بەپێی پێشبینییەکانی کەشناسیی هەرێم، شەپۆلێکی بارانبارین زۆربەی ناوچەکانی هەرێم دەگرێتەوە و پلەکانی گەرما بەڕێژەیەکی بەرچاو دادەبەزن.

بەڕێوەبەرایەتیی گشتیی کەشناسی و بوومەلەرزەزانیی هەرێم رایگەیاند، ئەمڕۆ ئاسمان بە گشتی هەوری باراناوی دەبێت، هاوکات نمەباران و بارانی مامناوەند لە زۆربەی ناوچەکان دەبارێت،لە دوای نیوەرۆوە لە هەندێک شوێنی جیا جیا باران بەشێوەی لێزم باران و هەورە بروسکە دەبێت.

کەشناسی هەرێم ئاماژەی بەوەشکردووە، پێشبینی بەرزبوونەوەی ئاستی ئاو دەکرێت بە تایبەت لە سنوری پارێزگای سلێمانی و سەنتەری پارێزگای هەولێر ودەوربەر 'بەحرکە و خەبات و هیران و شەقڵاوە و کۆیە' و ئیدارەی سەربەخۆی سۆران و بەشێک لە باشوری رۆژهەڵاتی پارێزگای دهۆک 'ئاکرێ ، بەردەرەش ، بجیل ، دینارتە' ، ئیدارەی سەربەخۆی گەرمیان .

هاوکات پلەکانی گەرما نزمتر دەبێتەوە بە چوار بۆ پێنج پلەی سیلیزی بە راوورد بە تۆمارەکانی دوێنێ.

کەشناسی هەرێم ئەوەشی خستەڕوو، سبەینێ ئاسمان هەوری تەواو و نمەباران و بارانی مامناوەند بە شێوەی پچر پچر بەردەوام دەبێت لە زۆربەی ناوچەکاندا تا کاتەکانی ئێوارە پاشان کەشی ناوچەکەمان جێگیر دەبێت و ئاسمان بۆ نیمچە هەور دەگۆرێت.

بەرزترین پلەکانی گەرمای پێشبینیکراو بە پلەی سیلیزی

هەولێر: 18 پلەی سیلیزی

پیرمام: 15 پلەی سیلیزی

سلێمانی: 16 پلەی سیلیزی

هەڵەبجە: 18 پلەی سیلیزی

چەمچەماڵ: 18 پلەی سیلیزی

دهۆک: 16 پلەی سیلیزی

زاخۆ: 16 پلەی سیلیزی

گەرمیان: 20 پلەی سیلیزی

حاجی ئۆمەران: 7 پلەی سیلیزی

لە وەڵامی هێرش و گرژییە سەربازییەکانی ناوچەکەدا، وتەبێژی سوپای پاسدارانی ئێران جەختدەکاتەوە، پڕۆسەی بەرهەمهێنانی موشەک و درۆن بەردەوامە.

حسێن موحیبی، وتەبێژی سوپای پاسداران، ئەمڕۆ لە کۆنفرانسێکی رۆژنامەنووسیدا رایگەیاند: "موشەکەکانمان توانیویانە بە تەواوی بەربەستی سیستمە بەرگرییە ئاسمانییەکانی ئەو شوێنانە تێپەرێنن کە کردوومانەتە ئامانج."

ئاماژەی بەوەشکرد، بەرهەمهێنانی موشەک و درۆن لە ئێران لە گەشەکردندایە و دەبێت جیهان دان بەو هێز و توانایەدا بنێت.

وتەبێژی سوپای پاسداران جەختی لەوەش کردەوە، ئێران لە بەرانبەر سەرجەم هێرش و دەستدرێژییەکاندا خۆڕاگر بووە، ئاشکرایکرد، لە دوو هەفتەی رابردوودا توانیویانە کۆنتڕۆڵی حەوت فڕۆکەی بێفڕۆکەوان بکەن.

حسێن موحیبی هۆشدارییەکی توندیدا و رایگەیاند: "لە ئەگەری هەر دەستدرێژییەکی نوێدا، زەوی لەژێر پێی دوژمناندا دەلەرزێنین." هەروەها ئەوەشی خستەڕوو، ئەوەی ئەمریکا چاوی لە شێوازی درۆنە ئێرانییەکان کردووە، بەڵگەیە لەسەر پێشکەوتن و باڵادەستیی ناوخۆیی پیشەسازییە بەرگرییەکانیان.

لە کۆتایی لێدوانەکەیدا، راشیگەیاند، موشەکە ئێرانییەکان بێتوانایی سیستمەکانی پاتریۆت و تادی ئەمریکیان پیشانداوە، هەروەها هێزی ئاسمانیی سوپای پاسداران توانیویەتی سیستمێکی بەرگری و بەربەستکاریی کاریگەر دژی هێرشکردنە سەر ژێرخانی وڵاتەکە دابمەزرێنێت.

سەرۆکی ئەمریکا دەڵێت، سوپای وڵاتەکەی لە هێرشێکی نوێ و سنورداردا بنکەیەکی بەرگریی ئاسمانیی ئێرانیان لە ناوچەیەکی ستراتیژیی باشوری ئەو وڵاتە تێکشکاندووە.

دۆناڵد ترەمپ، سەرۆکی ئەمریکا رایگەیاند، سوپای وڵاتەکەی دوێنێ هێرشێکی نوێ و سنورداری کردووەتە سەر ئامانجێک لە ناوخۆی ئێران و سیستمێکی بەرگریی ئاسمانی ئەو وڵاتەیان کردووەتە ئامانج.

هێرشەکە لە کاتەکانی بەرەبەیانی رۆژی شەممە ئەنجامدراوە، لە کاتێکدا ترەمپ لە لێدوانێکدا بۆ رۆژنامەنووسان لە ویلایەتی فلۆریدا، هێرشەکەی بە "سنوردار" وەسف کرد.

ترەمپ ئاماژەی بەوەشکرد، "ئێرانییەکان بنکەیەکی بچوکی بەرگریی ئاسمانییان دروستکردبوو، بەڵام لە ماوەی پێنج بۆ 15 خولەکدا بە تەواوەتی تێکمانشکاند."

لە لایەکی ترەوە، میدیاکانی ئێران بڵاویانکردەوە، دەنگی دوو تەقینەوەی بەهێز لە ناوچەی 'سوزا' لە دورگەی قشم لە باشوری ئێران بیستراوە، کە دەڕوانێتە سەر دەریای هورمز، بەپێی زانیارییەکان، ئامانجەکانی سوپای ئەمریکا لە دورگەکانی قشم لەگەڵ ناوچەی بەندەر عەباس لەسەر وشکانی بوون.