وەزارەتی جەنگی ئەمریكا بڕیاری دا رێگەی ئەژماركردن و بڵاوكردنەوەی زیانە گیانییەكانی سوپاكەی لە شەڕی ئێران بگۆڕێت، ئەمەش دوای ئەوەی رووبەرووی رەخنەی توند بووەوە بەوەی كە ژمارەی كوژراو و بریندارەكان بە كەمتر لە راستییەكەی نیشان دەدەن.

رۆژنامەی نیویۆرك تایمز رایگەیاند كە  وەزارەتی جەنگی ئەمریكا شێوازی ئەژماركردنی زیانەكانی گۆڕیوە و ئامارە نوێیەكان دەریدەخەن كە ژمارەی بریندارەكان گەیشتووەتە 624 سەرباز، دوای ئەوەی ئاگربەست لە 7ی تەمموزدا كۆتایی هات، وەزارەتی بەرگری لاپەڕەیەكی نوێی بۆ بڵاوكردنەوەی زیانەكان بە ناوی زیانەكانی ئۆپەراسیۆنە دەرەكییەكان دروست كردووە تاوەكو ئامارە كۆن و نوێیەكان تێكەڵ نەبن.

لێپرسراوانی سەربازی ئاماژەیان بەوە كرد كە ئەم گۆڕانكارییە بەهۆی تێكچوونی كاتیی داتاكان بووە لە ماڵپەڕی رەسمی وەزارەتدا، بەڵام چاودێران پێیان وایە ئەمە هەوڵێكە بۆ كەمكردنەوەی كاریگەرییە دەروونییەكانی جەنگ. 

وەزارەتی بەرگریی سعودیە تێکشکاندنی چەند فڕۆکەیەکی بێفڕۆکەوانی راگەیاند کە لە خاکی عیراقەوە ئاراستە کرابوون.

وەزارەتەکە لە راگەیەندراوێکدا ئاماژەی بەوە کردووە: ئەو درۆنانە هەوڵیانداوە دامەزراوە نەوتییەکان لە ناوچەکانی رۆژهەڵات و ریاز بکەنە ئامانج، و باسی لەوەش کردووە: هەوڵە تیرۆریستییەکان لە خاکی عیراقەوە دەستیان پێکردووە و لەلایەن میلیشیا تیرۆریستییەکانی سەر بە ئێرانەوە ئەنجام دراون.

جەختیشی کردووەتەوە: مافی سعودیە لە بەرگریکردن لە خۆی و پاراستنی مافی وەڵامدانەوە لە کات و شوێنی گونجاودا.

وەزارەتەکە سەرکۆنەی دەستدرێژییەکان بەو درۆنانەی لەلایەن میلیشیاکانی سەر بە ئێران لە عیراقەوە هەڵدراون کرد و ئاماژەی بە سووربوونی سعودیە دا لەسەر رێگریکردن لە دەستدرێژیکاران، هەروەها جەختی کردەوە: لەسەر پێویستی گرتنەبەری تەواوی رێکارە پێویستەکان لەلایەن حکومەتی عیراقەوە بۆ دەستەبەرکردنی رێگریکردن لە بەکارهێنانی خاکەکەی وەک دەسپێکێک بۆ دەستدرێژی.