روسیا و ئۆکراین رۆژی پێنجشەممە دەستیانکرد بە جێبەجێکردنی قۆناغی یەکەمی رێککەوتنێکی گەورەی ئاڵوگۆڕی زیندانییەکان، کە بریتییە لە ئاڵوگۆڕی هەزار کەس لە هەر لایەکەوە.

ڤۆلۆدیمێر زیلنسكی، سەرۆكی ئۆكراین ئەمڕۆ رایگەیاندی کە 390 هاوڵاتی ئۆکراینی ئازادکراون و بە سەلامەتی گەڕاونەتەوە وڵات. لەم ژمارەیەدا 270 کەس کارمەندی سەربازی و 120 کەسیش هاوڵاتی مەدەنین.

ئەم ئاڵوگۆڕە بە یەکێک لە گەورەترین ئاڵوگۆڕەکان دادەنرێت لە دوای دەستپێکردنی هێرشی روسیا بۆ سەر ئۆکراین لە ساڵی 2022ەوە.

بەپێی راگەیەندراوەکان، ئاڵوگۆڕەکە بۆ ماوەی سێ رۆژ بەردەوام دەبێت، لە 23 تا 25ی ئایاری ئەمساڵ.

ئەم رێککەوتنە لە 16ی ئەم مانگە لە شاری ئەستانبوڵ لە نێوان نوێنەرانی هەردوو لایەن ئەنجامدراوە. بڕیارە قۆناغەکانی دیکەی رێککەوتنەکە لە چەند رۆژی داهاتوودا تەواو بکرێن.

ئەم هەنگاوە وەک یەکێک لە گرنگترین پێشکەوتنەکان لە بواری مرۆیی لە نێوان هەردوو وڵاتدا لە ماوەی دوایی دادەنرێت.

سبەینێ بە ئامادە بوونی هەردوو ئاڕاستەی بزوتنەوەی گۆڕان، لە هۆڵی یاریگای  ئاشتی كۆنفڕانسی بزوتنەوەكە دەبەسترێت.

بە پێی زانیاریەكانی كوردسات نیوز ئامادەكارییەكان لە هەردوو ئاراستەكەوە كۆتای هاتووە و هەردوولا دەستورێكیان ئامادەكردووە بۆ ئەوەی دەنگی لەسەر بدرێت داهاتووی بزوتنەوەكە یەكلایی بكاتەوە.

بەگوێرەى راگەیەندراوێکى کۆمیسیۆنى باڵاى سەربەخۆى هەڵبژاردنەکانى عیراقیش؛ خۆیان سەرپەرشتیى کۆنفرانسەکەى بزووتنەوەى گۆڕان دەکەن و لە کۆنفرانسەکەدا پشت بە ژمارەى دامەزرێنەران نابەستن و بەگوێرەى زۆرینەى ئامادەبووانى کۆنگرە بڕیار دەدەن.

کۆمیسیۆنى باڵاى سەربەخۆى هەڵبژاردنەکان رۆژى 26ـی نیسانى بۆ ئەنجامدانى سێیەمین کۆنفرانسى بزووتنەوەى گۆڕان دیاریکرد کە لە هۆڵى ئاشتى شارى سلێمانى بەڕێوەچوو، بەڵام بەهۆى ئامادەنەبوونى زۆرینەى دامەزرێنەرانى حیزبەکەوە کۆنفرانسەکە رێژەى یاسایى تەواونەکرد و بەکراوەیى بەجێهێڵدرا.

ئاسایشی هەرێم لە راگەیەنراوێكدا دەستگیركردنی سێ تیرۆریستی داعشی لە چەند ناوچەیەك ئاشكرا كرد.

بەرێوەبەرایەتی گشتی ئۆپراسیۆنەكانی ئاسایش, بەهەماهەنگی و ئاڵۆگۆڕی زانیاری لەگەڵ دەزگا ئەمنییەكانی عیراق لەسنووری سلێمانی و چەمچەماڵ و شارەزورتوانیان سێ تیرۆریستی داعش دەستگیربكەن.

ئاسایش ئاماژەی بەوەداوە لە  ماوەی 6 تا 21ـی ئەم مانگە لەسەر بنەمای زانیاری هەواڵگری و بەبڕیاری دادوەری لێكۆڵینەوە، دوای بەدواداچوون و كۆكردنەوەی زانیاری وورد لە چەند هەڵمەتێكدا ئەو تیرۆریستانەیان دەستگیر كردوە. 

بە پێی راگەیەنراوەكەی ئاسایشی هەرێم ئەو سێ تیرۆریستەی داعش كە لە دەورووبەری سلێمانی و چەمچەماڵ و شارەزوور, دەستگیركراون لەلایەن دادگاكانەوە داواكراو بوون، لەرابردوودا ئەندامی چالاكی گرووپی تیرۆریستی داعش بوون بە ماددەی چواری یاسای تیرۆر روبەڕوی یاسا دەكرێنەوە.