ناوەندی فەلەکناسی نێودەوڵەتیی یەکەم رۆژی جەژنی قوربانی دیاری کرد و دەڵێت، رۆژی 6ی مانگی داهاتوو یەکەم رۆژی جەژن دەبێت.

ناوەندی فەلەکناسی نێودەوڵەتی رایگەیاندووە، رۆژی 6ی 6 کە دەکاتە هەینی، یەکەم رۆژی جەژنی قوربان دەبێت، کە لە رۆژی 27ی 5دا، هیلالی مانگ دەبینرێت و رۆژی 28ی مانگ دەست دەکرێت بە رێورەسمەکانی حەج.

بەپێی هەواڵی ناوەندەکە، رۆژی 5ی ئەم مانگە کۆتا رۆژی رێورەسمەکانی حەج و دواتر دەست دەکرێت بە وەستان لەسەر کێوی عەرەفە، بەوەش رۆژی 6ی مانگی داهاتوو یەکەم رۆژی جەژنی قوربان دەبێت.

جەژنی رەمەزان و جەژنی قوربان دوو جەژنی رەسمین لە ئایینی ئیسلامدا و ساڵانە لەو وڵاتانەی زۆرینە موسوڵمانن جەژن دەکرێت و رۆژانی جەژنیش دەکرێتە پشوو.

د.لەتیف رەشید سەرۆک کۆماری عیراق، ئەمڕۆ یەکشەممە25ـی 5ـی 2025، لەکۆشکی بەغداد، پێشوازی لە شو دۆنیۆ بەڕێوەبەری گشتی رێکخراوی خۆراک و کشتوکاڵی نەتەوە یەکگرتووەکان (فاو) و وەفدی یاوەری کرد.

لەمیانی دیدارەکەدا باسیان لەهاریکاری تەکنیکی نێوان عیراق و رێکخراوی (فاو) و چۆنیەتی بەرزکردنەوەی ئاستیان بۆ پشتیوانیکردنی کەرتەکانی کشتوکاڵ وبەرهەمە کشتوکاڵیەکان و باشترکردنی کوالێتی تۆو و پاراستنی بەپیتی خاک و روبەڕوبونەوەی ئاستەنگەکانی پەیوەست بە ئاسایشی خۆراک کرد، جگە لە ئاڵوگۆڕکردنی شارەزایی تەکنیکی و تەکنەلۆژی لە نێوان هەردوولا.

سەرۆک کۆمار جەختی لە گرنگی پابەندبون بەڕاسپاردەکانی نەتەوە یەکگرتووەکان لە بواری بەڕێوەبردنی ئاو و کەمکردنەوەی بەفیڕۆدان و هاوکاری نێوان وڵاتانی دراوسێ کردەوە، بەمەبەستی پاراستنی سەرچاوە ئاوییەکان و کارکردن بۆ پاراستنی ژینگە، بە ئاماژەدان بەوەی کە گۆڕانی کەشوهەوا ئاستەنگێکی گەورەیە بۆ ناوچەکە، بەتایبەت لە عیراق بەهۆی دابەزینی ئاستی ئاوی روبارەکانی دیجلە و فورات و وشکەساڵی و بەبیابانبون و کاریگەرییە گەورەکانیان لەسەر کەرتی کشتوکاڵ.

سەرۆک کۆمار دووپاتی کردەوە لە پێویستی هاوکاری و هەماهەنگی هاوبەش لەگەڵ وڵاتانی دراوسێ بۆ تێپەڕاندنی قەیرانی ئاو و سود وەرگرتن لە یاسا نێودەوڵەتییەکان بۆ رێکخستن و دابەشکردنی ئەم سەرچاوەیە، هاوکات جەختیشی لەوە کردەوە کە عیراق لەئێستادا سەرنجی لەسەر بەدەستهێنانی پشکێکی دادپەروەرانەیە لە ئاو.

لەلای خۆیەوە شو دۆنیۆ، پێزانینی گەورەی خۆی بۆ ئەو پێشکەوتن و گەشەپێدانەی کە لە عیراقدا بەدی دەکرێت، چ لە شارەکان و چ لە روی کشتوکاڵدا دەربڕی، جەختیشی لە پابەندبوونی رێکخراوی (فاو)  کردەوە بۆ بەردەوامبوونی هاوکاریی دوولایەنە لە بوارە جیاوازەکاندا لە چوارچێوەی پسپۆڕی خۆیدا.

لە دیدارەکەدا هەر یەک لە یاریدەدەری بەڕێوەبەری گشتی رێکخراوی (فاو) و نوێنەری هەرێمی بۆ رۆژهەڵاتی نزیک و باکووری ئەفریقا د.عەبدو لحەکیم واعر و نوێنەری (فاو) لە عیراق د.سەلاح حاجی حەسەن، ئامادە بوون.

لێپرسراوێكی ئەمریكی ئاشكرایدەكات، ئیدارەی ترەمپ بەنیازی كەمكردنەوەی سزاكانی سەر ئێرانە بۆ ئەوەی بگەن بە رێككەوتن لەبارەی راگرتنی پیتاندنی یۆرانیۆم. 

رۆژنامەی ئیسرائیل هیوم لە زاری لێپرسراوێكی ئەمریكی كە نەیویستوە ناوی ئاشكرا بكرێت بڵاویكردۆتەوە، لە ئێستادا ئیدارەی ترەمپ رەشنوسی رێككەوتنێكی سەرەتایی داوەتە تاران، كە بەپێی بەندەكانی ئەو رێككەوتنە پێویستە ئێران پیتاندنی یۆرانیۆم رابگرێ، لە بەرامبەریشدا ئەمریكا سزاكانی سەر ئێران كەمدەكاتەوە.

ئەو لێپرسراوەی ئەمریكا ئەوەشی خستوەتەروو، ئەمریكا ئەوەی بە روونی بە ئیران ووتوە كە هیچ كات واز لە مەرجی راگرتنی تەواوەتی پێتاندنی یۆرانیۆم لە لایەن تارانەوە ناهێنێت، ئەوەش كاردانەوەی نەرێنیی لای تاران دروستكردووە.