دەقی پەیامەکەی سەرۆکی ھەرێمی کوردستان ….

ڕۆژی جیھانیی ئافرەتان بە گەرمی لە تەواوی ژنانی کوردستان، عێراق و جیھان ‏پیرۆز ‏دەکەم، ‏ھیوای سەرکەوتنی زیاتر، کۆڵنەدان و بەردەوامییان بۆ دەخوازم.‏
ئافرەتان ساڵانێکی زۆرە خۆیان ڕێکخستووە و لە ھەموو بوارەکاندا خەبات دەکەن ‏بۆ ‏‏دابینکردنی مافە ڕەواکانیان و بنبڕکردنی چەوساندنەوە و توندوتیژی و ‏بەرەنگاربوونەوەی ‏‏نایەکسانی. وەک چۆن پێشتر لە بواری چاکسازیی یاسایی، ‏سیاسەتی کۆمەڵایەتی، سەربەخۆییی دارایی و ‏‏پەروەردەدا پشتگیریمان لە ژنان کردووە، بەردەوام دەبین ‏و ھەمیشە ‏‏پشتگیری لە خەباتیان دەکەین بۆ مسۆگەرکردنی ‏تەواوی مافەکانیان.‏
ھیچ کۆمەڵگەیەک بەبێ ئازادیی ئافرەت، ئازاد نییە و پێشناکەوێت. کار دەکەین بۆ ‏ئەوەی لە ‏‏ھەرێمی کوردستان بواری زیاتر بە بەشداریی ژنان لە ژیانی سیاسی و ‏بەڕێوەبردن و ھەموو ‏‏بوارەکانی دیکەدا بدرێت، توندوتیژی دژی ژنان و پێشێلکردنی ‏مافەکانیان کە مایەی نیگەرانییە، ‏کۆتایی بێت. ‏

لەم ڕوانگەیەوە ھەرێمی کوردستان پێویستی بە کار و سیاسەت و ‏ستراتیژیی نوێ، ‏بە ‏بەشداریی ھەمووان ھەیە. پەروەردە و فێرکردن و برەودان بە ‏توێژینەوەی ‏ئەکادیمی و کاری ‏زانستی، ھۆشیاری و گفتوگۆی ھەمەلایەنە، باشترین ڕیگەن بۆ گەیشتن ‏‏بەم ئامانجە.‏

ستایش و دەستخۆشی بۆ ئەو خانمانەی متمانەیان بە خۆ بووە، لە کایە و بوارە جیاکانی ژیاندا چوونەتە پێشەوە و خۆیان سەلماندووە، لە ڕاپەراندنی ئەرک و کارەکانیاندا سەرکەوتوون و بوونەتە پێشەنگ. ھەروەھا ئافرەتانی کوردستان، دەبێ ھاوشانی ژنانی جیھان، ئامادەیی و بەشداریی زیاتریان ھەبێت لە پرسەکانی ئافرەتان و پرسەکانی دیکەی ژیاندا.

لەم یادەدا کار و خەباتی ئافرەتانی کوردستان لە ڕێکخراوە حکوومی و ‏ناحکوومییەکان، لە ‏‏فەرمانگە و دامەزراوەکاندا بە بەرزی ھەڵدەسەنگێنین. بە ڕێز و ‏پێزانینەوە لە ئەرک و ڕەنج ‏و ‏ماندووبوونی ھەموو ئەو خانمە کۆڵنەدارنە دەڕوانین کە ‏لە ھەر بوارێکی کەرتی گشتی و ‏تایبەتدا کار ‏دەکەن و بەشدارییەکی کارا لە ‏بەڕێوەبردن و بنیاتانی کۆمەڵگە و وڵاتدا دەکەن.‏
سڵاو لە گیانی پاکی ھەموو ئەو خانمانەی لەپێناو یەکسانی و بەدیھێنانی مافەکانی ‏ژناندا ‏‏گیانیان بەخشی و ھەموو ئەوانەی بوونەتە قوربانیی توندتیژی. گیانیان شاد و ‏یادیان ‏ھەمیشە ‏بە خێر.‏
شکۆدار بێت یادی ھەشتی مارس، ڕۆژی جیھانیی ئافرەتان.‏