وەزارەتی حەج و ئەوقافی تاڵیبان رێنماییەکی 10 لاپەڕەیی بڵاوکردەوە، کە تێیدا چەندین کردەوەی پەیوەست بە ئاهەنگەکانی هاوسەرگیری و بۆنەکانی تری بە پێچەوانەی شەریعەتی ئیسلامی زانیوە و قەدەغەی کردوون.

 لەم رێنماییەدا داوا لە پێشنوێژ و وتارخوێنەکان کراوە، لە وتارەکانی رۆژی هەینیدا ئەم بابەتانە بە بیری خەڵک بهێننەوە و هۆشدارییان پێبدەن، دورکەونەوە لەو کارانە دژی شيریعەتی ئیسلامن.

بەپێی رێنماییەکان، تاڵیبان پێی وایە ماکیاژکردنی بوک جۆرێکە لە فێڵکردن، هەروەها بەکارهێنانی ئەڵقەی دەزگیرانداری، یارییە ئاگرینەکان، بۆن، پۆشینی جلی تەسک و تەنک بۆ ژنان، مۆسیقا،و سەمای تێکەڵاوی ژن و پیاو لە ئاهەنگەکاندا قەدەغەن.

ئەم هەنگاوە نوێیە بەشێکە لە هەوڵەکانی تاڵیبان بۆ ناچارکردنی هاووڵاتیانی ئەفغانستان، کە ئاهەنگەکانیان بەگوێرەی دەقە ئیسلامییەکان و  لە روانگەی ئەوانەوە، بەڕێوەببەن.