ئەمڕۆ دەستبە دابەشکردنی موچەی مانگی 10ـی فەرمانبەرانی هەرێم دەکرێت، ئەمەش دوای ئەوەی رۆژی چوارشەممە ناردنی  834 ملیار و 920 ملیۆن دینار لەلایەن بەغداوە راگەیەندرا.

وەزارەتی دارایی هەرێم  رۆژی چوارشەممە رایگەیاند بوو،  بەهۆی رێکارە تەکنیکییەکانی سیستەمی ACH و پشووی کۆتایی هەفتەی بانکەکانەوە دابەشکردنی موچە دوا دەکەوێت.

بە گوێرەی ئەو خشتەیەی وەزارەتەکە بڵاویکردوەتەوە، ئەمڕۆ دەستبەدابەشکردنی دەکرێت و بەپێی خشتەکە، خانەنشینی شارستانی و پێشمەرگە لە یەکەم رۆژدا مووچە وەردەگرن،  بەدوایشیاندا کەسوکاری شەهیدان، زیندانیانی سیاسی، بەرکەوتووانی چەکی کیمیایی، وەزارەتەکانی پەروەردە و خوێندنی باڵا موچەکانیان وەردەگرن.

بڕیارە موچەی مانگی(10) تشرینی یەکەم  بە چوار رۆژ دابەش بکرێت و رۆژی چوارشەممە کۆتایی بە دابەشکردنەکە دێت.

جێی باسە ئەم مانگە تەواوی موچەخۆران موجيکانیان بە ئەلیکترۆنی و لە رێگەی پڕۆژەی "هەژماری من"ـوەیە، بە گوێرەی ئەو داتایانەی پرۆژەی "هەژماریی من" بڵاویکردوەتەوە لە تەواوی هەرێمی کوردستان زیاتر لە ملیۆنێک و 30 هەزار فەرمانبەر و موچەخۆر خۆیان لە پرۆژەکەدا تۆمار کردوە.