عرفان مورتەزایی کوڕە پوری ژینا ئەمینی بە کەناڵی ئەی تیڤی بەریتانی راگەیاندووە، خانەوادەی ژینا داوا دەکەن دادگایەکی نێودەوڵەتی لێکۆڵینەوە لە دۆسیەی کوشتنی کچەکەیان بکات و لێپرسراوانی ئێران روبەڕوی بەرپرسیارێتی بکەنەوە.

ئاماژەی بەوەشکردووە، دەزگا ئەمنییەکانی ئێران ھەڕەشەیان لە خانەوادەی ژینا ئەمینی کردووە و پێیانڕاگەیاندون، ئەگەر لێدوان بۆ میدیاکان بدەن، کوڕە تاقانەکەیان دەستگیر دەکرێت.

دوای گیانلەدەستدانی گوماناوی ژینا ئەمینی، عرفان مورتەزایی زانیاری لەبارەی روداوەکە و فشارەکان بۆ سەر خانەوادەکەی بڵاوکردەوە و بەوھۆیەشەوە فشاری دەزگا ئەمنییەکانی ئێرانی لەسەربوو، بۆیە ناچاربوو وڵاتەکەی جێبھێڵێت و لەئێستاشدا داوای وەرگرتنی مافی پەنابەرێتی لە ئەڵمانیا دەکات.