ناتانیاهۆ بە زانیاری هەستیارەوە دەچێتە واشنتۆن و زانیاری هەواڵگریی لەبارەی بەرنامە ئەتۆمییەکەی ئێران رادەستی کۆشکی سپی دەکات.

بنیامین ناتانیاهۆ سەرۆک وەزیرانی ئیسرائیل بۆ ئەنجامدانی دیدارێک لەگەڵ دونالد ترەمپ سەرۆکی ئەمریکا بەرەو واشنتۆن بەڕێکەوت، بەپێی زانیارییەکانی راگەیاندنەکانی ئیسرائیلیش، ناتانیاهۆ زانیاریی هەواڵگریی هەستیار لەبارەی بەرنامە ئەتۆمییەکەی ئێرانەوە رادەستی کۆشکی سپی دەکات.

کەناڵی 12ـی ئیسرائیلی لە زاری چەند سەرچاوەیەکەوە بڵاویکردەوە، ناتانیاهۆ لە هەشتەمین دیداری خۆیدا لەگەڵ ترەمپ لە خولی دووەمی سەرۆکایەتیەکەیدا، زانیاریی زۆر نوێ و هەستیاری هەواڵگری لەبارەی پێشچوونەکانی ئێران بەرەو بەدەستهێنانی چەکی ئەتۆمی دەخاتەڕوو، بەبێ ئەوەی وردەکاری زیاتر لەسەر ناوەڕۆکی زانیارییەکان ئاشکرا بکرێت.

هەمان سەرچاوەکان ئاماژەیان بەوەشکردووە، سەرۆک وەزیرانی ئیسرائیل لەم سەردانەیدا دژایەتیی خۆی بۆ داواکارییەکەی ئەمریکا دەردەبرێت کە داوای لێکردوون لە خاکی لوبنان و سوریا بکشێنەوە. لە بەرانبەریشدا، ناتانیاهۆ داوایەک ئاڕاستەی ترەمپ دەکات بۆ راگرتن و فڕۆشتنی فڕۆکەی جەنگیی لە جۆری "F-35" بە تورکیا.

پێش بەڕێکەوتنی بۆ واشنتۆن لە ئەمڕۆ، بنیامین ناتانیاهۆ جەختی کردەوە کە لەگەڵ ترەمپ تاوتوێی تەواوی پرسە هەنووکەیییەکان دەکات و لە سەرووی هەموویانەوە پرسی ئێران دەبێت.

ناتانیاهۆ رایگەیاند: "ئامانجمان پاراستنی ئاسایشمان و فراوانکردنی بازنەی ئاشتییە لە دەوروبەرمان"، هەروەها جەختی لەوەشکردەوە، ئەرکەکەی لە واشنتۆن تەنها یەک ئامانجی روونی هەیە، ئەویش "دەستەبەرکردنی ئاسایش، بەهێزی و داهاتووی ئیسرائیلە".

سەرۆک وەزیرانی ئیسرائیل ئەم کۆبوونەوەیەی لەگەڵ ترەمپ بە "بەرپرسیارێتییەکی قورس" وەسف کرد و ئەوەشی خستەڕوو، لەم ساتەوەختە سەختانەدا دەبێت بە "ئیرادەیەکی بەهێز و داناییەکی زۆرەوە" ئاراستەی روداوەکان بکرێت.

دادگای لێکۆڵینەوەی نەجەف دەستگیرکردنی تۆمەتبارێکی ڕاگەیاند کە بە ناوی نووسینگەی سەرۆکی ئەنجومەنی باڵای دادوەری و لێژنەی دژە گەندەڵییەوە باج و سەرانەی لە بەرپرسانی پارێزگاکە وەرگرتوە.

ئەنجومەنی باڵای دادوەری، ئەمڕۆ دووشەممە، دەستگیرکردنی کەسێکی راگەیاند کە خۆی وەک فەرمانبەری نووسینگەی سەرۆکی ئەنجومەنی باڵای دادوەری و لێژنەی ناوەندیی دژە گەندەڵی ناساندبوو.

لە راگەیەندراوێکی ئەنجومەنەکەدا هاتوو لە: دادگای لێکۆڵینەوەی نەجەف دەستگیرکردنی تۆمەتبارێکی راگەیاند کە بە مەبەستی بڕینەوەی پارە و سەرانەسەندنی دارایی (سەپاندنی باج و هەڕەشە) لە بەڕێوەبەری تۆمارکردنی خانوبەرەی پارێزگای نەجەفی، خۆی وەک فەرمانبەری نووسینگەی سەرۆکی ئەنجومەنی باڵای دادوەری و لێژنەی ناوەندیی دژە گەندەڵی لە سەرۆکایەتی وەزیران ناساندبوو.

راگەیەندراوەکە ئاماژەی بەوەش کردووە: تۆمەتبارەکە بە تەلەفۆن پەیوەندی بە بەڕێوەبەری تۆمارکردنی خانوبەرەوە کردووە و بانگەشەی ئەوەی کردووە کە لە کۆبوونەوەدایە لەگەڵ سەرۆکی ئەنجومەنی باڵای دادوەری بە مەبەستی ئیمزاکردنی بڕیارنامەکان، و ناوی بەڕێوەبەری تۆمارکردنی خانوبەرە لەناو لیستی فەرمانی دەستگیرکردندایە، هەروەها دەتوانێت ئەو رێکارانە لەبەرانبەر بڕێک پارەدا هەڵبوەشێنێتەوە، و روونیشیکردووەتەوە: تۆمەتبارەکە پێشتریش سەرانەی لە بەڕێوەبەری فرۆکەخانەی نەجەفی ئەشرەف و بەڕێوەبەری دابەشکردنی کارەبای پارێزگاکەش سەندبوو.

لە راگەیەندراوەکەدا ئەوەش خراوەتە روو کە: دادگا رێکارە یاساییە پێویستەکانی گرتووەتە بەر و بەڵگەکانی کۆکردووەتەوە و توانیویەتی تۆمەتبارەکە دەستگیر بکات، هەروەها وتەکانی بە شێوەی دادوەری تۆمار کراون بە مەبەستی رەوانەکردنی بۆ دادگای تایبەتمەند تاوەکو بەپێی یاسا دادگایی بکرێت.