نووسینگەی راگەیاندنی قوباد تاڵەبانی بڵاویکردەوە، قوباد تاڵەبانی پێشوازی لە فەرامەرز ئەسەدی، کونسوڵی گشتیی ئێران لە هەولێر کرد و پێکەوە تاوتوێی پەیوەندییەکانی نێوان ئێران و هەرێمی کوردستان و چەند پرسێکی دیکەیان کرد.

لە بڵاوکراوەکەدا ئاماژە بەوەش کراوە: لە کۆبوونەوەکەدا کە رۆژی سێشەممە 18ـی 11ـی 2027 بەڕێوەچوو، باس لە چۆنییەتی دەربازبوون لە رەوشی سیاسیی چەقبەستووی هەرێم کرا.

ئەوەش روونکراوەتەوە، ئاڵوگۆڕی بیروڕاش لەبارەی دواین پێشهاتە سیاسییەکانی عیراق کرا و تیایدا قوباد تاڵەبانی جەختی کردەوە لەسەر پێویستیی پشتیوانیکردنی حکومەتی عیراق بۆ پاراستنی ئاسایش و سەقامگیری وڵات.