وەزارەتی تەندروستیی هەرێمی حکومەتی کاربەڕێکەر رایگەیاند، لە پێناو پاراستنی سەلامەتیی هاووڵاتییان و تەندروستیی گشتی، بەڕێوەبەرایەتیی کۆنترۆڵی جۆریی دەرمان (KMCA) بڕیاریدا بە قەدەگەکردنی سێ بەرهەمی تەواوکەری خۆراکی، کە شیوای خواردن نین.

تەندروستیی هەرێم لە راگەیەندراویكدا رایگەیاندوە، بڕیاریانداوە  بە کشاندنەوەی سێ بەرهەمی تەواوکەری خۆراکی لە بازاڕی دەرمانی هەرێمی کوردستان، کە بریتین لە؛ قاوەی رۆما (ROMA Coffee)، قاوەی میلانۆ (Milano Coffee) و چای جینسینگ (Ginseng tea).

ئاماژە بەوەشکراوە، ئەم بڕیارەی بەڕێوەبەرایەتییەکە دوای ئەوە هات کە لە ئەنجامی شیکارییە تاقیگەییەکاندا دەرکەوت ئەو بەرهەمانەی بۆ دابەزاندنی کێش ریکلامیان بۆ دەکرێت، بڕێکی زۆر لە ماددەی قەدەغەکراو و مەترسیداریـیان تێدایە، بەبێ ئەوەی کارگەی دروستکەر و کۆمپانیای هاوردەکار لە بەڵگەنامە رەسمییەکاندا ئاماژەیان بە بوونی ئەو ماددەیە کردبێت. 

بە گوێرەی راگەیەندراوەکەی تەندروستی، ئەو  خۆراکانە، ماددەی سیبوتڕامینیان تێدایە، کە بەهۆی دروستکردنی مەترسیی راستەوخۆ لەسەر دڵ و کۆئەندامی سوڕی خوێن، لە ساڵی 2010ـەوە لە بازاڕی دەرمانی سەرجەم وڵاتانی جیهان قەدەغە کراوە و کشێنراوەتەوە.

لە راگەیەندراوەکەدا وەزارەتی تەندروستی داوا لە هاووڵاتییان دەکات دەستبەجێ کڕین و بەکارهێنانی ئەو سێ بەرهەمە رابگرن، هۆشداریش دەداتە سەرجەم دەرمانخانە و کۆگاکانی دەرمان کە بە زوترین کات مامەڵەکردن و فرۆشتنیان بوەستێنن، بەپێچەوانەوە روبەڕووی رێکاری توندی یاسایی دەکرێنەوە.

دادگای فیدراڵی عیراق، دەركردنی فەرمانسالاریی بۆ وەستانی كارەكانی پەرلەمانی كوردستان رەتكردەوە، بەڵام سكاڵاکە بۆ هەڵوەشاندنەوەی دانیشتنی دووەمی خولی شەشەمی پەرلەمان وەك خۆی ماوەتەوە.

دوای ئەوەی ئەمڕۆ دادگای باڵای فیدراڵیی عیراق، داواكاریی دەركردنی فەرمانسالاریی (ئەمری وەلائی) جووڵانەوەی نەوەی نوێی رەتكردەوە، پارێزەر دابان ئەحمەد جەبار روونكردنەوەیەكی یاسایی بڵاوكردەوە و جەختی كردەوە، ئەو بڕیارە بە مانای هەڵوەشاندنەوەی كۆی سكاڵاكە نایەت.

ئەو پارێزەرە ئاماژەی بەوەكردووە، رەتكردنەوەی فەرمانسالارییەكە تەنها رەتكردنەوەی داواكارییەكە بووە بۆ راگرتنی كاتیی كارەكانی پەرلەمانی كوردستان، نەك هەڵوەشاندنەوەی بنەڕەتی سكاڵاكەی نەوەی نوێ كە تایبەتە بە هەڵوەشاندنەوەی دانیشتنی رۆژی 4ـی تشرینی دووەمی 2026ـی پەرلەمانی كوردستان.

ئەو پارێزەرە روونیشی كردووەتەوە، بنەڕەتی سكاڵاكە تاوەكو ئێستا لە دادگای فیدراڵی یەكلانەبووەتەوە و پرۆسەی دادبینی تێیدا بەردەوام دەبێت، هەروەها جەختی لەوەشكردووەتەوە، بڕیاری رەتكردنەوەی فەرمانسالارییەكە بڕیاری كۆتایی نییە و لە رووی یاساییەوە قابیلی تانەلێدانە لە ڕێگەی پێشكەشكردنی داواكاریی ستەمدارییەوە.