ئێستا حکومەتی ھەرێم بەھۆی نەھاتنی پارە لە بەغدادەوە، مووچەی مانگەکانی تەممووز و ئابی دابەشنەکردووە، کە بەپێی زانیارییەکانی کوردسات نیوز، حکومەتی عێراق ئامادەیە مانگانە وەک قەرز ٥٩٨ ملیار دینار بۆ ھەرێمی کوردستان بنێرێت، تاکو ئەوکاتەی کێشەکانی نێوان بەغداد و ھەولێر چارەسەردەبن، بەڵام حکومەتی ھەرێم بەو بڕە پارەیە رازی نییە.

لەو بارەیەوە سەرچاوەیەک لە وەزارەتی دارایی و ئابووریی ھەرێم بە کوردسات نیوزی راگەیاند، تا بەشە بودجەی ھەرێم بە تەواوی نەیەت، ئامادەنین ئەو بڕە پارەیە وەکو قەرز وەربگرن، چونکە ٥٩٨ ملیار دینار بەشی مووچە ناکات.

بەپێی زانیارییەکان، دیوانی چاودێری دارایی عێراق، راپۆرتێکی لەبارەی خەرجی و داھاتەکانی ھەرێمی کوردستان ئامادەکردووە و ئاڕاستەی وەزارەتی دارایی عێراقی کردووە، وەزارەتی داراییش دوای بەراوردکاری و لێدەرکردنی خەرجی و داھاتەکانی ھەرێم، راپۆرتەکە بۆ محەمەد شیاع سودانی سەرۆک وەزیرانی عێراق بەرزدەکاتەوە.