ئەندامێکی ئەنجومەنی نوێنەرانی عیراق باس لە پڕۆژەیاسای بودجەی ساڵی 2027ـی عیراق دەکات و دەشڵێت: مژدە بۆ موچەخۆرانی هەرێم، موچەکانیان زامن کراوە.

دیلان غەفور، ئەندامی لیژنەی دارایی ئەنجومەنی نوێنەرانی عیراق بە کوردسات نیوزی راگەیاند: دوێنێ لەگەڵ فالح ساری، وەزیری دارایی عیراق کۆبوومەوە، باسمان لە چەند تەوەرێکی یاسای بودجەی 2027ـی عیراق کرد وەک نرخی دۆلار و نرخی بەرمیلی نەوت، هەروەها باسمان لە بەشەبودجەی هەرێمی کوردستان کرد.

بەهای دۆلار و نرخی نەوت

سەبارەت بە بەهای دۆلار و نرخی نەوت، دیلان غەفور ئەوەی خستەڕوو: بەهای 100 دۆلار بە 150 هەزار دینار لە پڕۆژەیاسای بودجەی ساڵی 2027 جێگیرکراوە، هەروەها بۆ بەرمیلێک نەوت 58 دۆلار پێشنیاز کراوە.

موچەی موچەخۆرانی هەرێم

دیلان غەفور ئاماژەی بەوەشدا: مژدە دەدەم بە موچەخۆرانی هەرێم کە موچەکانیان جێگیرکراوە، پێویستمان بەوەیە کە وەفدی هەرێم لە بەغداد بن و ئەو بڕگانەی کە نەگەیشتوونەتە رێککەوتن، تێبپەڕێندرێت.

بەهەمیشەییکردنی گرێبەستەکان

سەبارەت بە بەهەمیشەییکردنی گرێبەستەکان، ئەندامەکەی ئەنجومەنی نوێنەران رایگەیاند: لە عیراق 100 هەزار گرێبەست دەکرێنە هەمیشەیی، 50 هەزاریان سەربازین و 50 هەزاریان مەدەنین، ئەم بابەتە لەگەڵ هەرێمی کوردستان جیایە.

"هەرێمی کوردستان داوایکردووە لە پڕۆژەیاسای بودجەی 2027 گرێبەستەکانی هەرێمیش بکرێنە هەمیشەیی، بەڵام ئەم بڕگەیان تا ئێستا گفتوگۆی لەبارەوە دەکرێت و جێگیر نەکراوە"، دیلان غەفور وادەلێت.

ئاژانسی نێودەوڵەتیی وزە رایگەیاند، کە بەهۆی بڕیاری ئازادکردنی 100 ملیۆن بەرمیل نەوت لە یەدەگی ستراتیجی، نرخەکانی نەوت لە بازاڕەکانی جیهاندا ڕوویان لە دابەزین کردووە.

لە کۆنگرەیەکی رۆژنامەوانیدا، فاتح بیرۆڵ، بەڕێوەبەری جێبەجێکاری ئاژانسی نێودەوڵەتیی وزە (IEA)، ئاشکرای کرد کە ئازادکردنی ئەو بڕە گەورەیەی نەوت شوێنپەنجەی خۆی جێهێشتووە و راستەوخۆ بووەتە هۆی دەستپێکردنی ئاڕاستەی دابەزینی نرخەکان.

هاوکات دۆناڵد ترەمپ، سەرۆکی ویلایەتە یەکگرتووەکانی ئەمریکا دووپاتی کردەوە کە وڵاتانی ئەوروپا رەزامەندییان دەربڕیوە لەسەر ئازادکردنی بڕێکی بەرچاو لە سووتەمەنی و گازۆیل لە یەدەگی ستراتیجی وڵاتەکانیان، جەختیشیکردەوە؛  بڕیارەکەی ئەوروپا دەستبەجێ دەچێتە بواری جێبەجێکردنەوە.

ئەم رێکارە هەوبەشەی ئەمریکا و وڵاتانی ئەوروپا بۆ ئازادکردنی سوتەمەنی لە یەدەگە ستراتیجییەکان وەک کارتێکی گوشار و بژاردەیەکی سەرەکی بەکاردێت بۆ راگرتنی هاوسەنگی بازاڕ و رێگریگرتن لە بەرزبوونەوەی زۆرتری بەردەوامی نرخەکان.