبوون بۆ ئەمریكا، چونكە بە پرۆسە ی سەربازی نەیتوانی رزگاریان بكات و دیبلۆماسیەتیش لەو شكست تربوو..

 

منیش و ئێوەش لە مەبەست و ئارەزوو دەستكەوتەكانی جەنگەكە تێدەگەین، بەڵام تێناگەم عیراق بۆچی بوو بە جوگرافیای شەڕ؟ خۆ نزیكەی 10 دەوڵەتی تر دراوسێی كۆماری ئیسلامین بۆچی ئەوان وەك عیراقیان بەسەرنەهاتوە؟

 

پرسیارێكی سەیرە!! وەڵامێكی سەیرتری دەوێت ئەویش ئەوەیە لای هەردوو بەرەی جەنگەكە عیراق هەر ئەو وڵاتەیە كە جەنگی كەنداوی یەكەم بە 8 ساڵ لەگەڵ ئێران و جەنگی كەنداوی دووەم ساڵی 1991 بە داگیركردنى كوەیت و جەنگی كەنداوی سێهەم 2003 بە لەناوبردنی دەسەڵاتی بەعسیەكان كۆتایی هات، بەم سێ جەنگە هەرچی داتاو ئامارو نەخشەو پلانی عیراق هەبوەو هەن، لەبەر دەستی شەڕكەرەكان بە تۆماری ماونەتەوە و پیاكێشانی لەقەو جوتەیەك بۆ ناوشانی ئەم وڵاتە كە تاكە وڵاتێكە سەروەری خاك و ئاسمان و دەریای پارێزراو نیە، لەكاتی شەڕ و ئاشتیدا بۆ هەر لایەك هەیە كە موشەك و درۆن و تۆپە دوورهاوێژەكانیان بگرنە دەزگا و سەربازگە و كارگە و كۆمپانیاكانی عیراق و بانگەشەی شەڕیش نەكەن، كەواتە كۆنەقین و كای كۆن بە با كردن لەگەڵ عیراق گونجاوە و كەسیش نیە لەسەری بە جواب بێت، ئەگینا بە كام لۆجیك لە دنیادا هەبوە وڵاتێك لە جەنگێكدا نەبێت و لە دوولایەنی جەنگەكەوە لێی بدرێت و هەموو دنیاش وەك تەماشاكەر سەیری بكەن.

ئەمەش لەسێگۆشەی خڕ دەچێت.