مەڵبەندی دووی رێکخستنی کەرکوکی یەکێتی لە راگەیەندراوێکدا لەبارەی رووداوەکانی دوو رۆژی رابردوو لەسەر رێگەی کەرکوک-ھەولێر دەڵێت، لەگەڵ نزیکبوونەوەی خیانەتی گەورەی ٣١ی ئاب و تای ھەڵبژاردنی ئەنجومەنی پارێزگاکان، پارتی بۆ پەردەپۆشکردنی ئەو خیانەتە گەورەی دەرحەق بە کۆمەڵانی خەڵکی کوردستان کردی، چەند رۆژێکە لە کەرکوک، بەبیانووی وەرگرتنەوەی بارەگاکەیان، جەنجاڵیەکی زۆریان بۆ کار و کەسابەتی ھاووڵاتیانی کەرکوک دروستکردووە.

دەشڵێت، ئەو لایەنانەی ئێستا رێگەی سەرەکیی کەرکوک - ھەولێر داخستووە، دۆستەکانی پارتین، ھەندێکیان لە ھەولێر دانیشتوون و ھەندێکیشیان لە بەغداد ھاوپەیمانی پرۆسەی سیاسیی ئەون .

باس لەوەشدەکات، پارتی لە عێراق جێگری سەرۆک وەزیران و وەزیری دەرەوەی ھەیە، ھەروەھا جێگری سەرۆکی ئەنجومەنی  نوێنەران و بەرپرسیارێتی لیژنە پەرلەمانییەکانی ھەیە، بەڵام لەم دۆسێیە، خۆیان حەشارداوە و بێدەنگییان ھەڵبژاردووە، کە ھیچ پێویستی بە ھاندانی نەتەوەیی و گرژی نێوان پێکھاتەکان نییە.

مەڵبەندی کەرکوکی یەکێتی، ئاماژە بەوەشدەکات، پارتی تا دوێنێ بانگەوازی ئەوەی دەکرد بە شکۆ و بەئاڵای کوردستانەوە دەگەڕێتەوە، کەچی ئێستا ناتوانن بەرگریی لە بیناکەی خۆشیان بکەن، بۆیە داوا لە حکومەتی لۆکاڵی کەرکوک و ھێزەکانی سوپا و داوا لە پارتیش  دەکەن ئەم بابەتە  بە یاسا و دەستور نەک بە جەمسەرگیریی گرژی  چارەسەر بکەن تاکو چیتر ھاووڵاتیانمان نەبنە قوربانی موزایەدە پێشوەختەکانی  پارتی بۆ ھەڵبژاردن.